Pagtudlo sa Mensahe sa Pagpahiuli (Part 1)

Pasiuna

Ang ebanghelyo ni Jesukristo gitudlo sa mga propeta sa tanang dispensasyon, nagtugot sa mga anak sa Dios nga makasabut sa mahangturong mga kamatuoran ug makabaton og kinabuhing dayon. Human sa kamatayon ni Jesukristo, ang kamatuoran sa ebanghelyo ug ang awtoridad sa priesthood nawala gikan sa yuta, nga miresulta sa Dakong Apostasiya. Ang Pagpahiuli sa ulahing mga adlaw mibuntog sa mga epekto sa Apostasiya ug miestablisar pag-usab sa Simbahan ni Kristo dinhi sa yuta. Ang umaabut nga mga misyonaryo kinahanglang klaro nga makasabut sa mga konsepto sa Apostasiya ug sa Pagpahiuli ug kinahanglang andam nga mopasabut niini sa yanong paagi ug mopamatuod niini uban sa gahum.

Advance nga Pagpangandam

Tun-i ang Isangyaw ang Akong Ebanghelyo, mga pahina 36–41.
Pag-andam aron ipasalida ang video nga “The Great Apostasy” (16:33), nga anaa sa LDS.org.
Pag-andam og kopya sa “Ang Pamilya: Usa ka Pamahayag ngadto sa Kalibutan” alang sa matag estudyante.

Mga Sugyot alang sa Pagtudlo

Ang Dios Mao Ang Atong Mahigugmaong Langitnong Amahan

Sugdi ang klase pinaagi sa pagpakonsiderar sa mga estudyante sa mosunod nga case study:

Karong gabii sa dili pa matulog, makadawat ka og mensahe gikan sa usa ka higala nga nawad-an og kadasig ug naghunahuna kon tinuod ba nga dunay Dios ug kon nagpakabana ba Siya kanato. Ang imong higala mangutana, “Motuo ka ba nga tinuod nga dunay Dios? Sa imong gituohan unsa man gyud ang Dios?”

Dapita ang pipila ka estudyante sa pagpakigbahin kon unsaon nila pagtubag ang ilang higala. Dayon, sultihi ang imong klase nga ang leksyon karon mag-focus sa pipila ka mga doktrina ug mga baruganan nga makita diha sa unang leksyon sa misyonaryo, lakip na ang kinaiyahan sa atong Langitnong Amahan.

Ipabasa og kusog sa usa ka estudyante ang seksyon nga giulohan og “Ang Dios Mao Ang Atong Mahigugmaong Langitnong Amahan” diha sa mga pahina 36–37 sa Isangyaw ang Akong Ebanghelyo. Dapita ang mga estudyante sa pagbadlis o pag-highlight sa mga pulong nga ilang magamit sa pagtabang sa uban nga mas makasabut sa kinaiyahan sa Dios isip atong mahigugmaong Langitnong Amahan.

Hatagi ang mga estudyante og pipila ka minutos sa pagpangita sa tulo o upat ka mga tudling sa kasulatan nga gilista diha sa Pagtuon sa Kasulatan nga box sa pahina 37 sa Isangyaw ang Akong Ebanghelyo. Ipahunahuna nila kon sa unsang paagi nga ang mga tudling makatabang sa pagtubag sa mga pangutana gikan sa usa ka tawo nga dunay mga pangutana kalabut sa Dios, sama sa case study sa pagsugod sa leksyon. Mahimo nimong awhagon ang mga estudyante sa pag-highlight sa usa o dugang pa nga mga tudling sa ilang mga kasulatan o sa pagsulat niini diha sa margin sa ilang kopya sa Isangyaw ang Akong Ebanghelyo. Dayon ipangutana:

Unsa kaha ang usa ka mubo nga pamahayag sa pag-summarize sa labing mahinungdanong mga doktrina nga inyong nabasahan diha sa Isangyaw ang Akong Ebanghelyo ug sa mga tudling sa kasulatan? (Ang mga tubag mahimong maglakip sa doktrina nga ang Dios mao ang atong mahigugmaong Langitnong Amahan ug nagtinguha Siya nga mobalik kitang tanan sa pagpuyo uban Kaniya.)
Nganong importante man alang sa mga indibidwal nga makasabut og una niini nga baruganan sa dili pa makakat-on mahitungod sa ubang mga doktrina?

Ang Ebanghelyo Mipanalangin sa Akong Pamilya

Ipabasa og hilum sa mga estudyante ang seksyon nga giulohan og “Ang Ebanghelyo Mopanalangin sa mga pamilya” diha sa pahina 37 sa Isangyaw ang Akong Ebanghelyo ug paghimo og pamahayag sa pag-summarize sa papel [role] sa panimalay ug sa pamilya diha sa plano sa Dios bahin sa kalipay. Human sila makagahin og oras sa pagbasa, dapita ang mga estudyante sa pagpakigbahin sa ilang mga pamahayag sa summary. (Ang mga pamahayag mahimong maglakip sa doktrina nga ang mga pamilya gi-orden sa Dios ug kabahin sa plano sa Dios nga magdala og kalipay sa Iyang mga anak. Isulat sa pisara kining gi-bold nga baruganan.)

Sa imong pag-evaluate sa mga panginahanglan sa imong mga estudyante ug sa nahabilin nga oras, ikonsiderar ang pagpresentar sa mosunod nga kalihokan: I-focus ang pagtagad sa imong mga estudyante diha sa katapusang linya nga ilang nabasa sa Isangyaw ang Akong Ebanghelyo. “Pinaagi sa mga propeta sa tanang panahon, lakip na ang atoa, ang Dios mipadayag sa Iyang plano sa kalipay para sa tagsa-tagsa ug sa mga pamilya.”

Aron matabangan ang mga estudyante nga mas makasabut nganong importante kaayo kining kamatuoran sa kalibutan karon, i-display ang kopya sa “Ang Pamilya: Usa ka Pamahayag ngadto sa Kalibutan” o iapud-apod ang mga kopya ngadto sa klase. Dayon dapita ang mga estudyante sa paggahin og pipila ka minutos sa pagbasa sa pamahayag ug motino sa mga pulong o mga baruganan nga makatabang kanato nga mas makasabut sa papel sa kaminyoon ug sa pamilya diha sa plano sa Langitong Amahan. Iparekord sa pisara sa usa ka estudyante kini nga mga item.

I-display ang mosunod nga kinutlo gikan ni Presidente Boyd K. Packer sa Korum sa Napulog Duha ka mga Apostoles:

“Ang kinadak-ang katuyoan sa kaaway, kinsa dunay ‘dakong kapungot, sanglit nasayud man siya nga hamubo na lamang ang iyang panahon’ (Pinadayag 12:12), mao ang pagbalda, pagdisturbo, ug pagguba sa panimalay ug sa pamilya” (“The Father and the Family,” Ensign, Mayo 1994, 19).

Pangutan-a ang mga estudyante:

Nganong ang “kinadak-ang katuyoan” sa kaaway mao man ang pagguba sa panimalay ug sa pamilya? (Ang panimalay mao ang “labing maayong dapit sa pagtudlo, pagkat-on, ug paggamit sa mga baruganan sa ebanghelyo ni Jesukristo.”)
Unsa ang pipila ka kalibutanong uso nga misupak sa plano sa Langitnong Amahan alang sa kaminyoon, panimalay, ug pamilya? (Pahinumdom: Ayaw paggahin og taas nga panahon sa paghisgot niining mga uso. Igo na ang pag-ila lamang niini ug dayon gamita ang instruksyon nga mosunod sa pagpabilin nga maka-focus diha sa plano sa Langitnong Amahan alang sa mga pamilya.)

Dapita ang mga estudyante sa pagpakigbahin kon unsaon nila paggamit ang “Ang Pamilya: Usa ka Pamahayag ngadto sa Kalibutan” sa pagtudlo sa mga sitwasyon aron sa paghatag og kalainan tali sa plano sa Langitnong Amahan ug ang kalibutanong mga uso nga misupak sa Iyang plano alang sa kaminyoon, panimalay, ug pamilya.

Pasabta ang mga estudyante nga ang ubang mga tawo nga ilang mahimamat dunay mga panglantaw nga lahi o gani misupak sa mga pagtulun-an sa Simbahan kalabut sa kaminyoon, panimalay, ug pamilya. Ipakigbahin ang imong pagpamatuod nga kon ang mga misyonaryo mogamit sa mga kasulatan ug sa mga pulong sa mga propeta sa pagtudlo, magiyahan sila pinaagi sa Espiritu Santo sa pagtabang niadtong ilang gitudloan nga mas makasabut sa papel [role] sa kaminyoon, panimalay, ug pamilya diha sa plano sa Langitnong Amahan alang sa Iyang mga anak.

Mga Propeta ug mga Dispensasyon

Pasabta ang mga estudyante nga usa ka importanting paagi nga gipakita sa Dios ang Iyang gugma alang kanato mao ang pagtawag og mga propeta. I-display ang mosunod nga kinutlo ni Elder M. Russell Ballard sa Korum sa Napulog Duha ka mga Apostoles, ug ipabasa kini og kusog sa usa ka estudyante. Ipapangita sa mga estudyante kon unsa nga mga panalangin ang moabut niadtong mosunod sa propeta:

“Maayo nga atong ipangutana, ‘Duna bay tingog nga kanunayng mohatag kanato og klaro nga mga direksyon sa pagpangita sa atong agianan sa gubot nga kalibutan karon?’ Ang tubag kay oo. Kana nga tingog mao ang tingog sa buhing mga propeta ug mga apostoles. …

“Dili kini basta-basta lamang nga butang, akong mga kaigsoonan, ang pagkaadunay propeta sa Dios sa atong taliwala. Katalagsaon ug katingalahan sa mga panalangin nga moabut sa atong mga kinabuhi samtang maminaw kita sa mga pulong sa Ginoo nga gihatag ngari kanato pinaagi kaniya. … Kon kita maminaw sa tambag sa Ginoo nga gipahayag pinaagi sa mga pulong sa Presidente sa Simbahan, ang atong pagsanong kinahanglan nga positibo ug dili langayon. Ang kasaysayan nagpakita nga adunay kasiguroan, kalinaw, kauswagan ug kalipay sa pagsanong sa mapanagnaong mga tambag sama sa gibuhat ni Nephi sa karaan: ‘Ako moadto ug mobuhat sa mga butang nga ang Ginoo nagsugo’ (1 Nephi 3:7). …

“Karon ako mohatag kaninyo og saad. Yano ra kini, apan tinuod kini. Kon maminaw kamo sa buhing propeta ug mga apostoles ug mopatalinghug sa among tambag, dili kamo mahisalaag” (“His Word Ye Shall Receive,” Ensign, Mayo 2001, 65–66).

Human mabasa ang kinutlo, ipangutana:

Unsa nga mga panalangin ang moabut niadtong mosunod sa tambag sa mga propeta sa Ginoo?

Hatagi og panahon ang mga estudyante sa pagbasa og hilum sa Doktrina ug mga Pakigsaad 1:37–38. Dayon ipangutana:

Unsay gitudlo niini nga tudling mahitungod sa mga propeta ug sa ilang tambag?
Makahunahuna ba kamo og piho nga panahon nga ang pagsunod sa tambag sa propeta sa Ginoo nakapanalangin sa inyong kinabuhi?

Ipabasa og kusog sa usa ka estudyante ang unang paragraph ubos sa ulohan nga “Ang Langitnong Amahan Mopadayag sa Iyang Ebanghelyo sa Matag Dispensasyon [Kapaigoan]” sa pahina 38 sa Isangyaw ang Akong Ebanghelyo. Tabangi ang mga estudyante nga mahibalo sa mga doktrina nga gitudlo niini nga paragraph pinaagi sa pagpangutana:

Unsa ang pipila ka doktrina nga atong makat-unan kalabut sa mga propeta niini nga paragraph? (Samtang dunay pipila ka baruganan nga mahimong ipakigbahin sa mga estudyante, tabangi ang mga estudyante nga mahibalo nga ang mga propeta nakakat-on sa ebanghelyo ni Jesukristo pinaagi sa pagpadayag ug dunay responsibilidad sa pagtudlo sa uban ug sa pagpamatuod mahitungod ni Jesukristo.)

Hunahunaa ang paggamit sa training model sa MTC samtang nagtabang ka sa mga estudyante nga magtudlo sa kaimportante sa mga propeta. Pasabta ang mga estudyante nga kinahanglan silang mobasa sa depinisyon sa propeta nga makita diha sa pahina 52 sa Isangyaw ang Akong Ebanghelyo ug dayon mangandam sa pag-role-play sa pagtudlo sa usa ka investigator mahitungod sa mga propeta. Dayon i-demonstrate ang pag-role-play pinaagi sa pagtudlo sa usa ka sakop sa klase mahitungod sa mga propeta. Sunod, papangitaa ang mga estudyante og partner ug papraktisa sa pag-role-play, nga maghunahuna nga ang estudyante nga gitudloan usa ka dili miyembro nga nakadungog nga ang Simbahan gipangulohan og usa ka propeta. Ang mga estudyante nga nag-acting nga mga magtutudlo kinahanglang mopasabut og daklit kon unsa ang usa ka propeta ug mopamatuod mahitungod sa moderno nga mga propeta. Dayon ang mga estudyante nga gitudloan kinahanglang mo-evaluate sa ilang mga partner pinaagi sa pagpahayag kon unsay ilang nakita nga mas makahuluganon ug makapadasig kalabut sa presentasyon. Dayon papraktisa og usab ang mga estudyante, mosubli sa pag-role play nga ang mga papel [role] sa mga estudyante giilis aron mohatag sa ubang mga estudyante og kahigayunan nga makatudlo ug makadawat og feedback.

Papuli-puliha sa pagbasa og kusog ang pipila ka estudyante sa katapusang upat ka paragraph diha sa pahina 38–39 sa Isangyaw ang Akong Ebanghelyo. Hangyoa ang klase sa pagsunod, nga mangita sa kalabutan tali sa mga propeta, apostasiya, ug mga dispensasyon. Kon gikinahanglan, dapita ang mga estudyante sa pagtuon usab sa “Kapaigoan [Dispensasyon]” diha sa Ang Giya ngadto sa mga Kasulatan. Tabangi ang mga estudyante sa paghisgot sa mga kamatuoran nga makita niini nga mga paragraph pinaagi sa pagpangutana sama sa mosunod:

Nganong makatabang man sa mga investigator nga makasabut nga ang tanang miaging mga dispensasyon natapos sa apostasiya?
Unsa may gibuhat sa Dios sa tibuok kasaysayan sa pagtapos sa mga panahon sa apostasiya? Sa unsang paagi nga ang pagsabut niini nga sumbanan makaandam sa mga investigator nga makakat-on kalabut sa Pagpahiuli sa ebanghelyo pinaagi ni Propeta Joseph Smith?

Kon itugot sa panahon, mahimo nimong hatagan ang mga estudyante og pipila ka minutos aron makapraktis sa pagpasabut sa usag usa sa materyal diha sa pahina 38 sa Isangyaw ang Akong Ebanghelyo. Awhaga sila sa paglakip diha sa ilang pagpasabut sa mga pulong nga apostasiya, dispensasyon, ug propeta.

Ang Yutan-ong Pagpangalagad sa Manluluwas ug ang Pag-ula

Ipatan-aw sa mga estudyante ang hulagway diha sa pahina 40 sa Isangyaw ang Akong Ebanghelyo, nga nagpakita sa pag-orden ni Jesukristo sa Napulog Duha ka mga Apostoles. Pangutan-a ang mga estudyante:

Unsa ang ubang mga butang nga gibuhat ni Jesukristo aron sa pag-establisar sa Iyang Simbahan dinhi sa yuta sa Iyang panahon? (Mahimo nimong dapiton ang mga estudyante sa pagbasa og hilum sa seksyon nga giulohan og “Ang Yutan-ong Pagpangalagad sa Manluluwas ug ang Pag-ula sa pahina 40 sa Isangyaw ang Akong Ebanghelyo alang sa reference.)
Sa unsang paagi nga ang pangalagad sa Manluluwas ug ang pagsalikway sa katapusan nagsunod og sumbanan nga naestablisar sa miaging mga dispensasyon? (Sa wala pa ang pagkatawo ni Jesukristo, ang mga tawo anaa sa kahimtang sa apostasiya. Gipahiuli ni Jesukristo ang ebanghelyo nganhi sa yuta, sama sa gibuhat nila ni Noe, Abraham, ug Moises sa nag-unang mga dispensasyon. Human sa kamatayon ni Jesukristo ug sa mga Apostoles, nasugamak na usab ang mga anak sa Dios sa kahimtang sa apostasiya hangtud nga mitawag na usab ang Dios og propeta aron mapahiuli ang ebanghelyo ni Jesukristo.)

Ang Dakong Apostasiya

Aron matabangan ang mga estudyante nga mas makasabut sa panginahanglan alang sa pagpahiuli sa ebanghelyo ni Jesukristo, isulat sa pisara ang mosunod nga pangutana:

Unsa ang mga hinungdan nga misangput sa Dakong Apostasiya, ug unsa man ang mga resulta niini?

Ipapangita sa mga estudyante ang mga tubag niining mga pangutana diha sa unang duha ka paragraph sa seksyon nga giulohan og “Ang Dakong Apostasiya” sa mga pahina 40–41 sa Isangyaw ang Akong Ebanghelyo. Human sa igong panahon, ipatubag sa mga estudyante ang mga pangutana diha sa pisara. Siguroa nga nasabtan sa mga estudyante nga human sa kamatayon ni Jesukristo ug sa Iyang mga Apostoles, ang walay pagtugot nga mga kausaban midaut sa mga doktrina ug mga naandang gibuhat sa Simbahan, nga sa katapusan miresulta sa pagkuha sa mga yawe sa priesthood ug awtoridad gikan sa yuta.

Dapita ang mga estudyante nga hilum nga magtuon sa pipila ka tudling sa kasulatan nga gilista diha sa Pagtuon sa Kasulatan nga box nga nahimutang sa ubos sa pahina 41 sa Isangyaw ang Akong Ebanghelyo. Ipapangita sa mga estudyante kon unsay gipanagna sa mga manunulat sa kasulatan nga mahitabo sa Simbahan ni Jesukristo sa katapusan. Human makabaton og igong panahon nga makatuon ang mga estudyante, hangyoa sila sa pagpakigbahin ngadto sa laing sakop sa klase kon unsay ilang nakit-an. Mahimo nimong ilista sa pisara ang ubang mga tubag ug dayon ikonsiderar ang pagsulat niining summary statement: Ang mga propeta sa karaan nanagna nga dunay kinatibuk-ang pagpahilayo gikan sa kamatuoran.

Ipares-pares ang mga estudyante ug paandama sila sa pagtudlo og upat ngadto sa lima ka minutos nga leksyon mahitungod sa Apostasiya. Ipasabut nga ang ilang pagtudlo kinahanglang simple, klaro, ug naka-focus sa modawat sa mensahe. Ipagamit sa mga estudyante ang materyal diha sa mga pahina 40–41 sa Isangyaw ang Akong Ebanghelyo (o mahimo nilang gamiton ang pamphlet sa misyonaryo nga giulohan og Ang Pagpahiuli sa Ebanghelyo ni Jesukristo). Awhaga ang mga parisan sa pagpakigbahin og usa o duha ka kasulatan nga may kalabutan sa Apostasiya ug ipasabut kon unsay kahulugan niini.

Human makabaton og igong panahon nga makaandam ang mga estudyante, patudloi sa matag pares ang laing pares. Sa pagtapos sa mga estudyante sa ilang kasinatian sa pagtudlo, pahisguti sa grupo ang mosunod: Unsay maayong nahitabo sa inyong leksyon? Unsa kaha ang pwede ninyong buhaton nga mas maayo pa? Unsa man ang pinakaepektibo sa pagtabang sa uban nga makasabut kon unsay nahitabo human sa kamatayon sa mga Apostoles?

Dayon, papuli-puliha og papel [role] ug tuguti ang parisan nga gitudloan nga maoy motudlo sa laing parisan. Siguroa nga duna silay panahon sa paghatag ug pagdawat og feedback.

Human makabaton og oportunidad ang tanang estudyante nga makatudlo, dapita ang mga sakop sa klase sa pagpakigbahin sa ilang mga hunahuna gikan sa ilang mga kasinatian ngadto sa tibuok klase.

Aron mapakita ang epekto sa Dakong Apostasiya sa kalibutan ug sa pag-andam sa mga estudyante alang sa sunod nga leksyon mahitungod sa Pagpahiuli sa ebanghelyo ni Jesukristo, ipasalida ang video nga “The Great Apostasy” (16:33). Samtang nagtan-aw sila, awhaga ang mga estudyante sa pagkonsiderar kon sa unsang paagi nga ang gipahiuli nga ebanghelyo ni Jesukristo nakabuntog sa mga sangputanan sa Dakong Apostasiya.

Human matan-aw ang video, ipangutana:

Sa unsang paagi nga ang Pagpahiuli sa ebanghelyo ni Jesukristo nakabuntog sa mga sangputanan sa Dakong Apostasiya?
Samtang nagtan-aw mo sa istorya mahitungod sa pagkakabig ni Wilford Woodruff, unsa ang inyong nahunahunaan kalabut sa oportunidad sa pagpakigbahin sa mensahe sa Pagpahiuli sa ebanghelyo ni Jesukristo ngadto sa uban?

Tapusa pinaagi sa pagpangutana sa mga estudyante kon aduna ba kanila ang gustong mopakigbahin sa ilang pagpamatuod ngadto sa klase mahitungod sa Pagpahiuli sa ebanghelyo ni Jesukristo.

Mga Pagdapit aron Molihok

Dapita ang mga estudyante sa pagribyu sa mga doktrina nga nalangkob niini nga leksyon pinaagi sa pagkompleto sa usa o dugang pa sa mosunod nga gisugyot nga mga kalihokan:

Gamita ang entry sa Ang Giya ngadto sa mga Kasulatan nga “Hingpit nga Pagbiya,” pagtuon pa og dugang kalabut sa Dakong Apostasiya. Gamita ang inyong study journal aron makasulat og notes diha sa mga tudling sa kasulatan nga mahimo ninyong gamiton sa pagtudlo mahitungod sa Apostasiya.
Tun-i ug pamalandungi ang artikulo sa Gospel Topics nga “Are Mormons Christian?” nga makita diha sa lds.org/topics.
Agig pagpangandam alang sa sunod nga klase, sugdi sa pagmemorya ang paghulagway ni Joseph Smith mahitungod sa Unang Panan-awon, sigun sa makita diha sa pahina 43 sa Isangyaw ang Akong Ebanghelyo (tan-awa usab sa Joseph Smith—Kasaysayan 1:16–19).