Sēnesi 42–46

Siosefa mo e Hongé

Ko e faingamālie ʻo ha tangata ke fakatahaʻi hono fāmilí

Naʻe fiekaia e fāmili ʻo Sēkopé koeʻuhí ko ha honge. Ko ia naʻe fekauʻi atu ʻe Sēkope hono ngaahi fohá ki ʻIsipite ke fakatau ha meʻakai. Naʻá ne tuku pē hono foha siʻisiʻi taha ko Penisimaní ʻi ʻapi. Naʻá ne manavasiʻi naʻa mole ʻa Penisimani ʻo hangē ko e mole hono foha ko Siosefá ʻi he ngaahi taʻu lahi kimuʻá. Naʻe ʻikai ke ne ʻilo naʻe fakatau pōpula ʻe hono ngaahi foha lalahí ʻa Siosefa.

Sēnesi 42:1–4

ʻI he taimi ko ʻení, naʻe hoko ʻa Siosefa ko ha taki maʻongoʻonga ʻi ʻIsipite. Naʻá ne tokangaʻi hono fakatau atu ʻo e meʻakaí lolotonga e hongé. Naʻe fakataha e kau tautehiná mo Siosefa ʻo kole ha meʻakai. Naʻe ʻikai ke nau ʻiloʻi ia.

Sēnesi 42:5–8

Naʻe ʻiloʻi kinautolu ʻe Siosefa, ka naʻá ne fakangalingali pē ʻoku ʻikai ke ne ʻiloʻi kinautolu. Naʻá ne fehuʻi ange fekauʻaki mo honau fāmilí ke ʻilo pe naʻe kei moʻui ʻene tamaí mo hono tokoua ko Penisimaní.

Sēnesi 42:10–14

Naʻe ʻoange leva ʻe Siosefa ha meʻatokoni ki hono ngaahi tokouá. Naʻá ne talaange ke ʻoua naʻa nau toe foki mai ke maʻu ha meʻakai kae ʻoua kuo nau omi mo honau tehina ko Penisimaní.

Sēnesi 42:15–20

ʻI he toe ʻosi e meʻakai ʻa e fāmilí, naʻe ʻiloʻi ʻe Sēkope kuo pau ke ne ʻave ʻa Penisimani mo hono ngaahi foha kehé ki ʻIsipite. Naʻe kei manavasiʻi pē ʻa Sēkope ke tukuange ʻa Penisimani. Ka naʻe palōmesi ange ʻe Siuta, ko e taha ʻo e kau tautehiná, te ne maluʻi ʻa Penisimani.

Sēnesi 43:1–15

ʻI he foki ʻa e kau tautehiná ki ʻIsipité, naʻe ʻai ʻe Siosefa ke hangē naʻe kaihaʻasi ʻe Penisimani ha ipu silivá. Naʻá ne fie sio pe kuo liliu hono ngaahi taʻoketé. Naʻe kōlenga ʻa Siuta kia Siosefa ke ʻoua te ne tauteaʻi ʻa Penisimani ka ke tauteaʻi ia.

Sēnesi 44

Naʻe fiefia ʻa Siosefa ke vakai kuo liliu hono ngaahi taʻoketé. Ne nau ʻofa lahi ʻia Penisimani ʻo feʻunga ke maluʻi ia. Ko ia ai, naʻe toki fakahā ange leva ʻe Siosefa ia.

Sēnesi 42:21–24; 45:1–4

Naʻe fakamolemoleʻi ʻe Siosefa hono ngaahi taʻoketé ʻi hono fakatau ia ke hoko ko ha pōpulá. Naʻe pehē ʻe Siosefa ko e founga ia ʻa e ʻEikí ke tokoniʻi honau fāmilí ke hao mei he hongé.

Sēnesi 45:5–8

Naʻe foki e kau tautehina ʻo Siosefá ki heʻenau tamai ko Sēkopé, ʻo fakahā kiate ia ʻa e meʻa kotoa pē naʻe hokó. Naʻe hiki kotoa ʻe Sēkope hono fāmilí ki ʻIsipite.

Sēnesi 45:24–28; 46:1–26

Naʻe talitali lelei ʻe Felo e fāmili ʻo Sēkopé. Naʻá Ne foaki ange ha kelekele mo ha fanga monumanu koeʻuhí ke nau maʻu ha meʻakai lahi. Naʻe nofo melino e fāmili ʻo Sēkopé ʻi ha taimi lōloa.

Sēnesi 45:16–23