“Ko ‘Ilaisiā mo e Kau Taulaʻeiki ‘o Pealí,” Ngaahi Talanoa ʻo e Fuakava Motuʻá (2022)
“Ko ‘Ilaisiā mo e Kau Taulaʻeiki ‘o Pealí,” Ngaahi Talanoa ʻo e Fuakava Motuʻá
1 Ngaahi Tuʻi 18
Ko ʻIlaisiā mo e Kau Taulaʻeiki ʻo Pealí
Ko e kau palōfita ‘a e ʻEikí mo e kau taula‘eiki loí
Naʻe hokohoko atu ke mamahi ʻa e puleʻanga ʻo ʻIsilelí koeʻuhi ko e ʻikai maʻu ha vaí. Naʻe folofola ange ʻe he tuʻi ko ʻĒhapí ki he kakaí ke nau muimui ʻi he ʻotua loi ne fakahingoa ko Peali.
Na‘e fekauʻi ‘e he ʻEikí ‘a e palōfita ko ʻIlaisiaá ke fetaulaki mo ʻĒhapi. Na‘e fakaafeʻi ‘e ʻIlaisiā ʻa e kakai kotoa pē ki he tumuʻaki ʻo ha moʻunga. Na‘á ne fakaafeʻi ‘a e tuʻí mo ‘ene kau taulaʻeikí ki ha pole ke sio pe ko e ʻEikí pe ko Peali ʻa e ʻOtua moʻoní.
Naʻe fakamatalaʻi ‘e ʻIlaisiā ‘a e polé. Te ne feilaulauʻi mo e kau taulaʻeikí ha pulu ʻi ha ʻesi feilaulau, ka he ʻikai te nau tutu ʻe kinautolu ha afi. Ka, ʻe lotu ʻa e kau taula‘eikí kia Peali ke tutu e afí. Hili ia pea ʻe lotu ʻa ʻIlaisiā ki he ʻEikí ke tutu e afí. Na‘e ʻilo ‘e ʻIlaisiā ko e ‘Otua pē ʻe taha ʻoku moʻoní te ne tutu ʻa e afí.
Na‘e lotu ʻa e kau taula‘eiki ʻa Peali ki honau ‘otuá mei he pongipongi ki he hoʻatā, ka na‘e ʻikai hoko ha meʻa. Naʻe fakakata ange ʻa ʻIlaisiā kiate kinautolu ʻo tala ange pau pē ʻoku mohe ‘a honau ʻotua ko Pealí.
Naʻe hoko ʻo ʻita ʻa e kau taulaʻeikí, ʻo nau puna ki he funga ʻesi feilaulaú, pea nau kalanga ʻo aʻu ki he efiafí. Na‘a nau fakaʻamu ʻe tali mai honau ʻotuá, ka na‘e ʻikai pē ke ʻi ai ha vela ia.
Hili ia pea hoko leva ‘a ʻIlaisiā. Na‘á ne langa ha ‘esi-feilaulau ki he ʻEikí, keli ha luo takatakai ‘i he ʻesi feilaulaú, pea teuteuʻi ʻa e feilaulaú.
Na‘e kole ʻe ‘Ilaisiā ki he kakaí ke fakafonu ʻaki ha vai e talamu ‘e fā pea huaʻi ki he fefie ʻo ʻene ‘esi feilaulaú tuʻo tolu. Naʻe viviku ʻa e fefié mo e ‘esi feilaulaú. Na‘e fakafonu ʻe he vaí e kotoa ʻo e luó.
Na‘e lotu ʻa ‘Ilaisiā ki he ʻEikí ke fakahā mai ʻa e mālohi ʻo e ‘Otua moʻoní. Na‘e ʻalu hifo ‘a e afi mei he ‘Eikí ʻo tutu ‘a e feilaulaú, fefié, ngaahi fo‘i maká, mo e vaí. Na‘e ʻilo ‘e he kakaí ko e ʻOtua ‘a ʻIlaisiaá ʻa e ‘Otua moʻoní. Na‘e lotu ʻa ‘Ilaisiā ke ʻosi ‘a e laʻala‘aá, pea naʻe ʻomai ‘e he ʻEikí ‘a e ʻuhá.