Sēnesi 27–33

Sēkope mo Hono Fāmilí

Founga ʻoku Tauhi ai ʻe he ʻEikí ʻEne Ngaahi Talaʻofá

Na‘e mavahe ʻa Sēkope mei hono ʻapí ke hao mei hono tokoua loto-ʻita ko ‘Īsoá. Naʻe tāpuakiʻi ʻa Sēkope ʻe heʻene tamaí ke ne kumi pea mali mo ha fefine naʻe ‘ofa ki he ʻEikí mo tauhi ‘Ene ngaahi fekaú.

Sēnesi 27:42–46; 28:1–5

Lolotonga e fononga ‘a Sēkopé, ne ʻa‘ahi kiate ia ʻa e ‘Eikí ʻi ha vīsone. Na‘á ne palōmesi ke ʻia Sēkope maʻu ai pē. Na‘e palōmesi ‘a Sēkope ke foaki ki he ʻEikí ha vahe hongofulu ‘e taha ʻo e me‘a kotoa pē naʻá ne ma‘ú.

Sēnesi 28:10–16, 20–22

Na‘e palōmesi ‘e he ʻEikí kia Sēkope te ne maʻu ha fānau tokolahi. ʻE monūʻia ʻa e faʻahinga kotoa pē ‘o e māmaní ʻo fakafou ʻi he hako ʻo Sēkopé, ke nau ʻilo‘i ʻa e Fakamo‘uí. ‘Oku ui ʻa e hako ʻo Sēkopé ʻi he ngaahi ʻaho kimui ní ko e fale ʻo ‘Isilelí.

Sēnesi 28: 3–4, 14; 1 Nīfai 10:14

Na‘e fononga ʻa Sēkope ki he fonua naʻe ui ko Hālani. Naʻá ne ʻofa ai ʻi ha fefine angamā‘oniʻoni ko hono hingoá ko Lesieli.

Sēnesi 27:43; 29:9–20

Na‘e loto-fiemālie ʻa Sēkope ke ngāue ‘i ha taʻu ‘e fitu ki he tamai ʻa Lesieli, ko Lēpaní, kapau ‘e fakangofua ange ia ʻe Lēpani ke mali mo Lesieli. Na‘e loto-lelei ki ai ʻa Lēpani. Na‘e ngāue ʻa Sēkope ‘i ha taʻu ‘e fitu.

Sēnesi 29:21–27

Ka na‘e fie maʻu ʻe Lēpani ke ʻuluaki mali ʻa Lia, ko hono ʻofefine lahi tahá. Lolotonga e malí, naʻe kākaa‘i ʻe Lēpani ʻa Sēkope ʻo ʻoange ʻa Lia ke na mali. Ka na‘e ʻofa ʻa Sēkope ‘ia Lesieli. Na‘á ne palōmesi ke ne ngāue ʻi ha toe taʻu ‘e fitu kehe kapau ʻe lava ke ne mali foki mo ia. Na‘e loto-lelei ki ai ʻa Lēpani, pea kamata ke tokolahi ʻa e fāmili ʻo Sēkopé.

Sēnesi 29:28–35; 30:3–13, 17–24; Sēkope 2:27–30

Na‘e ʻikai ke totongi totonu ‘e Lēpani ʻa Sēkope. Ka na‘e tāpuekina ʻe he ʻEikí ‘a Sēkope ʻaki ha fanga monumanu tokolahi peá Ne folofola kia Sēkope ke foki ki ʻapi.

Sēnesi 30:31, 43; 31:1–7, 17–18

ʻI he‘ene foki ki ʻapí, naʻe ʻilo ʻe Sēkope na‘e ō mai hono tokoua ko ‘Īsoá pea mo ha kau tangata ʻe toko 400 ke fakafetaulaki kiate ia.

Sēnesi 32:3–6

Na‘e pehē ʻe Sēkope naʻe kei ʻita pē ʻa ʻĪsoa kiate ia. Na‘e ilifia ‘a Sēkope ki he malu ʻa hono fāmilí, ko ia na‘á ne ʻave kinautolu ki ha feitu‘u malu peá ne lotu.

Sēnesi 32:7–24

Na‘e lotu ʻa Sēkope ʻi he poó kakato ʻo aʻu atu ki he pongipongí. Naʻe ʻaʻahi ʻa e ʻEikí kia Sēkope pea tāpuakiʻi ia. Na‘e folofola ʻa e ‘Eikí kia Sēkope te ne hoko ko ha taki ma‘ongoʻonga ki he tokolahi. Na‘e liliu ʻe he ‘Eikí ʻa e hingoa ‘o Sēkopé ki he ʻIsilelí.

Sēnesi 32:24–30

Na‘e ʻikai fuoloa kuo maʻu ‘e ʻĪsoa mo ‘ene kau tangatá ‘a Sēkope mo hono fāmilí. Na‘e ʻikai ke toe ‘ita ʻa ʻĪsoa kia Sēkope. Na‘á ne lele atu ke fakafetaulaki kia Sēkope pea fā‘ofua kiate ia. Na‘á ne fiefia ʻaupito ke sio kiate ia pea mo feʻiloaki mo hono fāmilí. Na‘e fiefia foki mo Sēkope ke sio kia ʻĪsoa.

Sēnesi 33:1–7

Na‘e tauhi ʻe he ‘Eikí ʻene ngaahi palōmesi kia Sēkopé ʻi he kotoa ‘o ʻene mo‘uí. Na‘e aʻu atu ʻa Sēkope ki ʻapi mo hono fāmilí pea nau nofo ai. Talu mei he taimi ko iá, na‘e ui ʻa Sēkope ko ‘Isileli, pea naʻe ui ʻa hono hakó ko e kau ‘Isilelí. Na‘á ne hokohoko atu pē ke tauhi e ngaahi fekaú mo lotu ki he ʻEikí.

Sēnesi 33:17–20