5

Unsa ang Papel (Role) sa Basahon ni Mormon?

Pasiuna

Ang Basahon ni Mormon usa ka gamhanang ebidensya sa pagkabalaan ni Jesukristo ug pruweba sa Pagpahiuli pinaagi ni Propeta Joseph Smith. Gitubag niini ang “mga pangutana sa tawo” (tan-awa sa Isangyaw ang Akong Ebanghelyo, 127) nga anaa sa daghan sa mga anak sa Langitnong Amahan mahitungod sa ilang kinabuhi. Usa ka mahinungdanong bahin sa pagkakabig mao ang pagkadawat og usa ka pagsaksi gikan sa Espiritu Santo nga ang Basahon ni Mormon tinuod. Ang umaabut nga misyonaryo kinahanglang magtuon sa Basahon ni Mormon matag adlaw, magbaton og personal nga pagpamatuod mahitungod sa Basahon ni Mormon, ug makaangkon og kasinatian sa pagpakigbahin niana nga pagpamatuod ngadto sa uban.

Advance nga Pagpangandam

• Tun-i ang 1 Nephi 10:14; 2 Nephi 3:12; 3 Nephi 16:4–5; 20:13.

• Tun-i ang “Ang Basahon ni Mormon: Usa ka Saksi sa Biblia,” Ensign, Okt. 2011, 24–27.

• Tun-i ang Isangyaw ang Akong Ebanghelyo, mga pahina123–29.

• Pag-andam aron ipasalida ang video nga “Ang Basahon ni Mormon—Basahon gikan sa Dios” (1:55; video clip gikan sa pakigpulong ni Elder Tad R. Callister, Ensign o Liahona, Nob. 2011, 74–76, nga anaa sa lds.org/media-library.

• Pag-andam aron ipasalida ang video nga “A Book of Mormon Story” (5:15), nga anaa sa LDS.org.

Mga Sugyot alang sa Pagtudlo

Ang Basahon ni Mormon usa ka Gamhanang Ebidensya sa Pagkabalaan ni Jesukristo

Dapita ang mga estudyante sa pagtan-aw sa ilang mga kopya sa Basahon ni Mormon, o iisa ang usa ka kopya aron masusi sa klase. Dayon ipangutana ang mosunod:

• Kon kamo wala pay nahibaloan mahitungod sa Basahon ni Mormon, unsa may inyong makat-unan pinaagi sa pagbasa lamang sa subtitle nga (Lain nga Tugon ni Jesukristo)?

• Unsay inyong gilauman nga makita sa sulod sa basahon?

Ipapakli sa mga estudyante ang ulohang pahina [title page] sa Basahon ni Mormon ug basaha ang ikaduhang paragraph, nga hatagan og pagtagad ang gusto sa mga manunulat sa Basahon ni Mormon nga makumbinsir ang kalibutan. Dayon ipangutana:

• Unsa man ang gusto sa mga manunulat sa Basahon ni Mormon nga makumbinsir ang kalibutan?

Isulat sa pisara ang mosunod: Ang mahinungdanong katuyoan sa Basahon ni Mormon mao ang pagkumbinsir sa tanang mga tawo nga si Jesus mao ang Kristo.

Ipabasa og kusog sa usa ka estudyante ang seksyon nga giulohan og “Ang Basahon ni Mormon Nagpamatuod ni Kristo” diha sa pahina 125 sa Isangyaw ang Akong Ebanghelyo samtang ang klase magsunod, nga makita sa mga paagi nga ang Basahon ni Mormon nagsilbi nga usa ka saksi ni Jesukristo.

Dayon pangutan-a ang mga estudyante:

• Sa unsang mga paagi nga ang Basahon ni Mormon nagsilbi nga usa ka saksi ni Jesukristo?

• Sa unsang paagi nga ang Basahon ni Mormon nakapalig-on sa inyong pagpamatuod mahitungod ni Jesukristo?

Dapita ang mga sakop sa klase sa pagpakigbahin ngadto sa laing sakop sa klase sa ilang personal nga mga pagpamatuod mahitungod sa Basahon ni Mormon, sa ilang mga kasinatian sa pagbasa ug pag-ampo kalabut niini, o sa ilang paborito nga mga tudling kalabut sa Manluluwas ug sa Iyang misyon. Sultihi ang mga estudyante nga usa sa labing importante nga mga butang nga ilang mabuhat sa dili pa mosulod sa MTC mao ang pagbasa sa tibuok Basahon ni Mormon ug mag-ampo mahitungod sa katinuod niini. Awhaga ang mga estudyante sa pagsunod sa tambag ni Presidente Ezra Taft Benson ngadto sa mga miyembro sa Simbahan sa pagbasa og 30 minutos matag adlaw sa Basahon ni Mormon.

Ang Biblia ug ang Basahon ni Mormon Nagsuporta sa Usag Usa

Ipapakli sa mga estudyante sa pahina 126 diha sa Isangyaw ang Akong Ebanghelyo. Hangyoa ang pipila ka estudyante nga magpuli-puli sa pagbasa og kusog sa mga paragraph diha sa seksyon nga giulohan og “Ang Basahon ni Mormon ug ang Biblia Nagsuporta sa Usag Usa.”

Dayon ipangutana:

• Unsa ang ubang mga paagi nga ang Basahon ni Mormon ug ang Biblia nagsuporta sa usag usa?

• Nganong kinahanglang gamiton sa mga misyonaryo ang Basahon ni Mormon ug ang Biblia samtang nagtabang sila sa uban nga makakat-on sa ebanghelyo ni Jesukristo? (Ang mga tubag sa mga estudyante kinahanglang magpakita sa mosunod nga kamatuoran: Ang Basahon ni Mormon ug ang Biblia nagtinabangay isip mga saksi ni Jesukristo ug sa Iyang mga pagtulun-an.)

Aron matabangan ang mga estudyante nga makasabut niini nga konsepto, hangyoa ang usa ka estudyante sa pagbasa og kusog sa 2 Nephi 3:12. Ipabasa og kusog sa laing estudyante ang Ezequiel 37:15–17. Ipatan-aw sa klase ang mga pulong nga nagpasabut sa Biblia ug ang mga pulong nga nagpasabut sa Basahon ni Mormon. Human mabasa kining mga tudling, pangutan-a ang klase:

• Sa unsang paagi nga kining mga kasulatan nagsuporta sa ideya mahitungod sa duha ka mga saksi?

• Unsa ang mga panalangin nga gisaad isip resulta sa paghiusa sa Basahon ni Mormon ug sa Biblia?

Aron makapakita og dugang kon sa unsang paagi nga ang Basahon ni Mormon ug ang Biblia nagsilbi nga mga saksi ni Jesukristo, ipabasa sa usa ka estudyante ang mosunod gikan ni Elder Tad R. Callister sa Seventy, o ipakita ang video clip sa kinutlo.

“Ngano nga ang Basahon ni Mormon importante man kaayo kon duna na kitay Biblia nga makatudlo kanato mahitungod ni Jesukristo? Wala ba kamo mahibulong nganong dunay daghang simbahan nga Kristiyano sa kalibutan karon nga ila mang nakuha ang ilang mga doktrina gikan sa samang Biblia? Tungod kay lahi-lahi ang ilang pagsabut sa Biblia. Kon pareha pa unta ang ilang pagsabut, pareha ra unta silag simbahan. Dili kini mao ang kahimtang nga gusto sa Ginoo, kay si Apostol Pablo mipahayag nga adunay “‘usa ka Ginoo, usa ka pagtuo, usa ka bautismo’ (Mga Taga-Efeso 4:5). Aron mahitabo kini nga panaghiusa, ang Ginoo miestablisar og balaan nga balaod sa mga saksi. Si Pablo mitudlo, ‘Sa bisan unsa nga sumbong pamatud-an sa duha o tulo ka mga saksi’ (2 Mga Taga-Corinto 13:1).

“Ang Biblia usa ka saksi ni Jesukristo; ang Basahon ni Mormon lain nga saksi. Ngano nga ang ikaduhang saksi importante kaayo? Ang mosunod nga paghulagway makatabang: Pila ka tul-id nga linya ang inyong ma-drowing sa usa ka tuldok diha sa papel? Ang tubag walay katapusan. Sa makadiyot, ibutang ta nga ang usa ka tuldok nagrepresentar sa Biblia ug ang gatusan ka tul-id nga linya nga madrowing agi niana nga tuldok nagrepresentar sa lain-laing paghubad sa Biblia ug ang kada hubad nagrepresentar og laing simbahan.

“Unsay mahitabo, kon nianang piraso sa papel adunay ikaduha nga tuldok nga nagrepresnetar sa Basahon ni Mormon? Pila man ka tul-id nga linya ang inyong madrowing tali niining duha ka mga tuldok: ang Biblia ug ang Basahon ni Mormon? Usa lang. Usa lang ka hubad sa mga doktrina ni Kristo ang makuha sa pagpamatuod niining duha ka mga saksi.

“Sa kanunay ang Basahon ni Mormon maoy magpamatuod, moklaro, mohiusa nga saksi sa doktrina nga gitudlo sa Biblia busa adunay ‘usa ka Ginoo, usa ka pagtuo, usa ka bautismo’” (“Ang Basahon ni Mormon—Basahon gikan sa Dios,” Ensign o Liahona, Nob. 2011, 75).

Human mapasalida ang video o mabasa ang kinutlo, ipangutana:

• Unsa man ang bili sa pagbaton og duha ka mga saksi ni Jesukristo nga mga kasulatan?

• Unsa ang inyong makat-unan gikan sa pakigpulong ni Elder Callister nga makatabang kaninyo sa pagtudlo sa uban kon sa unsang paagi nga naghiusa ang Basahon ni Mormon ug ang Biblia?

Pahinumdom: Kon imong gibati nga ang mga estudyante nagkinahanglan nga makakita og mga example kon sa unsang paagi nga ang Basahon ni Mormon ug ang Biblia nagkahiusa aron maklaro ang mga pagtulun-an ni Jesukristo, ikonsiderar ang paggamit sa pipila ka example nga makita diha sa “Ang Basahon ni Mormon: Usa ka Saksi sa Biblia,” Ensign o Liahona, Okt. 2011, 24–27.

Ang Papel sa Basahon ni Mormon sa Pagpundok sa Israel

Sa paghatag og konteksto samtang magtudlo ka sa sunod nga baruganan, mahimo nimong ipabasa og usab sa mga estudyante ang ikaduhang paragraph diha sa ulohang pahina sa Basahon ni Mormon ug pabadlisi o ipa-highlight ang saad nga ang mga magbabasa “mahibalo sa mga pakigsaad sa Ginoo, nga sila dili ipahimulag sa kahangturan.” Ipasabut nga kini nga paragraph adunay kalabutan sa kamatuoran nga ang mga anak sa Dios sa nagkatibulaag nga balay sa Israel kinahanglang pagapundukon. Pahinumdumi ang mga estudyante nga ang Dios mihimo og mga pakigsaad sa karaang panahon ngadto sa Iyang mga anak. Hinoon, ang Ginoo mipatibulaag sa mga sakop sa balay sa Israel sa tibuok kalibutan tungod sa ilang pagkadili matarung ug sa pagsukol.

Pag-ila sa mga doktrina. Ang pagkat-on sa pag-ila ug pagsabut sa mga doktrina ug mga baruganan makatabang sa mga estudyante sa pagpahisama sa mga kasulatan ngadto sa ilang kaugalingong kinabuhi ug makagiya kanila sa paghimo og mga desisyon. Usahay mopasabut ka og mga doktrina ug mga baruganan. Hinoon, kinahanglan nga maningkamot ka nga matabangan ang mga estudyante nga makakat-on sa pag-ila sa mga doktrina ug mga baruganan nga sila ra.

I-assign ang mga estudyante sa pagbasa sa mosunod nga mga tudling sa kasulatan ug sa pagpangita kon sa unsang paagi pagapundukon ang mga anak sa Dios: 1 Nephi 10:14; 3 Nephi 16:4–5; o 3 Nephi 20:13. Dayon ipangutana ang sama sa mosunod aron matabangan sila nga makaila sa doktrina nga gitudlo niining mga tudling sa kasulatan:

• Sumala niining mga tudling, unsa ang kinahanglang mahitabo sa mga indibidwal aron mapundok isip kabahin sa balay sa Israel? (Kinahanglan gayud silang makaila kang Jesukristo.)

• Unsa ang papel sa Basahon ni Mormon niini nga proseso? (Bisan kon ang mga estudyante mahimong mogamit og lain-laing mga pulong, kinahanglan silang makahibalo sa mosunod nga kamatuoran: Ang Basahon ni Mormon nagsilbing himan sa pagtabang nga mapundok ang mga anak sa Dios pinaagi sa pagtabang kanila nga makaila kang Jesukristo.)

Basaha ang mosunod nga pamahayag, diin si Elder Bruce R. McConkie (1915–1985) sa Korum sa Napulog Duha ka mga Apostoles namulong mahitungod sa papel sa Basahon ni Mormon sa pagpundok sa Israel:

“Kon mahitungod sa pagpundok sa Israel ang hisgutan, ang Basahon ni Mormon mao ang labing importante nga basahon nga nasulat sukad. Kini ang basahon nga magpundok sa Israel ug mopadayag, diha sa kayano ug kahingpit, sa doktrina sa pagpundok. … Ang Basahon ni Mormon maoy hinungdan nga ang mga tawo motuo sa ebanghelyo ug mopasakop sa Simbahan, ug, sama sa ato nang nakita, kini ang gahum nga nagpahinabo sa pagpundok sa Israel” (A New Witness for the Articles of Faith [1985], 554).

Sunod, pangutana og sama sa mosunod:

• Sa unsang paagi nga ang mga misyonaryo makaapil sa pagpundok sa balay sa Israel? (Pinaagi sa pagtabang sa uban nga makatuon ug makasabut sa Basahon ni Mormon aron makaduol sila kang Kristo pinaagi sa hugot nga pagtuo, paghinulsol, bunyag, pagkumpirma, ug paglahutay sa katapusan.)

• Nganong importante man nga gamiton sa mga misyonaryo ang Basahon ni Mormon samtang motabang sila sa uban nga moduol ngadto ni Kristo?

Ang Pagdawat og Pagpamatuod sa Basahon ni Mormon usa ka Mahinungdanong Bahin sa Pagkakabig

Ipabasa og kusog sa usa ka estudyante ang mosunod nga istorya gikan sa autobiography ni Apostol Parley P. Pratt (1807–1857), diin iyang gihulagway ang iyang kasinatian sa pagbasa sa Basahon ni Mormon sa unang higayon:

“Naghinam-hinam ko nga miabli niini, ug gibasa ang ulohang pahina niini. Gibasa dayon nako ang pagpamatuod sa pipila ka saksi nga may kalabutan sa paagi nga kini nakit-an ug nahubad. Human niini gisugdan nako kini pagbasa sa han-ay nga paagi. Nagbasa ko sa tibuok adlaw; langay na gani ang mokaon, wala na koy tinguha alang sa pagkaon; langay na gani ang pagkatulog dihang miabut na ang gabii, kay mas ganahan ko nga magbasa kay sa matulog.

“Samtang nagbasa ko, ang espiritu sa Ginoo diha kanako, ug ako nasayud ug nakasabut nga ang basahon tinuod, ingon kayano ug nagpakita nga sama sa pagkasabut ug pagkasayud sa usa ka tawo nga siya anaa” (Autobiography of Parley P. Pratt, ed. Parley P. Pratt Jr. [1874], 38).

• Sa unsang paagi nga ang Espiritu sa Ginoo nakaapekto ni Parley P. Pratt samtang nagbasa siya sa Basahon ni Mormon?

• Mahimo ba kamong mopakigbahin og usa ka higayon nga ang Espiritu mitandog ninyo samtang nagbasa kamo og usa ka pihong kasulatan o tudling sa Basahon ni Mormon?

Dapita ang mga estudyante sa pagbadlis o pag-highlight sa mosunod nga sentence diha sa Isangyaw ang Akong Ebanghelyo, pahina 124: “Ang Basahon ni Mormon, inubanan sa Espiritu, mao ang inyong pinakagamhanan nga kapanguhaan sa pagkakabig.” Aron matabangan ang mga estudyante nga makasabut niining kamatuoran, ipabasa nila ang seksyon nga “Ang Basahon ni Mormon Makapaduol sa mga Tawo ngadto sa Dios” sa pahina 129 sa Isangyaw ang Akong Ebanghelyo. Dayon ipangutana:

• Sumala niini nga seksyon sa Isangyaw ang Akong Ebanghelyo, unsa ang pipila ka piho nga mga butang nga mahitabo kon ang usa ka tawo magsugod sa pagtuon sa Basahon ni Mormon?

• Nganong ang pagtabang sa mga investigator nga makatuon ug makabaton og pagpamatuod sa Basahon ni Mormon usa man sa labing importante nga mga tumong sa usa ka misyonaryo?

Ipasabut ngadto sa klase nga makatabang sila sa mga investigator nga mobati sa makakabig nga gahum sa Basahon ni Mormon pinaagi sa pagtabang sa mga investigator nga makakita og mga tubag sa labing importante nga mga pangutana sa kinabuhi sa sulod sa mga pahina niini. Papuli-puliha ang pipila ka estudyante sa pagbasa og kusog sa mga paragraph ug mga pangutana nga makita diha sa pahina 128 sa Isangyaw ang Akong Ebanghelyo. Hangyoa ang klase sa pagpangita sa kahulugan sa mga pulong nga “mga pangutana sa tawo.” Dayon hisguti ang mosunod:

• Unsa ang kahulugan sa mga pulong nga “mga pangutana sa tawo” nganha kaninyo?

Diha sa pisara, isulat ang mosunod nga kamatuoran:

Ang mga pagtulun-an sa Basahon ni Mormon nagtubag sa mga pangutana sa tawo.

Hisguti ang mosunod uban sa mga estudyante:

• Unsaon man ninyo paggamit ang Basahon ni Mormon sa pagpangita og mga tubag sa mga pangutana sa tawo?

• Unsa nga mga pangutana sa tawo diin inyong nakita ang tubag diha sa Basahon ni Mormon?

Ikonsiderar ang paghatag og mubo nga demonstration sa klase kon unsaon paggamit sa Basahon ni Mormon aron makakita og mga tubag sa mga pangutana sa tawo. Pagpili og usa sa mga pangutana diha sa lista sa pahina 128 sa Isangyaw ang Akong Ebanghelyo. Gamit ang mga tudling sa Basahon ni Mormon nga gilista uban sa pangutana, ipakita kon sa unsang paagi nga ang Basahon ni Mormon makatubag sa pangutana nga imong gipili. Ikonsiderar usab ang pagpakita kon unsaon paggamit ang Ang Giya ngadto sa mga Kasulatan ug ubang mga tabang sa pagtuon sa pagpangita og mga tubag sa mga pangutana. Ipakigbahin ang imong mga gibati ngadto sa klase kon sa unsang paagi nga ang Basahon ni Mormon makatabang usab kanila ug sa ilang mga investigator nga makit-an ang mga tubag sa ilang mga pangutana.

Paghatag og sumbanan [model]. Kon magtabang sa mga estudyante aron makakat-on og mga kahanas, makatabang ang pag-demonstrate o paghatag og sumbanan alang sa mga estudyante, paghatag og panahon para makapraktis, ug dayon ang paghatag og makapadasig nga feedback.

Human makahatag niining sumbanan ngadto sa mga estudyante, dapita sila sa pagsunod sa samang proseso. Hangyoa sila sa pagpili og usa sa mga pangutana gikan sa lista ug dayon iparibyu ang nag-uban nga tudling diha sa Basahon ni Mormon aron makakita sa mga doktrina ug mga baruganan nga makatubag sa pangutana. Human makahatag nila og igong panahon sa pag-andam, dapita ang mga estudyante sa pagpakigbahin og daklit ngadto sa laing estudyante kon unsay ilang nakit-an. Kon mahuman na sila, hisguti ang mosunod:

• Sa unsang paagi nga ang mga misyonaryo makagamit sa Basahon ni Mormon aron sa pagtabang sa mga investigator nga makakita sa mga tubag sa mga pangutana sa tawo?

Aron sa pagpakita og dugang kon sa unsang paagi nga ang Basahon ni Mormon makatubag sa mga pangutana sa tawo, ipasalida ang video nga “A Book of Mormon Story.” Ipatan-aw sa mga estudyante kon sa unsang paagi nga ang Basahon ni Mormon nakatubag sa pipila ka mga pangutana ni Brother Cook sa wala pa siya mipasakop sa Simbahan.

Human sa video mahimo kang mangutana:

• Unsa ang pipila ka importante nga mga pangutana ni Brother Cook nga natubag sa dihang nagbasa siya sa Basahon ni Mormon?

• Sa unsang paagi nga ang pagpakita niining mga tubag nakaapekto kaniya?

Dapita ang mga estudyante sa paghunahuna og usa ka importanting pangutana nga may kalabutan sa ebanghelyo diin sila o usa ka higala nagtinguha nga matubag. Ipamatuod nga ang Ginoo motabang sa pagtubag sa ilang pangutana pinaagi sa ilang pagtuon sa Basahon ni Mormon.

Ang Basahon ni Mormon Mipanghimatuod sa Kamatuoran sa Pagpahiuli

Dapita ang mga estudyante nga magpuli-puli sa pagbasa og kusog sa seksyon diha sa Isangyaw ang Akong Ebanghelyo nga giulohan og “Ang Basahon ni Mormon Mao ang Tukurang Bato sa Atong Relihiyon,” nga magsugod sa pahina 124 ug magpadayon ngadto sa table sa pahina 125. Samtang magbasa sila, hangyoa sila sa pagpamalandong sa pamahayag ni Joseph Smith kalabut sa kaimportante sa Basahon ni Mormon. Dayon ipangutana:

• Sa unsang mga paagi nga ang Basahon ni Mormon mao ang “pundasyon sa pagpamatuod”?

• Sa inyong hunahuna nganong gibabagan man sa kaaway ang Basahon ni Mormon ug nagtinguha nga ang mga tawo dili makabasa niini? (Tungod kay kini ang tukurang bato sa atong relihiyon.)

Ipasabut nga dunay daghang tawo sa kalibutan nga naglisud sa pagtuo sa istorya ni Joseph Smith ug sa gigikanan sa Basahon ni Mormon. Ang mga misyonaryo kinahanglang andam sa pagtubag sa mga pagduha-duha sa mga investigator kalabut sa balaanong gigikanan sa Basahon ni Mormon.

Pahinumdom: Bisan kon importante nga mahibaloan sa mga estudyante nga mahimong mag-atubang sila og mga pagsupak gikan sa pipila ka tawo nga kritiko sa Basahon ni Mormon, dili makatabang sa klase nga detalyadong hisgutan ang mga argumento nga gigamit sa mga kritiko sa ilang pagsulay og paglantugi kang Joseph Smith ug sa Basahon ni Mormon. Klaruha ngadto sa mga estudyante nga ang buluhaton sa misyonaryo dili ang pagprubar sa katinuod sa istorya ni Joseph Smith o sa Basahon ni Mormon. Hinoon, ang mga misyonaryo kinahanglang motudlo ug mopamatuod sa Basahon ni Mormon ug motabang sa mga investigator nga makabasa ug mahibalo sa ilang kaugalingon nga ang Basahon ni Mormon tinuod pinaagi sa personal nga pagpadayag gikan sa Espiritu sa Ginoo. Ikonsiderar ang pagrekomendar nga basahon sa mga estudyante didto sa ilang balay ang pakigpulong ni Elder Jeffrey R. Holland nga “Kasiguroan alang sa Kalag” (Ensign o Liahona, Nob. 2009, 88–90).

Samtang naghunahuna ka sa mga panginahanglan sa imong mga estudyante ug sa mga pag-aghat sa Espiritu, mahimo kang mogahin og pipila ka minutos ug ipakita sa klase kon unsaon sa pagpangita og impormasyon nga tukma sa doktrina gamit ang mga kapanguhaan sama sa seksyon sa Gospel Topics sa LDS.org o mga artikulo sa magasin sa Simbahan.

Isip usa ka klase, magbasa og dungan sa seksyon nga giulohan og “Gamita ang Basahon ni Mormon sa Pagtubag sa mga Pagsupak” nga makita diha sa Isangyaw ang Akong Ebanghelyo, sa pahina 130. Hangyoa ang mga estudyante sa pagpangita sa tambag nga makatabang kanila sa paglig-on sa pagtuo sa mga investigator kinsa dunay mga kabalaka o pagduha-duha. Ipangutana ang sama sa mosunod aron matabangan ang mga estudyante nga mahibalo og usa ka baruganan nga makita diha sa ilang pagbasa:

• Sumala ni Presidente Benson, nganong importante man alang sa usa ka tawo nga dunay mga kabalaka mahitungod sa atong mga gituohan nga masayud kon ang Basahon ni Mormon tinuod ba?

• Sa unsang mga paagi nga ang Basahon ni Mormon makatabang sa usa ka tawo nga masulbad ang espirituhanong mga kabalaka ug mga pagduha-duha?

Sa pag-summarize sa mga baruganan nga nahibaloan sa mga estudyante, mahimo nimong isulat sa pisara kini nga baruganan: Ang pagdawat og pagpamatuod nga ang Basahon ni Mormon tinuod makatabang sa mga investigator nga mabuntog ang espirituhanong mga kabalaka ug mga pagduha-duha.

I-display ang mosunod nga pamahayag gikan ni Presidente Gordon B. Hinckley (1910–2008), ug ipabasa og kusog sa matag usa sa pipila ka estudyante ang usa o duha ka paragraph:

“Matag higayon nga awhagon nato ang uban nga mobasa sa Basahon ni Mormon, nakahatag kita nila og kaayohan. Kon ila kining basahon sa mainampuong paagi ug uban sa kinasingkasing nga tinguha nga masayud sa kamatuoran, masayud sila pinaagi sa gahum sa Espiritu Santo nga ang basahon tinuod.

“Sa higayon nga masayud sila nga ang Basahon ni Mormon tinuod, nan masayud sila sa kamatuoran sa daghan pang butang. Kay kon ang Basahon ni Mormon tinuod, nan buhi ang Dios. …

“Kon ang Basahon ni Mormon tinuod, nan si Jesus mao gayud ang atong Manunubos, ang Manluluwas sa kalibutan. Ang dakong katuyoan sa pagpreserbar ug pagpagawas niini, sumala sa kaugalingon niining pamahayag, mao ‘[ang] pagpamatuod ngadto sa Judeo ug sa Hentil nga si Jesus mao ang Kristo, ang Dios sa Kahangturan, nagpaila sa iyang kaugalingon ngadto sa tanan nga mga nasud.’ (Ulohang pahina sa Basahon ni Mormon.) …

“Kon ang Basahon ni Mormon tinuod, si Joseph Smith usa ka Propeta sa Dios, kay siya mao ang instrumento diha sa kamot sa Ginoo aron sa pagpagawas niining pagpamatuod mahitungod sa pagkabalaan sa atong Ginoo. …

“Kon tinuod ang Basahon ni Mormon, nan ang Simbahan tinuod, tungod sa samang awtoridad diin napagawas kining sagradong rekord ug napakita kanato karon. Usa kini ka pagpahiuli sa Simbahan nga gitakda sa Manluluwas didto sa Palestina. Usa kini ka pagpahiuli sa Simbahan nga gitakda sa Manluluwas sa dihang mibisita Siya niini nga kontinente nga makita dinhi niining sagradong rekord” (“The Power of the Book of Mormon,” Ensign, Hunyo 1988, 6).

Ikonsiderar ang pagpangutana sa mosunod:

• Nganong importante man kaayo alang sa mga investigator, mga misyonaryo, ug mga miyembro nga makabaton og pagpamatuod sa Basahon ni Mormon?

• Sa unsang paagi nga ang katinuod sa Basahon ni Mormon mopanghimatuod nga si Joseph Smith usa ka propeta sa Dios? (tan-awa sa Mateo 7:13–15).

• Sa unsang paagi nga ang inyong pagpamatuod sa Basahon ni Mormon nakatabang sa pagpanghimatuod diha sa inyong kasingkasing sa mahangturong kamahinungdanon sa Pagpahiuli?

Hunahunaa ang pagpakigbahin sa imong kaugalingong pagpamatuod nga ang Basahon ni Mormon usa ka ebidensya sa katinuod sa Pagpahiuli. Tapusa ang imong leksyon pinaagi sa pagdapit og pipila ka estudyante sa pagpakigbahin sa ilang mga pagpamatuod kalabut sa Basahon ni Mormon ug sa pagpasabut kon nganong naghinam-hinam sila nga motabang sa uban nga makabasa sa Basahon ni Mormon ug mag-ampo kalabut niini.

Pahinumdom: Hibaloi nga sa leksyon 8 ang mga estudyante dunay oportunidad sa pagpraktis sa pagdapit sa usa ka tawo nga mobasa ug mag-ampo kalabut sa katinuod sa Basahon ni Mormon.

Mga Pagdapit aron Molihok

Pahinumdumi ang umaabut nga mga misyonaryo nga ang labing maayo nga paagi sa pag-andam alang sa usa ka full-time nga misyon mao ang pagsugod sa paghimo sa misyonaryo nga buhat karon. Dapita ang mga sakop sa klase sa paghimo og personal nga mga tumong sa pagbuhat sa mosunod:

• Mobasa sa tibuok Basahon ni Mormon ug mag-ampo aron masayud sa katinuod niini, bisan kon nahimo na nila kini kaniadto.

• Moestablisar og kinaiya sa pagbasa matag adlaw gikan sa Basahon ni Mormon.

• Pahibaloon ang usa ka tawo mahitungod sa Basahon ni Mormon sa moabut nga semana (sa personal man o pinaagi sa social media) ug modapit kanila sa pagbasa ug sa pag-ampo mahitungod niini.