10

Pagtudlo sa Plano sa Kaluwasan (Part 1)

Pasiuna

Ang plano sa kaluwasan mao ang plano sa Langitnong Amahan alang sa kalipay sa Iyang mga anak. Nakasentro kini sa Pag-ula ni Jesukristo ug nagtudlo kon ngano nga gikinahanglan ang Pag-ula. Ang plano sa Langitnong Amahan mitubag usab sa mga pangutana nga “Diin man ko gikan?,” “Unsa man ang akong katuyoan sa kinabuhi?,” ug “Asa man ko padulong human sa akong kamatayon?” Ang umaabut nga mga misyonaryo kinahanglang dunay klaro nga panabut mahitungod sa doktrina sa plano sa kaluwasan ug andam nga mopasabut niini sa yanong paagi ug mopamatuod niini uban sa gahum.

Advance nga Pagpangandam

• Tun-i ang 2 Nephi 2:22–25; Alma 12:32–34; Moises 1:39.

• Tun-i ang Isangyaw ang Akong Ebanghelyo, mga pahina 56–59.

• Pag-andam aron ipasalida ang video nga “God Is Our Father” (3:05), nga anaa sa LDS.org.

• Pag-andam aron ipasalida ang video nga “The Plan of Salvation” (4:30), nga anaa sa LDS.org.

Mga Sugyot alang sa Pagtudlo

Kinabuhi nga sa Wala pa Dinhi sa Yuta: Ang Katuyoan ug Plano sa Dios para Kanato

Ikonsiderar ang pagpakanta sa klase sa himno nga “Ako Anak sa Dios” isip kabahin sa pangbukas nga debosyonal. Sa pagsugod sa leksyon, iparibyu og hilum sa mga estudyante ang lyrics sa unang bersikulo sa “Ako anak sa Dios,” ug hangyoa sila sa pagpangita og bisan unsa nga mga doktrina o mga baruganan diha sa lyrics.

Ako anak sa Dios,

Gipadala dinhi,

Panimalay, ginikanan

Ako gihatagan.

Agaka ko, tudloi ko,

Unsay buhaton.

Nga makabalik ko sa

Amahang Langitnon.

(“Ako Anak sa Dios,” Songbook sa mga Bata, nu. 2)

Pahinumdom: Isip laing opsyon, mahimo nimong ikonsiderar ang pagsugod sa klase pinaagi sa pagpasalida sa video nga “God Is Our Father” (3:15). Human makagahin og pipila ka gutlo sa paghisgot sa video, ipakanta sa klase ang “Ako Anak sa Dios.”

Human sa pipila ka gutlo, dapita ang mga estudyante sa pagpasabut sa bisan unsa nga importanting mga doktrina o mga baruganan nga ilang makita diha sa himno. Kon gikinahanglan, mahimo nimong ikonsiderar ang pagpangutana sa mosunod:

• Unsa may gipakita niining lyrics mahitungod sa atong kinabuhi sa wala pa kita moanhi sa yuta?

• Unsa may gipakita niining lyrics mahitungod sa atong katuyoan sa kinabuhi dinhi sa yuta?

Sultihi ang mga estudyante nga isip mga misyonaryo, makabaton sila og oportunidad sa pagtudlo mahitungod sa katuyoan sa kinabuhi. Ipabasa og kusog sa usa o daghan pa nga mga estudyante ang unang duha ka paragraph sa seksyon nga giulohan og “Kinabuhi nga sa Wala pa Dinhi sa Yuta: Ang Katuyoan ug Plano sa Dios para Kanato” diha sa pahina 56–57 sa Isangyaw ang Akong Ebanghelyo.

Mahimo usab nimong ipakigbahin ang mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:

“Walay mas tulukibon nga kamatuoran ang gipadangat ngari kanato diha sa pagpahiuli kay sa kahibalo mahitungod sa atong kinabuhi sa wala pa dinhi sa yuta. Walay laing simbahan nga nasayud o nagtudlo niini nga kamatuoran. Ang doktrina gihatag lamang pinaagi sa outline nga porma, pero ang may kalabutan nga mga kamatuoran kanunayng gibalik-balik diha sa mga pindayag aron sa pagpasalig kanato sa piho nga sukaranang mga kamatuoran” (Our Father’s Plan [1984], 14).

Ipangutana:

• Sa unsang paagi nga ang pagkasayud mahitungod sa atong kinabuhi sa wala pa dinhi sa yuta ug nga kita nabuhi isip espiritu nga mga anak sa atong Amahan sa Langit makahatag og mas dakong kahulugan sa atong kinabuhi? (Samtang motubag ang mga estudyante, mahimo nimong hatagan og gibug-aton kini nga baruganan: Kon atong masabtan nga kita mga anak sa Langitnong Amahan, makakita kita og mas dakong kahulugan sa atong kinabuhi dinhi sa yuta.)

Aron matabangan ang mga estudyante nga mas mapalambo ang ilang pagsabut niini nga baruganan, ipasalida ang video nga “God Is Our Father” (3:05), ug papaminawa ang mga estudyante sa mga panalangin nga gihulagway sa mga tawo diha sa video.

Human makatan-aw sa video ang mga estudyante, ipangutana ang mosunod:

• Unsa man ang ubang mga panalangin nga gihulagway sa mga tawo diha sa video nga naggikan sa pagkasayud nga sila mga anak sa Dios?

• Sa unsang paagi nga ang kahibalo nga kamo anak sa Dios nakatabang ninyo nga makakita og mas dakong kahulugan sa inyong kinabuhi?

Papuli-puliha sa pagbasa og kusog ang pipila ka estudyante sa katapusang upat ka paragraph diha sa mga pahina 56–57 sa Isangyaw ang Akong Ebanghelyo. Sugoa ang klase sa pagpangita og mga doktrina ug mga baruganan nga nagtudlo kon unsa ang katuyoan sa Dios alang sa Iyang mga anak ug kon sa unsang paagi nga ang plano sa kaluwasan nakatuman niana nga katuyoan. Dayon ipangutana:

• Unsa man ang gitakda sa plano sa Dios nga buhaton alang sa Iyang mga anak? (Apil sa ilang mga tubag, ang mga estudyante mahimong maglakip sa doktrina nga ang plano sa kaluwasan mihimo niining posible nga matagamtam sa tanang anak sa Dios ang mga panalangin sa pagka-imortal ug kinabuhing dayon.) Kon gikinahanglan ang pagklaro, mahimo nimong i-refer sa mga depinisyon sa pagka-imortal ug kahimayaan diha sa mga pahina 68–69 sa Isangyaw ang Akong Ebanghelyo. Hatagi og gibug-aton nga ang kinabuhing dayon mao ang matang sa kinabuhi nga gipuy-an sa Dios.)

Pagmemorya. Ang pagmemorya makatabang sa mga estudyante nga mahibalo ug maganahan sa pinili nga mga tudling sa kasulatan. Makapadugang usab kini sa kalagmitan nga ang Espiritu Santo mopahinumdom kanila niining mga tudling sa panahon sa panginahanglan (tan-awa sa Juan 14:26). Sa pagdapit nimo sa mga estudyante nga memoryahon ang mga kasulatan, pagbantay aron mapahiangay ang mga gilauman ngadto sa mga kapabilidad ug mga kahimtang sa matag estudyante. Ang mga estudyante dili kinahanglang mobati nga maulawan o mabug-atan kon magkalisud sila sa pagmemorya sa mga tudling.

Aron matabangan ang mga estudyante nga makasabut niini nga doktrina, ipabasa ug ipamemorya nila ang Moises 1:39. Human sila makabaton og pipila ka gutlo sa pagmemorya ug pagpraktis sa pag-recite niini nga tudling, ipangutana:

• Sa unsang paagi nga ang pagtudlo sa mga investigator nga ang katuyoan sa Dios mao ang pagpahinabo sa atong pagka-imortal ug kinabuhing dayon makaapekto sa mga pagpili nga ilang himoon sa ilang inadlaw nga kinabuhi?

Hatagi ang mga estudyante og pipila ka gutlo nga mamalandong sa tahas [role] sa mga misyonaryo sa pag-abag sa Langitnong Amahan sa Iyang buhat nga mao “ang pagpahinabo sa pagka-imortal ug sa kinabuhi nga dayon sa tawo” (Moises 1:39). Dapita ang mga estudyante sa pagpakigbahin sa ilang mga hunahuna ngadto sa laing estudyante o isulat ang ilang mga hunahuna diha sa study journal.

Ang Paglalang ug ang Atong Pisikal nga mga Lawas

Ipabasa og kusog sa usa ka estudyante ang seksyon nga giulohan og “Ang Paglalang [The Creation]” sa pahina 57 sa Isangyaw ang Akong Ebanghelyo. Hatagi og instruksyon ang mga estudyante nga pangitaon ang kaimportante sa Paglalang diha sa plano sa kaluwasan. Dayon ipangutana:

• Ngano nga atong ikonsiderar ang paglalang sa yuta nga usa ka importante nga bahin sa plano sa Dios sa kaluwasan? (Aron mouswag ug mamahimong sama sa Dios, ang kada usa kanato kinahanglan moanhi sa yuta aron makaangkon og lawas ug matestingan atol sa usa ka panahon sa pagsulay.)

Aron matabangan ang mga estudyante nga makasabut sa kaimportante sa pagdawat og pisikal nga lawas, i-display ug basaha og kusog ang mosunod nga pamahayag, nga gihimo ni Sister Susan W. Tanner samtang nagserbisyo pa siya isip kinatibuk-ang presidente sa Young Women. Ipapangita sa mga estudyante kon nganong ang matag usa kanato naghinam-hinam nga makadawat og pisikal nga lawas.

“Sa kinabuhi sa wala pa dinhi sa yuta atong nakat-unan nga ang lawas usa ka bahin sa dakong plano sa kalipay sa Dios alang kanato. Sumala sa nalatid sa pamahayag sa pamilya: ‘Ang mga espiritu nga anak nga lalaki ug babaye nakaila ug misimba sa Dios isip ilang Mahangturong Amahan ug midawat sa Iyang plano diin ang Iyang mga anak makaangkon og pisikal nga lawas ug maangkon ang yutan-on nga mga kasinatian aron molambo ngadto sa pagka-perpekto ug sa katapusan maamguhan ang iyang balaang kapalaran isip usa ka manununod sa kinabuhing dayon.’ Sa pagkatinuod, ‘kita nakasinggit sa kalipay’ (Job 38:7) nga mahimong kabahin niining plano.

“Nganong naghinam-hinam man kitag maayo? Atong nasabtan ang mahangturong mga kamatuoran mahitungod sa atong mga lawas. Nasayud kita nga ang atong lawas sama sa panagway sa Dios. Kita nasayud nga ang atong lawas maoy puy-an sa atong espiritu. Nasabtan usab nato nga ang atong mga lawas moagi og kasakit, balatian, kakulangan, ug tintasyon. Apan kita andam, gani madasigon, sa pagdawat niining mga hagit tungod kay nasayud kita nga sa panagtipon sa espiritu ug elemento lamang nga kita molambo ngadto sa pagkahimong sama sa atong Langitnong Amahan (tan-awa sa D&P 130:22) ug ‘makadawat sa kahingpitan sa kalipay’ (D&P 93:33)” (“Ang Kabalaan sa Lawas,” Ensign o Liahona, Nob. 2005, 13).

Dayon ipangutana:

• Didto sa kinabuhi sa wala pa dinhi sa kalibutan, unsa nga mga kamatuoran ang atong nasabtan nga nakapahimo kanato nga maghinam-hinam nga moanhi sa yuta ug makaangkon og pisikal nga lawas?

• Nganong andam ug madasigon man kitang moanhi sa yuta bisan kon nasayud kita nga magsagubang kita og lisud nga mga hagit sa pagkamortal?

Hatagi ang mga estudyante og panahon nga makapamalandong sa mosunod nga pangutana: Unsaon man ninyo sa pagpasabut ngadto sa usa ka investigator kon sa unsang paagi nga ang atong mortal nga kasinatian makatabang kanato nga mouswag aron mahisama sa atong Langitnong Amahan? Kon itugot sa panahon, dapita sila sa pagtuon sa mga scripture reference diha sa Pagtuon sa Kasulatan nga box ubos sa “Ang Paglalang [The Creation]” sa pahina 57 sa Isangyaw ang Akong Ebanghelyo. Pagkahuman sa usa ka minuto o sobra pa, paatubanga ang mga estudyante ngadto sa tawo nga naglingkod sa ilang tupad ug ipasabut ang ilang tubag sa pangutana.

Kabubut-on [Agency] ug ang Pagkapukan [Fall] ni Adan ug Eva

Isulat sa pisara ang mosunod nga mga heading:

Unsa ang mahimong buhaton nila ni Adan ug Eva didto sa Tanaman

Unsa ang dili mahimong buhaton ni Adan ug ni Eva didto sa Tanaman

Dapita ang mga estudyante nga tun-an ang 2 Nephi 2:22–25 ug ang “Kabubut-on [Agency] ug ang Pagkapukan [Fall] ni Adan ug Eva” nga seksyon diha sa pahina 58 sa Isangyaw ang Akong Ebanghelyo. Samtang magbasa sila, pahimoa og lista ang katunga sa klase kon unsay mahimo nila ni Adan ug Eva didto sa Tanaman sa Eden (mahimo silang magpuyo hangtud sa kahangturan sa usa ka kahimtang sa pagka-inosente, mahimo silang mogamit sa ilang kaugalingong kabubut-on sa paghimo og mga desisyon). Pahimoa og lista ang laing katunga sa klase kon unsay dili mahimo nila ni Adan ug Eva didto sa Tanaman sa Eden (dili sila mouswag o makasinati og pagsupak, dili sila makasinati og hingpit nga kalipay o kasakit o kasubo, dili sila makasala, dili sila makasinati og balatian o pag-antus, dili sila makabaton og mga anak). Human sa pipila ka minutos, hangyoa sila sa pagpakigbahin sa unsay ilang nakit-an. Samtang motubag sila, ikonsiderar ang pagpasulat diha sa pisara sa usa ka sakop sa klase sa mga tubag sa mga estudyante.

Ipatan-aw sa mga estudyante ang mga termino nga pisikal nga kamatayon ug espirituhanong kamatayon diha sa pahina 58 Isangyaw ang Akong Ebanghelyo. Tingali ang tanang mga estudyante makasabut nga ang pisikal nga kamatayon nagpasabut sa kamatayon sa pisikal nga lawas. Tabangi sila nga makasabut nga ang espirituhanong kamatayon nagpasabut sa pagkabulag gikan sa presensya sa Dios. Ang duha ka kamatayon usa ka sangputanan sa Pagkapukan ni Adan. Pinaagi lamang sa Pag-ula ni Jesukristo nga atong mabuntog ang duha ka kamatayon.

Mahimo nimong mapalambo ang panabut sa mga estudyante mahitungod sa kaimportante sa Pagkapukan diha sa plano sa kaluwasan pinaagi sa pag-display sa mosunod nga kinutlo gikan ni Presidente Joseph Fielding Smith (1876–1972) ug sa pagpabasa niini og kusog sa usa ka estudyante ngadto sa klase:

“Sa dihang si Adan gipapahawa sa Tanaman sa Eden, gipahamtangan siya og sentensya sa Ginoo. Ang ubang tawo mitan-aw niana nga sentensya ingon nga usa ka makalilisang nga butang. Dili kadto ingon niana; usa kadto ka panalangin. Wala ko kahibalo kon makonsiderar ba gyud kini bisan gani og silot nga nagtakuban [punishment in disguise].

“Aron ang katawhan makaangkon og kaluwasan ug kahimayaan gikinahanglan nila nga makaangkon og mga lawas niining kalibutana, ug makasinati ug makakat-on sa unsay makita dinhi lamang sa pagkamortal, Ang Ginoo miingon nga ang iyang dakong buhat ug himaya mao, “ang pagpahinabo sa pagka-imortal ug sa kinabuhi nga dayon sa tawo” [Moises 1:39]. Kon wala ang pagkamortal kining dakong panalangin dili matuman. Busa, mga kalibutan nalalang ug gipuy-an sa mga anak sa Dios, ug gihatagan sila sa pribilehiyo nga moagi sa mortal nga pagpakabuhi, nga anaa kanila ang dakong gasa sa kabubut-on. Pinaagi niini nga gasa mopili sila og maayo o mopili og dautan, ug sa ingon makadawat sa ganti didto sa mga kahangturan nga moabut. Tungod sa kalapasan ni Adan ania kita dinhi sa mortal nga kinabuhi. …

“Ang pagkapukan sa tawo miabut isip usa ka panalangin nga nagtakuban [blessing in disguise], ug mao ang paagi sa pagpadayon sa mga katuyoan sa Ginoo diha sa pag-uswag sa tawo, imbis nga mao ang paagi sa pagbabag kanila” (Doctrines of Salvation, comp. Bruce R. McConkie, 3 vols. [1954–56], 1:113–14).

Dayon ipangutana:

• Ngano nga angay mang tan-awon ang Pagkapukan ni Adan ug Eva isip mahinungdanon kaayo nga bahin sa plano sa Dios sa kaluwasan? (Ang Pagkapukan ni Adan ug Eva mitugot sa espiritung mga anak sa Dios nga makaangkon og pisikal nga mga lawas ug mihimo niining posible nga mouswag sila ug mahisama Kaniya.)

Dapita ang mga estudyante sa pagribyu sa “Pagtudlo kabahin sa Pagkapukan” nga box diha sa pahina 58 sa Isangyaw ang Akong Ebanghelyo. Dayon ipasabut sa mga estudyante ang doktrina sa Pagkapukan sa ilang kaugalingong mga pulong ngadto sa estudyante nga naglingkod tupad nila.

Ang Atong Kinabuhi dinhi sa Yuta

Ipasalida ang video nga “The Plan of Salvation” (4:30) o ipabasa og kusog sa usa ka estudyante ang mosunod nga kinutlo gikan ni Presidente Boyd K. Packer sa Korum sa Napulog Duha ka mga Apostoles. Ipapangita sa mga estudyante ang mga paagi nga gisimbolo sa tulo ka yugto nga dula [play] ang plano sa kaluwasan:

“Ang plano sa katubsanan, uban sa tulo ka mga dibisyon niini, mahimong ikapahisama sa usa ka bantugan nga tulo ka yugto nga dula. Ang unang yugto giulohan og ‘Ang Kinabuhi sa Wala pa Dinhi sa Yuta.’ Ang mga kasulatan naghulagway niini nga mao ang atong una nga kahimtang (tan-awa sa Judas 1:6; Abraham 3:26, 28). Ang ikaduhang yugto, gikan sa pagkatawo ngadto sa panahon sa pagkabanhaw, mao ang ‘Ikaduha nga Kahimtang.’ Ang ikatulong yugto gitawag og ‘Kinabuhi Human sa Kamatayon’ o ‘Kinabuhing Dayon.’

“Sa pagkamortal, sama kita sa mga aktor kinsa misulod sa teyatro sa pag-abli gyud sa telon alang sa ikaduha nga yugto. Wala nato maabti ang unang yugto. Ang produksyon adunay daghang pang mga plano nga mosal-ot, nga nakapalisud sa paghulagway kon si kinsa ang may kalabutan sa usa ug unsa ang kalabutan sa usa, kon si kinsa ang mga bayani ug si kinsa ang mga kontra. Mas nahimo pa kining komplikado tungod kay dili lamang kita mga tumatan-aw; mga sakop kita sa cast, diha sa entablado, sa tunga-tunga niining tanan!”

“Isip kabahin sa mahangturon nga plano, ang panumduman sa atong kinabuhi sa wala pa dinhi sa yuta, ang unang yugto, gisalipdan sa usa ka tabil. Tungod kay misulod kita sa pagkamortal sa sinugdanan sa ikaduhang yugto nga walay panumduman sa unang yugto, dili kaayo kini ikahibulong nga lisud ang pagsabut kon unsa ang nangahitabo. …

“Kon naglaum kamo nga makakaplag lamang og kasayon ug kalinaw ug kalipay panahon sa ikaduhang yugto, sigurado nga madismaya kamo. Gamay ra kamo og masabtan kon unsa ang nanghitabo ug kon ngano nga ang mga butang gitugutan man nga maingon niini.

“Hinumdumi kini! Ang panultihon nga ‘Ug sila nagpuyong malipayon hangtud sa hangtud’ wala gayud masulat diha sa ikaduha nga yugto. Kana nga panultihon anaa sa ikatulo nga yugto, dihang ang mga misteryo nasulbad ug ang tanan natarung. …

“Anaay maora og usa ka script alang niining talagsaon nga dula, ang drama sa tanang kapanahunan. Gilatid diha niini, sa mubo nga porma, kon unsay nahitabo sa unang yugto—ang kinabuhi sa wala pa dinhi sa yuta. Samtang wala kaayoy daghang detalye, ang script miklaro sa katuyoan sa tanan, ug gipadayag niini ang dakong bahin sa plano aron sa pagtabang ninyo nga makahunahuna kon bahin sa unsa gayud ang kinabuhi.

“Kana nga script, nga inyo na untang nahibaloan, mao ang mga kasulatan—ang mga pinadayag. Basaha kini. Tun-i kini. Sultihan kamo niini kon unsa ang tawo, nganong ang Dios ‘matinagdanon man kaniya,’ ug nganong gihimo kita nga ‘ubos lamang og diyutay sa mga manolunda’ ug sa gihapon ‘gipurong-purongan … uban sa himaya ug dungog’ (Salmo 8:4–5).

“Ang mga kasulatan namulong sa kamatuoran. Gikan niini igo ninyong makat-unan ang tanang tulo ka yugto aron sa pagsugod sa kinabuhi ug makakuha og direksyon sa inyong kinabuhi. Nagpadayag kini nga ‘kamo usab diha sa sinugdanan uban sa Amahan; nga kana mao ang Espiritu, gani ang Espiritu sa kamatuoran;

“‘Ug ang kamatuoran mao ang kahibalo sa mga butang ingon nga sila mao karon, ug ingon nga sila mao sa kaniadto, ug ingon nga sila mao sa umaabut’ (D&P 93:23–24)” (Boyd K. Packer, “The Play and the Plan” [fireside sa Church Educational System, Mayo 7, 1995], 2–3; si.lds.org).

Dayon ipangutana ang sama sa mosunod:

• Sa unsang mga paagi nga gisimbolo sa tulo ka yugto nga dula ang pipila ka elemento sa plano sa kaluwasan?

• Sumala niini nga analohiya, nganong lisud man alang sa daghang tawo nga masabtan ang katuyoan sa kinabuhi dinhi sa yuta?

• Sumala niini nga analohiya, asa man nato makit-an ang script alang niining mahinungdanong tulo ka yugto nga dula?

• Sa unsang paagi nga ang mga kasulatan makatabang sa mga anak sa Dios nga mas masabtan ang ilang katuyoan diha sa plano sa Dios?

Pasabta ang mga estudyante nga kon ang mga misyonaryo motudlo sa plano sa kaluwasan, makatabang sila sa mga investigator nga mas masabtan ang katuyoan sa pagkamortal ug sa unsang paagi kita makabalik sa pagpuyo pag-usab uban sa Langitnong Amahan (tan-awa sa Alma 12:32–34). Ipabasa sa mga estudyante ang seksyon nga giulohan og “Ang Atong Kinabuhi dinhi sa Yuta” sa pahina 59 sa Isangyaw ang Akong Ebanghelyo. Human sila makabaton og igong panahon nga mabasa ang seksyon, ipangutana:

• Unsaon man ninyo sa pagpasabut sa katuyoan niini nga kinabuhi sa usa o duha ka sentence?

Sultihi ang mga estudyante nga importante nga masabtan sa mga investigator nga ang atong pagpangandam sa pagbalik ngadto sa presensya sa Dios magdepende sa mga desisyon nga atong gihimo panahon sa atong kinabuhi dinhi sa yuta. Ang mga desisyon sa pagsunod sa mga sugo sa Dios makatabang kanato nga mas mahiduol ngadto sa atong Langitnong Amahan, samtang ang pagsupak sa mga sugo sa Dios makapugong sa atong pagbalik ngadto sa Iyang presensya. Isulat sa pisara ang mosunod:

Mga sangputanan sa sala:

Dayon ipangutana:

• Unsa man ang mga sangputanan sa sala? (Kon gikinahanglan, awhaga ang mga estudyante sa pagribyu sa ikaduhang paragraph sa “Ang Atong Kinabuhi dinhi sa Yuta” sa pahina 59 sa Isangyaw ang Akong Ebanghelyo. Bisan kon mogamit sila og lain-laing mga pulong, ang mga estudyante kinahanglang makasabut niini nga mga kamatuoran: Ang sala mosangput sa pagkawalay kalipay ug mao ang makaingon sa pagbati nga sad-an ug kaulaw. Makapahimo kini kanato nga hugaw ug dili takus nga mosulod sa presensya sa Dios. Ang sala makapugong sa atong pagbalik ngadto sa atong Amahan sa Langit gawas kon kita mapasaylo.)

• Sa unsang paagi nga ang pagsabut sa mga sangputanan sa sala makatabang sa pag-andam sa mga investigator aron modawat sa mensahe sa Pag-ula?

Pahinumdumi ang mga estudyante nga niini nga kinabuhi makasinati kitang tanan og espirituhanong kamatayon—mahibulag kita gikan sa presensya sa Dios. Pangutan-a ang mga estudyante:

• Sa unsang paagi nga ang ebanghelyo ni Jesukristo makatabang kanato nga mabuntog ang espirituhanong kamatayon ug makabalik ngadto sa presensya sa Dios? (Samtang motubag ang mga estudyante mahimo nimo silang pangutan-on kon sa unsang paagi nga ang hugot nga pagtuo diha ni Jesukristo, paghinulsol, bunyag pinaagi sa pagpaunlod, ug ang gasa sa Espiritu Santo makatabang kanato nga mabuntog ang mga epekto sa Pagkapukan ug moandam kanato sa pagbalik ngadto sa presensya sa Dios.)

Importante nga ang mga estudyante mahatagan og oportunidad nga makapraktis unsaon sa pagpasabut sa mga elemento sa plano sa kaluwasan nga nahisgutan niini nga leksyon. Makatabang kini nga mas masabtan nila ang mga doktrina ug mga baruganan nga ilang itudlo ngadto sa mga investigator.

Ipares-pares ang mga estudyante. Hatagi og igong panahon aron ang mga parisan makaandam sa pagtudlo og lima ngadto sa napulo ka minutos nga leksyon mahitungod sa katuyoan sa atong kinabuhi dinhi sa yuta. Iparibyu sa mga estudyante ang materyal diha sa mga pahina 58–59 sa Isangyaw ang Akong Ebanghelyo, lakip na ang mga kasulatan gikan sa Pagtuon sa Kasulatan nga mga box. Kon available, mahimo usab nilang tun-an ang mga pahina 2–9 sa pamphlet sa misyonaryo nga giulohan og Ang Plano sa Kaluwasan. Samtang nag-andam ang mga estudyante, lakaw libut sa klase ug tabangi sila nga makaandam og simple ug mubo nga pagpasabut sa mga elemento sa plano sa kaluwasan. Pamatud-i og usab nga ang paggamit sa mga tudling sa kasulatan diha sa ilang mensahe ug ang pagpamatuod mahitungod sa mga doktrina ug mga baruganan nga ilang gitudlo modugang og gahum sa ilang leksyon.

Human makabaton og igong panahon ang mga estudyante nga maribyu ang materyal ug makaandam og mubo nga leksyon, i-assign ang matag parisan sa mga estudyante sa pagtudlo og laing parisan. Dayon i-rotate sila aron ang matag parisan dunay oportunidad sa pagtudlo og kausa. Samtang ang matag parisan motapus sa ilang kasinatian sa pagtudlo, pahisguti nila ang mosunod uban sa mga estudyante nga ilang gitudloan:

• Unsa may maayong nabuhat sa mga magtutudlo?

• Unsa nga mga pamaagi ang makahimo unta sa presentasyon nga mas epektibo pa?

Human makabaton og oportunidad ang matag parisan sa pagpraktis ug pag-evaluate sa ilang pagtudlo, dapita ang mga sakop sa klase sa pagpakigbahin sa ilang mga hunahuna gikan sa ilang mga kasinatian ngadto sa tibuok klase.

Tapusa ang leksyon pinaagi sa pagsulat sa pisara sa mosunod nga mga pamahayag ug sa paghangyo sa mga estudyante nga ikonsiderar kon sa unsang paagi nga kining mga baruganan makapalambo sa ilang tinguha nga moserbisyo og msiyon:

Ang matag tawo nga inyong mahimamat anak sa Langitnong Amahan ug Iyang gihigugma.

Ang matag tawo nga inyong mahimamat nagdala og palas-anon sa pagkadili malipayon nga moabut tungod sa mga sala nga wala masulbad pinaagi sa makapalimpyo nga Pag-ula ni Kristo.

Dapita ang pipila ka estudyante sa pagpakigbahin kon unsay ilang gibati samtang namalandong niining mga pamahayag. Ikonsiderar ang pagtapos sa leksyon pinaagi sa pagpangutana sa mga estudyante kon aduna ba kanila ang ganahang mohatag og pagpamatuod ngadto sa klase mahitungod sa mga doktrina nga may kalabutan sa plano sa kaluwasan.

Mga Pagdapit aron Molihok

Pagpadayon sa paglambo. Ang mga magtutudlo ug mga misyonaryo kinahanglang makakat-on og mga baruganan sa epektibo nga pagtudlo ug ma-master ang epektibo nga mga kahanas sa pagtudlo sa hinay-hinay pinaagi sa pagtuon, hugot nga pagtuo, pagpraktis, ug kasinatian. Ang tumong sa matag misyonaryo kinahanglang mao ang pagrepresentar sa Manluluwas sa kalibutan sa ingon ka maayo kutob sa mahimo ug mahimong “usa ka magtutudlo nga gikan sa Dios” (Juan 3:2). Kadtong modangup sa Ginoo matag adlaw mobati sa Iyang panabang samtang naningkamot sila nga molambo.

Dapita ang mga estudyante nga palawman ang ilang panabut sa plano sa kaluwasan ug sa pagpalambo sa ilang mga kahanas sa pagtudlo pinaagi sa pagpili sa usa sa mosunod nga mga kalihokan nga trabahuon sa gawas sa klase:

• Ribyuha ang “Mga Mahinungdanong Depinisyon” nga seksyon diha sa mga pahina 68–69 sa Isangyaw ang Akong Ebanghelyo. Praktisa ang pagpasabut sa matag termino sa inyong kaugalingong mga pulong gamit ang simple nga mga pamahayag sa kamatuoran.

• Ribyuha ang mga tudling sa kasulatan nga makita diha sa Pagtuon sa Kasulatan nga mga box sa mga pahina 58–59 sa Isangyaw ang Akong Ebanghelyo. Pagpili og usa o duha ka mga tudling nga gusto ninyong gamiton sa pagtudlo sa matag usa sa lain-laing mga bahin sa plano sa kaluwasan ug markahi kini diha sa inyong mga kasulatan. Ikonsiderar ang pagmemorya sa usa o dugang pa niining mga tudling.

• Paghimo og outline alang sa pagtudlo sa plano sa kaluwasan. Ikonsiderar ang paggamit sa mga ideya sa lesson plan diha sa mga pahina 64–66 sa Isangyaw ang Akong Ebanghelyo isip usa ka reference.

• Hunahunaa ang usa ka higayon sa dihang ang inyong kahibalo sa plano sa kaluwasan nakapanalangin sa inyong kinabuhi. Pagsulat og usa ka summary niana nga kasinatian diha sa inyong study journal o ipakigbahin kini sa usa ka higala.