4

Pagtudlo pinaagi sa Espiritu

Pasiuna

Ang malampuson nga mga misyonaryo nakasabut nga “kon ang tawo mamulong pinaagi sa gahum sa Espiritu Santo ang gahum sa Espiritu Santo modala niini ngadto sa mga kasingkasing sa katawhan” (2 Nephi 33:1). Kon sila lang, ang mga misyonaryo dili makadala sa mga panalangin sa pagpamatuod ug pagkakabig ngadto sa laing tawo, bisan unsa pa man sila ka eksperto o ka eksperyensyado. Ang Espiritu Santo lang ang makadala sa tinuod nga pagkakabig. Kon ang mga investigator mobati sa Espiritu nga naglihok diha kanila, o kon makakita sila og ebidensya sa gugma ug kalooy sa Ginoo diha sa ilang kinabuhi, malig-on sila sa espirituhanong paagi, ang ilang pagtuo molambo, ug malagmit nga makabig sila.

Advance nga Pagpangandam

• Tun-i ang Doktrina ug mga Pakigsaad 42:14; 50:12–14, 17–23.

• Tun-i ang mosunod aron makita ang ubang mga paagi diin ang Espiritu Santo makaimpluwensya sa mga magtutudlo ug mga tigkat-on sa ebanghelyo: Lucas 12:12; Juan 14:26; 1 Nephi 2:16; 2 Nephi 33:1; Alma 18:16; Moroni 10:5; ug Doktrina ug mga Pakigsaad 6:14–15, 23.

• Tun-i ang Isangyaw ang Akong Ebanghelyo, mga pahina 108–109, 214–17, ug 221–27.

• Pag-andam aron ipasalida ang video nga “A Man without Eloquence” (6:06), nga anaa sa LDS.org.

• Pag-andam aron ipasalida ang video nga “Teach People, Not Lessons: Jynx” (6:34), The District 2, nga anaa sa youtube.com.

• Pag-andam aron ipasalida ang video nga “Teaching about the Holy Ghost and Prayer: John” (5:00), The District 2, nga anaa sa LDS.org.

Mga Sugyot alang sa Pagtudlo

Pagtudlo pinaagi sa Espiritu

Pasabta ang mga estudyante nga kausa si Presidente Brigham Young namulong mahitungod sa iyang pagkakabig sa ebanghelyo ug sa misyonaryo nga mitabang kaniya aron makaangkon og pagpamatuod. Dayon ipasalida ang video nga “A Man without Eloquence” (6:06). Hangyoa ang mga estudyante sa pagpaminaw kon sa unsang paagi nga ang Espiritu nakaimpluwensya ni Presidente Brigham Young ug nakatabang niya aron makabig.

Human matan-aw ang video, ipangutana ang mosunod:

• Sa unsang paagi nga ang pagpaminaw sa mapaubsanong tawo nga mihatag sa iyang pagpamatuod nakatabang ni Brigham Young nga tinuod nga nakabig?

• Gikan sa kasinatian ni Brigham Young, unsa nga mga baruganan ang inyong nakat-unan mahitungod sa pagtudlo pinaagi sa Espiritu? (Ang mga estudyante mahimong mahibalo niining mga baruganan: Ang pagtudlo pinaagi sa Espiritu mahimong moresulta sa pagkakabig sa uban; kon magtudlo kita pinaagi sa Espiritu, kinahanglan gayud nga sinsero kita ug mamulong gikan sa kasingkasing; kinahanglan gayud nga magmapaubsanon kita [tan-awa sa D&P 136:33].)

Hatagi og panahon ang mga estudyante nga makatuon sa Doktrina ug mga Pakigsaad 42:14; 50:13–14 ug 17–23, nga mangita sa mga instruksyon sa Ginoo ngadto niadtong motudlo sa Iyang ebanghelyo. Dayon ipangutana:

• Unsa nga mga baruganan sa pagtudlo sa ebanghelyo ang gihatag niini nga mga pinadayag? (Dunay pipila ka hustong mga tubag nga mahimong mahatag sa mga estudyante. Ang mga tubag mahimong maglakip sa mosunod nga baruganan: Ang Ginoo misugo nga ang ebanghelyo kinahanglang itudlo pinaagi sa Espiritu ug wala nay lain pang paagi.)

• Sumala sa Doktrina ug mga Pakigsaad 50:22, unsay mahitabo kon ang usa ka misyonaryo magtudlo pinaagi sa Espiritu? (Ang misyonaryo ug ang investigator “[ma]kasabut sa usag usa, ug ang duha makadawat og kaayohan ug maglipay nga maghiusa.” Iklaro ngadto sa mga estudyante nga ang pagtudlo pinaagi sa Espiritu mahitabo lamang kon ang Espiritu Santo anaa ug bation sa magtutudlo, sa tigkat-on, o sa duha. Ikonsiderar ang pagsulat sa pisara niini nga baruganan.)

Pahinumdumi ang mga estudyante nga ang presensya sa Espiritu dili kanunayng makita pinaagi sa emosyon ug sa mga luha. Kon gikinahanglan, basaha ngadto sa klase ang mosunod gikan ni Presidente Howard W. Hunter:

“Mohatag ko og pasidaan kalabut niini nga hilisgutan. … Nabalaka ako usahay nga ingon og ang hilabihan nga emosyon o ang paghilak gipahisama sa presensya sa Espiritu Tinuod ang Espiritu sa Ginoo makahatag og hilabihang emosyonal nga mga pagbati, lakip na ang paghilak, pero kanang dayag nga timailhan kinahanglang dili ikalibog sa presensya mismo sa Espiritu.

“Naka-obserbar ako sa akong daghang mga kaigsoonan sa milabay nga mga katuigan ug giambitan namo ang talagsaon ug dili mahulagway nga espirituhanong mga kasinatian. Kadtong tanang mga kasinatian managlahi, espesyal ang matag usa sa iyang kaugalingong paagi, ug ang maong sagradong mga higayon mahimong inubanan o dili sa mga luha. Sa kasagaran mao gayud na, pero usahay kini inubanan og tumang kahilom. Sa ubang higayon inubanan kini og kalipay. Kini sa kanunay inubanan og pagpakita sa kamatuoran, sa pagpadayag ngadto sa kasingkasing” (“Eternal Investments” [pakigpulong ngadto sa mga religious educator sa Church Educational System, Peb. 10, 1989], 3; si.lds.org).

Aron matabangan ang mga estudyante nga makasabut kon sa unsang paagi nga ang Espiritu Santo makaimpluwensya sa mga magtutudlo ug mga tigkat-on, isulat sa pisara ang mosunod nga mga scripture reference, o iapud-apod kini ngadto nila diha sa usa ka handout. (Pahinumdom: ihatag sa mga estudyante ang mga reference lamang; ang materyal nga anaa sa parentheses alang lamang sa kaayohan sa magtutudlo):

• Lucas 12:12 (motudlo kon unsay isulti)

• Juan 14:26 (mopahiumdom sa mga butang)

• 1 Nephi 2:16 (motandog sa kasingkasing)

• 2 Nephi 33:1 (modala sa mga kamatuoran ngadto sa kasingkasing)

• Alma 18:16 (motabang sa pag-ila sa hunahuna sa uban)

• Moroni 10:5 (mohatag og pagsaksi mahitungod sa tanang kamatuoran)

• Doktrina ug mga Pakigsaad 6:14–15, 23 (modan-ag sa hunahuna, mohatag og kalipay ug kalinaw)

Magtrabaho nga magpares. Ang magtrabaho nga magpares makatugot sa matag estudyante sa pag-apil sa usa ka kalihokan, ug makahatag kini og luwas nga kahimtang diin ang mga estudyante makatudlo sa usag usa ug makahimo sa pagpakigbahin sa ilang mga pagbati, mga hunahuna, ug mga pagpamatuod.

Awhaga ang mga estudyante sa pagtuon niining mga tudling sa kasulatan nga magpares. Ipapangita sa usa ka estudyante sa matag pares ang mga paagi diin ang Espiritu Santo makaimpluwensya sa magtutudlo sa ebanghelyo samtang ang laing estudyante mangita sa mga paagi diin ang Espiritu Santo makaimpluwensya sa usa ka tawo nga gitudloan. Dayon pahisguti sa usag usa kon unsay ilang nakat-unan. Human nga ang matag pares dunay igong panahon nga maghisgot kon unsay ilang nakat-unan, ipangutana ang sama sa mosunod aron matabangan sila nga makaanalisar pa og dugang sa unsay ilang gibasa:

• Sumala sa mga bersikulo nga inyong natun-an, unsa ang ubang mga paagi diin ang Espiritu makaimpluwensya niadtong inyong tudloan? (Samtang motubag ang mga estudyante, mahimo kang mangutana kanila kon asa nga mga tudling sa kasulatan nila nakit-an ang ilang mga tubag.)

• Sa unsang paagi nga ang Espiritu makaimpluwensya sa uban nga makabig sa ebanghelyo ni Jesukristo?

• Sa unsang paagi nga kining mga tudling nagpakita nganong importante alang sa mga misyonaryo nga magtudlo pinaagi sa Espiritu?

Magdapit sa Espiritu samtang Ikaw Magtudlo

Sultihi ang imong klase nga ang Isangyaw ang Akong Ebanghelyo adunay pipila ka mga seksyon nga nagpasabut kon unsay mabuhat sa mga misyonaryo aron madapit ang giya sa Espiritu samtang magtudlo sila. Bahina ang imong klase ngadto sa ginagmayng mga grupo nga dili mosobra sa upat ka estudyante sa matag grupo. I-assign ang matag grupo nga tun-an ang usa sa mosunod nga mga seksyon sa Isangyaw ang Akong Ebanghelyo:

1. “Unsaon Pagsugod sa Pagtudlo,” mga pahina 214–16 (dili iapil ang box sa Kalihokan)

2. “Ipahiangay ang Inyong Pagtudlo aron Matubag ang mga Panginahanglan,” mga pahina 216–17 (dili iapil ang mga box sa Kalihokan ug Pagtuon sa Kasulatan)

3. “Pagtudlo alang sa Pagsabut,” mga pahina 221–22 (dili iapil ang box sa Pagtuon sa Kasulatan)

4. “Paminaw,” mga pahina 225–26 (dili iapil ang box sa Kalihokan)

Isulat sa pisara ang mosunod nga mga instruksyon aron mahibalo ang mga grupo kon unsay angay nilang buhaton:

Basaha ang inyong seksyon sa Isangyaw ang Akong Ebanghelyo.

Hisguti diha sa inyong mga grupo kon unsa nga mga baruganan ang inyong nabasahan nga makatugot sa mga misyonaryo nga mahimong mas epektibo nga mga magtutudlo ug aron magauban kanila ang Espiritu samtang magtudlo sila.

Human sa igong panahon, hangyoa ang usa ka estudyante sa matag grupo sa pag-summarize kon sa unsang paagi nga ang kahanas nga ilang nabasahan makatampo sa abilidad sa misyonaryo nga motudlo uban sa Espiritu Santo. I-assign ang usa ka estudyante sa pag-summarize sa importante nga mga punto diha sa pisara. Samtang ang mga grupo nag-summarize sa ilang mga ideya, ikonsiderar ang pagpangutana sama sa mosunod:

• Sa unsa kaha nga paagi nga ang hustong pagsugod sa leksyon makadapit sa Espiritu Santo nga magauban sa pagtudlo sa leksyon?

• Sa unsa kaha nga paagi nga ang pagpabiling yano sa mensahe sa ebanghelyo makadapit sa Espiritu Santo sa pagtudlo ug sa paglig-on sa investigator?

• Sa unsang paagi nga ang pagpabilin sa leksyon nga naka-focus sa mga panginahanglan sa investigator makadapit sa Espiritu Santo?

• Sa unsang paagi nga ang pagpaminaw sa unsay isulti sa investigator makatampo sa abilidad sa misyonaryo nga magtudlo pinaagi sa Espiritu?

“Pangitaa ang.” Ang mga magtutudlo makapalambo sa pagkaepektibo sa mga tudling sa kasulatan, mga video presentation, ug mga kinutlo pinaagi sa paghatag daan og instruksyon sa mga estudyante kon unsay kinahanglan nilang pangitaon samtang nanan-aw o nagbasa sila. Mahimo kining buhaton sa mga magtutudlo pinaagi sa pagsulat sa pisara sa piho nga mga butang nga pangitaon sa mga estudyante o mga pangutana nga ikonsiderar. Mopadako kini sa kalagmitan nga ang mga estudyante mahibalo ug makakat-on sa dunay kalabutan ug importante nga mga punto.

Aron matabangan ang mga estudyante nga makakita kon unsa ang pipila ka mga kahanas sa pagtudlo nga anaa sa ibabaw, ipasalida ang video nga “Teach People, Not Lessons: Jynx” (6:34). Awhaga ang mga estudyante sa pagpangita og ebidensya nga ang mga misyonaryo nagtudlo pinaagi sa Espiritu. Ag mga estudyante mahimong piho nga motan-aw aron makakita kon giunsa paggamit sa mga misyonaryo ang mga kahanas nga gitun-an sa klase diha sa Isangyaw ang Akong Ebanghelyo ug sa unsang paagi nga ang paggamit niining mga kahanas nakadapit sa Espiritu ngadto sa pagtudlo sa mga misyonaryo.

Human matan-aw ang video, hisguti ang mosunod:

• Unsay gibuhat sa mga misyonaryo diha sa ilang pagtudlo nga nakatugot kanila nga magtudlo pinaagi sa Espiritu?

• Unsa nga ebidensya ang inyong nakita nga si Jynx nakakat-on pinaagi sa Espiritu?

Sa dili pa magpadayon, hatagi og panahon ang mga estudyante nga isulat ang tubag sa mosunod nga pangutana:

• Unsaon man ninyo sa paggamit ang mga baruganan nga atong nahisgutan niini nga leksyon?

Pagtabang sa mga investigator nga Makaila sa Espiritu

Hangyoa ang pipila ka estudyante nga magpuli-puli sa pagbasa og kusog sa seksyon nga “Ang Gahum sa Espiritu diha sa Pagkabig” diha sa mga pahina 108–109 sa Isangyaw ang Akong Ebanghelyo (dili iapil ang mga box sa Kalihokan ug Pagtuon sa Kasulatan). Pasunda ang klase ug pamarkahi ang mga pulong nga naghulagway kon unsay kinahanglang bation sa investigator aron mahitabo ang pagkakabig. Dayon ipangutana:

• Unsay kinahanglang bation sa mga investigator aron mahitabo ang pagkakabig? (Siguroa nga ang mga estudyante mahibalo sa mosunod nga baruganan: Kon mobati ang mga investigator sa Espiritu nga naglihok diha kanila, malagmit nga makabig sila sa ebanghelyo ni Jesukristo.)

• Sa unsa nga paagi nga makaingon mo nga ang investigator mibati sa impluwensya sa Espiritu Santo? (Posible nga mga tubag: ang misyonaryo mibati sa Espiritu Santo; ang investigator komportable sa pagpangutana, gusto pang makakat-on og dugang, ug andam nga mohimo ug motuman sa mga commitment; dunay pagsinabtanay, usa ka pagbati sa kalipay, ug kasuod ngadto sa Dios; ug dunay mas malambuong panaghigalaay tali sa misyonaryo ug sa investigator.)

• Si Elder M. Russell Ballard nagtudlo, “Ang mga kasinatian uban sa Espiritu mosunod gayud kon ang usa ka tawo andam nga mosulay sa pagsusi sa pulong” (“Now Is the Time,” Ensign, Nob. 2000, 75). Unsa man ang mabuhat sa usa ka misyonaryo aron madasig ang mga investigator sa pag-eksperimento sa pulong?

Pasabta ang mga estudyante nga usa sa ilang labing mahagiton nga tahas isip mga misyonaryo mao ang pagtabang sa mga investigator sa pag-ila sa mga pag-aghat sa Espiritu Santo ug dayon pagtabang kanila nga molihok base niadtong mga hunahuna ug mga pagbati. Pinaagi sa pagdasig sa Espiritu Santo, ang mga misyonaryo masayud kon unsay espirituhanong mga pag-aghat nga kinahanglang madawat sa investigator aron makabig, ug makapahigayon sila og kahimtang kon asa mahitabo kana nga mga pag-aghat.

Sa pagpakita kon sa unsang paagi kini mabuhat, ipasalida ang video nga “Teaching about the Holy Ghost and Prayer: John” (5:00). Dapita ang klase sa pagpangita kon giunsa sa pagtabang sa mga misyonaryo si John nga makakat-on sa pag-ila sa Espiritu.

Human sa video, ipangutana ang mosunod:

• Giunsa sa pagtabang sa mga misyonaryo si John nga makaila sa Espiritu?

• Unsay gibuhat sa mga misyonaryo aron matabangan si John nga mahibalo kon unsaon aron makadawat og mga tubag gikan sa Ginoo?

Dapita ang mga estudyante sa pagbasa sa Doktrina ug mga Pakigsaad 11:12, ug pahisguti nila ang mosunod nga pangutana nga magpares:

• Kon nangutana ninyo ang investigator unsay bation kon anaa ang Espiritu Santo, sa unsang paagi nga ang Doktrina ug mga Pakigsaad 11:12 makatabang kaninyo sa pagtubag?

Paglihok base sa mga Pag-aghat sa Espiritu

I-display ang mosunod, ug ipabasa kini og kusog sa usa ka estudyante:

“Ang komunikasyon uban sa atong Amahan sa Langit dili tiawtiaw nga butang. Sagrado kini nga pribilehiyo. Gibase kini sa mahangturon, walay kausabang mga baruganan. Madawat nato ang tabang gikan sa atong Amahan sa Langit agig tubag sa atong hugot nga pagtuo, pagkamasulundon, ug sa hustong paggamit sa kabubut-on” (Richard G. Scott, “Unsaon Pag-angkon og Pagpadayag ug Inspirasyon alang sa Inyong Personal nga Kinabuhi,” Ensign o Liahona, Mayo 2012, 47).

Dayon ipangutana:

• Sa unsang mga paagi nga ang atong komunikasyon sa Langitnong Amahan mahimong tiawtiaw? Unsa man ang atong mabuhat aron mapabiling mas makahuluganon ang atong mga pag-ampo?

• Unsa may kahulugan niini nganha kaninyo nga “madawat nato ang tabang gikan sa atong Amahan sa Langit agig tubag sa atong hugot nga pagtuo, pagkamasulundon, ug sa hustong paggamit sa kabubut-on”? (Bisan kon mogamit sila og lain-laing mga pulong, ang mga estudyante malagmit motubag og susama sa mosunod: Madawat nato ang tabang gikan sa atong Amahan sa Langit kon mo-focus kita sa pagpalambo sa atong pagtuo, pagkamasulundon, ug sa hustong paggamit sa kabubut-on. Isulat sa pisara kini nga baruganan.)

Aron matabangan nga mapalambo ang panabut sa estudyante mahitungod niini nga baruganan, i-display ang mosunod nga duha ka kinutlo ni Presidente Boyd K. Packer sa Kroum sa Napulog Duha ka mga Apostoles, ug ipabasa kini og kusog sa usa ka estudyante ngadto sa klase:

““Kini nga tingog sa Espiritu malumo nga mamulong, mag-aghat kanimo unsay buhaton o unsay isulti, o kini mopasidaan o mopahimangno kanimo.

“Ibaliwala o supaka kini nga mga pag-aghat, ug ang Espiritu mobiya kanimo. Imo kanang pagpili—imong kabubut-on” (“Personal Revelation: The Gift, the Test, and the Promise,” Ensign, Nob. 1994, 60).

“Ang Espiritu dili mokuha sa atong atensyon pinaagi sa pagsinggit o pag-uyog kanato gamit ang bug-at nga kamot. Hinoon kini mohung-hong. Hinay kini nga mohapuhap nga kon kita bisi kaayo mahimong dili gayud nato mabati kini. …

“Usahay moduso lang kini nga igo kitang makapatalinghug. Apan kasagaran, kon dili kita mopatalinghug sa malumo nga pagbati, ang Espiritu mobiya ug maghulat hangtud nga kita mangita ug maminaw ” (“The Candle of the Lord,” Ensign, Ene. 1983, 53).

• Unsay inyong nakat-unan gikan niining mga pagtulun-an ni Presidente Packer?

• Kay ang Espiritu Santo mamulong man sa malumong paagi, unsa nga matang sa mga butang ang makapalisud aron madungog o mailhan ang Espiritu sa kalibutan karon?

Samtang motubag ang mga estudyante, ikonsiderar ang paghisgot kon sa unsang paagi nga ang sobra nga paggamit sa mga electronic device makapalisud aron mailhan ang Espiritu. (Alang sa dugang pa mahitungod niini nga hilisgutan, tan-awa sa Elder M. Russell Ballard, “Be Still, and Know That I Am God” [debosyonal alang sa mga young adult sa Church Educational System, Mayo 4, 2014].)

Sunod, ikonsiderar ang pagbasa sa mosunod nga pamahayag gikan ni Elder Richard G. Scott sa Korum sa Napulog Duha ka mga Apostoles:

“Ang pagkamapainubsanon gikinahanglan aron makaangkon og espirituhanong kahibalo. Ang magpaubos mao ang pagkahimong matudloan. Ang pagkamapainubsanon motugot kanimo nga matudloan pinaagi sa Espiritu ug matudloan gikan sa mga tinubdan nga dinasig sa Ginoo, sama sa mga kasulatan. Ang binhi sa personal nga pag-uswag ug pagsabut motubo ug molambo pinaagi sa pagkamapainubsanon. Ang bunga niini mao ang espirituhanong kahibalo nga mogiya kaninyo dinhi ug sa sunod nga kinabuhi.

“Ang mapasigarbuhon nga indibidwal dili masayud sa mga butang sa Espiritu. Gitudlo ni Pablo kini nga kamatuoran, nga nag-ingon:

““‘Walay bisan usa nga makasabut sa mga hunahuna sa Dios, gawas sa Espiritu sa Dios. …

“‘Ang tawo nga kalibutanon dili magadawat sa mga igatudlo sa Espiritu sa Dios: kay alang kaniya kini mga binuang: ug siya dili arang makasabut niini, tungod kay kini ugod kinahanglan mang pagatugkaron sa espirituhanon nga paagi’ (1 Cor. 2:11, 14)” (“Acquiring Spiritual Knowledge,” Ensign, Nob. 1993, 87).

• Unsa may tahas sa pagkamapaubsanon diha sa atong abilidad sa pagdawat ug pag-ila sa mga pag-aghat sa Espiritu?

• Kamo aduna bay mga kasinatian sa dihang gigiyahan kamo sa Espiritu? Unsay inyong gibati? Giunsa ninyo pagkasayud nga ang Espiritu kadto? (Tan-awa sa Moroni 7:13.)

Kon itugot sa panahon, tungaa ang imong klase. Ipasabut ngadto sa imong mga estudyante nga mangita sila sa duha ka case study diha sa kasulatan aron makita kon giunsa paggiya sa Espiritu sa Ginoo ang buhat sa Iyang mga sulugoon. Ipabasa sa katunga sa klase ang Mga Buhat 4:5–13. Sultihi kining katunga sa klase nga diha sa Mga Buhat 3, giayo nila ni Pedro ug Juan ang usa ka tawo. Sa Mga Buhat 4, gidakop sila ug gidala sa atubangan sa mga lider sa mga Judeo aron masukit-sukit mahitungod sa pagpang-ayo. Ipabasa sa laing katunga sa klase ang Mga Buhat 16:6–15. Sultihi kining katunga sa klase nga kining mga bersikulo naghisgot mahitungod ni Pablo atol sa usa sa iyang misyonaryo nga mga panaw. I-assign ang duha ka grupo sa klase sa pagpangita kon giunsa sa pagtabang sa Espiritu Santo si Pedro o si Pablo nga masangyaw ang ebanghelyo. Human sa igong panahon, hangyoa ang mga estudyante sa pagreport kon giunsa paggiya sa Espiritu Santo sila ni Pedro ug Pablo. Dayon ipangutana:

• Giunsa man paggamit nila ni Pedro ug Pablo ang ilang kabubut-on aron mosunod sa pagmando gikan sa Espiritu?

• Unsay anaa nga mga ebidensya nga gisunod nila ni Pedro ug Pablo ang Espiritu?

• Unsay piho nga nahitabo ngadto ni Pedro diha sa Mga Buhat 4 ug ngadto ni Pablo diha sa Mga Buhat 16 tungod kay ang matag usa kanila misunod sa pagmando sa Espiritu?

• Sa unsang paagi nga kamo napanalanginan pinaagi sa pagsunod sa pagmando sa Espiritu Santo?

Mga pagpamatuod sa mga estudyante. Mas masabtan sa mga estudyante kon unsaon paggamit ang mga baruganan sa ebanghelyo ug mobati nga mas madasigon sa paggamit niini sa ilang kinabuhi kon ilang madungog ang magtutudlo ug ang ubang mga estudyante nga mopamatuod mahitungod sa kabililhon niana nga mga baruganan. Ang mga magtutudlo makaawhag sa mga estudyante nga mopamatuod sa mga kamatuoran sa ebanghelyo pinaagi sa pagpangutana og mga pangutana nga makadapit kanila sa pagpakigbahin sa ilang mga kasinatian ug mga gituohan.

Tapusa pinaagi sa pagdapit sa mga estudyante sa pagpamatuod kon giunsa sila sa pagpanalangin sa Ginoo pinaagi sa Iyang Espiritu. Hangyoa sila sa pagkonsiderar kon sa unsang paagi nga ang pagkat-on og dugang mahitungod sa pagtudlo pinaagi sa Espiritu nakaapekto sa ilang tinguha nga modapit sa uban ngadto kang Kristo. Pasaligi sila nga samtang magtinguha sila sa Espiritu diha sa ilang kinabuhi, mapalambo nila ang ilang abilidad sa pagtudlo pinaagi sa Espiritu.

Mga Pagdapit aron Molihok

Dapita ang mga estudyante nga mangandam sa pagtudlo sa ebanghelyo pinaagi sa Espiritu pinaagi sa pagkompleto sa usa o dugang pa sa mosunod nga mga kalihokan:

• Tan-awa ang ubang mga episode sa The District (nga makita diha sa LDS.org) samtang mangandam kamo sa pagserbisyo og misyon.

• Praktisa ang lain-laing paagi nga sugdan ang pagtudlo og leksyon gamit ang pipila sa mga pulong nga kusganong makadapit sa Espiritu diha sa Isangyaw ang Akong Ebanghelyo, mga pahina 214–16.

• Pamalandunga ug iampo ang sa usa ka tawo nga gusto ninyong palig-unon diha sa ebanghelyo. Iampo ang mahitungod sa usa ka mensahe sa ebanghelyo nga inyong mapakigbahin niini nga tawo. Ipakigbahin ang mensahe ug ang inyong pagpamatuod ngadto sa tawo, sa personal man o sa social media.