Institute
Leksyon 2: Ang Atong Panginahanglan sa Pag-ula

2

Ang Atong Panginahanglan sa Pag-ula

Pasiuna

Ang Pag-ula ni Jesukristo mao ang labing importante nga bahin sa plano sa Dios alang sa kaluwasan. Pinaagi sa Iyang Pag-ula, gituman ni Jesukristo ang mga katuyoan sa Iyang Amahan pinaagi sa pagtubos kanato gikan sa espiritwal ug pisikal nga kamatayon, motagbaw sa mga gipangayo sa kaangayan, ug molimpyo kanato gikan sa atong indibidwal nga mga sala pinaagi sa paghinulsol. Ang Manluluwas mohupay usab kanato diha sa atong mga kahuyang, mohatag kanato og kalig-on aron matuman ang mga butang nga dili nato mahimo kon kita ra, ug mohatag kanato og paglaum nga makabalik kita sa pagpuyo uban Kaniya ug sa Langitnong Amahan. Ang full-time nga mga misyonaryo moapil sa buhat sa kaluwasan pinaagi sa pagtabang sa uban nga makakat-on kon unsaon sa pagdawat sa mga panalangin sa Pag-ula pinaagi sa hugot nga pagtuo diha ni Jesukristo, paghinulsol, bunyag, pagkumpirma, ug paglahutay sa katapusan.

Advance nga Pagpangandam

Mga Sugyot alang sa Pagtudlo

Nganong Gikinahanglan Nato ang Pag-ula

Sugdi pinaagi sa pagpangutana sa mga estudyante sa mosunod:

  • Sa unsang paagi nga masabtan sa mga tawo nga gikinahanglan nila ang Pag-ula ni Jesukristo sa ilang kinabuhi?

Sunod, i-display ang mosunod nga pamahayag:

Presidente Ezra Taft Benson

“Ingon nga ang tawo dili magtinguha og pagkaon hangtud nga gutumon siya, dili usab siya magtinguha sa kaluwasan ni Kristo hangtud nga masayud siya nganong nagkinahanglan siya ni Kristo.

“Walay usa ang igo ug tukma nga nasayud nganong gikinahanglan niya si Kristo hangtud nga iyang masabtan ug madawat ang doktrina sa Pagkapukan ug ang epekto niini nganha sa tanang katawhan” (Presidente Ezra Taft Benson, A Witness and a Warning [1988], 33).

Dayon ipangutana:

  • Unsa man ang atong gipasabut kon maghisgot kita kalabut sa Pagkapukan ni Adan?

I-display ang mosunod nga kinutlo ug ipabasa kini og kusog sa usa ka estudyante ngadto sa klase:

“Tungod kay si Adan ug si Eva … mikaon sa bunga sa kahoy sa kahibalo sa maayo ug sa dautan, sila gihinginlan gikan sa atubangan sa Ginoo (tan-awa sa D&P 29:40–41). Sa lain nga pagkasulti, sila nakasinati og espirituhanon nga kamatayon. Nahimo usab sila nga mortal—ubos sa pisikal nga kamatayon. Kini nga espiritwal ug pisikal nga kamatayon mao ang gitawag og Pagkapukan. …

“Isip mga kaliwatan ni Adan ug ni Eva, atong napanunod ang napukan nga kahimtang sa panahon sa pagkamortal (tan-awa sa Alma 42:5–9, 14). Kita gisalikway sa atubangan sa Ginoo ug ubos na sa pisikal nga kamatayon. Nahimutang usab kita sa usa ka kahimtang [nga adunay] pagbatok [oposisyon], diin kita gisulayan pinaagi sa mga kalisdanan sa kinabuhi ug sa mga tintasyon sa kaaway (tan-awa sa 2 Nephi 2:11–14; D&P 29:39; Moises 6:48–49)” (Matinud-anon sa Tinuhoan [2004], 146).

Tabangi ang mga estudyante nga mahibalo sa mga doktrina nga gitudlo niini nga kinutlo pinaagi sa pagpangutana:

  • Sa unsang paagi nga ang Pagkapukan ni Adan nakaapekto sa matag usa kanato isip mga kaliwatan ni Adan ug ni Eva? (Sama ni Adan ug ni Eva, kita usab ubos sa pisikal ug espiritwal nga kamatayon. Nagpuyo kita sa napukan nga kalibutan ug ubos sa mga kalisdanan sa kinabuhi ug sa mga tintasyon sa kaaway. Nahibulag kita gikan sa presensya sa Amahan ug nagkinahanglan sa tabang sa Manluluwas aron makabalik ngadto Kaniya.)

Isulat sa pisara ang mosunod nga mga scripture reference, ug hatagi ang mga estudyante og pipila ka minutos aron matun-an kini:

Mga Taga-Roma 3:23

2 Nephi 9:6–10

Alma 42:9–11, 14

Samtang nagtuon sila, awhaga ang mga estudyante sa pagpangita kon sa unsang paagi nga ang matag usa kanato naapektuhan sa Pagkapukan ni Adan ug ni Eva?

  • Giunsa sa pagpasabut niining mga kasulatan kon sa unsang paagi nga ang matag usa kanato naapektuhan sa Pagkapukan ni Adan ug ni Eva? (Samtang motubag ang mga estudyante, isulat sa pisara ang ilang mga tubag. Bisan kon magkalain-lain ang ilang mga tubag, mahimong susama kini sa mosunod: Kitang tanan makasala ug mahimong hugaw sa atubangan sa Dios; tungod kay kita makasala, mapahilayo kita gikan sa presensya sa Dios; makasinati kita og pisikal nga kamatayon; nagpuyo kita sa usa ka napukan nga kalibutan ug kinahanglan gayud nga mabuntog ang “kinaiyanhon nga tawo” [Mosiah 3:19].)

Pangutan-a ang mga estudyante kon unsa ang ilang mga pangutana mahitungod sa mga doktrina ug mga pulong nga ilang nakit-an. Tuguti nga maghisgot ang klase aron masusi kini nga mga pangutana. Dayon ipangutana:

  • Sa unsang paagi nga kining mga kasulatan makatabang sa pagpasabut kon nganong nagkinahanglan kitang tanan ni Jesukristo? (Ang Pag-ula ni Jesukristo mitubos kanato gikan sa Pagkapukan ni Adan ug gikan sa atong kaugalingong mga lihok sa pagkamasinupakon.

Ipasabut nga isip kabahin sa maloloy-ong plano sa Dios, ang Pag-ula ni Jesukristo nagtugot kanato nga makalingkawas sa “mangtas” nga kamatayon ug impyerno (tan-awa sa 2 Nephi 9:10), nga nangahulugan ug pisikal ug espiritwal nga kamatayon. Kitang tanan mabanhaw. Pinaagi sa Pag-ula ni Jesukristo, mahimo kitang malimpyuhan sa atong mga sala kon maghinulsol kita. Kon wala si Jesukristo, dili lang kay malaglag kita, apan maulipon kita sa yawa sa tibuok kahangturan.

Paghatag og mubo nga pagpamatuod mahitungod sa kaalam ug kalooy sa plano sa Dios. Pasaligi ang mga estudyante nga tanang resulta sa Pagkapukan mahimong mabuntog pinaagi sa Pag-ula ni Jesukristo.

Ang Kaimportante sa Pagtudlo sa Pag-ula

video iconIkonsiderar ang pagbasa o pagpasalida sa video clip sa mosunod nga pamahayag ni Elder Richard G. Scott sa Korum sa Napulog Duha ka mga Apostoles. Ipapangita sa mga estudyante kon nganong importante alang kanato nga palambuon ang atong panabut mahitungod sa Pag-ula.

Elder Richard G. Scott

“Samtang kamo naghinumdom sa Pagkabanhaw ug sa bugti nga Iyang gibayad ug sa gasa nga gihatag pinaagi sa Pag-ula, pamalandonga kon unsay gitudlo sa mga kasulatan mahitungod niadtong sagrado nga mga panghitabo. Ang inyong personal nga pagsaksi mahitungod sa katinuod niini malig-on. Kinahanglan nga kini mas labaw pa kay sa mga baruganan nga inyong gimemorya. Kinahanglan kining mahimong bahin na sa inyong pagkatawo isip usa ka gamhanang panalipod batok sa nagkadaghan nga kadautan nga nakaapekto sa atong kalibutan. …

“Kon wala ang Pag-ula, ang plano sa kalipay sa Amahan sa Langit dili unta hingpit nga magamit. Ang Pag-ula naghatag sa tanan og oportunidad sa pagbuntog sa mga sangputanan sa mga sayop nga nahimo sa kinabuhi. Kon motuman kita og balaod, makadawat kita og panalangin. Kon mosupak kita og balaod, wala nay sobra gikan sa ninglabay nga kamasulundon aron sa pagtagbaw sa mga gipangayo sa kaangayan alang nianang nasupak nga balaod. Ang Pag-ula sa Manluluwas nagtugot kanato sa paghinulsol sa bisan unsa nga pagsupak ug sa ingon makalikay sa mga silot nga mapahamtang unta sa hustisya.

“Ang akong balaang pagtahud ug pasalamat alang sa Pag-ula sa Balaan sa Israel, sa Prinsipe sa Pakigdait ug sa atong Manunubos, padayon nga milambo samtang naningkamot ako nga makasabut og dugang pa kalabut niini. Nakaamgo ako nga walay mortal nga hunahuna nga makasabut sa igong paagi, gani walay tukmang mapadayag sa dila sa tawo, sa hingpit nga kahulugan sa tanan nga nabuhat ni Jesukristo alang sa mga anak sa atong Langitnong Amahan pinaagi sa Iyang Pag-ula. Apan mahinungdanon nga ang matag usa kanato makat-on kutob sa atong mahimo kalabut niini. Ang Pag-ula mao kanang mahinungdanong lamas sa plano sa kalipay sa atong Amahan sa Langit diin kon wala kini kana nga plano wala unta magamit. Ang inyong panabut sa Pag-ula ug sa hunahuna nga mahatag niini sa inyong kinabuhi makapalambo kaayo sa inyong mapuslanon nga paggamit sa tanang kahibalo, kasinatian, ug sa kahanas nga inyong naangkon sa mortal nga kinabuhi. …

“Adunay labihan ka importante nga panginahanglan alang sa matag usa kanato sa paglig-on sa atong panabut sa kamahinungdanon sa Pag-ula ni Jesukristo nga mahimo kining dili matarug nga pundasyon kon asa nato tukuron ang atong mga kinabuhi. …

“Ang mas lawom nga personal nga pagpamalandong sa kasulatan inubanan sa pagsiksik, kinasingkasing nga pag-ampo molig-on sa inyong panabut ug pasalamat alang sa Iyang bililhon nga Pag-ula” (“SIya Buhi! Tanang Himaya ngadto sa Iyang Pangalan!” Ensign o Liahona, Mayo 2010, 75–76).

Tabangi ang mga estudyante sa pag-analisar sa pamahayag ni Elder Scott pinaagi sa pagpangutana sama sa mosunod:

  • Unsa nga bahin sa pakigpulong ni Elder Scott ang naghatag og gibug-aton sa pagsabut sa Pag-ula? (Siguroa nga matino sa mga estudyante ang mga pamahayag sama sa mosunod: ang pag-antus sa Manluluwas “makaapekto kanato dili lamang niining kinabuhia apan sa tibuok kahangturan”; “ang Iyang Pag-ula nakapahimo sa plano sa kalipay sa Iyang Amahan sa Langit nga magamit sa hingpit nga paagi”; “gidumala ni Jesus ang pagbalanse tali sa hustisya ug kalooy nga nagdepende sa atong pagkamasulundon”; “ang Pag-ula naghatag sa tanan og oportunidad sa pagbuntog sa mga sangputanan sa mga sayop nga nahimo sa kinabuhi”; ug “ang inyong panabut sa Pag-ula ug sa hunahuna nga mahatag niini sa inyong kinabuhi makapalambo kaayo sa inyong mapuslanon nga paggamit sa tanang kahibalo, kasinatian, ug sa kahanas nga inyong naangkon sa mortal nga kinabuhi.”)

  • Namahayag si Elder Scott nga ang mga baruganan sa Pag-ula “kinahanglan nga mas labaw pa kay sa mga baruganan nga inyong gimemorya. Kinahanglan kining mahimong bahin na sa inyong pagkatawo.” Sa unsang paagi nga mabuhat kini sa umaabut nga misyonaryo?

Daghang mga batan-on ang wala makasabut sa mga panalangin, gawas sa pagpasaylo sa mga sala, nga moabut sa ilang kinabuhi pinaagi sa Pag-ula. Aron matabangan nga mas mapalambo pa ang panabut sa mga estudyante mahitungod niining ubang mga panalangin, hatagi ang klase og pipila ka minutos sa pagtuon sa mosunod nga mga tudling sa kasulatan, nga mangita sa mga panalangin nga moabut pinaagi sa Pag-ula ni Jesukristo: Mosiah 3:19; 4:3; 24:12–15; Alma 5:12–13; 7:11–13. Human sa igong panahon, hangyoa ang klase nga ipasabut ang uban pa sa daghang mga panalangin sa Pag-ula. I-summarize diha sa pisara ang ilang mga tubag.

I-display ang mosunod nga kinutlo ug ipabasa kini og kusog sa usa ka estudyante:

“Samtang ang imong pagsabut kabahin sa Pag-ula ni Jesukristo motubo, ang imong tinguha sa pagpaambit sa ebanghelyo modako” (Isangyaw ang Akong Ebanghelyo, 2).

Tabangi ang imong mga estudyante nga mas makasabut niini nga baruganan pinaagi sa pagpangutana:

  • Nganong ang tinguha sa usa ka tawo nga mopakigbahin sa ebanghelyo modako man kon siya makasabut sa Pag-ula?

I-assign ang mga estudyante sa pakig-uban og trabaho sa laing sakop sa klase nga magpuli-puli sa pagbasa og kusog sa 1 Nephi 8:10–12; Enos 1:5–9; and Mosiah 27:34–36 ug 28:1–4. Ipapangita nila ang usa ka sumbanan [pattern] nga makita diha niini nga mga tudling: Human sa igong panahon, dapita ang pipila ka mga estudyante sa pagpasabut sa sumbanan nga ilang nakit-an. (Human nga si Lehi, Enos, ug ang anak nga mga lalaki ni Mosiah nakasinati sa mga panalangin sa Pag-ula, gibati nila ang tinguha nga mopakigbahin sa ebanghelyo ug motabang sa uban nga makadawat sa samang mga panalangin.)

Aron matabangan ang mga estudyante nga mobati sa kamatuoran ug sa kaimportante sa baruganan nga imong gisulat sa pisara, ipangutana ang mosunod:

  • Kon dili kaayo personal, unsa ang inyong mga kasinatian kalabut sa Pag-ula nga nakapadasig ninyo nga mopakigbahin sa ebanghelyo ngadto sa uban?

  • Sa unsang paagi nga ang inyong kahibalo ug mga pagbati mahitungod sa Pag-ula nakapadasig ninyo nga modala sa uban nga mas mapaduol ngadto kang Jesukristo?

Hatagi ang mga estudyante og panahon nga mamalandong kon ang ilang pagsabut sa Pag-ula ni Jesukristo kabahin ba sa ilang kadasig nga moserbisyo og misyon ug kon unsa kaha ang ilang buhaton aron molambo ang lebel sa ilang pasalamat alang sa unsay nabuhat ni Jesukristo ngadto kanila.

Pagtabang sa mga Investigator nga Makadawat sa mga Panalangin sa Pag-ula

Sultihi ang imong mga estudyante nga walay doktrina nga ilang itudlo isip mga misyonaryo nga mas importante nga masabtan ug madawat sa mga investigator ug mga misyonaryo kay sa Pag-ula ni Jesukristo.

Patun-i sa mga estudyante ang 2 Nephi 2:6–8 ug ipapangita kon unsay gitudlo ni Lehi nga kinahanglan natong buhaton sa atong kahibalo mahitungod sa Pag-ula. Human makatubag ang pipila ka mga estudyante, tabangi sila nga masabtan ang panginahanglan sa mga investigator nga makasabut ug modawat sa Pag-ula pinaagi sa pag-display ug pagbasa og kusog sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

Elder Jeffrey R. Holland

“Sa mga zone conference, nga mao ang pipila sa labing mahinungdanon namong higayon sa pagtudlo isip mga General Authority kauban niining batan-ong mga elder ug sister, gipangutana nako ang mga misyonaryo kon unsay gusto nila nga buhaton sa mga investigator isip resulta sa ilang panaghisgot kauban nila.

“‘Magpabunyag!’ nagdungan sila sa pagsinggit.

“‘Oo,’ miingon ko, ‘ganahan kita nga magpabunyag sila, pero unsa may angayng mahitabo sa dili pa kana?’ …

“… Hapit kanunayng malimtan sa mga misyonaryo ang pagtino sa duha ka labing mahinungdanong butang nga buhaton sa dili pa ang bunyag: makabaton og hugot nga pagtuo diha ni Ginoong Jesukristo ug maghinulsol sa ilang mga sala. Apan ‘kita nagtuo nga ang unang mga baruganan ug mga ordinansa sa Ebanghelyo mao ang: una, Hugot nga pagtuo diha ni Ginoong Jesukristo; ikaduha, Paghinulsol; [dayon] ikatulo, Bunyag pinaagi sa pagpaunlod alang sa kapasayloan sa mga sala; ikaupat, Pagpandong sa mga kamot alang sa gasa sa Espiritu Santo’ (A of F 1:4; emphasis gidugang).

“Ang bag-ong kinabuhi sa usa ka kinabig kinahanglang matukod sa pagtuo diha ni Ginoong Jesukristo ug sa Iyang matubsanong sakripisyo—usa ka kombiksyon nga Siya Anak gayud sa Dios, nga Siya buhi karon, nga Siya mao gayud ang ganghaan sa pundok sa mga panon, nga Siya lamang ang naghupot sa yawe sa atong kaluwasan ug kahimayaan. Kana nga pagtuo pagasundan sa tinuod nga paghinulsol, ang paghisulsol nga nagpakita sa atong tinguha nga malimpyo ug mabag-o ug maayo, ang paghinulsol nga nagtugot kanato nga makadawat sa kinatibuk-ang mga panalangin sa Pag-ula” (“Missionary Work and the Atonement,” Ensign, Mar. 2001, 10–11).

Dayon ipangutana:

  • Unsa may kinahanglan nga buhaton sa usa ka investigator aron makaangkon sa hingpit nga mga panalangin sa Pag-ula? (Magbaton og hugot nga pagtuo kang Jesukristo, maghinulsol, ug magpabunyag.)

Pasabta ang mga estudyante nga ang Doktrina ug mga Pakigsaad 20:37 naghulagway sa mga kwalipikasyon alang sa bunyag. Ipabasa sa mga estudyante ang bersikulo ug ipapangita kon unsay kinahanglang buhaton sa mga investigator sa dili pa mabunyagan. Pangutan-a:

  • Unsa ang ubang mga butang nga kinahanglang buhaton sa mga investigator nga makita nga nagpalambo sila og pagtuo kang Jesukristo? (Mopaubos sila sa ilang kaugalingon, maghinulsol sa ilang mga sala, magpakita og maayong binuhatan, ug uban pa.)

  • Unsa ang tahas sa mga misyonaryo sa pagtabang sa mga investigator nga mabuhat ang mga kwalipikasyon alang sa bunyag? Sa unsang paagi kini adunay kalabutan sa inyong katuyoan isip misyonaryo? (Kon gikinahanglan, pahinumdumi ang mga estudyante mahitungod sa mga baruganan gikan sa miaging leksyon.)

Ang mga Misyonaryo Gisugo nga Motudlo og Paghinulsol

Diha sa pisara, isulat ang mosunod nga pangutana:

Unsa ang pinakaimportante nga butang nga mabuhat sa mga misyonaryo sa pagtabang nga madala ang mga anak sa Dios ngadto kang Kristo?

Ipabasa sa mga estudyante ang Doktrina ug mga Pakigsaad 18:11–14 ug ipapangita ang tubag sa pangutana diha sa pisara. Hisguti ang mga tubag sa mga estudyante sa pangutana, dayon ipangutana:

  • Nganong ang paghinulsol mao lamang ang bugtong paagi aron makaangkon ang mga anak sa Dios sa hingpit nga mga panalangin sa Pag-ula? (Tan-awa sa Mosiah 16:13; Alma 11:37; ug Helaman 14:13.)

Diha sa pisara, isulat ang mosunod nga tubag sa pangutana nga gi-display na:

Ang mga misyonaryo gisugo nga motudlo sa paghinulsol aron nga kadtong ilang tudloan makaangkon sa hingpit nga mga panalangin sa Pag-ula ug magsugod og bag-ong kinabuhi diha ni Kristo.

Tungaa ang klase. Patun-i sa katunga sa klase ang seksyon nga giulohan og “Ang Pag-ula” sa mga pahina 60–61 sa Isangyaw ang Akong Ebanghelyo. Patun-i sa laing katunga sa klase ang seksyon nga giulohan og “Pinaagi kang Kristo Mahimo Kita nga Malimpyohan gikan sa Sala” sa mga pahina 70–71 sa Isangyaw ang Akong Ebanghelyo. Hatagi ang mga estudyante og pipila ka minutos sa pagbasa ug sa pag-andam aron itudlo ang duha ka minuto nga overview sa materyal nga ilang gibasa. Isip kabahin sa ilang overview, awhaga ang mga estudyante sa (1) pag-ila ug pagpasabut sa mahinungdanong mga punto sa doktrina, (2) pagpakigbahin og personal nga kasinatian o kasulatan nga nagsuporta sa doktrina, ug (3) paghatag og pagpamatuod mahitungod sa unsay ilang gitudlo. I-summarize diha sa pisara kining tulo ka mga lakang.

Human ang mga estudyante dunay igo nga panahon aron makaandam, mahimo nimong ipares ang mga estudyante sa unang grupo ngadto sa usa ka sakop gikan sa laing grupo ug papuli-puliha sila sa pagtudlo sa usag usa. Human nga ang matag estudyante adunay oportunidad sa pagtudlo sa laing sakop sa klase, mahimo nimong dapiton ang usa ka estudyante sa pagboluntaryo nga moadto sa atubangan sa klase ug itudlo ang iyang overview ngadto sa klase. Inigkahuman sa presentasyon, pasalamati ang estudyante nga mipresentar ug pangutan-a ang klase alang sa bisan unsa nga feedback kalabut sa kasinatian. Pangutan-a kon sila aduna bay mga pangutana, ug dayon ipangutana:

  • Unsay inyong gibati nga makatudlo ug makahatag og pagpamatuod mahitungod sa Pag-ula ni Jesukristo?

  • Unsa ang pipila ka mga butang nga inyong nadiskubrihan nga makatabang kaninyo kon magtudlo kamo og mga investigator mahitungod sa Pag-ula ni Jesukristo?

  • Nganong nagpaabut man kamo nga matudlo ang Pag-ula ni Jesukristo ngadto sa uban?

Paggamit sa mga Kasulatan

Ipasabut ngadto sa mga estudyante nga isip misyonaryo, makatudlo sila uban sa dakong impluwensya kon gamiton nila ang mga kasulatan. Ipapangita sa katunga sa klase ang mga tudling sa kasulatan diha sa “Ang Pag-ula” nga seksyon sa box nga Pagtuon sa Kasulatan sa pahina 61 sa Isangyaw ang Akong Ebanghelyo. Ipapangita sa laing katunga sa klase ang mga tudling sa kasulatan diha sa box nga Pagtuon sa Kasulatan sa mga pahina 70–71 sa Isangyaw ang Akong Ebanghelyo. Awhaga ang mga estudyante sa pagpili og tudling mahitungod sa Pag-ula ni Jesukristo nga ilang nasabtan ug komportable nga ipamatuod. Human mahatagan og igong panahon nga mopakigbahin ang mga estudyante, ipangutana:

  • Sa unsang paagi nga inyong magamit ang kasulatan nga inyong gipili aron makatabang sa usa ka tawo nga mas masabtan ang Pag-ula ni Jesukristo? (Awhaga ang pipila ka mga estudyante sa pagtubag.)

  • Sa inyong hunahuna nganong importante man nga mogamit ang mga misyonaryo sa mga kasulatan kon magtudlo sila?

Ipapakli sa mga estudyante ang seksyon nga giulohan og “Gamita ang mga Kasulatan” sa mga pahina 219 sa Isangyaw ang Akong Ebanghelyo. Ipabasa sa usa ka estudyante ang unang paragraph, lakip na ang dunay bullet nga mga punto, ug dayon pangutan-a ang mga sakop sa klase sa pagkonsiderar kon sa unsang paagi nga ang ilang mga ideya mahitungod sa kaimportante sa paggamit sa mga kasulatan motugma sa pamahayag diha sa Isangyaw ang Akong Ebanghelyo.

Sultihi ang imong klase nga sa pipila ka minutos magtudlo sila og laing estudyante, gamit ang kasulatan mahitungod sa Pag-ula nga ilang gipili sa una. Ipasabut nga dunay mga baruganan diha sa Isangyaw ang Akong Ebanghelyo nga makatabang kanila samtang magtudlo sila. Ipabasa og kusog sa usa ka estudyante ang subsection nga giulohan og “Ipaila ang kasulatan” sa pahina 220 sa Isangyaw ang Akong Ebanghelyo. Pangutan-a kon ang mga estudyante kon duna bay mga pangutana mahitungod niini nga lakang, ug hatagi sila og panahon sa paghunahuna kon unsaon nila sa pagpaila sa kasulatan nga ilang gipili.

Sunod, ipabasa og kusog sa laing estudyante ang subsection nga giulohan og “Basaha ang tudling” sa pahina 220 sa Isangyaw ang Akong Ebanghelyo. Hatagi ang mga estudyante og panahon nga hilum nga mobasa sa ilang gipili nga tudling sa kasulatan ug moila sa bisan unsa nga mga pulong nga kinahanglan tingali nilang ipasabut sa usa ka investigator. Dayon ipabasa og kusog sa ikatulong estudyante ang subsection nga giulohan og “Gamita ang kasulatan” sa pahina 220–221. Usab, pangutan-a ang mga estudyante kon sila aduna bay mga pangutana.

Aron matabangan ang mga estudyante nga magmalampuson sa pagtudlo gikan sa mga kasulatan, kinahanglan nimong ipakita nila ang imong kahanas niini. Hunahunaa ang pagpili og usa o duha ka bersikulo gikan sa Mosiah 3:7–11 ug 16–19 nga itudlo aron dili nimo magamit ang usa sa mga tudling nga gipili sa mga estudyante. Himoa nga simple ug mubo samtang i-demonstrate nimo ang tulo ka lakang: ipaila, basaha, ug gamita ang tudling sa kasulatan. Kini nga demonstration makatabang sa mga estudyante aron dili mobati nga mabug-atan sa unsay gilauman diha kanila. Kon mahuman na ka, pangutan-a ang mga estudyante kon sila aduna bay mga pangutana.

Hatagi ang mga estudyante og pipila ka minutos nga makaandam sa pagtudlo sa ilang gipili nga tudling sa kasulatan gamit ang tulo ka lakang nga makita diha sa Isangyaw ang Akong Ebanghelyo. Dayon ipares ang matag estudyante ngadto sa laing sakop sa klase, ug patudloi nila ang usag usa. Kon mahuman na sa pagtudlo ang mga estudyante, pasaligi sila nga samtang magtuon sila sa mga kasulatan ug sa Isangyaw ang Akong Ebanghelyo, ang ilang abilidad ug pagsalig sa pagtudlo sa ebanghelyo molambo.

Sa pagtapos sa leksyon karon, pangutan-a ang imong mga estudyante kon aduna ba kanila ang ganahang mopakigbahin sa ilang mga pagbati mahitungod ni Jesukristo, ilabi na mahitungod sa Pag-ula ni Jesukristo.

Mga Pagdapit aron Molihok

Dapita ang imong mga estudyante sa pagbuhat sa usa o dugang pa sa mosunod aron matabangan sila nga mas masabtan ang Pag-ula ni Jesukristo:

  • Atol sa inyong personal nga pagtuon sa kasulatan, markahi o i-highlight ang mga tudling nga nakatabang ninyo nga masabtan si Jesukristo ug ang Iyang Pag-ula.

  • Ipakigbahin ang inyong pagpamatuod mahitungod sa Pag-ula ngadto sa usa ka tawo diha sa panimalay, sa simbahan, o sa internet.

  • Kon itugot sa higayon, ipamatuod ang mahitungod sa Pag-ula atol sa teaching appointment kauban ang full-time nga mga misyonaryo.

  • Paggahin og panahon matag adlaw nga makatuon sa Pag-ula ni Jesukristo diha sa mga kasulatan.