Ang umaabut [prospective] ug ang full-time nga mga misyonaryo makatabang sa pagpauswag sa buhat sa kaluwasan pinaagi sa pagkat-on mahitungod sa buhat sa templo ug family history ug dayon motabang sa uban nga makasinati sa mga pagbati sa Espiritu nga nag-uban niini nga buhat. Ang family history mahimong usa ka gamhanang paagi sa pagpangita og mga tawo nga katudloan ug sa paglig-on sa pagtuo sa bag-ong mga kinabig ug sa dili kaayo aktibo nga mga miyembro. Ang pag-apil diha sa buhat sa family history mopabati sa kasingkasing sa mga tawo ngadto sa ilang katigulangan ug ngadto sa Ginoo. Ang family history usa ka himan nga magamit sa mga misyonaryo sa pagdapit sa uban nga moduol kang Kristo ug makadawat sa ordinansa sa kaluwasan.
Ipamilyar ang inyong kaugalingon sa mga basic search tool diha sa FamilySearch.org, o dapita ang usa ka ward o branch family history consultant sa pagtudlo mahitungod niining mga himan atol sa leksyon.
Pag-andam aron i-display ang hulagway sa usa ka duol nga templo.
I-display ang usa ka litrato sa duol nga templo, ug dayon basaha ang mosunod nga kinutlo gikan ni Presidente Howard W. Hunter:
Imahe
President Howard W. Hunter
“Andamon nato ang matag misyonaryo aron moadto sa templo nga takus ug himoon kana nga kasinatian nga mas nindot pa gani kay sa pagdawat og mission call” (“Follow the Son of God,” Ensign, Nob. 1994, 88).
Alang sa emphasis, mahimo nimong basahon og usab ang kinutlo ug dayon ipangutana sa mga estudyante:
Sa unsang mga paagi nga ang pag-adto sa templo “mas nindot pa” kay sa pagdawat og mission call? (Ang posible nga mga tubag mahimong maglakip sa mosunod: bisan kon ang misyon temporaryo lang, ang mga pakigsaad nga atong gihimo diha sa templo mahangturon; ang mga panalangin sa templo makahatag og gahum ngadto sa takus nga mga misyonaryo.)
Ipabasa sa usa ka estudyante ang unang paragraph ubos sa “Mga Templo ug Family History” sa mga pahina 100–101 sa Isangyaw ang Akong Ebanghelyo. Dayon ipangutana:
Unsa man ang pipila sa mga panalangin nga atong madawat diha sa templo?
Sa unsang paagi nga kining mga panalangin makatabang sa usa ka tawo nga nanlimbasug sa pagduol ngadto kang Kristo?
Aron makita kon sa unsang paagi nga ang mga misyonaryo mapanalanginan pinaagi sa pagtambong sa templo sa wala pa ang misyonaryo nga pagserbisyo, hangyoa ang klase sa pagpakli sa Doktrina ug mga Pakigsaad 109:22–23, ug ipasabut nga kini nga mga bersikulo mga kabahin sa pagpahinungod nga pag-ampo sa Templo sa Kirtland. Dapita ang usa ka estudyante sa pagbasa og kusog sa mga bersikulo samtang magsunod ang klase, nga mangita sa mga panalangin sa templo nga madawat sa mga sulugoon sa Ginoo. Dayon tabangi ang mga estudyante nga mahibalo sa doktrina nga gitudlo niini nga mga bersikulo pinaagi sa pagpangutana sa mosunod:
Sa unsang paagi nga kining mga bersikulo makatabang kaninyo nga masabtan kon nganong importante nga ang mga misyonaryo makadawat og mga panalangin sa templo sa dili pa mobiya aron magmisyon? (Ang mga tubag sa mga estudyante mahimong ma-summarize pinaagi niini nga baruganan: Ang pagdawat og mga panalangin sa templo makapahimo sa mga misyonaryo sa pag-adto sa kalibutan uban sa balaanong panabang ug gahum. Ikonsiderar ang pagsulat sa pisara niini nga baruganan.)
I-display ang mosunod nga mensahe ni Elder Jeffrey R. Holland sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:
Imahe
Elder Jeffrey R. Holland
Importante gayud alang kaninyo nga makasabut nga ang pag-adto sa templo alang sa inyong kaugalingon nga endowment, lakip ang talagsaong mga ordinansa nga nag-andam kaninyo alang nianang endowment … mga mahinungdanon nga bahin sa pag-andam sa inyong misyon. … [Kinahanglan kamong] makasabut sa kamahinungdanon niadtong mga pakigsaad sa templo, ang dili mabadbad nga sumpay tali sa inyong endowment ug sa inyong kalampusan isip misyonaryo. Sa tinuod, ang pulong gayud nga endowment nagpasabut sa kahulugan nianang mahinungdanon nga sumpay. Ang endowment usa ka gasa. …
“Kamo nasayud nga dili kini ninyo mahimo nga kamo lang. Nagkinahangkan kita sa tabang sa langit; nagkinahanglan kita sa mga gasa sa Dios. … Kini nga buhat seryoso kaayo ug ang pagbatok sa kaaway niini hilabihan gayud nga kita nagkinahanglan sa matag balaanong gahum sa pagpalambo sa atong paningkamot ug sa pagpalig-on sa Simbahan” (“Pagtuman sa mga Pakigsaad: Usa ka Mensahe alang Niadtong Moserbisyo og Misyon,” Liahona, Ene. 2012, 49–50).
Ipasabut nga sa dili pa makadawat sa endowment diha sa templo, ang takus nga mga miyembro kinahanglan gayud nga makadawat og usa ka rekomend sa templo gikan sa ilang lokal nga mga lider sa priesthood. Dayon i-display ang mosunod nga pamahayag ug dapita ang usa ka estudyante sa pagbasa niini og kusog ngadto sa klase:
“Usa ka rekomend sa templo ang mopaila nga kita takus pinaagi sa usa ka interbyu uban sa usa ka sakop sa bishopric o sa atong presidente sa branch ug interbyu usab sa usa ka miyembro sa atong kapangulohan sa stake o kapangulohan sa misyon. Ang mga interbyu sa rekomend sa templo mao ang mga oportunidad alang kanato sa pag-eksamin sa atong mga katakus. Sa kada interbyu, ang atong mga priesthood lider mangutana kanato kabahin sa atong personal nga pamatasan ug hugot nga pagtuo. Ang atong mga priesthood lider mohimo niining mga interbyu nga pribado ug kompidensyal. …
“Ang mosunod mao ang pipila sa mga hilisgutan nga ipangutana sa inyong mga priesthood lider:
Ang inyong pagpamatuod sa Langitnong Amahan, ni Jesukristo, ug sa Espiritu Santo.
Kon kamo ba nagsuporta sa Presidente sa Simbahan.
Kon kamo ba nagsunod sa balaod sa kaputli, nagbayad og ikapulo, nagmatinud-anon ngadto sa uban, ug nagsunod sa Pulong sa Kaalam.
Kon kamo ba naningkamot sa pagsimba, naghupot sa mga pakigsaad nga inyong gihimo, ug nagpahiuyon sa inyong kinabuhi sa mga sugo sa ebanghelyo” (“Pagpakatakus sa Pagsulod sa Templo,” Ensign, Ago. 2010, 8–9; o Liahona, Ago. 2010, 12–13).
Sa unsang paagi nga ang mga gikinahanglan alang sa pagkatakus makatabang kaninyo nga masabtan ang sagradong kinaiyahan sa templo ug sa inyong calling isip misyonaryo?
Kon kini dili kaayo sagrado o personal, unsa nga mga kasinatian ang inyong mapakigbahin nga nakatabang kaninyo nga masabtan ug mabati ang kaimportante sa templo ug sa buhat nga gihimo didto?
Ipakonsiderar sa mga estudyante kon unsa ang ilang kinahanglang buhaton aron takus nga makadawat sa ilang endowment diha sa templo.
Sa dili pa magpadayon, mahimo nimong ipasabut ngadto sa imong mga estudyante nga isip mga misyonaryo kinahanglang buhaton nila ang kutob sa ilang mahimo aron awhagon ang bag-ong mga kinabig nga mangandam nga moadto sa templo. Ang bag-ong mga kinabig nga moadto sa templo aron mopahigayon og mga bunyag alang sa ilang mga katigulangan mas may kalagmitan nga magpabiling aktibo ug dayon moadto sa templo sa dili madugay aron makadawat sa ilang endowment ug sealing didto sa templo. Tapusa kining bahina sa leksyon pinaagi sa pagpakigbahin sa imong pagpamatuod mahitungod sa templo ug sa espirituhanong kalig-on nga imong nadawat tungod sa pagsimba didto.
Ang Plano sa Dios sa Pagtubos sa mga Patay
Pahinumdumi ang mga estudyante nga human sa kamatayon ni Jesukristo, mibisita Siya sa kalibutan sa espiritu (tan-awa sa 1 Pedro 3:18–20; 4:6). Dayon hangyoa ang mga estudyante sa pagpakli ngadto sa Doktrina ug mga Pakigsaad 138:29–35. Ipasabut nga kini nga seksyon naglangkob sa istorya sa panan-awon ni Presidente Joseph F. Smith sa kalibutan sa espiritu. Dapita ang duha ka estudyante nga magpuli-puli sa pagbasa og kusog sa mga bersikulo. Dayon ipangutana:
Unsay gibuhat sa Manluluwas aron sa pag-organisar sa pagsangyaw sa ebanghelyo ngadto sa mga patay didto sa kalibutan sa espiritu?
Sa unsang paagi nga ang mga bersikulo 33–35 makatabang kanato nga masabtan ang paagi diin kadtong modawat sa ebanghelyo didto sa kalibutan sa espiritu makadawat sa mga ordinansa sa kaluwasan? (Kadtong modawat sa mensahe sa ebanghelyo makaangkon sa makaluwas nga mga ordinansa alang kanila.)
Papuli-puliha sa pagbasa og kusog ang duha ka estudyante sa katapusang duha ka paragraph diha sa “Mga Templo ug Family History” nga seksyon sa pahina 101 sa Isangyaw ang Akong Ebanghelyo. Dayon ipangutana:
Unsa man ang plano sa Ginoo alang sa mga tawo nga namatay nga wala makadawat sa gikinahanglan nga mga ordinansa sa ebanghelyo? (Ang mga buhi makapahigayon sa makaluwas nga mga ordinansa alang niadtong nangamatay na.)
Ang Misyon ni Elijah
Ipasabut nga si Elijah usa ka propeta sa Daang Tugon nga nabuhi mga 900 B.C. Si propeta Malaquias nanagna nga si Elijah mobalik nganhi sa yuta (tan-awa sa Malaquias 4:5–6), ug sa dihang mipakita si Moroni kang Joseph Smith niadtong 1823, gipasabut niya og usab nga si Elijah mobalik. Ipabasa og kusog sa usa ka estudyante ang Joseph Smith—Kasaysayan 1:38–39 samtang mosunod ang klase, nga mangita sa unsay gitudlo ni Moroni mahitungod ni Elijah. Ipangutana:
Unsa man ang nakat-unan ni Joseph Smith mahitungod ni Elijah? (Bisan kon mogamit sila og lain-laing mga pulong, ang mga estudyante kinahanglang makasabut nga sa wala pa ang Ikaduhang Pag-anhi ni Jesukristo, si Elijah mobalik nganhi sa yuta ug ang kasingkasing sa mga anak mobati ngadto sa ilang mga amahan.)
Unsa man ang buot ipasabut nga ang kasingkasing sa mga anak mobati ngadto sa ilang mga amahan? (Ang mga indibidwal mahimong interesado ug magpakabana sa mahangturong kaayohan sa ilang mga pamilya sa nangagi, sa karon, ug sa umaabut. Kini nga interes usa ka bahin sa unsay makapadasig sa mga tawo sa pagsiksik sa mga rekord sa ilang nangamatay nga mga katigulangan ug sa pag-apil sa mga ordinansa alang kanila.)
Pasabta ang mga estudyante nga usa ka semana human mapahinungod ang Templo sa Kirtland niadtong 1836, espesyal nga mga panghitabo ang nahitabo nga narekord sa Doktrina ug mga Pakigsaad 110. Dapita ang usa ka estudyante sa pagbasa og kusog sa Doktrina ug mga Pakigsaad 110:13–16 samtang mosunod ang klase, nga mangita kon unsay gipahiuli ni Elijah nganhi sa yuta. Pangutan-a ang mga estudyante:
Unsa nga mga yawe ang gipahiuli ni Elijah ngadto ni Joseph Smith? (Kon gikinahanglan, dapita ang mga estudyante nga tan-awon ang Doktrina ug mga Pakigsaad 110:16, ug tabangi sila nga makasabut nga gipahiuli ni Elijah ang mga yawe sa priesthood kalabut sa sealing.)
Aron matabangan ang mga estudyante nga makasabut kon sa unsang paagi nga ang mga yawe sa priesthood kalabut sa sealing makapanalangin sa mga pamilya, hangyoa ang usa ka estudyante sa pagbasa og kusog sa unang paragraph diha sa seksyon nga giulohan og “Mahangturon nga Kaminyoon” sa Isangyaw ang Akong Ebanghelyo, pahina 99. Dayon ipangutana:
Sumala niini nga paragraph, unsa man ang katuyoan sa mga yawe sa sealing nga gipahiuli ni Elijah nganhi sa yuta? (Ang mga estudyante mahimong mogamit og lain-laing mga pulong, apan kinahanglan silang mahibalo sa mosunod nga doktrina: Pinaagi sa mga yawe sa priesthood kalabut sa sealing, ang sagradong mga ordinansa mahimong mapahigayon diha sa mga templo nga mobugkos sa mga pamilya sa kahangturan.)
Sa unsang paagi nga kining mga yawe nakapanalangin kaninyo, sa inyong pamilya, sa inyong kaparyentihan, o sa inyong mga higala?
Diha sa pisara, isulat ang “Ang Espiritu ni Elijah.” I-display ang mosunod nga mga kinutlo ug dapita ang duha ka estudyante sa pagbasa niini og kusog ngadto sa klase:
Imahe
Elder Russell M. Nelson
Si Elder Russell M. Nelson sa Korum sa Napulog Duha ka mga Apostoles mihatag og kahulugan sa espiritu ni Elijah isip “usa ka pagpabati sa Espiritu Santo nga naghatag og pagsaksi sa balaang kinaiyahan sa pamilya” (“A New Harvest Time,” Ensign, Mayo 1998, 34).
Imahe
Elder David A. Bednar
Si Elder David A. Bednar sa Korum sa Napulog Duha ka mga Apostoles mihatag og dugang nga hunahuna kon sa unsang paagi nga ang espiritu ni Elijah makaimpluwensya sa mga indibidwal. “Kining talagsaong impluwensya sa Espiritu Santo nagdasig sa mga tawo sa pag-ila, pagrekord, ug paghinumdom sa ilang mga katigulangan ug mga sakop sa pamilya—kaniadto ug karon.
“Ang Espiritu ni Elijah nakaapekto sa mga miyembro ug dili mga miyembro sa Simbahan. Apan, isip mga miyembro sa gipahiuli nga Simbahan ni Kristo, kita adunay responsibilidad nga pakigsaad sa pagsiksik sa atong mga katigulangan ug paghatag kanila sa makaluwas nga mga ordinansa sa ebanghelyo. …
“Tungod niini nga mga rason kita naghimo sa pagsiksik sa family history, nagtukod og mga templo, ug nagpahigayon sa mahinungdanon nga mga ordinansa. Tungod niini nga mga rason si Elijah gipadala aron sa pagpahiuli sa awtoridad sa pagbugkos nga nagbugkos dinhi sa yuta ug didto sa langit” (“Ang mga Kasingkasing sa mga Anak Mobati,” Ensign o Liahona, Nob. 2011, 25–26).
Tabangi ang mga estudyante nga mahibalo ug mas makasabut sa mga doktrina nga gitudlo ni Elder Nelson ug ni Elder Bednar pinaagi sa pagpangutana:
Apan unsay buot natong ipasabut kon kita moingon nga “espiritu ni Elijah”?
Sa unsang paagi nga ang Espiritu Santo makaimpluwensya sa atong mga pagbati mahitungod sa pamilya? (Ang espiritu ni Elijah, nga usa ka lahi nga impluwensya sa Espiritu Santo, naghatag og pagsaksi sa balaanong kinaiyahan sa pamilya ug makatabang kanato nga hatagan og bili ang mga sakop sa atong pamilya, ang nangagi ug ang karon. Gibutang usab niini ngari kanato ang usa ka tinguha sa paghatag og makaluwas nga mga ordinansa alang sa atong mga katigulangan.)
Nakasulay ba kamo nga ang inyong kasingkasing mibati ngadto sa inyong mga katigulangan sa pipila ka paagi? Kon mao, unsa may giaghat nga inyong buhaton? (Kon gikinahanglan, pahinumdumi ang mga estudyante sa nag-unang mga leksyon sa kurso kon sa unsang paagi nga ang Espiritu Santo makigsulti kanato.)
Pag-apil diha sa Buhat sa Family History
Ipakita ngadto sa mga estudyante ang usa ka nakompleto nga upat ka henerasyon nga pedigree chart o usa ka fan chart nga gi-print gikan sa FamilySearch.org. Hangyoa ang mga estudyante sa pagpasabut kon unsa nga impormasyon ang anaa niini nga mga dokumento.
Iapud-apod ang blangko nga upat ka henerasyon nga pedigree chart ngadto sa matag estudyante. Hatagi ang mga estudyante og higayon nga masusi ang pedigree chart ug masulat ang mga pangalan sa ilang mga katigulangan kutob sa ilang mahimo.
Asa man kaha kamo makapangita sa impormasyon nga gikinahanglan aron makompleto ang inyong pedigree chart o fan chart? (Pahinumdumi ang mga estudyante nga kinahanglan una silang magtinguha og tabang gikan sa mga ginikanan, mga apohan, o sa ubang mga sakop sa pamilya. Ang mga ward o branch family history consultant dako usab ang matabang sa family history research. Dugang pa, kinahanglang mahibalo ang mga estudyante mahitungod sa website sa Simbahan alang sa family history research, ang FamilySearch.org.)
Pangutan-a kon duna ba sa mga estudyante ang gustong mopakigbahin sa ilang mga kasinatian sa paggamit sa FamilySearch aron makakat-on mahitungod sa ilang mga katigulangan. Kon ang mga estudyante wala pa makagamit sa FamilySearch, hatagi sila og daklit nga overview kon unsay ilang makita didto. Mahimo gani nga inyong tan-awon sa FamilySearch.org diha sa computer ug mag-search gamit ang pangalan sa usa sa namatay na nga mga katigulangan sa imong mga estudyante. Hatagi og gibug-aton nga ang FamilySearch usa ka himan nga makatabang kanato nga mailhan ang atong mga katigulangan ug maandam ang ilang impormasyon aron masumiter ngadto sa templo alang sa mahinungdanon nga mga ordinansa.
Pasabta ang mga estudyante nga ang laing paagi aron makasinati sa family history mao ang pagkolekta og mga istorya mahitungod sa ilang mga katigulangan ug mga sakop sa pamilya. Ang mga istorya sa family history makatabang kanato nga mobati sa espiritu ni Elijah ug molambo ang atong gugma ug pasalamat alang sa mga sakop sa pamilya nga nag-una kanato. Ikonsiderar ang pagpakigbahin og mubo nga istorya mahitungod sa usa sa imong mga katigulangan. Dayon ipangutana:
Sa unsang paagi nga ang mga istorya sa family history makaimpluwensya sa inyong mga pagbati alang sa mga sakop sa inyong pamilya?
Sa unsang paagi nga kini makatabang kaninyo aron masabtan kon si kinsa kamo ug unsay mahimo ninyong makab-ot?
Ipasalida ang video nga “The Time Is Now” (3:20). Samtang magtan-aw sila sa panaghisgot uban ni Elder David A. Bednar sa Korum sa Napulog Duha ka mga Apostoles, awhaga ang mga estudyante sa pagkonsiderar sa mga rason nganong nagsugod sila o ganahang magsugod sa pag-apil sa buhat sa family history.
Unsa man ang inyong nakat-unan mahitungod sa buhat sa family history gikan ni Elder Bednar ug sa kabatan-onan diha niini nga video?
Unsa ang mga pagbati nga nasinati niining kabatan-onan sa dihang miapil sila sa family history?
Sultihi ang mga estudyante nga misaad si Elder Bednar ngadto sa kabatan-onan nga moapil sa buhat sa templo ug family history. I-display ang mosunod nga kinutlo ug dapita ang usa ka estudyante sa pagbasa niini og kusog:
Imahe
Elder David A. Bednar
“Kon motuman mo niini nga pagdapit uban sa pagtuo [nga moapil sa buhat sa family history ug mopahigayon og mga bunyag alang sa inyong mga katigulangan], ang inyong kasingkasing mobati sa inyong mga amahan. Ang saad nga gihimo ngadto nila ni Abraham, Isaac, ug Jacob matisok diha sa inyong mga kasingkasing. Ang inyong patriyarkal nga panalangin, uban sa pamahayag niini sa kaliwatan, mosumpay ninyo ngadto sa mga amahan ug mahimong mas mahinungdanon alang kaninyo. Ang inyong gugma ug pasalamat alang sa inyong mga katigulangan motubo. Ang inyong pagpamatuod ug pagkakabig ngadto sa Manluluwas mahimong lig-on ug malungtaron. Ug ako mosaad nga kamo panalipdan batok sa grabe nga impluwensya sa yawa. Samtang kamo moapil ug mohigugma niining balaan nga buhat, kamo panalipdan sa inyong kabatan-on ug sa tibuok ninyong kinabuhi” (“Ang mga Kasingkasing sa mga Anak Mobati,” Ensign o Liahona, Nob. 2011, 26–27).
Pangutan-a ang mga estudyante:
Hain sa mga panalangin nga nahisgutan ni Elder Bednar ang ganahan ninyong madawat, ug ngano man? (Ang mga tubag mahimong maglakip sa baruganan nga ang pag-apil sa buhat sa family history makapalig-on sa atong pagkakabig ngadto sa Manluluwas ug magdala og espirituhanong proteksyon batok sa impluwensya sa yawa.)
Matabangan nimo ang mga estudyante sa pagpakigbahin og personal nga mga kasinatian mahitungod sa buhat sa family history pinaagi sa pagpangutana sama sa mosunod:
Sa unsang paagi nga nasinati ninyo ang usa o dugang pa niining gisaad nga mga panalangin diha sa inyong kinabuhi?
Aduna ba kaninyo o usa ka sakop sa inyong pamilya nga nakakita og pangalan sa usa ka katigulangan ug miadto sa templo aron mabunyagan alang nianang tawhana? Sa unsang paagi nga kana nga kasinatian lahi kay sa mabunyagan alang sa tawo nga dili paryente?
Kon walay estudyante nga nakasinati niini, ikonsiderar ang pagpangutana: Sa unsang paagi nga inyong nasinati ang gisaad nga mga panalangin pinaagi sa pagbuhat og mga bunyag alang sa mga patay?
Kon atol sa inyong panaghisgot sa klase mahibaloan nimo nga dunay usa o dugang pa nga mga estudyante nga miapil ug dunay lig-ong mga pagbati mahitungod sa family history, mahimo nimo silang pangutan-on kon unsa nga tambag ang ilang mahatag ngadto sa ilang kaedad nga wala pa makasugod sa paghimo sa buhat sa family history.
Paggamit sa Family History aron Dapiton ang Uban nga Moduol kang Kristo
Sultihi ang mga estudyante nga ang pag-search sa impormasyon sa family history nahimo nang popular nga kalihokan sa kalibutan karon. Ipabasa og kusog sa usa ka estudyante ang mosunod nga pamahayag ni Presidente Gordon B. Hinckley:
Imahe
President Gordon B. Hinckley
“Dunay minilyon sa tibuok kalibutan nga nagtrabaho sa mga rekord sa family history. Ngano man? Nganong gibuhat nila kini? Mituo ko nga tungod kini kay natandog sila sa espiritu niini nga buhat, butang nga atong gitawag og espiritu ni Elijah. Kini ang pagpabalik sa mga kasingkasing sa mga anak ngadto sa ilang mga amahan. Kadaghanan kanila wala makasabut kon unsay tinuod nga katuyoan diha niini, gawas lang tingali sa usa ka lig-on ug makapadasig nga pagkakuryuso.
“Kinahanglang duna gyuy usa ka katuyoan diha niining grabe nga paggahin sa panahon ug kwarta. Kana nga katuyoan, diin kami mohatag og balaang pagsaksi, mao ang pag-ila sa mga henerasyon sa mga nangamatay aron mapahigayon ang mga ordinansa alang kanila alang sa ilang mahangturon ug walay katapusan nga panalangin ug pag-uswag” (“A Century of Family History Service,” Ensign, Mar. 1995, 62).
Ipangutana:
Unsaon man paggamit sa mga misyonaryo kining naglambo, tibuok kalibutan nga interes diha sa family history aron mapaila ang uban ngadto sa ebanghelyo?
Hangyoa ang mga estudyante sa pagbasa og kusog sa unang tulo ka paragraph ug sa katapusang paragraph sa seksyon nga giulohan og “Family History” sa Isangyaw ang Akong Ebanghelyo, mga pahina 200–202. Ipatan-aw nila kon nganong ang pag-istorya mahitungod sa buhat sa family history kauban ang mga dili miyembro usa ka natural ug dili makapahadlok nga paagi diin ang misyonaryo makasugod sa pagpakig-istorya. Human mabasa kining mga paragraph, ipangutana:
Sa unsang paagi nga ang pagpakig-istorya sa uban mahitungod sa buhat sa family history mahimong epektibo nga himan aron ang mga misyonaryo makakita og mga tawo nga katudloan? (Kinahanglang masabtan sa mga estudyante nga ang family history mahimong usa ka gamhanang kapanguhaan nga magamit sa pagpangita niadtong giandam sa Ginoo nga makadawat sa ebanghelyo.)
Human makatubag ang mga estudyante, ipasalida ang video nga “Family History and Missionary Work—Finding” (3:53). Samtang magtan-aw sila, ipakonsiderar sa mga estudyante kon sa unsang paagi nila magamit ang hilisgutan sa family history aron makasugod og panag-istoryahanay ngadto sa uban.
Human mapasalida ang video, ipangutana:
Unsay gibuhat sa mga misyonaryo diha sa video aron makasugod og panag-istoryahanay ngadto sa uban mahitungod sa buhat sa family history?
Unsa ang epekto sa pakig-istoryahanay mahitungod sa buhat sa family history ngadto sa potensyal nga mga investigator?
Sultihi ang mga estudyante nga magpraktis na sila karon sa paggamit og pedigree chart aron sa pagdapit og tawo nga makat-on pa mahitungod sa Simbahan. (Isip alternatibo, mahimo nimong ipakonsiderar sa mga estudyante kon sa unsang paagi nila magamit ang istorya mahitungod sa usa sa ilang mga katigulangan aron makasugod og panag-istoryahanay mahitungod sa ebanghelyo). Aron matabangan ang mga estudyante nga mahimong malampuson niini nga assignment, pangayo og mga ideya sa mga estudyante kon unsaon paggamit ang pedigree chart (o usa ka istorya mahitungod sa usa ka katigulangan) aron makasugod og panag-istoryahanay mahitungod sa buhat sa family history ug sa unsang paagi nga moresulta kini ngadto sa usa ka mensahe mahitungod sa gipahiuli nga ebanghelyo ni Jesukristo. Samtang motubag ang mga estudyante, isulat sa pisara ang ilang mga ideya.
Gamita ang pipila sa ilang mga ideya ug ipakita sa klase kon unsaon paggamit ang pedigree chart aron makasugod og panag-istoryahanay ngadto sa usa ka tawo mahitungod sa ebanghelyo. Dayon, ipares ang mga estudyante ngadto sa laing sakop sa klase ug papraktisa sila sa pagbuhat sa samang butang. Human makabaton og kahigayunan ang matag estudyante sa pagtudlo sa laing sakop sa klase, pangutana og pipila ka pang-follow-up nga mga pangutana sama sa:
Sa inyong hunahuna unsay maayo nga nahitabo niining pagpraktis sa pagtudlo?
Unsay gusto ninyong buhaton nga mas maayo pa?
Kon itugot sa panahon, pasabta ang mga estudyante nga sa daghang dapit kon asa sila moserbisyo, ang mga misyonaryo hangyoon nga motabang sa pagpalig-on sa pagtuo ug pasalig [commitment] sa dili kaayo aktibo nga mga miyembro sa Simbahan. Ang family history mahimong bililhon nga himan sa pagtabang niining mga indibidwal nga mobati sa Espiritu Santo ug moduol kang Kristo. Dayon ipasalida ang video nga “Family History and Missionary Work—Activation” (3:05), ug ipapangita sa mga estudyante ang mga paagi nga ang buhat sa family history magamit aron makatabang sa pagpaaktibo sa dili kaayo aktibo nga mga miyembro:
Human mapasalida ang video, ipangutana:
Sa unsang paagi nga ang pagpakig-istorya mahitungod sa buhat sa family history ug sa doktrina sa mahangturong mga pamilya makatabang sa paglig-on sa pagtuo sa dili kaayo aktibo nga mga miyembro?
Hatagi og gutlo ang mga estudyante nga makonsiderar kon unsay ilang mabuhat karon ug unsay ilang mabuhat isip mga misyonaryo diin magamit ang buhat sa family history isip usa ka himan aron madapit ang uban nga moduol kang Kristo. (Kon giaghat sa Espiritu, mahimo kang motawag og pipila ka estudyante nga ipakigbahin ang ilang mga tubag ngadto sa klase.) Ipakigbahin ang imong pagpamatuod mahitungod sa mga baruganan nga gitudlo diha niini nga leksyon.
Mga Pagdapit aron Molihok
Dapita ang mga estudyante sa pag-apil karon sa buhat sa kaluwasan pinaagi sa paghimo sa usa o dugang pa sa mosunod nga mga kalihokan:
Pag-set up og LDS Account aron maka-access kamo sa FamilySearch.org. Kon posible, paghimo ug pag-print og upat ka henerasyon nga pedigree chart o usa ka fan chart nga dunay impormasyon sa inyong pamilya.
Ipakita ang inyong upat ka henerasyon nga pedigree chart ngadto sa usa ka higala o silingan ug dapita siya nga makat-on pa mahitungod sa family history. Pagtakda og petsa nga dad-on ang inyong higala ngadto sa usa ka family history consultant o mobisita og family history library.
Gamit ang FamilySearch.org, ilha ang usa o dugang pa sa inyong mga katigulangan nga nagkinahanglan nga ang mga ordinansa sa templo mapahigayon alang kanila. Kon posible, andama ang impormasyon aron mapahigayon ang ilang buhat sa templo ug makompleto ang mga ordinansa sa bunyag ug pagkumpirma alang kanila.