Leksyon 11: Pagtudlo sa Plano sa Kaluwasan (Part 2)
11
Pagtudlo sa Plano sa Kaluwasan (Part 2)
Pasiuna
Ang plano sa kaluwasan naghatag og usa ka Manluluwas aron sa pagbuntog sa mga epekto sa Pagkapukan ni Adan. Pinaagi sa Pag-ula sa Manluluwas, atong mabuntog ang kamatayon, sala, ug kasub-anan. Agig dugang, mabanhaw kita ug ang matarung mobalik ngadto sa presensya sa Dios ug mahisama Kaniya. Ang umaabut nga mga misyonaryo kinahanglang dunay klaro nga panabut mahitungod sa doktrina sa plano sa kaluwasan ug andam nga mopasabut niini sa yanong paagi ug mopamatuod niini uban sa gahum.
Sa dili pa magsugod ang klase, isulat sa pisara ang mosunod:
“Ang [Juan 3:16] nag-summarize sa tibuok nga plano sa kaluwasan” (Elder Bruce R. McConkie).
Kon magsugod na ang klase, hangyoa ang mga estudyante sa pagbasa og hilum sa Juan 3:16 ug ipahunahuna kon sa unsang paagi nga kini nga bersikulo “nag-summarize sa tibuok nga plano sa kaluwasan.”
Human makabasa ug makapamalandong sa pipila ka gutlo ang mga estudyante, dapita sila sa paghisgot kon sa unsang paagi nga kini nga kasulatan nag-summarize sa plano sa kaluwasan. Kon gikinahanglan, mahimo nimong basahon ang tibuok nga pamahayag nga naa sa Juan 3:16 nga gihimo ni Elder Bruce R. McConkie (1915–85) sa Korum sa Napulog Duha ka mga Apostoles:
Imahe
Elder Bruce R. McConkie
“Kini tingali ang labing inila ug gamhanan nga nag-inusarang bersikulo sa kasulatan nga napamulong sukad. Nag-summarize kini sa tibuok nga plano sa kaluwasan, mihiusa sa Amahan, sa Anak, sa iyang maulaong sakripisyo, nga gilauman nga ang pagtuo diha kaniya makapahimo sa tumutuo sa pagbuhat og matarung nga binuhatan, ug mahangturong kahimayaan sa katapusan alang sa mga matinud-anon” (Doctrinal New Testament Commentary, 3 vols. [1965–73], 1:144).
Ipabasa og kusog sa usa ka estudyante ang unang paragraph sa seksyon nga “Ang Pag-ula” sa pahina 60 sa Isangyaw ang Akong Ebanghelyo. Dayon ipangutana:
Unsaon man ninyo sa pagsulti, sa usa ra ka sentence, nganong importante kaayo ang maulaong sakripisyo ni Jesukristo alang sa matag anak sa Dios? (Ang mga tubag sa mga estudyante kinahanglang maglakip sa doktrina nga ang Pag-ula ni Jesukristo mihimo niining posible nga mabuntog nato ang mga epekto sa Pagkapukan.)
Unsa ang mga epekto sa Pagkapukan nga masinati natong tanan? (Ang nag-unang mga epekto mao ang [1] pisikal nga kamatayon, [2] sala ug espirituhanong kamatayon [pagkabulag gikan sa Dios], ug [3] pag-antus ug kasub-anan.)
Samtang motubag ang mga estudyante, ikonsiderar ang paglista sa ilang mga tubag diha sa kolum sa pisara ubos sa heading nga “Mga Epekto sa Pagkapukan.” Dayon sulati ang kolum diha sa tuo sa heading nga “Sa unsang paagi nga ang Pag-ula nakabuntog sa mga epekto sa Pagkapukan” (o i-display kini nga table gamit ang laing pamaagi):
Mga Epekto sa Pagkapukan
Sa unsang paagi nga ang Pag-ula nakabuntog sa mga epekto sa Pagkapukan
Isangyaw ang Akong Ebanghelyo, 60–61, “Ang Pag-ula,” paragraph 6
Bahina ang klase ngadto sa tulo ka grupo, ug i-assign ang matag grupo sa pagtuon sa mga reference sa usa sa tulo ka kategoriya diha sa tsart. Hangyoa ang mga estudyante nga mangandam sa pagpakigbahin kon sa unsang paagi nga ang mga materyal nga ilang gitun-an nakatabang sa pagpasabut kon giunsa pagbuntog sa Pag-ula ni Jesukristo sa mga epekto sa Pagkapukan. Sultihi ang mga estudyante nga ang mga kasulatan diha niini nga tsart nagrepresentar sa daghang tudling nga magamit sa paghulagway sa doktrina sa Pag-ula ug nga kinahanglan silang magtuon og dugang nga mga tudling alang sa mas lawom nga pagsabut niini nga doktrina. Human sila mahatagi og igong panahon nga makatuon, dapita ang pipila ka estudyante gikan sa matag grupo sa klase sa pagpasabut kon unsay ilang gitun-an ug sa unsang paagi kini makatabang kanato nga makasabut kon sa unsang paagi nga ang Pag-ula makapanalangin kanato.
Hatagi ang mga estudyante og pipila ka minutos sa pagsulat og pipila ka sentence nga nag-summarize o nag-outline kon unsay gusto nilang itudlo sa investigator mahitungod sa Pag-ula ni Jesukristo. Human sa pipila ka minutos, ikonsiderar ang pagtawag sa pipila ka estudyante nga basahon ngadto sa klase ang unsay ilang gisulat.
Dapita ang Espiritu aron matabangan ang mga estudyante nga mobati sa kamatuoran ug kaimportante sa Pag-ula ni Jesukristo pinaagi sa pagpasalida sa video nga “For God So Loved the World” (4:48). Ipapangita sa mga estudyante ang mga paagi nga gipakita ni Jesukristo ang Iyang gugma alang sa kalibutan.
Human mapasalida ang video, ipangutana:
Usan man ang ubang mga paagi nga gipakita ni Jesukristo ang Iyang gugma alang sa uban?
Sa unsang paagi nga kining video nakatabang kaninyo nga mapasalamatan ang pangalagad ug maulaong misyon sa Manluluwas?
Dapita ang mga estudyante sa pagtan-aw og balik sa unsay ilang gisulat mahitungod sa unsay gusto nilang itudlo sa investigator mahitungod sa Pag-ula ni Jesukristo. Hatagi sila og pipila ka minutos sa pagsulat og dugang nga mga sentence nga nag-summarize kon unsay ilang gituohan ug ikapamatuod mahitungod sa Pag-ula ni Jesukristo. Human sa pipila ka minutos, i-assign ang mga estudyante nga makigpares sa laing sakop sa klase ug makig-role-play sa usag usa kon unsaon nila sa pagpamatuod ngadto sa investigator mahitungod sa Pag-ula ni Jesukristo.
Human makabaton og oportunidad ang matag estudyante sa pag-role-play, tapusa kini nga bahin sa leksyon pinaagi sa pagpangutana:
Nganong importante man alang sa mga misyonaryo nga kanunayng mopakigbahin sa ilang pagpamatuod mahitungod ni Jesukristo ngadto sa ilang gitudloan? (Mahimo nimong hatagan og gibug-aton nga usa sa mga tahas sa Espiritu Santo mao ang pagpamatuod mahitungod ni Jesukristo [tan-awa sa Juan 15:26; 3 Nephi 11:32]; busa, kon mopamatuod kita mahitungod ni Jesukristo ngadto sa uban, atong gidapit ang Espiritu Santo nga mopanghimatuod sa atong pagsaksi diha sa kasingkasing niadtong atong gitudloan.)
Awhaga ang mga estudyante sa pagkonsiderar kon unsa kaha ang ilang buhaton aron mapalambo ang ilang pagpasalamat ug pagpamatuod mahitungod ni Jesukristo ug sa Iyang Pag-ula. Pasaligi ang mga estudyante nga pinaagi sa pagpalambo sa ilang pagpamatuod mahitungod sa Manluluwas mahimo silang mas andam nga modapit sa uban nga moduol ngadto kang Kristo.
Ang Atong Mahangturon nga Destinasyon
I-refer ang mga estudyante ngadto sa diagram nga makita diha sa “Plano sa Kaluwasan” nga box sa pahina 63 sa Isangyaw ang Akong Ebanghelyo. Dapita ang mga estudyante nga tun-an una ang diagram ug dayon magdrowing og kaugalingon nilang bersyon nga dili magtan-aw sa Isangyaw ang Akong Ebanghelyo. Ang kaugalingon nilang diagram mahimong lain-lain og porma, basta naglakip kini sa mahinungdanong mga bahin sa plano sa kaluwasan. Pahinumdumi ang mga estudyante nga ang mga misyonaryo kinahanglang makapasabut sa nag-unang mga elemento sa plano sa kaluwasan sa simple nga mga termino ngadto sa investigator.
Aron matabangan ang mga estudyante nga makasabut sa sulod [content] nga makita sa tulo ka nahabiling mga seksyon sa leksyon 2 diha sa Isangyaw ang Akong Ebanghelyo (mga pahina 61–63), hangyoa ang mga estudyante nga mogahin og pipila ka minutos nga mabasa ang mga seksyon ug moila sa mga doktrina, mga baruganan, ug mga ideya nga kinahanglang mahibaloan sa mga investigator. Samtang magbasa ang mga estudyante, i-display sa pisara ang mga ulohan sa seksyon nga naa sa tsart:
Unsay kinahanglang mahibaloan sa investigator?
Ang kalibutan sa espiritu
Ang Pagkabanhaw , ang Paghukom, ug pagka-imortal
Mga gingharian sa himaya
Makatabang nga patun-an sa mga estudyante ang usa ka seksyon sa usa ka higayon ug mopakigbahin sa mga doktrina, mga baruganan, o mga ideya nga ilang nahibaloan sa dili pa mopadayon sa pagbasa sa sunod nga seksyon. Mahimo nimong dapiton ang usa ka estudyante sa pagrekord sa mga tubag sa klase ubos sa tukma nga heading diha sa pisara. Ikonsiderar ang paghangyo sa mga estudyante nga kopyahon ang tsart ngadto sa ilang mga study journal ug sulatan kini samtang maghisgot ang klase sa matag seksyon.
Ang mga pangutana sama sa mosunod mahimong makatabang sa mga estudyante sa pag-analisar sa unsay ilang gibasa:
Unsay epekto ngari kanato sa atong mga desisyon dinhi sa yuta human kita mamatay?
Sa unsang paagi nga ang atong pagsabut mahitungod sa Paghukom makaapekto sa atong mga desisyon karon?
Sa unsang paagi nga ang Pag-ula ni Jesukristo makaapekto sa matag yugto sa atong pagpakabuhi (premortal, mortal, ug postmortal)?
Nganong importante nga himoong klaro ug simple ang pagpaila niining mga kamatuoran ngadto sa uban?
Pasabta ang mga estudyante nga usa sa importante nga mga doktrina sa Pagpahiuli mao nga ang mga anak sa Dios dunay potensyal nga mahisama Kaniya. Ang atong pagsabut mahitungod sa Langitnong Amahan naghatag kanato og paglaum nga pinaagi sa Pag-ula ni Jesukristo, mahimo kitang mouswag ug makadawat sa panalangin sa kahimayaan (tan-awa sa “Kahimayaan,” diha sa Isangyaw ang Akong Ebanghelyo, pahina 68). Bisan kon sa umaabut mahimo kitang sama sa Dios, kanunay gihapon kitang mosimba Kaniya. Ang atong pag-uswag dili gayud makapausab sa Iyang pagka-Siya isip atong Amahan ug atong Dios. (Alang sa dugang impormasyon mahitungod niini nga hilisgutan, tan-awa sa artikulo sa Gospel Topics nga giulohan og “Becoming Like God” diha sa lds.org/topics.)
Ipares-pares ang klase, ug dapita ang matag pares nga mangandam sa pagtudlo og usa ka tawo mahitungod sa katuyoan sa kinabuhi ug unsay mahitabo ngari kanato human kita mamatay. Samtang mangandam sila, ang mga estudyante kinahanglang mo-refer ngadto sa mga pahina 60–63 sa Isangyaw ang Akong Ebanghelyo o sa mga pahina 10–15 sa pamphlet sa misyonaryo nga Ang Plano sa Kaluwasan, kon anaa kini. Awhaga ang mga estudyante sa paggamit og dili mominos sa usa ka kasulatan samtang magtudlo sila. Awhaga usab sila sa paggamit sa mga diagram sa plano sa kaluwasan nga ilang gihimo o sa diagram diha sa pahina 63 sa Isangyaw ang Akong Ebanghelyo. Ipasabut nga ang ilang pagtudlo kinahanglang simple ug klaro ug kinahanglang maglakip sa ilang pagpamatuod. Tuguti og igong panahon aron ang mga pares makaandam sa pagtudlo, ug dayon dapita ang matag pares nga makig-uban sa laing pares. I-assign ang usa ka parisan sa mga estudyante sa pagtudlo sa laing duha ka estudyante.
Samtang ang managkompanyon motapus sa ilang kasinatian sa pagtudlo, pahisguti sa matag grupo ang mosunod nga sila ra: Unsa ang maayong nahitabo sa pagtudlo? Unsaon man paglambo sa mga estudyante nga nagtudlo?
Dayon, pailisa sila og mga tahas [role] ug tuguti ang mga estudyante kinsa gitudloan nga mao ang motudlo sa laing parisan sa mga estudyante. Siguroa nga sila dunay panahon nga makadawat og feedback. Human makatudlo ang matag pares, dapita ang mga sakop sa klase sa pagpaambit sa ilang hunahuna gikan sa ilang mga kasinatan ngadto sa tibuok klase.
Kon itugot sa panahon, tapusa ang leksyon pinaagi sa paghatag sa imong pagpamatuod mahitungod sa plano sa kaluwasan, o dapita ang mga sakop sa klase sa pagbuhat sa samang butang.
Mga Pagdapit aron Molihok
Dapita ang mga estudyante sa pagpili og usa o sobra pa sa mosunod nga mga kalihokan nga buhaton sa gawas sa klase aron mapalambo ang ilang panabut mahitungod sa plano sa kaluwasan:
Praktisa ang pagdrowing sa diagram diha sa pahina 63 sa Isangyaw ang Akong Ebanghelyo ug ang pagpasabut sa nag-unang mga elemento sa plano sa kaluwasan, gamit ang usa ka kasulatan nga mosuporta sa matag elemento.
Ikonsiderar kon unsaon ninyo sa pagtudlo ang plano sa kaluwasan aron makatabang sa usa ka tawo nga bag-o lang namatyan og sakop sa pamilya o minahal sa kinabuhi. Pagsulat og mubo nga summary o outline sa inyong mga ideya diha sa inyong study journal:
Tun-i ang usa ka pakigpulong mahitungod sa Pag-ula ni Jesukristo gikan sa bag-o lang nga gipamulong sa kinatibuk-ang komperensya. Ilha ang mga baruganan gikan sa pakigpulong nga makatabang kaninyo nga mas masabtan ang Pag-ula ni Jesukristo. Paghimo og lista sa mga paagi nga napanalanginan kamo sa Pag-ula.
Pag-ampo alang sa oportunidad sa pagpakigbahin sa plano sa kaluwasan ngadto sa usa ka tawo nga mahimong mapanalanginan pinaagi sa mas maayo nga pagsabut sa plano sa Langitnong Amahan. Dayon molihok pinaagi sa pagtuo ug motudlo niining doktrina aron sa pagpanalangin sa kinabuhi sa tawo.