Pagpalambo og mga Hiyas nga Sama kang Kristo

Pasiuna

Ang mga misyonaryo kinahanglang maningkamot nga mas mahisama sa Manluluwas samtang nagtrabaho sila sa pagdapit sa uban nga moduol ngadto Kaniya. Ang Manluluwas mao ang atong hingpit nga ehemplo ug misugo kanato nga mahimong sama Kaniya (tan-awa sa 3 Nephi 27:27), ug ang Iyang Pag-ula makapahimo kanato nga mas mahisama Kaniya ug sa atong Langitnong Amahan. Usa ka importante nga bahin sa pagkahimong sama kang Jesukristo mao ang pagkat-on kon unsa ang paagi sa Iyang pagpakabuhi, linihukan, ug pagtudlo. Samtang personal natong gipalambo og maayo ang mga hiyas nga sama kang Kristo, mas andam kita nga moserbisyo sa Dios ug sa uban panahon sa atong misyon ug sa tibuok natong kinabuhi.

Advance nga Pagpangandam

Tun-i ang Alma 17:22–37; 18:1–3, 8–10; Moroni 7:45–48; ug Doktrina ug mga Pakigsaad 4:1–7.
Tun-i ang Isangyaw ang Akong Ebanghelyo, mga pahina 139–48, 152.
Pakupyahi ang Kalihokan Kabahin sa Hiyas diha sa pahina 152 sa Isangyaw ang Akong Ebanghelyo alang sa matag estudyante sa imong klase (opsyonal).
Pag-andam aron ipasalida ang video nga “Christlike Attributes” (2:54), nga anaa sa LDS.org.
Pag-andam aron ipasalida ang video nga “Impressions of Missionaries” (4:32), nga anaa sa youtube.com.

Mga Sugyot alang sa Pagtudlo

Ang Kaimportante sa mga Hiyas nga Sama kang Kristo

Dapita ang mga estudyate sa pagpakli sa pahina 149 sa Isangyaw ang Akong Ebanghelyo ug ipatan-aw ang litrato sa name tag sa misyonaryo. Ipangutana:

Unsa ang duha ka labing importante nga bahin sa name tag sa misyonaryo? (Ang pangalan sa misyonaryo ug ang pangalan sa Manluluwas.)
Nganong importante man alang ninyo ug alang sa uban nga ilambigit ang inyong pangalan ngadto sa pangalan sa Manluluwas?

Papuli-puliha sa pagbasa og kusog ang mga estudyante sa lima ka paragraph diha sa mga pahina 139–140 sa Isangyaw ang Akong Ebanghelyo samtang mosunod ang klase, nga mangita kon unsaon nato sa pagdawat ang pagdapit nga mosunod ni Jesukristo. Kon mahuman na sila sa pagbasa, ipangutana:

Unsaon man nato pagdawat ang pagdapit ni Jesukristo nga mosunod Kaniya? (Ang mga estudyante kinahanglang mahibalo sa baruganan: Atong dawaton ang pagdapit ni Jesukristo nga mosunod Kaniya pinaagi sa pagkahimong sama Kaniya ug pagpalambo sa Iyang mga hiyas.)
Sa unsang paagi nga ang pagpalambo og mga hiyas ni Kristo makapahimo ninyong mas gamhanan ug epektibo nga tigpangalagad sa ebanghelyo ni Jesukristo?

Hangyoa ang matag usa ka estudyante nga mopili og mga kasulatan diha sa Pagtuon sa Kasulatan nga box sa pahina 140 sa Isangyaw ang Akong Ebanghelyo. Ipabasa sa mga estudyante ang ilang gipili nga tudling sa kasulatan ug ipapangita kon unsay gisulti niini kalabut sa pagsunod sa ehemplo ni Jesukristo. Dapita ang mga estudyante nga ipakigbahin kon unsay ilang nakat-unan ngadto sa klase. Human sa pagpakigbahin sa pipila ka estudyante, ipangutana:

Unsa ang pipila ka mga kinaiya nga inyong masulti mahitungod ni Jesukristo?

Ipasalida ang video nga “Christlike Attributes” (2:54), nga nagpakita sa ubang mga hiyas sa Manluluwas. Ipatan-aw sa mga estudyante kon sa unsang paagi nga ang balaanong mga hiyas sa Manluluwas makita pinaagi sa iyang mga lihok—ilabi na sa paagi sa iyang inter-aksyon ngadto sa uban.

Human matan-aw ang video, ipangutana ang sama sa mosunod, nga siguroon nga dunay igong panahon ang mga estudyante sa pagpamalandong sa ilang mga tubag:

Sa unsang paagi nga ang balaanong mga hiyas sa Manluluwas makita pinaagi sa iyang mga lihok, ilabi na sa paagi sa iyang inter-aksyon ngadto sa uban?
Unsa ang epekto sa mga lihok ni Jesus ngadto sa uban?

Hangyoa ang mga estudyante nga ipakigbahin ngadto sa ilang katapad ang usa ka kasinatian diin naimpluwensyahan sila sa tawo nga dunay hiyas nga sama kang Kristo. Dayon hatagi sila og panahon nga makapamalandong sa mosunod nga pangutana:

Unsa nga mga hiyas ni Kristo ang gipakita diha sa video nga gusto ninyong mapalambo og maayo?

Pagpalambo og mga Hiyas nga Sama kang Kristo

Papuli-puliha sa pagbasa og kusog ang pipila ka estudyante sa Doktrina ug mga Pakigsaad 4:1–7.

Sumala sa Doktrina ug mga Pakigsaad 4:5–6, unsa ang relasyon tali sa mga hiyas nga sama kang Kristo ug sa mga kwalipikasyon nga matawag niana nga buhat? (Bisan kon mogamit sila og lain-laing mga pulong, ang mga estudyante kinahanglang mahibalo niini nga baruganan: Ang mga indibidwal nga dunay mga hiyas nga sama kang Kristo kwalipikado nga moserbisyo diha sa buhat sa Ginoo.)

Dapita ang klase sa pagpakli ngadto sa Kalihokan Kabahin sa Hiyas sa pahina 152 sa Isangyaw ang Akong Ebanghelyo. Human mapasabut ang mga instruksyon nga makita diha sa ibabaw sa pahina, dapita ang mga estudyante sa pagkompleto sa kalihokan. Tingali makatabang nga sultihan ang mga estudyante kon unsa kadugayon ang ilang igahin sa kalihokan. Ikonsiderar ang paghatag og mga photocopy sa kalihokan alang sa mga estudyante. Kon pilion sa mga estudyante nga kompletuhon ang kalihokan diha sa kaugalingon nilang mga kopya sa Isangyaw ang Akong Ebanghelyo, mahimo nimo silang awhagon nga lapis ang gamiton. Tuguti og igong panahon nga mahuman sa tanang estudyante ang kalihokan. Dayon hangyoa ang mga sakop sa klase sa pagpakigbahin kon unsa ang ilang nakat-unan ug gibati samtang nagtrabaho sila niining pag-evaluate sa kaugalingon. Kon gikinahanglan, ikonsiderar ang pagpangutana og sama niini:

Unsa nga mga hiyas gikan sa kalihokan ang inyong giganahan, ug ngano man?
Unsa ang inyong nakat-unan gikan niini nga kalihokan?

Tabangi ang mga estudyante nga mas mapalambo pa ang ilang panabut sa mga hiyas nga sama kang Kristo pinaagi sa pagdapit kanila sa pagpili og usa ka hiyas nga gusto nilang mas makat-unan pa ug mapalambo og maayo diha sa ilang kaugalingong kinabuhi. Hangyoa ang mga estudyante sa pagpangita sa seksyon nga naghulagway sa gipili nila nga hiyas diha sa mga pahina 140–48 sa Isangyaw ang Akong Ebanghelyo. Dayon hatagi sila og panahon nga makatuon sa ilang seksyon, kauban ang may kalabutan nga mga kasulatan. Tingali makatabang nga sultihan ang mga estudyante kon unsa kadugayon ang ilang igahin sa pagtuon. Isulat sa pisara ang mosunod nga mga pangutana nga ikonsiderar sa mga estudyante samtang magbasa sila:

Unsa nga bag-ong mga hunahuna kalabut niini nga hiyas ang inyong nabatunan?
Unsa may kinahanglang mausab diha sa inyong kasingkasing, hunahuna, o mga lihok aron mapalambo kini nga hiyas?
Sa unsang paagi nga ang pagpalambo niini nga hiyas makadugang sa inyong pagkaepektibo isip misyonaryo?

Lakaw libut sa kwarto aron makita kon kumusta ang matag estudyante ug sa pagtubag sa bisan unsa nga mga pangutana sa mga estudyante. Human makahatag og igong panahon, dapita ang mga estudyante sa pagpakigbahin sa ilang mga tubag sa mga pangutana nga gisulat sa pisara.

I-display ang mosunod nga pamahayag ni Presidente Dieter F. Uchtdorf, ug hangyoa ang mga estudyante sa pagpangita sa gisulti ni Presidente Uchtdorf nga kinahanglan gayud natong buhaton aron makapalambo og mga hiyas nga sama kang Kristo:

“Ang mga kasulatan naghulagway og daghang mga hiyas nga sama kang Kristo nga atong gikinahanglan nga palamboon samtang kita nagpakabuhi. … Ang mga hiyas nga sama kang Kristo mga gasa gikan sa Dios. Dili kini mapalambo nga walay panabang gikan Kaniya. Ang tabang nga gikinahanglan natong tanan gihatag kanato nga libre pinaagi sa Pag-ula ni Jesukristo. Ang pagbaton og pagtuo kang Jesukristo ug sa Iyang Pag-ula nangahulugan nga misalig sa hingpit Kaniya—mosalig sa Iyang walay kinutubang gahum, kahibalo, ug gugma. Ang mga hiyas nga sama kang Kristo moabut sa atong kinabuhi samtang kita matarung nga naggamit sa atong kabubut-on. … Sa pagpaninguha nga mahimong sama sa Manluluwas, kinahanglan nga kanunay kitang motimbang-timbang sa atong kinabuhi ug mosalig, pinaagi sa dalan sa tinuod nga paghinulsol, diha sa mga katakus ni Jesukristo ug sa mga panalangin sa Iyang Pag-ula” (“Mga Hiyas nga Sama kang Kristo—Ang gahum nga Mobayaw Kanato,” Ensign o Liahona, Nob. 2005, 102–103).

Unsa ang kahulugan niini nganha kaninyo nga ang “mga hiyas nga sama kang Kristo mga gasa gikan sa Dios”? (Mga gasa kini nga dili mapalambo og maayo kon wala ang panabang sa Dios.)
Sumala ni Presidente Uchtdorf, unsa may atong mahimo aron maangkon ang panabang sa Dios sa pagpalambo niining mga hiyas? (Mahimo nimong i-summarize ang mga tubag sa mga estudyante pinaagi sa pagsulat sa pisara sa mosunod: Atong mapalambo ang mga hiyas nga sama kang Kristo samtang kita maghinulsol, magbaton og hugot nga pagtuo diha ni Jesukristo, ug mosalig sa Pag-ula.)
Sa unsang paagi nga ang paghinulsol ug pagbaton og hugot nga pagtuo diha sa Pag-ula makatabang kanato nga mapalambo ang mga hiyas nga sama kang Kristo? (Pinaagi sa hugot nga pagtuo ug paghinulsol, atong gidapit ang Ginoo sa pagpanalangin kanato og mga hiyas nga sama kang Kristo. Kon maghinulsol kita, atong gipakita ang atong tinguha nga mas mahisama kang Kristo, ug atong madapit ang mas lig-on nga pakigrelasyon sa Espiritu Santo ngari sa atong kinabuhi.

I-display ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog ngadto sa klase:

“Sa pagtudlo sa mga Nephite, naghisgot ang Manluluwas kon unsay angayan nila nga makab-ot. Iya silang gihagit nga maghinulsol ug magpabunyag ug pagasantoson pinaagi sa pagdawat sa Espiritu Santo, ‘aron mobarug nga walay lama sa akong atubangan sa katapusan nga adlaw’ (3 Ne. 27:20). Miingon siya sa pagtapos: ‘Busa, unsa nga matang sa mga tawo kamo angay nga mahisama? Sa pagkatinuod Ako moingon nganha kaninyo, gani sama nga Ako mao’ (3 Ne. 27:27).

“Ang ebanghelyo ni Jesukristo mao ang plano diin kita mamahimo kon unsa gayud ang angay nga mahimo sa mga anak sa Dios. Kining walay lama ug hingpit nga kahimtang moresulta gumikan sa makanunayong pagtuman sa mga pakigsaad, mga ordinansa, ug mga aksyon, ang katingbanan sa husto nga mga pagpili, ug sa padayon nga paghinulsol. ‘Kini nga kinabuhi mao ang panahon alang sa mga tawo sa pagpangandam sa pagsugat sa Dios’ (Alma 34:32)” (“The Challenge to Become,” Ensign, Nob. 2000, 33).

Ipangutana:

Sumala ni Elder Oaks, unsay kinahanglan natong buhaton aron mas mahisama kang Jesukristo? (Kinahanglan kitang mohimo ug motuman og sagrado nga mga pakigsaad, takus nga modawat sa mga ordinansa, mohimo og husto nga mga pagpili, ug maghinulsol.)

Dapita ang mga estudyante sa pagpakli ngadto sa Moroni 7:47–48. Ipasabut nga bisan tuod nga kining mga bersikulo piho nga naglangkob sa gugmang putli, nagtudlo kini og kinatibuk-ang baruganan kalabut sa pag-angkon og mga hiyas nga sama kang Kristo. Dapita ang usa ka estudyante sa pagbasa sa mga bersikulo samtang mosunod ang klase, nga mangita kon unsay atong mabuhat aron madapit ang tabang sa Langitnong Amahan nga mahisama sa Iyang Anak (ang mga tubag kinahanglang mag-focus sa kaimportante sa paghangyo sa Langitnong Amahan nga tabangan kita ug mamahimong “tinuod nga mga sumusunod” ni Kristo). Ipasabut nga kay ang mga hiyas nga sama kang Kristo mga gasa man gikan sa Dios, kinahanglan kitang mohangyo Kaniya og tabang sa pagpalambo niini.

Aron matabangan ang mga estudyante sa pagkonsiderar kon unsaon nila pag-apply sa ilang nakat-unan, mahimo nimong hangyoon ang mga estudyante nga mopakigbahin og mga example sa aksyon nga mahimong buhaton sa usa ka umaabut nga misyonaryo samtang magtinguha nga mapalambo ang hiyas nga ilang gitun-an. Dayon hatagi ang mga estudyante og pipila ka minutos sa pagsulat og plano, lakip na ang pipila ka hustong mga pagpili nga ilang mahimo sa kanunay, aron matabangan sila nga mas makapalambo niana nga hiyas. Awhaga sila sa pagpakigbahin sa ilang plano ngadto sa ilang mga ginikanan o kasaligan nga higala. Usab, awhaga ang mga estudyante nga dili langayon ang pagsunod sa ilang plano. Ang mga paningkamot nga ilang gibuhat karon makahimo og dakong epekto sa ilang mga kasinatian sa misyon.

Tapusa kini nga bahin sa leksyon pinaagi sa pagpasalig sa mga estudyante nga ang Ginoo mopanalangin kanila samtang magpakita sila og hugot nga pagtuo diha sa Pag-ula ug magtinguha nga mahisama Kanila.

Mga Hiyas nga Sama kang Kristo diha sa Misyonaryo nga Buhat

Isulat sa pisara ang mosunod nga pamahayag ni Presidente Dieter F. Uchtdorf sa Unang Kapangulohan, kinsa mipakigbahin og kinutlo nga kasagaran napahinungod kang Saint Francis of Assisi. Hangyoa ang usa ka estudyante sa pagbasa og kusog sa pamahayag:

“Isangyaw ang ebanghelyo sa tanang panahon ug kon gikinahanglan, gamiti og mga pulong” (“Naghulat diha sa Dalan sa Damasco,” Ensign o Liahona, Mayo 2011, 77).

Dayon ipangutana ang sama sa mosunod:

Unsaon nato sa pagpakigbahin sa ebanghelyo nga dili mogamit og mga pulong?
Sa unsang paagi nga ang pagbaton og mga hiyas nga sama kang kristo makatugot kanato nga mas makasangyaw sa ebanghelyo, nga parehong mogamit og mga pulong ug dili mogamit og mga pulong?
Unsay mahitabo sa kasingkasing sa mga indibidwal kon trataron sila sa Kristohanong pamaagi? (Ang ilang kasingkasing mahumok ug mas ganahan silang maminaw sa mensahe sa ebanghelyo).
Nganong ang mga hiyas nga sama kang Kristo sa usa ka misyonaryo importante man kaayo sa kalampusan sa misyonaryo nga buhat? (Ang mga tubag sa mga estudyante mahimong maglakip niini nga kamatuoran: Ang mga hiyas nga sama kang Kristo mahimong usa ka gamhanang impluwensya sa pagdala sa mga tawo ngadto sa Manluluwas.)

Ipasalida ang video nga “Impressions of Missionaries” (4:32). Pasulata ang mga estudyante og notes mahitungod sa mga hiyas nga naobserbahan sa mga investigator diha sa mga misyonaryo ug sa epekto niadtong mga hiyas ngadto sa mga investigator.

Human mapasalida ang video, ipangutana:

Unsa ang pipila ka positibong mga hiyas sa mga misyonaryo nga nahibaloan sa mga investigator?
Sa inyong hunahuna ngano man nga kining mga kinaiya nakahimo sa ingon nga positibong impresyon diha sa mga investigator?
Ang ubang mga investigator naghisgot og dili kaayo positibong mga kinaiya. Sa unsang paagi nga kining mga kinaiya nakaapekto sa mga investigator?
Sa unsang paagi nga malikayan sa mga misyonaryo kining dili kaayo positibong mga impresyon?

Aron mas mapakita kon sa unsang paagi nga ang mga hiyas ug mga kinaiya nga sama kang Kristo makatabang sa mga misyonaryo nga maandam ang ilang gitudloan sa pagdawat sa ebanghelyo, hangyoa ang usa ka estudyante sa pag-summarize sa istorya mahitungod sa mga paningkamot ni Ammon sa pagsangyaw sa ebanghelyo ngadto sa mga Lamanite. Bahina ang klase ngadto sa upat ka grupo, ug i-assign ang usa sa mosunod nga mga tudling sa kasulatan sa matag grupo. Ipabasa og hilum sa mga estudyante ang gi-assign ngadto nila nga tudling ug ipapangita ang mga kinaiya nga sama kang Kristo nga gipakita ni Ammon.

Human mahatagi og panahon ang mga estudyante nga makabasa, hisguti ang mosunod diha sa klase:

Unsa nga mga hiyas nga sama kang Kristo ang gipakita ni Ammon diha sa mga bersikulo nga inyong gibasa?
Sa unsang paagi nga ang mga hiyas ni Ammon nakaapekto sa mga tawo nga iyang gitudloan?
Unsa ang ubang mga paagi diin ang modernong mga misyonaryo makasunod sa ehemplo ni Ammon?

Dapita ang mga estudyante sa paghunahuna og usa ka tawo nga ilang naobserbahan nga mipakita og ehemplo sa mga hiyas nga sama kang Kristo. Ipangutana:

Sa unsang paagi nga kini nga tawo nakaimpluwensya kaninyo pinaagi sa ilang Kristohanong kinaiya?

Pagserbisyo uban sa usa ka Kompanyon

Pahinumdumi ang mga estudyante nga ang mga misyonaryo kanunay nga i-assign nga moserbisyo uban sa usa ka kompanyon. Dapita ang mga estudyante sa paghunahuna og mga hagit nga lagmit nga mahitabo kon magtrabaho uban sa usa ka kompanyon. Pangutan-a ang mga estudyante sa mosunod:

Sa inyong hunahuna ngano nga ang mga misyonaryo magserbisyo man nga magkompanyon?

Basaha og kusog ang Doktrina ug mga Pakigsaad 42:6 ug 2 Mga Taga-Corinto 13:1 aron matabangan ang mga estudyante nga makita nga ang mga misyonaryo magserbisyo nga magkompanyon tungod kay usa kini ka sumbanan nga gihatag sa Ginoo. Dayon ipangutana:

Nganong importante man nga ang mga misyonaryo mopakita og mga hiyas ug mga lihok nga sama kang Kristo ngadto sa ilang mga kompanyon? (Tan-awa sa D&P 38:24–25, 27.)

I-display ang mosunod nga pamahayag ni Presidente James E. Faust (1920–2007) sa Unang Kapangulohan, ug hangyoa ang usa ka estudyante sa pagbasa niini og kusog ngadto sa klase:

“Ayaw gayud tuguti ang panagbingkil diha sa inyong panagkompanyon. Ang uban ninyong misyonaryo nga mga kompanyon maoy mahimo ninyong pinakasuod nga mga higala sa inyong kinabuhi. Magmahimong matang sa kompanyon nga gusto ninyong ikauban. Ayaw paghinakog sa inyong relasyon kauban sa inyong mga kompanyon. Kon dunay panagbingkil, ang Espiritu sa Ginoo mobiya, nga dili magsapayan kon si kinsay nasayop. Matag usa kanato usa ka indibidwal nga dunay talagsaong mga kalig-on ug mga talento, lahi kay sa ubang tawo sa kalibutan. Matag usa kanato dunay mga kahuyang. Sa usa ka nindot nga panagkompanyon, dunay teamwork—diin kon ang usa huyang, ang usa lig-on” (“What I Want My Son to Know before He Leaves on His Mission,” Ensign, Mayo 1996, 41).

Unsay gisulti ni Presidente Faust nga mahitabo kon dunay panagbingkil tali sa misyonaryo nga managkompanyon? (Tan-awa usab sa 3 Nephi 11:29.)
Sa unsang paagi nga ang mga hiyas nga atong gitun-an makatabang sa managkompanyon nga malikayan ang panagbingkil ug dunay mas nindot nga relasyon? (Tabangi ang mga estudyante nga mahibalo sa baruganan nga kon ang misyonaryo nga managkompanyon mopakita sa usag usa og mga hiyas ug mga kinaiya nga sama kang Kristo, mapanalanginan sila sa Espiritu.)
Ngano kaha nga ang pagbaton og nindot nga relasyon makahimo sa panagkompanyon nga mas epektibo sa pagsangyaw sa ebanghelyo?

Ikonsiderar ang pagbasa og kusog sa unang lima ka paragraph ubos sa subsection nga giulohan og “Your Companion” (diha sa “Relationships with Others” nga seksyon) sa Missionary Handbook (mga pahina 29–30). Dayon ipangutana:

Giunsa ninyo paggamit ang usa ka baruganan nga makita dinhi niining mga paragraph sa paglig-on sa inyong relasyon ngadto sa usa ka sakop sa pamilya o higala?

Tapusa pinaagi sa pagdapit sa imong mga estudyante nga mopamatuod mahitungod ni Kristo ug sa kamiportante sa pagkahimong sama Kaniya.

Mga Pagdapit aron Molihok

Tabangi ang mga estudyante nga mahibalo nga ang proseso sa pagpalambo og mga hiyas nga sama kang Kristo nagkinahanglan sa tabang sa Ginoo ug dugang nga personal nga paningkamot. Awhaga ang mga estudyante sa pagkompleto sa usa o dugang pa sa mosunod nga gisugyot nga mga kalihokan isip kabahin sa ilang mga paningkamot nga mas mahisama sa Manluluwas:

Pagpili og usa sa mga hiyas nga sama kang Kristo gikan sa kapitulo 6 sa Isangyaw ang Akong Ebanghelyo ug tun-i pa gayud kini gamit ang mga kasulatan, lakip sa Bible Dictionary, Topical Guide, index, ug uban pa. Paghimo og plano nga mas mapalambo pa kana nga hiyas diha sa inyong kinabuhi. Ipakigbahin ang inyong plano ngadto sa inyong mga ginikanan o kasaligan nga higala.
Paghunahuna kon unsay inyong mabuhat aron mas mahisama kang Kristo ngadto sa inyong pamilya, mga higala (mga miyembro ug dili miyembro), ug mga lider sa Simbahan. Isulat ang nahunahunaan ninyo nga piho nga mga ideya ug lihuka kini karong semanaha.
Paghimo og pipila ka tumong kon unsaon ninyo pag-andam aron makalikay sa panagbingkil sa umaabut ninyong misyonaryo nga kompanyon.
Pangita og mga paagi sa pagpahayag sa gugma ngadto sa mga sakop sa pamilya ug mga higala ug sa pagserbisyo kanila uban sa pagpailub ug gugmang putli.