Pagtudlo sa Ebanghelyo ni Jesukristo (Part 1)

Pasiuna

Ang ebanghelyo ni Jesukristo naglakip sa mahangturong mga doktrina, mga baruganan, mga balaod, mga pakigsaad, ug mga ordinansa nga gikinahanglan aron ang katawhan makasulod og balik ngadto sa presensya sa Dios ug mahimaya didto sa celestial nga gingharian. Ang unang mga baruganan ug mga ordinansa sa ebanghelyo mao ang hugot nga pagtuo diha ni Ginoong Jesukristo, paghinulsol, bunyag pinaagi sa pagpaunlod, ug gasa sa Espiritu Santo. Ang umaabut nga mga misyonaryo kinahanglang andam nga motabang sa mga investigator nga makabaton og hugot nga pagtuo diha ni Jesukristo ug maghinulsol sa ilang mga sala sa dili pa sila mabunyagan ug makadawat sa Espiritu Santo.

Advance nga Pagpangandam

Tun-i ang Mosiah 3:19; 4:1–3; 5:2; ug Alma 36.
Tun-i ang Isangyaw ang Akong Ebanghelyo, mga pahina 70–74.
Pag--andam aron i-display ang hulagway nga Pagkakabig ni Alma nga Batan-on] (Libro sa mga Hulagway sa Ebanghelyo [2009], nu. 77) o susama nga hulagway.
Pag-andam aron ipasalida ang video nga “Jesus Christ Is the Way” (5:02), nga anaa sa LDS.org.
Pagpakopya sa handout nga giulohan og “Repentance [Paghinulsol],” nga makita sa katapusan sa leksyon, nga gamiton uban sa ideya sa pagtudlo kalabut sa paghinulsol (opsyonal).

Mga Sugyot alang sa Pagtudlo

Pinaagi kang Kristo Mahimo Kita nga Malimpyohan gikan sa Sala

Aron matabangan ang mga estudyante nga maandam sa pagkat-on gikan sa leksyon, isulat sa pisara kini nga pangutana sa dili pa magsugod ang klase:

Sa unsang paagi nga ang sumbanan sa kalibutan sa husto ug sayop lahi kay sa sumbanan sa Langitnong Amahan?

Human magsugod ang klase, dapita ang pipila ka estudyante nga tubagan ang pangutana diha sa pisara. Human makatubag ang pipila ka estudyante, ipabasa og kusog sa usa ka estudyante ang box nga giulohan og “Sala” diha sa pahina 71 sa Isangyaw ang Akong Ebanghelyo. Dayon ipangutana:

Nganong importante man alang sa mga investigator nga masabtan kon unsa ang sala ug unsa ang mga sangputanan niini sa dili pa magkat-on mahitungod sa ebanghelyo ni Jesukristo?

Isulat sa pisara ang mosunod nga pangutana ug dapita ang mga estudyante sa pagpangita sa tubag samtang magtuon sila sa seksyon nga “Pinaagi kang Kristo Mahimo Kita nga Malimpyohan gikan sa Sala” diha sa mga pahina 70–71 sa Isangyaw ang Akong Ebanghelyo.

Unsa ang pipila ka mga kamatuoran nga gitudlo diha niini nga seksyon nga mahimong makatabang sa mga investigator nga magtinguha nga mas mahiduol kang Jesukristo?

Human mahatagi og igong panahon ang mga estudyante nga makabasa, dapita ang mga estudyante sa pagpakigbahin sa unsay ilang nakit-an. Ang ilang mga tubag mahimong maglakip sa mosunod nga mga kamatuoran:

Gipadala sa Dios ang Iyang Pinalanggang Anak, si Jesukristo, nganhi sa kalibutan aron makabaton kita sa posibilidad nga makabalik sa pagpuyo sa Iyang presensya human kita mamatay.
Pinaagi lamang sa grasya ug kalooy sa Manluluwas nga malimpyo kita gikan sa sala.
Pinaagi sa Pag-ula ug Pagkabanhaw ni Jesukristo, ang tanang tawo madala pagbalik ngadto sa presensya sa Ginoo aron pagahukman.
Walay mahugaw nga butang nga makapuyo sa presensya sa Dios.
Si Jesukristo mirepresentar kanato ug miantus sa silot alang sa atong mga sala.
Si Jesukristo mopasaylo sa atong mga sala kon kita modawat Kaniya, maghinulsol, ug motuman sa Iyang mga sugo.

Sunod, hatagi ang mga estudyante og pipila ka minutos nga makatuon o makamarka og pipila ka tudling sa kasulatan diha sa mga paragraph nga bag-o lang nilang gibasa o diha sa Pagtuon sa Kasulatan nga box sa pahina 71 nga naghulagway sa usa sa mga baruganan nga bag-o lang nilang natino. Ikonsiderar ang pagpapili sa katunga sa klase og mga tudling diha sa mga paragraph nga bag-o lang nilang gibasa ug ang laing katunga sa pagpili og mga tudling diha sa Pagtuon sa Kasulatan nga box. Hangyoa ang mga estudyante nga mangandam sa pagpasabut kon unsaon nila paggamit ang usa o duha niadtong mga tudling sa kasulatan aron matabangan ang usa ka investigator nga makasabut ug makapasalamat kon unsay nabuhat sa Langitnong Amahan ug sa Iyang Anak nga si Jesukristo aron sa pagtabang kanato nga mabuntog ang mga epekto sa sala. Human sa pipila ka minutos, dapita ang pipila ka estudyante sa pagpasabut sa unsay ilang nakat-unan.

Hugot nga Pagtuo diha kang Jesukristo

Iparibyu sa mga estudyante ang pamahayag mahitungod sa katuyoan isip usa ka misyonaryo nga makita diha sa box nga giulohan og “Ang Inyong Katuyoan” sa pahina 1 sa Isangyaw ang Akong Ebanghelyo. Dayon ipangutana:

Unsa man ang kalainan tali sa (1) pagtabang sa usa ka tawo nga “moduol ngadto kang Kristo” ug makabig ngadto sa Iyang gipahiuli nga ebanghelyo ug (2) sa pagtabang lamang sa usa ka tawo nga mamiyembro sa Simbahan?
Nganong mas importante man nga ang mga misyonaryo motabang sa mga tawo nga moduol ngadto kang Kristo kay sa motabang kanila nga mamiyembro sa Simbahan?

Dapita ang mga estudyante nga tun-an ang unang paragraph sa seksyon nga giulohan og “Hugot nga Pagtuo kang Jesukristo” sa pahina 71 sa Isangyaw ang Akong Ebanghelyo. Samtang magtuon sila, ipapangita sa mga estudyante ang mga paagi nga ang hugot nga pagtuo kang Jesukristo makatabang sa usa ka tawo nga makabig ngadto sa Iyang gipahiuli nga ebanghelyo. Dayon ipangutana:

Gikan sa inyong nabasahan, unsa man ang buot ipasabut sa pagbaton og hugot nga pagtuo kang Jesukristo?
Sa unsang paagi nga ang hugot nga pagtuo kang Jesukristo makapahimo sa usa ka tawo nga makabig ngadto sa Iyang gipahiuli nga ebanghelyo?

Isulat sa pisara: Ang hugot nga pagtuo kang Jesukristo moresulta ngadto sa paglihok. Dapita ang mga estudyante sa pagbasa sa nahabilin sa “Hugot nga Pagtuo kang Jesukristo” diha sa mga pahina 71–72 sa Isangyaw ang Akong Ebanghelyo. Samtang magbasa sila, dapita sila nga markahan ang pipila ka aksyon nga nagpakita sa hugot nga pagtuo sa usa ka tawo ngadto kang Jesukristo ug sa Iyang Pag-ula. Human sa pipila ka minutos, ipangutana:

Unsa ang ubang mga aksyon nga mahimong magpakita nga ang usa ka investigator nagpalambo og pagtuo kang Jesukristo? (Ang mga tubag mahimong maglakip sa: paghinulsol, pagkat-on ug pagkahisama sa Manluluwas, pagtuman sa mga sugo, paglikay sa sala, pag-ampo alang sa kalig-on nga makabuntog sa tintasyon, pagkat-on sa pulong sa Dios, ug pagtuman sa mga pasalig [commitment] nga mosunod sa mga baruganan sa ebanghelyo.)
Sumala sa unsay inyong nabasahan, kon mopakita kita og hugot nga pagtuo kang Jesukristo, unsaon man Niya sa pagpanalangin kanato sa atong inadlaw nga kinabuhi? (Ang mga tubag mahimong maglakip sa: mohatag Siya kanato og gahum nga masagubang ang mga hagit sa kinabuhi; motabang Siya kanato nga mausab ang mga tinguha sa atong kasingkasing; moayo Siya kanato sa pisikal ug sa espiritwal nga paagi.)

Ipasulat sa mga estudyante ang mga tubag sa mosunod nga mga pangutana diha sa ilang mga study journal:

Sa unsang paagi nga ang inyong hugot nga pagtuo kang Jesukristo nakapadasig kaninyo sa paglihok sa mga paagi nga gihulagway diha niini nga seksyon?
Unsa pa ang lain ninyong mabuhat aron mas mapakita nga kamo dunay hugot nga pagtuo kang Jesukristo?

Ipares-pares ang mga estudyante o pinaagi sa mga companionship. Dapita ang mga parisan sa pag-andam og duha o tulo ka minutos nga leksyon mahitungod sa hugot nga pagtuo kang Jesukristo. Samtang mangandam sila, ipagamit sa mga estudyante ang materyal diha sa Isangyaw ang Akong Ebanghelyo, mga pahina 71–72, lakip na ang usa o duha ka kasulatan gikan sa Pagtuon sa Kasulatan nga box. Ang mga estudyante mahimo usab nga mogamit sa pamphlet sa misyonaryo nga giulohan og Ang Ebanghelyo ni Jesukristo. Human makabaton og igong panahon nga makaandam ang mga estudyante, organisaha ang mga parisan ngadto sa mga grupo sa tag-upat ka estudyante (duha ka parisan sa matag grupo). I-assign ang usa ka parisan sa mga estudyante sa pagtudlo sa laing parisan. Ipasabut nga kinahanglan silang mogamit sa ilang kaugalingong mga pulong ug magmahimong simple ug klaro samtang magtudlo sila.

Sa pagtapos sa mga estudyante sa ilang kasinatian sa pagtudlo, pahisguti sa ginagmayng grupo nga sila ra kon unsay maayong nahitabo, unsay ilang gibati nga hagit sa pagtudlo ug ngano man, ug sa unsang paagi nga ang ilang pagtudlo nakatabang niadtong gitudloan nga mobati sa kaimportante sa pagbaton og hugot nga pagtuo kang Jesukristo.

Dayon, magpuli-puli og tahas [role] ug tugutan ang laing parisan nga motudlo. Siguroa nga mahatagan sila og panahon nga makadawat usab og feedback.

Sa pagtapos niini nga pangpraktis nga kalihokan [practice activity], pangutan-a ang mga estudyante kon unsa ang ilang mga pangutana o unsa nga mga hunahuna ang ilang nabatunan. Kon magpanuko ang mga estudyante sa pagtubag, mahimo nimong ipangutana, “Unsa man ang pipila ka mga butang nga inyong giganahan sa inyong nadungog gikan niadtong nagtudlo kaninyo?” Pangutan-a kon aduna ba sa mga estudyante ang gustong mopakigbahin ngadto sa klase og usa ka kasinatian gikan sa ilang kinabuhi sa dihang napanalanginan sila tungod sa pagbaton og hugot nga pagtuo kang Jesukristo.

Paghinulsol

I-display ang hulagway ni Alma ug ang anak nga mga lalaki ni Mosiah (tan-awa sa Libro sa mga Hulagway sa Ebanghelyo, 77), ug dapita ang usa ka estudyante sa pag-summarize og daklit sa istorya sa pagkakabig ni Alma nga Batan-on (tan-awa sa Alma 36:6–24). Dayon papuli-puliha sa pagbasa og kusog ang pipila ka estudyante sa Alma 36:13, 17–21, ug 23–25.

Dayon ipangutana:

Giunsa man sa pagpakita ni Alma nga aduna siyay hugot nga pagtuo ni Jesukristo?
Unsa man ang nahitabo isip resulta sa pagpakita ni Alma og hugot nga pagtuo?
Unsa man ang resulta sa kinasingkasing nga paghinulsol ni Alma?

Hatagi ang mga estudyante og usa ka minuto sa pagsulat diha sa ilang mga study journal og usa ka sentence nga depinisyon sa paghinulsol. Dapita ang pipila ka estudyante sa pagbasa sa ilang mga sentence ngadto sa klase. Aron matabangan ang imong mga estudyante nga masilsil diha ilang hunahuna ang simple nga definition sa paghinulsol, i-display ang mosunod nga kinutlo gikan ni Elder Neil L. Andersen sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog.

“Kon kita makasala, kita mopalayo gikan sa Dios. Kon kita maghinulsol, kita mobalik ngadto sa Dios. …

“… Ang paghinulsol mao ang pagpalayo gikan sa pipila ka mga butang, sama sa pagkadili matinuoron, garbo, kasuko, ug dautang mga hunahuna, ug mopaingon ngadto sa uban nga mga butang, sama sa pagkamaayo, pagkadili hakog, pagpailub, ug pagka-espirituhanon. Kini ang ‘pagduol og usab’ ngadto sa Dios” (“Paghinulsol … Aron Ako Moayo Kaninyo,” Ensign o Liahona, Nob. 2009, 40–41).

Sa unsang paagi nga kining simple nga depinisyon makatabang ninyo sa pagpasabut sa kahulugan sa paghinulsol? (Human makatubag ang mga estudyante, isulat sa pisara kini nga baruganan: Ang paghinulsol mao ang pagbalik ngadto sa Dios.)

Aron matabangan ang mga estudyante nga mas makasabut sa proseso ug sa mga resulta sa paghinulsol, ikonsiderar nga tun-an sa mga estudyante ang Mosiah 3:19; 4:1–3; ug 5:2. Samtang magtuon sila, ipaila sa mga estudyante ang mga pulong nga makatabang sa pagtino kon unsay buot ipasabut sa paghinulsol. Human makahatag og igong panahon, hangyoa ang pipila ka mga estudyante sa pagpasabut ngadto sa klase kon unsay ilang nakit-an. Dayon ipangutana:

Unsa nga ebidesnya ang inyong nakit-an diha niini nga mga bersikulo nga ang katawhan ni Haring Benjamin mipakita og hugot nga pagtuo aron sa katapusan makadawat og kapasayloan sa ilang mga sala?

Iapud-apod ang mga handout nga naglangkob sa mosunod nga table, o drowinga kini diha sa pisara ug ipakopya kini sa mga estudyante ngadto sa ilang mga study journal:

Unsa ang paghinulsol?	Unsaon man nato sa paghinulsol?	Unsa man ang mga bunga o ebidensya sa paghinulsol?
Kausaban sa hunahuna, pagtuo, kinaiya	Mobati og pagbasol o diosnong kasubo	Modawat sa kalooy ni Kristo

Hangyoa ang mga estudyante sa pagtuon sa seksyon nga giulohan og “Paghinulsol” diha sa mga pahina 72–73 sa Isangyaw ang Akong Ebanghelyo. Samtang magbasa sila, pasulati sa mga estudyante ang mga kolum sa ilang mga tsart o mga handout gamit ang mga pulong, o mga sentence gikan sa Isangyaw ang Akong Ebanghelyo. Aron matabangan ang mga estudyante nga makita ang mga matang sa mga pulong nga mahimo nilang ilakip, usa ka example ang gihatag diha sa matag kolum. Kon mahuman na, ang ilang mga tsart mahimong makita sama sa mosunod:

Unsa ang paghinulsol?	Unsaon man nato sa paghinulsol?	Unsa man ang mga bunga o ebidensya sa paghinulsol?
Kausaban sa hunahuna, pagtuo, kinaiya Bag-ong panglantaw sa kaugalingon, sa Dios, ug sa kalibutan Usbon ang atong kinabuhi aron mahisubay kini sumala sa kabubut-on sa Dios. Magpalayo sa sala ug dili na mobuhat niini pag-usab Padayon nga mosulay sa pagkorihir sa mga kalapasan ug molambo	Mobati og pagbasol o diosnong kasubo Mohunong sa pagbuhat og sayop nga mga butang Padayon sa pagbuhat og maayong mga butang Moila sa mga sala Mokumpisal sa mga sala Mangayo og pasaylo sa Dios Mokorihir sa mga problema tungod sa atong mga aksyon Mobatok sa bisan unsa nga tinguha sa pagpakasala Mopalambo og mga kinaiya nga sama kang Kristo, motubo sa kahibalo, moserbisyo Mopakita og gugma alang sa Dios pinaagi sa pagtuman	Modawat sa kalooy ni Kristo Ang panglantaw sa kaugalingon ug sa kalibutan mausab Makasabut sa atong relasyon ngadto sa Dios Ang tinguha nga mosunod sa Dios mag-anam og kalig-on Mobati sa pagpasaylo sa Dios Mobati sa kalinaw sa Dios Ang pagbati nga dunay sala ug kasubo mahanaw Mobati sa Espiritu nga mas abunda Mas andam nga mopuyo uban sa Dios ug ni Jesukristo Mahimong mas sama ni Jesus Mobati og hingpit nga kalipay

Unsa ang paghinulsol?

Unsaon man nato sa paghinulsol?

Unsa man ang mga bunga o ebidensya sa paghinulsol?

Kausaban sa hunahuna, pagtuo, kinaiya

Bag-ong panglantaw sa kaugalingon, sa Dios, ug sa kalibutan

Usbon ang atong kinabuhi aron mahisubay kini sumala sa kabubut-on sa Dios.

Magpalayo sa sala ug dili na mobuhat niini pag-usab

Padayon nga mosulay sa pagkorihir sa mga kalapasan ug molambo

Mobati og pagbasol o diosnong kasubo

Mohunong sa pagbuhat og sayop nga mga butang

Padayon sa pagbuhat og maayong mga butang

Moila sa mga sala

Mokumpisal sa mga sala

Mangayo og pasaylo sa Dios

Mokorihir sa mga problema tungod sa atong mga aksyon

Mobatok sa bisan unsa nga tinguha sa pagpakasala

Mopalambo og mga kinaiya nga sama kang Kristo, motubo sa kahibalo, moserbisyo

Mopakita og gugma alang sa Dios pinaagi sa pagtuman

Modawat sa kalooy ni Kristo

Ang panglantaw sa kaugalingon ug sa kalibutan mausab

Makasabut sa atong relasyon ngadto sa Dios

Ang tinguha nga mosunod sa Dios mag-anam og kalig-on

Mobati sa pagpasaylo sa Dios

Mobati sa kalinaw sa Dios

Ang pagbati nga dunay sala ug kasubo mahanaw

Mobati sa Espiritu nga mas abunda

Mas andam nga mopuyo uban sa Dios ug ni Jesukristo

Mahimong mas sama ni Jesus

Mobati og hingpit nga kalipay

Human mahatagi og igong panahon ang mga estudyante nga makompleto ang ilang mga tsart, dapita ang mga estudyante sa paghisgot sa mga pulong nga ilang gilakip diha sa ilang mga tsart kauban ang laing sakop sa klase. Ikonsiderar ang pagpangutana sa klase og pipila o tanan sa mosunod nga mga pangutana aron mas mapalambo ang panabut sa mga estudyante mahitungod sa mga doktrina ug mga baruganan nga ilang gibasa:

Sa unsang paagi nga ang mga baruganan nga inyong natino diha sa una ug sa ikaduhang kolum makatabang kaninyo aron mahibalo kon ang investigator tinuod nga naghinulsol?
Sumala sa unsay inyong gisulat diha sa ikatulong kolum, unsa nga mga panalangin ang moabut tungod sa paghinulsol, agig dugang sa pagdawat og kapasayloan sa mga sala?
Ikonsiderar ang mga item diha sa una ug ikatulong kolum. Nganong kinahanglan man nga magbaton kita og hugot nga pagtuo kang Kristo kon kining mga butanga tinuod gayud nga mahitabo?

Samtang motubag ang mga estudyante, mahimo nimong ipasabut nga ang mga misyonaryo magtudlo sa ebanghelyo aron motabang sa mga tawo nga makaugmad og hugot nga pagtuo kang Jesukristo ug aron madasig sila nga maghinulsol. Ang hugot nga pagtuo kang Jesukristo ug ang paghinulsol mao ang mga kondisyon aron makadawat og mga panalangin nga gikan sa Pag-ula. Ang paghinulsol makatabang usab sa mga investigator nga mas masuod ngadto sa Langitnong Amahan ug ni Jesukristo. Aron maandam ang mga estudyante sa pagpraktis og tudlo mahitungod sa paghinulsol, ipakigbahin ang mosunod nga sitwasyon ngadto sa klase:

Ikaw ug ang imong kompanyon nagtudlo og duha ka roommate sulod sa tulo ka semana. Ang usa kanila miuswag gayud og maayo. Ang laing roommate daw nawad-an og interes ug karon mobiya sa kwarto kon magsugod na ang inyong leksyon. Sa dihang sa katapusan kamo dunay oportunidad nga mapangutana ang dili interesado nga roommate, iyang gipasabut nga nahibalo siya nga wala siya magpakabuhi sumala sa kabubut-on sa Dios, pero nagpakabuhi siya nga ingon na gayud niini sa tibuok niyang kinabuhi ug mituo nga ingon na gayud siya niini, ug wala na kaayoy dugang mahimo mahitungod niini.

Ipares-pares ang mga estudyante o pinaagi sa mga companionship. Hatagi ang mga parisan og igong panahon sa pag-andam kon unsaon nila sa pagtinabangay sa pagtudlo sa laing parisan sa mga estudyante sa tulo o upat ka minuto nga mubo nga leksyon mahitungod sa paghinulsol. Dasiga ang mga estudyante nga mangandam sa pag-role-play sa pagtudlo sa duha ka roommate niana nga sitwasyon. Ipasabut nga ang ilang pagtudlo kinahanglang simple, klaro, ug naka-focus sa mga panginahanglan sa mga roommate. Kinahanglang ikonsiderar nila kon unsaon nila sa pagtabang ang nawad-an sa interes nga roommate nga makasabut nganong kinahanglan siya nga mag-usab ug unsaon sa pagtabang nga siya makaamgo nga pinaagi sa panabang sa Manluluwas, ang paghinulsol posible. Ipagamit sa mga estudyante ang materyal diha sa Isangyaw ang Akong Ebanghelyo, mga pahina 72–73, o sa pamphlet sa misyonaryo nga giulohan og Ang Ebanghelyo ni Jesukristo. Awhaga sila sa paglakip og usa o duha ka tudling sa kasulatan nga nagpakita sa kaimportante sa paghinulsol.

Organisaha ang mga estudyante ngadto sa ginagmay nga grupo, nga dunay duha ka parisan sa matag grupo. I-assign ang usa ka parisan sa mga estudyante sa pagtudlo sa laing parisan, nga mao ang modala sa papel [role] sa mga roommate nga gihulagway diha sa sitwasyon. Pasabta ang mga estudyante nga kon modala sila sa papel sa mga investigator, kinahanglang mobati nga sila gawasnong mopahayag og potensyal nga tinuorayng mga problema pero kinahanglang dili mosulay nga mahimong dramatic o antipatiko ngadto sa mga estudyante nga nagtudlo.

Sa pagtapos sa mga estudyante sa ilang kasinatian sa pagtudlo, pahisguti sa grupo nga sila ra kon unsay maayong nahitabo ug unsay mas maayo pa untang nahimo sa mga magtutudlo.

Dayon papuli-puliha og mga papel ang mga estudyante aron ang laing parisan sa mga estudyante dunay oportunidad nga makapraktis og tudlo. Siguroa nga sila dunay panahon nga makadawat og feedback.

Human sa pag-role-play, pangutan-a ang mga estudyante kon unsa nga mga pangutana o hunahuna ang ilang naangkon gikan sa kasinatian sa pagtudlo.

Aron matabangan ang mga estudyante nga mobati sa kamatuoran ug sa kaimportante sa paghinulsol nga mao ang paagi aron makabalik ang mga tawo ngadto sa Dios, ipakita ang video nga “Jesus Christ Is the Way” (5:02).

Human mapasalida ang video, ipangutana:

Unsa nga ebidensya ang inyong nakita dinhi niini nga video nga kini nga sister tinuod gayud nga nausab pinaagi sa paghinulsol ug nga siya midangup og balik ngadto sa Dios?
Unsa ang inyong gibati samtang nagtan-aw kamo kon sa unsang paagi nga ang mensahe sa ebanghelyo nakatabang niini nga sister nga mausab ug modangup ngadto sa Dios?

Tapusa pinaagi sa pagpangutana sa mga estudyante kon aduna ba kanila ang gustong mopakigbahin sa ilang pagpamatuod mahitungod sa hugot nga pagtuo ug paghinulsol ug mosulti nganong nagtinguha sila sa pagpakigbahin sa ebanghelyo. Tapusa pinaagi sa pagpakigbahin usab sa imong pagpamatuod.

Mga Pagdapit aron Molihok

Dapita ang mga estudyante nga magkat-on og dugang pa mahitungod sa mga panalangin sa pagbaton og hugot nga pagtuo kang Jesukristo ug sa pagdawat og kapasayloan sa sala ug hingpit nga kalipay pinaagi sa paghinulsol pinaagi sa pagbuhat sa usa o dugang pa sa mosunod nga gisugyot nga mga kalihokan:

Itudlo ang leksyon sa umaabut nga family home evening mahitungod sa kaimportante sa hugot nga pagtuo kang Jesukristo ug paghinulsol.
Tun-i ang mga tudling sa kasulatan mahitungod sa hugot nga pagtuo nga anaa sa Pagtuon sa Kasulatan nga box diha sa pahina 72 sa Isangyaw ang Akong Ebanghelyo. Markahi o i-highlight ang gusto ninyong gamiton sa pagtudlo sa uban sa inyong pagmisyon.
Gamita ang Giya ngadto sa mga Kasulatan ug ang mga pulong sa modernong mga propeta ug mga apostoles sa pagtuon mahitungodt sa doktrina sa paghinulsol. Isulat ang unsay inyong nakat-unan diha sa study journal. Hunahunaa kon kamo duna bay pagpamatuod mahitungod niini nga doktrina nga inyong mapakigbahin sa uban panahon sa inyong misyon. Lig-una ang inyong pagtuo sa baruganan sa paghinulsol pinaagi sa pagtinguha nga maghinulsol sa matag adlaw, ug irekord ang inyong mga kasinatian diha sa inyong study journal.
Gamita ang mga himan diha sa internet sama sa social media aron i-post ang video nga “Jesus Christ Is the Way” (o laing video kalabut sa Manluluwas ug sa Iyang Pag-ula) aron ma-view sa uban. Ilakip ang usa ka pagpasabut ngano nga ang video makahuluganon nganha kaninyo.”