Pagtudlo sa Ebanghelyo ni Jesukristo (Part 2)

Pasiuna

Ang ebanghelyo ni Jesukristo naglakip sa mahangturong mga doktrina, mga baruganan, mga balaod, mga pakigsaad, ug mga ordinansa nga gikinahanglan aron ang katawhan makasulod og balik ngadto sa presensya sa Dios ug mahimaya sa celestial nga gingharian. Ang unang mga baruganan ug mga ordinansa sa ebanghelyo mao ang hugot nga pagtuo kang Jesukristo, paghinulsol, bunyag pinaagi sa pagpaunlod, ug gasa sa Espiritu Santo. Ang mga misyonaryo dunay importante nga katungdanan sa pagdapit sa uban nga magpabunyag ug makadawat sa gasa sa Espiritu Santo. Agig dugang, sa higayon nga ang mga anak sa Dios mahimong mga miyembro sa Simbahan, kinahanglan gayud sila nga molahutay hangtud sa katapusan pinaagi sa pagdawat sa ubang mga baruganan ug mga ordinansa ug magpabiling matinuoron sa mga sugo sa Dios. Ang umaabut nga mga misyonaryo kinahanglang dunay klaro nga panabut mahitungod niini nga mga doktrina ug andam nga mopasabut niini sa yanong paagi ug mopamatuod niini uban sa gahum.

Advance nga Pagpangandam

Tun-i ang Mateo 3:13–17; Juan 3:3–6; 2 Nephi 31:17–20; ug Doktrina ug mga Pakigsaad 20:37.
Tun-i ang Isangyaw ang Akong Ebanghelyo, mga pahina 74–77.
Pag-andam aron i-display ang hulagway ni Jesus nga gibunyagan.
Pag-andam aron ipasalida ang video nga “Invitation to Be Baptized: German,” (2:43), The District 2, nga anaa sa LDS.org

Mga Sugyot alang sa Pagtudlo

Bunyag, Ang Atong Unang Pakigsaad

Aron maandam ang mga estudyante sa pagtino sa mga baruganan mahitungod sa bunyag, i-display ang hulagway ni Juan nga nagbunyag kang Jesus, ug dapita ang mga estudyante sa pag-summarize kon unsay ilang nahibaloan mahitungod sa bunyag ni Jesukristo.

Imahe

John and Jesus in river

Si Juan nga nagbunyag kang Jesus

Mahimo nga imong pilion ang pagribyu sa istorya mahitungod sa bunyag sa Manluluwas pinaagi sa pagpabasa og kusog sa usa ka estudyante sa Mateo 3:13–17. Dayon dapita ang mga estudyante sa pag-atubang ngadto sa tawo nga naglingkod sa ilang tupad ug ipatubag kini nga pangutana:

Unsang importante nga mga kamatuoran ang gitudlo diha niini nga istorya mahitungod sa bunyag ni Jesus?

Isulat sa pisara ang mosunod nga mga pulong:

Ordinansa Pakigsaad

Hangyoa ang katunga sa klase nga tun-an ang unang upat ka paragraph diha sa seksyon nga “Bunyag, Ang Atong Unang Pakigsaad” sa pahina 74 sa Isangyaw ang Akong Ebanghelyo, nga mangita sa mga paagi kon unsaon sa pagpasabut ang termino nga ordinansa. Patun-i sa laing katunga sa klase ang samang seksyon, nga mangita sa mga paagi kon unsaon sa pagpasabut ang termino nga pakigsaad.

Sa higayon nga mahatagan na og igong panahon nga makatuon ang mga estudyante, hangyoa ang mga volunteer sa pagtino sa mga termino nga ordinansa ug pakigsaad. Dayon ipangutana:

Sa unsang paagi nga ang mga termino nga ordinansa ug pakigsaad dunay kalabutan sa bunyag? (Tabangi ang mga estudyante nga mahibalo niini nga kamatuoran: Pinaagi sa ordinansa sa bunyag, mohimo kita og sagrado nga pakigsaad ngadto sa Dios.

I-focus ang pagtagad sa imong mga estudyante diha sa ikaupat nga paragraph sa “Bunyag, Ang Atong Unang Pakigsaad” nga seksyon, ug dayon ipangutana:

Sa dihang nakadawat kita sa ordinansa sa bunyag, unsa man ang atong gipakigsaad nga buhaton? (Sa dihang nabunyagan kita, mihimo kita og sagrado nga pakigsaad nga modala diha sa atong kaugalingon sa ngalan ni Jesukristo, sa kanunay mohinumdom Kaniya, ug motuman sa Iyang mga sugo. Kon bation nimo nga nagkinahanglan ang mga estudyante og dugang nga instruksyon kalabut niini nga ideya, mahimo kang mogahin og pipila ka minutos uban kanila aron masusi ang Doktrina ug mga Pakigsaad 20:37.)

Matabangan nimo ang mga estudyante nga mas makasabut sa ilang pakigsaad sa bunyag pinaagi sa pag-display sa mosunod nga kinutlo ni Elder Robert D. Hales sa Korum sa Napulog Duha ka mga Apostoles ug sa pagpabasa niini og kusog sa usa ka estudyante:

Imahe
Elder Robert D. Hales

“Atol sa bunyag mihimo kita og usa ka pakigsaad ngadto sa atong Langitnong Amahan nga andam kita nga moadto sa Iyang gingharian ug motuman sa Iyang mga sugo gikan nianang higayuna, bisan kon nagpuyo pa gihapon kita sa kalibutan. Kita gipahinumduman gikan sa Basahon ni Mormon nga ang atong bunyag usa ka pakigsaad nga ‘mobarug ingon nga mga saksi sa Dios [ug sa Iyang gingharian] sa tanan nga mga panahon ug diha sa tanan nga mga butang, ug diha sa tanan nga mga dapit nga kamo mahimo nga maanaa, bisan hangtud sa kamatayon, nga kamo mahimo nga matubos sa Dios, ug malakip uban niadto nga diha sa unang pagkabanhaw, nga kamo makabaton og kinabuhi nga dayon’ [Mosiah 18:9; emphasis gidugang].

“Kon kita nakasabut sa atong pakigsaad sa bunyag ug sa gasa sa Espiritu Santo, kini mousab sa atong kinabuhi ug moestablisar sa atong hingpit nga pagkamaunungon sa gingharian sa Dios. Kon ang mga tintasyon moabut kanato, kon kita maminaw, ang Espiritu Santo mopahinumdom kanato nga kita misaad sa paghinumdom sa atong Manluluwas ug pagtuman sa mga sugo sa Dios” (“The Covenant of Baptism: To Be in the Kingdom and of the Kingdom,” Ensign, Nob. 2000, 7).

Sa inyong hunahuna unsay buot ipasabut sa “moestablisar sa atong hingpit nga pagkamaunungon sa gingharian sa Dios”?
Sa unsang mga paagi nga ang bunyag makapausab sa kinabuhi sa usa ka tawo?

Dapita ang mga estudyante sa pagbasa sa nahabiling mga paragraph mahitungod sa bunyag diha sa pahina 75 sa Isangyaw ang Akong Ebanghelyo. Hangyoa sila sa pagpangita ug pagmarka sa dugang nga mga aspeto sa doktrina sa bunyag nga importante nga ipakigbahin ngadto sa mga investigator. Hatagi sila og pipila ka gutlo nga makompleto kini nga kalihokan, ug dayon hangyoa ang pipila ka estudyante sa pagpakigbahin sa unsay ilang nakit-an. Samtang motubag ang mga estudyante, mahimo kang mangutana og pang-follow-up nga mga pangutana sama niini:

Nganong importante man nga masabtan sa usa ka investigator kini nga mga doktrina?
Unsa ang relasyon tali sa pakigsaad sa bunyag ug sa mga baruganan sa hugot nga pagtuo kang Jesukristo ug paghinulsol, nga atong gihisgutan sa miaging klase?
Nganong ang pagpaunlod [immersion] usa man ka importanting bahin sa ordinansa sa bunyag? (Nagsimbolo kini sa kamatayon, paglubong, ug Pagkabanhaw ni Jesukristo. Nagsimbolo usab kini sa katapusan sa atong karaan nga kinabuhi ug sa atong pagkatawo pag-usab isip usa ka disipulo ni Kristo [tan-awa sa Mga Taga-Roma 6:3–6].)

Ipasabut nga importante kini nga ang mga investigator mangandam og maayo alang sa bunyag. Hangyoa ang usa ka estudyante sa pagbasa og kusog sa Doktrina ug mga Pakigsaad 20:37. Dayon paatubanga ang mga estudyante ngadto sa laing sakop sa klase ug pahisguti ang mosunod:

Sa unsang paagi nga kining bersikulo makatabang kaninyo sa pagtino kon ang usa ka investigator andam na alang sa bunyag? (Kon ang mga estudyante maglisud sa pagtubag niini nga pangutana, i-refer sila ngadto sa box nga giulohan og “Sa Dili pa ang Bunyag” sa ubos sa pahina 75 sa Isangyaw ang Akong Ebanghelyo.
Sa inyong hunahuna unsa man ang buot ipasabut sa ““moduol nga adunay usa ka masulub-on nga kasingkasing ug usa ka mahinulsulon nga espiritu”?
Sa unsang paagi nga mapakita sa tawo nga sila tinuoray nga “nakadawat sa Espiritu ni Kristo”?

Hatagi ang mga estudyante og gutlo sa pagsulat diha sa ilang mga study journal mahitungod sa piho nga mga paagi nga ang pagtuman sa ilang pakigsaad sa bunyag makadala og mga panalangin diha sa ilang kinabuhi. Human sa igong panahon, hangyoa ang usa o duha ka estudyante sa pagpakigbahin ngadto sa klase sa unsay ilang gisulat.

Ipasalida ang video nga “Invitation to Be Baptized: German” (2:43). Samtang nagtan-aw sa video ang mga estudyante, dapita sila sa pagpangita kon giunsa pagtudlo sa mga misyonaryo si German mahitungod sa kaimportante sa bunyag.

Unsa may gisulti sa mga misyonaryo aron matabangan si German nga makasabut sa kaimportante sa bunyag?
Unsa ang anaa nga ebidensya nga gibati ni German ang Espiritu Santo ug adunay tinguha nga magpabunyag?

Ipares-pares ang klase, ug dapita ang matag parisan sa paggamit sa materyal nga anaa sa mga pahina 74–75 sa Isangyaw ang Akong Ebanghelyo ug usa o duha ka kasulatan gikan sa Pagtuon sa Kasulatan nga box diha sa pahina 75 aron makaandam og upat ngadto sa lima ka minutos nga leksyon nga naka-focus sa pagpaila sa bunyag ngadto sa usa ka investigator. Ang mga estudyante mahimo usab nga mogamit sa materyal diha sa pahina 8 sa pamphlet sa misyonaryo nga Ang Ebanghelyo ni Jesukristo.

Human makabaton og igong panahon nga makaandam ang mga estudyante, organisaha ang klase ngadto sa ginagmayng grupo sa tag-upat ka estudyante, nga dunay duha ka parisan sa matag grupo. Hangyoa ang usa ka parisan sa matag grupo sa pagtudlo sa laing parisan mahitungod sa bunyag sulod sa upat ngadto sa lima ka minutos. Awhaga ang mga estudyante nga nag-acting isip mga misyonaryo sa pagpakli sa ilang pinili nga mga tudling sa kasulatan ug basahon kini og kusog isip kabahin sa ilang pagtudlo. Sa pagtapos sa mga estudyante sa ilang kasinatian sa pagtudlo, pahisguti sa ginagmayng grupo ang mosunod nga sila ra: Unsay nindot nga nahitabo? Sa unsang paagi nga ang leksyon nakatabang niadtong gitudloan nga makasabut sa kaimportante sa bunyag? Unsa man unta ang pwedeng mausab sa mga magtutudlo aron mahimo ang ilang pagtudlo nga mas epektibo?

Dayon, papuli-puliha og papel [role] ug tuguti ang parisan sa mga estudyante nga gitudloan nga maoy motudlo sa laing parisan. Siguroa nga duna pay panahon alang sa ikaduhang parisan sa pagdawat og feedback. Atol niining kalihokan, lakaw libut sa kwarto aron maobserbahan ang mga estudyante nga nagtudlo, ug dayega ug hatagi og mga sugyot kon unsaon nila aron molambo.

Kon ang tanang estudyante nakabaton na og oportunidad nga makatudlo, paggahin og pipila ka minutos aron mahisgutan sa tanan ang kasinatian isip usa ka klase. Sa pagsugod sa panaghisgot, ipangutana ang sama sa mosunod:

Unsa man ang pipila ka mga butang nga inyong nakat-unan gumikan sa pagtudlo niini nga doktrina?
Nganong importante man nga mangandam kamo karon sa pagtudlo niining mga baruganan, mga kamatuoran, ug mga doktrina ngadto sa uban?
Unsa ang butang nga inyong mabuhat karon aron mas maandam sa pagtudlo mahitungod sa ebanghelyo ni Jesukristo sa inyong misyon?

Ang Gasa sa Espiritu Santo

Aron maandam ang mga estudyante alang niining bahina sa leksyon, pangutan-a ang klase kon unsa nga ordinansa ang ipahigayon inighuman dayon nga ang usa ka tawo mabunyagan (pagkumpirma, diin ang mga indibidwal mahimong mga miyembro sa Simbahan ug makadawat sa gasa sa Espiritu Santo.) Hangyoa ang mga estudyante sa paggahin og trayenta segundo sa pagpamalandong kon nganong ang mga tawo kumpirmahan inighuman dayon nga sila mabunyagan. Sa dili pa motubag ang mga estudyante, ikonsiderar ang pagbasa ngadto kanila niining kinutlo ni Propeta Joseph Smith:

Imahe
Prophet Joseph Smith

““Mahimo kamong mobunyag og usa ka bag sa sama sa usa ka tawo, kon kini wala himoa alang sa kapasayloan sa mga sala ug pag-angkon sa Espiritu Santo. Ang bunyag pinaagi sa tubig katunga lamang sa bunyag, ug walay bili kon wala ang laing katunga–—–kana mao, ang bunyag sa Espiritu Santo” (Mga Pagtulun-an sa mga Presidente sa Simbahan: Joseph Smith [2007], 112).

Ipangutana:

Nganong ang bunyag makonsiderar man nga “katunga lamang sa bunyag” kon dili kini pagasundan sa “bunyag sa Espiritu Santo””? (Human sa pipila ka tubag, mahimo nimong awhagon ang mga estudyante sa pagpaminaw alang sa dugang tubag niini nga pangutana samtang magpadayon ang leksyon.)

Pasabta ang mga estudyante nga ang usa ka pangulo sa Judeo nga ginganlan og Nicodemo sekreto nga miadto sa pagkagabii aron mangutana kang Jesus sa Nazaret. Ipabasa og kusog sa usa ka estudyante ang Juan 3:3, ug ipangutana:

Unsa ang gipasabut sa mga pulong sa Manluluwas diha sa Juan 3:3 mahitungod sa unsay gikinahanglan aron makasulod sa gingharian sa Dios?

Basaha ang Juan 3:4–6 ngadto sa klase ug ipangutana:

Unsa man ang gipangutana ni Nicodemo nga nagsugyot nga wala siya makasabut sa pagtulun-an sa Manluluwas diha sa bersikulo 3?
Giunsa man pagtubag ni Jesus ang mga pangutana ni Nicodemo? (Gitudloan Niya si Nicodemo og sukaranang doktrina: Gikinahanglan nga kita igaanak sa tubig ug sa Espiritu aron makasulod sa gingharian sa Dios. Iyang gitudlo nga ang “igaanak pag-usab” nagpasabut sa espirituhanong pagkatawo pag-usab, dili pisikal.)

Isulat sa pisara:

Igaanak pag-usab

Igaanak sa tubig

Igaanak sa Espiritu

Dayon ipangutana:

Unsay buot ipasabut sa “igaanak sa tubig”? (Nagpasabut kini nga bunyagan pinaagi sa pagpaunlod.)
Unsay buot ipasabut sa “igaanak sa Espiritu”? (Nagpasabut kini nga makadawat sa gasa sa Espiritu Santo. Ipasabut nga giklaro sa footnote diha sa LDS English version sa Biblia nga nagpasabut kini sa bunyag sa Espiritu Santo.)
Sa inyong hunahuna ngano kaha nga ang pulong nga “igaanak” gigamit man sa paghulagway sa unsay mahitabo kanato sa espirituhanong paagi? Unsa nga mga aspeto sa pisikal nga pagkatawo ang matandi ngadto sa atong espirituhanong pagkatawo pag-usab? (Kon gikinahanglan, ikonsiderar ang pagbasa sa Moises 6:58–59 aron matabangan nga matubag kini nga pangutana.)

Hangyoa ang pipila ka estudyante nga magpuli-puli sa pagbasa og kusog sa mga paragraph diha sa seksyon nga “Ang Gasa sa Espiritu Santo” sa pahina 76 sa Isangyaw ang Akong Ebanghelyo. Hangyoa ang klase sa pagsunod, nga mangita sa mga panalangin nga nag-uban sa gasa sa Espiritu Santo.

Ipangutana sa klase:

Unsa ang pipila ka panalangin nga nag-uban sa gasa sa Espiritu Santo? (Usa sa mga doktrina nga kinahanglang mahibaloan sa mga estudyante mao kini: Ang gasa sa Espiritu Santo makahatag og makapabalaan ug makapalimpyo nga epekto niadtong mga modawat niini.)

Aron matabangan ang mga estudyante nga mas makasabut sa doktrina, hangyoa sila sa pagtuon sa usa o duha sa mga kasulatan ubos sa heading nga “Mga Panalangin ug Impluwensya gikan sa Espiritu Santo” diha sa Pagtuon sa Kasulatan nga box sa pahina 76 sa Isangyaw ang Akong Ebanghelyo. Samtang magtuon sila, dapita sila sa pag-highlight diha sa ilang mga kasulatan sa pipila ka mga panalangin nga moabut gikan sa pagdawat sa gasa sa Espiritu Santo. Dayon ipangutana:

Nganong importante man nga ang usa ka tawo makadawat sa Espiritu Santo human nga mabunyagan?

Ipangutana ang mosunod, pero sa dili pa motubag ang mga estudyante, hatagi sila og higayon nga mamalandong sa hilum sa ilang mga tubag. Sa higayon nga makabaton na sila og igong panahon, dapita ang pipila ka estudyante sa pagtubag ug sa pagpakigbahin diha sa klase sa ilang kaugalingong mga kasinatian.

Unsa nga mga panalangin ang inyong nadawat gikan sa gasa sa Espiritu Santo?

Ipares-pares ang klase. Hangyoa ang klase sa paggamit sa impormasyon gikan sa Isangyaw ang Akong Ebanghelyo (o sa seksyon nga giulohan og “Nganong Kinahanglan Ko nga Modawat sa Espiritu Santo?” diha sa mga pahina 8–10 sa pamphlet sa misyonaryo nga Ang Ebanghelyo ni Jesukristo) ug pag-andam og upat ngadto sa lima ka minuto nga leksyon mahitungod sa gasa sa Espiritu Santo. Pahinumdumi sila sa paglakip og usa o duha ka kasulatan diha sa ilang leksyon gikan sa Pagtuon sa Kasulatan nga box nga anaa sa ubos sa pahina 76 sa Isangyaw ang Akong Ebanghelyo.

Human mahatagi og igong panahon nga makaandam, organisaha ang mga klase ngadto sa ginagmayng grupo sa tag-upat ka estudyante, nga dunay duha ka parisan sa matag grupo. Hangyoa ang usa ka parisan sa mga estudyante sa pagtudlo sa laing parisan. Samtang magtudlo ang mga estudyante, lakaw libut sa kwarto aron mag-obserbar, modayeg ug mohatag og mga sugyot kon unsaon nila aron molambo. Sa pagtapos sa mga estudyante sa ilang kasinatian sa pagtudlo, pahisguti sa ginagmayng grupo ang mosunod nga sila ra: Unsay nindot nga nahitabo? Unsa man unta ang lahi nga nabuhat sa mga magtutudlo aron mahimo ang ilang pagtudlo nga mas epektibo? Sa unsang paagi nga ang ilang leksyon nakatabang niadtong gitudloan nga makasabut sa gasa sa Espiritu Santo?

Dayon papuli-puliha og papel [role] ang matag parisan, nga magtugot sa parisan sa mga estudyante nga gitudloan nga maoy motudlo sa laing parisan. Siguroa nga duna pay panahon alang sa ikaduhang parisan sa pagdawat og feedback.

Kon ang matag parisan sa mga estudyante nakabaton na og oportunidad nga makatudlo, paggahin og pipila ka minutos sa pag-evaluate sa kasinatian pinaagi sa pagpangutana sama sa mosunod:

Unsa man ang pipila ka mga butang nga inyong nakat-unan gikan sa pagtudlo niini nga doktrina?
Base niini nga kasinatian, unsa man nga butang ang inyong mabuhat aron mapalambo ang inyong pagtudlo isip misyonaryo?

Paglahutay ngadto sa Katapusan

Diha sa pisara, pagdrowing og hulagway sa usa ka ganghaan [gate] nga dunay agianan sa likod niini:

Imahe

gate and path

Hangyoa ang usa ka estudyante sa pagbasa og kusog sa 2 Nephi 31:17. Dayon ipangutana sa klase:

Unsa ang gitino ni Nephi nga mao ang ganghaan paingon sa atong kinabuhing dayon?

Hangyoa ang laing estudyante sa pagbasa og kusog sa 2 Nephi 31:18–20 samtang mosunod ang klase, nga mangita kon unsay kinahanglan natong buhaton human kita mabunyagi.

Unsa man ang giingon ni Nephi nga anaa lapas sa ganghaan? (Ang higpit ug pig-ot nga dalan paingon sa kinabuhing dayon.)
Sumala ni Nephi, unsa man ang kinahanglang buhaton sa usa ka tawo human mabunyagi aron makadawat og kinabuhing dayon?
Sa unsang paagi nga ang paglahutay hangtud sa katapusan may kalabutan sa pagsunod sa ehemplo sa Manluluwas?

Hangyoa ang mga estudyante sa pagbasa sa seksyon nga giulohan og “Paglahutay hangtud sa Katapusan” diha sa pahina 77 sa Isangyaw ang Akong Ebanghelyo. Awhaga sila sa pagpangita kon unsay atong mabuhat aron makalahutay hangtud sa katapusan. Dayon ipangutana:

Nganong importante man nga molahutay kita hangtud sa katapusan? (Ang mga estudyante kinahanglang mahibalo niini nga baruganan: Samtang kinasingkasing kitang maningkamot nga makalahutay hangtud sa katapusan, mahimo kitang kwalipikado alang sa kinabuhing dayon.)
Sa unsang paagi nga ang pagsunod sa ehemplo sa Manluluwas makatabang kaninyo nga makalahutay hangtud sa katapusan?

Tapusa pinaagi sa pagpakigbahin sa imong kaugalingong pagpamatuod sa kaimportante sa ebanghelyo ni Jesukristo, ilabi na sa bunyag, sa gasa sa Espiritu Santo, ug sa paglahutay hangtud sa katapusan.

Mga Pagdapit aron Molihok

Ikonsiderar ang pagdapit sa mga estudyante nga palamboon ang ilang panabut mahitungod sa ebanghelyo ni Jesukristo pinaagi sa pagbuhat sa usa o dugang pa sa mosunod nga mga kalihokan sa umaabut nga semana:

Praktison ang pagpasabut sa mga gikinahanglan alang sa bunyag nga makita diha sa Doktrina ug mga Pakigsaad 20:37. Mosulat og pipila ka sentence diha sa inyong study journal nga naghulagway sa unsay inyong gibuhat karon aron magpakabuhi sumala sa pakigsaad sa bunyag nga gilatid diha niini nga bersikulo.
Basahon ang mga tudling mahitungod sa gasa sa Espiritu Santo nga makita diha sa Pagtuon sa Kasulatan nga box sa pahina 76 sa Isangyaw ang Akong Ebanghelyo. Basahon usab ang nasulat nga “Espiritu Santo” diha sa Ang Giya ngadto sa mga Kasulatan. Markahan diha sa inyong mga kasulatan o isulat diha sa inyong study journal ang mga bersikulo nga gusto ninyong gamiton kon magtudlo og usa ka tawo mahitungod sa gasa sa Espiritu Santo.
Itudlo ang mga baruganan sa “Leksyon 3: Ang Ebanghelyo ni Jesukristo” ngadto sa usa ka sakop sa pamilya o higala (mas maayo kon dili pa miyembro sa Simbahan, o dili kaayo aktibo), sa personal o diha sa internet. Ipakigbahin ang imong kaugalingong pagpamatuod mahitungod niining mga baruganan samtang ikaw nagtudlo niini.