“Ko Taniela mo e ‘Ana ʻo e Fanga Laioné” Ngaahi Talanoa ʻo e Fuakava Motuʻá (2022)
“Ko Taniela mo e ‘Ana ʻo e Fanga Laioné” Ngaahi Talanoa ʻo e Fuakava Motuʻá
Taniela 6
Ko Taniela mo e ʻAna ʻo e Fanga Laioné
Ko e loto-toʻa ha tangata ʻe taha ke lotu
Naʻe hoko ʻa Talaiasi ko e pule ʻo Pāpilone. Na‘á ne ʻofa ʻia Taniela mo loto ke fakanofo ia ko e taki ki he kotoa ʻo e puleʻangá. Naʻe loto-kovi ai ha ni‘ihi ʻo e kau tangata poto ‘a e tuʻí.
Na‘e ʻilo‘i ʻe he kau tangata potó e lotu ‘a Taniela ki he ʻOtuá, ko ia ai naʻa nau kākaa‘i e tu‘í ke faʻu lao foʻou. Ko ha taha pē naʻe lotu ki he ʻOtuá ʻe lī ia ki ha ʻana ʻo e fanga laioné.
Ka neongo iá, na‘e kei fili pē ʻa Taniela ke lotu ki he ‘Otuá. Naʻe sio e kau tangata poto ʻa e tuʻí ki he lotu ʻa Tanielá pea nau tala ki he tuʻí ʻoku maumauʻi ʻe Taniela ʻa e laó. Na‘e ʻilo‘i ai ʻe he tu‘í kuo kākaaʻi ia ‘e heʻene kau tangata potó. Na‘á ne feinga ke kumi ha founga ke ne fakahaofi ai ʻa Taniela, ka naʻe pau ke muimui e tuʻí ki he‘ene lao pē ʻaʻaná.
Na‘e lī ʻa Taniela ki he ‘ana ʻo e fanga laioné. Naʻe ʻā e tu‘í he poó kakato, ʻo ʻaukai koe‘uhi ke maluʻi ‘a Taniela.
‘I he hengihengi ʻo e ʻaho hono hokó, naʻe fakavave atu ‘a e tuʻí ki he ʻana ʻo e fanga laioné. Na‘á ne ui kia Taniela ke vakai pe ʻokú ne kei mo‘ui. Na‘e ui fakafoki mai ʻa Taniela! Na‘á ne tala ange ki he tuʻí na‘e fekauʻi hifo ‘e he ʻOtuá ha ‘āngelo ke ne tāpuniʻi ʻa e ngaahi ngutu ‘o e fanga laioné. Na‘e ʻikai ke fakalavea‘i ia ʻe he fanga laioné.
Naʻe fiefia ʻa e tuʻí he hao ‘a Tanielá. Na‘á ne tauteaʻi ‘a e kau tangata poto ko ia ne nau kākaaʻi iá, pea naʻá ne fakangata ʻa e laó. Na‘á ne akoʻi hono pule‘angá ʻo kau ki he mālohi mo e angalelei ‘a e ʻOtuá.