“Tuʻi ko Tēvitá,” Ngaahi Talanoa ʻo e Fuakava Motuʻá (2022)
“Tuʻi ko Tēvitá,” Ngaahi Talanoa ʻo e Fuakava Motuʻá
1 Samuela 18–19; 31; 2 Samuela 1; 5; 11–12
Tuʻi ko Tēvitá
Ko e ngaahi faingata‘aʻia ʻa ha tu‘í
Na‘e ofo ʻa e Tu‘i ko Saulá, ko e tu‘i ʻo ‘Isileli, ʻi he ikuna‘i ʻe Tēvita ‘a Kolaiaté. Naʻe fakanofo ʻe Saula ‘a Tēvita ke taki ki heʻene ngaahi kau taú.
Naʻe ‘ofa ʻa Tēvita ki he ʻEikí peá ne loto ma‘u pē ke fakahoko ʻa e me‘a naʻe totonú. Naʻe ʻofa ʻa e kakai ʻo ʻIsilelí ʻia Tēvita.
Naʻe fakaʻau ke meheka ʻa Saula peá ne feinga ke tāmate‘i ʻa Tēvita. Ka na‘e muimui ʻa Tēvita ki he ‘Eikí, pea naʻe malu‘i ia ʻe he ‘Eikí meia Saula.
Na‘e tau ʻa e kau ‘Isilelí ʻi ha ngaahi tau lahi. ‘I he ʻaho ʻe taha naʻe pekia ‘a Saula mo hono ngaahi fohá ‘i he taú. Naʻe ʻofa ʻa Tēvita ʻiate kinautolu peá ne loto-mamahi ʻaupito heʻene ‘ilo ʻenau pekiá. Naʻe fie ma‘u he taimí ni ʻe he kau ‘Isilelí ha tuʻi fo‘ou. Na‘e fili ʻe he ‘Eikí ʻa Tēvita ke hoko ko e tu‘i. Naʻe fiefia ʻa e kakaí.
1 Samuela 31:2–6; 2 Samuela 1:11–12; 5:1–5
Na‘e tāpuekina mo tataki ʻe he ʻEikí ‘a e Tuʻi ko Tēvitá. ‘I he tokoni ʻa e ‘Eikí, naʻe ikuna‘i ai ʻe he kau tau ‘a Tēvitá ʻa honau ngaahi filí.
‘I ha ʻaho ‘e taha naʻe totonu ke ʻalu ʻa Tēvita ʻi he taú, ka naʻá ne nofo ʻi ʻapi. Na‘á ne mamata ki ha fefine fakaʻofoʻofa. Ko hono hingoá ko Patisepa, pea na‘e fie mali ʻa Tēvita mo ia. Ka naʻe ‘osi mali ia mo ‘Ulaia, ko ha sōtia ʻi he kau tau ‘a Tēvitá.
Na‘e loto ‘a Tēvita ke mali mo Patisepa, ko ia na‘á ne fekau atu ʻa hono husepāniti ko ʻUlaiá ki ha tau fakamanavahē koe‘uhí ke tāmateʻi ai ‘a ʻUlaia.
Na‘e ʻikai fuoloa kuo ʻilo ‘e Tēvita ne mate ʻa ‘Ulaia ʻi he taú. Na‘e fekau ‘e Tēvita ʻene kau tamaio‘eikí ke ʻomi ‘a Patisepa ki hono falé, peá ne mali mo ia.
Ka na‘e ʻikai ke hōifua ʻa e ʻEikí ki he meʻa na‘e fakahoko ʻe Tēvitá. Na‘e fekauʻi ‘e he ʻEikí ‘a Nētane, ko ha palōfita, ke tala kia Tēvita e mamafa ʻo ʻene angahalá. Naʻe loto-mamahi ʻaupito ʻa Tēvita ʻi he meʻa naʻá ne fakahoko kia ʻUlaia mo Patisepá. Na‘á ne lotu mo ʻaukai ke ma‘u ha fakamolemole mei he ʻEikí.