Ang Isangyaw ang Akong Ebanghelyo nagtudlo nga ang katuyoan isip usa ka misyonaryo mao ang pag-“pangimbitar sa uban sa pagduol ngadto kang Kristo pinaagi sa pagtabang kanila nga makadawat sa gipahiuli nga ebanghelyo pinaagi sa pagbaton og hugot nga pagtuo kang Jesukristo ug sa Iyang Pag-ula, paghinulsol, pagpabunyag, pagdawat sa gasa sa Espiritu Santo, ug paglahutay hangtud sa katapusan” (Isangyaw ang Akong Ebanghelyo, 1). Si Elder Neil L. Andersen sa Korum sa Napulog Duha ka mga Apostoles miingon, “Ang inyong misyon mahimong usa ka sagrado nga oportunidad sa pagdala sa uban ngadto ni Kristo ug sa pagtabang sa pag-andam alang sa Ikaduhang Pag-anhi sa Manluluwas” (“Pag-andam sa Kalibutan alang sa Ikaduhang Pag-anhi,” Ensign o Liahona, Mayo 2011, 50). Kini nga kurso makatabang sa pag-andam sa imong mga estudyante nga moapil sa sagradong oportunidad sa misyonaryo nga buhat.
Hangyoa ang mga estudyante sa pag-ila sa mga kalihokan ug mga buluhaton nga kanunayng gibuhat sa mga misyonaryo, ug ilista kini sa pisara. (Ang mga tubag mahimong maglakip sa pag-tracting, pagtuon, pagtudlo, pag-ampo, ug pagserbisyo.)
Dapita ang usa ka estudyante sa pagbasa sa teksto nga anaa sa “Ang Inyong Katuyoan” nga box diha sa pahina 1 sa Isangyaw ang Akong Ebanghelyo. (Kay kini man ang unang miting sa klase, posible nga daghang estudyante ang walay dalang kopya sa Isangyaw ang Akong Ebanghelyo, mao nga mahimo kang moapud-apod og mga photocopy niini ug sa uban pang may kalabutan nga mga pahina.)
Sunod, dapita ang mga estudyante sa pagtandi sa pamahayag sa katuyoan isip misyonaryo ngadto sa lista sa mga buluhaton diha sa pisara, ug ipangutana:
Sa unsang paagi nga ang pagsabut sa pamahayag sa katuyoan isip misyonaryo makapalambo sa inyong hunahuna kon unsay buhaton sa mga misyonaryo? Sa unsang paagi nga kining katuyoan makahatag og kahulugan ngadto sa mga buluhaton nga gibuhat sa mga misyonaryo?
Unsa nga bahin niining pamahayag sa katuyoan [purpose statement] ang nagpakita sa responsibilidad sa misyonaryo, ug unsa nga bahin ang nagpakita sa responsibilidad sa investigator?
Sa unsang paagi nga ang paghimo niining pamahayag sa katuyoan isip giya nga baruganan sa inyong trabaho maghimo ninyong mas epektibo nga misyonaryo? (Ang pamahayag sa katuyoan maghatag og direksyon sa trabaho nga buhatunon sa usa ka misyonaryo. Makatabang kini sa mga misyonaryo nga mominos ang pag-focus sa pagpahigayon sa buluhaton ug mas modugang ang pag-focus sa pagtuman sa ilang tinuod nga katuyoan.)
Aron matabangan ang mga sakop sa klase nga mas makasabut sa katuyoan sa misyonaryo nga buhat, dapita sila sa pagpakli sa pahina 2 sa Isangyaw ang Akong Ebanghelyo, ug dayon hangyoa ang usa ka estudyante sa pagbasa og kusog sa katapusang paragraph, nga magsugod sa “Ikaw gitawag.”
Isip usa ka klase, hisguti ang mosunod nga mga pangutana:
Sumala niini nga paragraph, unsa may kinahanglang buhaton sa usa ka tawo aron moduol sa Manluluwas?
Sumala niini nga paragraph, unsa may buhaton sa usa ka misyonaryo aron matabangan ang uban nga moduol kang Jesukristo?
Hatagi ang matag estudyante og kopya sa handout nga “Atong Katuyoan Isip Misyonaryo.” Ang handout naglangkob og porsyon sa pakigpulong nga gihatag ni Elder D. Todd Christofferson, sa Korum sa Napulog Duha ka mga Apostoles. I-arrange ang mga estudyante ngadto sa ginagmay nga grupo, o dapita sila sa paghimo og ilang kaugalingong grupo. Hangyoa ang mga grupo sa pagbasa og dungan sa handout ug sa paghisgot sa mga pangutana diha sa katapusan.
Human makabaton ang mga estudyante og igong panahon sa pagtuon ug paghisgot sa pakigpulong ni Elder Christofferson, tawaga ang pipila ka mga estudyante aron sa pagpakigbahin sa ilang mga tubag sa mga pangutana nga gihisgutan. Dayon ipangutana ang mosunod:
Unsaon man ninyo sa pagsugod aron maka-focus sa pamahayag sa katuyoan isip misyonaryo? (Ang mga tubag mahimong maglakip sa mosunod: ang mga estudyante mahimong mopili sa pagmemorya niini, mahimong isulat nila kini ug ibutang kini sa dapit nga ila kining makita matag adlaw, mahimong mag-ampo sila alang sa panabang aron mas makasabut niini, o mahimong mangita sila og mga elemento niini nga katuyoan isip kabahin sa ilang pagtuon sa kasulatan.)
Ipabasa og kusog sa usa ka estudyante ang mosunod nga pamahayag ni Elder Dallin H. Oaks sa Korum sa Napulog Duha mga Apostoles:
Imahe
Elder Dallin H. Oaks
“Kita wala magsangyaw ug magtudlo aron sa ‘pagdala og mga katawhan ngadto sa Simbahan’ o sa pagpadaghan sa mga miyembro sa Simbahan. Kita wala magsangyaw ug magtudlo aron lamang sa pagdani sa mga tawo nga mopuyo og mas maayo nga mga kinabuhi. … Atong gidapit ang tanan nga moduol kang Kristo pinaagi sa paghinulsol ug bunyag ug pagkumpirma aron maabli ang ganghaan sa celestial nga gingharian ngadto sa mga anak sa Dios [tan-awa sa D&P 76: 51–52]. Wala nay lain pa nga makabuhat niini” (“The Purpose of Missionary Work,” missionary satellite broadcast, Abr. 1995).
Nganong importante man nga hinumduman nga ang pagsangyaw sa ebanghelyo usa ka butang nga mas labaw pa kay sa pagtabang sa usa ka tawo nga mamiyembro sa Simbahan? (Tan-awa usab sa 3 Nephi 11:33–34.)
Unsa ang inyong mga gihunahuna samtang gikonsiderar ninyo nga motabang kamo sa “pag-abli sa ganghaan sa celestial nga gingharian” niadtong inyong tudloan?
Dapita ang mga estudyante sa paghunahuna kon unsaon nila paggamit ang katuyoan isip misyonaryo diha sa ilang kinabuhi, ug hangyoa sila sa paghunahuna kon ang ilang personal nga mga tinguha sa pagserbisyo mitugma ba sa pamahayag sa katuyoan isip misyonaryo nga makita diha sa Isangyaw ang Akong Ebanghelyo. Hangyoa ang mga estudyante nga mogahin og panahon sa pagsulat diha sa papel o sa study journal kon unsang piho nga mga aksyon ang ilang buhaton aron mas mapahaum ang ilang mga rason sa pagserbisyo og misyon niining pamahayag sa katuyoan.
Pagtudlo sa Doktrina ni Kristo
Ipasabut ngadto sa klase nga ang Manluluwas mipadayag nga usa sa nag-unang mga katuyoan sa Basahon ni Mormon mao ang “modala ngadto sa kahayag sa akong ebanghelyo [ug] sa tinuod nga mga katuyoan sa akong doktrina” (D&P 10:62). Ang doktrina ni Kristo naglakip sa sugo nga ang tanang katawhan motuo kang Jesukristo isip Ginoo ug Manluluwas, maghinulsol sa sala, magpabunyag, ug modawat sa Espiritu (tan-awa sa 3 Nephi 11:32). Isulat ang mosunod sa pisara:
Bahina ang klase ngadto sa tulo ka grupo. Hangyoa ang usa ka grupo sa pagtuon sa 2 Nephi 31:2, 10–21; hangyoa ang ikaduhang grupo sa pagtuon sa 3 Nephi 11:31–41; ug hangyoa ang ikatulong grupo sa pagtuon sa 3 Nephi 27:13–22. Hangyoa ang matag grupo sa pagbasa sa ilang mga bersikulo ug ipatino kon unsay gikinahanglan alang niadtong nagtinguha nga mosunod kang Jesukristo. Mahimo nimong awhagon ang mga estudyante nga i-highlight o markahan diha sa ilang mga kasulatan ang piho nga mga kamatuoran mahitungod sa doktrina ug ebanghelyo ni Jesukristo.
Human makagahin og pipila ka minutos ang mga estudyante sa pagribyu niining mga tudling [passage], hangyoa sila sa paglista sa ubos sa matag reference diha sa pisara sa piho nga mga aksyon nga gikinahanglang buhaton sa mga sumusunod ni Jesukristo.
Dayon ipangutana ang sama sa mosunod:
Kon dunay mangutana kaninyo kon mituo ba ang mga Mormon kang Jesukristo, sa unsang paagi nga kining tulo ka mga tudling sa kasulatan diha sa pisara makatabang kaninyo sa pagtubag sa pangutana?
Sa inyong kaugalingong mga pulong, unsaon man ninyo sa pagpasabut ang doktrina o ebanghelyo ni Jesukristo ngadto sa usa ka tawo nga wala masayud kon unsa kini?
Ang ubang mga tawo tingali mangutana kaninyo ngano nga ang mga misyonaryo nagsangyaw ngadto sa mga tawo nga mituo na kang Jesukristo. Sa unsang paagi nga ang doktrina ni Kristo, sigun sa gilatid niini nga mga kasulatan diha sa pisara, makatabang kaninyo sa pagtubag niana nga pangutana?
Samtang motubag ang mga estudyante, siguroa nga nasabtan nila nga ang doktrina ni Kristo naglangkob sa (1) unsay nabuhat ni Jesukristo ug padayon nga gibuhat aron mapaduol kita ngadto sa Amahan (tan-awa sa Alma 33:22; D&P 76:40–42) ug (2) unsay kinahanglan gayud natong buhaton aron makadawat sa mga panalangin sa Pag-ula ni Jesukristo, lakip na sa hugot nga pagtuo, paghinulsol, pagpabunyag, pagdawat sa gasa sa Espiritu Santo, ug paglahutay hangtud sa katapusan (tan-awa sa 3 Nephi 27:16–21).
I-refer og balik ang mga estudyante ngadto sa pamahayag sa katuyoan isip misyonaryo diha sa pisara ug ipangutana:
Sa unsang paagi nga ang doktrina ni Kristo adunay kalabutan sa katuyoan sa misyonaryo nga buhat?
Samtang gihisgutan sa mga estudyante kini nga pangutana, mahimong mapahayag nila ang mosunod nga kamatuoran: Matuman sa mga misyonaryo ang ilang katuyoan pinaagi sa pagtabang sa mga investigator nga makadawat sa doktrina ni Kristo, mopalambo og pagtuo, maghinulsol, magpabunyag, modawat sa gasa sa Espiritu Santo, ug molahutay sa katapusan.
Aron mas molambo pa ang panabut sa mga estudyante nga ang mga investigator kinahanglan gayud nga molihok base sa doktrina ni Kristo aron makadawat sa gipahiuli nga ebanghelyo, ipapakli sa mga estudyante ang pahina 6 sa Isangyaw ang Akong Ebanghelyo, ug hangyoa ang usa ka estudyante sa pagbasa og kusog sa nag-unang duha ka paragraph diha sa seksyon nga giulohan og “Ang Ebanghelyo ni Jesukristo.” Dayon ipangutana ang sama sa mosunod aron matabangan ang mga estudyante nga makasabut nganong importante nga ang mga investigator mopakita og pagtuo:
Unsa nga ebidensya ang mahimong pangitaon sa misyonaryo aron matino kon ang investigator nagpakita ba og hugot nga pagtuo kang Jesukristo ug sa Iyang Pag-ula, naghinulsol, ug nangandam aron makadawat sa pakigsaad sa bunyag?
Human makatubag ang mga estudyante, ipasabut nga ang mga misyonaryo sa kasagaran mabalaka bahin sa pagsulti ug sa pagbuhat sa hustong butang. Hinoon, ang mas importante kay sa unsay isulti ug buhaton sa mga misyonaryo mao nga ang mga investigator molihok pinaagi sa pagtuo sa unsay gitudlo ngadto kanila. Usa sa labing importante nga mga kahanas nga mapalambo sa usa ka misyonaryo mao ang pag-ila pinaagi sa Espiritu kon ang investigator tinuod ba nga naglihok pinaagi sa pagtuo ug nakabig.
Unsa nga ebidensya ang mahimong pangitaon sa misyonaryo aron matino kon ang Espiritu diha ba atol sa usa ka leksyon ug gibati sa investigator?
Unsay mabuhat sa umaabut nga mga misyonaryo aron mas makasabut ug makagamit sa doktrina ni Kristo? (Ang mga tubag mahimong maglakip sa usa sa mosunod: mag-ampo pinaagi sa pagtuo alang sa mas dako nga panabut, magtuon sa mga kasulatan sa piho nga mga aspeto sa doktrina ni Kristo sama sa Pag-ula ni Jesukristo ug sa unang mga baruganan ug mga ordinansa sa ebanghelyo, makig-istorya sa uban mahitungod sa unsay ilang gibuhat aron molambo ang ilang pagtuo kang Jesukristo, magtuon sa mga pag-ampo sa sakrament alang sa dakong panabut sa mga pakigsaad sa bunyag, ug uban pa.)
Human mapasalida ang video, ipangutana ang sama sa mosunod aron matabangan ang mga estudyante sa pagpasabut kon unsay gibuhat sa mga misyonaryo aron matuman ang ilang katuyoan:
Unsa may gibuhat niini nga mga misyonaryo aron matabangan ang pamilyang Robles nga molambo ang pagtuo? (Ang mga tubag mahimong maglakip sa mosunod: ila silang giawhag sa pag-ampo mahitungod sa Basahon ni Mormon, mitubag sa ilang mga pangutana, mitudlo kanila nganong importante ang pagtuman sa mga sugo, mi-commit kanila sa pagtuman sa mga sugo, mitabang kanila nga makadawat sa ordinansa sa bunyag, misiguro nga ang ward nalambigit sa ilang kinabuhi, ug miawhag kanila nga maningkamot nga moadto sa templo.)
Nganong ang pagtudlo sa mga investigator ug pagdapit kanila nga moduol kang Kristo importante man nga mga aspeto sa unsay gibuhat sa mga misyonaryo?
Unsa nga ebidensya ang inyong nakita nga ang pagtuo sa mga sakop sa pamilyang Robles milambo ug nga mibati sila nga mas madawaton sa Espiritu ni Kristo?
Hatagi ang imong mga estudyante og pipila ka minutos aron matun-an ang seksyon nga giulohan og “Pagtabang sa Uban sa Paghimo og mga Pasalig [Commitment]: Ang Agianan ngadto sa Hugot nga Pagtuo ug Paghinulsol” diha sa Isangyaw ang Akong Ebanghelyo, pahina 9. Dayon ipares-pares ang mga estudyante ug magpuli-puli sa pagpakigbahin kon unsay ilang gibati mahitungod sa pagdapit sa uban sa pagtuman sa mga commitment. Unsa man ang ilang mga kahadlok o mga kabalaka? Unsa ang nakatabang kanila nga makabaton og pagsalig nga ila kining mahimo? Dayon ipangutana ang mosunod nga mga pangutana:
Sa unsang paagi nga ang pagkasabut sa doktrina ni Kristo makatabang kaninyo nga makadapit og mga investigator sa paghimo og mga commitment?
Nganong misulti man si Elder Jeffrey R. Holland nga ang misyonaryo kinahanglang “maguol pag-ayo” kon ang mga tawo wala mobuhat sa commitment nga mobasa o mag-ampo mahitungod sa Basahon ni Mormon?
Dapita ang klase sa paghunahuna kon unsa kaha ang bation nga makatabang sa mga tawo nga mag-usab ug mabunyagan. Pangutan-a kon duna ba kanila ang nakatabang og usa ka higala o sakop sa pamilya nga moduol kang Kristo, ug dapita sila sa pagpakigbahin kon unsay bation kon makatabang niana nga proseso.
Ang Pinakamahinungdanon nga Katungdanan
Hisguti kon giunsa pagbaton sa mga misyonaryo ang awtoridad sa pagtudlo sa ebanghelyo ngadto sa mga anak sa Langitnong Amahan ug sa pagtabang kanila aron makadawat sa mga ordinansa nga motugot kanila nga makatagamtam sa mga panalangin sa Pag-ula. I-display ang mosunod nga mga pamahayag, ug dapita ang usa ka estudyante sa pagbasa niini og kusog ngadto sa klase:
Imahe
Prophet Joseph Smith
“Human ang tanan nasulti na, ang pinakamahinungdanon ug ang pinaka importante nga katungdanan mao ang pagsangyaw sa Ebanghelyo” (Joseph Smith, gikutlo diha sa Isangyaw ang Akong Ebanghelyo, 13).
Imahe
President Spencer W. Kimball
“Ang pagtudlo sa ebanghelyo mas importante pa kay sa ubang maayo nga mga binuhatan. Anaa kamo sa pinakamahinungdanon nga buhat sa kalibutan, ug walay butang niini nga kalibutan nga ikatandi niini. Ang pagtukod og mga balay ug mga taytayan baliwala. Ang pagtukod og mga kalibutan baliwala kon itandi sa mga kinabuhi nga inyong giugmad. Ang pagluwas sa mortal nga mga kinabuhi dili ingon ka importante nga kalampusan kon itandi sa unsay inyong gibuhat. Mahimo kamong moanhi sa usa niining mga sementeryo ug mopabuhi sa mga patay, bisan usa ka libo o napulo ka libo kanila, ug sa gihapon dili kini ikatandi sa unsay inyong gibuhat kon magluwas kamo og mga tawo” (The Teachings of Spencer W. Kimball [1982], 547).
Pangutan-a ang imong mga estudyante kon dunay pipila kanila nga mopakigbahin nganong sa ilang hunahuna ang pagsangyaw sa ebanghelyo mao ang atong labing importante nga katungdanan. Siguroa nga nasabtan sa mga estudyante nga pinaagi sa pagsangyaw sa ebanghelyo, atong matabangan ang uban nga makabaton sa mga panalangin sa Pag-ula.
Hangyoa ang usa ka estudyante sa pagbasa og kusog sa Doktrina ug mga Pakigsaad 18:10, 15–16 samtang magsunod ang klase, nga mangita sa mga panalangin nga moabut niadtong mosangyaw sa ebanghelyo ug niadtong modawat sa ebanghelyo. Dayon ipangutana:
Unsa man ang ubang mga panalangin nga moabut niadtong mosangyaw sa ebanghelyo ug niadtong gitudloan sa ebanghelyo?
Ipasabut nga ang misyonaryo nga buhat mahimong mahagiton usab. Ipabasa sa usa ka estudyante ang mosunod nga kinutlo gikan ni Elder Jeffrey R. Holland sa Korum sa Napulog Duha ka mga Apostoles:
Imahe
Elder Jeffrey R. Holland
“Nakumbinsir ko nga ang misyonaryo nga buhat dili sayon tungod kay ang kaluwasan dili yano nga kasinatian. Ang kaluwasan dili gayud sayon. Kita ang Simbahan ni Jesukristo, kini ang kamatuoran, ug Siya ang atong Halangdon nga Mahangturong Pangulo. Unsaon man nato sa pagtuo nga mahimo kining sayon alang kanato nga dili man gayud kadto sayon alang kaniya? Morag maayo alang nako nga ang mga misyonaryo ug mga lider sa misyon kinahanglang mogahin og pipila ka gutlo didto sa Getsemani. Ang mga misyonaryo ug mga lider sa misyon kinahanglang molakaw og dili mominus sa usa o duha ka lakang paingon sa tumoy sa Kalbaryo.
“… Ako nagtuo nga ang mga misyonaryo ug mga investigator, aron masayud sa kamatuoran, aron maluwas, aron masayud og butang niini nga bili nga gibayaran na, kinahanglang mobayad sa gamayng simbolikanhong kantidad nianang samang bili” (“Missionary Work and the Atonement,” Ensign, Mar. 2001, 15).
Sa unsang paagi nga kini nga panglantaw mahitungod sa misyonaryo nga buhat makatabang kaninyo kon makasinati kamo og mga hagit isip misyonaryo?
Sa pagtapos nimo sa klase, hunahunaa ang paghatag sa mga estudyante og pipila ka minutos sa pagsulat kon unsay ilang nakat-unan mahitungod sa relasyon tali sa misyonaryo nga buhat ug sa doktrina ni Kristo. Awhaga ang mga estudyante sa paghimo og tumong mahitungod sa unsay ilang mabuhat aron mas makasabut sa doktrina ni Kristo samtang mangandam sila alang sa ilang misyon. Pangutan-a ang mga estudyante kon aduna ba kanila ang gustong mopakigbahin sa ilang mga pagpamatuod ngadto sa klase. Ipahayag ang imong pagpamatuod nga kon ang mga estudyante makakat-on ug molihok base sa doktrina ni Kristo, mahimo silang mas malampuson nga mga misyonaryo.
Mga Pagdapit aron Molihok
Pasabta ang mga estudyante nga ang epektibong pagpangandam alang sa full-time nga misyon nagkinahanglan og paningkamot gawas sa klasehanan. Busa, sa pagtapos sa matag leksyon, ihatag ang gisugyot nga mga kalihokan nga gitumong aron sa pagtabang kanila nga mahimong mas andam nga moserbisyo og misyon. Aron matabangan ang mga estudyante sa pagsugod karon nga moapil sa buhat sa Ginoo, hagita sila sa paghimo og usa o dugang pa sa mosunod:
Gamit ang social media, ipakigbahin sa uban nganong naghinam-hinam kamo nga moserbisyo og misyon ug unsay inyong gibuhat aron maandam.
Tan-awa ang pipila ka mga video nga makita diha sa Hastening the Work of Salvation nga seksyon sa LDS.org ug isulat diha sa study journal ang inyong gibati samtang naghunahuna kamo sa inyong oportunidad nga moapil sa buhat sa kaluwasan.
Dapita ang usa ka higala nga motambong niining klase sa pagpangandam sa misyonaryo uban kaninyo. (Mahimo nimong ipadangat kining pagdapit ngadto sa mga estudyante sa katapusan sa matag klase.)
Dapita ang usa ka dili miyembro o dili kaayo aktibo nga miyembro aron magpatudlo sa mga leksyon sa misyonaryo.