12

Pagpangita og mga Tawo nga Katudloan

Pasiuna

Dili mapakigbahin sa mga misyonaryo ang ebanghelyo hangtud nga makakita sila og tawo nga katudloan. Ang pagpangita og mga tawo nagkinahanglan sa pagpakita og hugot nga pagtuo—hugot nga pagtuo sa pagpakig-istorya sa mga tawo mahitungod sa ebanghelyo ni Jesukristo, hugot nga pagtuo sa pagtan-aw og mga oportunidad sa pagtudlo, ug hugot nga pagtuo nga ang Dios mogiya kanila ngadto sa mga tawo nga andam nga maminaw. Ang pinakaepektibong paagi sa pagpangita og mga tawo nga katudloan mao ang pinaagi sa mga miyembro sa Simbahan. Ang tanang miyembro sa Simbahan, lakip na sa umaabut nga mga misyonaryo, dunay personal nga responsibilidad sa pagtabang sa pagpangita og mga tawo nga andam nga modawat sa gipahiuli nga ebanghelyo. Ang mga batan-on makapangandam alang sa full-time nga pagserbisyo pinaagi sa pagpakigbahin sa ebanghelyo karon, sa personal ug pinaagi sa mga kapanguhaan diha sa internet.

Advance nga Pagpangandam

• Tun-i ang Doktrina ug mga Pakigsaad 18:10, 14–16; 33:6–11; 100:5–6.

• Tun-i ang Isangyaw ang Akong Ebanghelyo, mga pahina 189, 196, 198, 208.

• Pag-andam aron ipasalida ang video nga “Developing the Faith to Find” (2:55), The District 1, nga anaa sa LDS.org

• Pag-andam aron ipasalida ang video nga “The Lord of the Harvest: The Adams Family” (4:41), nga anaa sa LDS.org.

• Pag-andam aron ipasalida ang video nga “Sharing Your Beliefs” (2:02), nga anaa sa LDS.org.

• I-assign daan ang usa o duha ka estudyante aron mopakita sa usa o duha sa mosunod sa panahon sa klase: (1) unsaon paggamit sa LDS.org o mormon.org sa pag-share og mga video o ubang mga materyal gamit ang social media ug (2) unsaon paghimo og profile diha sa mormon.org.

Mga Sugyot alang sa Pagtudlo

Pagpalambo og Hugot nga Pagtuo sa Pagpangita og mga Tawo nga Katudloan

Ipasabut nga si Presidente Wilford Woodruff miserbisyo isip usa ka misyonaryo didto sa England sa wala madugay human siya naordinahan pagka-Apostol. I-display ug hangyoa ang mga estudyante sa pagpuli-puli sa pagbasa og kusog sa mosunod nga istorya sa pagpaila sa kaimportante sa pagtinguha sa panabang sa Ginoo sa pagpangita og mga tawo nga katudloan. Ipapangita sa klase kon unsay gibuhat ni Elder Woodruff aron makakita og mga tawo nga katudloan:

“Si Elder Woodruff nag-ampo sa Ginoo … , nangutana asa siya paingon. Iyang giasoy pag-usab: ‘Sa pagtuo nga mao kadtoy higayon ug katungdanan nga masayud sa kabubut-on sa Ginoo sa maong hilisgutan, busa, nangutana ako sa akong Langitnong Amahan pinaagi sa pangalan ni Jesukristo sa pagtudlo kanako sa iyang kabubut-on niining butanga, ug ako nangutana, ang Ginoo mihatag, ug mipakita kanako nga mao kini ang iyang kabubut-on nga moadto dayon ako sa habagatang England. Nakig-istorya ako ni brother William Benbow mahitungod niini, kinsa nagpuyo sa Herefordshire ug adunay mga higala nga nagpuyo didto, ug gusto nga akong bisitahan kadtong dapita, ug [siya] mitanyag sa pag-uban kanako ngadto sa balay sa iyang igsoong lalaki ug mobayad sa akong pamilite, nga akong gidawat dayon.’

“Niadtong Marso 4, 1840, si Elder Woodruff ug si William Benbow miabut sa balay sa igsoon ni William nga si John. ‘Mga usa ka oras sa akong pag-abut sa iyang balay,’ nahinumdom si Presidente Woodruff, ‘akong nahibaloan ngano nga ang Ginoo mipadala nako didto. … Akong nakita ang pundok sa mga lalaki ug mga babaye, mga unom ka gatus, kinsa nagkahiusa ubos sa pangalang Nagkahiusang mga Kaigsoonan [United Brethren], nga naningkamot sa pag-establisar sama sa karaang lagda sa mga butang. Gusto nilang itudlo ang Ebanghelyo nga gitudlo sa mga propeta ug mga apostoles, sama sa akong gihimo sa batan-on pa ko.’

“Pinaagi sa makugihong pagtuon sa Biblia, si John Benbow ug ang iyang pamilya ug mga higala miandam sa ilang kaugalingon sa paghangup sa gipahiuli nga ebanghelyo.

“Ang pamilyang Benbow dali rang midawat sa mensahe sa Pagpahiuli, ug si William mibalik ngadto sa Staffordshire ‘human sa kalipay nga nakakita sa iyang igsoon nga si John Benbow, ug sa tibuok niyang pamilya, … nga nabunyagan ngadto sa bag-o ug walay katapusan nga pakigsaad.’ Si Elder Woodruff nagpabilin sa maong dapit sulod sa walo ka bulan. Unya nahinumdom siya: ‘Ang unang traynta ka adlaw human sa akong pag-abut sa Herefordshire nakabunyag ako og kwarenta y singko ka mga tigsangyaw ug gatusan ka mga miyembro. … Nakadala kami og duha ka libo sulod sa walo ka bulan nga pagpaningkamot.’

“Kabahin niini nga kasinatian, si Presidente Woodruff misulat: ‘Ang tibuok kasaysayan niining misyon sa Herefordshire nagpaila sa kaimportante sa pagpaminaw sa hinay hinagawhaw nga tingog sa Dios ug sa mga pagpadayag sa Espiritu Santo. Ang Ginoo adunay mga tawo didto nga andam na alang sa Ebanghelyo. Nag-ampo sila alang sa kahayag ug kamatuoran, ug ang Ginoo mipadala kanako ngadto kanila’” (Mga Pagtulun-an sa mga Presidente sa Simbahan: Wilford Woodruff [2004], 98–99).

Pangutan-a ang mga estudyante:

• Unsa may gibuhat ni Elder Woodruff aron sa pagtino kon asa mangita og mga tawo nga andam nga modawat sa ebanghelyo?

• Sa unsang mga paagi nga ang Ginoo miabag ni Elder Woodruff? (Mahimo nimong ipasabut ngadto sa mga estudyante nga wala lamang gidasig sa Ginoo si Elder Woodruff nga moadto sa habagatang bahin sa England, pero giablihan usab niya ang dalan alang ni Elder Woodruff sa pagtudlo didto sa uma ni John Benbow, diin gatusan ka mga lalaki ug mga babaye ang giandam aron makadawat sa gipahiuli nga ebanghelyo.)

• Unsa nga baruganan mahitungod sa pagpangita og mga tawo nga katudloan ang gipakita diha sa istorya ni Elder Woodruff? (Ang mga tubag sa mga estudyante mahimong i-summarize pinaagi sa pagsulat sa pisara sa mosunod nga baruganan: Ang Ginoo makatabang kanato sa pagpangita og mga tawo nga katudloan nga giandam aron makadawat sa ebanghelyo kon mag-ampo kita alang sa panabang, maminaw sa Espiritu, ug dayon molihok pinaagi sa hugot nga pagtuo.)

Hangyoa ang klase sa pagpakli ngadto sa pahina 189 sa Isangyaw ang Akong Ebanghelyo, ug hangyoa ang usa ka estudyante sa pagbasa og kusog sa unang paragraph ubos sa heading nga “Pagpalambo sa Hugot nga Pagtuo aron sa Pagpangita.” Dayon ipangutana:

• Sa unsang paagi nga ang pagkahibalo nga “ang Ginoo nag-andam og mga tawo nga modawat kaninyo ug sa gipahiuli nga ebanghelyo” nakatabang sa pagdasig kaninyo nga mangandam sa pagserbisyo og misyon?

Ipabasa sa mga estudyante ang sunod nga paragraph diha sa mga pahina 189–90 sa Isangyaw ang Akong Ebanghelyo, ubos sa subheading nga “Ang Pamilya sa Dios.” Dayon ipangutana:

• Sa unsang paagi nga ang doktrina nga ang tanang lalaki ug babaye kabahin sa pamilya sa Dios makaimpluwensya sa inyong mga pagbati kalabut sa pagpangita og mga tawo nga katudloan?

• Diha sa kinutlo gikan sa Alma 31:34–35, unsa man ang gi-ampo ni Alma samtang nangandam siya sa pagsangyaw ngadto sa mga Zoramite?

• Unsa man ang atong makat-unan gikan sa pag-ampo ni Alma?

Ipasalida ang video nga “Developing the Faith to Find” (2:55), ug ipapangita sa mga estudyante ang mga ideya kalabut sa pagpangita og mga tawo nga katudloan. Mahimo nimong awhagon ang mga estudyante sa paghimo og notes mahitungod sa unsay ilang nakat-unan.

Ipangutana:

• Unsa nga mga ideya mahitungod sa pagpangita og mga tawo nga katudloan ang gihatag sa mga misyonaryo dinhi niini nga video? (Ang mga estudyante mahimong mohatag og mga tubag nga sama niini: Ang mga misyonaryo kinahanglang mag-ampo alang sa mga oportunidad, gugma alang sa uban ug motan-aw kanila sama sa pagtan-aw sa Dios kanila, ug mahinumdom nga ang Ginoo nag-andam sa Iyang mga anak nga makadawat sa ebanghelyo ug mogiya sa Iyang mga misyonaryo aron makakita kanila. Tungod kay gihigugma sa Dios ang Iyang mga anak, gusto niya nga ang tanan dunay oportunidad sa pagpaminaw ug sa pagdawat sa ebanghelyo.)

• Nganong importante man ang paglihok base sa mga pagbati nga motabang sa uban ug modapit kanila nga magkat-on sa ebanghelyo?

Ipabasa sa mga estudyante ang tulo ka paragraph diha sa subsection nga giulohan og “Pangitaa Sila nga Modawat Kaninyo” sa pahina 190 sa Isangyaw ang Akong Ebanghelyo. Dayon ipangutana:

• Unsa ang pipila ka hagit nga mahimo natong sagubangon kon mosulay sa pagpangita og mga tawo nga katudloan? (Kasagaran wala kita mahibalo kon kinsa ang andam alang sa ebanghelyo. Ang mga tawo mahimong dili dayon makaila kanato isip mga sulugoon sa Ginoo. Mahimong wala sila makaamgo nga nangita sila sa gipahiuli nga ebanghelyo.)

• Sa unsang paagi nga ang Ginoo motabang kanato sa pagpangita og mga tawo nga katudloan? (Iyang ipadala ang Espiritu Santo aron mogiya kanato.)

• Sa inyong hunahuna unsa kaha ang ipabuhat sa Ginoo sa mga misyonaryo kon dili dayon sila makakita og mga resulta sa ilang mga paningkamot sa pagpangita og mga tawo nga katudloan?

Kon dunay mga estudyante sa klase nga mga kinabig sa Simbahan, ikonsiderar ang pagdapit og usa o dugang pa aron mopakigbahin kon sa unsang paagi sila nahibalo mahitungod sa Simbahan ug sa unsang paagi nga ilang nabantayan nga ang mga misyonaryo nagtudlo kanila sa kamatuoran. Kon walay mga kinabig diha sa klase, dapita ang mga estudyante sa paghunahuna og usa ka kinabig nga ila gayung nailhan diha sa ilang pamilya o sa ilang ward. Ikonsiderar ang pagdapit kanila sa pagpakigbahin kon sa unsang paagi nga kana nga tawo midawat sa ebanghelyo.

Ang Kaimportante sa Misyonaryo nga Buhat sa Miyembro

I-display ang mosunod nga pamahayag ni Presidente Thomas S. Monson ug dapita ang usa ka estudyante sa pagbasa niini og kusog:

“Karon ang panahon sa mga miyembro ug sa mga misyonaryo sa paghiusa, sa pag-uban og trabaho, sa paghago sa ubasan sa Ginoo sa pagdala og mga kalag ngadto Kaniya Siya nag-andam og paagi nato aron ipakigbahin ang ebanghelyo sa daghan kaayong mga paagi, ug Siya motabang nato sa pagtrabaho kon kita molihok pinaagi sa hugot nga pagtuo sa pagtuman sa Iyang buhat” (“Hugot nga Pagtuo sa Buhat sa Kaluwasan” [pakigpulong nga gihatag atol sa tibuok kalibutan nga sibya sa pagpangulo kalabut sa Buhat sa Kaluwasan, Hunyo 23, 2013]).

Mahimo kang mangutana sa mga estudyante sama sa mosunod:

• Nganong importante man nga hinumduman nga ang propeta sa Dios mihangyo kanato nga moapil sa misyonaryo nga buhat sa miyembro? (Mahimo nimong ikonsiderar ang pag-refer ngadto sa Doktrina ug mga Pakigsaad 88:81, nga naghatag og gibug-aton sa mga gilauman sa Ginoo alang niadtong nakadawat sa ebanghelyo.)

• Sa inyong hunahuna ngano nga si Presidente Monson miingon man nga “karon ang panahon” alang sa mga miyembro ug sa mga misyonaryo sa pag-uban og trabaho?

Dayon dapita ang mga estudyante sa pagpakli ngadto sa pahina 196 sa Isangyaw ang Akong Ebanghelyo, ug papuli-puliha ang tulo ka estudyante sa pagbasa og kusog sa unang tulo ka paragraph ubos sa heading nga “Ang Ka-importante sa mga Miyembro.” Dayon ipangutana:

• Unsa ang mahimong resulta kon ang mga miyembro ug mga misyonaryo mag-uban og trabaho sa pagsangyaw sa ebanghelyo? (Ang mga tubag sa mga estudyante mahimong maglakip niini nga baruganan: Kon ang mga miyembro modapit sa uban aron matudloan ug motambong atol sa pagtudlo, mas daghang tawo ang mabunyagan ug magpabiling aktibo sa Simbahan.)

Ipasalida ang video nga “The Lord of the Harvest: The Adams Family” (4:41), ug hangyoa ang mga estudyante nga hatagan og pagtagad kon unsay gibuhat sa mga miyembro sa Simbahan aron matabangan ang pamilya Adams nga makadawat sa mga panalangin sa ebanghelyo.

Ipangutana:

• Unsa man ang pipila ka mga paningkamot nga miresulta sa pagkadawat sa pamilya Adams sa mga panalangin sa ebanghelyo?

• Sa inyong hunahuna unsa man ang nakapadasig sa mga miyembro diha sa video aron mopakigbahin sa ebanghelyo ngadto sa pamilya Adams?

Ipabasa og kusog sa mga estudyante ang duha ka paragraph diha sa seksyon nga giulohan og “Walay Paningkamot nga Mausik” sa Isangyaw ang Akong Ebanghelyo, pahina 208. Dayon ikonsiderar ang pagpangutana sama sa mosunod:

• Bisan kon ang mga tawo dili modawat sa pagdapit nga mopakisusi sa gipahiuli nga ebanghelyo, nganong wala may paningkamot nga mausik diha sa pagserbisyo ug pagtudlo?

• Unsaon man nga mapabilin sa misyonaryo ang maayong kinaiya kon ang mga tawo mopili nga dili mopakisusi sa ebanghelyo?

Dapita ang mga estudyante nga ipakigbahin kon unsay ilang gibuhat sa miagi aron moapil sa misyonaryo nga buhat sa miyembro. Hangyoa sila sa pagpasabut kon unsay ilang gibati samtang misulay sila sa pagpakigbahin sa ebanghelyo ngadto sa uban.

Pag-apil sa Misyonaryo nga Buhat sa Miyembro

Ilista sa pisara ang mosunod nga mga kasulatan, dayon ipabasa og hilum sa matag estudyante ang usa sa mga tudling ug ipapangita ang mga panalangin nga gisaad ngadto niadtong kinsa mopili nga moapil sa misyonaryo nga buhat.

D&P 18:10, 14–16

D&P 33:6–11

D&P 100:5–6

Pag-awhag sa tanang estudyante nga moapil. Ang mga magtutudlo kinahanglang maningkamot sa pagpangita og mga paagi nga madapit sa tukmang paagi ang tanang estudyante sa pag-apil diha sa mga panaghisgutan sa klase, bisan kadtong nagpanuko sa pagbuhat sa ingon. Usahay ang usa o dugang pa nga mga estudyante lagmit nga modominar sa panaghisgutan sa klase. Ang mga magtutudlo mahimong makig-istorya sa pribado sa ingon nga mga indibidwal ug mopasalamat kanila sa ilang kaandam nga motampo sa panaghisgutan sa klase, ug dayon mohangyo sa ilang tabang sa pagpaapil usab sa uban.

Human mahatagi ang mga estudyante og pipila ka gutlo nga maribyu ang tudling nga ilang gipili, hangyoa ang mga estudyante sa pagpasabut sa mga bersikulo nga ilang gibasa ug ipakigbahin kon sa unsang paagi nga ang gisaad nga mga panalangin makadasig kanila sa pagpangita og mga tawo nga modawat sa mensahe sa ebanghelyo. Awhaga ang tanang sakop sa klase nga moapil sa panaghisgutan. Mahimo nimong ilista sa pisara ang mga tubag sa mga estudyante tupad sa tukma nga kasulatan.

Ikonsiderar ang pagsulat sa pisara sa mosunod nga baruganan: Isip mga misyonaryo nga miyembro, makasugod kita karon sa pagpangita og mga tawo nga katudloan sa mga misyonaryo.

Aron matabangan ang mga estudyante nga mas makasabut kon sa unsang paagi sila makaapil sa misyonaryo nga buhat sa miyembro, ipabasa og kusog sa usa ka estudyante ang mosunod nga pamahayag ni Elder M. Russell Ballard sa Korum sa Napulog Duha ka mga Apostoles: Hangyoa ang klase sa pagpaminaw sa tambag kon sa unsang paagi mabatunan ang pagsalig ug kaisug sa pagtabang sa uban:

“Mga kaigsoonan, ang kahadlok mapulihan og pagtuo ug pagsalig kon ang mga miyembro ug full-time nga mga misyonaryo moluhod sa pag-ampo ug tinuoray nga mangayo sa Ginoo sa pagpanalangin nila og mga oportunidad. Dayon, kinahanglan kitang mopakita sa atong pagtuo ug mangita og oportunidad sa pagpahibalo sa ebanghelyo ni Jesukristo ngadto sa mga anak sa atong Langitnong Amahan, ug siguradong moabut ang mga oportunidad. Kining mga oportunidad wala magkinahanglan og pinugos o tinuyo nga pagtubag. Natural ra kini nga moabut agig resulta sa atong gugma sa atong mga kaigsoonan. Magmapositibo lang, ug kadtong inyong sultihan mobati sa inyong gugma. Dili nila makalimtan kana nga pagbati, bisan kon dili pa tukma ang panahon nga modawat sila sa ebanghelyo. Kana usab mahimong mausab sa umaabut kon ang ilang kahimtang mausab.

“Imposible nga mapakyas kita kon kita naghimo sa pinakamaayo diha sa buhat sa Ginoo. Samtang ang sangputanan maoy resulta sa pagpili, ang pagpakigbahin sa ebanghelyo maoy atong responsibilidad.

“Salig sa Ginoo. Siya ang Maayong Magbalantay. Nakaila Siya sa Iyang mga karnero, ug ang Iyang mga karnero nakaila sa Iyang tingog; ug karon, ang tingog sa Maayong Magbalantay mao ang inyong tingog ug ang akong tingog. Ug kon wala kita moapil, daghan niadtong maminaw unta sa mensahe sa Pagpahiuli ang malabyan. Ginaingon kini, kinahanglan lang ang hugot nga pagtuo ug buhat sa atong bahin. Ang mga baruganan yano ra—pag-ampo, sa personal ug diha sa inyong pamilya, alang sa pang-misyonaryo nga mga oportunidad. …

“Dili kinahanglan nga kamo hilig nga makighugoy-hugoy o maayong manulti o madanihon nga magtutudlo. Kon kamo adunay gugma ug paglaum, ang Ginoo misaad nga kon inyong ‘ipataas ang inyong mga tingog ngadto niini nga mga katawhan [ug] ipamulong ang mga hunahuna diin [Siya] mobutang sa inyong mga kasingkasing, … kamo dili pagalibugon sa atubangan sa mga tawo;

“‘[Ug] ihatag kini kaninyo … sa diha gayud nga higayon, unsa ang inyong isulti’ (D&P 100:5–6)” (“Ibutang ang Inyong Pagsalig diha sa Ginoo,” Ensign o Liahona, Nob. 2013, 44).

Ipangutana:

• Unsa man ang gisugyot ni Elder Ballard nga mabuhat sa mga miyembro aron makapalambo og mas dakong pagsalig sa pagpaila sa ebanghelyo ngadto sa uban?

• Sa unsang mga paagi nga ang pagpangita og mga tawo nga katudloan usa ka butang nga may kalabutan sa hugot nga pagtuo?

Pagahina ang mga estudyante og pipila ka gutlo sa pagsusi diha sa lista sa “Mga Ideya sa Pagtabang sa mga Miyembro” sa pahina 198 sa Isangyaw ang Akong Ebanghelyo ug mangita sa piho nga mga paagi nga ang mga miyembro makaapil sa misyonaryo nga buhat. Papilia ang mga estudyante og usa o duha ka ideya nga mahimo nilang gamiton karon aron moapil sa misyonaryo nga buhat sa miyembro. Dayon ipangutana:

• Hain niini nga mga ideya ang inyong mabuhat karon aron makadapit sa uban sa pagpaminaw sa mensahe sa ebanghelyo?

• Sa inyong hunahuna ngano nga ang ubang mga miyembro sa Simbahan magpanuko man sa pagtabang sa uban sa mga paagi nga makita diha sa lista?

Pagsulat sa mga assignment. Ang pagsulat sa mga assignment makahatag sa mga estudyante og mga oportunidad nga personal nga makaapil, makadawat og inspirasyon, ug makaandam sa pagtudlo ug sa pagpakigbahin sa ilang mga pagbati ngadto sa uban.

Awhaga ang mga estudyante nga mogahin og pipila ka minutos sa pagsulat og pipila ka butang nga ilang buhaton aron makapangita og mga tawo nga katudloan sa mga misyonaryo. Isugyot ngadto sa mga estudyante nga ang ilang mga plano mahimong mas epektibo kon ilang isulat ang mga ngalan sa mga dili miyembro nga mga higala ug mga sakop sa pamilya diin ilang mapakigbahin ang mensahe sa ebanghelyo. Mahimo nimong isugyot nga i-apil sa mga estudyante ang mga aksyon sama sa kanunay nga pag-ampo alang sa misyonaryo nga mga oportunidad, pakigsulti sa uban mahitungod sa mga hilisgutan sa ebanghelyo, pagdapit sa uban ngadto sa mga tulumanon sa pagsimba o ubang mga kalihokan sa Simbahan, pagdapit sa uban nga maminaw sa mga leksyon gikan sa mga misyonaryo, pagdapit sa uban nga mobasa sa Basahon ni Mormon, ug uban pa. Kon giaghat sa Espiritu, mahimo kang motawag og pipila ka estudyante sa pagpakigbahin sa ilang mga plano ngadto sa klase.

Gamita ang Tanang Himan Nga Giandam sa Dios

Ipabasa og kusog sa usa ka estudyante ang mosunod nga pamahayag ni Elder L. Tom Perry (1922–2015) sa Korum sa Napulog Duha ka mga Apostoles, ug hangyoa ang klase sa pagpaminaw kon sa unsang paagi nga nausab ang proseso sa pagpangita og mga tawo nga katudloan:

“Sa batan-on pa akong misyonaryo, kami makaistorya sa mga tawo sa dalan ug makapanuktok sa pagpakigbahin sa ebanghelyo. Ang kalibutan nausab sukad nianang panahona. Karon, daghang mga tawo ang busy na kaayo sa ilang mga kinabuhi. Magdali sila, ug sa kasagaran dili kaayo motugot og estranghero nga mosulod sa ilang mga panimalay, nga wala dapita, sa pagpakigbahin og mensahe sa gipahiuli nga ebanghelyo. Ang ilang labing importanting paagi sa pagkontak sa uban, bisan sa suod nga mga higala, kasagaran pinaagi sa Internet. Busa, ang matang sa buhat sa misyonaryo, kinahanglang mausab kon kinahanglan nga matuman ang buhat sa Ginoo sa pagpundok sa Israel ‘gikan sa upat ka mga suok sa yuta’ [2 Nephi 21:12]. Ang mga misyonaryo karon tugutan na sa paggamit sa Internet sa ilang mga paningkamot sa pagpangita og katudloan. …

“Samtang ang mga misyonaryo mosulod niining bag-ong kausaban diin sila mogamit og mga komputer sa buhat sa Ginoo, among gidapit ang mga batan-on ug ang mga tigulang, ang mga hamtong, ug dili kaayo hamtong, ang kabatan-onan, ug ang mga bata sa tanang dapit sa pakig-uban namo … nga ipakigbahin ang ilang mga mensahe sa ebanghelyo sa online. …

“Ingon nga ang mga misyonaryo mopahiangay sa nagkausab nga kalibutan, ang mga miyembro kinahanglan usab nga mousab sa paagi sa ilang paghunahuna mahitungod sa misyonaryo nga buhat. Sa pagsulti niini, gusto nakong klarohon nga kon unsay gihangyo ngari kanato, isip mga miyembro, wala mausab; apan ang paagi sa pagtuman sa atong responsibilidad sa pagpakigbahin sa ebanghelyo kinahanglang ipahiangay sa nagkausab nga kalibutan” (“Ang Misyonaryo nga Buhat sa Digital nga Panahon” [pakigpulong nga gihatag atol sa tibuok kalibutan nga sibya sa pagpangulo kalabut sa Buhat sa Kaluwasan, Hunyo 23, 2013]).

Ipangutana:

• Sumala ni Elder Perry, nganong kinahanglan man gayud nga sugdan sa mga miyembro ug mga misyonaryo ang paggamit sa mga kapanguhaan diha sa internet sa ilang pagpakigbahin sa ebanghelyo? Unsa man ang mga kaayohan sa paggamit niining mga kapanguhaan?

• Unsa ang pipila ka himan o kapanguhaan nga inyong magamit sa pagpakigbahin sa inyong pagpamatuod mahitungod sa ebanghelyo ug sa pagdapit sa uban nga makakat-on pa og dugang?

• Unsa man ang pipila ka pihong mga paagi nga inyong magamit kini nga mga himan sa pagpakigbahin sa mensahe sa ebanghelyo? (Kini nga panaghisgutan makatabang sa mga estudyante nga mahibalo sa baruganan nga ang mga sumusunod ni Jesukristo makagamit sa moderno nga teknolohiya sa pagpakigbahin sa ilang pagpamatuod sa ebanghelyo ngadto sa mga tawo sa tibuok kalibutan.)

Pahinumdom: Samtang maghisgot ang klase sa mga kapanguhaan sa misyonaryo diha sa internet, ikonsiderar ang paghisgot sa mormon.org, nga gidesinyo ug gisulat aron makaabut ngadto sa mga dili miyembro. Ang site usa ka maayo kaayo nga kapanguhaan alang sa mga investigator. Naglangkob kini og mga tubag sa mga pangutana nga kanunayng gipangutana, ug ang mga sulod [content] niini gipahiangay sa mga leksyon sa Isangyaw ang Akong Ebanghelyo. Angmormon.org nag-feature usab sa liboan ka mga profile nga gi-post sa mga miyembro sa Simbahan sa tibuok kalibutan Mahimo nimong awhagon ang mga sakop sa klase sa paghimo og kaugalingon nilang mga profile, diin mapakigbahin nila ang ilang mga pagbati kalabut sa ebanghelyo.

I-display ang mosunod nga mga sumbanan gikan sa LDS.org, dapita ang usa ka estudyante sa pagbasa og kusog sa unang paragraph. Dayon tawaga ang ubang estudyante sa pagbasa og kusog sa lista sa mga sumbanan alang sa paggamit sa social media. Hangyoa ang klase sa pagpangita og mga paagi nga kini nga impormasyon makatabang kanila nga mahimong mas maayo sa pagpakigbahin sa ebanghelyo diha sa internet.

“Ang social media mahimong usa ka gamhanang impluwensya diha sa kinabuhi niadtong naggamit niini. Makahatag kini og mga paagi sa pagpahayag sa atong hugot nga pagtuo diha ni Jesukristo ug makapalig-on og mga relasyon. Ang Simbahan nag-awhag sa paggamit sa social media kon kini mosuporta sa misyon sa Simbahan, mopalambo og mga relasyon, ug mopadangat sa pagpadayag ngadto sa mga anak sa atong Langitnong Amahan. Ang mga miyembro sa Simbahan giawhag nga mahimong mga ehemplo sa ilang hugot nga pagtuo sa tanang higayon ug sa tanang dapit, lakip na kon moapil sa tibuok kalibutan nga panaghisgot nga anaa pinaagi sa social media. …

“Ang mosunod mao ang mga sugyot alang sa paggamit sa social media diha sa atong personal nga kinabuhi: …

“Magmatinahuron sa inyong mga inter-aksyon ngadto sa uban diha sa internet. Gitakda sa mga pagtulun-an sa mga Santos sa Ulahing mga Adlaw nga ang mga miyembro motratar sa uban pinaagi sa pagtahud, bisan unsa pa ang sitwasyon.

“Ipahayag ang inyong personal nga pagsaksi sa gipahiuli nga ebanghelyo, kon giniyahan sa Espiritu. Ang ingon nga mga mensahe kinahanglang personal; ayaw pagbilin og impresyon sa mga tawo nga namulong kamo alang sa Simbahan, ug ayaw pag-organisar og mga pundok nga makahatag og impresyon nga opisyal kining nagrepresentar o gipasiugdahan sa Simbahan.

“Kanunay nga magmahimong ehemplo sa usa ka sumusunod ni Kristo sa inyong mga inter-aksyon ngadto sa uban diha sa social media. Ang inyong positibong ehemplo makaimpluwensya niadtong inyong makauban. Mas maalamon nga mohunong sa pagpakig-uban niadtong kanunay nga modaut sa uban ug ilabi na niadtong mo-post og dili angay nga materyal. …

“Gamiton ang maayong paghukom kon mag-post sa usa ka social media nga site. Walay ‘delete’ nga button diha sa Internet. Ang mga hulagway ug mga post mahimong magpabilin sulod sa daghang katuigan ug mahimong makadaut kon mangita mo og trabaho o aron madawat sa kolehiyo, ingon man usab sa laing mga higayon diin ang inyong public Internet record mahimong matan-aw. Siguroa nga ang inyong mga komunikasyon mahiangay sa inyong pasalig [commitment] sa pagdala diha kaninyo sa ngalan sa Manluluwas” (“Social Media Helps for Members [Mga Tabang alang sa mga Miyembro kalabut sa Social Media],” LDS.org).

Hangyoa ang mga estudyante sa pagpakigbahin sa ilang mga hunahuna ngadto sa klase kalabut kon ngano nga ang mga sugyot diha niini nga lista importante man nga ilang mahinumduman samtang mopakigbahin sila sa ebanghelyo diha sa internet.

Kon duna pay igong panahon, ikonsiderar ang paghangyo sa usa ka estudyante nga ipakita ngadto sa klase kon unsaon sa pagpakigbahin sa mga video o ubang mga materyal diha sa LDS.org o mormon.org gamit ang social media. Mahimo nimong hangyoon ang laing estudyante sa pagpakita kon unsaon paghimo og profile diha sa mormon.org.

Ikonsiderar ang pagpasalida sa video nga “Sharing Your Beliefs” (2:02) aron matabangan ang mga estudyante nga mobati nga masaligon sa ilang abilidad sa paggamit sa teknolohiya sa pagpakigbahin sa ilang mga pagbati ug pagpamatuod sa ebanghelyo. Sa dili pa ipasalida ang video, awhaga ang mga estudyante sa pagpangita sa potensyal nga impluwensya nga mahimo sa usa ka tawo pinaagi sa paggamit sa teknolohiya sa pagpakigbahin sa iyang mga pagbati mahitungod sa ebanghelyo.

Human mapasalida ang video, ipangutana:

• Sa unsang paagi nga ang teknolohiya makapalambo sa mga paningkamot sa mga miyembro kinsa nagtinguha nga mopakigbahin sa mensahe sa ebanghelyo?

Dapita ang mga estudyante sa paghulagway kon sa unsang paagi nila magamit ang teknolohiya sa pagpakigbahin sa ilang pagpamatuod ngadto sa uban. Tapusa pinaagi sa pagpakigbahin sa imong pagpamatuod mahitungod sa mga doktrina ug mga baruganan nga gitudlo diha sa leksyon.

Mga Pagdapit aron Molihok

Tabangi ang mga estudyante nga makasugod karon sa pagpangita og mga tawo nga maminaw sa mensahe sa ebanghelyo pinaagi sa pagkompleto sa usa o dugang pa sa mosunod nga gisugyot nga mga kalihokan:

• Kompletuha ang mga item nga inyong gilista panahon sa pagsulat sa assignment niini nga leksyon aron sa pagpangita og mga tawo nga katudloan sa mga misyonaryo.

• Ribyuha ang lista sa pagkontak diha sa inyong cell phone ug pangita og dili kaayo aktibo nga miyembro o dili miyembro. Tawagi o i-text kana nga tawo ug dapita siya nga mouban ninyo sa simbahan karong Dominggo.

• I-explore ang mormon.org nga website ug i-explore ang mga kapanguhaan sa site, sama sa mga video, mga artikulo, ug mga profile nga gi-post sa mga miyembro sa Simbahan. Ipakigbahin ngadto sa uban ang usa ka video, artikulo, o laing page gamit ang social media.

• Paghimo og kaugalingon ninyong profile diha sa mormon.org. Ipakigbahin ngadto sa uban ang inyong profile gamit ang social media.

• Ipakigbahin ang usa ka Mormon Messages nga video ug ang inyong mga pagbati mahitungod niini gamit ang social media.