“Tuʻi ko Sōsaiá,” Ngaahi Talanoa ʻo e Fuakava Motuʻá (2022)
“Tuʻi ko Sōsaiá,” Ngaahi Talanoa ʻo e Fuakava Motuʻá
2 Ngaahi Tuʻi 22; 2 Fakamatala Meʻa Hokohoko 34–35
Tuʻi ko Sōsaiá
Ko ha feinga ke talangofua ki he ngaahi fekau ʻa e ʻEikí
Naʻe taʻu valu ʻa Sōsaia ʻi he taimi naʻe fokotuʻu ai ia ko e tuʻi ʻo Siutá. Ko ha tuʻi lelei ia naʻe ʻofa ki he ʻEikí. Naʻá ne fie tokoni ki hono kakaí, ʻa e kakai ʻIsilelí, ke nau talangofua ki he ʻEikí mo taʻofi ʻenau moihū ki he ngaahi tamapuá. ʻI heʻene matuʻotuʻa angé, naʻe kamata ke ne fakaleleiʻi mo hono kakaí ʻa e temipalé pea toe ngaohi ia ke fakaʻofoʻofa.
2 Ngaahi Tuʻi 22:1–2; 2 Fakamatala Meʻa Hokohoko 34:3–7
Lolotonga e ngāue ʻa e kakaí ʻi he temipalé, naʻe maʻu ʻe Hilikia ko e taulaʻeiki lahí, ʻa e tohi ʻo e fonó, ko ha takainga tohi naʻe ʻi ai ʻa e ngaahi folofolá.
Naʻe lau ʻe ha tamaioʻeiki e tohí kia Sōsaia. Naʻe fanongo ʻa Sōsaia ki he ngaahi folofolá pea naʻá ne loto mamahi koeʻuhí naʻe ʻikai talangofua hono kakaí ki he ʻEikí. Naʻá ne hae hono valá ke fakahaaʻi naʻá ne loto mamahi.
Naʻá ne talaange kia Hilikia ke fehuʻi ki he ʻEikí pe ko e hā ʻoku totonu ke nau faí. Naʻe ʻaʻahi ʻa Hilikia mo e kau tamaioʻeiki ʻa e tuʻí kia Hūlita. Ko ha palōfita fefine ia, ko ha taki faivelenga naʻe ueʻi fakalaumālie ʻe he ʻOtuá. Naʻá ne pehē naʻe fiefia e ʻEikí ʻia Sōsaia koeʻuhí naʻá ne tokoniʻi e kakaí ke nau talangofua. Naʻe talaʻofa ʻe he ʻEikí ʻe moʻui ʻa e Tuʻi ko Sōsaiá ʻi he melino.
Naʻe fie maʻu ʻe he Tuʻi ko Sōsaiá hono kakaí ke tauhi ʻenau ngaahi palōmesi ki he ʻEikí. Naʻá ne kole ange ke nau fakafiefiaʻi ʻa e Laka Atú ke tokoni ke nau manatuʻi e founga naʻe fakatauʻatāinaʻi ai ʻe he ʻEikí e kakai ʻIsileli ʻi ʻIsipité he kuonga fuoloá.