“Nehemaia,” Ngaahi Talanoa ʻo e Fuakava Motuʻá (2022)
“Nehemaia,” Ngaahi Talanoa ʻo e Fuakava Motuʻá
Nehemaia 1–2; 4; 6
Nehemaia
Ko hono toe langa ʻo e ʻā ʻi Selusalemá
Ko Nehemaiá ko ha Siu na‘e nofo ʻi Pēsia. Ko e tamaioʻeiki falalaʻanga ia ʻa e tuʻí. Naʻe fanongo ʻa Nehemaia ʻi ha ʻaho ʻe taha ʻoku faingataʻaʻia ʻa e kau Siu ʻi Selusalemá. Naʻe fakaʻauha e ngaahi ʻā holisi naʻe maluʻi ʻaki ʻa Selusalemá pea kuo teʻeki toe langa. Naʻe ʻi ha tuʻunga fakatuʻutāmaki ʻa Selusalema. Naʻe ʻaukai mo lotu ʻa Nehemaia ki he tokoni ʻa e ʻEikí.
Naʻe ʻeke ʻe he tuʻí kia Nehemaia pe ko e hā ʻoku loto-mamahi aí. Naʻá ne fakahā ki he tuʻí ʻa e faingataʻa ʻi Selusalemá. Naʻe folofola ange e tuʻí te ne lava ʻo tokoni. Naʻe kole ʻe Nehemaia ke ʻalu ki Selusalema ʻo toe langa e ʻaá. Naʻe fokotuʻu ʻe he tuʻí ʻa Nehemaia ko ha taki peá ne foaki kiate ia e ngaahi meʻa naʻá ne fie maʻú.
Naʻe kamata ke toe langa ʻe Nehemaia mo e kau Siú e ngaahi ʻā ʻo Selusalemá. Ka naʻe fakakata ʻaki kinautolu ʻe honau ngaahi filí mo feinga ke taʻofi kinautolu.
Naʻe feinga e ngaahi filí ke kākaaʻi ʻa Nehemaia ke mavahe mei he koló. Ka naʻe ʻikai mavahe ʻa Nehemaia. Naʻá ne falala ki he ʻEikí. Naʻá ne fai ha ngāue maʻongoʻonga.
Naʻe talaange ʻe Nehemaia ki hono kakaí ke ʻoua te nau ilifia. Ne nau fokotuʻu ha kau leʻo ʻi he ʻā holisí ke maluʻi ia. Naʻe hokohoko atu pē hono langa ʻe he kau Siú e ʻā holisí. Naʻe foaki ʻe he ʻEikí ha mālohi ki he kau Siú, pea ne nau fakaʻosi e ʻaá ʻi ha ʻaho ʻe 52. Naʻe toe malu pē ʻa Selusalema.