8

Pagtudlo sa Mensahe sa Pagpahiuli (Part 2)

Pasiuna

Ang mensahe sa Pagpahiuli mao nga ang ebanghelyo ni Jesukristo, nga naglakip og mahangturong doktrina, awtoridad sa priesthood, ug mga ordinansa sa kaluwasan, gipahiuli nganhi sa yuta pinaagi kang Propeta Joseph Smith. Pinaagi sa gipahiuli nga ebanghelyo ni Jesukristo—ang samang ebanghelyo nga gipadayag sa matag dispensasyon sa ebanghelyo—ang tanang anak sa Dios makabaton og kinabuhing dayon. Ang umaabut nga mga misyonaryo kinahanglang klaro nga makasabut sa mga konsepto sa Apostasiya ug sa Pagpahiuli ug kinahanglang andam nga mopasabut niini sa yanong paagi ug mopamatuod niini uban sa gahum.

Advance nga Pagpangandam

• Tun-i ang Moroni 10:3–5 ug Joseph Smith—Kasaysayan 1:1–19.

• Tun-i ang Isangyaw ang Akong Ebanghelyo, mga pahina 42–46.

• Tun-i ang Gordon B. Hinckley, “Ang Kahibulongang Tukuranan sa Atong Pagtuo,” Ensign o Liahona, Nob. 2002, 78–81.

• Pag-andam aron ipasalida ang mga video nga “‘Dali, Tanang Anak sa Dios,’ Part 1” (1:17) ug “‘Dali, Tanang Anak sa Dios,’ Part 2”(2:00; mga video clip gikan sa pakigpulong ni Presidente Thomas S. Monson, Ensign o Liahona, Mayo 2013, 66–69), nga anaa sa lds.org/media-library.

• Pag-andam aron ipasalida ang video nga “Invitation to Read the Book of Mormon: Jynx” (8:06), The District 2, nga anaa sa youtube.com.

• Andama ang handout nga giulohan og “The Marvelous Foundation of Our Faith,” nga makita sa katapusan sa leksyon.

Mga Sugyot alang sa Pagtudlo

Ang Panan-awon ni Joseph Smith sa Langitnong Amahan ug ni Jesukristo

Ipakita ang unang video clip gikan sa pakigpulong ni Presidente Thomas S. Monson nga “Dali, Tanang Anak sa Dios,” diin gipakigbahin ni Presidente Monson ang kasinatian sa pagkakabig ni Elmer Pollard:

“Sa dihang nagserbisyo pa ko isip presidente sa misyon sa Canada labaw sa 50 ka tuig na ang milabay, usa ka batan-ong misyonaryo nga gikan sa gamay, hilit nga komunidad, natingala sa gidak-on sa Toronto. Mubo siya apan taas og pagpamatuod. Wala madugay, uban sa iyang kompanyon, miadto siya sa balay ni Elmer Pollard sa Oshawa, Ontario, Canada. Naluoy sa batan-ong mga lalaki, nga atol sa grabing snow, nanuktok sa kabalayan, giimbitar ni Mr. Pollard ang mga misyonaryo sa pagsulod. Ilang gipresentar kaniya ang ilang mensahe. Wala niya batia ang espiritu. Giingnan niya sila nga mobiya ug dili na mobalik. Ang iyang katapusang gisulti sa mga elder sa ilang pagbiya ingon og mabiaybiayon: ‘Dili gyud kamo makasulti nga nagtuo mo ni Joseph Smith nga usa ka propeta sa Dios!’

“Gilamba ang pultahan” (“Dali, Tanang Anak sa Dios,” Ensign o Liahona, Mayo 2013, 68).

Human mapasalida ang video clip, ipangutana:

• Kon usa pa kamo niining mga misyonaryo, unsa kaha ang inyong mga hunahuna ug mga pagbati sa pagbiya ninyo sa balay ni Mr. Pollard?

• Unsay inyong mabuhat niining puntoha?

Ipasalida ang ikaduhang video clip, nga naglangkob sa nahabilin sa istorya ni Presidente Monson:

“Milakaw ang mga elder. Ang batan-ong taga probinsya misulti sa iyang kompanyon: ‘Elder, wala ta motubag ni Mr. Pollard. Miingon siya nga wala ta motuo nga si Joseph Smith tinuod nga propeta. Mamalik ta ug mohatag sa atong pagpamatuod ngadto niya.’ Sa sinugdanan ang mas sinati nga misyonaryo nagduha-duha apan miuyon ra nga mobalik. Nahadlok sila pag-ayo sa ilang pagduol sa pultahan. Nanuktok sila, miatubang ni Mr. Pollard, naghulat, ug dayon uban sa gahum nga gikan sa Espiritu, ang atong walay kasinatian nga misyonaryo misulti: ‘Mr. Pollard, miingon ka nga wala mi motuo nga si Joseph Smith usa ka propeta sa Dios. Mopamatuod ko nga si Joseph usa ka propeta. Iyang gihubad ang Basahon ni Mormon. Iyang nakita ang Dios Amahan ug si Jesus ang Anak. Nasayud ako niini.’

“Paglabay sa panahon, si Mr. Pollard, karon Brother Pollard, mibarug sa miting sa priesthood ug mipahayag, ‘Wala ko makatulog nianang gabhiona. Nagbalik-balik sa akong dunggan ang mga pulong “si Joseph Smith usa ka propeta sa Dios. Nasayud ako niini. Nasayud ako niini. Nasayud ako niini.” Pagkasunod adlaw akong gitawgan ang mga misyonaryo ug mihangyo nga mobalik sila. Ang ilang mensahe, inubanan sa ilang mga pagpamatuod, nakapausab sa akong kinabuhi ug sa kinabuhi sa akong pamilya’” (“Dali, Tanang Anak sa Dios,” Ensign o Liahona, Mayo 2013, 68).

Ipangutana:

• Sa inyong hunahuna ngano man nga ang pagpamatuod sa misyonaryo mahitungod ni Propeta Joseph Smith dunay dako nga epekto kang Mr. Pollard?

Ipapakli sa mga estudyante ang Joseph Smith—Kasaysayan diha sa Perlas nga Labing Bililhon. Hangyoa ang usa ka estudyante sa pagbasa og kusog sa mga bersikulo 5–6, ug dayon ipabasa og kusog sa laing estudyante ang mga bersikulo 7–9. Dayon pangutan-a ang mga estudyante:

• Unsaon man ninyo sa pag-summarize niining mga bersikulo sa usa o duha lang ka sentence?

Ipabasa og kusog sa usa ka estudyante ang Joseph Smith—Kasaysayan 1:10. Samtang gibasa ang bersikulo, hangyoa ang mga estudyante sa pagkonsiderar kon sa unsang paagi nga ang pagpangita ni Joseph Smith sa kamatuoran sa relihiyon susama sa nasinati sa daghang tawo nga ilang mahimamat sa ilang misyon. Dayon ipangutana:

• Unsa nga mga pangutana nga gipanlimbasugan sa batan-ong Joseph Smith?

• Unsay nakapalisud ni Joseph “sa pagdesisyon kon hain nga simbahan ang apilan?

• Sa unsang paagi kaha nga ang mga pangutana ni Joseph Smith susama sa mga pangutana sa mga tawo sa kalibutan karon?

Ipabasa og kusog sa usa ka estudyante ang Joseph Smith—Kasaysayan 1:11–13. Dayon ipangutana:

• Unsa nga baruganan ang nakat-unan ni Joseph Smith kon unsaon sa pagpangita ang espirituhanong kamatuoran? (Bisan kon mogamit sila og lain-laing mga pulong, ang mga estudyante malagmit mopahayag niini nga baruganan: Makakat-on kita og espirituhanong kamatuoran gikan sa Dios kon mag-ampo kita ngadto Kaniya alang sa mga tubag ug andam nga molihok.)

• Unsaon man ninyo paggamit ang ehemplo ni Joseph Smith aron matabangan ang uban kinsa nagtinguha nga makakita og espirituhanong kamatuoran?

Ipabasa og hilum sa mga estudyante ang Joseph Smith—Kasaysayan 1:14–19. Samtang nagbuhat sila sa ingon, ipahunahuna nila ang malungtarong epekto sa Unang Panan-awon ngadto sa kalibutan ug sa ilang personal nga kinabuhi. Human sila makabaton og pipila ka hilum nga gutlo aron mahuman ang pagbasa, ipangutana ang sama sa mosunod:

• Unsa kaha ang pipila ka rason nga giataki sa kaaway si Joseph Smith sa wala pa mipakita ang Langitnong Amahan ug ang Iyang Anak nga si Jesukristo? (Gustong pugngan sa kaaway si Joseph gikan sa pagkat-on og espirituhanong kamatuoran ug sa ingon mapugngan nga mahitabo ang Pagpahiuli.)

• Sa unsang mga paagi nga gisugdan sa pagbuntog sa Unang Panan-awon ang mga sangputanan sa Dakong Apostasiya? (Hatagi og gibug-aton kini nga kamatuoran ngadto sa mga estudyante: Pinaagi sa Unang Panan-awon, ang kalangitan naabli pag-usab ug nagsugod ang Pagpahiuli.

• Unsa nga doktrinal nga mga kamatuoran ang makat-unan gikan sa Unang Panan-awon? (Ang Amahan ug ang Anak managlahing mga binuhat, ang kalangitan naabli, mahimo kitang makadawat og pinadayag, ug uban pa.)

• Sa inyong hunahuna ngano kaha nga ang Isangyaw ang Akong Ebanghelyo nagsugyot man nga itudlo sa mga misyonaryo ang Unang Panan-awon atol sa una gyud nilang pakigkita sa usa ka investigator?

• Sa unsang paagi nga ang pagkat-on mahitungod sa pagpakita sa Langitnong Amahan ug sa Iyang Anak nga si Jesukristo makatabang sa mga investigator sa ilang pagpangita og espirituhanong kamatuoran?

Pahinumdom: Kon anaa, mahimo nimong pakit-on ang mga estudyante og video clip sa kinutlo gikan sa handout. Presidente Gordon B. Hinckley, “Ang Kahibulongang Tukuranan sa Atong Pagtuo.” Ang video clip molungtad gikan sa 9:30 ngadto sa 17:29.

Aron matabangan ang mga estudyante nga mas mapalambo ang ilang panabut sa kaimportante sa Unang Panan-awon, hatagi ang matag estudyante og kopya sa handout nga giulohan og “Ang Kahibulongang Tukuranan sa Atong Pagtuo,” nga naglangkob og bahin sa pakigpulong ni Presidente Gordon B. Hinckley.

Ipabasa og kusog sa usa ka estudyante ang unang tulo ka paragraph. Dayon ipangutana:

• Nganong ang “kinatibuk-ang kusog” sa Ang Simbahan ni Jesukristo sa mga Santos sa Ulahing mga Adlaw nagdepende man sa katinuod sa Unang Panan-awon? (Kinahanglang makasabut ang mga estudyante nga kon ang istorya ni Joseph Smith mahitungod sa iyang panan-awon tinuod, nan ang pagpangangkon tinuod usab nga Ang Simbahan ni Jesukristo sa mga Santos sa Ulahing mga Adlaw mao lamang ang simbahan dinhi sa yuta nga dunay hingpit nga pagtugot ug awtoridad sa Langitnong Amahan ug ni Jesukristo.)

• Sumala ni Presidente Hinckley, sa unsang mga paagi nga ang buhat ni Joseph Smith lahi kay sa buhat nga gihimo sa miaging mga lider sa relihiyon kinsa mireporma sa mga naandang binuhatan sa pagsimba ug doktrinal nga mga pagtulun-an?

Hatagi ang mga estudyante og pipila ka minutos sa pagbasa og hilum sa nahabilin diha sa handout. Samtang nagbasa sila, awhaga sila sa pagmarka sa mga pulong, o mga pamahayag nga ilang giganahan. Human makabasa ang mga estudyante, dapita ang pipila kanila sa pagpakigbahin sa unsay ilang gimarkahan ug ipasabut nganong importante kini ngadto kanila. Ikonsiderar ang pagpangutana sama sa mosunod:

• Ngano kaha nga lisud alang sa ubang mga tawo ang pagdawat sa katinuod sa panan-awon ni Joseph Smith?

• Sa pagkonsiderar sa mga baruganan nga gitun-an sa atong miaging leksyon, sa unsang paagi nga ang Unang Panan-awon mihaum sa sumbanan sa mga dispensasyon, apostasiya, ug pagpahiuli? (Human sa panahon sa apostasiya, ang Unang Panan-awon mipasiugda sa pagpahiuli ug sa bag-ong dispensasyon sa ebanghelyo. Sama sa miaging mga dispensasyon, usa ka propeta ang gitawag sa Dios aron sa pagpahiuli sa mga kamatuoran sa ebanghelyo ug sa awtoridad sa priesthood. Si Joseph Smith gitawag isip propeta sa “dispensasyon sa kahingpitan sa panahon” [Mga Taga-Efeso 1:10]. (Nagpasabut kini nga ang ebanghelyo dili mawala pinaagi sa apostasiya apan magpabilin sa yuta hangtud sa Ikaduhang Pag-anhi ni Kristo.)

• Sa unsang paagi nga ang pagtabang sa investigator nga makasabut niining sumbanan sa kasulatan mahitungod sa apostasiya ug pagpahiuli makatabang nga madawat niya ang katinuod sa Unang Panan-awon ug sa modernong Pagpahiuli sa ebanghelyo?

Dapita ang klase sa pagpakli sa pahina 43–44 sa Isangyaw ang Akong Ebanghelyo ug mobasa og hilum sa katapusang tulo ka paragraph diha sa pahina, nga mangita sa mga butang nga gipahiuli o giestablisar pag-usab pinaagi sa Pagpahiuli. Dayon hangyoa ang mga estudyante sa pagpakigbahin kon unsa ang ilang nakit-an. Mahimo nimong siguruon nga mahisgutan sa klase (1) ang pagpahiuli sa awtoridad, mga yawe, ug mga ordinansa sa priesthood, (2) ang pag-establisar og usab sa Simbahan ni Kristo, (3) ang pagtawag sa napulog duha ka mga Apostoles, (4) ang pagpasiugda sa bag-ong dispensasyon sa ebanghelyo, ug (5) ang pagtawag og usa ka buhing propeta.

Aron matabangan ang mga estudyante nga mobati sa kamatuoran ug sa kaimportante sa Unang Panan-awon ug sa Pagpahiuli, hangyoa ang klase sa pagtubag sa mga pangutana sama sa mosunod:

• Giunsa ninyo pagbaton og pagpamatuod sa katinuod ug kaimportante sa Unang Panan-awon?

• Sa unsang paagi nga ang inyong pagpamatuod sa Unang Panan-awon nakaimpluwensya sa inyong pagtuo sa Pagpahiuli sa ebanghelyo ni Jesukristo?

Pangutan-a kon duna bay mga estudyante nga gustong mopakigbahin sa ilang pagpamatuod ngadto sa klase mahitungod sa Unang Panan-awon o sa Pagpahiuli.

Ipares-pares ang klase. Organisaha ang mga estudyante ngadto sa ginagmay nga mga grupo nga tinagup-at (duha ka parisan sa matag grupo). Hatagi ang mga estudyante og igong panahon sa pag-andam kon unsaon nila pagtudlo ang tulo ngadto sa upat ka minuto nga leksyon mahitungod sa Unang Panan-awon ug sa Pagpahiuli. Ipasabut nga ang ilang pagtudlo kinahanglang simple ug klaro. Iparibyu sa mga estudyante ang materyal diha sa Isangyaw ang Akong Ebanghelyo, mga pahina 42–44, o diha sa pahina 11 sa pamphlet sa misyonaryo nga giulohan og Ang Pagpahiuli sa Ebanghelyo ni Jesukristo. Awhaga ang mga estudyante sa paggamit sa ilang kaugalingong mga pulong sa pagpasabut sa kasinatian ni Joseph Smith (gawas kon mokutlo sila o mobasa gikan sa Joseph Smith—Kasaysayan 1:16–17). Pahinumdumi sila sa pagtapos pinaagi sa ilang mga pagpamatuod. I-assign ang usa ka parisan diha sa matag grupo sa pagtudlo sa laing parisan.

Sa pagtapos sa mga estudyante sa ilang kasinatian sa pagtudlo, pahisguti sa matag grupo nga sila ra kon unsay maayong nahitabo atol sa pagtudlo ug unsay mas maayo pa untang nahimo sa mga magtutudlo.

Dayon, magpuli-puli og tahas [role] ug tugutan ang laing parisan nga motudlo. Siguroa nga dunay panahon alang sa feedback. Human makatudlo ang tanang parisan, dapita ang mga sakop sa klase sa pagpakigbahin sa ilang hunahuna gikan sa ilang mga kasinatan ngadto sa tibuok klase.

Pagtabang sa mga estudyante nga makatubag sa lisud nga mga pangutana. Ang mga estudyante usahay makasugat og lisud nga mga pangutana nga mohagit sa ilang pagtuo. Isip magtutudlo, makatabang ka sa pag-andam sa mga estudyante nga makatubag niini nga mga pangutana ug sa pagbatok sa mga hagit sa ilang pagtuo (tan-awa sa Mga Taga-Efeso 6:11–13; 1 Nephi 15:24; Helaman 3:29). Makatabang ang pagtubag sa mahagitong mga pangutana atol sa klase; hinoon, ang maong mga pangutana kinahanglang hisgutan sa mainampingon ug sa matinud-anong paagi. Pahinumdumi ang mga estudyante nga dunay daghang kapanguhaan nga available aron sa pagtabang nga matubag ang lisud nga mga pangutana diha sa mga website sa Simbahan; pananglitan, sa Gospel Topics nga seksyon sa LDS.org.

Mahimong makatabang sa imong mga estudyante nga mahibalo kon unsaon pagtubag ang lisud nga mga pangutana kalabut sa nagkalain-laing istorya sa Unang Panan-awon nga gisulat ni Joseph Smith. Ipasabut nga ang istorya sa Unang Panan-awon nga makita diha sa Joseph Smith—Kasaysayan gisulat sa Propeta niadtong 1838 isip kabahin sa opisyal nga kasaysayan sa Simbahan nga imantala sa kalibutan. Tungod kay girekord ni Joseph Smith ang iyang kasinatian sobra sa kausa, dunay laing mga istorya sa Unang Panan-awon. Pasabta ang mga estudyante nga ang matag istorya morag nagkalahi sa paghatag og gibug-aton ug sa mga detalye niini. Ang ubang mga kritiko nasayop sa pagpangatarungan nga ang bisan unsa nga kalainan sa pagsaysay og usab mga ebidensya sa paghimo-himo niini. Bisan pa man niana, kon ang indibidwal mosaysay og usab sa usa ka kasinatian sa daghang sitwasyon ngadto sa lain-laing maminaw sulod sa daghang katuigan, ang matag istorya lagmit nga mohatag og gibug-aton sa nagkalain-laing mga aspeto sa kasinatian ug naglangkob og talagsaong mga detalye. Pananglitan, ang kalainan nga susama sa Unang Panan-awon nahitabo sa mga istorya ni Pablo mahitungod sa iyang panan-awon didto sa dalan sa Damasco (tan-awa sa Mga Buhat 9:3–9; 22:6–11; 26:12–18).

Pahinumdom: Alang sa tabang sa pagpasabut sa nagkalain-laing mga istorya sa Unang Panan-awon, tan-awa ang artikulo nga “First Vision Accounts” diha sa Gospel Topics nga seksyon sa lds.org/topics. Ikonsiderar ang pagpakigbahin niini nga link ngadto sa mga estudyante aron mabasa nila ang materyal nga sila mismo.

Pagdapit sa Uban nga Mobasa sa Basahon ni Mormon

Sugdi sa pag-establisar ang kaimportante niining bahina sa leksyon pinaagi sa pagpabasa og kusog sa usa ka estudyante sa katapusang duha ka paragraph diha sa pasiuna sa Basahon ni Mormon. Dapita ang mga estudyante sa pagpangita sa mga saad nga gihatag ngadto niadtong mopili nga mobasa sa Basahon ni Mormon, mamalandong niini, ug mangutana sa Dios kon tinuod ba kini. Dapita ang mga estudyante sa pagpakigbahin sa unsay ilang nakit-an.

Ipapakli sa mga estudyate ngadto sa pahina 44–45 sa Isangyaw ang Akong Ebanghelyo, ug ipabasa og kusog sa usa ka estudyante ang unang paragraph diha sa seksyon nga “Ang Basahon ni Mormon: Lain nga Tugon ni Jesukristo.” Tabangi ang mga estudyante nga mahibalo sa doktrina nga gitudlo niini nga paragraph pinaagi sa pagpangutana:

• Nganong ang Basahon ni Mormon usa man ka bililhon ug gamhanang himan alang sa mga misyonaryo? (Tabangi ang mga estudyante nga makakita nga ang Basahon ni Mormon naglangkob sa walay katapusang ebanghelyo, makapakumbinsir nga ebidensya nga si Joseph Smith usa ka propeta sa Dios, ug lain kini nga tugon ni Jesukristo. (Tan-awa sa D&P 20:8–11.)

Aron matabangan ang mga estudyante nga mas makasabut niini nga doktrina, ipangutana ang pipila ka pangutana sama sa mosunod:

• Nganong ang Basahon ni Mormon usa man ka makapakumbinsir nga ebidensya nga si Joseph Smith usa ka propeta sa Dios? (Kon ang tawo masayud nga ang Basahon ni Mormon tinuod, nan kinahanglan usab silang masayud nga si Joseph Smith nagbuhat pinaagi sa balaanong giya aron madiskubrihan ug mahubad kini ug siya usa ka propeta sa Dios.)

• Sa unsang paagi nga ang mga investigator mapanalanginan kon magbasa sila sa Basahon ni Mormon ug makabaton og pagsaksi nga kini tinuod? (Masayud sila nga si Joseph Smith usa ka propeta, ug mahimo silang andam nga modawat sa Pagpahiuli sa ebanghleyo ni Jesukristo ug makadawat sa makaluwas nga mga ordinansa.)

Ipabasa og kusog sa usa ka estudyante ang Moroni 10:3–5. Ipangutana ang mosunod:

• Unsa nga mga lakang ang kinahanglang himoon sa usa ka tawo aron makabaton og pagsaksi nga ang Basahon ni Mormon tinuod? (Bisan kon mogamit sila og lain-laing mga pulong, ang mga estudyante malagmit mopahayag niini nga baruganan: Samtang kita mobasa, mamalandong, ug mag-ampo uban sa tinuod nga katuyoan mahitungod sa Basahon ni Mormon, ipadayag sa Dios ang katinuod niini ngari kanato pinaagi sa gahum sa Espiritu Santo.)

• Unsay gipasabut sa “mangutana uban sa tinuod nga katuyoan” (Moroni 10:4)? (Kinasingkasing nga magtinguha nga makadawat og tubag pinaagi sa Espiritu Santo ug mahimong mapasaligon nga lihukon ang gihatag nga tubag.)

Sa pagpakita nganong importante nga ang usa ka investigator mobasa sa Basahon ni Mormon ug mag-ampo uban sa tinuod nga katuyoan mahitungod sa katinuod niini, ipakita ang video nga “Invitation to Read the Book of Mormon: Jynx” (8:06).

Hununga ang video sa 0:55 ug hangyoa ang klase nga mamalandong sa makadiyot kon unsa kaha ang ilang mahunahuna ug mga pagbati kon usa pa sila sa mga misyonaryo nga nagtudlo ni Jynx. Tawaga ang pipila ka estudyante sa pagpakigbahin kon unsay ilang isulti ngadto kaniya.

Samtang magpasalida sa nahabiling bahin sa video, ikonsiderar ang pagpatan-aw sa katunga sa klase kon nganong kinahanglan man gyud nga ang mga investigator mobasa ug mag-ampo mahitungod sa Basahon ni Mormon aron makabaton og pagsaksi sa katinuod niini. Ipatan-aw sa laing katunga sa klase kon unsay gisulti sa mga misyonaryo nga nakatabang ni Jynx nga mobati og kadasig sa pagbasa sa Basahon ni Mormon. Human sa video, hisguti ang mosunod kauban sa mga estudyante:

• Unsa man ang gisulti ug gibuhat sa mga misyonaryo aron madasig si Jynx nga mobasa ug mag-ampo mahitungod sa Basahon ni Mormon?

• Unsa man ang gisulti ug gibuhat sa mga misyonaryo nga midapit sa Espiritu Santo aron pagsaksi sa ilang mga pulong?

• Nganong importante man kaayo alang sa usa ka investigator nga mobasa ug mag-ampo mahitungod sa katinuod sa Basahon ni Mormon? (Siguroa nga nasabtan sa mga estudyante nga dili paigo nga moapud-apod lang ang mga misyonaryo og mga kopya sa Basahon ni Mormon. Ang tahas sa usa ka misyonaryo mao ang pagtabang sa uban nga mobati sa kaimportante sa pagbasa ug pag-ampo mahitungod sa Basahon ni Mormon aron ilang mahibaloan nga si Joseph Smith usa ka propeta sa Dios ug nga ang ebanghelyo ni Jesukristo napahiuli na.)

Ipasabut ngadto sa klase nga karon duna na silay oportunidad nga ma-role-play ang pagdapit og usa ka tawo nga mobasa sa Basahon ni Mormon. Ipakita ang pagpaila sa Basahon ni Mormon ug ang pagpadangat sa pagdapit nga mobasa niini ug mag-ampo aron masayud nga ang mensahe niini tinuod. Dayon ipares-pares ang klase, o ikonsiderar ang paggamit sa usa sa laing gisugyot nga mga sumbanan [configuration] nga makita sa “Mga Kalihokan sa Pagtudlo” nga seksyon diha sa pasiuna niini nga manwal.

Hatagi ang mga estudyante og igong panahon sa pag-andam nga modapit og usa ka investigator nga mobasa sa Basahon ni Mormon ug mag-ampo aron masayud kon kini tinuod ba. Dapita ang mga estudyante sa pagbasa sa box nga giulohan og “Gamita ang Basahon ni Mormon sa Pagkumpirmar sa Katinuod sa Pagpahiuli,” nga nahimutang sa ibabaw sa pahina 45 sa Isangyaw ang Akong Ebanghelyo. Ang mga estudyante mahimo usab nga mogamit sa pahina 15 sa pamphlet sa misyonaryo nga giulohan og Ang Pagpahiuli sa Ebanghelyo ni Jesukristo. Kinahanglan nilang tapuson ang pangpraktis nga kalihokan pinaagi sa pagpakigbahin sa ilang pagpamatuod sa Basahon ni Mormon ug sa pagpadangat sa pagdapit nga mobasa ug mag-ampo mahitungod sa katinuod niini.

Human makabaton og oportunidad ang tanang estudyante nga makapraktis sa pagpakigbahin sa ilang pagpamatuod sa Basahon ni Mormon ug pagpadangat sa pagdapit nga mobasa ug mag-ampo, hangyoa ang mga sakop sa klase sa pagpakigbahin sa ilang mga hunahuna gikan sa ilang mga kasinatian ngadto sa tibuok klase.

Sa pagtapos nimo sa leksyon, pahinumdumi ang mga estudyante mahitungod sa mga panalangin sa pagbasa ug pagpalig-on sa ilang personal nga pagpamatuod sa Basahon ni Mormon sa dili pa moserbisyo isip full-time nga misyonaryo. Pangutan-a kon duna ba kanila ang gustong mopakigbahin sa ilang mga pagpamatuod sa Basahon ni Mormon. Ipakigbahin ang imong pagpamatuod sa Basahon ni Mormon, ug pasalagi ang mga estudyante nga makakita sila og hingpit nga kalipay sa pagdapit nila sa uban sa pagbasa niining gamhanang saksi ni Jesukristo.

Mga Pagdapit aron Molihok

Awhaga ang mga estudyante sa paggamit sa unsay ilang nakat-unan niini nga leksyon sa umaabut nga semana. Mahimo nilang ikonsiderar ang pagbuhat sa mosunod:

• Mag-ampo alang sa mas lig-on nga pagpamatuod sa Unang Panan-awon ug sa katinuod sa Basahon ni Mormon.

• Magbasa sa artikulo nga “First Vision Accounts” diha sa Gospel Topics nga seksyon sa lds.org/topics.

• Memoryahon ang istorya sa Unang Panan-awon nga narekord diha sa Joseph Smith—Kasaysayan 1:16–17. Mopakigbahin niini sa usa ka higala o sakop sa pamilya ug mohatag sa inyong pagpamatuod sa kaimportante sa panghitabo.

• Mag-ampo alang sa tabang sa pagtino og usa ka tawo nga inyong mahatagan og kopya sa Basahon ni Mormon. Molihok base sa espirituhanong mga pag-aghat nga inyong madawat.

Handout