Pag-andam alang sa Kinabuhi isip usa ka Misyonaryo

Pasiuna

Ang pagserbisyo og misyon mao ang pagdawat og tawag nga morepresentar ni Ginoong Jesukristo. Ang pagmisyon usa ka maanindot nga kasinatian, apan naglakip usab kini sa pagkugi og maayo. Aron mahimong epektibo nga mga misyonaryo, ang batan-ong mga lalaki ug batan-ong mga babaye kinahanglan gayud nga mangandam nga mosalig sa Ginoo kon mag-atubang sila og mga hagit. Samtang ang umaabut nga mga misyonaryo mag-establisar og maayong mga gilauman sa kinabuhi sa misyon, mahimo silang mas andam nga moserbisyo sa tibuok nilang “kasingkasing, gahum, hunahuna, ug kusog” (D&P 4:2).

Advance nga Pagpangandam

Tun-i ang 2 Nephi 4:19–26 ug Alma 17:2–3, 9; 26:11–13; 29:10.
Tun-i ang pakigpulong ni Elder David A. Bednar, “Pagkahimong Usa Ka Misyonaryo,” Ensign o Liahona, Nobyembre 2005, 44–47.
Pag-andam aron ipasalida ang mga video nga “Pagkahimong Usa Ka Misyonaryo, Part 1” (2:26) ug “Pagkahimong Usa Ka Misyonaryo, Part 2” (1:01; mga video clip gikan sa pakigpulong ni Elder David A. Bednar, Ensign o Liahona, Nob. 2005, 44–47), nga anaa sa lds.org/media-library.
Pag-andam aron ipasalida ang video nga “Stay within the Lines” (5:10), nga anaa sa youth.lds.org.
Pag-andam aron ipasalida ang video nga “Preparation of Gordon B. Hinckley: Forget Yourself and Go to Work” (2:04), nga anaa sa LDS.org.
Andama ang handout nga giulohan og “Demands of Missionary Life [Mga Gikinahanglan sa Kinabuhi sa Misyonaryo],” nga makita diha sa katapusan sa leksyon.

Mga Sugyot alang sa Pagtudlo

Pagkahimong usa ka Misyonaryo

Sugdi ang leksyon pinaagi sa pagpangutana sa klase niini:

Sa unsang mga paagi nga inyong malauman nga mausab ang inyong kinabuhi kon magsugod na mo sa inyong pagserbisyo isip usa ka misyonaryo?
Unsa may inyong masugdan og buhat karon aron maandam alang niana nga mga kausaban sa paagi sa pagpakabuhi?

I-display ug dapita ang usa ka estudyante sa pagbasa sa mosunod nga pamahayag ni Elder David A. Bednar sa Korum sa Napulog Duha Apostoles, o ipasalida ang video clip mahitungod sa pamahayag. Ipasabut nga bisan tuod nga si Elder Bednar namulong ngadto sa batan-ong mga lalaki sa sesyon sa priesthood sa kinatibuk-ang komperensya, ang mga baruganan nga iyang gitudlo magamit usab sa batan-ong mga babaye.

“Sa mga miting nga kauban sa mga kabatan-onan sa Simbahan libut sa kalibutan, kanunay nakong giawhag ang mga manambong sa pagpangutana. Usa sa mga pangutana nga kanunay akong pangutan-on sa mga batan-ong lalaki mao kini: ‘Unsay akong buhaton aron makapangandam og maayo sa pagserbisyo isip usa ka full-time nga misyonaryo?’ Ang maong matinud-anong pangutana kinahanglan may seryuso nga tubag.

“Mga minahal kong kabatan-onan, ang bugtong nga labing importanting butang nga inyong mahimo sa pagpangandam alang sa usa ka tawag aron sa pagserbisyo mao ang pagkahimong usa ka misyonaryo sa dili pa nga kamo moadto sa usa ka misyon. Palihug tutuki nga sa akong tubag akong gihatagan og gibug-aton ang pagkahimong kay sa moadto. Tuguti ako sa pagpasabut unsay kahulugan.

“Sa atong naandan nga sinultian sa Simbahan, sa kanunay moingon kita nga moadto sa simbahan, moadto sa templo, ug moadto sa usa ka misyon. Tuguti nga maisugon akong moingon nga kining atong ingon sa kanunayng giklaro nga moadto wala makaigo sa tumong.

“Ang isyu dili kay moadto sa simbahan; kondili, ang isyu mao ang pag-ampo ug pagbag-o sa mga pakigsaad sa atong pagtambong sa simbahan. Ang isyu dili nga moadto o nakaadto sa templo; kondili, ang isyu mao nga anaa sa atong mga kasingkasing ang espiritu, ang mga pakigsaad, ug ang mga ordinansa diha sa balay sa Ginoo. Ang isyu dili nga moadto sa usa ka misyon; kondili ang isyu mao ang pagkahimong usa ka misyonaryo ug pagserbisyo sulod sa atong tibuok kinabuhi sa bug-os natong kasingkasing, gahum, hunahuna, ug kusog. Mahimo nga ang usa ka batan-on moadto sa usa ka misyon ug walay pagkahimong usa ka misyonaryo, ug dili kini mao ang gikinahanglan sa Ginoo o unsay gusto sa Simbahan.

“Ang akong tinuod nga pangandoy alang sa matag usa ninyong mga batan-ong lalaki mao nga dili lang unta nga moadto og usa ka misyon—kondili nga kamo mamahimong mga misyonaryo sa dili pa kamo mosumiter sa inyong mga papeles sa pagmisyon, nga dugay na sa dili pa ninyo madawat ang tawag sa pagserbisyo, nga dugay na sa dili pa kamo ma-set apart sa inyong stake president, ug sa dili pa kamo mosulod sa MTC” (“Pagkahimong Usa Ka Misyonaryo,” Ensign o Liahona, Nob. 2005, 45).

Unsay gisulti ni Elder Bednar nga labing importante nga butang nga inyong mabuhat aron maandam alang sa tawag nga moserbisyo og misyon? (Mahimong usa ka misyonaryo bisan sa dili pa kamo moadto sa misyon.)

Ipabasa sa usa ka estudyante ang sunod nga bahin sa kinutlo ni Elder Bednar, o ipasalida ang video clip mahitungod sa pamahayag:

“Klaro, nga ang proseso sa pagkahimo nga misyonaryo wala magkinahanglan nga ang batan-ong lalaki magsul-ob og puti nga polo ug kurbata kada adlaw sa tulunghaan o pagsunod sa mga giya sa misyonaryo sa dayong katulog ug pagbangon, bisan tuod kadaghanan sa ginikanan mouyon niini nga ideya. Apan mahimo nimong palamboon ang imong tinguha sa pag-alagad sa Dios [tan-awa sa D&P 4:3], ug mahimo nimong sugdan sa paghunahuna ingon sa hunahuna sa mga misyonaryo, sa pagbasa sa gitun-an sa mga misyonaryo, sa pag-ampo sama sa inampoan sa mga misyonaryo, ug nga mobati sama sa bation sa mga misyonaryo. Malikayan ninyo ang mga butang nga kalibutanon nga maoy makahimo sa Espiritu Santo sa pagbiya, ug makabaton ka’g pagsalig nga makaila ug pagtubag sa mga espirituhanong awhag. Lagda human sa usa ka lagda, diyutay dinhi ug diyutay didto, kamo sa hinayhinay mahimong misyonaryo nga inyong gipangandoy ug ang misyonaryo nga gilauman sa Manluluwas” (“Pagkahimong Usa Ka Misyonaryo,” 45–46).

Dayon ipangutana:

Sumala ni Elder Bednar, sa unsang mga paagi nga mahimo kamong misyonaryo sa dili pa kamo mosulod sa missionary training center?

Human makatubag ang mga estudyante, isulat sa pisara ang mosunod nga kamatuoran: Mahimo kong misyonaryo karon sa paagi sa akong paghunahuna, pagbati, ug paglihok. Sa pagpakita niini nga baruganan, hangyoa ang mga estudyante sa pagpakli ngadto sa Alma 17:2–3, 9, 11, ug ipasabut nga kining mga bersikulo naghulagway sa anak nga mga lalaki ni Mosiah, kinsa nagserbisyo og misyon ngadto sa mga Lamanite. Dapita ang usa ka estudyante sa pagbasa og kusog sa mga bersikulo samtang magsunod ang klase, nga mangita sa gibuhat sa anak nga mga lalaki ni Mosiah aron maandam sa pagtudlo uban sa gahum ug awtoridad. Dayon pangutan-a ang mga estudyante:

Unsa may gibuhat sa anak nga mga lalaki ni Mosiah aron maandam sa pagtudlo uban sa gahum ug awtoridad?
Sa unsang paagi nga ang umaabut nga mga misyonaryo makasunod sa ehemplo sa anak nga mga lalaki ni Mosiah samtang nangandam sila nga mahimong mga misyonaryo karon?

Ipapakli sa mga estudyate ngadto sa pahina 165–66 sa Isangyaw ang Akong Ebanghelyo, ug ipabasa og kusog sa usa ka estudyante ang ikatulo nga paragraph. Dayon ipangutana ang sama sa mosunod:

Sumala sa sulat kalabut sa missionary call, unsay gilauman nga ipahinungod sa mga misyonaryo ngadto sa Ginoo, ug unsay gilauman nga ilang biyaan?
Unsay mga ehemplo sa “personal nga mga kalihokan” nga gihangyo nga biyaan sa mga misyonaryo kon magsugod na sila sa ilang misyonaryo nga pagserbisyo?
Kanus-a man kamo napanalanginan pinaagi sa paghimo og mga sakripisyo aron makaserbisyo sa Dios?

Sunod, hatagi ang mga estudyante og pipila ka minutos sa pagpamalandong ug sa pagsulat sa mga tubag sa mosunod nga mga pangutana diha sa ilang mga study journal. Awhaga ang mga estudyante nga pihong mosulat sa unsay ilang gibati nga personal nga gisulti kanila sa Espiritu Santo. Dayon ipangutana:

Unsa ang pipila ka mga butang nga inyong mabuhat karon aron magsugod sa paghunahuna, pagbati, ug paglihok sama sa usa ka misyonaryo?
Sa unsang paagi kamo makaandam sa pagbiya sa personal nga mga kalihokan ug ipahinungod ang tanan ninyong panahon ug pagtagad sa pagserbisyo sa Ginoo?
Sa unsa kaha nga paagi nga ang pagbuhat niining mga butanga makatabang kaninyo nga maandam sa pagtudlo uban sa gahum ug awtoridad sama sa anak nga mga lalaki ni Mosiah?

Awhaga ang mga estudyante sa pagsulat sa piho nga mga tumong diha sa ilang mga journal. Ang mga ideya mahimong maglakip sa pagtuon sa Basahon ni Mormon matag adlaw, mag-ampo adlaw ug gabii, motambong sa tanang mga miting sa simbahan, matulog sa dili pa mag-alas10:30 sa gabii ug mobangon sa alas 6:30 sa buntag, minusan ang ilang paggamit sa mga electronic device, o maningkamot nga mas masulundon sa mga sugo.

Ang Sumbanan sa Katakus

Isulat sa pisara ang pulong nga “panginahanglanon [prerequisite],” ug hangyoa ang mga estudyante sa paghunahuna sa mga kahimtang diin ang mga panginahanglanon gikinahanglan. Hatagi og panahon ang mga estudyante sa pagpangita sa Doktrina ug mga Pakigsaad 88:74 alang sa pipila ka mga panginahanglanon sa pagserbisyo og misyon. Dayon ipangutana:

Unsay gitambag sa Ginoo nga buhaton sa mga mamumuo sa Iyang gingharian aron maandam sa pagsangyaw sa ebanghelyo? (Magbalaan sa ilang kaugalingon, molimpyo sa ilang kasingkasing, mohugas sa ilang kamot.)
Unsa ang gipasabut sa mabalaan? (Mahimong limpyo, mahimong takus sa Espiritu Santo.)
Unsa nga baruganan kalabut sa mga misyonaryo ang gitudlo diha sa Doktrina ug mga Pakigsaad 88:74? (Human makatubag ang mga estudyante, isulat sa pisara ang mosunod: Gimandoan sa Ginoo ang Iyang mga sulugoon nga magmahimong limpyo.)

Aron matabangan sa pagpasabut kon unsay buot ipasabut nga ang usa ka misyonaryo kinahanglang limpyo ug takus nga moserbisyo og misyon, i-display ang mosunod nga kinutlo sa usa ka pakigpulong nga gihatag ni Elder M. Russell Ballard sa Korum sa Napulog Duha ka mga Apostoles, ug dapita ang usa ka estudyante sa pagbasa og kusog niini:

“Isip usa ka Apostol ni Ginoong Jesukristo, ako moawhag kaninyo sa pagsugod karon dayon—karong gabii—nga mahimong puno ug hingpit nga takus. Paglig-on sa tinguha ug pasalig sa inyong mga kaugalingon ug ngadto sa Dios nga sugod karon kamo mopabilin sa inyong mga kasingkasing, mga kamot, ug mga hunahuna nga putli ug walay mansa gikan sa bisan unsa nga matang sa moral nga kalapasan. Pagtinguha sa paglikay sa pornograpiya ingon nga kamo kinahanglan molikay sa labing maliputon nga sakit, kay kana tukma gayud nga mao. Pagtinguha sa hingpit nga pagdumili sa tabako, alkohol, ug gidili nga mga druga. Pagtinguha sa pagkamatinuoron. Pagtinguha nga mahimong maayong mga lungsuranon ug motuman sa mga lagda sa yuta diin kamo nagpuyo. Pagtinguha nga sugod niining gabhiona ug sa umaabut dili gayud ninyo hugaw-hugawan ang inyong lawas o mogamit og pinulongan nga law-ay ug dili angayan sa tawo nga naghupot sa priesthood” (“Ang Labing Maayong Henerasyon sa mga Misyonaryo,” Ensign o Liahona, Nob. 2002, 47).

Ipangutana ang sama sa mosunod aron makatabang sa mga estudyante nga makaanalisar sa tambag ni Elder Ballard:

Unsa nga mga sugo ang pihong nahisgutan ni Elder Ballard nga kinahanglang tumanon sa umaabut nga mga misyonaryo?
Unsay buot ipasabut sa paghimo sa inyong kasingkasing, kamot, ug hunahuna nga “walay mansa gikan sa bisan unsa nga matang sa moral nga kalapasan”? (Kon gikinahanglan, mahimo nimong i-refer ngadto sa seksyon nga “Sekswal nga Kaputli” sa Alang sa Kalig-on sa mga Kabatan-onan [booklet, 2011], 35–37.)
Nganong maalamon man ang paglikay sa pornograpiya sama sa atong paglikay sa peligro nga sakit, ug sa unsa kaha nga paagi nga ang paglikay sa pornograpiya makatabang kaninyo sa paghunahuna, pagbati, ug paglihok sama sa usa ka misyonaryo?

Ipasalida ang video nga “Stay within the Lines” (5:10) aron matabangan ang mga estudyante nga mobati sa kamatuoran ug sa kaimportante nga mahimong takus nga moserbisyo og misyon. Sa dili pa ipasalida ang video, ikonsiderar ang paghisgot kon nganong ang utlanan nga mga linya [boundary line] importante sa piho nga sports. Hisguti ang kalainan tali sa “sulod sa linya [in bounds]” ug ang “lapas sa linya [out of bounds]” ug ang paagi nga makaapekto ang utlanan nga mga linya ngadto sa mga lihok sa mga atleta atol sa dula. Sultihi ang mga estudyante nga si Elder Jeffrey R. Holland sa Korum sa Napulog Duha ka mga Apostoles namulong kon unsay buot ipasabut sa magpabilin sulod sa espiritwal nga mga linya sa dili pa magmisyon.

Human makatan-aw sa video, ikonsiderar ang pagpangutana sa mga estudyante sa mosunod:

Unsay kalabutan sa “pagpabilin sa sulod sa mga linya” ug pag-andam nga moserbisyo og misyon?
Mihangyo si Elder Holland niadtong anaa sa team sa Ginoo nga magpabilin diha sa team ug dili “molapas sa mga linya.” Unsa man ang ipasabut niini alang kaninyo?
Nganong ang kapakyas sa paghinulsol sa miaging mga sala makapugong man sa usa ka misyonaryo nga epektibong makatabang sa uban nga moduol ngadto kang Kristo?

Hatagi ang mga estudyante og higayon aron mamalandong sa ilang kaugalingong level sa pagkatakus nga moserbisyo og misyon. Pasabta ang mga estudyante nga kon duna silay bisan unsa nga problema kalabut sa ilang pagkatakus, kinahanglan silang magtinguha og giya diha sa sinsero nga pag-ampo ug hisgutan kini nga mga problema kauban ang ilang bishop o branch president.

Pisikal ug Emosyonal nga Pagpangandam

I-display ang mosunod nga pamahayag nga gihatag sa Unang Kapangulohan niadtong 2002, ug dapita ang mga estudyante sa pagbasa niini og hilum. O ipabasa kini og kusog sa usa ka estudyante.

“Ang full-time nga misyonaryo nga pagserbisyo usa ka pribilehiyo alang niadtong gitawag pinaagi sa inspirasyon sa Presidente sa Simbahan. Ang mga bishop ug mga stake president dunay bug-at nga responsibilidad sa pagtino sa takus, kwalipikado nga mga sakop kinsa andam sa espirituhanon, pisikal,ug emosyonal nga paagi alang niining sagradong pagserbisyo ug kinsa mahimong marekomendar nga walay pagduha-duha” (Sulat sa Unang kapangulohan, Dis. 11, 2002).

Dayon ipangutana:

Agig dugang sa espirituhanong pagkaandam, nganong kinahanglan man nga ang tawo mangandam sa pisikal ug sa emosyonal nga paagi aron moserbisyo og misyon?

I-display ang mosunod nga kinutlo, ug dapita ang usa o dugang pa nga mga estudyante sa pagbasa niini og kusog:

“Regular (kada adlaw) nga pag-ehersisyo. Ang usa ka misyonaryo kinahanglang makalakaw og average nga unom ka milya (10 km) kada adlaw ug makabisikleta og 12 ka milya (19 km) kada adlaw. Ang umaabut nga mga misyonaryo nga naanad lang og lakaw gikan sa ilang sakyanan ngadto sa klase o sa trabaho posible nga manakit ang tiil ug maluthan kon moabut sila sa mission field. … Ang misyonaryo nga dili himsog maluya sa misyonaryo nga buhat, ug ang gikapoy nga misyonaryo mas daling mawad-an og kadasig ug magkaproblema sa panglawas kay sa misyonaryo nga himsog.

“Ang umaabut nga mga misyonaryo makapangandam alang sa pisikal nga kinahanglanon sa kinabuhi sa misyonaryo pinaagi sa pag-establisar og regular nga sumbanan sa aerobic exercise—maglakaw, magdagan, o magbisikleta sulod sa usa ka oras kada adlaw. …

“Saktong gidugayon sa pagkatulog. Bisan kon ang panginahanglan sa pagkatulog magkalain-lain, ang mga young adult sa kasagaran kinahanglan nga matulog og pito ngadto sa walo ka oras kada adlaw. Kasagaran, kinahanglang matulog na sila inigka-alas 10:30 ngadto sa tungang gabii ug momata inigka-alas 6:30 ngadto sa alas 8:00 sa buntag. Ang pagpamulaw hangtud sa alas 2:00 o alas 3:00 sa kaadlawon ug pagkatulog hangtud sa alas 10:00 sa buntag makapaluya sa tawo sa tibuok adlaw ug ganahan rang matulog hangtud sa udto. … Ang mga misyonaryo dunay naka-iskedyul nga kinabuhi. Matulog sila inigka-alas 10:30 sa gabii ug momata inigka-alas 6:30 sa buntag kada adlaw. Kini nga iskedyul mahimong lisud gawas kon ang umaabut nga mga misyonaryo maanad na sa susama nga buluhaton sa wala pa ang tawag sa pagserbisyo.

“Makapahimsog sa lawas nga mga kinaiya sa pagkaon Imbis nga magsigeg kaon og tam-is ug tambok, ang mga batan-on kinahanglang makakat-on nga ganahan sa mga pagkaong dunay protein ug fiber, sama sa unod sa karne, yogurt, mga utanon, ug prutas. Usab, ang pag-inom og sobra sa 12 ounce sa softdrink kada adlaw sobra ra kaayo” (Donald B. Doty, “Missionary Health Preparation,” Ensign, Mar. 2007, 64).

Kon ang misyonaryo dili himsog sa pisikal, unsay epekto niini sa dagan sa buhat, sa kompanyon sa misyonaryo, ug sa kaugalingong pagkatawo sa misyonaryo?

Hangyoa ang mga estudyante nga hilum nga mamalandong sa mosunod nga mga pangutana:

Unsaon ninyo sa paghulagway ang inyong kasamtangang pisikal nga pagpangandam nga moserbisyo og misyon?
Unsa ang ubang mga butang nga inyong mabuhat karon aron andam nga matubag ang pisikal nga panginahanglan sa usa ka full-time nga misyon?

Awhaga ang mga estudyante sa paghimo og plano nga sugdan na karon ang saktong pagkatulog, mokaon og makapahimsog nga pagkaon, ug mag-ehersisyo aron sila dunay pisikal nga kalig-on nga gikinahanglan aron molampus isip mga misyonaryo. Kon itugot sa panahon, dapita ang mga estudyante nga isulat ang ilang mga plano diha sa ilang mga study journal.

Hangyoa ang usa ka estudyante nga ipasabut kon unsay reaksyon sa lawas sa labihan ka makaluya nga pisikal nga mga kalihokan sama sa pagdagan nga mosaka ug mokanaug sa hagdanan (paspas nga pagpitik sa kasingkasing, mas grabe nga pagginhawa, pagpaningot, luya nga mga kaunuran, ug uban pa). Ipasabut nga ang pisikal nga stress usa lamang ka matang sa hagit nga atubangon sa mga misyonaryo. Dayon ipangutana:

Unsa kaha ang reaksyon sa lawas ug hunahuna sa misyonaryo sa emosyonal o sikolohikal nga stress nga moresulta gikan sa lisud nga mga hagit o wala damha nga mga problema?

Ipasabut nga tanang misyonaryo makasinati og emosyonal nga stress, mga pagbati sa kamingaw ug kakulang, kasubo, o uban pang emosyon nga makapahasol kanila, ug normal ra kini nga bahin sa kinabuhi sa misyonaryo.

Ipasalida ang video nga “Preparation of Gordon B. Hinckley: Forget Yourself and Go to Work” (2:04). Awhaga ang mga estudyante nga mangita sa mga rason nganong si Presidente Gordon B. Hinckley nawad-an og kadasig isip batan-ong misyonaryo didto sa England.

Pangutan-a ang klase:

Unsa ang pipila ka mga rason nganong si Presidente Gordon B. Hinckley nawad-an og kadasig sa pag-abut niya sa mission field?
Unsay gibuhat ni Presidente Hinckley nga nakatabang kaniya nga mabuntog ang pagkawalay kadasig?

Ipasabut ngadto sa klase nga nasinati sa ubang bantugan nga mga misyonaryo diha sa kasulatan nakasinati og pagkawalay kadasig ug uban pang mga panlimbasug sa ilang misyonaryo nga mga paningkamot. Isulat sa pisara ang mosunod nga mga scripture reference: Jeremias 1:4–9; Alma 17:5; 26:27; ug Moises 6:31–32. Papilia ang mga sakop sa klase ug ipabasa og hilum ang usa sa mga tudling sa kasulatan, nga mangita sa mga hagit nga nahibaloan o nasugatan sa mga indibidwal diha sa ilang gibasa. Samtang motubag ang mga estudyante, ikonsiderar ang pag-summarize sa ilang mga tubag diha sa pisara, sama sa gipakita:

Jeremias 1:4–9. Nahadlok si Jeremias nga ang mga tawo dili maminaw kaniya tungod kay bata pa kaayo siya.

Alma 17:5; 26:27 Si Ammon ug ang iyang kaubang mga misyonaryo nag-antus sa lawas ug sa hunahuna. Mibati sila og kawalay kadasig ug andam na nga mohunong.

Moises 6:31–32. Nabalaka si Enoch nga walay maminaw kaniya tungod kay dili siya maayong mosulti ug bata pa kaayo.

Dayon ipangutana:

Unsay inyong nakat-unan gikan niining tulo ka istorya mahitungod sa emosyonal nga mga hagit sa pagsangyaw sa ebanghelyo? (Samtang motubag ang mga estudyante, mahimo nimong isulat sa pisara kini nga kamatuoran: Ang pisikal ug emosyonal nga mga hagit normal ra nga bahin sa kinabuhi sa misyonaryo.
Unsay inyong hunahuna sa dihang nabasa ninyo ang pamahayag nga ang pisikal ug emosyonal nga mga hagit normal ra nga bahin sa kinabuhi sa misyonaryo?
Sa unsang paagi nga ang pagkasayud nga tanang misyonaryo nag-atubang og mga hagit makaapekto sa paagi sa inyong pag-andam sa pagserbisyo?

Tabangi ang mga estudyante nga makasabut nga hapit tanang misyonaryo nakasinati og emosyonal o pisikal nga mga hagit. Busa, ang mga misyonaryo kinahanglang makakat-on unsaon sa pagsagubang sa stress sa maayo ug tukma sa misyon nga paagi. Kasagaran, ang maayong mga paagi sa pagsagubang sa stress nga epektibo sa gawas sa mission field, sama sa pag-inusara, pagpaminaw og musika, o pagdula og sports, dili kanunayng mahimo sa mga misyonaryo. Ang mga misyonaryo kinahanglang makakat-on sa pagsagubang sa stress sa mga paagi nga nahisubay sa mga lagda sa misyon.

Bahina ang klase ngadto sa ginagmay nga mga grupo, ug iapud-apod ang “Demands of Missionary Life [Mga Gikinahanglan sa Kinabuhi sa Misyonaryo]” nga handout ngadto sa mga estudyante. Hangyoa ang matag grupo sa (1) pagbasa og kusog sa unang seksyon, nga giulohan og “Demands of Missionary Life [Mga Gikinahanglan sa Kinabuhi sa Misyonaryo],” ug (2) paghisgot kon sa unsang paagi nga ang pagkahibalo sa gikinahanglan sa kinabuhi sa misyonaryo makatabang kanila nga mas maandam alang sa mga hagit sa kinabuhi sa misyon.

Human nga ang mga grupo dunay igong panahon sa pagbasa ug paghisgot sa seksyon, hangyoa ang pipila ka estudyante sa pagpakigbahin sa ubang nag-una nga mga punto nga gihisgutan sa ilang grupo. Dayon, sa tibuok klase, paggahin og pipila ka minutos sa pagbasa ug paghisgot sa sunod nga seksyon sa handout, nga giulohan og “Adjusting to New Experiences [Pag-adjust ngadto sa Bag-ong Kasinatian],” ug hisguti kon sa unsang paagi nga ang pagsabut sa kasagaran nga mga yugto sa pag-adjust makatabang sa mga estudyante kon mosulod na sila sa MTC.

Dangup sa Ginoo alang sa Panabang kalabut sa mga Hagit

Aron sa pag-awhag sa mga estudyante nga magsugod sa paghunahuna kon unsaon nila sa pagsagubang ang mga hagit kon ila kining masinati sa mission field, ipasabut nga si Nephi miatubang og labihan ka grabe nga pagbati sa kakulang ug pagkawalay kadasig ug misulat kalabut sa unsay iyang gibuhat aron mabuntog kadto nga mga pagbati. Ipabasa og kusog sa usa ka estudyante ang 2 Nephi 4:17–19. Dayon ipangutana:

Unsa nga mga pulong ang gigamit ni Nephi sa paghulagway sa mga resulta sa iyang mga kahuyang?

Hangyoa ang mga estudyante sa pagtuon sa 2 Nephi 4:19–26, nga mangita sa mga butang nga nakatabang ni Nephi nga mabuntog ang iyang mga pagbati sa pagkawalay kadasig. Dayon ipangutana:

Unsa nga mga pulong ang gigamit ni Nephi sa paghulagway kon giunsa niya pagbuntog ang iyang grabe ka negatibong mga pagbati? (Kinahanglang mahibaloan sa mga estudyante nga si Nephi misalig sa Ginoo [tan-awa sa bersikulo 19], nahinumdom siya kon unsay gibuhat sa Ginoo ngadto kaniya sa nangagi [tan-awa sa mga bersikulo 20–23], mihalad siya og mainiton nga mga pag-ampo [tan-awa sa bersikulo 24], ug nahinumdom siya sa kalooy sa Ginoo [bersikulo 26].)
Sa unsang paagi nga ang paghinumdom sa Ginoo ug sa Iyang kaayo nakatabang kaninyo sa panahon sa pagkawalay kadasig o stress?
Sa sayoong bahin sa leksyon, atong giila nga normal ra alang sa mga misyonaryo nga makasinati og emosyonal nga stress, mga pagbati sa kamingaw ug kakulang, kasubo, o uban pang emosyon nga mahimong makapahasol kanila. Magkonsiderar sa unsay gisulat ni Nephi diha sa 2 Nephi 4:19–26, unsa nga tambag ang imong ihatag sa misyonaryo kinsa nakasinati niining mga matang sa mga pagbati? (Tabangi ang mga estudyante nga mahibalo sa mosunod nga baruganan, ug ikonsiderar ang pagsulat niini sa pisara: Kon ang mga misyonaryo mosalig sa Ginoo, makatabang ang Ginoo kanila sa pagdumala sa pisikal ug emosyonal nga gikinahanglan sa kinabuhi sa misyonaryo.)

Ikonsiderar ang pagpakigbahin ngadto sa mga estudyante sa mosunod nga pamahayag gikan ni Elder Jeffrey R. Holland sa Korum sa Napulog Duha ka mga Apostoles:

“Dili ko motuo nga ang misyonaryo nga buhat sayon ra kaayo, ni ang pagkakabig, ni ang retensyon, ni ang padayon nga pagkamatinud-anon. Ako mituo nga nagkinahanglan kini og paningkamot, butang nga gikan sa kahiladman sa atong mga kalag.

“Kon nahimo Niya nga molakaw sa gabii, moluhod, mohapa, modugo gikan sa matag lungag sa panit, ug motuaw, ‘Abba, Amahan (Papa), kon kini nga kopa mahimong molabay, tuguti kini nga molabay’ [tan-awa sa Marcos 14:36], nan dili kita angayang matingala nga ang kaluwasan dili dula-dula o sayon nga butang alang kanato. Kon naghunahuna kamo kon wala bay mas sayon nga paagi, kinahanglan ninyong hinumduman nga dili kamo ang unang nangutana niana. Dunay tawo nga mas bantugan ug mas halangdon nga nangutana sa dugay nang panahon ang milabay kon wala bay mas sayon nga paagi.

“Ang Pag-ula makatabang sa mga misyonaryo nga tingali mas importante pa gani kay sa pagtabang niini sa mga investigator. Kon manlimbasug kamo, kon gisalikway kamo, kon giluwaan kamo ug gihinginlan ug mahimo nga usa ka yubit ug usa ka pagya, nakadawat kamo sa samang pagtratar sa labing maayo nga kinabuhi nga nailhan niining kalibutana sukad, ang bugtong putli ug hingpit nga kinabuhi nga nabuhi sukad. Duna kamoy rason nga magmasaligon ug magmapasalamaton nga ang Buhi nga Anak sa Buhi nga Dios nasayud mahitungod sa tanan ninyong kasub-anan ug kalisdanan. Ang bugtong dalan aron maangkon ang kaluwasan mao ang pag-agi sa Getsemani ug ngadto sa Kalbaryo. Ang bugtong dalan paingon sa kahangturan mao ang pinaagi Kaniya—ang Dalan, ang Kamatuoran, ug ang Kinabuhi” (“Missionary Work and the Atonement,” Ensign, Mar. 2001, 15).

Dayon ipangutana:

Sumala ni Elder Holland, unsay anaa nga rason sa mga misyonaryo aron magmasaligon panahon sa panlimbasug?

Sultihi ang mga estudyante nga kon magsagubang og mahagiton nga mga kahimtang sa mission field, kinahanglan nilang hinumduman nga ang buhat nga ilang gihimo mao ang pagtabang sa pagdala sa uban ngadto kang Jesukristo. Isulat sa pisara ang mosunod nga mga scripture reference: Alma 26:11–13; 29:10; ug Doktrina ug mga Pakigsaad 18:15–16. Hangyoa ang pipila ka estudyante nga magpuli-puli sa pagbasa og kusog niining mga tudling samtang mosunod ang klase, nga mangita kon unsay gitudlo sa mga tudling mahitungod sa kinabuhi sa misyonaryo. Dapita ang mga estudyante sa pagpakigbahin og mga hunahuna, ug dayon pasaligi sila nga bisan tuod lisud nga buhat ang full-time nga misyonaryo nga pagserbisyo ug mahimong makapasagmuyo usahay, kon maningkamot kita sa pagdala sa uban ngadto kang Jesukristo, ang Ginoo mopanalangin kanato og hingpit nga kalipay. Ikonsiderar ang paghangyo sa mga estudyante nga mopakigbahin sa mga kasinatian kon ila nang nasinati kini nga mga baruganan.

Ipasabut ngadto sa mga estudyante nga matag karon ug unya mahimong makakompanyon sila og usa nga dunay mga problema sa emosyonal o sa mental. Sa ingon nga mga kahimtang, kinahanglan silang maminaw ug mopakita og gugma ngadto sa ilang kompanyon, tungod kay ang kompanyon nga dunay kinaiya sa pagsuporta mahinungdanon sa pagtabang nga mabuntog ang mga problema. Dili gayud sila mosugyot nga kon ang usa ka nanlimbasug nga misyonaryo dunay dugang lamang nga pagtuo ang iyang mga hagit mawala.

Ipasabut usab nga ang ubang mga hagit nagkinahanglan og dugang tabang gikan sa mga lider sa priesthood ug sa mga mental health professional, ug nga kasagaran sa mga misyon magbutang og tukmang mga health professional alang sa mga misyonaryo. Ang mga misyonaryo nga nanlimbasug sa emosyonal nga paagi kinahanglang mohisgut sa ilang kahimtang ngadto sa ilang mission president aron matino kon unsa ang tukmang tabang.

Aron matabangan ang mga estudyante nga madugangan pa ang pagkonsiderar kon unsaon nila pagsagubang ang pisikal ug emosyonal nga mga hagit nga ilang giatubang isip mga misyonaryo, hatagi sila og pipila ka minutos nga isulat ang mahitungod sa higayon dihang kinahanglan nilang mabuntog ang lisud nga mga kahimtang. I-follow up pinaagi sa pagpangutana sa mga estudyante kon unsay ilang nakat-unan mahitungod sa Ginoo ug mahitungod sa ilang kaugalingon gikan sa kasinatian ug sa unsang paagi nila magamit ang kasinatian sa paglig-on kanila sa umaabut.

Sa pagtapos, ipahayag ang imong pagsalig sa imong mga estudyante ug sa ilang abilidad sa pagsagubang sa mga hagit nga nag-uban sa kinabuhi sa misyonaryo. Ipakigbahin ang imong pagpamatuod nga ang Ginoo motabang sa mga indibidwal nga modangup ngadto Kaniya sa pagdumala sa pisikal ug emosyonal nga gikinahanglan sa ilang kinabuhi.

Mga Pagdapit aron Molihok

Dapita ang mga sakop sa klase nga mangandam alang sa kinabuhi sa misyon pinaagi sa pagkompleto sa usa sa dugang pa sa mosunod nga mga kalihokan:

Ikonsiderar kon unsay kinahanglan ninyong buhaton aron mahimong limpyo ug takus nga moserbisyo og misyon. Kon gikinahanglan, wagtanga ang dili maayo nga mga hunahuna ug mga kinaiya nga makapasilo sa Espiritu.
Paghimo og personal nga mga tumong nga masunod ang inadlaw nga programa sa pag-ehersisyo, nga mokaon og makapahimsog nga pagkaon, o mopalambo og kinaiya sa pagkatulog nga magsunod sa inadlaw nga iskedyul sa misyonaryo.
Ribyuha ang mga sumbanan sa sinul-uban alang sa full-time nga mga misyonaryo nga anaa sa LDS.org.
Hangyoa ang usa ka returned missionary nga maghisgot kon unsay iyang gibuhat aron madumala ang stress ug mabuntog ang mga hagit sa kinabuhi sa misyonaryo.
Hisguti kauban sa mga ginikanan o mga lider sa priesthood ang mga paagi aron magkauyon sa misyonaryo nga kompanyon kinsa may pagkalahi o lisud ninyong ikasinabut.