Aron molambo ang mga misyonaryo diha sa ebanghelyo ug magpabilin sa dalan paingon sa kinabuhing dayon, kinahanglan sila nga mopalambo og kinaiya sa pagtuon sa ebanghelyo. Sa mga missionary training center, ang mga misyonaryo mogahin og pipila ka oras matag adlaw sa pagtuon nga sila ra ug kauban sa ilang mga kompanyon. Sa mission field gilauman sila nga magpadayon sa ilang pagtuon sa ebanghelyo matag adlaw. Kinahanglan gayud silang makat-on “pinaagi sa pagtuon ug usab pinaagi sa hugot nga pagtuo” (D&P 88:118) aron makaugmad og dakong kahibalo mahitungod sa ebanghelyo ug makapalambo sa ilang kaugalingong pagkakabig. Mahinungdanon alang sa mga misyonaryo nga makabaton niining dakong kahibalo nga maangkon pinaagi sa pagtuon nga giniyahan sa Espiritu aron makatudlo uban sa gahum ug matuman ang ilang katuyoan.
Pag-andam aron ipakita ang mga hulagway nila ni Joseph ug ni Hyrum Smith.
Imahe
statue of Joseph and Hyrum Smith
Si Joseph ug si Hyrum Smith
Mga Sugyot alang sa Pagtudlo
Ang Kaimportante sa Pagtuon sa Ebanghelyo
Ipakita sa mga estudyante ang hulagway nila ni Joseph Smith ug sa iyang igsoon nga si Hyrum ug hangyoa sila sa pagpakli sa ilang mga kasulatan ngadto sa Doktrina ug mga Pakigsaad 11. Tabangi ang mga estudyante nga makasabut sa konteksto niini nga seksyon pinaagi sa pagpasabut nga samtang naghubad si Joseph Smith sa Basahon ni Mormon, ang iyang magulang nga igsoon nga si Hyrum na-interesado kaayo sa buhat ug nagtinguha nga mopakigbahin ngadto sa uban sa mensahe sa Pagpahiuli. Nagtinguha sa kabubut-on sa Ginoo, gihangyo ni Hyrum si Joseph nga mangayo og pagpadayag alang kaniya. Ang tubag sa Ginoo girekord diha sa Doktrina ug mga Pakigsaad 11. Sa daghang paagi, si Hyrum susama og kahimtang sa mga sakop sa imong klase, kinsa nag-andam sa ilang kaugalingon nga mopakigbahin sa mensahe sa gipahiuli nga ebenghelyo.
Papuli-puliha sa pagbasa og kusog ang duha ka estudyante sa Doktrina ug mga Pakigsaad 11:15–17 samtang mosunod ang klase, nga mangita sa tambag nga gihatag sa Ginoo ngadto kang Hyrum. Dayon ipangutana:
Nganong gisultihan man sa Ginoo si Hyrum sa “pagpaabut sa mubo nga panahon” sa dili pa mopakigbahin sa mensahe sa ebanghelyo ngadto uban?
Unsa man ang gimando sa Ginoo nga buhaton ni Hyrum samtang nangandam siya sa pagpakigbahin sa ebanghelyo ngadto sa uban? Unsay buot ipasabut sa pagbaton sa pulong sa Dios? Unsay buot ipasabut sa mahala diha sa imong kasingkasing ang pulong sa Ginoo?
Sa unsang paagi nga ang tambag sa Ginoo diha niini nga mga bersikulo makatabang sa usa ka tawo karon kinsa nangandam nga moserbisyo og misyon? (Bisan kon mogamit sila og lain-laing mga pulong, ang mga estudyante kinahanglang mahibalo sa mosunod nga baruganan: Ang pagtuon sa ebanghelyo moandam sa mga misyonaryo sa pagsangyaw sa ebanghelyo uban sa Espiritu ug uban sa gahum.)
Unsa nga mga panalangin ang gisaad sa Ginoo niadtong kinsa “[n]agbaton sa [Iyang] pulong”?
Ipapakli sa mga estudyate ang pahina 219 sa Isangyaw ang Akong Ebanghelyo, ug ipabasa og kusog sa usa ka estudyante ang paragraph nga nagsugod og “Ang imong abilidad sa pagtudlo uban sa gahum.” Dayon ipangutana:
Unsa nga mga ideya niini nga paragraph ang misuporta sa kaimportante sa inadlaw nga pagtuon sa kasulatan alang niadtong gusto nga mahimong epektibo nga mga misyonaryo? (Ang pagtuon sa ebanghelyo moandam sa mga misyonaryo sa pagtudlo sa ebanghelyo uban sa gahum.)
Sultihi ang mga estudyante nga ang nahabilin sa leksyon mag-focus sa unsay dugang nilang makuha gikan sa ilang personal nga pagtuon sa kasulatan. Awhaga ang mga estudyante sa pagpamalandong sa tibuok leksyon kon sa unsang paagi nga magamit ang ilang nakat-unan aron molambo ang pagkaepektibo sa ilang pagtuon sa kasulatan ug sa ebanghelyo.
Paggamit sa Journal sa Pagtuon [Study Journal]
Ipapakli sa klase ang pahina x diha sa pasiuna sa Isangyaw ang Akong Ebanghelyo. Dapita ang duha ka estudyante sa pagbasa og kusog sa duha ka paragraph diha sa subsection sa “Journal sa Pagtuon”. Human mabasa sa mga estudyante, ipangutana:
Sumala niini nga seksyon, sa unsang paagi nga ang paggamit sa study journal makatabang kaninyo samtang magtuon kamo sa ebanghelyo?
Nganong importante man ang pagrekord sa mga ideya ug mga pagbati nga inyong nadawat atol sa pagtuon sa ebanghelyo?
Ikonsiderar ang pagpangutana sa imong mga estudyante kon sila duna bay study journal, ug dapita kadtong duna sa pagpakigbahin kon sa unsang paagi nga ang ilang journal nakahatag kanila og kaayohan. Awhaga usab ang mga estudyante sa pagsugod og gamit sa study journal kon wala pa sila makabuhat niini. Pahinumdumi sila nga ang study journal mahimong usa lamang ka simple nga dili mahalon nga bound journal, notebook, o mga pahina sa usa ka binder. Mahimo usab silang mogamit sa notes ug journal tools diha sa LDS.org o usa ka note-taking app diha sa electronic device. Awhaga ang mga estudyante sa pagdala og study journal sa matag klase aron marekord ang ilang mga ideya, mga pagbati, ug mga hunahuna atol sa klase.
Pagkat-on pinaagi sa Espiritu
Ipares-pares ang mga estudyante. Dapita sila nga magdungan og basa sa ikaduhang paragraph diha sa pahina 20 sa Isangyaw ang Akong Ebanghelyo ug dayon hisguti kon unsay gikinahanglan aron makabaton og makahuluganong mga kasinatian sa pagkat-on sa mga kasulatan. Human mahisguti sa mga estudyante ang paragraph, dapita ang pipila kanila sa pagpakigbahin og pipila ka dagkong mga ideya gikan sa panaghisgutan. Mahimo kang mangutana og sama niini:
Unsay buot ipasabut sa pagtuon nga inubanan sa “tinuod nga katuyoan”? (Ang tinuod nga katuyoan nagpasabut nga gusto kitang motuman o mobuhat sa unsay atong nakat-unan.)
Sa unsang paagi nga ang pagtuon nga inubanan sa “tinuod nga katuyoan” ug “gutom[on] ug uhaw[on] sa pagkamatarung” makaapekto sa pagtuon sa ebanghelyo sa usa ka tawo? (Samtang motubag ang mga estudyante, hunahunaa ang pagpangutana sa pang-follow-up nga mga pangutana aron maawhag sila sa paghunahuna og maayo mahitungod sa ilang mga tubag. Pananglitan, kon ang mga estudyante motubag nga ang tinuod nga katuyoan makita kon giunsa sa usa ka tawo sa pag-ampo, mahimo kang mangutana kanila sa pagpasabut kon sa unsang paagi nga ang pag-ampo sa usa ka tawo lahi. Kon ang usa ka estudyante motubag nga makita kini sa ilang mga tinguha, hangyoa sila nga ipasabut pa og dugang kana nga ideya.)
Hangyoa ang tulo ka estudyante nga magpuli-puli sa pagbasa og kusog sa mga paragraph diha sa seksyon nga giulohan og “Pagkat-on pinaagi sa Espiritu Santo” sa mga pahina 20–21 sa Isangyaw ang Akong Ebanghelyo. Pasunda ang klase ug pamarkahi ang mga panalangin nga moabut kanato kon ang Espiritu Santo motabang kanato nga makat-on sa ebanghelyo. Dayon ipangutana:
Unsa nga mga panalangin ang moabut kanato kon ang Espiritu Santo mogiya sa atong pagkat-on sa ebanghelyo? (Ikonsiderar ang pagsulat diha sa pisara niini nga baruganan samtang motubag ang mga estudyante: Kon ang Espiritu Santo mogiya sa atong pagkat-on sa ebanghelyo, makadawat kita og mas dakong kahayag ug panabut.)
Aron matabangan ang mga estudyante nga mas makasabut kon unsaon nila sa pagdapit ang Espiritu Santo sa pagtudlo kanila samtang magtuon sila sa ebanghelyo, basaha o i-display ang mosunod nga kinutlo gikan ni Elder D. Todd Christofferson sa Korum sa Napulog Duha ka mga Apostoles. Dapita ang imong mga estudyante sa pagpangita kon unsay ilang mahimo aron makabaton og dugang pa gikan sa ilang pagtuon sa kasulatan.
Imahe
Elder D. Todd Christofferson
“Aron ang ebanghelyo masulat sa inyong kasingkasing, kinahanglan mong masayud unsa kini ug motubo sa pagsabut niini sa mas hingpit nga paagi. Nagpasabut kana nga kinahanglan kini ninyong tun-an. Sa pagsulti ko nga ‘tun-an,’ nagpasabut ko nga labaw pa kay sa pagbasa lang. Maayo man na nga usahay mobasa og basahon sa kasulatan sulod sa gitakda nga oras aron makuha ang kinatibuk-ang kahulugan sa mensahe niini, pero sa konbersyon, kinahanglan mas hatagan ninyo og gibug-aton ang kadugayon sa panahon nga inyong gigahin sa mga kasulatan kay sa kadugayon nga nagbasa mo nianang panahona. Naghunahuna ko nga usahay magbasa mo og pipila ka mga bersikulo, mohunong aron mamalandong niini, magbasa og maayo sa mga bersikulo pagbalik, ug samtang naghunahuna mo bahin sa unsay gipasabut niini, mag-ampo para sa panabut, mangutana diha sa inyong hunahuna, maghulat sa espirituhanong mga impresyon, ug mosulat sa mga impresyon ug mga panghunahuna nga moabut aron mo makahinumdom ug makat-on og dugang pa. Sa pagtuon niining paagiha, mahimong dili daghan ang inyong mabasa nga mga kapitulo o mga bersikulo sulod sa tunga sa oras, pero makahatag kamo og luna sa inyong kasingkasing para sa pulong sa Dios, ug Siya makigsulti nganha kaninyo” (“Kon Makabig Na Kamo,” Ensign o Liahona, Mayo 2004, 11. Alang sa dugang nga mga ideya sa pagtuon, tan-awa sa Elder Richard G. Scott, “Unsaon Pag-angkon og Pagpadayag ug Inspirasyon alang sa Inyong Personal nga Kinabuhi,” Ensign o Liahona, Mayo 2012, 45–47).
Tabangi ang mga estudyante sa pag-analisar sa pamahayag ni Elder Christofferson pinaagi sa pagpangutana sa mosunod:
Unsa nga mga aksyon nga gitino ni Elder Christofferson nga makahatag og dugang panabut sa mga kasulatan?
Sa unsang paagi nga kini nga mga aksyon mas makatugot sa Espiritu Santo sa pagtudlo kaninyo?
Sa unsang paagi nga ang usa o dugang pa niining mga aksyon nakatabang sa pagpalambo sa inyong panabut mahitungod sa ebanghelyo?
Ipasabut nga makatabang ang pagtuon sa mga kasulatan aron makasabut kon sa unsang paagi nga ang Espiritu Santo makigsulti kanato. Bahina ang klase sa tinagurha (mahimo nga ang samang pares gihapon gikan sa miaging kalihokan). Isulat sa pisara ang mosunod nga mga scripture reference, ug hangyoa ang mga estudyante sa pagkopya niini ngadto sa ilang mga study journal o sa usa ka piraso nga papel: Doktrina ug mga Pakigsaad 8:2–3; 9:7–8; 11:12–14; ug 138:1–2, 11.
Hatagi og panahon ang mga estudyante nga makatuon niini nga mga tudling ug makamarka sa mga pulong nga naghulagway kon sa unsang paagi nga ang Espiritu Santo makigsulti kanato. Mahimo usab silang mosulat og pipila ka pahinumdom diha sa ilang study journal mahitungod sa unsay ilang nakat-unan gikan niini nga mga tudling. Hangyoa ang mga estudyante sa paghisgot uban sa ilang partner kon unsay ilang gimarkahan diha niini nga mga bersikulo ug unsay ilang nakat-unan. Human makahatag og igong panahon, ipangutana ang mosunod:
Unsa nga mga pulong ang inyong nakit-an nga naghulagway kon sa unsang paagi nga ang Espiritu Santo makigsulti kanato? (Isulat sa pisara ang mga tubag sa mga estudyante.)
Sa unsang paagi nga ang Espiritu Santo mitudlo kaninyo sa usa niining mga paagi ug nakapalambo sa inyong panabut mahitungod sa doktrina o baruganan sa ebanghelyo? Unsa ang pipila ninyo ka piho nga mga kasinatian?
Dapita ang mga estudyate sa pagpakli ngadto sa pahina 25 sa Isangyaw ang Akong Ebanghelyo, ug ipabasa og kusog sa usa ka estudyante ang unang upat ka mga item nga dunay bullet ubos sa ulohan nga “Mga Ideya ug mga Sugyot sa Pagtuon.” Ikonsiderar ang pagpangutana sa mosunod:
Sa unsang paagi nga kining mga rekomendasyon makaapekto sa abilidad sa misyonaryo nga epektibong mopakigbahin sa ebanghelyo ngadto sa uban?
Unsaon ninyo sa paggamit niini nga mga ideya ug sa pagbuhat niini karon isip umaabut nga mga misyonaryo?
Sa unsang paagi nga ang pagpalambo sa inyong mga kahanas ug mga kinaiya sa pagtuon sa ebanghelyo makatampo sa inyong kalampusan isip mga misyonaryo? (Ang mga estudyante mahimong mopahayag og usa ka baruganan susama niini: Samtang ang mga misyonaryo mopalambo og mga kinaiya sa epektibo nga pagtuon sa ebanghelyo, matudloan sila sa Espiritu, ang ilang kasinatian mas magantihon, ug mas maandam sila sa pagtudlo sa ebanghelyo.)
Bahina ang klase ngadto sa mga grupo nga tinagutlo o tinagup-at. Hangyoa ang matag grupo nga ilang bahinon ang unom ka mga subsection ubos sa “Mga Ideya ug mga Sugyot sa Pagtuon” diha sa mga pahina 25–28 sa Isangyaw ang Akong Ebanghelyo, ug patun-i sa mga sakop sa grupo ang na-assign nila nga mga subsection. Ang ubang mga sakop sa grupo mahimong magtuon og sobra pa sa usa ka subsection. Pagpili og lider sa matag grupo aron mangulo sa panaghisgutan mahitungod sa unsay nakat-unan sa mga sakop sa grupo ug unsay ilang mabuhat karon aron mahimo ang ilang pagtuon sa ebanghelyo nga mas gamhanan ug epektibo. Human mahatagi og panahon ang mga grupo, pangutan-a ang klase:
Sa unsang paagi nga kining mga kahanas o mga kinaiya sa pagtuon nakatabang kaninyo sa pagtuon sa mga kasulatan sa mas epektibong paagi?
Aron matabangan ang mga estudyante nga personal nga makagamit sa unsay nahisgutan, hatagi og kopya ang matag estudyante sa “Personal nga mga Kinaiya sa Pagtuon sa Kasulatan” nga handout. Hatagi ang klase og pipila ka minutos sa pagkompleto sa kalihokan diha sa handout.
Human sa igong panahon, hangyoa ang mga estudyante nga mopakigbahin og bisan unsa nga hunahuna o panabut nga ilang naangkon gikan niini nga kalihokan. Awhaga sila nga ipadayon sa paggamit ang mga kahanas ug mga kinaiya sa pagtuon sa kasulatan nga ilang napilian ngadto sa ilang personal nga pagtuon. Pasaligi sila nga sa pagbuhat nila niini, ang Espiritu Santo modan-ag sa ilang hunahuna ug mopalambo sa ilang panabut mahitungod sa ebanghelyo.
Tabangi ang klase nga makasabut nga agig dugang sa unsaon nila sa pagtuon, ang kanus-a ug unsa ang ilang tun-an importante usab kaayo sa pagtabang kanila nga mahimong epektibo nga mga misyonaryo. Ipapakli sa mga sakop sa klase ang pahina viii diha sa pasiuna sa Isangyaw ang Akong Ebanghelyo ug ipatan-aw ang Inadlaw nga Iskedyul sa Misyonaryo nga makita diha sa seksyon nga “Personal nga Pagtuon, Pagtuon kauban ang Kompanyon, mga District Meeting ug mga Zone Conference.” Dayon ipangutana:
Sa unsang paagi nga ang Inadlaw nga Iskedyul sa Misyonaryo nagpakita sa kaimportante sa pagtuon sa ebanghelyo?
Sa unsang paagi nga ang kanunay nga pagtuon sa kasulatan karon makaandam kaninyo alang niining higpit nga iskedyul isip misyonaryo?
Pagmarka sa Kasulatan
Kon kamo duna pay igong panahon nga nahabilin, ikonsiderar ang pagpasalida sa video nga “Advice for Studying the Scriptures” (2:07) aron matabangan ang klase nga makahunahuna og mga paagi diin ilang mapalambo ang paagi sa pagmarka sa ilang mga kasulatan.
Human mapasalida ang video, ipangutana:
Unsa ang inyong nakat-unan gikan ni Elder Bednar nga makatabang kaninyo nga mapalambo ang inyong pagtuon sa kasulatan?
Unsa man ang katuyoan sa pagmarka sa mga kasulatan? (Aron matabangan kamo nga makahinumdom sa kaulahian sa unsay inyong nakat-unan kon magkinahanglan kamo niini pag-usab.)
Nganong importante man nga ang mga misyonaryo adunay epektibong paagi sa paghinumdom sa unsay ilang nakat-unan?
Buhata ang Unsay Imong Makat-onan
Ipabasa sa usa ka estudyante ngadto sa klase ang unang paragraph ubos sa heading nga “Buhata ang Unsay Imong Makat-onan” diha sa Isangyaw ang Akong Ebanghelyo, pahina 21. Dayon ipabasa og kusog sa usa ka estudyante ang Juan 7:17. Tabangi ang mga estudyante nga mahibalo og usa ka baruganan nga gitudlo diha sa Isangyaw ang Akong Ebanghelyo ug sa Juan 7:17 pinaagi sa pagpangutana:
Unsay kalainan tali sa pagkahibalo mahitungod sa mga kasulatan ug pagbuhat sa mga pagtulun-an nga makita diha sa mga kasulatan? (Bisan kon mogamit sila og lain-laing mga pulong, ang mga estudyante kinahanglang makasabut niini nga baruganan: Kon magbuhat kita sumala sa mga pagtulun-an sa ebanghelyo, ang Espiritu Santo mopamatuod sa kamatuoran niadtong mga baruganan ug molig-on sa atong pagtuo, kahibalo, ug pagpamatuod.)
Ipasabut nga si Elder David A. Bednar sa Korum sa Napulog Duha ka mga Apostoles nagtudlo sa kaimportante sa pagbuhat sa unsay atong nakat-unan. I-display ang mosunod nga kinutlo, ug hangyoa ang usa ka volunteer sa pagbasa niini og kusog ngadto sa klase:
Imahe
Elder David A. Bednar
“Isip mga tigkat-on sa ebanghelyo, kinahanglan kita ‘mga tigtuman sa mga pulong, ug dili kay magpaminaw ra’ (Santiago 1:22). Bukas ang atong mga kasingkasing ngadto sa impluwensya sa Espiritu Santo samtang kita sa tukma naggamit sa kabubut-on ug naglihok pinasubay sa husto nga mga baruganan—ug sa ingon niana kita nagdapit sa Iyang pagtulun-an ug gahum sa pagpamatuod” (“Magtukaw uban sa Bug-os nga Pagkamapadayunon,” Ensign o Liahona, Mayo 2010, 42).
Unsay buot ipasabut sa pagkahimong mga tigtuman sa mga pulong ug dili kay magpaminaw ra?
Sa unsang paagi nga ang paglihok “pinasubay sa husto nga mga baruganan” makapalambo sa atong panabut sa paagi nga dili mahimo sa pagtuon lamang?
Sa unsang paagi nga ang paglihok pinasubay sa husto nga mga baruganan mitugot kaninyo nga makabaton og mas lawom nga panabut ug pagpamatuod mahitungod sa baruganan sa ebanghelyo nga inyong gitinguha nga buhaton?
Ipabasa sa usa ka estudyante ang ikaduhang paragraph sa pahina 21 sa Isangyaw ang Akong Ebanghelyo samtang mosunod ang klase, nga mangita sa dugang nga mga paagi nga ang pagsunod sa ebanghelyo makaapekto sa kasingkasing ug mga abilidad a misyonaryo. Human sa pagbasa, ipangutana ang mosunod:
Unsa ang dugang nga mga panalangin nga moabut sa mga misyonaryo kon tumanon nila ang mga baruganan sa ebanghelyo nga ilang nahibaloan nga tinuod? (Tabangi ang mga estudyante sa pagsulti niini nga baruganan: Samtang motuman ang mga misyonaryo sa ebanghelyo, ang Espiritu Santo mopalambo sa ilang tinguha ug abilidad sa pagpakigbahin sa ebanghelyo.)
Samtang nangandam kamo sa pagserbisyo og misyon, giunsa sa Espiritu Santo pagpalambo ang inyong tinguha nga moserbisyo?
Pagdapit sa mga Investigator nga Mosimba
Ang mga misyonaryo motabang sa mga investigator nga mouswag paingon sa bunyag pinaagi sa pagdapit kanila nga tumanon ang ilang mga commitment. Pananglitan, ipasabut ngadto sa mga estudyante nga kon mosimba ang mga investigator, makadawat sila og dugang nga pagpadayag pinaagi sa Espiritu Santo ug tinguha nga mas mapaduol sa Dios. Ang pagsimba makatabang sa mga investigator nga makabaton og pagpamatuod sa gipahiuli nga ebanghelyo ug maandam aron mabunyagan.
Ipakita kon unsaon sa pagdapit sa usa ka tawo nga mosimba. Una, ipakigbahin sa daklit ang mga panalangin nga moabut pinaagi sa pagsimba. Dayon gamita ang pamphlet sa misyonaryo nga Ang Pagpahiuli (mga pahina 22–23) sa pagpasabut kon unsay mahitabo atol sa sakrament miting. Dayon ipakita kon unsaon sa pagdapit sa usa ka investigator nga motambong sa mga miting sa Simbahan. Human sa imong demonstration, ipapraktis sa mga estudyante ang pagdrama-drama sa mga lakang nga imong gipakita kauban ang usa ka partner. Tuguti ang matag usa kanila nga magpuli-puli og pagpakigbahin sa daklit sa mga panalangin nga ilang nadawat gumikan sa pagsimba, sa pagpasabut kon unsay mahitabo atol sa sakrament miting, ug sa pagdapit sa laing tawo nga mosimba.
Ipamatuod ang mahitungod sa mga doktrina ug mga baruganan sa ebanghelyo nga anaa sa leksyon.
Mga Pagdapit aron Molihok
Dapita ang mga estudyante nga himoon ang personal nga pagtuon sa ebanghelyo nga usa ka prayoridad samtang mangandam sila nga moserbisyo og misyon. Ang mosunod nga gisugyot nga mga kalihokan makatabang sa mga estudyante nga maka-focus sa pagkat-on pinaagi sa Espiritu:
Pag-establisar og kinaiya sa inadlaw nga personal nga pagtuon sa ebanghelyo, lakip na ang pagtuon ug pagpamalandong sa Basahon ni Mormon.
Pag-ampo sa pagsugod sa inyong personal nga pagtuon sa ebanghelyo aron sa pagdapit sa Espiritu nga motabang kaninyo. Kon wala pa kamo makahimo, sugdi ang paggamit og study journal atol sa inyong personal nga pagtuon sa ebanghelyo.
Pagpili og usa sa mga ideya ug mga sugyot sa pagtuon sa ebanghelyo nga makita diha sa mga pahina 25–28 sa Isangyaw ang Akong Ebanghelyo, ug gamita kini sa inyong personal nga pagtuon karong semanaha.