“Palōfita ko Samuelá,” Ngaahi Talanoa ʻo e Fuakava Motuʻá (2022)
“Palōfita ko Samuelá,” Ngaahi Talanoa ʻo e Fuakava Motuʻá
1 Samuela 2–3
Palōfita ko Samuelá
Ko ha tamasiʻi naʻe ui ʻe he ʻEikí
‘I ha taimi lōloa, naʻe ‘ikai maʻu ‘e he kau ʻIsilelí ha palōfita ‘a e ʻEikí ke tataki kinautolu. Ka na‘e pule ʻa e kau fakamāú ‘i ʻIsileli ʻi he ngaahi ta‘u lahi. Lolotonga e taimi ko ‘ení, naʻe ‘omi ʻe ‘Ana hono foha kei talavou ko Samuelá ke nofo mo ʻĪlai, ko e taulaʻeiki mo e fakamaau ʻo ‘Isilelí. Na‘e tokoni ‘a Samuela kia ʻĪlai ‘i he temipalé.
Na‘e ngāue foki mo e ongo foha ‘o ʻĪlaí ‘i he temipalé, ka naʻá na kaiha‘asi ʻa e ngaahi foaki naʻe totonu ke ʻave maʻá e ʻEikí. Na‘e lāunga ha kakai ʻe ni‘ihi kia ʻĪlai, ka na‘e ʻikai ke tautea‘i kinaua ʻe ‘Īlai.
ʻI ha efiafi ‘e taha naʻe fanongo ‘a Samuela ki ha leʻo ‘okú ne ui ia. Na‘á ne pehē ko ʻĪlai, ko ia na‘e ʻalu ‘a Samuela kiate ia. Ka na‘e ʻikai ke ui ia ‘e ʻĪlai. Naʻe tala ange ʻe ʻĪlai kia Samuela ke foki ʻo mohe.
Na‘e ongoʻi ‘e Samuela ʻa e le‘ó ʻoku ui ia ko hono tu‘o uá. Na‘á ne ʻalu kia ‘Īlai ʻo ʻeke ange pe ko e hā na‘á ne fie maʻú. Ka na‘e ʻikai ke ui ia ‘e ʻĪlai. Na‘e tala ange ʻe ‘Īlai kia Samuela ke ‘alu ʻo mohe.
Na‘e ongoʻi ‘e Samuela ʻa e le‘ó ʻoku ui ia ko hono tu‘o tolú. Na‘á ne toe ʻalu kia ‘Īlai ʻo ʻeke pe ko e hā e meʻa naʻá ne fie maʻú. Ko e taimi ko ‘ení, naʻe ‘iloʻi ‘e ʻĪlai ko e ‘Eikí na‘e folofola kia Samuelá. Naʻe tala ange ʻe ʻĪlai kia Samuela ke foki ʻo mohe. Na‘e tala ange ʻe ‘Īlai kapau ʻe toe ui ‘a e ʻEikí, ‘oku totonu ke fakafanongo ʻa Samuela.
Na‘e fanongo ʻa Samuela ki he le‘ó ne toe ui mai kiate ia. Ko e taimi ko ‘ení naʻe kole ʻe Samuela ki he ʻEikí ke folofola mai pea te ne fakafanongo. Na‘e folofola ʻa e ‘Eikí kia Samuela naʻe ʻikai totonu hono tuku ʻe ʻĪlai ke ngāue hono ongo foha angakoví ʻi he temipalé. Na‘e ʻikai ke toe fakangofua ʻa e fāmili ʻo ʻĪlaí ke ngāue ʻi ai.
‘I he ʻaho hono hokó, naʻe ‘eke ange ʻe ‘Īlai kia Samuela pe ko e hā naʻe folofola ki ai ʻa e ‘Eikí. Na‘e tala ange ʻe Samuela. Na‘e ʻilo‘i ʻe ‘Īlai naʻe folofola ‘a e ʻEikí ʻo fakafou ‘ia Samuela.
Na‘e mafola ‘a e ongoongó ʻi he kotoa ‘o e fonua ʻo ‘Isilelí. Na‘e ʻiloʻi ‘e he kakaí naʻe fili ‘e he ʻEikí ‘a Samuela ke hoko ko ʻEne palōfita.