Pasiuna sa Manwal sa Magtutudlo alang sa Pagpangandam sa Misyonaryo (Religion 130)

Ang Atong Tumong

AngTumong sa Seminaries and Institutes of Religion namahayag:

“Ang atong katuyoan mao ang pagtabang sa mga batan-on ug mga young adult nga makasabut ug makasalig sa mga pagtulun-an ug Pag-ula ni Jesukristo, mahimong takus alang sa mga panalangin sa templo, ug makaandam sa ilang kaugalingon, sa ilang mga pamilya, ug sa uban alang sa kinabuhing dayon uban sa ilang Amahan sa Langit” (Gospel Teaching and Learning: A Handbook for Teachers and Leaders in Seminaries and Institutes of Religion [2012], 1).

Isip magtutudlo sa institute, makatabang ka nga makab-ot kining tumong samtang epektibo nimong itudlo ang ebanghelyo: “Motudlo kita sa mga estudyante sa mga doktrina ug mga baruganan sa ebanghelyo nga makita diha sa mga kasulatan ug sa mga pulong sa mga propeta. Kini nga mga doktrina ug mga baruganan gitudlo sa paagi nga mogiya ngadto sa pagsabut ug pagkalig-on. Motabang kita sa mga estudyante nga sila makatuman sa ilang tahas [role] diha sa proseso sa pagkat-on ug moandam kanila sa pagtudlo sa ebanghelyo ngadto sa uban” (Gospel Teaching and Learning, x).

Ang Fundamentals of Gospel Teaching and Learning makatabang kanimo ug sa imong mga estudyante nga matuman ang Tumong sa Seminaries and Institutes of Religion samtang dungan kamong magtuon sa mga kasulatan, mga pulong sa mga propeta, ug sa Isangyaw ang Akong Ebanghelyo . Kining mahinungdanong mga butang mao ang mosunod:

Makatudlo ug makakat-on pinaagi sa Espiritu.
Makaugmad og kahimtang sa pagkat-on nga may gugma, pagtahud, ug katuyoan.
Magtuon sa mga kasulatan matag adlaw, ug magbasa sa teksto sa kurso.
Makasabut sa konteksto ug sulod [content] sa mga kasulatan ug sa mga pulong sa mga propeta.
Makaila, makasabut, ug mobati sa kamatuoran ug kaimportante, ug magamit ang mga doktrina ug mga baruganan.
Makapasabut, makapakigbahin, ug makapamatuod sa mga doktrina ug mga baruganan sa ebanghelyo.
Mahimong hanas sa importanting mga tudling sa kasulatan ug Sukaranang mga Doktrina.

“Kon maimplementar sa maalamong paagi ug mahiuyon sa usag usa, [kining mahinungdanong mga butang] makatampo ngadto sa abilidad sa mga estudyante nga makasabut sa mga kasulatan ug sa mga doktrina ug mga baruganan nga nalangkob niini. Makaawhag usab kini sa mga estudyante nga mahimong aktibo sa ilang tahas sa pagkat-on sa ebanghelyo ug makapalambo sa abilidad sa mga estudyante sa pagsunod sa ebanghelyo ug sa pagtudlo niini ngadto sa uban” (Gospel Teaching and Learning, 10). Kining mahinungdanong mga butang kinahanglang makita isip mga resulta imbis mga pamaagi sa pagtudlo (tan-awa sa Gospel Teaching and Learning, 10). Ang mga sugyot sa pagtudlo niini nga manwal nagpresentar og mga paagi sa pagkab-ot niining mga resulta sa inyong pagtudlo.

Ang Katuyoan Niini nga Kurso

Religion 130: Ang Pagpangandam sa Misyonaryo gidesinyo aron sa pagtabang sa pag-andam sa mga estudyante alang sa full-time nga misyonaryo nga pagserbisyo pinaagi sa pag-focus sa mga doktrina, mga baruganan, ug tambag nga makita diha sa mga kasulatan, mga pulong sa mga propeta, ug sa Isangyaw ang Akong Ebanghelyo. Kini nga manwal, ang mga kasulatan, ug ang Isangyaw ang Akong Ebanghelyo mao ang imong nag-unang mga teksto samtang mangandam ka sa pagtudlo niini nga kurso. AngIsangyaw ang Akong Ebanghelyo nagsilbi nga manwal sa estudyante alang niini nga kurso, busa kinahanglan nimong awhagon ang mga estudyante nga magbaton og kopya alang sa ilang kaugalingong pagtuon ug gamiton diha sa klase. Imong mapanalanginan ang kinabuhi sa imong mga estudyante samtang tabangan nimo sila nga mapamilyar niini ug mogamit niini sa ilang pagpangandam nga moserbisyo og misyon.

Giunsa Pag-organisar ang mga Leksyon

Kini nga manwal gidesinyo aron tabangan ang bag-ong natawag nga mga magtutudlo ingon man usab kadtong mga dili pa kaayo sinati. Ang kurso gidesinyo nga molungtad og usa ka semester, ug gibahin kini ngadto sa 15 ka leksyon. Ang matag leksyon gidesinyo nga itudlo atol sa 90 minutos nga panahon sa klase. Kon ang inyong panahon sa klase molungtad og minos sa 90 minutos, makapili ka nga pamub-an ang mga leksyon o bahinon kini sa daghang bahin aron matudlo sa sobra sa duha o dugang pa nga mga panahon sa klase.

Ang matag leksyon diha sa manwal naglangkob og lima ka bahin:

Pasiuna
Advance nga Pagpangandam
Mga Sugyot alang sa Pagtudlo
Mga Tabang sa Pagtudlo
Mga Pagdapit aron Molihok

Pasiuna

Ang matag leksyon magsugod og mubo nga pasiuna nga nag-summarize sa mga doktrina, mga baruganan, ug dagkong mga ideya nga gihisgutan diha sa leksyon.

Advance nga Pagpangandam

Kini nga seksyon naglakip sa mahinungdanong mga kapanguhaan sa pagtuon ug naglista usab sa mga kapanguhaan (pananglitan, mga video, mga handout, ug uban pa) nga gigamit sa matag outline sa leksyon ug nianang kinahanglan nimong andamon daan. Pananglitan, kon ang leksyon mosugyot sa pagpasalida og video, mas maayo nga i-download o andamon nang daan ang video.

Mga Sugyot alang sa Pagtudlo

Kini nga seksyon naghatag og mga sugyot alang sa pagtudlo sa gitakda nga mga hilisgutan sa kurso. Isip magtutudlo, kinahanglan nimong tun-an og maayo kini nga seksyon. Ang mga sugyot sa pagtudlo niini nga manwal nagsunod sa sumbanan nga gihulagway diha sa chapter 3 sa Gospel Teaching and Learning. Nagpakita kini kon unsaon paggamit ang Fundamentals of Gospel Teaching and Learning diha sa inyong pagtudlo aron matabangan ang mga estudyante nga makasabut ug makagamit sa mga baruganan sa ebanghelyo ug molambo ang ilang personal nga pagkakabig.

Sa nag-unang seksyon sa matag leksyon, makita nimo ang pipila ka mahinungdanong mga doktrina, mga baruganan, ug mga kamatuoran nga gi-print og bold. Kining mga doktrina ug mga baruganan gitino diha sa kurikulum tungod kay (1) nagpakita kini sa importanting mga kamatuoran nga makita diha sa mga kasulatan ug sa Isangyaw ang Akong Ebanghelyo, (2) piho kining magamit ngadto sa mga panginahanglan ug mga kahimtang sa umaabut nga mga misyonaryo, o (3) mahinungdanon kining mga kamatuoran nga makatabang sa mga estudyante nga mapalambo ang ilang relasyon ngadto sa Ginoo ug moandam kanila alang sa full-time nga misyonaryo nga pagserbisyo. Si Presidente Henry B. Eyring sa Unang Kapangulohan mitambag: “Samtang mag-andam kamo og leksyon, pangitaa diha niini ang makapakabig nga mga baruganan. … Ang makapakabig nga baruganan mao kanang moresulta ngadto sa pagkamasulundon sa kabubut-on sa Dios” (“Converting Principles” [pakigpulong ngadto sa mga CES religious educator, Peb. 2, 1996], 1; si.lds.org). Hibaloi nga kini nga manwal wala mosulay sa pagtino sa tanang doktrina ug mga baruganan nga mahimong itudlo sa usa ka leksyon, ug mahimong aghaton ka sa Espiritu sa pagtudlo sa laing mga baruganan ug mga doktrina nga wala mahisguti diha sa mga materyal sa leksyon. Alang sa dugang nga mga ideya sa pagpahiangay sa mga leksyon, tan-awa ang “Desisyuni kon Unsa ug Unsaon sa Pagtudlo” nga seksyon sa ubos.

Mga Tabang sa Pagtudlo

Ang mga tabang sa pagtudlo makita diha sa mga box sa tibuok leksyon, ug nagtanyag kini og giya sa nagkalain-laing mga pamaagi, mga kahanas, ug mga technique sa pagtudlo. Gidesinyo kini aron sa paghatag og dugang nga ideya ngadto sa sukaranang mga baruganan sa religious education. Pangita og mga paagi sa paggamit niining mga tabang sa epektibo ug sa makanunayong paagi diha sa imong pagtudlo.

Mga Pagdapit aron Molihok

Si Elder David A. Bednar Korum sa Napulog Duha ka mga Apostoles nagtudlo: “Ang akong tinuod nga pangandoy alang sa matag usa ninyong mga batan-ong lalaki mao nga dili lang unta nga moadto og usa ka misyon—kondili nga kamo mamahimong mga misyonaryo sa dili pa kamo mosumiter sa inyong mga papeles sa pagmisyon, nga dugay na sa dili pa ninyo madawat ang tawag sa pagserbisyo, nga dugay na sa dili pa kamo ma-set apart sa inyong stake president, ug sa dili pa kamo mosulod sa MTC” (“Pagkahimong Usa Ka Misyonaryo,” Ensign o Liahona, Nob. 2005, 45). Pinasubay niini nga konsepto, ang matag leksyon naglangkob og gisugyot nga mga kalihokan aron awhagon ang umaabut nga mga misyonaryo nga magsugod sa paghunahuna, paglihok, ug pagserbisyo nga sama sa mga misyonaryo sa dili pa sila mosulod sa missionary training center. Ang mga kalihokan nga makita diha niini nga seksyon nag-awhag sa mga sakop sa klase nga himoon diha sa panimalay ang unsay ilang nakat-unan sa klase. Adunay lain-laing mga paagi sa pag-assign o pagsugyot niining mga kalihokan. Pananglitan, mahimo nimong iapud-apod ang handout atol sa unang klase nga naglista sa girekomendar nga mga kalihokan alang sa matag semana sa semester. Mahimo usab nimong isulat sa pisara ang sinemana nga lista sa mga kalihokan o padalhan ang imong mga estudyante og sinemana nga text o mensahe sa email.

Desisyuni kon Unsa ug Unsaon sa Pagtudlo

Pagpili og mga Ideya sa Pagtudlo Nga Motubag sa mga Panginahanglan sa mga Estudyante

Samtang mangandam ka sa pagtudlo, mahimo nimong pangutan-on ang imong kaugalingon og sama niini: Unsa nga mga pamaagi o mga kalihokan sa pagtudlo ang makatabang sa akong mga estudyante aron makasabut sa unsay gikinahanglan nilang mahibaloan? Unsay makatabang sa akong mga estudyante aron makaila, makasabut, ug makapasabut sa mahinungdanong mga doktrina ug mga baruganan? Unsay akong mahimo aron matabangan ang mga estudyante nga mobati sa kamatuoran ug kaimportante niadtong mga doktrina ug mga baruganan? Unsaon nako sa pagtabang ang mga estudyante nga makagamit niining mga doktrina ug mga baruganan sa ilang kaugalingong kinabuhi?

Kini nga manwal gidesinyo aron makatabang kanimo sa proseso sa pagplano og leksyon. Ribyuha og maayo ang materyal sa leksyon. Pilia ang ang mga ideya sa pagtudlo nga mas makatubag sa mga panginahanglan sa imong mga estudyante, ug ma-personalize kini sa imong indibidwal nga pamaagi sa pagtudlo. Ang Espiritu Santo mogiya kanimo diha niini nga proseso. Mahimo kang mopili nga mogamit sa tanan o bahin sa mga gisugyot sa kurikulum, o mahimo nimong ipahiangay ang gisugyot nga mga ideya ngadto sa mga panginahanglan ug mga kahimtang sa imong klase. Sa pagtino nimo kon unsaon sa pagpahiangay sa mga materyal sa leksyon, hinumdumi ang pag-andam og maayo ug tuguti usab ang Espiritu nga mogiya kanimo. Ikonsiderar kining tambag gikan ni Elder Dallin H. Oaks sa Korum sa Napulog Duha ka mga Apostoles: “Mosunod una kita, dayon atong ipahiangay. Kon tinud-anay kitang nakatutok sa gitakda nga leksyon nga atong ihatag, nan makasunod kita sa Espiritu nga mopahiangay niini” (“A Panel Discussion with Elder Dallin H. Oaks” [satellite broadcast sa Seminaries and Institutes of Religion, Ago. 7, 2012], 6; si.lds.org).

Paghatag og mga Oportunidad sa Pagtudlo ngadto sa mga Estudyante

Usa sa labing importante nga mga butang nga imong mahimo isip magtutudlo niini nga kurso mao ang paghatag sa mga estudyante og daghang oportunidad nga makapraktis sa pagtudlo ug makapamatuod atol sa klase, kay daghang mga batan-on ang kulang og pagsalig sa pagtudlo sa mga doktrina ug mga baruganan sa ebanghelyo. Hatagi ang mga estudyante og kahigayunan nga makatubag sa mga pangutana, sa pagpasabut sa mga kamatuoran sa ebanghelyo ngadto sa ubang mga sakop sa klase, ug sa pagtudlo sa mga leksyon sa misyonaryo nga makita diha sa Isangyaw ang Akong Ebanghelyo. Samtang ang umaabut nga mga misyonaryo makasabut kon sa unsang paagi nga ang mga doktrina ug mga baruganan sa ebanghelyo makagiya paingon sa kaluwasan, motudlo sila sa ebanghelyo uban sa dugang nga kasinsero ug gahum.

Agig dugang sa pagkat-on kon unsay isulti ug unsay buhaton, ang umaabut nga mga misyonaryo kinahanglan gayud nga makakat-on sa pag-focus sa mga panginahanglan sa mga investigator ug makaila pinaagi sa Espiritu kon unsay gikinahanglan sa matag investigator aron makapadayon diha sa dalan paingon sa pagkakabig. Tabangi ang mga estudyante nga makasabut nga ang malungtarong pagkakabig sa investigator dili kaayo magdepende kon unsay gisulti ug gibuhat sa misyonaryo kondili milihok ba ang investigator pinaagi sa hugot nga pagtuo. Ang labing epektibo nga mga misyonaryo mohatag gayud og pagtagad sa unsay isulti ug buhaton sa mga investigator ug dayon mahigugmaong motabang kanila nga mouswag paingon sa pagkakabig.

Tinuon ang mga Gilauman alang sa mga Estudyante

Ang mosunod nga mga sugyot mahimong makatabang samtang ikaw mangandam ug magtudlo sa mga leksyon:

I-assign ang mga estudyante sa pagbasa sa magamit nga mga seksyon sa Isangyaw ang Akong Ebanghelyo o mga mensahe sa kinatibuk-ang komperensya sa sa dili pa ang matag leksyon. Ikonsiderar ang paghatag sa mga estudyante og syllabus o course outline atol sa pagsugod sa kurso nga nagpasabut kon unsay itudlo panahon sa matag klase ug unsay kinahanglang basahon sa mga estudyante agig pagpangandam alang sa matag klase. Ang mga estudyante nga mangandam daan sa ilang kaugalingon malagmit nga mas matudloan pinaagi sa Espiritu Santo panahon sa leksyon.
Paabuta ang mga estudyante nga motuman sa ilang tahas isip tigkat-on (tan-awa sa Gospel Teaching and Learning, 6, 15, 55).
Tuguti ang mga estudyante sa pagdiskobre sa mga kamatuoran sa ebanghelyo nga sila mismo. Ang mga estudyante malig-on kon imo silang giyahan pinaagi sa proseso sa pagkat-on nga susama sa unsay imong nasinati atol sa pagpangandam sa leksyon. Samtang nagdiskobre ang mga estudyante og mga doktrina ug mga baruganan nga sila mismo, hatagi sila og mga oportunidad sa pagpasabut niining mga kamatuoran diha sa ilang kaugalingong mga pulong ug sa pagpakigbahin ug sa pagpamatuod kon unsay ilang nahibaloan, unsay ilang gibati, ug unsay ilang giplanohan nga buhaton.
Paghimo og kahimtang diin ang mga estudyante mobati sa Espiritu sa Ginoo samtang nagtudlo ug nagkat-on sila gikan sa usag usa (tan-awa sa D&P 88:78, 122).
Awhaga ang mga estudyante nga magdala og personal nga kopya sa mga kasulatan, usa ka kopya sa Isangyaw ang Akong Ebanghelyo, ug study journal ngadto sa matag klase. Ipasabut kon unsa ang study journal ug unsaon kini paggamit.

Samtang nagdesisyon ka kon unsa ug unsaon pagtudlo, hinumdumi kini nga mga pulong ni Elder David A. Bednar sa Korum sa Napulog Duha Apostoles:

“Nakaobserbar ko og komon nga kinaiya sa mga magtutudlo kinsa dunay dakong impluwensya sa akong kinabuhi. Mitabang sila kanako sa pagpaningkamot nga makat-on pinaagi sa hugot nga pagtuo. Nagdumili sila sa paghatag kanako og sayon nga mga tubag sa lisud nga mga pangutana. Gani, wala gayud sila mohatag kanako og tubag. Hinoon, ilang gitudlo ang paagi ug mitabang kanako sa paghimo sa mga lakang aron makit-an ang kaugalingon nakong mga tubag. Sa tinuod lang wala kaayo ko ganahi niini nga pamaagi, apan ang kasinatian nakapahimo nako sa pagsabut nga ang tubag nga gihatag sa laing tawo sa kasagaran dili mahinumduman og dugay, kon mahinumduman man ugaling. Apan ang tubag nga atong madiskubrihan o maangkon pinaagi sa paggamit sa hugot nga pagtuo, sa kasagaran, mahinumduman sa tibuok kinabuhi” (“Seek Learning by Faith” [usa ka gabii kauban si Elder David A. Bednar, Peb. 3, 2006], 5; si.lds.org).

Mga Kalihokan sa Pagtudlo

Dunay pipila ka paagi sa paghan-ay sa mga kalihokan sa pagtudlo sa klase nga gisugyot diha sa mga outline sa.leksyon. Kasagaran makatabang nga lain-lainon ang paghan-ay sa mga kalihokan aron magpabiling interesado ug maka-focus ang mga estudyante. Pananglitan, atol sa mga pag-role play, ikonsiderar ang pagdapit sa mga estudyante nga magpuli-puli isip misyonaryo ug investigator ug isip evaluator kon mahimo. Mahimo usab nga moapil ka sa bisan unsa nga tahas kon gikinahanglan.

M = Misyonaryo; I = Investigator; E = Evaluator

Sumbanan sa Pagbansay [Training Model]

Ang sumbanan sa pagbansay nga gigamit sa kurikulum sa MTC mahimong mapahiangay aron magamit niini nga kurso aron matabangan ang mga estudyante nga makapalambo og mga kahanas ug mga abilidad. Ang mga elemento niini nga sumbanan mahimong magamit sa bisan unsa nga han-ay ug sublion aron mas makab-ot ang tumong sa pagtabang sa mga estudyante nga molambo pinaagi sa pagpraktis.

Ipasabut—Ipakita—Praktison—Timbang-timbangon—Praktison Pag-usab

Ipasabut

Ipasabut ang mga konsepto ug mga kahanas nga kinahanglang mahibaloan sa mga estudyante, ug tudloi sila kon sa unsang paagi nga kining mga kahanas ug mga konsepto makatabang sa pagtuman sa katuyoan sa misyonaryo.

Ipakita

Paghatag og example kon unsay buhaton sa mga estudyante. Matuman kini pinaagi sa live nga pagpakita, mga video, o uban pang mga pamaagi.

Praktison

Ipapraktis sa mga estudyante ang mga kahanas nga magpares o mag-grupo.

Timbang-timbangon [Evaluate]

Pinaagi sa gi-input sa mga estudyante, itino ang mga butang nga maayo nilang nabuhat ug ang mga paagi nga mapalambo nila ang ilang mga kahanas. Hatagi sila og kadasig.

Praktison Pag-usab

Kon posible, hatagi og panahon alang sa subli nga pagpraktis.

Misyonaryo nga Buhat diha sa Internet

Isip full-time nga mga misyonaryo, ang imong mga estudyante mogamit sa Internet isip himan sa pag-proselyte aron makakita ug makakontak og mga investigator, makakontak og mga miyembro, makatrabaho uban sa lokal nga mga lider sa priesthood ug sa misyon, makatubag og mga pangutana, makadawat ug makakontak og mga referral, maka-follow up sa mga pasalig [commitment], makakumpirmar og mga appointment, ug makatudlo og mga baruganan gikan sa Isangyaw ang Akong Ebanghelyo. Ang lain-laing mga sugyot niining tibuok nga manwal makatabang nimo sa pag-awhag sa mga estudyante nga makasugod sa pagpakigbahin sa ebanghelyo gamit ang mga himan diha sa internet.

Isip magtutudlo alang niini nga kurso, mahimo kang mopahimulos sa elektronik nga mga himan pinaagi sa pagkontak sa imong mga estudyante panahon sa semana gamit ang mga mensahe sa text o social media aron mag-follow up og mga assignment sa klase, sa pag-awhag kanila nga magtuon sa dili pa sila moadto sa klase o sa pagpahinumdom kanila sa pagbasa sa Basahon ni Mormon matag adlaw.

Pagpahiangay sa Manwal ngadto Niadtong dunay mga Kakulangan

Kon magtudlo sa mga estudyante nga dunay mga kakulangan, ang mga magtutudlo mahimong mopahiangay sa mga leksyon aron matubag ang mga abilidad sa mga estudyante. Pananglitan, aron mapahiangay ang mga leksyon alang sa mga estudyante nga dili makabasa, mahimo nimong ikonsiderar ang pagbasa niini og kusog nga ikaw mismo, ipabasa sa mga estudyante, o mogamit og girekord nang daan nga mga materyal (sama sa usa ka audio o video nga bersyon sa mga kasulatan, sa Isangyaw ang Akong Ebanghelyo, ug sa mga pakigpulong sa kinatibuk-ang komperensya). Kon ang leksyon magkinahanglan og sinulat nga mga tubag, mahimo nimong awhagon ang mga estudyante nga mohatag og mga tubag nga isulti lang nila. Ang ubang mga estudyante mahimo usab nga moabag niadtong dunay mga kakulangan pinaagi sa indibidwal nga pagbasa sa mga materyal ngadto kanila o pagsulat sa mga tubag alang kanila.

Alang sa dugang nga mga ideya ug mga kapanguhaan, konsultaha ang Disability Resources page sa disabilities.lds.org ug ang S&I nga manwal sa polisiya sa seksyon nga giulohan og “Gipahiangay nga mga Klase ug mga Programa alang sa mga Estudyante nga dunay mga Kakulangan [Adapted Classes and Programs for Students with Disabilities].”