ការអភិវឌ្ឍលក្ខណៈដូចជាព្រះគ្រីស្ទ

សេចក្ដីផ្ដើម

អ្នកផ្សព្វផ្សាយសាសនាគួរតែខិតខំប្រែក្លាយ ឲ្យកាន់តែដូចជាព្រះអង្គសង្គ្រោះ នៅពេលពួកគេព្យាយាមអញ្ជើញមនុស្សទូទៅឲ្យមករកទ្រង់ ។ ព្រះអង្គសង្គ្រោះគឺជាគំរូដ៏គ្រប់លក្ខណ៍របស់យើង ហើយបានណែនាំឲ្យយើងប្រែក្លាយដូចជាទ្រង់ ( សូមមើល នីហ្វៃទី៣ ២៧:២៧ ) ហើយដង្វាយធួនរបស់ទ្រង់អាចធ្វើឲ្យយើងប្រែក្លាយកាន់តែដូចជាទ្រង់ និងព្រះវរបិតាសួគ៌បាន ។ ផ្នែកមួយដ៏សំខាន់ក្នុងការប្រែក្លាយដូចជាព្រះយេស៊ូវគ្រីស្ទ គឺត្រូវរៀនអំពីរបៀបដែលទ្រង់បានរស់នៅ ប្រព្រឹត្ត ហើយបង្រៀន ។ នៅពេលយើងផ្ទាល់អភិវឌ្ឍលក្ខណៈដូចជាព្រះគ្រីស្ទឲ្យបានកាន់តែពេញលេញ យើងនឹងត្រៀមខ្លួនបម្រើព្រះ និង មនុស្សទូទៅបានកាន់តែប្រសើរនៅក្នុងបេសកកម្ម និង ពេញមួយជីវិតរបស់យើង ។

ការរៀបចំទុកជាមុន

សូមសិក្សា អាលម៉ា ១៧:២២–៣៧, ១៨:១–៣, ៨–១០, មរ៉ូណៃ ៧:៤៥–៤៨ និង គោលលទ្ធិ និង សេចក្តីសញ្ញា ៤:១–៧ ។
សូមសិក្សា ប្រកាសដំណឹងល្អរបស់យើង ទំព័រ ១១៧-១២៤, ១២៨ ។
សូមថតចម្លង សកម្មភាពកំណត់ នៅទំព័រ ១២៨ នៅក្នុង ប្រកាសដំណឹងល្អរបស់យើង ចែកឲ្យសិស្ស ( ធ្វើក៏បានមិនធ្វើក៏បាន) ។
សូមរៀបចំបង្ហាញវីដេអូ « Christlike Attributes » ( ២:៥៤ ) ដែលមាននៅលើគេហទំព័រ LDS.org ។
សូមរៀបចំបង្ហាញវីដេអូ « Impressions of Missionaries » ( ៤:៣២ ) ដែលមាននៅលើគេហទំព័រ LDS.org ។

យោបល់សម្រាប់ការបង្រៀន

សារៈសំខាន់នៃលក្ខណៈដូចជាព្រះគ្រីស្ទ

សូមឲ្យសិស្សបើកទៅ ទំព័រ ១២៥ នៅក្នុង ប្រកាសដំណឹងល្អរបស់យើង រួចមើលទៅរូបថតស្លាកឈ្មោះអ្នកផ្សព្វផ្សាយសាសនា ។ សូមសួរ ៖

តើចំណុចពីរដែលមានសភាពលេចធ្លោជាងគេ នៅលើស្លាកឈ្មោះអ្នកផ្សព្វផ្សាយសាសនាគឺជាអ្វី ? ( ឈ្មោះអ្នកផ្សព្វផ្សាយសាសនា និង ព្រះនាមព្រះអង្គសង្គ្រោះ ) ។
ហេតុអ្វីបានជាវាជារឿងដ៏សំខាន់ចំពោះអ្នក និង អ្នកដទៃទៀត ដែលឈ្មោះរបស់អ្នកនៅជាមួយនឹងព្រះនាមព្រះអង្គសង្គ្រោះ ?

សូមឲ្យសិស្សដាក់វេនគ្នាអានឮៗ នៅក្នុងកថាខណ្ឌទាំងប្រាំ ទំព័រ ១១៧ នៅក្នុង ប្រកាសដំណឹងល្អរបស់យើង ខណៈដែលសិស្សឯទៀតអានតាម ដោយស្វែងរករបៀបដែលយើងអាចទទួលយកការអញ្ជើញឲ្យដើរតាមព្រះយេស៊ូវគ្រីស្ទ ។ បន្ទាប់ពីពួកគេបានអានរួចហើយ សូមសួរ ៖

តើយើងទទួលយកការអញ្ជើញរបស់ព្រះយេស៊ូវគ្រីស្ទ ឲ្យដើរតាមទ្រង់តាមរបៀបណា ? ( សិស្សគួរតែស្គាល់គោលការណ៍នេះ ៖ យើងទទួលយកការអញ្ជើញរបស់ព្រះយេស៊ូវគ្រីស្ទឲ្យដើរតាមទ្រង់ តាមរយៈការប្រែក្លាយដូចជាទ្រង់ និង ការអភិវឌ្ឃលក្ខណៈរបស់ទ្រង់ ) ។
តើការអភិវឌ្ឍលក្ខណៈដូចជាព្រះគ្រីស្ទ ជួយអ្នកឲ្យធ្វើជាអ្នកបង្រៀនដំណឹងល្អរបស់ព្រះយេស៊ូវគ្រីស្ទដ៏មានអានុភាព និង ដ៏មានប្រសិទ្ធភាពយ៉ាងដូចម្ដេច ?

សូមឲ្យសិស្សម្នាក់ៗជ្រើសរើសបទគម្ពីរមួយនៅក្នុង ប្រអប់ការសិក្សាព្រះគម្ពីរ នៅទំព័រ ១១៨ នៅក្នុង ប្រកាសដំណឹងល្អរបស់យើង ។ សូមឲ្យសិស្សអានវគ្គបទគម្ពីរដែលពួកគេបានជ្រើសរើស ហើយស្វែងរកអ្វីដែលខគម្ពីរនោះបានប្រាប់ អំពីការដើរតាមគំរូរបស់ព្រះយេស៊ូវគ្រីស្ទ ។ សូមឲ្យសិស្សចែកចាយជាមួយមិត្តរួមថ្នាក់ នូវអ្វីដែលពួកគេបានរៀន ។ បន្ទាប់ពីសិស្សបីបួននាក់បានឆ្លើយសំណួរហើយ សូមសួរ ៖

តើមានលក្ខណៈមួយចំនួនណាខ្លះ ដែលអ្នកមានដូចទៅនឹងព្រះយេស៊ូវគ្រីស្ទ ?

សូមបង្ហាញវីដេអូ « Christlike Attributes » ( នាទីទី ២:៥៤ ) ដែលបង្ហាញអំពីលក្ខណៈមួយចំនួនរបស់ព្រះអង្គសង្គ្រោះ ។ សូមឲ្យសិស្សទស្សនាស្វែងរករបៀបដែលលក្ខណៈដ៏ទេវភាពរបស់ព្រះអង្គសង្គ្រោះ បានស្ដែងចេញតាមរយៈទង្វើរបស់ទ្រង់—ជាពិសេសរបៀបដែលទ្រង់បានប្រព្រឹត្តជាមួយមនុស្សទូទៅ ។

ផ្ដល់ពេលវេលាឲ្យសិស្សពិចារណាអំពីចម្លើយ ។ សិស្សភាគច្រើនអាចឆ្លើយចម្លើយដែលគិតគូរបានល្អិតល្អន់ ប្រសិនបើពួកគេមានពេលគ្រប់គ្រាន់ដើម្បីពិចារណាអំពីចម្លើយរបស់ពួកគេ ។ ឧទាហរណ៍ បន្ទាប់ពីសួរសំណួរហើយ អ្នកអាចនិយាយថា « សូមចំណាយពេលបន្តិចដើម្បីគិតអំពីចម្លើយរបស់ប្អូន បន្ទាប់មក សូមឆ្លើយប្រាប់ខ្ញុំ » ។

បន្ទាប់ពីទស្សនាវីដេអូហើយ សូមសួរសំណួរដូចខាងក្រោម ដើម្បីប្រាកដថាអ្នកបានទុកពេលគ្រប់គ្រាន់ឲ្យសិស្សពិចារណាអំពីចម្លើយរបស់ខ្លួន ៖

តើលក្ខណៈដ៏ទេវភាពរបស់ព្រះអង្គសង្គ្រោះ បានស្ដែងចេញតាមរយៈទង្វើរបស់ទ្រង់—ជាពិសេសរបៀបដែលទ្រង់បានប្រព្រឹត្តជាមួយមនុស្សទូទៅនោះតាមរបៀបណា ?
តើទង្វើរបស់ព្រះយេស៊ូវ បានមានឥទ្ធិពលយ៉ាងដូចម្ដេចទៅលើមនុស្សទូទៅ ?

សូមឲ្យសិស្សចែកចាយជាមួយមិត្តអង្គុយក្បែរខ្លួន អំពីបទពិសោធន៍មួយដែលពួកគេបានទទួលឥទ្ធិពល ដោយនរណាម្នាក់ដែលមានអាកប្បកិរិយាដូចជាព្រះគ្រីស្ទ ។ បន្ទាប់មក សូមផ្ដល់ពេលវេលាបន្តិចឲ្យពួកគេពិចារណាអំពីសំណួរខាងក្រោម ៖

តើលក្ខណៈណាមួយរបស់ព្រះគ្រីស្ទ ដែលត្រូវបានបង្ហាញនៅក្នុងវីដេអូនេះ ដែលអ្នកចង់អភិវឌ្ឍឲ្យបានពេញលេញ ?

ការអភិវឌ្ឍលក្ខណៈដូចជាព្រះគ្រីស្ទ

សូមឲ្យសិស្សពីរបីនាក់ប្តូរវេនគ្នាអានឮៗនៅក្នុង គោលលទ្ធិ និងសេចក្ដីសញ្ញា ៤:១-៧ ។

យោងតាម គោលលទ្ធិ និង សេចក្តីសញ្ញា ៤:៥–៦ តើមានទំនាក់ទំនងអ្វីរវាងលក្ខណៈដូចជាព្រះគ្រីស្ទ និង គុណសម្បត្តិដើម្បីត្រូវបានហៅឲ្យធ្វើជាកិច្ចការ ? ( ទោះបីជាពួកគេអាចប្រើសម្ដីខុសគ្នាមែន ក៏សិស្សគួរតែយល់អំពីគោលការណ៍នេះ ៖ បុគ្គលទាំងឡាយដែលមានលក្ខណៈដូចជាព្រះគ្រីស្ទ សក្ដិសមនឹងបម្រើកិច្ចការរបស់ព្រះអម្ចាស់ ) ។

សូមឲ្យសិស្សបើកទៅ សកម្មភាពកំណត់ នៅទំព័រ ១២៨ នៅក្នុង ប្រកាសដំណឹងល្អរបស់យើង ។ បន្ទាប់ពីបានពន្យល់អំពីសេចក្ដីណែនាំដែលមាននៅផ្នែកខាងលើនៃទំព័រហើយ សូមឲ្យសិស្សធ្វើលំហាត់សកម្មភាពនោះ ។ វាជាការណ៍ល្អដែលប្រាប់ដល់សិស្ស អំពីរយៈពេលដែលពួកគេនឹងមានដើម្បីធ្វើលំហាត់សកម្មភាពនេះ ។ សូមគិតដល់ការចែកក្រដាសលំហាត់សកម្មភាពនេះ ដែលបានថតចម្លងឲ្យសិស្ស ។ ប្រសិនបើសិស្សជ្រើសរើសធ្វើលំហាត់សកម្មភាពនៅលើសៀវភៅ ប្រកាសដំណឹងល្អរបស់យើង របស់ពួកគេផ្ទាល់នោះ អ្នកអាចលើកទឹកចិត្តឲ្យពួកគេសរសេរខ្មៅដៃ ។ សូមផ្ដល់ពេលវេលាគ្រប់គ្រាន់ ឲ្យសិស្សធ្វើលំហាត់សកម្មភាពនេះ ។ បន្ទាប់មក សូមឲ្យសិស្សចែកចាយអំពីអ្វីដែលពួកបានរៀន ហើយបានទទួលអារម្មណ៍ នៅពេលពួកគេបានធ្វើការវាយតម្លៃលើខ្លួនឯង ។ ប្រសិនបើចាំបាច់ អ្នកអាចនឹងសួរសំណួរដូចខាងក្រោម ៖

តើលក្ខណៈណាខ្លះចេញពីលំហាត់សកម្មភាពនេះ ដែលអ្នកចាប់អារម្មណ៍ជាងគេ ? មូលហេតុអ្វី ?
តើអ្នកបានរៀនអ្វីខ្លះ ចេញមកពីលំហាត់សកម្មភាពនេះ ?

សូមជួយសិស្សពង្រឹងការយល់ដឹងរបស់ខ្លួនអំពីលក្ខណៈដូចជាព្រះគ្រីស្ទ ដោយឲ្យពួកគេជ្រើសរើសលក្ខណៈមួយ ដែលពួកគេចង់រៀនបន្ថែម ហើយអភិវឌ្ឍយ៉ាងពេញលេញនៅក្នុងជីវិតផ្ទាល់ខ្លួន ។ សូមឲ្យសិស្សបង្ហាញចំណុច ដែលប្រាប់អំពីលក្ខណៈដែលពួកគេបានជ្រើសរើសនៅទំព័រ ទំព័រ ១១៨–២៤ នៅក្នុង ប្រកាសដំណឹងល្អរបស់យើង ។ បន្ទាប់មក សូមផ្ដល់ពេលវេលាឲ្យសិស្សសិក្សាចំណុចរបស់ខ្លួន ដោយមានបទគម្ពីរមកជាមួយផង ។ វាអាចជាការណ៍ល្អដែលប្រាប់ដល់សិស្ស ឲ្យដឹងអំពីរយៈពេលដែលពួកគេនឹងសិក្សា ។ សូមសរសេរសំណួរខាងក្រោមនេះ ដាក់នៅលើក្ដារខៀនដើម្បីឲ្យសិស្សពិចារណានៅពេលពួកគេអាន ៖

តើការយល់ដឹងអ្វីខ្លះអំពីលក្ខណៈនេះ ដែលអ្នកបានទទួល ?
ដើម្បីអភិវឌ្ឍលក្ខណៈនេះ តើអ្នកត្រូវតែផ្លាស់ប្ដូរអ្វីខ្លះនៅក្នុងចិត្ត គំនិត ឬ ទង្វើ ?
តើការអភិវឌ្ឍលក្ខណៈនេះ អាចបង្កើនប្រសិទ្ធភាពរបស់អ្នកក្នុងនាមជាអ្នកផ្សព្វផ្សាយសាសនាយ៉ាងដូចម្ដេច ?

សូមដើរចុះឡើងដើម្បីមើលរបៀបដែលសិស្សម្នាក់ៗធ្វើលំហាត់ និងដើម្បីឆ្លើយសំណួរនានាដែលសិស្សអាចមាន ។ បន្ទាប់ពីបានទុកពេលគ្រប់គ្រាន់ហើយនោះ សូមឲ្យសិស្សចែកចាយចម្លើយរបស់ខ្លួនចំពោះសំណួរដែលបានសរសេរនៅលើក្ដារខៀន ។

សូមបង្ហាញសេចក្ដីថ្លែងការណ៍ខាងក្រោមដោយប្រធាន ឌៀថើរ អេស្វ អុជដូហ្វ រួចឲ្យសិស្សស្វែងរកអ្វីដែលប្រធាន អុជដូហ្វ មានប្រសាសន៍ថាយើងត្រូវតែធ្វើ ដើម្បីអភិវឌ្ឍលក្ខណៈដូចជាព្រះគ្រីស្ទ ៖

« បទគម្ពីរពិពណ៌នាអំពីលក្ខណៈដូចជាព្រះគ្រីស្ទមួយចំនួន ដែលយើងត្រូវអភិវឌ្ឍនៅក្នុងជីវិតរបស់យើង ។ … លក្ខណៈដូចជាព្រះគ្រីស្ទ គឺជាអំណោយមកពីព្រះ ។ វាពុំអាចបានអភិវឌ្ឍដោយគ្មានជំនួយពីទ្រង់បានឡើយ ។ ជំនួយមួយដែលយើងទាំងអស់គ្នាត្រូវការ គឺត្រូវបានប្រទានដោយឥតគិតថ្លៃ តាមរយៈដង្វាយធួននៃព្រះយេស៊ូវគ្រីស្ទ ។ ការមានសេចក្ដីជំនឿលើព្រះយេស៊ូវគ្រីស្ទ និង លើដង្វាយធួនរបស់ទ្រង់មានន័យថា ការពឹងផ្អែកទាំងស្រុងទៅលើទ្រង់—ដោយទុកចិត្តទៅលើព្រះចេស្ដា ព្រះបញ្ញាញាណ និង សេចក្ដីស្រឡាញ់ដ៏គ្មានទីបញ្ចប់របស់ទ្រង់ ។ នៅពេលយើងប្រើប្រាស់សិទ្ធិជ្រើសរើសរបស់យើងដោយសុចរិត នោះលក្ខណៈដូចជាព្រះគ្រីស្ទកើតមាននៅក្នុងជីវិតរបស់យើង ។ … នៅពេលព្យាយាមប្រែក្លាយឲ្យកាន់តែដូចជាព្រះអង្គសង្គ្រោះ យើងត្រូវវាយតម្លៃលើជីវិតរបស់យើងឡើងវិញឲ្យបានទៀងទាត់ ហើយពឹងផ្អែកទៅលើសេចក្ដីមេត្តារបស់ព្រះយេស៊ូវគ្រីស្ទ និង ពរជ័យទាំងឡាយមកពីដង្វាយធួនរបស់ទ្រង់ តាមរយៈមាគ៌ានៃការប្រែចិត្តដ៏ពិត » ( « Christlike Attributes—the Wind beneath Our Wings » Ensign ឬ Liahona ខែ វិច្ឆិកា ឆ្នាំ ២០០៥ ទំព័រ ១០២–១០៣ ) ។

តើឃ្លា « លក្ខណៈដូចជាព្រះគ្រីស្ទ គឺជាអំណោយមកពីព្រះ » មានន័យដូចម្ដេចចំពោះអ្នក ? ( វាគឺជាអំណោយដែលពុំអាចអភិវឌ្ឍបានយ៉ាងពេញលេញដោយពុំមានជំនួយមកពីព្រះនោះឡើយ ) ។
យោងតាមប្រធាន អុជដូហ្វ តើយើងអាចធ្វើអ្វីដើម្បីបានជំនួយពីព្រះអម្ចាស់ នៅក្នុងការអភិវឌ្ឍលក្ខណៈទាំងនេះ ? ( អ្នកអាចសង្ខេបចម្លើយរបស់សិស្ស ដោយសរសេរគោលការណ៍ដូចតទៅនេះនៅលើក្ដារខៀន ៖ យើងអាចអភិវឌ្ឍលក្ខណៈដូចជាព្រះគ្រីស្ទនៅពេលយើងប្រែចិត្ត មានសេចក្ដីជំនឿលើព្រះយេស៊ូវគ្រីស្ទ ហើយពឹងផ្អែកលើដង្វាយធួន ) ។
តើការប្រែចិត្ត និង ការមានសេចក្ដីជំនឿលើដង្វាយធួន អាចជួយយើងអភិវឌ្ឍលក្ខណៈដូចជាព្រះគ្រីស្ទបានយ៉ាងដូចម្ដេច ? ( តាមរយៈសេចក្ដីជំនឿ និង ការប្រែចិត្ត យើងអញ្ជើញព្រះអម្ចាស់ប្រទានពរយើងឲ្យមានលក្ខណៈដូចជាព្រះគ្រីស្ទ ។ នៅពេលយើងប្រែចិត្ត យើងបង្ហាញបំណងប្រាថ្នាដើម្បីប្រែក្លាយកាន់តែដូចជាព្រះគ្រីស្ទ ហើយយើងអញ្ជើញយាងព្រះវិញ្ញាណបរិសុទ្ធឲ្យមានវត្តមានកាន់តែច្រើននៅក្នុងជីវិតរបស់យើង ) ។

សូមបង្ហាញសេចក្ដីថ្លែងការណ៍ខាងក្រោមដោយអែលឌើរ ដាល្លិន អេក អូក ក្នុងកូរ៉ុមនៃពួកសាវកដប់ពីរនាក់ ហើយសូមឲ្យសិស្សម្នាក់អានវាឮៗ ៖

« នៅពេលបង្រៀនពួកសាសន៍នីហ្វៃ ព្រះអង្គសង្គ្រោះបានមានព្រះបន្ទូលប្រាប់អំពីអ្វីដែលពួកគេត្រូវតែក្លាយទៅជា ។ ទ្រង់បានអញ្ជើញពួកគេឲ្យប្រែចិត្ត ហើយទទួលពិធីបុណ្យជ្រមុជទឹក ហើយត្រូវបានញែកឲ្យបរិសុទ្ធតាមរយៈការទទួលព្រះវិញ្ញាណបរិសុទ្ធ ‹ ប្រយោជន៍ឲ្យអ្នករាល់គ្នាអាចឈរដោយគ្មានទោសនៅចំពោះយើងនៅថ្ងៃចុងក្រោយបង្អស់ › ( នីហ្វៃទី៣ ២៧:២០ ) ។ ទ្រង់បានមានព្រះបន្ទូលបញ្ចប់ ៖ ‹ តើអ្នករាល់គ្នាគួរធ្វើជាមនុស្សបែបណាទៅ ? យើងប្រាប់អ្នករាល់គ្នាជាប្រាកដថា ត្រូវឲ្យបានដូចជាយើង › ( នីហ្វៃទី៣ ២៧:២៧ ) ។

« ដំណឹងល្អនៃព្រះយេស៊ូវគ្រីស្ទ គឺជាផែនការដែលយើងអាចប្រែក្លាយទៅជាកូនចៅនៃព្រះ ដែលយើងគួរតែប្រែក្លាយ ។ ស្ថានភាពគ្មានស្នាមប្រឡាក់ និងឥតខ្ចោះនេះ នឹងជាលទ្ធផលចេញមកពីតំណនៃសេចក្ដីសញ្ញា ពិធីបរិសុទ្ធ និងទង្វើនានា បូករួមទាំងការជ្រើសរើសត្រឹមត្រូវ ហើយនឹងចេញមកពីការប្រែចិត្តឥតឈប់ឈរ ។ ‹ ជីវិតនេះគឺជាពេលវេលាសម្រាប់ឲ្យមនុស្សប្រុងប្រៀបខ្លួនទៅជួបនឹងព្រះ › ( អាលម៉ា ៣៤:៣២ ) » ( « The Challenge to Become » Ensign ខែ វិច្ឆិកា ឆ្នាំ ២០០០ ទំព័រ ៣៣ ) ។

សូមសួរ ៖

យោងតាមអែលឌើរ អូក តើយើងត្រូវធ្វើអ្វីខ្លះ ដើម្បីប្រែក្លាយកាន់តែដូចជាព្រះគ្រីស្ទ ? ( យើងត្រូវតែធ្វើ ហើយរក្សាសេចក្ដីសញ្ញាពិសិដ្ឋ ទទួលពិធីបរិសុទ្ធនានាដោយសក្ដិសម ធ្វើជម្រើសត្រឹមត្រូវ ហើយប្រែចិត្ត ) ។

សូមឲ្យសិស្សបើកទៅ មរ៉ូណៃ ៧:៤៧–៤៨ ។ សូមពន្យល់ថា ទោះជាខគម្ពីរទាំងនេះទាក់ទងជាពិសេសទៅនឹងសេចក្ដីសប្បុរសក្ដី ក៏វាបង្រៀនគោលការណ៍ទូទៅមួយអំពីការមានលក្ខណៈដូចជាព្រះគ្រីស្ទដែរ ។ សូមឲ្យសិស្សអានខគម្ពីរទាំងនោះខណៈដែលសិស្សដទៃទៀតអានតាម ដោយស្វែងរកអ្វីដែលយើងអាចធ្វើដើម្បីអញ្ជើញឲ្យមានជំនួយពីព្រះវរបិតាសួគ៌ ក្នុងការប្រែក្លាយដូចជាព្រះរាជបុត្រាទ្រង់ ( ចម្លើយគួរតែផ្ដោតទៅលើសារៈសំខាន់ នៃការទូលសុំជំនួយពីព្រះវរបិតាសួគ៌ និង ការប្រែក្លាយទៅជា « អ្នកដើរតាមដ៏ពិត » របស់ព្រះយេស៊ូវគ្រីស្ទ ) ។ សូមបង្ហាញថា ដោយសារតែលក្ខណៈដូចជាព្រះគ្រីស្ទគឺជាអំណោយមកពីព្រះ យើងគួរតែទូលសុំជំនួយពីទ្រង់ដើម្បីអភិវឌ្ឍលក្ខណៈទាំងនោះ ។

ការអនុវត្តរបស់អ្នករៀន ។ ការអនុវត្តកើតឡើងនៅពេលសិស្ស (១) ទទួលយកគោលលទ្ធិ ឬ គោលការណ៍មួយដាក់នៅក្នុងចិត្ត និង គំនិតរបស់ពួកគេ និង (២) ចាប់ផ្ដើមប្រព្រឹត្ត ហើយរស់នៅតាមអ្វីទាំងនោះ ។ គ្រូអាចសម្របសម្រួលឲ្យមានការអនុវត្តដោយផ្ដល់ពេលវេលាឲ្យសិស្សពិចារណា ឬ សរសេរអំពីអ្វីដែលពួកគេបានយល់ ហើយទទួលអារម្មណ៍ រួចពិចារណាថាតើសកម្មភាពណាខ្លះ ដែលពួកគេគួរតែទទួលយកដើម្បីអនុវត្តនៅក្នុងជីវិតនូវអ្វីដែលពួកគេបានរៀន ។

ដើម្បីជួយសិស្សពិចារណាអំពីរបៀបដែលពួកគេអាចអនុវត្តនូវអ្វីដែលពួកគេបានរៀននោះ អ្នកអាចឲ្យសិស្សចែកចាយឧទាហរណ៍នៃសកម្មភាពនានា ដែលអ្នកដែលត្រៀមខ្លួនធ្វើជាអ្នកផ្សព្វផ្សាយសាសនាអាចធ្វើ ដើម្បីខិតខំអភិវឌ្ឍលក្ខណៈដែលពួកគេបានសិក្សា ។ បន្ទាប់មក សូមផ្ដល់ពេលវេលាពីរបីនាទីឲ្យសិស្សសរសេរផែនការ រួមមានជម្រើសត្រឹមត្រូវជាប់លាប់ដែលពួកគេធ្វើ ដើម្បីជួយពួកគេឲ្យអភិវឌ្ឍលក្ខណៈនោះកាន់តែប្រសើរឡើង ។ សូមលើកទឹកចិត្តពួកគេឲ្យចែកចាយផែនការរបស់ខ្លួន ជាមួយឪពុកម្ដាយ ឬ មិត្តភក្ដិជិតស្និទ្ធ ។ សូមលើកទឹកចិត្តសិស្សផងដែរ កុំឲ្យពន្យារពេលក្នុងការធ្វើតាមផែនការរបស់ខ្លួន ។ កិច្ចខិតខំដែលពួកគេមាននាពេលឥឡូវនេះ អាចមានអានុភាពកាន់តែខ្លាំងទៅលើបទពិសោធន៍បេសកកម្មរបស់ពួកគេ ។

សូមបញ្ចប់ផ្នែកនេះនៃមេរៀនដោយអះអាងដល់សិស្សថា ព្រះអម្ចាស់នឹងប្រទានពរពួកគេដរាបណាពួកគេអនុវត្តសេចក្ដីជំនឿទៅលើដង្វាយធួន ហើយព្យាយាមប្រែក្លាយដូចជាទ្រង់ ។

លក្ខណៈដូចជាព្រះគ្រីស្ទនៅក្នុងកិច្ចការផ្សព្វផ្សាយសាសនា

សូមសរសេរសេចក្ដីថ្លែងការណ៍ខាងក្រោមនេះដោយប្រធាន ឌៀថើរ អេស្វ អុជដូហ្វ ក្នុងគណៈប្រធានទីមួយនៅលើក្ដារខៀន ដោយលោកបានចែកចាយប្រសាសន៍ដកស្រង់មួយដែលបានថ្លែងដោយសន្តកជន ហ្វ្រង់ស៊ីស អាស្សីស៊ី ។ សូមឲ្យសិស្សម្នាក់អានសេចក្ដីថ្លែងការណ៍នេះឮៗ ៖

« ចូរផ្សាយដំណឹងល្អនៅគ្រប់ពេលទាំងអស់ ហើយបើចាំបាច់ ចូរប្រើពាក្យសម្ដី » ( « Waiting on the Road to Damascus » Ensign ឬ Liahona ខែ ឧសភា ឆ្នាំ ២០១១ ទំព័រ ៧៧ ) ។

បន្ទាប់មក សូមសួរសំណួរដូចខាងក្រោមនេះ ៖

តើយើងអាចប្រកាសដំណឹងល្អ ដោយមិនប្រើពាក្យសម្ដីបានយ៉ាងដូចម្ដេចទៅ ?
តើការមានលក្ខណៈដូចជាព្រះគ្រីស្ទ អនុញ្ញាតឲ្យយើងប្រកាសដំណឹងល្អបានកាន់តែប្រសើរ ទាំងប្រើ ឬ មិនប្រើពាក្យសម្ដីបានយ៉ាងដូចម្ដេច ?
តើមានអ្វីកើតឡើងចំពោះដួងចិត្តរបស់បុគ្គលទាំងឡាយ នៅពេលដែលពួកគេត្រូវបានគេប្រព្រឹត្តទៅតាមរបៀបដូចជាព្រះគ្រីស្ទ ? ( ដួងចិត្តរបស់ពួកគេត្រូវបានបន្ទន់ ហើយពួកគេនឹងទទួលស្ដាប់សារលិខិតនៃដំណឹងល្អកាន់តែខ្លាំង ) ។
ហេតុអ្វីបានជាលក្ខណៈដូចជាព្រះគ្រីស្ទរបស់អ្នកផ្សព្វផ្សាយសាសនាមានសារៈសំខាន់ដល់ម្ល៉េះ ចំពោះភាពជោគជ័យក្នុងកិច្ចការផ្សព្វផ្សាយសាសនា ? ( ចម្លើយរបស់សិស្សអាចរួមបញ្ចូលសេចក្ដីពិតនេះ ៖ លក្ខណៈដូចជាព្រះគ្រីស្ទអាចមានអានុភាពខ្លាំងក្លា ក្នុងការនាំមនុស្សមករកព្រះអង្គសង្គ្រោះ ) ។

សូមបង្ហាញវីដេអូ « Impressions of Missionaries » ( នាទីទី ៤:៣២ ) ។ សូមឲ្យសិស្សកត់ត្រាលក្ខណៈទាំងឡាយ ដែលសាសនាគន់ការីសង្កេតឃើញមានក្នុងអ្នកផ្សព្វផ្សាយសាសនា និង ឥទ្ធិពលដែលលក្ខណៈទាំងនោះបានមានចំពោះសាសនាគន់ការី ។

បន្ទាប់ពីមើលរួច សូមសួរ ៖

តើលក្ខណៈវិជ្ជមានមួយចំនួនណាខ្លះរបស់អ្នកផ្សព្វផ្សាយសាសនា ដែលសាសនាគន់ការីបានរកឃើញ ?
តើអ្នកគិតថា ហេតុអ្វីបានជាគុណសម្បត្តិទាំងនេះ ធ្វើឲ្យសាសនាគន់ការីមានអារម្មណ៍វិជ្ជមាន ?
សាសនាគន់ការីមួយចំនួន បានលើកឡើងអំពីគុណសម្បត្តិមិនសូវវិជ្ជាមាន ។ តើគុណសម្បត្តិទាំងនេះ បានជះឥទ្ធិពលយ៉ាងដូចម្ដេចដល់សាសនាគន់ការី ?
តើអ្នកផ្សព្វផ្សាយសាសនាអាចចៀសវាងពី អារម្មណ៍មិនសូវវិជ្ជមានទាំងនេះបានយ៉ាងដូចម្ដេច ?

ដើម្បីបង្ហាញបន្ថែមអំពីរបៀបដែលលក្ខណៈ និង ឥរិយាបថដូចជាព្រះគ្រីស្ទ អាចជួយអ្នកផ្សព្វផ្សាយសាសនារៀបចំមនុស្សដែលពួកគេបង្រៀនឲ្យទទួលយកដំណឹងល្អ សូមឲ្យសិស្សម្នាក់សង្ខេបប្រវត្តិនៃការប្រឹងប្រែងរបស់អាំម៉ូន ក្នុងការប្រកាសដំណឹងល្អនៅក្នុងចំណោមពួកសាសន៍លេមិន ។ សូមបំបែកសិស្សក្នុងថ្នាក់ជាបួនក្រុម ហើយចាត់វគ្គបទគម្ពីរមួយចំណោមវគ្គបទគម្ពីរខាងក្រោមនេះ ដល់ក្រុមនីមួយៗ ។ សូមឲ្យសិស្សអានវគ្គបទគម្ពីរដែលបានចាត់តាំងដល់ពួកគេដោយស្ងៀមស្ងាត់ រួចស្វែងរកគុណសម្បត្តិដូចជាព្រះគ្រីស្ទដែល អាំម៉ូន បានបង្ហាញឲ្យឃើញ ។

ក្រោយពីសិស្សមានពេលអានគ្រប់គ្រាន់ហើយ សូមពិភាក្សាសំណួរខាងក្រោមនេះ ៖

តើលក្ខណៈដូចជាព្រះគ្រីស្ទណាខ្លះដែល អាំម៉ូន បានបង្ហាញឲ្យឃើញនៅក្នុងខគម្ពីរដែលអ្នកបានអាននេះ ?
តើលក្ខណៈរបស់អាំម៉ូនបានមានឥទ្ធិពលលើ មនុស្សដែលគាត់បានបង្រៀនយ៉ាងដូចម្ដេច ?
តើអ្នកផ្សព្វផ្សាយសាសនានាពេលបច្ចុប្បន្ន អាចធ្វើតាមគំរូរបស់អាំម៉ូនបានតាមរបៀបណា ?

សូមឲ្យសិស្សគិតអំពីបុគ្គលដែល ពួកគេបានសង្កេតឃើញថាជាគំរូនៃការមានលក្ខណៈដូចជាព្រះគ្រីស្ទ ។ សូមសួរ ៖

តើបុគ្គលនេះបានមានឥទ្ធិពលលើអ្នក តាមរយៈឥរិយាបថដូចជាព្រះគ្រីស្ទយ៉ាងដូចម្ដេច ?

ការបម្រើជាមួយដៃគូ

សូមរំឭកសិស្សថា អ្នកផ្សព្វផ្សាយសាសនាតែងតែត្រូវបានចាត់តាំងឲ្យបម្រើជាមួយដៃគូ ។ សូមឲ្យសិស្សប្រាប់អំពីឧបសគ្គនានាដែលអាចកើតឡើង នៅពេលពួកគេធ្វើការជាមួយដៃគូ ។ សូមសួរសិស្សនូវសំណួរដូចខាងក្រោម ៖

តើអ្នកគិតថា ហេតុអ្វីបានជាអ្នកផ្សព្វផ្សាយសាសនាត្រូវបម្រើជាដៃគូ ?

សូមអានឮៗនៅក្នុង គោលលទ្ធិ និង សេចក្ដីសញ្ញា ៤២:៦ និង កូរិនថូសទី២ ១៣:១ ដើម្បីជួយសិស្សឃើញថា អ្នកផ្សព្វផ្សាយសាសនាបម្រើជាដៃគូ ព្រោះនោះគឺជាលំនាំដែលបានមកពីព្រះអម្ចាស់ ។ បន្ទាប់មក សូមសួរ ៖

ហេតុអ្វីបានជាមានសារៈសំខាន់ដែលអ្នកផ្សព្វផ្សាយសាសនា ត្រូវបង្ហាញលក្ខណៈ និង ទង្វើដូចជាព្រះគ្រីស្ទ ចំពោះដៃគូរបស់ខ្លួន ? ( សូមមើល គ. និង ស. ៣៨:២៤–២៥, ២៧ ) ។

សូមបង្ហាញសេចក្ដីថ្លែងការណ៍ខាងក្រោមដោយប្រធាន ជែមស៍ អ៊ី ហ្វោស្ត ( ឆ្នាំ ១៩២០-២០០៧ ) ក្នុងគណៈប្រធានទីមួយ ហើយសូមឲ្យសិស្សម្នាក់អានវាឮៗ ៖

« ចូរកុំឲ្យមានសេចក្ដីទាស់ទែងណាមួយ កើតឡើងរវាងដៃគូរបស់អ្នកឲ្យសោះ ។ ដៃគូជាអ្នកផ្សព្វផ្សាយសាសនារបស់អ្នកមួយចំនួន នឹងក្លាយជាកល្យាណមិត្តមួយជីវិតរបស់អ្នក ។ ចូរធ្វើជាប្រភេទដៃគូ ដែលអ្នកចង់នៅជាមួយ ។ ចូរកុំមានភាពអាត្មានិយម នៅក្នុងទំនាក់ទំនងរបស់អ្នកជាមួយដៃគូឲ្យសោះ ។ « នៅពេលមានការទាស់ទែងគ្នា នោះព្រះវិញ្ញាណនៃព្រះអម្ចាស់នឹងយាងចេញ ដោយមិនគិតថា នរណាជាអ្នកខុសនោះទេ ។ យើងម្នាក់ៗគឺជាបុគ្គលដែលមានភាពខ្លាំង និង ទេពកោសល្យ ដែលខុសប្លែកពីបុគ្គលដទៃទៀតលើផែនដីនេះ ។ យើងម្នាក់ៗមាននូវភាពទន់ខ្សោយ ។ នៅក្នុងដៃគូភាពមួយដែលចុះសម្រុង គឺមានការងារជាក្រុម—ដែលមានម្នាក់ទន់ខ្សោយ ហើយម្នាក់ទៀតខ្លាំងពូកែ » ( « What I Want My Son to Know before He Leaves on His Mission » Ensign ខែ ឧសភា ឆ្នាំ ១៩៩៦ ទំព័រ ៤១ ) ។

តើប្រធាន ហ្វោស្ត បានមានប្រសាសន៍ថានឹងមានអ្វីកើតឡើង នៅពេលមានការទាស់ទែងគ្នារវាងដៃគូអ្នកផ្សព្វផ្សាយសាសនា ? ( សូមមើលផងដែរ នីហ្វៃទី៣ ១១:២៩ ) ។
តើលក្ខណៈទាំងឡាយដែលយើងបានសិក្សានេះ អាចជួយដៃគូឲ្យចៀសវាងពីការទាស់ទែងគ្នា ហើយមានទំនាក់ទំនងមួយកាន់តែចុះសម្រុងបានយ៉ាងដូចម្ដេច ? ( សូមជួយសិស្សស្វែងរកគោលការណ៍ដែលថា នៅពេលដៃគូអ្នកផ្សព្វផ្សាយសាសនាបង្ហាញឲ្យឃើញលក្ខណៈ និង ឥរិយាបថដូចជាព្រះគ្រីស្ទចំពោះគ្នាទៅវិញទៅមក នោះពួកគេត្រូវបានប្រទានពរឲ្យមានព្រះវិញ្ញាណ ) ។
ហេតុអ្វីបានជាការមានទំនាក់ទំនងដ៏ចុះសម្រុងមួយ អាចធ្វើឲ្យដៃគូភាពមួយមានប្រសិទ្ធភាពកាន់តែខ្លាំងក្នុងប្រកាសដំណឹងល្អ ?

សូមគិតដល់ការអានឮៗ នៅក្នុងកថាខណ្ឌចំនួនប្រាំដំបូងក្រោមចំណងជើង « ដៃគូរបស់អ្នក » ( នៅក្នុងចំណុច « ទំនាក់ទំនងជាមួយអ្នកដទៃ » ) នៅក្នុង ក្បួនច្បាប់អ្នកផ្សព្វផ្សាយសាសនា ( ទំព័រ ៣៣–៣៤ ) ។ បន្ទាប់មក សូមសួរ ៖

តើអ្នកបានប្រើគោលការណ៍មួយដែលមាននៅក្នុងកថាខណ្ឌទាំងនេះ ដើម្បីពង្រឹងទំនាក់ទំនងជាមួយសមាជិកគ្រួសារ ឬ មិត្តភក្ដិយ៉ាងដូចម្ដេច ?

សូមបញ្ចប់មេរៀនដោយអញ្ជើញឲ្យសិស្សរបស់អ្នក ថ្លែងទីបន្ទាល់របស់ខ្លួនអំពីព្រះគ្រីស្ទ និង សារៈសំខាន់នៃការប្រែក្លាយដូចជាទ្រង់ ។

ការអញ្ជើញឲ្យអនុវត្ត

សូមជួយសិស្សឲ្យដឹងថា ដំណើរការនៃការអភិវឌ្ឍលក្ខណៈដូចជាព្រះគ្រីស្ទ តម្រូវឲ្យមានជំនួយពីព្រះអម្ចាស់ និង ការប្រឹងប្រែងផ្ទាល់ខ្លួនយ៉ាងច្រើន ។ សូមលើកទឹកចិត្តសិស្សឲ្យធ្វើលំហាត់ខាងក្រោមនេះមួយ ឬ ច្រើន ទុកជាផ្នែកនៃការប្រឹងប្រែងរបស់ពួកគេក្នុងការប្រែក្លាយដូចជាព្រះអង្គសង្គ្រោះ ៖

សូមជ្រើសរើសលក្ខណៈដូចជាព្រះគ្រីស្ទចេញពី ជំពូកទី ៦ នៅក្នុង ប្រកាសដំណឹងល្អរបស់យើង រួចសិក្សាបន្ថែមដោយប្រើបទគម្ពីរនានា រួមបញ្ចូលទាំង Bible Dictionary, Topical Guide, index ។ល។ សូមដាក់ផែនការដើម្បីអភិវឌ្ឍលក្ខណៈនោះ ឲ្យបានកាន់តែប្រសើរនៅក្នុងជីវិតរបស់អ្នក ។ សូមចែកចាយផែនការរបស់អ្នក ជាមួយឪពុកម្ដាយ ឬ មិត្តភក្ដិជិតស្និទ្ធ ។
សូមគិតអំពីអ្វីដែលអ្នកអាចធ្វើ ដើម្បីប្រែក្លាយកាន់តែដូចជាព្រះគ្រីស្ទចំពោះក្រុមគ្រួសារ មិត្តភក្ដិរបស់អ្នក ( ទាំងសមាជិក និង មិនមែនសមាជិក ) ព្រមទាំងថ្នាក់ដឹកនាំសាសនាចក្រ ។ សូមសរសេរយោបល់ជាក់លាក់ៗ ដែលអ្នកមាន ហើយប្រព្រឹត្តតាមយោបល់ទាំងនោះនៅសប្ដាហ៍នេះ ។
សូមដាក់គោលដៅមួយចំនួនអំពីរបៀបដែលអ្នកអាចចៀសវាងពីការទាស់ទែងគ្នា ជាមួយដៃគូផ្សព្វផ្សាយសាសនានាពេលអនាគត ។
សូមស្វែងរកមធ្យោបាយបង្ហាញសេចក្ដីស្រឡាញ់ចំពោះសមាជិកគ្រួសារ និង មិតភក្តិ និងដើម្បីបម្រើពួកគេដោយសេចក្ដីអត់ធន់ និង សេចក្ដីសប្បុរស ។