“ʻOku Folofola ʻa e ʻEikí kia ʻIlaisiā,” Ngaahi Talanoa ʻo e Fuakava Motuʻá (2022)
“ʻOku Folofola ʻa e ʻEikí kia ʻIlaisiā,” Ngaahi Talanoa ʻo e Fuakava Motuʻá
ʻOku Folofola ʻa e ʻEikí kia ʻIlaisiā
Ko e fanongo ki he leʻo ʻo e ʻEikí
Naʻe fakahā ʻe he Tuʻi ko ʻĒhapí ki he Kuini ko Sisipelí, naʻe ikunaʻi ʻe he ʻEikí e kau taulaʻeiki ʻo Pealí. Naʻe ʻita ʻa Sisipeli peá ne pehē te ne tāmateʻi e palōfita ko ʻIlaisiaá.
Ke malú, naʻe mavahe ʻa ʻIlaisiā mei he fonua ko ʻIsilelí. Naʻá ne fononga ʻi ha ʻaho ʻe 40 mo ha pō ʻe 40, mo ʻaukai pē lolotonga ʻene fonongá. Naʻá ne aʻu atu ki he Moʻunga Sainaí ʻo maʻu ha ʻana ke toitoi ai. Naʻe fakahā ʻe he ʻEikí kia ʻIlaisiā ke ʻalu ki he tumutumu ʻo e moʻungá koeʻuhí ke Ne lava ʻo folofola kiate ia.
Naʻe haʻu ha havili mālohi ʻo veteki takai e ngaahi maka ʻi he ʻaná ʻo movetevete. Hili iá, naʻe luluʻi ʻe ha mofuike ʻa e kelekelé. Naʻe tupukoso leva ha afi. Naʻe fanongo ʻa ʻIlaisiā ki he ongo leʻolahi ʻo e matangí, mofuiké mo e afí. Ka naʻe ʻikai kau e leʻo ʻo e ʻEikí ʻi he ngaahi ongo leʻolahi ko iá.
Naʻe fanongo leva ʻa ʻIlaisiā ki ha kihiʻi leʻo siʻi mo vanavanaiki. Naʻá ne ʻiloʻi ko e ʻEikí ia. Naʻe fehuʻi ʻe he ʻEikí kia ʻIlaisiā pe ko e hā ʻokú ne fai ʻi aí.
Naʻe pehē ʻe ʻIlaisiā naʻá ne toitoi ke malu. Kuo tāmateʻi kotoa e kau palōfitá, pea naʻe fakafisingaʻi ʻe he kakaí ʻa e ʻEikí.
Naʻe fakafiemālieʻi ʻe he ʻEikí ʻa ʻIlaisiā mo fakahā ange ʻoku tokolahi ha kau ʻIsileli ʻoku nau kei moihū ki he ʻEikí. Naʻe kole ʻe he ʻEikí kia ʻIlaisiā ke foki ki ʻapi ʻo teuteuʻi ha palōfita ʻe taha. Ko e hingoa ʻo e palōfita foʻou ko ʻení ko ʻIlaisa.