១២
ការស្វែងរកមនុស្សដើម្បីបង្រៀន
សេចក្ដីផ្ដើម
អ្នកផ្សព្វផ្សាយសាសនាពុំអាចចែកចាយដំណឹងល្អបាននោះទេ លើកលែងតែពួកគេស្វែងរកមនុស្សដើម្បីបង្រៀន ។ ការស្វែងរកមនុស្សតម្រូវឲ្យប្រើសេចក្ដីជំនឿ—ជាសេចក្ដីជំនឿដើម្បីនិយាយទៅកាន់មនុស្សអំពីដំណឹងល្អរបស់ព្រះយេស៊ូវគ្រីស្ទ សេចក្ដីជំនឿថានឹងមានឱកាសដើម្បីបង្រៀន និង សេចក្ដីជំនឿថាព្រះនឹងដឹកនាំមនុស្សដែលត្រូវបានរៀបចំឲ្យស្ដាប់ ។ មធ្យោបាយដ៏មានប្រសិទ្ធភាពបំផុតដើម្បីស្វែងរកមនុស្សដើម្បីបង្រៀន គឺតាមរយៈសមាជិកនៃសាសនាចក្រ ។ សមាជិកទាំងអស់នៃសាសនាចក្រ រួមបញ្ចូលទាំងអ្នកដែលត្រៀមខ្លួនធ្វើជាផ្សព្វផ្សាយសាសនា មានការទទួលខុសត្រូវផ្ទាល់ខ្លួន ក្នុងការស្វែងរកមនុស្សដែលត្រៀមខ្លួនជាស្រេចដើម្បីទទួលយកដំណឹងល្អដែលបានស្ដារឡើងវិញ ។ ពួកយុវវ័យអាចត្រៀមខ្លួនសម្រាប់ការបម្រើពេញម៉ោងបាន តាមរយៈការចែកចាយដំណឹងល្អនាពេលឥឡូវនេះ ទាំងដោយផ្ទាល់ ឬ តាមរយៈធនធាននៅលើអ៊ិនធើរណិត ។
ការរៀបចំទុកជាមុន
-
សូមសិក្សា គោលលទ្ធិ និង សេចក្តីសញ្ញា ១៨:១០, ១៤–១៦, ៣៣:៦–១១, ១០០:៥–៦ ។
-
សូមសិក្សា ប្រកាសដំណឹងល្អរបស់យើង ទំព័រ ១៥៩, ១៦៤, ១៦៦, ១៧៤ ។
-
សូមរៀបចំបង្ហាញវីដេអូ « Developing the Faith to Find » ( ២:៥៥ ) The District 1 ដែលមាននៅលើគេហទំព័រ LDS.org ។
-
សូមរៀបចំបង្ហាញវីដេអូ « The Lord of the Harvest: The Adams Family » ( ៤:៤១ ) ដែលមាននៅលើគេហទំព័រ LDS.org ។
-
សូមរៀបចំបង្ហាញវីដេអូ « Sharing Your Beliefs » ( នាទីទី ២:០២ ) ដែលមាននៅលើគេហទំព័រ LDS.org ។
-
សូមចាត់សិស្សម្នាក់ ឬ ពីរនាក់ពីមុនម៉ោង ដើម្បីបង្ហាញរបៀបមួយ ឬ ទាំងពីរខាងក្រោមនេះនៅក្នុងមេរៀន ៖ (១) របៀបប្រើគេហទំព័រ LDS.org ឬ mormon.org ដើម្បីចែកចាយវីដេអូ ឬ ធនធានដទៃទៀតដោយប្រើប្រព័ន្ធផ្សព្វផ្សាយសង្គម និង (២) របៀបបង្កើតប្រវត្តិរូបនៅលើគេហទំព័រ mormon.org ។
យោបល់សម្រាប់ការបង្រៀន
បង្កើនសេចក្ដីជំនឿក្នុងការស្វែងរកមនុស្សដើម្បីបង្រៀន
សូមពន្យល់ថា ប្រធាន វិលហ្វូឌ វូឌដ្រុព្វ បានបម្រើជាអ្នកផ្សព្វផ្សាយនៅប្រទេសអង់គ្លេស ដែលមិនយូរប៉ុន្មានក្រោយមកលោកត្រូវបានតែងតាំងឲ្យធ្វើជាសាវកមួយរូប ។ សូមបង្ហាញ ឬ ឲ្យសិស្សប្តូរវេនគ្នាអានឮៗអំពីដំណើររឿងខាងក្រោម ដើម្បីណែនាំអំពីសារៈសំខាន់នៃការស្វែងរកជំនួយពីព្រះអម្ចាស់ ក្នុងការស្វែងរកមនុស្សដើម្បីបង្រៀន ។ សូមឲ្យសិស្សស្វែងរកថាតើអែលឌើរ វូឌដ្រុព្វ បានធ្វើអ្វីដើម្បីស្វែងរកមនុស្សដើម្បីបង្រៀន ៖
« អែលឌើរ វូឌដ្រុព្វ បានស្វែងរកព្រះអម្ចាស់នៅក្នុងការអធិស្ឋាន … ដោយទូលសួរថាតើលោកគួរតែទៅទីណា ។ លោកបានតំណាល ៖ ‹ ដោយជឿថាវាគឺជាឯកសិទ្ធិ និង ករណីយកិច្ចរបស់ខ្ញុំដែលត្រូវស្គាល់ ព្រះហឬទ័យរបស់ព្រះអម្ចាស់ស្ដីពីប្រធានបទមួយនេះ ហេតុដូច្នេះហើយ ខ្ញុំបានទូលសុំព្រះវរបិតាសួគ៌នៅក្នុងព្រះនាមនៃព្រះយេស៊ូវគ្រីស្ទ ឲ្យទ្រង់ត្រាស់សម្ដែងដល់ខ្ញុំអំពីព្រះហឬទ័យរបស់ទ្រង់ចំពោះកិច្ចការនេះ ហើយនៅពេលខ្ញុំទូលសូមនោះ ព្រះអម្ចាស់បានប្រទាន ហើយបានបង្ហាញខ្ញុំថា នេះគឺជាព្រះហឬទ័យទ្រង់ដែលខ្ញុំគួរតែធ្វើដំណើរទៅភាគខាងត្បូងប្រទេសអង់គ្លេសដោយកុំបង្អង់ឡើយ ។ ខ្ញុំបានពិភាក្សាជាមួយបងប្រុស វិល្លាម បិនបោវ អំពីប្រធានបទនេះ ដែលបានរស់នៅទីក្រុង ហៀហ្វដសៀរ ហើយមានមិត្តភក្ដិជាច្រើននៅតែរស់នៅទីនោះ ហើយវានឹងជារឿងឈ្លាសវៃបំផុតប្រសិនបើខ្ញុំទៅដល់តំបន់មួយនោះ ហើយ [ គាត់ ] បានស្ម័គ្រចិត្តជូនខ្ញុំទៅដោយសណ្ដានចិត្តដ៏ល្អទៅកាន់ផ្ទះបងប្រុសរបស់គាត់ ថែមទាំងបានបង់ថ្លៃសោហ៊ុយឲ្យខ្ញុំ ហើយខ្ញុំបានទទួលយកសណ្ដានចិត្តនោះដោយរីករាយ ។
« នៅថ្ងៃទី ៤ ខែ មិនា ឆ្នាំ ១៨៤០ អែលឌើរ វូឌដ្រុព្វ និង វិល្លាម បិនបោវ បានធ្វើដំណើរទៅដល់ផ្ទះបងប្រុសរបស់វិល្លាម គឺបងប្រុស ចន ។ ប្រធាន វូឌដ្រុព្វ បានចាំថា ‹ នៅមួយម៉ោងបន្ទាប់ពីខ្ញុំបានទៅដល់ផ្ទះរបស់គាត់ ខ្ញុំបានដឹងអំពីមូលហេតុដែលព្រះអម្ចាស់បានបញ្ជូនខ្ញុំមកទីនេះ ។ … ខ្ញុំបានឃើញបុរស និង ស្ត្រីមួយក្រុមធំ ប្រហែលប្រាំមួយរយនាក់ បញ្ចូលគ្នាជាក្រុមមួយឈ្មោះបងប្អូនរួមសាមគ្គី ហើយបានធ្វើការតាមរបៀបពីបូរាណ ។ ពួកគេចង់បានដំណឹងល្អដែលត្រូវបានបង្រៀនពួកព្យាការី និង សាវក ដូចដែលខ្ញុំបានទទួលក្នុងយុវវ័យរបស់ខ្ញុំដែរ › ។
« តាមរយៈការសិក្សាព្រះគម្ពីរប៊ីបដោយឧស្សាហ៍ព្យាយាម ចន បិនបោវ និងក្រុមគ្រួសារ ព្រមទាំងមិត្តភក្ដិទាំងឡាយរបស់គាត់ បានត្រៀមខ្លួនឱបក្រសោបយកដំណឹងល្អដែលបានស្ដារឡើងវិញ ។
« ក្រុមគ្រួសារ បិនបោវ បានទទួលយកសារលិខិតនៃការស្ដារឡើងវិញដោយមិនបង្អង់ ចំណែកឯ វិល្លាម បានធ្វើដំណើរត្រឡប់ទៅកាន់ទីក្រុង ស្តាហ្វដសៀរ វិញ បន្ទាប់ពីមានឯកសិទ្ធិដ៏រីករាយដើម្បីឃើញបងប្រុសគាត់គឺ ចន បិនបោវ និង ក្រុមគ្រសារទាំងមូល … បានទទួលពិធីបុណ្យជ្រមុជទឹកចូលទៅក្នុងសេចក្ដីសញ្ញាថ្មី និង អស់កល្បអស់កាលជានិច្ច › ។ អែលឌើរ វូឌដ្រុព្វ បានបម្រើនៅក្នុងតំបន់នោះអស់រយៈពេលប្រាំបីខែ ។ ក្រោយមក គាត់បាននៅចាំ ៖ នៅសាមសិបថ្ងៃដំបូងបន្ទាប់ពីខ្ញុំបានទៅដល់ទីក្រុង ហៀហ្វដសៀរ ខ្ញុំបានធ្វើពិធីបុណ្យជ្រមុជទឹកឲ្យគ្រូគង្វាលសែបសិបប្រាំនាក់ និង សមាជិកពួកគេបីបួនរយនាក់ ។ … យើងបាននាំមនុស្សមកស្គាល់សេចក្ដីពិតចំនួនពីរពាក់នាក់ ក្នុងរយៈពេលប្រមាណជាប្រាំបីខែក្រោយមក › ។
« យោងតាមបទពិសោធន៍នេះ ប្រធាន វូឌដ្រុព្វ បានសរសេរ ៖ ‹ រឿងរ៉ាវទាំងស្រុងនៅក្នុងបេសកកម្មហៀហ្វដសៀរនេះ បង្ហាញអំពីសារៈសំខាន់នៃការស្ដាប់តាមព្រះសូរសៀងដ៏តូចរហៀងរបស់ព្រះ និង វិវរណៈមកពីព្រះវិញ្ញាណបរិសុទ្ធ ។ ព្រះអម្ចាស់បានរៀបចំមនុស្សនៅទីនោះជាស្រេច ដើម្បីទទួលយកដំណឹងល្អ ។ មនុស្សទាំងនោះបានអធិស្ឋានទូលសុំពន្លឺ និង សេចក្តីពិត ហើយព្រះអម្ចាស់ទ្រង់បានបញ្ជូនខ្ញុំឲ្យទៅរកពួកគេ › » (Teachings of Presidents of the Church: Wilford Woodruff [ ឆ្នាំ ២០០៤ ] ទំព័រ ៩០–៩១ ) ។
សូមសួរសិស្ស ៖
-
តើអែលឌើរ វូឌដ្រុព្វ បានធ្វើអ្វី ដើម្បីដឹងអំពីទីកន្លែងដែលត្រូវស្វែងរកមនុស្សដែលត្រៀមខ្លួនជាស្រេចដើម្បីទទួលយកដំណឹងល្អ ?
-
តើព្រះអម្ចាស់បានជួយអែលឌើរ វូឌដ្រុព្វ តាមរបៀបណាខ្លះ ? ( អ្នកអាចចង្អុលបង្ហាញដល់សិស្សថា ព្រះអម្ចាស់ពុំគ្រាន់តែបានបំផុសគំនិតអែលឌើរ វូឌដ្រុព្វ ឲ្យធ្វើដំណើរទៅភាគខាងត្បូងនៃប្រទេសអង់គ្លេសនោះទេ ប៉ុន្តែទ្រង់ថែមទាំងបានបើកផ្លូវឲ្យអែលឌើរ វូឌដ្រុព្វ បង្រៀននៅកសិដ្ឋានរបស់ ចន បិនបោវ ជាកន្លែងដែលមានបុរស និង ស្ត្រីរាប់រយនាក់ត្រូវបានរៀបចំឲ្យទទួលយកដំណឹងល្អដែលបានស្ដារឡើងវិញ ) ។
-
តើគោលការណ៍ណាមួយអំពីការស្វែងរកមនុស្សដើម្បីបង្រៀន ដែលត្រូវបានបង្ហាញនៅក្នុងប្រវត្តិរបស់អែលឌើរ វូឌដ្រុព្វ ? ( ចម្លើយរបស់សិស្សអាចត្រូវបានសង្ខេប ដោយសរសេរគោលការណ៍ដូចតទៅនេះនៅលើក្ដារខៀន ៖ ព្រះអម្ចាស់អាចជួយយើងស្វែងរកមនុស្សដែលត្រូវបានរៀបចំឲ្យទទួលយកដំណឹងល្អនៅពេលយើងអធិស្ឋានទូលសូមជំនួយ ស្ដាប់តាមព្រះវិញ្ញាណ ហើយប្រព្រឹត្តដោយសេចក្ដីជំនឿ ) ។
សូមឲ្យសិស្សបើកទៅទំព័រ ១៥៩ នៅក្នុង ប្រកាសដំណឹងល្អរបស់យើង រួចឲ្យសិស្សម្នាក់អានឮៗ នៅក្នុងកថាខណ្ឌទីមួយក្រោមចំណុច « ការអភិវឌ្ឍសេចក្ដីជំនឿដើម្បីស្វែងរក » ។ បន្ទាប់មក សូមសួរ ៖
-
តើការដឹងថា « ព្រះអម្ចាស់កំពុងរៀបចំមនុស្សឲ្យទទួលអ្នក និង ដំណឹងល្អដែលបានស្ដារឡើងវិញ » អាចជួយជំរុញចិត្តអ្នកឲ្យត្រៀមខ្លួនបម្រើបេសកកម្មយ៉ាងដូចម្ដេច ?
សូមឲ្យសិស្សអានកថាខណ្ឌបន្ទាប់នៅទំព័រ ១៥៩ នៅក្នុង ប្រកាសដំណឹងល្អរបស់យើង ក្រោមចំណុចតូច « គ្រួសារនៃព្រះ » ។ បន្ទាប់មក សូមសួរ ៖
-
តើគោលលទ្ធិដែលថាបុរស និង ស្ត្រីគឺជាសមាជិកក្នុងគ្រួសារនៃព្រះ មានឥទ្ធិពលលើមនោសញ្ចេតនារបស់អ្នកក្នុងការស្វែងរកមនុស្សដើម្បីបង្រៀនយ៉ាងដូចម្ដេច ?
-
នៅក្នុងពាក្យដកស្រង់ចេញពី អាលម៉ា ៣១:៣៤–៣៥ តើអាលម៉ាបានអធិស្ឋានដូចម្ដេច នៅពេលលោកបានត្រៀមខ្លួនប្រកាសដំណឹងល្អទៅកាន់សាសន៍សូរាំ ?
-
តើយើងអាចរៀនអ្វីខ្លះ ចេញពីការអធិស្ឋានរបស់អាលម៉ា ?
សូមបង្ហាញវីដេអូ « Developing the Faith to Find » ( នាទីទី ២:៥៥ ) រួចឲ្យសិស្សស្វែងរកការយល់ដឹងនានាអំពីការស្វែងរកមនុស្សដើម្បីបង្រៀន ។ អ្នកអាចលើកទឹកចិត្តសិស្សឲ្យកត់ចំណាំ អ្វីដែលពួកគេបានរៀន ។
សូមសួរ ៖
-
តើការយល់ដឹងអ្វីខ្លះអំពីការស្វែងរកមនុស្សដើម្បីបង្រៀន ដែលអ្នកផ្សព្វផ្សាយសាសនាបានផ្ដល់ឲ្យនៅក្នុងវីដេអូនេះ ? ( សិស្សអាចផ្ដល់ចម្លើយដូចខាងក្រោម ៖ អ្នកផ្សព្វផ្សាយសាសនាគួរតែអធិស្ឋានដើម្បីមានឱកាស ស្រឡាញ់មនុស្សទូទៅ និង មើលទៅពួកគេដូចជាព្រះទ្រង់ទតពួកគេដែរ ហើយចងចាំថា ព្រះអម្ចាស់កំពុងរៀបចំបុត្រាបុត្រីទ្រង់ឲ្យទទួលយកដំណឹងល្អ ហើយកំពុងដឹកនាំអ្នកផ្សព្វផ្សាយសាសនារបស់ទ្រង់ទៅស្វែងរកពួកគេ ។ ដោយសារព្រះទ្រង់មានព្រះទ័យស្រឡាញ់បុត្រាបុត្រីទ្រង់ ទើបទ្រង់សព្វព្រះហឫទ័យឲ្យមនុស្សគ្រប់រូប មានឱកាសស្ដាប់ឮ ហើយទទួលយកដំណឹងល្អ ) ។
-
ហេតុអ្វីបានជាសំខាន់ដែលត្រូវប្រព្រឹត្តតាមអារម្មណ៍នានា ដើម្បីឈោងទៅជួយមនុស្សទូទៅ ហើយអញ្ជើញពួកគេឲ្យរៀនដំណឹងល្អ ?
សូមឲ្យសិស្សអានកថាខណ្ឌទាំងបីនៅក្រោមចំណុច « ស្វែងរកពួកគេដែលនឹងទទួលអ្នក » នៅទំព័រ ១៦០ នៅក្នុង ប្រកាសដំណឹងល្អរបស់យើង ។ បន្ទាប់មក សូមសួរ ៖
-
តើមានឧបសគ្គអ្វីខ្លះ ដែលយើងអាចជួបប្រទះនៅពេលយើងព្យាយាមស្វែងរកមនុស្សដើម្បីបង្រៀន ? ( ជាធម្មតាយើងពុំដឹងថា នរណាដែលត្រៀមខ្លួនជាស្រេចដើម្បីទទួលដំណឹងល្អនោះទេ ) ។ មនុស្សទូទៅអាចពុំដឹងភ្លាមៗថា យើងគឺជាអ្នកបម្រើរបស់ព្រះអម្ចាស់នោះទេ ។ ពួកគេអាចពុំដឹងខ្លួនគេថាកំពុងស្វែងរកដំណឹងល្អ ដែលបានស្ដារឡើងវិញឡើយ ) ។
-
តើព្រះអម្ចាស់ជួយយើង ក្នុងការស្វែងរកមនុស្សដើម្បីបង្រៀនយ៉ាងដូចម្ដេច ? ( ទ្រង់បញ្ជូនព្រះវិញ្ញាណបរិសុទ្ធឲ្យមកដឹកនាំយើង ) ។
-
តើអ្នកគិតថា ព្រះអម្ចាស់នឹងមានព្រះទ័យឲ្យអ្នកផ្សព្វផ្សាយសាសនារបស់ទ្រង់ធ្វើដូចម្ដេច នៅពេលពួកគេពុំឃើញលទ្ធផលភ្លាមៗចេញពីកិច្ចខិតខំរបស់ខ្លួនដើម្បីស្វែងរកមនុស្សដើម្បីបង្រៀន ?
ប្រសិនបើមានសិស្សដែលជាអ្នកប្រែចិត្តជឿមកក្នុងសាសនាចក្រ សូមគិតដល់ការអញ្ជើញពួកគេម្នាក់ ឬ ច្រើនឲ្យចែកចាយអំពីថាតើពួកគេបានមកស្គាល់សាសនាចក្រ និងថាតើពួកគេបានដឹងថាអ្នកផ្សព្វផ្សាយសាសនាកំពុងបង្រៀនសេចក្ដីពិតដល់ពួកគេយ៉ាងដូចម្ដេច ។ ប្រសិនបើគ្មានអ្នកប្រែចិត្តជឿក្នុងថ្នាក់ទេ សូមឲ្យសិស្សគិតអំពីអ្នកប្រែចិត្តជឿដែលពួកគេស្គាល់ច្បាស់នៅក្នុងក្រុមគ្រួសារ ឬ វួដរបស់ពួកគេ ។ សូមគិតដល់ការអញ្ជើញពួកគេឲ្យចែកចាយអំពី របៀបដែលបុគ្គលនោះបានទទួលយកដំណឹងល្អ ។
សារៈសំខាន់នៃកិច្ចការផ្សព្វផ្សាយសាសនារបស់សមាជិក
សូមបង្ហាញសេចក្ដីថ្លែងការណ៍ខាងក្រោមដោយប្រធាន ថូម៉ាស អេស ម៉នសុន ហើយសូមឲ្យសិស្សម្នាក់អានវាឮៗ ៖
« ឥឡូវដល់ពេលហើយសម្រាប់សមាជិក និងអ្នកផ្សព្វផ្សាយសាសនាដែលត្រូវសហការជាមួយគ្នា ធ្វើការរួមគ្នានៅក្នុងចម្ការព្រះអម្ចាស់ ដើម្បីនាំព្រលឹងទាំងឡាយមករកទ្រង់ ។ ទ្រង់បានរៀបចំមធ្យោបាយឲ្យយើងចែកចាយដំណឹងល្អតាមរបៀបជាច្រើន ហើយទ្រង់នឹងជួយយើងក្នុងកិច្ចការយើង បើយើងនឹងធ្វើកិច្ចការដោយសេចក្ដីជំនឿ ដើម្បីបំពេញកិច្ចការទ្រង់នោះ » ( « Faith in the Work of Salvation » [ សុន្ទរកថាផ្ដល់ឲ្យអំឡុងការចាក់ផ្សាយថ្នាក់ដឹកនាំទូទាំងពិភពលោកស្ដីពីកិច្ចការនៃសេចក្ដីសង្គ្រោះ ថ្ងៃទី ២៣ ខែ មិថុនា ឆ្នាំ ២០១៣ ] ) ។
អ្នកអាចនឹងសួរសំណួរដូចខាងក្រោម ៖
-
ហេតុអ្វីបានជាការចងចាំថា ព្យាការីរបស់ព្រះបានស្នើឲ្យយើងរួមចំណែកក្នុងកិច្ចការផ្សព្វផ្សាយសាសនារបស់សមាជិក គឺជារឿងសំខាន់ ? ( អ្នកអាចគិតដល់ការយោងទៅកាន់ គោលលទ្ធិ និង សេចក្តីសញ្ញា ៨៨:៨១ ដែលលើកឡើងអំពីការរំពឹងទុករបស់ព្រះអម្ចាស់ ចំពោះអ្នកដែលបានទទួលយកដំណឹងល្អ ) ។
-
តើអ្នកគិតថា ហេតុអ្វីបានជាប្រធាន ម៉នសុន បានមានប្រសាសន៍ថា « ឥឡូវដល់ពេលហើយ » សម្រាប់សមាជិក និងអ្នកផ្សព្វផ្សាយសាសនាត្រូវសហការជាមួយគ្នា ?
សូមឲ្យសិស្សបើកទៅទំព័រ ១៦៤ នៅក្នុង ប្រកាសដំណឹងល្អរបស់យើង រួចឲ្យសិស្សបីនាក់ដាក់វេនគ្នាអានឮៗ នៅក្នុងកថាខណ្ឌទាំងបីដំបូងក្រោមចំណុច « សារៈសំខាន់របស់សមាជិក » ។ បន្ទាប់មក សូមសួរ ៖
-
តើអាចមានលទ្ធផលដូចម្ដេចកើតឡើង នៅពេលសមាជិក និង អ្នកផ្សព្វផ្សាយសាសនាធ្វើការជាមួយគ្នាដើម្បីប្រកាសដំណឹងល្អ ? ( ចម្លើយរបស់សិស្សអាចបូកបញ្ចូលគោលការណ៍នេះ ៖ នៅពេលសមាជិកអញ្ជើញមនុស្សដទៃឲ្យរៀនដំណឹងល្អ ហើយមានវត្តមាននៅពេលបង្រៀន នោះនឹងមានមនុស្សកាន់តែច្រើនទទួលពិធីបុណ្យជ្រមុជទឹក ហើយបន្តនៅសកម្មក្នុងសាសនាចក្រ ) ។
សូមបង្ហាញវីដេអូ « The Lord of the Harvest: The Adams Family » ( ៤:៤១ ) រួចឲ្យសិស្សយកចិត្តទុកដាក់ទៅលើអ្វីដែលសមាជិកនៃសាសនាចក្របានធ្វើ ដើម្បីជួយក្រុមគ្រួសារអ័ដាម ឲ្យទទួលយកពរជ័យទាំងឡាយនៃដំណឹងល្អ ។
សូមសួរ ៖
-
តើមានការប្រឹងប្រែងអ្វីខ្លះ ដែលបាននាំឲ្យក្រុមគ្រួសារអ័ដាម ទទួលយកពរជ័យទាំងឡាយនៃដំណឹងល្អ ?
-
តើអ្នកគិតថា អ្វីដែលបានជំរុញចិត្តឲ្យសមាជិកនៅក្នុងវីដេអូនេះ ចែកចាយដំណឹងល្អជាមួយក្រុមគ្រួសារអ័ដាម ?
សូមឲ្យសិស្សអានឮៗ នូវកថាខណ្ឌទាំងពីរនៅក្នុងចំណុចក្រោមចំណងជើង « គ្មានការប្រឹងប្រែងណា ដែលឥតប្រយោជន៍នោះទេ » នៅក្នុង ប្រកាសដំណឹងល្អរបស់យើង ទំព័រ ១៧៤ ។ បន្ទាប់មក សូមគិតដល់ការសួរសំណួរដូចខាងក្រោម ៖
-
ប្រសិនបើមនុស្សពុំទទួលយកការអញ្ជើញឲ្យរៀនដំណឹងល្អដែលបានស្ដារឡើងវិញទេនោះ ហេតុអ្វីបានជាគ្មានការប្រឹងប្រែងក្នុងការបម្រើ និង បង្រៀនណាដែលឥតប្រយោជន៍ ?
-
តើអ្នកផ្សព្វផ្សាយសាសនាអាចបន្តមានឥរិយាបទល្អ នៅពេលមនុស្សពុំជ្រើសរើសរៀនដំណឹងល្អយ៉ាងដូចម្ដេច ?
សូមឲ្យសិស្សចែកចាយអ្វីដែលពួកគេបានធ្វើកន្លងមកនេះ ដើម្បីរួមចំណែកក្នុងកិច្ចការផ្សព្វផ្សាយសាសនារបស់សមាជិក ។ សូមឲ្យពួកគេពន្យល់ថាតើពួកគេបានមានអារម្មណ៍ដូចម្ដេច នៅពេលពួកគេព្យាយាមចែកចាយដំណឹងល្អជាមួយមនុស្សទូទៅ ។
ការរួមចំណែកនៅក្នុងកិច្ចការផ្សព្វផ្សាយសាសនារបស់សមាជិក
សូមសរសេរបទគម្ពីរខាងក្រោមនេះដាក់នៅលើក្ដារខៀន ក្រោយមកឲ្យសិស្សម្នាក់ៗអានដោយស្ងៀមស្ងាត់នូវវគ្គបទគម្ពីរទាំងនោះ ហើយស្វែងរកពរជ័យដែលបានសន្យាដល់អ្នកទាំងឡាយណាដែលជ្រើសរើសរួមចំណែកនៅក្នុងកិច្ចការផ្សព្វផ្សាយសាសនា ។
បន្ទាប់ពីបានទុកពេលវេលាបន្តិចឲ្យសិស្សរំឭកវគ្គបទគម្ពីរដែលពួកគេបានជ្រើសរើសហើយ សូមឲ្យសិស្សពន្យល់អំពីខគម្ពីរដែលពួកគេបានអាន ហើយចែកវាយអំពីរបៀបដែលពរជ័យទាំងឡាយអាចជំរុញចិត្តពួកគេឲ្យស្វែងរកមនុស្ស ដើម្បីឲ្យពួកគេទទួលយកសារលិខិតនៃដំណឹងល្អ ។ សូមលើកទឹកចិត្តសិស្សទាំងអស់ ឲ្យរួមចំណែកក្នុងការពិភាក្សានេះ ។ អ្នកអាចសរសេរចម្លើយរបស់សិស្ស ដាក់នៅលើក្ដារខៀនក្បែរបទគម្ពីរដែលត្រូវគ្នា ។
សូមគិតដល់ការសរសេរគោលការណ៍ខាងក្រោមនេះ នៅលើក្ដារខៀន ៖ ក្នុងនាមជាសមាជិកអ្នកផ្សព្វផ្សាយសាសនា យើងអាចចាប់ផ្ដើមនាពេលឥឡូវនេះ ដើម្បីស្វែងរកមនុស្សឲ្យអ្នកផ្សព្វផ្សាយសាសនាបង្រៀន ។
ដើម្បីជួយសិស្សយល់អំពីរបៀបដែលពួកគេអាចរួមចំណែកក្នុងកិច្ចការផ្សព្វផ្សាយសាសនារបស់សមាជិកបានកាន់តែប្រសើរ សូមឲ្យសិស្សម្នាក់អានឮៗអំពីប្រសាសន៍ដកស្រង់ចេញពី អែលឌើរ អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់ ។ សូមឲ្យសិស្សក្នុងថ្នាក់ស្ដាប់ស្វែងរកដំបូន្មាន ស្ដីពីរបៀបបង្កើនទំនុកចិត្ត និង ភាពក្លាហានក្នុងការបង្រៀនមនុស្សទូទៅ ៖
« បងប្អូនប្រុសស្រី ភាពភ័យខ្លាចនឹងជំនួសដោយជំនឿ និង ទំនុកចិត្ត នៅពេលសមាជិក និងអ្នកផ្សព្វផ្សាយសាសនាពេញម៉ោង លុតជង្គង់ចុះអធិស្ឋាន ហើយទូលសុំព្រះអម្ចាស់ ឲ្យប្រទានពរដល់ពួកគេដើម្បីមានឱកាសផ្សព្វផ្សាយសាសនា ។ បន្ទាប់មក យើងត្រូវតែបង្ហាញជំនឿយើង ហើយរកឱកាសណែនាំដំណឹងល្អរបស់ព្រះយេស៊ូវគ្រីស្ទទៅដល់បុត្រាបុត្រីព្រះវរបិតាសួគ៌ ប្រាកដណាស់ ឱកាសទាំងនោះនឹងពិតជាមាន ។ ឱកាសទាំងនេះ នឹងពុំតម្រូវឲ្យមានការឆ្លើយតបមកវិញដោយបង្ខំ ឬដូចដែលបានគ្រោងទុកនោះទេ ។ វានឹងមកជាផលនៃសេចក្ដីស្រឡាញ់ចំពោះបងប្អូនប្រុសស្រីយើង ។ ចូរមានភាពវិជ្ជមាន ហើយអ្នកដែលអ្នកនិយាយជាមួយ នឹងទទួលអារម្មណ៍ពីសេចក្ដីស្រឡាញ់របស់អ្នក ។ ពួកគេនឹងមិនភ្លេចអារម្មណ៍នោះទេ ទោះជាពួកគេពុំទាន់ដល់ពេលទទួលយកដំណឹងល្អក៏ដោយ ។ មានការផ្លាស់ប្ដូរយ៉ាងច្រើននាពេលអនាគត ជាពេលដែលស្ថានភាពពួកគេផ្លាស់ប្ដូរ ។
« យើងពុំអាចបរាជ័យបានឡើយ ពេលយើងខិតខំអស់ពីសមត្ថភាព ពេលយើងធ្វើកិច្ចការរបស់ព្រះអម្ចាស់ ។ ទោះជាអ្វីដែលស្ដែងចេញមក ជាលទ្ធផលមួយបានមកពីការប្រើសិទ្ធិជ្រើសរើសរបស់បុគ្គលម្នាក់យ៉ាងណាក្ដី ក៏ការចែកចាយដំណឹងល្អ គឺជាការទទួលខុសត្រូវរបស់យើងដែរ ។
« ចូរទុកចិត្តលើព្រះអម្ចាស់ ។ ទ្រង់ជាអ្នកគង្វាលល្អ ។ ទ្រង់ស្គាល់ចៀមទ្រង់ ហើយចៀមទ្រង់ស្គាល់ព្រះសូរសៀងទ្រង់ ហើយសព្វថ្ងៃនេះ សំឡេងនៃអ្នកគង្វាលល្អ គឺជាសំឡេងរបស់អ្នក និង ខ្ញុំ ។ ហើយបើយើងពុំរួមចំណែកទេនោះ មានមនុស្សជាច្រើននឹងពុំបានឮសារលិខិតនៃការស្ដារឡើងវិញឡើយ ។ វាថ្លែងដោយសាមញ្ញថា វាសំខាន់លើជំនឿ និងសកម្មភាពរបស់យើង ។ គោលការណ៍គឺសាមញ្ញណាស់-- អធិស្ឋានដោយផ្ទាល់ខ្លួន និងជាមួយគ្រួសារដើម្បីមានឱកាសផ្សព្វផ្សាយសាសនា ។ …
« អ្នកពុំចាំបាច់ជាមនុស្សឆ្លាតវៃ ឬ ជាគ្រូបង្រៀនប្រសព្វខាងនិយាយទាក់ទាញនោះទេ ។ បើអ្នកមានសេចក្ដីស្រឡាញ់ និងសង្ឃឹមជាប់ក្នុងខ្លួនអ្នក នោះព្រះអម្ចាស់សន្យាថា បើអ្នក « បន្លឺសំឡេងរបស់អ្នកឡើងដល់ប្រជាជននេះ [ ហើយ ] ប្រាប់គំនិតទាំងឡាយដែល [ ទ្រង់ ] នឹងដាក់ក្នុងចិត្តរបស់អ្នករាល់គ្នា … អ្នកនឹងមិនត្រូវបានធ្វើឲ្យខ្មាស់ នៅចំពោះមនុស្សលោកឡើយ ។
« ‹ [ ហើយ ] សេចក្ដីដែលអ្នកត្រូវនិយាយ … នឹងបានប្រទានដល់អ្នកនៅម៉ោងនោះ › ( គ. និង ស. ១០០:៥–៦ ) » ( « Put Your Trust in the Lord » Ensign ឬ Liahona ខែ វិច្ឆិកា ឆ្នាំ ២០១៣ ទំព័រ ៤៤ ) ។
សូមសួរ ៖
-
តើអែលឌើរ បាឡឺដ បានណែនាំថាសមាជិកអាចធ្វើអ្វីខ្លះ ដើម្បីបង្កើនទំនុកចិត្តកាន់តែខ្លាំងក្នុងការណែនាំដំណឹងល្អដល់មនុស្សទូទៅ ?
-
តើការស្វែងរកមនុស្សដើម្បីបង្រៀន គឺជាកត្តាទាក់ទងនឹងជំនឿតាមរបៀបណា ?
សូមឲ្យសិស្សចំណាយពេលបន្តិច ដើម្បីសិក្សាបញ្ជីនៅក្នុង « គំនិតសម្រាប់ជួយសមាជិក » នៅទំព័រ ១៦៦ នៅក្នុង ប្រកាសដំណឹងល្អរបស់យើង រួចស្វែងរកមធ្យោបាយជាក់លាក់ៗដែលសមាជិក អាចរួមចំណែកក្នុងកិច្ចការផ្សព្វផ្សាយសាសនា ។ សូមឲ្យសិស្សជ្រើសរើសយោបល់មួយ ឬ ពីរដែលពួកគេអាចប្រើនាពេលឥឡូវនេះដើម្បីរួមចំណែកក្នុងកិច្ចការផ្សព្វផ្សាយសាសនារបស់សមាជិក ។ បន្ទាប់មក សូមសួរ ៖
-
តើយោបល់ណាមួយដែលអ្នកអាចធ្វើនាពេលឥឡូវនេះ ដើម្បីអញ្ជើញមនុស្សទូទៅឲ្យស្ដាប់សារលិខិតនៃដំណឹងល្អ ?
-
តើអ្នកគិតថាហេតុអ្វីបានជាសមាជិកមួយចំនួននៃសាសនាចក្រ ស្ទាក់ស្ទើរក្នុងការជួយមនុស្សដទៃតាមរបៀបដែលមាននៅក្នុងបញ្ជីនេះ ?
សូមលើកទឹកចិត្តសិស្សឲ្យចំណាយពេលបន្តិច ដើម្បីសរសេរកិច្ចការពីរបីដែលពួកគេនឹងធ្វើ ដើម្បីស្វែងរកមនុស្សឲ្យអ្នកផ្សព្វផ្សាយសាសនាបង្រៀន ។ សូមណែនាំសិស្សថា ផែនការរបស់ពួកគេអាចមានប្រសិទ្ធភាពកាន់តែខ្លាំង ប្រសិនបើពួកគេសរសេរឈ្មោះមិតភក្ដិ និង សមាជិកគ្រួសារដែលមិនមែនសមាជិកសាសនាចក្រ ដែលពួកគេអាចចែកចាយសារលិខិតនៃដំណឹងល្អជាមួយ ។ អ្នកអាចណែនាំឲ្យសិស្សដាក់បញ្ចូលសកម្មភាពដូចជា ការអធិស្ឋានជាទៀងទាត់ដើម្បីមានឱកាសផ្សព្វផ្សាយសាសនា ការឈោងទៅជានិយាយជាមួយមនុស្សទូទៅអំពីប្រធានបទនៃដំណឹងល្អ ការអញ្ជើញមនុស្សទូទៅឲ្យមកសកម្មភាពថ្វាយបង្គំ ឬ សកម្មភាពដទៃៗទៀតនៃសាសនាចក្រ ការអញ្ជើញមនុស្សទូទៅឲ្យស្ដាប់ការបង្រៀនរបស់អ្នកផ្សព្វផ្សាយសាសនា ការអញ្ជើញមនុស្សទូទៅឲ្យអានព្រះគម្ពីរមរមន ជាដើម ។ នៅពេលព្រះវិញ្ញាណដឹកនាំ អ្នកអាចហៅសិស្សពីរបីនាក់ ឲ្យចែកចាយផែនការរបស់ពួកគេដល់មិត្តរួមថ្នាក់ ។
ប្រើរាល់ឧបករណ៍ដែលព្រះបានរៀបចំទុក
សូមឲ្យសិស្សម្នាក់អានឮៗ នូវសេចក្ដីថ្លែងការណ៍ខាងក្រោមនេះដោយអែលឌើរ អិល ថម ភែរី ក្នុងកូរ៉ុមនៃពួកសាវកដប់ពីរនាក់ ហើយឲ្យសិស្សក្នុងថ្នាក់ស្ដាប់ថាតើដំណើរការនៃការស្វែងរកមនុស្សដើម្បីបង្រៀនកំពុងមានការផ្លាស់ប្ដូរដូចម្ដេចដែរ ៖
« កាលខ្ញុំនៅជាអ្នកផ្សព្វផ្សាយសាសនាវ័យក្មេង យើងអាចនិយាយជាមួយដែលយើងទាក់ទងនៅតាមផ្លូវ និង គោះទ្វារផ្ទះដើម្បីចែកចាយដំណឹងល្អ ។ ពិភពលោកបានផ្លាស់ប្ដូរចាប់តាំងពីពេលនោះមក ។ សព្វថ្ងៃនេះ មនុស្សជាច្រើនជាប់ក្នុងភាពមមាញឹកនៃជីវិតរស់នៅប្រចាំថ្ងៃ ។ ពួកគេប្រញាប់ទៅទីនេះ ទៅទីនោះ ហើយជារឿយៗពួកគេពុំចង់អនុញ្ញាតឲ្យមនុស្សប្លែកមុខចូលទៅក្នុងផ្ទះរបស់គេ ដោយមិនបានអញ្ជើញ ទៅចែកចាយដំណឹងល្អដែលបានស្ដារឡើងវិញឡើយ ។ ចំណុចសំខាន់នៃការទាក់ទងជាមួយមនុស្សទូទៅ ទោះជាមិត្តជិតស្និទ្ធក្ដី ជាញឹកញាប់តាមរយៈអ៊ិនធើរណិត ។ ហេតុដូច្នេះហើយ លក្ខណៈដ៏ពិសេសនៃកិច្ចការផ្សព្វផ្សាយសាសនា ត្រូវតែ ‹ ចេញពីគ្រប់ទិសទាំងបួននៃផែនដី › [ នីហ្វៃទី២ ២១:១២ ] ។ សព្វថ្ងៃនេះ អ្នកផ្សព្វផ្សាយសាសនាត្រូវបានអនុញ្ញាតឲ្យប្រើអ៊ិនធើរណិតក្នុងកិច្ចការផ្សព្វផ្សាយរបស់ពួកគេ ។ …
« នៅពេលអ្នកផ្សព្វផ្សាយសាសនាឈានចូលក្នុងសម័យថ្មីនេះ ជាសម័យដែលពួកគេនឹងប្រើកុំព្យូទ័រដើម្បីធ្វើកិច្ចការរបស់ព្រះអម្ចាស់ យើងសូមអញ្ជើញមនុស្សទាំងចាស់ ទាំងក្មេង មជ្ឈិមវ័យ យុវមជ្ឈិមវ័យ យុវវ័យ និង កុមារគ្រប់ទិសទី ឲ្យចូលរួមជាមួយយើង … ក្នុងការចែកចាយសារលិខិតដំណឹងល្អតាមអ៊ិនធើរណិត ។ …
« គឺដូចជាអ្នកផ្សព្វផ្សាយសាសនាត្រូវតែសម្របខ្លួនទៅតាមការផ្លាស់ប្ដូរនៃពិភពលោក នោះសមាជិកក៏ត្រូវតែផ្លាស់ប្ដូររបៀបដែលពួកគេគិតអំពីកិច្ចការផ្សព្វផ្សាយសាសនាដែរ ។ នៅពេលថ្លែងអំពីការណ៍នេះ ខ្ញុំសូមបកស្រាយឲ្យបានច្បាស់ថា អ្វីដែលយើងក្នុងនាមជាសមាជិកត្រូវបានស្នើឲ្យធ្វើនោះពុំបានផ្លាស់ប្ដូរឡើយ ប៉ុន្តែរបៀបដែលយើងបំពេញការទទួលខុសត្រូវរបស់យើងក្នុងការចែកចាយដំណឹងល្អនោះត្រូវតែសម្របទៅតាមការផ្លាស់ប្ដូរនៃពិភពលោក » ( « Missionary Work in the Digital Age » [ សុន្ទរកថាផ្ដល់ឲ្យអំឡុងការចាក់ផ្សាយថ្នាក់ដឹកនាំទូទាំងពិភពលោកស្ដីពីកិច្ចការនៃសេចក្ដីសង្គ្រោះ ថ្ងៃទី ២៣ ខែ មិថុនា ឆ្នាំ ២០១៣ ] ) ។
សូមសួរ ៖
-
យោងតាមអែលឌើរ ភែរី ហេតុអ្វីបានជាសមាជិក និង អ្នកផ្សព្វផ្សាយសាសនាត្រូវតែចាប់ផ្ដើមប្រើប្រាស់ធនធាននៅលើអ៊ិនធើរណិតនៅពេលពួកគេចែកចាយដំណឹងល្អ ? តើការប្រើប្រាស់ធនធានទាំងនេះ ផ្ដល់គុណប្រយោជន៍ដូចម្ដេចខ្លះ ?
-
តើឧបករណ៍ ឬ ធនធានមួយចំនួននៅលើអ៊ិនធើរណិត ដែលអ្នកអាចប្រើប្រាស់ដើម្បីចែកចាយទីបន្ទាល់របស់អ្នកអំពីដំណឹងល្អ ហើយអញ្ជើញមនុស្សទូទៅឲ្យរៀនបន្ថែមមានអ្វីខ្លះ ?
-
តើរបៀបជាក់លាក់មួយចំនួនណាខ្លះ ដែលអ្នកអាចប្រើឧបករណ៍ទាំងនេះដើម្បីចែកចាយសារលិខិតដំណឹងល្អ ? ( ការពិភាក្សានេះនឹងជួយសិស្សស្វែងរកគោលការណ៍ដែលថា អ្នកដើរតាមព្រះយេស៊ូវគ្រីស្ទ អាចប្រើបច្ចេកវិទ្យាទំនើបដើម្បីចែកចាយទីបន្ទាល់របស់ខ្លួន ជាមួយមនុស្សទូទាំងពិភពលោក ) ។
សូមបង្ហាញសេចក្ដីណែនាំខាងក្រោមចេញពីគេហទំព័រ LDS.org រួចឲ្យសិស្សអានឮៗនៅក្នុងកថាខណ្ឌទីមួយ ។ ក្រោយមកសូមហៅសិស្សម្នាក់ទៀត ឲ្យអានឮៗនៅក្នុងបញ្ជីនៃសេចក្ដីណែនាំអំពីការប្រើប្រាស់ប្រព័ន្ធផ្សព្វផ្សាយសង្គម ។ សូមឲ្យសិស្សស្វែងរករបៀបដែលព័ត៌មាននេះ អាចជួយពួកគេប្រែក្លាយកាន់តែស្ទាត់ជំនាញក្នុងការចែកចាយដំណឹងល្អនៅលើអ៊ិនធើរណិត ។
« ប្រព័ន្ធផ្សព្វផ្សាយសង្គម អាចជាឥទ្ធិពលដ៏មានអានុភាពនៅក្នុងជីវិតរបស់មនុស្សដែលប្រើវា ។ វាអាចផ្ដល់វិធីជាច្រើនក្នុងការបង្ហាញជំនឿទៅលើព្រះយេស៊ូវគ្រីស្ទ ហើយពង្រឹងទំនាក់ទំនងរបស់យើងបាន ។ សាសនាចក្រលើកទឹកចិត្តឲ្យប្រើប្រព័ន្ធផ្សព្វផ្សាយសង្គម ទន្ទឹមនឹងពេលវាគាំទ្រដល់បេសកកម្មនៃសាសនាចក្រ ពង្រឹងទំនាក់ទំនង ហើយសម្រួលឲ្យមានវិវរណៈក្នុងចំណោមបុត្រាបុត្រីព្រះវរបិតាសួគ៌ ។ សមាជិកនៃសាសនាចក្រត្រូវបានលើកទឹកចិត្តឲ្យធ្វើជាគំរូចំពោះជំនឿរបស់ពួកគេនៅគ្រប់ពេល និង គ្រប់ទីកន្លែងទាំងអស់ រួមបញ្ចូលទាំងនៅពេលរួមចំណែកក្នុងការសន្ទនាជាសាកល ដែលមាននៅលើប្រព័ន្ធផ្សព្វផ្សាយសង្គម ។ …
« ខាងក្រោមនេះគឺជាសេចក្ដីណែនាំ អំពីការប្រើប្រព័ន្ធផ្សព្វផ្សាយសង្គមនៅក្នុងជីវិតរស់នៅរបស់យើង ៖ …
« ចូរមានភាពគួរសមនៅក្នុងការប្រព្រឹត្តរបស់អ្នក ជាមួយមនុស្សទូទៅនៅលើអ៊ិនធើរណិត ។ ការបង្រៀនរបស់ពួកបរិសុទ្ធថ្ងៃចុងក្រោយ តម្រូវឲ្យសមាជិកទាំងឡាយប្រព្រឹត្តចំពោះមនុស្សទូទៅដោយការគោរព ទោះជាក្នុងកាលៈទេសៈណាក៏ដោយ ។
« ចូរធ្វើជាសាក្សីផ្ទាល់ខ្លួនអំពីដំណឹងល្អដែលបានស្ដារឡើងវិញ នៅពេលបានដឹកនាំដោយព្រះវិញ្ញាណ ។ សារលិខិតដូចនេះគួរតែជាសារលិខិតផ្ទាល់ខ្លួន ចូរកុំបន្សល់គំនិតមួយដែលថាអ្នកថ្លែងជំនួសមុខឲ្យសាសនាចក្រឲ្យសោះ ហើយកុំបង្កើតក្រុមដែលផ្ដល់នូវអារម្មណ៍ដែលថាក្រុមទាំងនោះតំណាងជាផ្លូវការ ឬ ត្រូវបានឧបត្ថម្ភដោយសាសនាចក្រឡើយ ។
« ចូរធ្វើជាគំរូនៃអ្នកដើរតាមព្រះគ្រីស្ទ នៅក្នុងការប្រព្រឹត្តរបស់អ្នកជាមួយមនុស្សទូទៅនៅលើប្រព័ន្ធផ្សព្វផ្សាយសង្គម ។ គំរូល្អរបស់អ្នកអាចមានអានុភាពលើ មនុស្សដែលអ្នកទាក់ទងជាមួយ ។ វាជារឿងដ៏ឆ្លាតវៃដែលផ្ដាច់ទំនាក់ទំនងពីមនុស្សដែលជានិច្ចកាលព្យាយាមទាញមនុស្សដទៃឲ្យធ្លាក់ចុះ ជាពិសេសអ្នកដែលចុះផ្សាយរឿងដែលមិនសមរម្យ ។ …
« អនុវត្តការវិនិច្ឆ័យល្អនៅពេលចុះផ្សាយអ្វីមួយ នៅលើគេហទំព័រប្រព័ន្ធផ្សព្វផ្សាយសង្គម ។ ពុំមានប៊ូតុង « លុបចោល » នៅលើអ៊ិនធើរណិតឡើយ ។ រូបភាព និង ការចុះផ្សាយនានា អាចបន្តនៅរហូតដល់ច្រើនឆ្នាំ ហើយអាចធ្វើឲ្យខូចប្រយោជន៍នៅពេលអ្នកស្វែងរកការងារធ្វើ ឬ ដាក់ពាក្យចូលរៀនសាកលវិទ្យាល័យ ក៏ដូចជាឱកាសដទៃៗទៀតដែលកំណត់ត្រាលើអ៊ិនធើរណិតជាសាធារណៈរបស់អ្នកត្រូវគេបើកមើលបាន ។ សូមប្រាកដថា ទំនាក់ទំនងរបស់អ្នកមានភាពចុះសម្រុងជាមួយការតាំងចិត្តរបស់អ្នកដើម្បីលើកដាក់ព្រះនាមរបស់ព្រះអង្គសង្គ្រោះមកលើខ្លួនអ្នក » ( « Social Media Helps for Members » LDS.org ) ។
សូមឲ្យសិស្សចែកចាយគំនិតរបស់ខ្លួនជាមួយមិត្តរួមថ្នាក់ អំពីមូលហេតុដែលសេចក្ដីណែនាំនានាដែលមាននៅក្នុងបញ្ជី អាចមានសារៈសំខាន់ចំពោះពួកគេដែលត្រូវចងចាំ នៅពេលពួកគេចែកចាយដំណឹងល្អតាមអ៊ិនធើរណិត ។
ប្រសិនបើមានពេលគ្រប់គ្រាន់ សូមគិតដល់ការឲ្យសិស្សបង្ហាញដល់មិត្តរួមថ្នាក់អំពីរបៀបចែកចាយវីដេអូ ឬ ធនធានដទៃៗទៀតដែលមាននៅលើគេហទំព័រ LDS.org ឬ mormon.org ដោយប្រើប្រព័ន្ធផ្សព្វផ្សាយសង្គម ។ អ្នកឲ្យសិស្សម្នាក់ទៀត បង្ហាញអំពីរបៀបបង្កើតប្រវត្តិរូបមួយនៅលើគេហទំព័រ mormon.org ។
សូមគិតដល់ការបង្ហាញវីដេអូ « Sharing Your Beliefs » ( ២:០២) ដើម្បីជួយសិស្សមានអារម្មណ៍ទុកចិត្តលើសមត្ថភាពរបស់ខ្លួន ក្នុងការប្រើប្រាស់បច្ចេកវិទ្យា ដើម្បីចែកចាយអារម្មណ៍ ព្រមទាំងទីបន្ទាល់របស់ខ្លួនអំពីដំណឹងល្អ ។ ពីមុនបង្ហាញវីដេអូនេះ សូមលើកទឹកចិត្តសិស្សឲ្យស្វែងរកឥទ្ធិពលដ៏មានសក្ដានុពលដែលបុគ្គលម្នាក់អាចមាន ដោយការប្រើបច្ចេកវិទ្យាដើម្បីចែកចាយអារម្មណ៍របស់ពួកគេអំពីដំណឹងល្អ ។
បន្ទាប់ពីមើលរួច សូមសួរ ៖
-
តើបច្ចេកវិទ្យាអាចពង្រឹងកិច្ចខិតខំរបស់សមាជិក ដែលមានបំណងចែកចាយសារលិខិតនៃដំណឹងល្អបានយ៉ាងដូចម្ដេច ?
សូមឲ្យសិស្សពិពណ៌នាអំពីរបៀបដែលពួកគេអាចប្រើប្រាស់បច្ចេកវិទ្យា ដើម្បីចែកចាយទីបន្ទាល់របស់ខ្លួនជាមួយមនុស្សទូទៅ ។ សូមបញ្ចប់មេរៀនដោយការចែកចាយទីបន្ទាល់របស់អ្នក អំពីគោលលទ្ធិ និង គោលការណ៍ដែលបានបង្រៀននៅក្នុងមេរៀននេះ ។
ការអញ្ជើញឲ្យអនុវត្ត
សូមជួយសិស្សចាប់ផ្ដើមនាពេលឥឡូវនេះ ដើម្បីស្វែងរកមនុស្សដែលត្រៀមខ្លួនជាស្រេចដើម្បីស្ដាប់ឮសារលិខិតដំណឹងល្អ ដោយធ្វើសកម្មភាពមួយ ឬ ពីរដែលបានណែនាំដូចខាងក្រោម ៖
-
ធ្វើតាមកិច្ចការដែលអ្នកបានរាយក្នុងបញ្ជីនៅពេលអ្នកធ្វើលំហាត់សរសេរ ដើម្បីស្វែងរកមនុស្សឲ្យអ្នកផ្សព្វផ្សាយសាសនាបង្រៀន ។
-
មើលលេខទំនាក់ទំនងនៅក្នុងទូរសព្ទដៃរបស់អ្នក ហើយស្វែងរកសមាជិកមិនសូវសកម្ម ឬ អ្នកមិនមែនជាសមាជិក ។ ទូរសព្ទ ឬ ផ្ញើសារទៅកាន់បុគ្គលនោះ រួចអញ្ជើញគាត់ឲ្យទៅព្រះវិហារជាមួយអ្នកនៅថ្ងៃអាទិត្យ ។
-
បើកគេហទំព័រ mormon.org រួចបើកមើលធនធាននានានៅលើគេហទំព័រនោះមានដូចជា វីដេអូ អត្ថបទនានា និងប្រវត្តិរូបដែលបានចុះផ្សាយដោយសមាជិកនៃសាសនាចក្រ ។ ចែកចាយវីដេអូ អត្ថបទ ឬ ទំព័រផ្សេងទៀតជាមួយមនុស្សទូទៅ ដោយប្រើប្រព័ន្ធផ្សព្វផ្សាយសង្គម ។
-
បង្កើតប្រវត្តិរូបផ្ទាល់ខ្លួនរបស់អ្នកនៅលើគេហទំព័រ mormon.org ។ ចែកចាយប្រវត្តិរូបរបស់អ្នក ជាមួយមនុស្សទូទៅដោយប្រើប្រព័ន្ធផ្សព្វផ្សាយសង្គម ។
-
ចែកចាយវីដេអូ Mormon Messages ព្រមទាំងអារម្មណ៍របស់អ្នកអំពីវីដេអូនោះ ដោយប្រើប្រព័ន្ធផ្សព្វផ្សាយសង្គម ។