រៀនដោយព្រះវិញ្ញាណ

សេចក្ដីផ្ដើម

ដើម្បីឲ្យអ្នកផ្សព្វផ្សាយសាសនារីកចម្រើននៅក្នុងដំណឹងល្អ ហើយស្ថិតនៅលើមាគ៌ាដែលនាំទៅរកជីវិតដ៏នៅអស់កល្បជានិច្ច ពួកគេត្រូវអភិវឌ្ឍទម្លាប់នៃការសិក្សាដំណឹងល្អ ។ នៅឯមជ្ឈមណ្ឌលបំពាក់បំប៉នអ្នកផ្សព្វផ្សាយសាសនា អ្នកផ្សព្វផ្សាយសាសនាចំណាយពេលបីបួនម៉ោងរៀងរាល់ថ្ងៃ សិក្សាដោយខ្លួនឯង និង ជាមួយដៃគូរបស់ខ្លួន ។ នៅក្នុងតំបន់បេសកកម្ម ពួកគេត្រូវបានរំពឹងឲ្យបន្តការសិក្សាដំណឹងល្អរៀងរាល់ថ្ងៃ ។ ពួកគេត្រូវតែរៀន « ដោយសារការសិក្សា និង ដោយសារសេចក្ដីជំនឿផង » ( គ. និង ស. ៨៨:១១៨ ) ដើម្បីបង្កើតឃ្លាំងចំណេះដឹងនៃដំណឹងល្អ ហើយពង្រឹងការប្រែចិត្តជឿផ្ទាល់ខ្លួនរបស់ពួកគេ ។ វាចាំបាច់ចំពោះពួកអ្នកផ្សព្វផ្សាយសាសនាដែលត្រូវបំពេញបន្ថែមឃ្លាំងនៃចំណេះដឹងអំពីដំណឹងល្អនេះ តាមរយៈការសិក្សាដែលបានដឹកនាំដោយព្រះវិញ្ញាណ ដើម្បីបង្រៀនដោយមានអំណាច ហើយបំពេញតាមគោលបំណងរបស់ខ្លួន ។

ការរៀបចំទុកជាមុន

សូមសិក្សា គោលលទ្ធិ និង សេចក្តីសញ្ញា ៨:២–៣, ៩:៧–៨, ១១:១២–១៧, ២១–២២, ២៦–២៨ និង ១៣៨:១–២, ១១ ។
សូមសិក្សា ប្រកាសដំណឹងល្អរបស់យើង ទំព័រ ១៧–១៨, ២២–២៤ ។
សូមផ្ដល់ក្រដាសឲ្យសិស្សប្រើ ក្នុងករណីពួកគេពុំមានសៀវភៅកំណត់ហេតុការសិក្សាទេនោះ ។
សូមរៀបចំបង្ហាញវីដេអូ « Advice for Studying the Scriptures » ( ២:០៧ ) ដែលមាននៅលើគេហទំព័រ LDS.org ។
សូមរៀបចំក្រដាសចែកដែលមានចំណងជើងថា « ទម្លាប់អានព្រះគម្ពីរផ្ទាល់ខ្លួន » ដែលមាននៅចុងមេរៀននេះ ។
សូមរៀបចំបង្ហាញរូបភាពរបស់ យ៉ូសែប និង ហៃរុម ស៊្មីធ ។

រូបភាព
statue of Joseph and Hyrum Smith

យ៉ូសែប និង ហៃរុម ស៊្មីធ

យោបល់សម្រាប់ការបង្រៀន

សារៈសំខាន់នៃការសិក្សាដំណឹងល្អ

សូមបង្ហាញរូបភាពរបស់ យ៉ូសែប ស្ម៊ីធ និង បងប្រុសរបស់លោក ហៃរុម ដល់សិស្ស រួចឲ្យពួកគេបើកព្រះគម្ពីរទៅ គោលលទ្ធិ និង សេចក្តីសញ្ញា ១១ ។ សូមជួយសិស្សឲ្យយល់អំពីបរិបទនៃកណ្ឌនេះដោយពន្យល់ថា ខណៈពេលដែល យ៉ូសែប ស៊្មីធ កំពុងបកប្រែព្រះគម្ពីរមរមន បងប្រុសរបស់លោក ហៃរុម បានបែរជាចាប់អារម្មណ៍នឹងការងារនោះ ហើយមានបំណងចែកចាយសារលិខិតនៃការស្ដារឡើងវិញជាមួយមនុស្សទូទៅ ។ ហៃរុម បានស្នើឲ្យ យ៉ូសែប ទូលសូមវិវរណៈជំនួសឲ្យរូបលោក ដើម្បីស្វែងយល់អំពីព្រះឆន្ទៈរបស់ព្រះអម្ចាស់ ។ ចម្លើយរបស់ព្រះអម្ចាស់ ត្រូវបានកត់ត្រានៅក្នុង គោលលទ្ធិ និង សេចក្ដីសញ្ញា ១១ ។ តាមការយល់ឃើញភាគច្រើន ហៃរុម បានស្ថិតនៅក្នុងស្ថានភាពដូចគ្នាទៅនឹងសិស្សក្នុងថ្នាក់របស់អ្នកដែរ ដែលកំពុងត្រៀមខ្លួនចែកចាយសារលិខិតនៃដំណឹងល្អដែលបានស្ដារឡើងវិញនេះ ។

សូមឲ្យសិស្សពីរបីនាក់ ប្ដូរវេនគ្នាអាចឮៗនៅក្នុង គោលលទ្ធិ និង សេចក្តីសញ្ញា ១១:១៥–១៧ ទន្ទឹមនឹងពេលដែលសិស្សដទៃទៀតអានតាម ដោយស្វែងរកឱវាទដែលព្រះអម្ចាស់បានប្រទានដល់ ហៃរុម ។ បន្ទាប់មកសូមសួរ ៖

ហេតុអ្វីបានជាព្រះអម្ចាស់មានព្រះបន្ទូលប្រាប់ ហៃរុម ឲ្យ « ចាំបន្តិច » ពីមុនចែកចាយសារលិខិតនៃដំណឹល្អជាមួយមនុស្សទូទៅ ?

សូមឲ្យសិស្សអាន គោលលទ្ធិ និង សេចក្តីសញ្ញា ១១:២១–២២ និង ២៦ ដោយស្វែងរកឱវាទ ដែលអនុវត្តចំពោះអ្នកដែលត្រៀមធ្វើជាអ្នកផ្សព្វផ្សាយសាសនានាពេលបច្ចុប្បន្ននេះ ។

តើព្រះអម្ចាស់បានណែនាំហៃរុម ឲ្យធ្វើអ្វីដើម្បីចែកចាយសារលិខិតនៃដំណឹល្អជាមួយមនុស្សទូទៅ ? តើដើម្បីឲ្យបានព្រះបន្ទូលរបស់ព្រះ មានន័យដូចម្ដេច ? តើការទុកព្រះបន្ទូលរបស់ព្រះក្នុងចិត្តរបស់អ្នក មានន័យដូចម្ដេច ?
តើឱវាទរបស់ព្រះអម្ចាស់មាននៅក្នុងខគម្ពីរទាំងនេះ អាចជួយបុគ្គលដែលកំពុងត្រៀមខ្លួនចេញបម្រើបេសកកម្មនាពេលបច្ចុប្បន្ននេះយ៉ាងដូចម្ដេច ? ( ទោះបីជាពួកគេអាចប្រើពាក្យផ្សេងៗគ្នាមែន ក៏សិស្សគួរតែរកឃើញគោលការណ៍ដូចតទៅនេះ ៖ ការសិក្សាដំណឹងល្អ រៀបចំពួកអ្នកផ្សព្វផ្សាយសាសនាឲ្យប្រកាសដំណឹងល្អដោយនូវព្រះវិញ្ញាណ និង ព្រះចេស្ដា ) ។
តើពរជ័យអ្វីខ្លះ ដែលព្រះអម្ចាស់បានសន្យាចំពោះអ្នកទាំងឡាយដែល « ខំដើម្បីឲ្យបានព្រះបន្ទូល [ របស់ទ្រង់ ] » ?

កំណត់ចំណាំ ៖ នៅពេលពួកអ្នកផ្សព្វផ្សាយសាសនារៀនអំពីគោលលទ្ធិទាំងឡាយនៃដំណឹងល្អ ហើយពង្រឹងទីបន្ទាល់ នោះសមត្ថភាពរបស់ពួកគេក្នុងការបង្រៀនដោយនូវព្រះវិញ្ញាណ នឹងមានកាន់តែខ្លាំងឡើង ។ ពួកអ្នកផ្សព្វផ្សាយសាសនាត្រូវបានលើកទឹកចិត្តឲ្យរៀនសូត្រ ហើយរីកចម្រើនតាមរយៈការអានព្រះគម្ពីរមរមន និង ការសិក្សាមេរៀនទាំងឡាយដែលមាននៅក្នុង ជំពូកទី ៣ នៃ ប្រកាសដំណឹងល្អរបស់យើង ។ សូមជួយសិស្សរបស់អ្នកឲ្យដឹងថា ការសិក្សាបែបនេះអាចជួយពួកគេចាប់ផ្ដើម « បានព្រះបន្ទូល [ របស់ព្រះ ] » នាពេលឥឡូវនេះ ។

សូមឲ្យសិស្សបើកទៅ ទំព័រទី ១៨៤ នៅក្នុង ប្រកាសដំណឹងល្អរបស់យើង រួចឲ្យសិស្សម្នាក់អានឮៗ នៅក្នុងកថាខណ្ឌដែលចាប់ផ្ដើមដោយ « សមត្ថភាពរបស់អ្នកដើម្បីបង្រៀនជាមួយនឹងអំណាច » ។ បន្ទាប់មកសូមសួរ ៖

តើមានគំនិតអ្វីខ្លះនៅក្នុងកថាខណ្ឌនេះ ដែលបន្ថែមសារៈសំខាន់ទៅលើការសិក្សាព្រះគម្ពីរជារៀងរាល់ថ្ងៃ ចំពោះអ្នកដែលចង់ក្លាយទៅជាអ្នកផ្សព្វផ្សាយសាសនាដ៏មានប្រសិទ្ធភាព ។ ( ការសិក្សាព្រះគម្ពីររៀបចំអ្នកផ្សព្វផ្សាយសាសនា ឲ្យបង្រៀនដំណឹងល្អដោយនូវព្រះចេស្ដា ) ។

សូមប្រាប់សិស្សថា ចំណុចផ្សេងទៀតក្នុងមេរៀននេះ នឹងផ្ដោតសំខាន់ទៅលើរបៀបដែលពួកគេអាចទទួលបានប្រយោជន៍កាន់តែច្រើន ពីការសិក្សាព្រះគម្ពីរផ្ទាល់ខ្លួន ។ សូមលើកទឹកចិត្តសិស្សឲ្យពិចារណានៅពេលសិក្សាមេរៀននេះ អំពីរបៀបអនុវត្តអ្វីដែលពួកគេរៀន ដើម្បីបង្កើនអនុភាពនៃការសិក្សាព្រះគម្ពីរ និង ការសិក្សាដំណឹងល្អរបស់ពួកគេ ។

ការប្រើសៀវភៅកំណត់ហេតុការសិក្សា

សូមប្រាប់សិស្សឲ្យបើកទៅទំព័រ x នៅក្នុងបុព្វកថានៃ ប្រកាសដំណឹងល្អរបស់យើង ។ សូមឲ្យសិស្សអានឮៗនៅក្នុងកថាខណ្ឌទាំងពីរក្រោមចំណុច « ការសិក្សាផ្ទាល់ខ្លួន » ។ បន្ទាប់ពីការអាន សូមសួរ ៖

ស្របតាមផ្នែកនេះ តើការប្រើសៀវភៅកំណត់ហេតុការសិក្សា អាចជួយអ្នកនៅពេលអ្នកសិក្សាដំណឹងល្អបានយ៉ាងដូចម្ដេច ?
ហេតុអ្វីបានជាមានសារៈសំខាន់ ដែលត្រូវកត់ត្រាគំនិត ព្រមទាំងអារម្មណ៍នានាដែលអ្នកទទួលបានអំឡុងពេលការសិក្សាដំណឹងល្អ ?

សូមគិតអំពីការសួរដល់សិស្សរបស់អ្នក ថាតើពួកគេមានសៀវភៅកំណត់ហេតុការសិក្សាមួយក្បាលដែរឬទេ រួចសូមឲ្យសិស្សទាំងឡាយណាដែលមាន ចែកចាយអំពីគុណប្រយោជន៍ដែលសៀវភៅកំណត់ហេតុការសិក្សានោះបានជួយដល់ពួកគេ ។ សូមលើកទឹកចិត្តសិស្សឲ្យចាប់ផ្ដើមប្រើសៀវភៅកំណត់ហេតុការសិក្សា ក្នុងករណីដែលពួកគេពុំទាន់មាននៅឡើយនោះ ។ សូមរំឭកពួកគេថា សៀវភៅកំណត់ហេតុការសិក្សា អាចជាសៀវភៅកំណត់ហេតុជាកងមួយ ឬជាសៀវភៅកំណត់ចំណាំ ឬជាក្រដាសសៀវភៅកងមួយចោះភ្ជាប់គ្នាក៏បាន ។ សិស្សក៏អាចប្រើ ឧបករណ៍កំណត់ចំណាំ និង សៀវភៅកំណត់ហេតុ នៅលើគេហទំព័រ LDS.org ឬកម្មវិធីកត់ចំណាំមួយនៅលើឧបករណ៍អេឡិចត្រូនិចដែរ ។ សូមលើកទឹកចិត្តសិស្សឲ្យនាំយកសៀវភៅកំណត់ហេតុការសិក្សាមកជាមួយរាល់ពេលមករៀន ដើម្បីកត់ត្រាគំនិត អារម្មណ៍ និង ចំណេះដឹងដែលពួកគេមានពេលកំពុងរៀន ។

ការរៀនដោយព្រះវិញ្ញាណ

សំណួរតាមដាន សំណួរតាមដាន អាចជួយសិស្សឲ្យគិតកាន់តែខ្លាំងអំពីគោលការណ៍ ហើយឆ្លើយដោយក្ដីស្មោះស្ម័គ្រទាំងស្រុង ។ ឧទាហរណ៍ នៅពេលសិស្សឆ្លើយដោយប្រើចម្លើយសាមញ្ញ ឬ ខ្លី អ្នកអាចសួរថា « តើប្អូនអាចលើកឧទាហរណ៍មួយ អំពីអ្វីដែលប្អូនចង់មានន័យដែរឬទេ ? » ឬ « តើប្អូនអាចគិតអំពីគ្រាមួយ ដែលប្អូនបានទទួលអារម្មណ៍នៃសេចក្ដីពិតចំពោះអ្វីដែលយើងកំពុងតែពិភាក្សាគ្នាដែរឬទេ ? »

សូមចែកសិស្សជាគូៗ ។ សូមឲ្យពួកគេធ្វើការជាមួយគ្នាដើម្បីអាន កថាខណ្ឌទីពីរនៅទំព័រទី ១៧ នៅក្នុង ប្រកាសដំណឹងល្អរបស់យើង រួចពិភាក្សាអំពីអ្វីដែលតម្រូវឲ្យធ្វើ ដើម្បីមានបទពិសោធន៍នៃការៀនសូត្រមួយដ៏មានអត្ថន័យជាមួយនឹងព្រះគម្ពីរ ។ បន្ទាប់ពីសិស្សមានពេលគ្រប់គ្រាន់ដើម្បីពិភាក្សាអំពីកថាខណ្ឌនេះហើយ សូមឲ្យពួកគេពីរបីនាក់ចែកចាយគំនិតសំខាន់ពីរបីចេញពីការពិភាក្សារបស់ពួកគេ ។ អ្នកអាចសួរសំណួរដូចខាងក្រោម ៖

តើការសិក្សាដោយ « ចិត្តស្មោះស » មានន័យដូចម្ដេច ? (ចិត្តស្មោះស មានន័យថា យើងមានបំណងគោរព ឬ អនុវត្តតាមអ្វីដែលយើងរៀន ។
តើការសិក្សាដោយ « ចិត្តស្មោះស » និង « ស្រេកឃ្លានសេចក្ដីសុចរិត » មានអានុភាពលើការសិក្សាដំណឹងល្អរបស់បុគ្គលម្នាក់យ៉ាងដូចម្ដេច ? ( នៅពេលសិស្សឆ្លើយ សូមពិចារណាអំពីការសួរសំណួរតាមដានដើម្បីលើកទឹកចិត្តពួកគេឲ្យគិតអំពីចម្លើយរបស់ខ្លួនឲ្យបានកាន់តែច្រើន ។ ឧទាហរណ៍ ប្រសិនបើសិស្សឆ្លើយថា ចិត្តស្មោះស នឹងត្រូវបានឆ្លុះបញ្ចាំងតាមរបៀបដែលបុគ្គលម្នាក់អធិស្ឋាន នោះអ្នកអាចឲ្យពួកគេពន្យល់អំពីរៀបដែលការអធិស្ឋានរបស់បុគ្គលម្នាក់អាចនឹងមានភាពខុសគ្នា ។ ប្រសិនបើសិស្សឆ្លើយថា វានឹងបង្ហាញតាមបំណងប្រាថ្នារបស់ពួកគេ នោះសូមឲ្យពួកគេបកស្រាយលម្អិតលើគំនិតនោះ ) ។

សូមឲ្យសិស្សបីនាក់ដាក់វេនគ្នាអានឮៗ នូវកថាខណ្ឌក្នុងចំណុចក្រោមចំណងជើង « រៀនដោយព្រះវិញ្ញាណបរិសុទ្ធ » នៅលើទំព័រ ១៨ នៅក្នុង ប្រកាសដំណឹងល្អរបស់យើង ។ សូមឲ្យសិស្សឯទៀតអានតាម ហើយគូសចំណាំពរជ័យដែលកើតមានចំពោះយើង នៅពេលព្រះវិញ្ញាណបរិសុទ្ធជួយយើងរៀនដំណឹងល្អ ។ បន្ទាប់មកសូមសួរ ៖

តើមានពរជ័យអ្វីខ្លះដែលកើតមានចំពោះយើង នៅពេលព្រះវិញ្ញាណបរិសុទ្ធដឹកនាំការរៀនដំណឹងល្អ ? ( សូមគិតអំពីការសរសេរគោលការណ៍នេះនៅលើក្ដារខៀន នៅពេលសិស្សឆ្លើយ ៖ នៅពេលព្រះវិញ្ញាណបរិសុទ្ធដឹកនាំការរៀនដំណឹងល្អរបស់យើង យើងទទួលបានពន្លឺ និង ការយល់ដឹងកាន់តែច្រើន ) ។

ដើម្បីជួយសិស្សយល់កាន់តែច្បាស់អំពីរបៀបដែលពួកគេអាចយាងអញ្ជើញព្រះវិញ្ញាណបរិសុទ្ធ ឲ្យបង្រៀនពួកគេអំឡុងពេលសិក្សាដំណឹងល្អ សូមអាន ឬ ដាក់បង្ហាញប្រសាសន៍ដកស្រង់ពីអែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់ ។ សូមឲ្យសិស្សស្វែងរកអ្វីដែលពួកគេអាចធ្វើ ដើម្បីទទួលឲ្យបានកាន់តែច្រើនពីការសិក្សាព្រះគម្ពីររបស់ពួកគេ ។

រូបភាព
អែលឌើរ ឌី ថត គ្រីស្តូហ្វឺសិន

« ដោយសារតែដំណឹងល្អត្រូវបានចារក្នុងចិត្តរបស់អ្នក អ្នកត្រូវស្គាល់ថាវាគឺជាអ្វី ហើយត្រូវអភិវឌ្ឍដើម្បីយល់វាឲ្យបានកាន់តែពេញលេញ ។ នោះមានន័យថា អ្នកនឹងសិក្សាអំពីវា ។ « នៅពេលដែលខ្ញុំនិយាយថា ‹ សិក្សា › ខ្ញុំមានន័យថាជាអ្វីមួយ ដែលពិសេសជាងការគ្រាន់តែអានទៅទៀត ។ វាជារឿងល្អមួយ ដែលពេលខ្លះអានព្រះគម្ពីរ នៅក្នុងពេលកំណត់ណាមួយ ដើម្បីដឹងន័យទូទៅនៃសារលិខិតនោះ ប៉ុន្ដែចំពោះការប្រែចិត្តជឿវិញ អ្នកគួរតែយកចិត្តទុកដាក់ទៅលើចំនួនពេលវេលាដែលអ្នកបានចំណាយលើព្រះគម្ពីរ ជាងគិតអំពីចំនួនពេលវេលាដែលអ្នកចំណាយដើម្បីអាននៅក្នុងពេលនោះ ។ ខ្ញុំឃើញថា ពេលខ្លះអ្នកអានពីរបីខគម្ពីរ ឈប់ ដើម្បីសញ្ជឹងគិតអំពីខគម្ពីរនោះ សូមអានខគម្ពីរនេះម្តងទៀតដោយយកចិត្តទុកដាក់ ហើយនៅពេលអ្នកគិតអំពីអត្ថន័យរបស់វា សូមអធិស្ឋានដើម្បីទទួលបានការយល់ដឹង សួរសំណួរនៅក្នុងគំនិតរបស់អ្នក រង់ចាំការបំផុសគំនិតខាងវិញ្ញាណ រួចសរសេរទុកនូវការបំផុសគំនិត និង ទស្សនវិស័យជ្រៅជ្រះដែលនឹងកើតមាន ដើម្បីឲ្យអ្នកអាចចងចាំ ហើយរៀនសូត្របានកាន់តែប្រសើរឡើង ។ ការសិក្សាតាមរបៀបនេះ អ្នកប្រហែលមិនបានអានច្រើនជំពូក ឬ ច្រើនខគម្ពីរនៅក្នុងរយៈពេលកន្លះម៉ោងនោះទេ ប៉ុន្ដែអ្នកនឹងទុកកន្លែងមួយសម្រាប់ព្រះបន្ទូលនៃព្រះនៅក្នុងដួងចិត្តរបស់អ្នក ហើយទ្រង់នឹងមានព្រះបន្ទូលមកកាន់អ្នក » (« When Thou Art Converted » Ensign ឬ Liahona ខែ ឧសភា ឆ្នាំ ២០០៤ ទំព័រ ១១ ។ ដើម្បីទទួលបានយោបល់បន្ថែមសម្រាប់ការសិក្សា សូមមើល រីឆាដ ជី ស្កត « How to Obtain Revelation and Inspiration for Your Personal Life » Ensign ឬ Liahona ខែ ឧសភា ឆ្នាំ ២០១២ ទំព័រ ៤៥–៤៧ ។

សូមជួយសិស្សវិភាគលើសេចក្ដីថ្លែងការណ៍របស់អែលឌើរ គ្រីស្តូហ្វឺសិន ដោយសួរសំណួរដូចខាងក្រោម ៖

តើសកម្មភាពអ្វីខ្លះដែលអែលឌើរ គ្រីស្តូហ្វឺសិន បានលើកឡើង ដែលអាចដឹកនាំទៅរកការយល់ដឹងអំពីបទគម្ពីរទាំងឡាយ ?
តើសកម្មភាពទាំងនេះ អនុញ្ញាតឲ្យព្រះវិញ្ញាណបរិសុទ្ធបង្រៀនអ្នកបានកាន់តែច្រើនតាមរបៀបណា ?
តើសកម្មភាពមួយ ឬ ច្រើនក្នុងចំណោមសកម្មភាពទាំងនេះ បានជួយអ្នកពង្រឹងការយល់ដឹងរបស់អ្នកអំពីដំណឹងល្អតាមរបៀបណា ?

សូមពន្យល់ថា វាផ្ដល់អត្ថប្រយោជន៍នៅពេលយើងសិក្សាព្រះគម្ពីរដើម្បីឲ្យបានយល់អំពីរបៀបដែលព្រះវិញ្ញាណបរិសុទ្ធទាក់ទងជាមួយយើង ។ សូមបំបែកសិស្សគូៗ ( អាចជាដៃគូដដែលមកពីសកម្មភាពមុនក៏បាន ) ។ សូមសរសេរសេចក្ដីយោងបទគម្ពីរដូចខាងក្រោម ដាក់នៅលើក្ដារខៀន រួចសូមឲ្យសិស្សចម្លងចូលទៅក្នុងសៀវភៅកំណត់ហេតុការសិក្សារបស់ពួកគេ ឬ នៅលើក្រដាសមួយសន្លឹក ៖ គោលលទ្ធិ និង សេចក្តីសញ្ញា ៨:២–៣, ៩:៧–៨, ១១:១២–១៤ និង ១៣៨:១–២, ១១ ។

សូមផ្ដល់ពេលឲ្យសិស្សសិក្សាវគ្គបទគម្ពីរទាំងនេះ រួចគូសចំណាំពាក្យ ឬ ឃ្លា ដែលពិពណ៌នាអំពីរបៀបដែលព្រះវិញ្ញាណបរិសុទ្ធទាក់ទងជាមួយយើង ។ ពួកគេក៏អាចសរសេរកំណត់ចំណាំពីរបីនៅក្នុងសៀវភៅកំណត់ហេតុការសិក្សារបស់ខ្លួន អំពីអ្វីដែលពួកគេរៀនចេញពីវគ្គបទគម្ពីរទាំងនេះ ។ សូមឲ្យសិស្សពិភាក្សាជាមួយដៃគូរបស់ខ្លួន អំពីអ្វីដែលពួកគេបានគូសចំណាំនៅក្នុងខគម្ពីរទាំងនេះ ព្រមទាំងអ្វីដែលពួកគេបានរៀន ។ ក្រោយពីទុកពេលគ្រប់គ្រាន់ហើយ សូមសួរសំណួរដូចខាងក្រោម ៖

តើពាក្យ ឬ ឃ្លាណាខ្លះ ដែលអ្នកបានឃើញថាពិពណ៌នាអំពីរបៀបដែលព្រះវិញ្ញាណបរិសុទ្ធទាក់ទងជាមួយយើង ? ( សូមសរសេរចម្លើយរបស់សិស្សនៅលើក្ដារខៀន ) ។
តើព្រះវិញ្ញាណបរិសុទ្ធបានបង្រៀនអ្នកតាមរបៀបមួយក្នុងចំណោមរបៀបទាំងនេះ ហើយបានពង្រឹងការយល់ដឹងរបស់អ្នកអំពីគោលលទ្ធិ ឬ គោលការណ៍នៃដំណឹងល្អយ៉ាងដូចម្ដេច ? តើបទពិសោធន៍ជាក់លាក់ណាខ្លះ ដែលអ្នកធ្លាប់បានទទួល ?

សូមឲ្យសិស្សបើកទៅទំព័រ ២២ នៅក្នុង ប្រកាសដំណឹងល្អរបស់យើង រួចឲ្យសិស្សម្នាក់អានឮៗ ត្រង់ចំណុចខ្មៅទាំងបួនដំបូងក្រោមចំណងជើង « ការសិក្សាអំពីគំនិត និង យោបល់ » ។ សូមគិតអំពីការសួរសំណួរខាងក្រោមនេះ ៖

តើចំណុចដែលបានណែនាំទាំងនេះ មានអានុភាពលើសមត្ថភាពរបស់អ្នកផ្សព្វផ្សាយសាសនា ក្នុងការចែកចាយដំណឹងល្អជាមួយមនុស្សទូទៅដោយមានប្រសិទ្ធភាពយ៉ាងដូចម្ដេច ?
តើអ្នកអាចសម្របខ្លួនទៅតាមយោបល់ទាំងនេះ ហើយអនុវត្តតាមនាពេលឥឡូវនេះ ក្នុងនាមជាអ្នកដែលត្រៀមខ្លួនធ្វើជាផ្សព្វផ្សាយសាសនាបានយ៉ាងដូចម្ដេច ?
តើការបង្កើនជំនាញ និង ទម្លាប់នៃការសិក្សាព្រះគម្ពីររបស់អ្នក អាចរួមចំណែកនៅក្នុងជោគជ័យក្នុងនាមជាអ្នកផ្សព្វផ្សាយសាសនាបានយ៉ាងដូចម្ដេច ? ( សិស្សប្រហែលជាលើកឡើងអំពីគោលការណ៍ មួយដែលស្រដៀងទៅនឹងគោលការណ៍នេះ ៖ នៅពេលពួកអ្នកផ្សព្វផ្សាយសាសនាអភិវឌ្ឍទម្លាប់នៃការសិក្សាដំណឹងល្អដ៏មានប្រសិទ្ធភាព នោះពួកគេនឹងត្រូវបានបង្រៀនដោយព្រះវិញ្ញាណ បទពិសោធន៍របស់ពួកគេនឹងជាបទពិសោធន៍ដ៏មានតម្លៃ ហើយពួកគេនឹងត្រៀមខ្លួនបានកាន់តែរួចរាល់ដើម្បីបង្រៀនដំណឹងល្អ ) ។

សូមបែងចែកសិស្សទាំងឡាយជាក្រុមដែលមានគ្នាបី ឬ បួននាក់ ។ សូមឲ្យក្រុមនីមួយៗ បែងចែកក្នុងចំណោមពួកគេនូវចំណងជើងតូចទាំងប្រាំមួយក្រោម « ការសិក្សាអំពីគំនិត និង យោបល់ នៅទំព័រ ២២–២៤ នៅក្នុង ប្រកាសដំណឹងល្អរបស់យើង រួចឲ្យសមាជិកក្រុមម្នាក់ៗ សិក្សាចំណងជើងតូចរបស់គេរៀងៗខ្លួន ។ សមាជិកក្រុមខ្លះ អាចនឹងត្រូវសិក្សាចំណងជើងតូចលើសពីមួយ ។ សូមចាត់ឲ្យមានអ្នកដឹកនាំម្នាក់នៅក្នុងក្រុមនីមួយៗ ដើម្បីដឹកនាំការពិភាក្សាអំពីអ្វីដែលសមាជិកក្រុមបានរៀន និង អ្វីដែលពួកគេអាចធ្វើនាពេលឥឡូវនេះ ដើម្បីធ្វើឲ្យការសិក្សាដំណឹងល្អរបស់ពួកគេ កាន់តែមានអានុភាព និង មានប្រសិទ្ធភាព ។ នៅពេលក្រុមទាំងអស់បានមានពេលពិភាក្សាគ្រប់គ្រាន់ហើយ សូមសួរសិស្សក្នុងថ្នាក់ ៖

តើជំនាញ ឬ ទម្លាប់នៃការសិក្សាទាំងនេះ បានជួយអ្នកឲ្យសិក្សាព្រះគម្ពីរបានកាន់តែមានប្រសិទ្ធភាពយ៉ាងដូចម្ដេច ?

ដើម្បីជួយសិស្សអនុវត្តដោយផ្ទាល់នូវអ្វីដែលបានពិភាក្សាហើយនោះ សូមចែកក្រដាសចែក « ទម្លាប់អានព្រះគម្ពីរផ្ទាល់ខ្លួន » ដល់សិស្ស ។ សូមឲ្យពេលពីរបីនាទីដល់សិស្ស ដើម្បីធ្វើលំហាត់ដែលមាននៅលើក្រដាសចែកនោះ ។

រូបភាព

Scripture Study handout

បន្ទាប់ពីបានទុកពេលគ្រប់គ្រាន់ហើយ សូមឲ្យសិស្សចែកចាយគំនិត ឬ ការយល់ដឹងណាមួយ ដែលពួកគេទទួលបានពីលំហាត់នេះ ។ សូមលើកទឹកចិត្តពួកគេឲ្យធ្វើតាមដោយខ្ជាប់ខ្ជួន ជាមួយនឹងជំនាញ និង ទម្លាប់នៃការសិក្សាព្រះគម្ពីរដែលពួកគេបានជ្រើសរើសទៅក្នុងការសិក្សាផ្ទាល់ខ្លួន ។ សូមអះអាងដល់ពួកគេថា នៅពេលពួកគេធ្វើដូចនេះ ព្រះវិញ្ញាណបរិសុទ្ធនឹងបំភ្លឺគំនិតពួកគេ ហើយពង្រឹងការយល់ដឹងពួកគេអំពីដំណឹងល្អ ។

សូមជួយសិស្សឲ្យយល់ថា បន្ថែមទៅលើ របៀប ដែលពួកគេសិក្សា គឺថាពេលវេលា និង អ្វី ដែលពួកគេសិក្សានោះ ក៏អាចជាកត្តាដ៏សំខាន់ក្រៃលែងក្នុងការជួយពួកគេឲ្យក្លាយជាអ្នកផ្សព្វផ្សាយសាសនាដ៏មានប្រសិទ្ធភាពដែរ ។ សូមឲ្យសិស្សបើកទៅទំព័រ viii នៅក្នុងបុព្វកថានៃ ប្រកាសដំណឹងល្អរបស់យើង ហើយមើលទៅ កាលវិភាគជាប្រចាំរបស់អ្នកផ្សព្វផ្សាយសាសនា ដែលមាននៅក្រោមចំណុច « ការសិក្សាផ្ទាល់ខ្លួន ការសិក្សាជាមួយដៃគូ ការប្រជុំក្នុងមណ្ឌល និង សន្និសីទហ្សូន » ។ បន្ទាប់មកសូមសួរ ៖

តើកាលវិភាគជាប្រចាំរបស់អ្នកផ្សព្វផ្សាយសាសនា បង្ហាញអំពីសារៈសំខាន់នៃការសិក្សាដំណឹងល្អយ៉ាងដូចម្ដេច ?
តើការមានសិក្សាព្រះគម្ពីរជាប្រចាំនាពេលឥឡូវនេះ អាចត្រៀមខ្លួនអ្នកឲ្យធ្វើតាមកាលវិភាគដ៏មមាញឹកនេះក្នុងនាមជាអ្នកផ្សព្វផ្សាយសាសនា បានយ៉ាងដូចម្ដេច ?

ការគូសចំណាំព្រះគម្ពីរ

ប្រសិនបើអ្នកនៅសល់ពេលគ្រប់គ្រាន់ សូមគិតអំពីការបង្ហាញវីដេអូ « Advice for Studying the Scriptures » ( ២:០៧ ) ដើម្បីជួយសិស្សឲ្យគិតអំពីវិធីនានា ដែលពួកគេអាចកែលម្អរបៀបដែលពួកគេគូសចំណាំក្នុងព្រះគម្ពីររបស់ខ្លួន ។

បន្ទាប់ពីមើលវីដេអូរួច សូមសួរ ៖

តើអ្នកបានរៀនអ្វីខ្លះមកពីអែលឌើរ បែដណា ដែលនឹងជួយអ្នកកែលម្អការសិក្សាព្រះគម្ពីររបស់អ្នក ?
តើអ្វីជាគោលបំណងនៃការគូសចំណាំក្នុងព្រះគម្ពីរ ? ( ដើម្បីជួយអ្នកចងចាំអ្វី ដែលអ្នកបានរៀនក្រោយមកនៅពេលអ្នកត្រូវការវាម្ដងទៀត ) ។
ហេតុអ្វីបានជាមានសារៈសំខាន់ ដែលអ្នកផ្សព្វផ្សាយសាសនាត្រូវមានរបៀបចងចាំដ៏មានប្រសិទ្ធភាព នូវអ្វីដែលពួកគេបានរៀន ?

រស់នៅតាមអ្វីដែលអ្នកបានរៀន

សូមឲ្យសិស្សម្នាក់អានឲ្យសិស្សក្នុងថ្នាក់ស្ដាប់ នៅក្នុងកថាខណ្ឌទីមួយក្រោមចំណងជើង « ធ្វើតាមអ្វីដែលអ្នករៀន » នៅក្នុង ប្រកាសដំណឹងល្អរបស់យើង ទំព័រ ១៩ ។ បន្ទាប់មក សូមឲ្យសិស្សម្នាក់អានឮៗនៅក្នុង យ៉ូហាន ៧:១៧ ។ សូមជួយសិស្សស្វែងរកគោលការណ៍មួយ ដែលមានបង្រៀននៅក្នុង ប្រកាសដំណឹងល្អរបស់យើង និង យ៉ូហាន ៧:១៧ ដោយសួរ ៖

តើមានភាពខុសគ្នាដូចម្ដេច រវាងការស្គាល់បទគម្ពីរ និង ការរស់នៅតាមការបង្រៀនទាំងឡាយ ដែលមាននៅក្នុងបទគម្ពីរ ? ( ទោះបីជាពួកគេអាចប្រើសម្ដីខុសគ្នាមែន ក៏សិស្សគួរតែយល់អំពីគោលការណ៍នេះ ៖ នៅពេលយើងរស់នៅស្របតាមការបង្រៀននៃដំណឹងល្អ នោះព្រះវិញ្ញាណបរិសុទ្ធនឹងថ្លែងទីបន្ទាល់អំពីសេចក្ដីពិតនៃគោលការណ៍ទាំងនោះ ថែមទាំងនឹងពង្រឹងសេចក្ដីជំនឿ ចំណេះដឹង និង ទីបន្ទាល់របស់យើងផងដែរ ) ។

ចូរពន្យល់ថា អែលឌើរ ដាវីឌ អេ បែដណា ក្នុងកូរ៉ុមនៃពួកសាវកដប់ពីរនាក់ បានបង្រៀនអំពីសារៈសំខាន់នៃការប្រព្រឹត្តតាមអ្វីដែលយើងបានរៀន ។ សូមបង្ហាញសេចក្ដីថ្លែងការណ៍ខាងក្រោម រួចសូមឲ្យសិស្សម្នាក់ស្ម័គ្រចិត្តអានឲ្យសិស្សក្នុងថ្នាក់ស្ដាប់ ៖

រូបភាព
អែលឌើរ ដេវីឌ អេ បែដណា

ក្នុងនាមជាអ្នករៀនដំណឹងល្អ យើងគួរតែធ្វើជា ‹ អ្នកប្រព្រឹត្តតាមព្រះបន្ទូល ហើយកុំឲ្យគ្រាន់តែស្តាប់ប៉ុណ្ណោះ › ( យ៉ាកុប ១:២២ ) ។ ដួងចិត្តរបស់យើងបានបើកទទួលអានុភាពនៃព្រះវិញ្ញាណបរិសុទ្ធ ដរាបណាដែលយើងប្រើប្រាស់សិទ្ធិជ្រើសរើសរបស់យើងដោយសមរម្យ ហើយប្រព្រឹត្តឲ្យស្របតាមគោលការណ៍ត្រឹមត្រូវ—ហើយតាមរបៀបនោះ យើងអញ្ជើញឲ្យមានអំណាចដើម្បីបង្រៀន និង ដើម្បីថ្លែងទីបន្ទាល់ ( « Watching with All Perseverance » Ensign ឬ Liahona ខែ ឧសភា ឆ្នាំ ២០១០ ទំព័រ ៤២ ) ។

តើការធ្វើជាអ្នករស់នៅតាមព្រះបន្ទូល ពុំមែនគ្រាន់តែជាអ្នកស្ដាប់នោះឡើយ មានន័យដូចម្ដេច ?
តើការប្រព្រឹត្ត « ឲ្យស្របតាមគោលការណ៍ត្រឹមត្រូវ » ពង្រឹងការយល់ដឹងរបស់យើងទៅតាមរបៀបមួយ ដែលការគ្រាន់តែសិក្សាមួយមុខមិនអាចធ្វើបាន យ៉ាងដូចម្ដេច ?
តើការប្រព្រឹត្តឲ្យស្របតាមគោលការណ៍ត្រឹមត្រូវ បានអនុញ្ញាតឲ្យអ្នកបង្កើនការយល់ដឹង និង ទីបន្ទាល់អំពីគោលការណ៍នៃដំណឹងល្អដែលអ្នកព្យាយាមរស់នៅតាមនោះ យ៉ាងដូចម្ដេច ?

សូមឲ្យសិស្សម្នាក់អាន កថាខណ្ឌទីពីរនៅទំព័រ ១៩ នៅក្នុង ប្រកាសដំណឹងល្អរបស់យើង ខណៈពេលដែលសិស្សក្នុងថ្នាក់អានតាម ដោយស្វែងរកមធ្យោបាយបន្ថែមដែលការរស់នៅតាមដំណឹងល្អ មានអានុភាពលើដួងចិត្ត និង សមត្ថភាពរបស់អ្នកផ្សព្វផ្សាយសាសនា ។ បន្ទាប់ពីសិស្សបានអានរួចហើយ សូមសួរសំណួរដូចខាងក្រោម ៖

តើមានពរជ័យបន្ថែមអ្វីខ្លះ ដែលកើតមានដល់អ្នកផ្សព្វផ្សាយសាសនា នៅពេលពួកគេរស់នៅតាមគោលការណ៍ទាំងឡាយនៃដំណឹងល្អដែលពួកគេដឹងថាជាការពិតនោះ ? ( សូមជួយសិស្សឲ្យរកឃើញគោលការណ៍នេះ ៖ នៅពេលអ្នកផ្សព្វផ្សាយសាសនារស់នៅតាមដំណឹងល្អ នោះព្រះវិញ្ញាណបរិសុទ្ធនឹងបង្កើនបំណងប្រាថ្នា ព្រមទាំងសមត្ថភាពរបស់ពួកគេក្នុងការចែកចាយដំណឹងល្អ ) ។
ដោយសារតែអ្នកបានត្រៀមខ្លួនបម្រើបេសកកម្ម តើព្រះវិញ្ញាណបរិសុទ្ធបានបង្កើនបំណងប្រាថ្នារបស់អ្នកឲ្យបម្រើបេសកកម្មយ៉ាងដូចម្ដេច ?

ការអញ្ជើញសាសនាគន់ការីឲ្យទៅព្រះវិហារ

អ្នកផ្សព្វផ្សាយសាសនាជួយសាសនាគន់ការី ឲ្យរីកចម្រើនឆ្ពោះទៅទទួលពិធីបុណ្យជ្រមុជទឹក ដោយការអញ្ជើញពួកគេឲ្យរក្សាការតាំងចិត្ត ។ ឧទាហរណ៍ សូមពន្យល់សិស្សថា នៅពេលសាសនាគន់ការីទៅព្រះវិហារ នោះពួកគេអាចទទួលបានវិវរណៈកាន់តែច្រើន តាមរយៈព្រះវិញ្ញាណបរិសុទ្ធ ហើយមានបំណងខិតឲ្យកាន់តែជិតព្រះ ។ ការទៅព្រះវិហារអាចជួយសាសនាគន់ការីពង្រឹងទីបន្ទាល់អំពីដំណឹងល្អដែលបានស្ដារឡើងវិញ ហើយត្រៀមខ្លួនទទួលពិធីបុណ្យជ្រមុជទឹក ។

សូមបង្ហាញអំពីរបៀបអញ្ជើញសាសនាគន់ការី ឲ្យទៅព្រះវិហារ ។ ដំបូង សូមចែកចាយដោយសង្ខេបអំពីពរជ័យទាំងឡាយ ដែលកើតមានតាមរយៈការទៅព្រះវិហារ ។ បន្ទាប់មក សូមប្រើកូនសៀវភៅរបស់អ្នកផ្សព្វផ្សាយសាសនា ការស្ដារឡើងវិញ ( ទំព័រ ២២–២៣ ) ដើម្បីពន្យល់អំពីអ្វីដែលកើតឡើង ក្នុងពេលប្រជុំសាក្រាម៉ង់ ។ ក្រោយមក សូមបង្ហាញអំពីរបៀបបន្តការអញ្ជើញសាសនាគន់ការី ឲ្យចូលរួមការប្រជុំនៅឯព្រះវិហារ ។ បន្ទាប់ពីអ្នកបានបង្ហាញរួចហើយ សូមឲ្យសិស្សអនុវត្តសម្ដែងតាមជំហានទាំងឡាយជាមួយដៃគូរបស់ខ្លួន នូវអ្វីដែលអ្នកបានបង្ហាញ ។ សូមឲ្យពួកគេដាក់វេនគ្នាចែកចាយដោយសង្ខេបៗ អំពីពរជ័យទាំងឡាយដែលពួកគេបានទទួលតាមរយៈការទៅចូលរួមព្រះវិហារ ដើម្បីពន្យល់អំពីអ្វីដែលកើតឡើងនៅពេលប្រជុំសាក្រាម៉ង់ និង ដើម្បីអញ្ជើញមនុស្សម្នាក់ឲ្យមកព្រះវិហារ ។

សូមថ្លែងទីបន្ទាល់អំពីគោលលទ្ធិ និង គោលការណ៍ទាំងឡាយនៃដំណឹងល្អ ដែលមាននៅក្នុងមេរៀននេះ ។

ការអញ្ជើញឲ្យអនុវត្ត

សូមឲ្យសិស្សដាក់អាទិភាពលើការសិក្សាដំណឹងល្អផ្ទាល់ខ្លួន ទន្ទឹមនឹងពេលដែលពួកគេរៀបចំខ្លួនចេញបម្រើបេសកកម្មនោះ ។ សកម្មភាពដែលបានណែនាំខាងក្រោមនេះ អាចជួយសិស្សផ្ដោតសំខាន់ទៅលើការរៀនសូត្រដោយព្រះវិញ្ញាណ ៖

បង្កើតទម្លាប់នៃការសិក្សាដំណឹងល្អជាប្រចាំ រួមមានការសិក្សា និង ការពិចារណាលើព្រះគម្ពីរមរមន ។
អធិស្ឋាននៅពេលចាប់ផ្ដើមការសិក្សាដំណឹងល្អផ្ទាល់ខ្លួន ដើម្បីយាងអញ្ជើញព្រះវិញ្ញាណមកជួយអ្នក ។ ប្រសិនបើអ្នកពុំទាន់បានធ្វើដូចនេះទេ សូមចាប់ផ្ដើមប្រើសៀវភៅកំណត់ហេតុការសិក្សា នៅអំឡុងពេលការសិក្សាដំណឹងល្អផ្ទាល់ខ្លួនរបស់អ្នក ។
សូមជ្រើសរើសចំណុចមួយចេញពី គំនិត និង យោបល់សម្រាប់ការសិក្សា ដែលមាននៅ ទំព័រ ២២–២៤ នៅក្នុង ប្រកាសដំណឹងល្អរបស់យើង ហើយបញ្ចូលវាទៅក្នុងការសិក្សាផ្ទាល់ខ្លួនរបស់អ្នកនៅសប្ដាហ៍នេះ ។

ក្រដាសចែក

រូបភាព

ក្រដាសចែក ការសិក្សាព្រះគម្ពីរ