“Fekauʻaki mo e Fuakava Motuʻá,” Ngaahi Talanoa ʻo e Fuakava Motuʻá (2022)
“Fekauʻaki mo e Fuakava Motuʻá,” Ngaahi Talanoa ʻo e Fuakava Motuʻá
Fekauʻaki mo e Fuakava Motuʻá
Ko e ngaahi talaʻofa ʻa e Tamai Hēvaní ki Heʻene fānaú he kuonga muʻá
Ko e Konga ʻuluaki ʻo e Tohi Tapú ʻa e Fuakava Motuʻá. Naʻe fuoloa hono hiki e ngaahi potufolofola ko ʻení, kimuʻa pē ia pea toki ʻaloʻi ʻa Sīsū Kalaisí. ʻOku ʻi ai ha ngaahi talanoa ʻokú ne tokoniʻi kitautolu ke tau tui kiate Ia. ʻOkú ne akoʻi ko e tokotaha kotoa pē ʻi he māmaní ko e konga ia ʻo e fāmili ʻo e Tamai Hēvaní pea ʻokú Ne ʻofa ʻi Heʻene fānaú.
Teutalōnome 7:7–9; ʻĪsaia 45:10–12
ʻOku ui ʻa Sīsū Kalaisi ʻi he Fuakava Motuʻá ko Sihova mo e ʻEikí. ʻOkú Ne muimui ʻi he ngaahi fakahinohino ʻa e Tamai Hēvaní. Talu mei he kuonga ʻo ʻĀtama mo ʻIví, mo hono fekauʻi mai ʻe he Tamai Hēvaní e ʻEiki ko Sīsū Kalaisí ke folofola ki Heʻene kau palōfitá. ʻOku fekauʻi mai ʻe he Tamai Hēvaní ʻa e Laumālie Māʻoniʻoní ke tokoniʻi kitautolu ke tau ʻiloʻi ʻoku moʻoni e ngaahi lea ʻa ha palōfita.
ʻEkesōtosi 6:2–3; 2 Fakamatala Meʻa Hokohoko 20:20; ʻĀmosi 3:7; 2 Pita 1:21; Mōsese 2:1
Naʻe talaʻofa ʻe he ʻEikí ki he palōfita ko ʻĒpalahamé mo hono uaifi ko Selá ʻe tupulaki hona fāmilí ʻo tāpuekina e māmaní kotoa. Naʻe maʻu ʻe hona mokopuna ko Sēkopé ha fāmili tokolahi ʻa ia naʻe hoko ko ha puleʻanga. Naʻe ui kinautolu ko e fale ʻo ʻIsilelí, pe ko e kakai ʻIsilelí. Naʻe akoʻi kinautolu ʻe he kau palōfitá ke nau hanganaki atu ki he taimi ʻe hāʻele mai ai ʻa Sīsū Kalaisí.
Sēnesi 15:5–6; 17:1–8; Teutalōnome 18:15; ʻĪsaia 7:14
ʻOku lahi ha ngaahi talanoa ʻi he Fuakava Motuʻá ʻoku fakahaaʻi ai e founga naʻe tauhi ai ʻe he ʻEikí ʻEne ngaahi talaʻofa ki he kakai ʻIsilelí.
Sēnesi 9:13–17; Selemaia 11:4–5; Hepelū 11:1–35
ʻI he taimi ne fanongo ai e kakai ʻIsilelí ki he kau palōfitá mo tauhi e ngaahi fekaú, naʻe tokoniʻi kinautolu ʻe he ʻEikí. ʻI heʻenau talangataʻá, naʻe ʻikai ke Ne lava ʻo tokoniʻi kinautolu.
Teutalōnome 11:26–28; Siope 36:11–12
Ko ha konga koe e fāmili ʻo e Tamai Hēvaní. ʻOku angaʻofa ʻa e Tamai Hēvaní, pea ʻokú Ne ʻofeina koe. ʻOku ʻi ai ʻEne palani maʻau. Koeʻuhí ko e ʻEiki ko Sīsū Kalaisí, te ke lava ʻo toe foki ʻo nofo fakataha mo e Tamai Hēvaní. Hangē pē ko hono akoʻi ʻo e kakai ʻIsilelí, te ke lava ʻo fili ke tui ki he ʻEikí mo tauhi ʻEne ngaahi fekaú.