“Lute mo Nāomi,” Ngaahi Talanoa ʻo e Fuakava Motuʻá (2022)
“Lute mo Nāomi,” Ngaahi Talanoa ʻo e Fuakava Motuʻá
Lute 1–4
Lute mo Nāomi
Ko hono ikuna‘i ʻo e ngaahi ‘ahiʻahí ‘aki ʻa e ‘ofá mo e mateakí
Naʻe hiki ʻa Nāomi pea mo hono fāmilí ki Moape koeʻuhi he na‘e ʻikai ha me‘akai feʻunga ‘i he fonua ko Siutá. Hili iá na‘e mate ʻa e husepāniti ‘o Nāomí. Na‘e mali ʻa e ongo foha ʻo Nāomí mo e ongo fefine ʻo Moape ko hona hingoá ko ʻOʻopa mo Lute. Na‘a nau tokangaʻi ‘a Nāomi ʻi he taʻu ‘e 10.
Hili iá naʻe mate ‘a e ongo husepāniti ʻo ʻO‘opa mo Luté. Naʻe uitou leva ʻa e kau fafiné kotoa he taimí ni. Naʻe ʻikai lava ʻe Nāomi ke ʻoatu ha meʻakai maʻa Lute mo ʻOʻopa.
Naʻe foki ʻa ‘Oʻopa ki hono ʻapí. Ka na‘e fie nofo pē ʻa Lute ‘o tokangaʻi ‘a Nāomi. Naʻe fanongo ʻa Lute mo Nāomi naʻe toe maʻu ha ngoue ʻi he fonua ʻo Siutá, ko ia ai naʻá na fononga ki ai.
Na‘e tūʻuta atu ‘a Lute mo Nāomi ʻi Siuta lolotonga ‘a e utu-taʻú. Na‘á na fie maʻu ha me‘akai. Naʻe maʻu ʻe ha kāinga ʻo Nāomi ko hono hingoá ko Poasi ha ngaahi ngoueʻanga ʻi Siuta. Naʻá ne tuku kia Lute ke ne ʻave ʻa e kēleni ne toé mei heʻene ngaahi ngoueʻangá. Ko ha ngāue ne faingata‘a.
Na‘e fakaʻapa‘apaʻi ‘e Poasi ʻa Lute koe‘uhi naʻá ne ngāue mālohi pea na‘á ne mateakiʻi ‘a Nāomi mo e ʻEikí. Na‘á ne talaange ki he kau tamaioʻeikí ke tuku ha kēleni ʻoku lahi angé ʻi he ngaahi ngoueʻangá maʻa Lute.
Na‘e fie maʻu ‘e Nāomi ke maʻu ʻe Lute ha fāmili. Na‘á ne fakalotolahiʻi ‘a Lute ke mali mo Poasi. Na‘e ʻilo‘i ʻe Lute kapau ʻe mali mo Poasi, te na lava ʻo tokangaʻi fakataha ʻa Nāomi.
Na‘e fakakaukau ʻa Lute ke kole kia Poasi ke na mali. Na‘e ʻilo‘i ʻe Poasi ko ha fefine mateaki mo angatonu ʻa Lute. Naʻá ne loto ki ai.
Ne mali ‘a Lute mo Poasi. Hili iá pea naʻe ma‘u ʻe Lute ha ki‘i pēpē. Na‘á ne hoko ia ko e kui tangata ʻa Tēvitá, ko e tu‘i ʻi he kaha‘ú. Naʻe ʻosi atu ha ngaahi taʻu lahi mei ai, naʻe ʻaloʻi mai ʻa Sīsū Kalaisi ki he hako ʻo e fāmili ko ʻení.