“Palōfita ko Mōsesé,” Ngaahi Talanoa ʻo e Fuakava Motuʻá (2022)
“Palōfita ko Mōsesé,” Ngaahi Talanoa ʻo e Fuakava Motuʻá
ʻEkesōtosi 2–3
Palōfita ko Mōsesé
Naʻe ui ke fakatau‘atāinaʻi ‘a e kakai ʻo e ‘Eikí
Na‘e tupu hake ʻa Mōsese ko e foha ‘o e ʻofefine ‘o Feló. Na‘e sio ʻa Mōsese ki he angakovi ʻa e kau ‘Isipité ki he kakai ʻIsilelí. Na‘á ne loto-mamahi ʻi hono fakapōpulaʻi ʻe he kau ʻIsipité ʻa e kau ʻIsilelí.
‘I ha ʻaho ʻe taha na‘e sio ʻa Mōsese ki ha tangata ‘Isipite ʻokú ne tā ha tangata ‘Isileli. Naʻe tāmate‘i ʻe Mōsese e tangata ʻIsipité ke malu‘i ʻa e tangata ‘Isilelí.
ʻI he ‘ilo ki ai ʻa Feló, naʻá ne loto ke tāmate‘i ʻa Mōsese, ka na‘e hola ʻa Mōsese mei ‘Isipite.
Na‘e ʻalu ‘a Mōsese ki ha feituʻu ko Mitiane, ʻo ne fetaulaki ai mo ha fefine ko Sīpola. Naʻá na mali pea maʻu mo ha fānau.
Lolotonga e nofo ʻa Mōsese ʻi Mitiané, naʻá ne sio ki ha vao ʻakau na‘e vela, ka naʻe ‘ikai ke tutu ʻe he afí ‘a e vao ʻakaú. Na‘e hā mai ‘a e ʻEikí ʻi he afí pea folofola kia Mōsese.
Na‘e folofola ʻa e ‘Eikí naʻá Ne ‘afioʻi ne faingataʻa‘ia ʻa e kau ‘Isilelí ʻi ‘Isipite. Na‘á Ne fekau ‘a Mōsese ke foki ki ʻIsipite pea tala kia Felo ke fakatauʻatāinaʻi ‘a e kakai ʻIsilelí. Na‘e folofola ʻa e ‘Eikí te Ne tokoniʻi ‘a Mōsese ke fakatauʻatāina‘i ʻa e kau ‘Isilelí mo tataki kinautolu ki ha fonua ʻo e tala‘ofá.