ការបង្រៀនដំណឹងល្អនៃព្រះយេស៊ូវគ្រីស្ទ ( ភាគ ២ )

សេចក្ដីផ្ដើម

ដំណឹងល្អនៃព្រះយេស៊ូវគ្រីស្ទ រួមបញ្ចូលទាំងគោលលទ្ធិ គោលការណ៍ ក្រឹត្យវិន័យ សេចក្តីសញ្ញា និង ពិធីបរិសុទ្ធដ៏អស់កល្ប ដែលតម្រូវឲ្យមនុស្សលោកទទួលយកដើម្បីបានចូលទៅក្នុងវត្តមានរបស់ព្រះ ហើយបានលើកតម្កើងឡើងនៅក្នុងនគរសេឡេស្ទាល ។ គោលការណ៍ និង ពិធីបរិសុទ្ធនៃដំណឹងល្អទីមួយមានដូចជា ជំនឿលើព្រះយេស៊ូវគ្រីស្ទ ការប្រែចិត្ត ពិធីបុណ្យជ្រមុជទឹកដោយការពន្លិច និង អំណោយព្រះវិញ្ញាណបរិសុទ្ធ ។ អ្នកផ្សព្វផ្សាយសាសនាមានករណីយកិច្ចសំខាន់ក្នុងការអញ្ជើញមនុស្សទូទៅ ឲ្យទទួលពិធីបុណ្យជ្រមុជទឹក ហើយទទួលអំណោយព្រះវិញ្ញាណបរិសុទ្ធ ។ បន្ថែមពីលើនោះ នៅពេលកូនចៅរបស់ព្រះក្លាយជាសមាជិកនៃសាសនាចក្រ នោះពួកគេត្រូវតែស៊ូទ្រាំដល់ទីបំផុតដោយការទទួលយកគោលការណ៍ និង ពិធីបរិសុទ្ធទាំងឡាយផ្សេងទៀត ហើយបន្ដនៅស្មោះត្រង់ចំពោះព្រះបញ្ញត្តិទាំងឡាយរបស់ព្រះ ។ អ្នកដែលត្រៀមខ្លួនធ្វើជាអ្នកផ្សព្វផ្សាយសាសនា គួរតែយល់ឲ្យបានច្បាស់អំពីគោលលទ្ធិទាំងនេះ ហើយត្រៀមខ្លួនពន្យល់វាដោយសាមញ្ញ ហើយថ្លែងទីបន្ទាល់អំពីវាដោយអំណាច ។

ការរៀបចំទុកជាមុន

សូមសិក្សា ម៉ាថាយ ៣:១៣-១៧ យ៉ូហាន ៣:៣-៦ នីហ្វៃទី ២ ៣១:១៧-២០ និង គោលលទ្ធិ និងសេចក្ដីសញ្ញា ២០:៣៧។
សូមសិក្សា ប្រកាសដំណឹងល្អរបស់យើង ទំព័រ ៦៤-៦៧ ។
សូមរៀបចំបង្ហាញរូបភាពព្រះយេស៊ូវទទួលពិធីបុណ្យជ្រមុជទឹក ។
សូមរៀបចំបង្ហាញវីដេអូ « Invitation to Be Baptized ៖ German » ( នាទីទី ២:៤៣ ) The District 2 ដែលមាននៅលើគេហទំព័រ LDS.org ។

យោបល់សម្រាប់ការបង្រៀន

ពិធីបុណ្យជ្រមុជទឹក សេចក្ដីសញ្ញាទីមួយរបស់យើង

ដើម្បីរៀបចំសិស្សឲ្យស្គាល់គោលការណ៍ទាំងឡាយអំពីបុណ្យជ្រមុជទឹក សូមដាក់តាំងរូបភាពយ៉ូហានធ្វើពិធីជ្រមុជទឹកថ្វាយព្រះយេស៊ូវ ហើយអញ្ជើញសិស្សឲ្យសង្ខេបអ្វីដែលពួកគេដឹងអំពីពិធីបុណ្យជ្រមុជទឹករបស់ព្រះយេស៊ូវគ្រីស្ទ ។

យ៉ូហានធ្វើពិធីបុណ្យជ្រមុជទឹកថ្វាយព្រះយេស៊ូវ

អ្នកអាចជ្រើសរើសរំឭកដំណើររឿងនៃពិធីបុណ្យជ្រមុជទឹករបស់ព្រះអង្គសង្គ្រោះដោយការឲ្យសិស្សអាន ម៉ាថាយ ៣:១៣-១៧ ឮៗ ។ បន្ទាប់មកសូមឲ្យសិស្សឲ្យបែរទៅរកសិស្សដែលអង្គុយនៅជិតពួកគេ ហើយឆ្លើយសំណួរនេះ ៖

តើសេចក្ដីពិតដ៏មានសារៈសំខាន់អ្វីខ្លះ ដែលត្រូវបានបង្រៀននៅក្នុងដំណើររឿងនៃពិធីបុណ្យជ្រមុជទឹករបស់ព្រះយេស៊ូវ ?

សូមសរសេរពាក្យខាងក្រោមនៅលើក្តារខៀន ៖

សេចក្ដីសញ្ញានៃ ពិធីបុណ្យជ្រមុជទឹក

សូមឲ្យសិស្សពាក់កណ្ដាលថ្នាក់ សិក្សាកថាកណ្ឌចំនួនបួនដំបូងក្នុងចំណុច « ពិធីបុណ្យជ្រមុជទឹក សេចក្ដីសញ្ញាទីមួយរបស់យើង » នៅទំព័រ ៦៤ នៅក្នុង ប្រកាសដំណឹងល្អរបស់យើង ដោយស្វែងរករបៀបពន្យល់ពាក្យ ពិធីបរិសុទ្ធ ។ សូមឲ្យសិស្សពាក់កណ្ដាលថ្នាក់ទៀត សិក្សាចំណុចដូចគ្នា ដោយរកមើលរបៀបពន្យល់ពាក្យ សេចក្ដីសញ្ញា ។

នៅពេលសិស្សមានពេលគ្រប់គ្រាន់ដើម្បីសិក្សាហើយ សូមឲ្យអ្នកស្ម័គ្រចិត្តផ្ដល់និយមន័យលើពាក្យ ពិធីបរិសុទ្ធ និង សេចក្ដីសញ្ញា ។ បន្ទាប់មក សូមសួរ ៖

តើពាក្យ ពិធីបរិសុទ្ធ និង សេចក្ដីសញ្ញា ទាក់ទងទៅនឹងពិធីបុណ្យជ្រមុជទឹកយ៉ាងដូចម្ដេច ? ( សូមជួយសិស្សឲ្យរកឃើញសេចក្ដីពិតនេះ ៖ តាមរយៈពិធីបរិសុទ្ធនៃពិធីបុណ្យជ្រមុជទឹក នោះយើងធ្វើសេចក្ដីសញ្ញាពិសិដ្ឋមួយជាមួយព្រះ ) ។

សូមផ្ដោតការយកចិត្តទុកដាក់របស់សិស្សទៅលើកថាកណ្ឌក្រោមចំណុច « ពិធីបុណ្យជ្រមុជទឹក សេចក្ដីសញ្ញាទីមួយរបស់យើង » បន្ទាប់មក សូមសួរ ៖

នៅពេលយើងទទួលពិធីបរិសុទ្ធនៃពិធីបុណ្យជ្រមុជទឹក តើយើងចុះសេចក្ដីសញ្ញាថាធ្វើអ្វីខ្លះ ? ( នៅពេលយើងទទួលពិធីបុណ្យជ្រមុជទឹក នោះយើងធ្វើសេចក្តីសញ្ញាថា លើកដាក់មកលើខ្លួនយើងនូវព្រះនាមនៃព្រះយេស៊ូវគ្រីស្ទ ចងចាំទ្រង់ជានិច្ច ហើយគោរពតាមព្រះបញ្ញត្តិទំាងឡាយរបស់ទ្រង់ ។ ប្រសិនបើអ្នកមានអារម្មណ៍ថា សិស្សត្រូវការព័ត៌មានបន្ថែមចំពោះយោបល់នេះ អ្នកអាចចំណាយពេលពីរបីនាទីជាមួយពួកគេ ពិនិត្យមើល គោលលទ្ធិ និងសេចក្ដីសញ្ញា ២០:៣៧ ) ។

អ្នកអាចជួយសិស្សយល់កាន់តែច្បាស់អំពីសេចក្ដីសញ្ញានៃពិធីបុណ្យជ្រមុជទឹករបស់ពួកគេ តាមរយៈការបង្ហាញប្រសាសន៍ដកស្រង់ដូចខាងក្រោមដោយ អែលឌើរ រ៉ូបឺត ឌី ហែល ក្នុងកូរ៉ុមនៃពួកសាវកដប់ពីរនាក់ ហើយសុំឲ្យសិស្សអានវាឮៗ ៖

រូបភាព
អែលឌើរ រ៉ូបឺត ឌី ហ៊ែល

« នៅពេលពិធីបុណ្យជ្រមុជទឹក យើងចុះសេចក្ដីសញ្ញាមួយជាមួយព្រះវរបិតាសួគ៌យើងថា យើងមានឆន្ទៈដើម្បីមករកនគររបស់ទ្រង់ ហើយគោរពតាមមព្រះបញ្ញត្តិទាំងឡាយរបស់ទ្រង់ចាប់ពីពេលនោះតទៅ ទោះជាយើងនៅតែរស់នៅលើពិភពលោកនេះនៅឡើយក្ដី ។ យើងត្រូវបានរំឮកចេញពីព្រះគម្ពីរមរមនថា ពិធីបុណ្យជ្រមុជទឹករបស់យើង គឺជាសេចក្តីសញ្ញាមួយ ដើម្បី ‹ ឈរជាសាក្សីដល់ព្រះ [ និងនគររបស់ទ្រង់ ] នៅគ្រប់ពេល និង គ្រប់សេចក្តី និង គ្រប់ទីកន្លែង ដែលអ្នករាល់គ្នានៅ ដរាបរហូតដល់ស្លាប់ ដើម្បីអ្នកអាចត្រូវបានប្រោសលោះដោយព្រះ ហើយបានរាប់ជាមួយនឹងពួកអ្នកនៃដំណើររស់ឡើងវិញទីមួយ ដើម្បីឲ្យអ្នករាល់គ្នាអាចមានជីវិតដ៏នៅអស់កល្បជានិច្ច › [ ម៉ូសាយ ១៨:៩ ត្រូវបានគូសបញ្ជាក់បន្ថែម ] ។

« នៅពេលយើងយល់អំពីសេចក្ដីសញ្ញានៃពិធីបុណ្យជ្រមុជទឹករបស់យើង និងអំណោយនៃព្រះវិញ្ញាណបរិសុទ្ធ នោះវានឹងផ្លាស់ប្ដូរជីវិតរបស់យើង ហើយវានឹងបង្កើតភក្ដីភាពទាំងស្រុងរបស់យើងចំពោះនគរនៃព្រះ ។ នៅពេលការល្បួងជ្រៀតចូលមកក្នុងជីវិតរបស់យើង ប្រសិនបើយើងនឹងស្ដាប់តាមព្រះវិញ្ញាណបរិសុទ្ធ នោះទ្រង់នឹងរំឭកយើងថា យើងបានសន្យាថា ចងចាំដល់ព្រះអង្គសង្គ្រោះរបស់យើង ហើយថានឹងគោរពតាមព្រះបញ្ញត្តិរបស់ព្រះ » (« The Covenant of Baptism: To Be in the Kingdom and of the Kingdom » Ensign ខែ វិច្ឆិកា ឆ្នាំ ២០០០ ទំព័រ ៧ ) ។

តើអ្នកគិតថា « បង្កើតភក្ដីភាពទាំងស្រុងរបស់យើងចំពោះនគរនៃព្រះ » មានន័យដូចម្ដេច ?
តើពិធីបុណ្យជ្រមុជទឹកផ្លាស់ប្ដូរជីវិតមនុស្សម្នាក់តាមរបៀបណាខ្លះ ?

សូមឲ្យសិស្សអានកថាកណ្ឌដែលនៅសល់ទាំងប៉ុន្មានអំពីពិធីបុណ្យជ្រមុជទឹកនៅ ទំព័រ ៦៥ នៅក្នុង ប្រកាសដំណឹងល្អរបស់យើង ។ សូមឲ្យពួកគេរកមើល ហើយគូសចំណាំទិដ្ឋភាពបន្ថែមនៃគោលលទ្ធិអំពីពិធីបុណ្យជ្រមុជទឹក ដែលសំខាន់ត្រូវចែកចាយជាមួយសាសនាគន់ការី ។ សូមផ្ដល់ពេលបន្តិចឲ្យពួកគេធ្វើសកម្មភាពនេះ រួចហើយឲ្យសិស្សពីរបីនាក់ចែកចាយអំពីអ្វីដែលពួកគេរកឃើញ ។ នៅពេលសិស្សឆ្លើយសំណួរ អ្នកអាចសួរសំណួរតាមដានដូចតទៅ ៖

ហេតុអ្វីវាសំខាន់ដែលសាសនាគន់ការី ត្រូវយល់អំពីគោលលទ្ធិទាំងនេះ ?
តើទំនាក់ទំនងរវាងសេចក្ដីសញ្ញានៃពិធីបុណ្យជ្រមុជទឹក និងគោលការណ៍ទាំងឡាយនៃសេចក្ដីជំនឿលើព្រះយេស៊ូវគ្រីស្ទ និង ការប្រែចិត្ត ដែលយើងបានពិភាក្សាកាលពីមុនមានអ្វីខ្លះ ?
ហេតុអ្វីក៏ការពន្លិចទៅក្នុងទឹក គឺជាផ្នែកមួយដ៏សំខាន់នៃពិធីបរិសុទ្ធនៃពិធីបុណ្យជ្រមុជទឹក ? ( វាគឺជានិមិត្តរូបនៃសេចក្ដីស្លាប់ ការបញ្ចុះ និងការមានព្រះជន្មរស់ឡើងវិញរបស់ព្រះយេស៊ូវគ្រីស្ទ ។ វាក៏ជានិមិត្តរូបនៃការបញ្ចប់ជីវិតចាស់ និងការកើតឡើងជាថ្មីរបស់យើង ក្នុងនាមជាសិស្សមួយរូបនៃព្រះគ្រីស្ទដែរ [ សូមមើល រ៉ូម ៦:៣-៦ ] ) ។

សូមពន្យល់ថា វាសំខាន់ណាស់ដែលសាសនាគន់ការីត្រូវរៀបចំខ្លួនឲ្យបានត្រឹមត្រូវ ដើម្បីទទួលពិធីបុណ្យជ្រមុជទឹក ។ សូមឲ្យសិស្សម្នាក់អាន គោលលទ្ធិ និង សេចក្ដីសញ្ញា ២០:៣៧ ឮៗ ។ បន្ទាប់មក សូមឲ្យសិស្សផ្លាស់វេនទៅសិស្សម្នាក់ទៀត ហើយពិភាក្សាដូចខាងក្រោម ៖

តើខគម្ពីរនេះអាចជួយអ្នកកំណត់ថាពេលណាសាសនាគន់ការីម្នាក់ បានត្រៀមខ្លួនរួចរាល់ដើម្បីទទួលពិធីបុណ្យជ្រមុជទឹក ដោយរបៀបណា ? ( ប្រសិនបើសិស្សមានការលំបាកក្នុងការឆ្លើយសំណួរនេះ សូមនាំពួកគេទៅប្រអប់ចំណងជើង « មុនពិធីបុណ្យជ្រមុជទឹក » នៅផ្នែកខាងក្រោមនៃទំព័រ ៦៥ នៅក្នុង ប្រកាសដំណឹងល្អរបស់យើង ) ។
តើអ្នកគិតថា « ដើម្បីមករកទ្រង់ដោយដួងចិត្តសង្រេង និងវិញ្ញាណទន់ទាប » មានន័យដូចម្ដេច ?
តើមនុស្សម្នាក់បង្ហាញថា ពួកគេពិតជា « បានទទួលព្រះវិញ្ញាណនៃព្រះគ្រីស្ទ » យ៉ាងដូចម្ដេច ?

សកម្មភាពសរសេរ ។ ការសរសេរអាចជាឧបករណ៍ដ៏មានប្រសិទ្ធភាពមួយនៅក្នុងការជួយសិស្សនឹកគិត ហើយពិចារណាអំពីគោលលទ្ធិ និងគោលការណ៍ទាំងឡាយដែលមានបង្រៀននៅក្នុងថ្នាក់ ។ កិច្ចការសរសេរគួរតែត្រូវបានពន្យល់យ៉ាងច្បាស់ ហើយគួរតែផ្ដល់ពេលគ្រប់គ្រាន់ដើម្បីសិស្សអាចបញ្ចប់វាបាន ។ នៅពេលបញ្ចប់សកម្មភាពនោះ អ្នកអាចផ្ដល់ពេលវេលាឲ្យសិស្សពីរបីនាក់ចែកចាយចម្លើយរបស់ពួកគេជាមួយនឹងមិត្តក្នុងថ្នាក់ ។

សូមផ្ដល់ពេលវេលាបន្តិចឲ្យសិស្ស សរសេរនៅក្នុងសៀវភៅកំណត់ហេតុការសិក្សារបស់ពួកគេ អំពីវិធីដ៏ច្បាស់លាស់ដែល ការរក្សាសេចក្ដីសញ្ញាពិធីបុណ្យជ្រមុជទឹករបស់ពួកគេ បាននាំមកនូវពរជ័យជាច្រើនក្នុងជីវិតរបស់ពួកគេ ។ បន្ទាប់ពីផ្ដល់ពេលគ្រប់គ្រាន់ហើយ សូមឲ្យសិស្សពីរ ឬបីនាក់ ចែកចាយអ្វីដែលពួកគេបានសរសេរនោះ ទៅដល់មិត្តក្នុងថ្នាក់ ។

សូមបង្ហាញវីដេអូ « Invitation to Be Baptized: German » ( នាទីទី ២:៤៣) ។ នៅពេលសិស្សមើលវីដេអូ សូមឲ្យពួកគេទស្សនាស្វែងរករបៀបដែលអ្នកផ្សព្វផ្សាយសាសនាបង្រៀន ហើរមែន អំពីសារៈសំខាន់នៃពិធីបុណ្យជ្រមុជទឹក ។

តើអ្នកផ្សព្វផ្សាយសាសនាបាននិយាយអ្វីខ្លះ ដើម្បីជួយហើរមែន យល់អំពីសារៈសំខាន់នៃពិធីបុណ្យជ្រមុជទឹក ?
តើមានភស្ដុតាងអ្វីខ្លះដែលបង្ហាញថា ហើរមែន បានទទួលអារម្មណ៍ពីព្រះវិញ្ញាណបរិសុទ្ធ ហើយមានបំណងប្រាថ្នាទទួលពិធីបុណ្យជ្រមុជទឹក ?

សូមបំបែកសិស្សក្នុងថ្នាក់ជាគូៗ ហើយឲ្យដៃគូនីមួយៗប្រើធនធានដែលមាននៅ ទំព័រ ៦៤-៦៥ នៅក្នុង ប្រកាសដំណឹងល្អរបស់យើង និងបទគម្ពីរមួយ ឬពីរចេញមកពីប្រអប់ ការសិក្សាព្រះគម្ពីរ នៅទំព័រ ៦៥ ដើម្បីរៀបចំមេរៀនដែលមានរយៈពេលបួនទៅប្រាំនាទី ដែលផ្ដោតទៅលើការណែនាំអំពីពិធីបុណ្យជ្រមុជទឹកដល់សាសនាគន់ការី ។ សិស្សក៏អាចប្រើធនធាននៅទំព័រ ៨ ក្នុងកូនសៀវភៅអ្នកផ្សព្វផ្សាយសាសនា ដំណឹងល្អនៃព្រះយេស៊ូវគ្រីស្ទ ផងដែរ ។

បន្ទាប់ពីបានផ្ដល់ពេលវេលាគ្រប់គ្រាន់ឲ្យសិស្សរៀបចំហើយ សូមរៀបចំថ្នាក់ជាក្រុមតូចៗសម្រាប់សិស្សបួននាក់ ដែលមួយក្រុមៗមានពីរគូ ។ សូមឲ្យសិស្សមួយគូក្នុងក្រុមនីមួយៗ បង្រៀនដល់គូផ្សេងទៀតអំពីពិធីបុណ្យជ្រមុជទឹកសម្រាប់រយៈពេលបួនទៅប្រាំនាទី ។ សូមលើកទឹកចិត្តសិស្សដែលដើរតួជាអ្នកផ្សព្វផ្សាយសាសនា ឲ្យបើកទៅវគ្គបទគម្ពីរដែលបានជ្រើសរើសរបស់ពួកគេ ហើយអានវាឮៗជាផ្នែកនៃការបង្រៀនរបស់ពួកគេ ។ នៅពេលសិស្សបានបញ្ចប់បទពិសោធន៍នៃការបង្រៀនរបស់ពួកគេហើយ សូមឲ្យក្រុមតូចៗពិភាក្សាអំពីសំណួរដូចខាងក្រោម ៖ តើមានអ្វីខ្លះដំណើរការទៅដោយរលូន ? តើមេរៀននេះបានជួយដល់អ្នកដែលត្រូវគេបង្រៀន ឲ្យយល់អំពីសារៈសំខាន់នៃពិធីបុណ្យជ្រមុជទឹកយ៉ាងដូចម្ដេច ? តើអ្នកបង្រៀនអាចកែប្រែអ្វីខ្លះ ដើម្បីធ្វើឲ្យការបង្រៀនរបស់ខ្លួនកាន់តែមានប្រសិទ្ធភាព ?

បន្ទាប់មក សូមប្ដូរតួនាទី ហើយអនុញ្ញាតឲ្យដៃគូដែលត្រូវបានគេបង្រៀននោះ បង្រៀនដល់ដៃគូមួយទៀតវិញ ។ សូមប្រាកដថា មានពេលសម្រាប់ឲ្យដៃគូទីពីរទទួលមតិកែលម្អ ។ អំឡុងសកម្មភាពនេះ សូមដើរជុំវិញបន្ទប់ដើម្បីមើលសិស្សបង្រៀន ហើយផ្ដល់ការសរសើរ និងយោបល់អំពីរបៀបដែលពួកគេអាចកែលម្អ ។

នៅពេលសិស្សទាំងអស់បានមានឱកាសបង្រៀនហើយ សូមចំណាយពេលពីរបីនាទីពិភាក្សាអំពីបទពិសោធន៍នោះជាមួយសិស្សក្នុងថ្នាក់ទាំងអស់គ្នា ។ ដើម្បីចាប់ផ្ដើមការពិភាក្សា សូមសួរសំណួរដូចខាងក្រោម ៖

តើអ្នកបានរៀនអ្វីខ្លះ ចេញមកពីការបង្រៀនគោលលទ្ធិនេះ ?
ហេតុអ្វីក៏វាសំខាន់ដែលអ្នកត្រូវរៀបចំខ្លួននាពេលនេះ ដើម្បីបង្រៀនគោលការណ៍ សេចក្ដីពិត និង គោលលទ្ធិទាំងនេះដល់មនុស្សទូទៅ ?
តើមានកិច្ចការអ្វីខ្លះដែលអ្នកអាចធ្វើនាពេលនេះ ដើម្បីរៀបចំខ្លួនកាន់តែប្រសើរ ដើម្បីបង្រៀនអំពីដំណឹងល្អនៃព្រះយេស៊ូវគ្រីស្ទនៅក្នុងបេសកកម្មរបស់អ្នក ?

អំណោយទាននៃព្រះវិញ្ញាណបរិសុទ្ធ

ដើម្បីរៀបចំសិស្សសម្រាប់ផ្នែកនេះក្នុងមេរៀន សូមសួរសិស្សក្នុងថ្នាក់ថាតើពិធីបរិសុទ្ធណាខ្លះ ដែលត្រូវតែធ្វើឡើងឆាប់ៗ បន្ទាប់ពីបុគ្គលម្នាក់បានទទួលពិធីបុណ្យជ្រមុជទឹកហើយ ( ពិធីបញ្ជាក់ ជារបៀបដែលបុគ្គលនោះក្លាយជាសមាជិកនៃសាសនាចក្រ ហើយទទួលអំណោយនៃព្រះវិញ្ញាណបរិសុទ្ធ ) ។ សូមឲ្យសិស្សចំណាយពេលសាមសិបវិនាទី ដើម្បីពិចារណាអំពីមូលហេតុដែលមនុស្សត្រូវទទួលពិធីបញ្ជាក់ឆាប់ៗ បន្ទាប់ពីពួកគេបានទទួលពិធីបុណ្យជ្រមុជទឹក ។ ពីមុនសិស្សឆ្លើយ សូមគិតដល់ការអានប្រសាសន៍ដកស្រង់ដោយព្យាការី យ៉ូសែប ស៊្មីធ ឲ្យសិស្សស្ដាប់ ៖

រូបភាព
ព្យាការី យ៉ូសែប ស្ម៊ីធ

« ប្រសិនបើអ្នកពុំបានទទួលពិធីបុណ្យជ្រមុជទឹកដោយការផ្ដាច់បាប ហើយទទួលព្រះវិញ្ញាណបរិសុទ្ធទេនោះ អ្នកដូចជាជ្រមុជទឹកឲ្យបាវខ្សាច់ដូច្នោះដែរ ។ ពិធីបុណ្យជ្រមុជទឹកដោយទឹក គឺជាពិធីបុណ្យជ្រមុជទឹកពាក់កណ្ដាល ហើយវាពុំល្អទេ បើគ្មានពាក់កណ្ដាលទៀត--ដែលជាពិធីបុណ្យជ្រមុជដោយព្រះវិញ្ញាណបរិសុទ្ធ » ( Teachings of Presidents of the Church: Joseph F. Smith [ ឆ្នាំ ២០០៧ ] ទំព័រ ៩៥ ) ។

សូមសួរ ៖

ហេតុអ្វីបានជាពិធីបុណ្យជ្រមុជទឹកត្រូវបានចាត់ទុកជា « ពិធីបុណ្យជ្រមុជទឹកតែពាក់កណ្ដាល » ប្រសិនបើពុំមាន « ពិធីបុណ្យជ្រមុជដោយព្រះវិញ្ញាណបរិសុទ្ធ » នៅតាមក្រោយទេនោះ ។ ( បន្ទាប់ពីសិស្សបានឆ្លើយ អ្នកអាចលើកទឹកចិត្តសិស្សឲ្យស្ដាប់ចម្លើយបន្ថែមចំពោះសំណួរនេះ នៅពេលបន្តមេរៀនទៅមុខទៀត ) ។

សូមពន្យល់សិស្សថា អ្នកដឹកនាំសាសន៍យូដាម្នាក់ ឈ្មោះ នីកូដេម បានមកសួរសំណួរព្រះយេស៊ូវនៃណាសារ៉ែតនៅយប់មួយដោយសម្ងាត់ ។ សូមឲ្យសិស្សម្នាក់អាន យ៉ូហាន ៣:៣ ឮៗ ហើយសួរ ៖

តើព្រះបន្ទូលរបស់ព្រះអង្គសង្គ្រោះនៅក្នុង យ៉ូហាន ៣:៣ ប្រាប់អំពីអ្វីខ្លះដែលចាំបាច់ត្រូវធ្វើដើម្បីចូលទៅក្នុងនគរព្រះ ?

សូមអាន យ៉ូហាន ៣:៤-៦ ដល់សិស្សក្នុងថ្នាក់ ហើយសួរ ៖

តើនីកូដេមបានសួរអ្វីខ្លះ ដែលប្រាប់ថា គាត់ពុំបានយល់អំពីការបង្រៀនរបស់ព្រះអង្គសង្គ្រោះនៅក្នុងខទី ៣ ?
តើព្រះយេស៊ូវឆ្លើយសំណួរនីកូដេមយ៉ាងដូចម្ដេច ? ( ទ្រង់បានបង្រៀននីកូដេមអំពីគោលលទ្ធិគ្រឹះមួយនៃដំណឹងល្អ ៖ យើងត្រូវតែកើតពីទឹក ហើយ ពីព្រះវិញ្ញាណ ដើម្បីចូលទៅក្នុងនគរព្រះបាន ។ ទ្រង់បានបង្រៀនថា ការ « កើតជាថ្មីម្ដងទៀត » សំដៅទៅលើការកើតជាថ្មីខាងវិញ្ញាណ ពុំមែនខាងរូបកាយទេ ) ។

សូមសរសេរនៅលើក្ដារខៀន ៖

កើតជាថ្មី

កើតពីទឹក

កើតពីព្រះវិញ្ញាណ

បន្ទាប់មក សូមសួរ ៖

តើ « កើតពីទឹក » មានន័យដូចម្ដេច ? ( វាមានន័យថាត្រូវទទួលពិធីបុណ្យជ្រមុជទឹកដោយការពន្លិច ) ។
តើ « កើតពីព្រះវិញ្ញាណ » មានន័យដូចម្ដេច ? ( វាមានន័យថា ទទួលអំណោយនៃព្រះវិញ្ញាណបរិសុទ្ធ ។ ប្រសិនបើសិស្សពិបាកឆ្លើយសំណួរនេះ សូមឲ្យពួកគេមើលទៅ យ៉ូហាន ៣:៥ លេខយោង ខ ) ។
តើអ្នកគិតថាហេតុអ្វីបានជាពាក្យ « កើត » ត្រូវបានប្រើដើម្បីពិពណ៌នាអំពីអ្វីដែលចាំបាច់ត្រូវកើតឡើងចំពោះយើងខាងវិញ្ញាណ ? តើការកើតខាងរូបកាយ ប្រៀបធៀបទៅនឹងការកើតជាថ្មីខាងវិញ្ញាណ មានលក្ខណៈដូចម្ដេច ? ( ប្រសិនបើចាំបាច់ សូមគិតដល់ការអានម៉ូសេ ៦:៥៨-៥៩ ដើម្បីជួយឆ្លើយសំណួរនេះ ) ។

សូមឲ្យសិស្សបីបួននាក់ ប្តូរវេនគ្នាអានឮៗ នូវកថាខណ្ឌក្នុងចំណុចក្រោមចំណងជើង « អំណោយនៃព្រះវិញ្ញាណបរិសុទ្ធ » នៅលើទំព័រ ៦៥ នៅក្នុង ប្រកាសដំណឹងល្អរបស់យើង ។ សូមឲ្យសិស្សក្នុងថ្នាក់ផ្ទៀងតាម ដោយរកមើលពរជ័យដែលមានអមជាមួយអំណោយនៃព្រះវិញ្ញាណបរិសុទ្ធ ។

សូមសួរសិស្ស ៖

តើពរជ័យអ្វីខ្លះ ដែលមានអមមកជាមួយអំណោយនៃព្រះវិញ្ញាណបរិសុទ្ធ ? ( គោលលទ្ធិមួយដែលសិស្សគួរស្គាល់គឺ ៖ អំណោយនៃព្រះវិញ្ញាណបរិសុទ្ធអាចនាំមកនូវការញែកចេញជាបរិសុទ្ធ និងឥទ្ធិពលនៃការលាងសម្អាតចំពោះអ្នកទាំងឡាយដែលទទួលយកវា ) ។

ដើម្បីជួយសិស្សយល់កាន់តែច្បាស់អំពីគោលលទ្ធិនេះ សូមឲ្យពួកគេសិក្សាបទគម្ពីរមួយ ឬពីរក្រោមចំណងជើង « ពរជ័យ និង ឥទ្ធិពលមកពីព្រះវិញ្ញាណបរិសុទ្ធ » នៅក្នុងប្រអប់ការសិក្សាគម្ពីរនៅទំព័រ ៦៧ នៅក្នុង ប្រកាសដំណឹងល្អរបស់យើង ។ នៅពេលពួកគេសិក្សា សូមឲ្យពួកគេគូសចំណាំនៅក្នុងព្រះគម្ពីររបស់ពួកគេអំពីពរជ័យមួយចំនួន ដែលកើតមានមកពីការទទួលអំណោយនៃព្រះវិញ្ញាណបរិសុទ្ធ ។ បន្ទាប់មក សូមសួរ ៖

ហេតុអ្វីបានជាសំខាន់ដែលបុគ្គលម្នាក់ ត្រូវទទួលព្រះវិញ្ញាណបរិសុទ្ធ បន្ទាប់ពីបានទទួលពិធីបុណ្យជ្រមុជទឹកហើយ ?

ការពិចារណា ។ ដោយការផ្ដល់ពេលវេលាឲ្យសិស្សរបស់អ្នកពិចារណានៅក្នុងថ្នាក់ អ្នកអាចលើកទឹកចិត្តពួកគេឲ្យរៀនដោយព្រះវិញ្ញាណ ។ តួនាទីមួយរបស់ព្រះវិញ្ញាណគឺដើម្បីបង្ហាញយើងអំពី « គ្រប់អ្វីទាំងអស់ដែល [ យើង ] ត្រូវធ្វើ » ( នីហ្វៃទី២ ៣២:៥ ) ។ មេរៀនដ៏មានប្រសិទ្ធភាពបំផុត គឺមានបញ្ចូលនូវពេលខ្លះដើម្បីឲ្យសិស្សនឹកគិតអំពីសេចក្ដីពិតដែលពួកគេកំពុងរៀន ។

សូមសួរសំណួរដូចខាងក្រោម ប៉ុន្តែពីមុនសិស្សឆ្លើយ សូមទុកពេលបន្តិចឲ្យពួកគេពិចារណាដោយស្ងាត់ស្ងៀមអំពីចម្លើយរបស់ពួកគេ ។ នៅពេលពួកគេមានពេលគ្រប់គ្រាន់ហើយ សូមឲ្យសិស្សបួនប្រាំនាក់ឆ្លើយ ហើយចែកចាយបទពិសោធន៍ផ្ទាល់ខ្លួនរបស់ពួកគេជាមួយសិស្សក្នុងថ្នាក់ ។

តើពរជ័យអ្វីខ្លះដែលអ្នកបានទទួលមកពីអំណោយនៃព្រះវិញ្ញាណបរិសុទ្ធ ?

សូមបំបែកសិស្សឲ្យធ្វើការជាដៃគូ ។ សូមឲ្យសិស្សប្រើព័ត៌មានចេញមកពី ប្រកាសដំណឹងល្អរបស់យើង ( ឬចំណុចក្រោមចំណងជើង « តើហេតុអ្វីខ្ញុំចាំបាច់ត្រូវទទួលព្រះវិញ្ញាណបរិសុទ្ធ ? » នៅទំព័រ ៨-១០ នៅក្នុងកូនសៀវភៅអ្នកផ្សព្វផ្សាយសាសនា ដំណឹងល្អនៃព្រះយេស៊ូវគ្រីស្ទ ) ហើយរៀបចំមេរៀនបួនទៅប្រាំនាទីស្ដីពីអំណោយនៃព្រះវិញ្ញាណបរិសុទ្ធ ។ សូមរំឭកពួកគេឲ្យដាក់បញ្ចូលនៅក្នុងមេរៀនរបស់ពួកគេនូវបទគម្ពីរមួយ ឬពីរ ចេញមកពីប្រអប់ ការសិក្សាព្រះគម្ពីរ នៅផ្នែកខាងលើនៃទំព័រ ៦៦ នៅក្នុង ប្រកាសដំណឹងល្អរបស់យើង ។

បន្ទាប់ពីបានផ្ដល់ពេលគ្រប់គ្រាន់ឲ្យសិស្សរៀបចំហើយ សូមរៀបចំថ្នាក់ជាក្រុមតូចៗដែលមានសិស្សបួននាក់ ដែលមួយក្រុមៗមានពីរគូ ។ សូមឲ្យសិស្សមួយគូបង្រៀនសិស្សមួយគូទៀត ។ នៅពេលសិស្សបង្រៀន សូមដើរមើលក្នុងថ្នាក់ ផ្ដល់នូវការសរសើរ និងយោបល់អំពីរបៀបដែលពួកគេអាចកែលម្អ ។ នៅពេលសិស្សបានបញ្ចប់បទពិសោធន៍នៃការបង្រៀនរបស់ពួកគេហើយ សូមឲ្យក្រុមតូចៗពិភាក្សាគ្នាដូចខាងក្រោម ៖ តើមានអ្វីខ្លះដំណើរការដោយរលូន ? តើអ្នកបង្រៀនអាចធ្វើអ្វីខ្លះ ដើម្បីធ្វើឲ្យការបង្រៀនរបស់ពួកគេកាន់តែមានប្រសិទ្ធភាព ? តើមេរៀនរបស់ពួកគេ បានជួយដល់អ្នកដែលត្រូវបានបង្រៀន ឲ្យយល់អំពីអំណោយនៃព្រះវិញ្ញាណបរិសុទ្ធយ៉ាងដូចម្ដេច ?

បន្ទាប់មក សូមឲ្យដៃគូក្នុងក្រុមនីមួយៗប្ដូរតួនាទី ដោយឲ្យដៃគូសិស្សដែលត្រូវបានគេបង្រៀន ឲ្យបង្រៀនដល់ដៃគូផ្សេងទៀតវិញ ។ សូមប្រាកដថា មានពេលសម្រាប់ឲ្យដៃគូទីពីរទទួលមតិកែលម្អ ។

នៅពេលដៃគូសិស្សគ្រប់គ្នាបានមានឱកាសបង្រៀនរួចហើយ សូមចំណាយពេលពីរបីនាទី ដើម្បីវាយតម្លៃបទពិសោធន៍ដោយការសួរសំណួរដូចខាងក្រោម ៖

តើអ្នកបានរៀនអ្វីខ្លះ ចេញមកពីការបង្រៀនគោលលទ្ធិនេះ ?
ផ្អែកទៅលើបទពិសោធន៍នេះ តើមានកិច្ចការអ្វីខ្លះដែលអ្នកអាចធ្វើដើម្បីកែលម្អការបង្រៀនរបស់អ្នកក្នុងនាមជាអ្នកផ្សព្វផ្សាយសាសនា ?

ការស៊ូទ្រាំដល់ទីបំផុត

នៅលើក្ដារខៀន សូមគូររូបភាពច្រកទ្វារមួយដែលមានផ្លូវដើរទៅ ៖

រូបភាព

ទ្វារ និង ផ្លូវ

សូមឲ្យសិស្សម្នាក់ក្នុងថ្នាក់អាន នីហ្វៃទី២ ៣១:១៧ ។ បន្ទាប់មក សូមសួរសិស្ស ៖

តើនីហ្វៃបានប្រាប់អ្វីខ្លះ ដែលជាច្រកទ្វារនាំទៅកាន់ជីវិតអស់កល្បជានិច្ចរបស់យើង ?

សូមឲ្យសិស្សផ្សេងទៀតអាន នីហ្វៃទី២ ៣១:១៨-២០ ឮៗ ខណៈដែលសិស្សក្នុងថ្នាក់អានតាម ហើយស្វែងរកអ្វីដែលយើងត្រូវធ្វើបន្ទាប់ពីយើងបានទទួលពិធីបុណ្យជ្រមុជទឹក ។

តើនីហ្វៃបាននិយាយថា មានអ្វីនៅបន្ទាប់ពីច្រកទ្វារ ? ( ផ្លូវតូច និងចង្អៀត ដែលនាំទៅកាន់ជីវិតដ៏អស់កល្បជានិច្ច ) ។
ស្របតាមនីហ្វៃ តើមនុស្សម្នាក់ត្រូវធ្វើអ្វីខ្លះ បន្ទាប់ពីបានទទួលពិធីបុណ្យជ្រមុជទឹកដើម្បីទទួលជីវិតអស់កល្បជានិច្ចហើយនោះ ?
តើការស៊ូទ្រាំដល់ទីបំផុត ទាក់ទងនឹងការដើរតាមគំរូរបស់ព្រះអង្គសង្គ្រោះយ៉ាងដូចម្ដេច ?

សូមឲ្យសិស្សអានក្នុងចំណុចក្រោមចំណងជើង« ការស៊ូទ្រាំដល់ទីបំផុត » នៅទំព័រ ៦៧ នៅក្នុង ប្រកាសដំណឹងល្អរបស់យើង ។ សូមលើកទឹកចិត្តពួកគេ ឲ្យរកមើលអ្វីដែលយើងអាចធ្វើដើម្បីស៊ូទ្រាំដល់ទីបំផុត ។ បន្ទាប់មក សូមសួរ ៖

ហេតុអ្វីបានជាវាសំខាន់ ដែលយើងត្រូវស៊ូទ្រាំដល់ទីបំផុត ? ( សិស្សគួរតែរកឃើញគោលការណ៍នេះ ៖ នៅពេលយើងព្យាយាមដោយក្លៀវក្លាដើម្បីស៊ូទ្រាំដល់ទីបំផុត នោះយើងនឹងសក្ដិសមនឹងជីវិតអស់កល្បជានិច្ច ) ។
តើការធ្វើតាមគំរូរបស់ព្រះអង្គសង្គ្រោះ នឹងជួយអ្នកឲ្យស៊ូទ្រាំដល់ទីបំផុតយ៉ាងដូចម្ដេច ?

សូមបញ្ចប់ការបង្រៀនដោយចែកចាយទីបន្ទាល់របស់អ្នកផ្ទាល់អំពីសារៈសំខាន់នៃដំណឹងល្អនៃព្រះយេស៊ូវគ្រីស្ទ ជាពិសេសពិធីបុណ្យជ្រមុជទឹក អំណោយនៃព្រះវិញ្ញាណបរិសុទ្ធ និងការស៊ូទ្រាំដល់ទីបំផុត ។

ការអញ្ជើញឲ្យអនុវត្ត

សូមគិតដល់ការអញ្ជើញសិស្សឲ្យពង្រឹងការយល់ដឹងរបស់ខ្លួនឲ្យបានជ្រៅជ្រះអំពីដំណឹងល្អនៃព្រះយេស៊ូវគ្រីស្ទ ដោយការធ្វើសកម្មភាពមួយ ឬច្រើនដូចខាងក្រោមអំឡុងសប្ដាហ៍ក្រោយ ៖

ហាត់ពន្យល់អំពីតម្រូវការនៃពិធីបុណ្យជ្រមុជទឹកដែលមាននៅក្នុង គោលលទ្ធិ និង សេចក្ដីសញ្ញា ២០:៣៧ ។ សរសេរប្រយោគមួយចំនួននៅក្នុងសៀវភៅកំណត់ហេតុការសិក្សារបស់អ្នក ដែលពិពណ៌នាអំពីអ្វីដែលអ្នកកំពុងធ្វើឥឡូវនេះ ដើម្បីរស់នៅឲ្យស្របតាមសេចក្ដីសញ្ញានៃពិធីបុណ្យជ្រមុជទឹក ដែលបានចែងនៅក្នុងខគម្ពីរនេះ ។
អានវគ្គបទគម្ពីរអំពីអំណោយនៃព្រះវិញ្ញាណបរិសុទ្ធ ដែលមាននៅក្នុងប្រអប់ ការសិក្សាព្រះគម្ពីរ នៅទំព័រ ៦៦ នៅក្នុង ប្រកាសដំណឹងល្អរបស់យើង ។ សូមអាន « Holy Ghost » នៅក្នុង Bible Dictionary ផងដែរ ។ គូសចំណាំនៅក្នុងព្រះគម្ពីររបស់អ្នក ឬសរសេរក្នុងសៀវភៅកំណត់ហេតុការសិក្សារបស់អ្នក នូវខគម្ពីរដែលអ្នកចង់ប្រើពេលបង្រៀននរណាម្នាក់អំពីអំណោយនៃព្រះវិញ្ញាណបរិសុទ្ធ ។
បង្រៀនគោលការណ៍នៃ « មេរៀនទី ៣ ៖ ដំណឹងល្អនៃព្រះយេស៊ូវគ្រីស្ទ » ទៅកាន់សមាជិកគ្រួសារ ឬមិត្តភក្ដិម្នាក់ ( ប្រសើរបំផុតគួរតែជាមនុស្សម្នាក់ដែលពុំមែនជាសមាជិកនៃសាសនាចក្រ ឬជាមនុស្សម្នាក់ដែលមិនសូវសកម្ម ) ដោយផ្ទាល់ ឬតាមអ៊ិនធើរណិត ។ សូមចែកចាយទីបន្ទាល់ផ្ទាល់ខ្លួនរបស់អ្នក អំពីគោលការណ៍ទាំងនេះនៅពេលអ្នកបង្រៀនវា ។