ʻĒseta 2–5; 7–9

Kuini ʻĒseta

Ko e loto-to‘a ʻi he taimi ‘o e fakatuʻutāmakí

Na‘e ui ʻa e kau ‘Isileli ʻe ni‘ihi ko e kau Siu. Ko ʻĒsetá ko ha Siu na‘e nofo ʻi Pēsia. Naʻe mate ‘ene ongomātuʻá, ko ia ai na‘e tokangaʻi ia ʻe hono kāinga ko Motekiai. Na‘e fakaafeʻi ia ki he palasi ‘o e tuʻí fakataha mo e kau finemui kehe ‘i he puleʻangá. Naʻe fie maʻu ʻe he tu‘í ha kuini foʻou, pea na‘á ne fili ʻa ‘Ēseta.

‘Ēseta 2:2–7, 16–17 

Na‘e ʻi ai ha tamaioʻeiki ʻa e tuʻí ko Hāmani naʻá ne maʻu ha mafai lahi. Na‘e tokoni ʻa Hāmani ki he tu‘í ke pule ki he fonuá. Na‘e ʻai ʻe he tu‘í ʻa e tokotaha kotoa pē ke punou kia Hāmani.

ʻĒseta 3:1–2 

Ka na‘e ʻikai punou ‘a Motekiai kia Hāmani. Naʻe punou pē ʻa Motekiai ia ki he ‘Eikí. Na‘e hoko ʻeni ke ʻita ai ʻa Hāmani. Na‘á ne loto ke tauteaʻi ‘a Motekiai mo e kau Siu kotoa pē.

‘Ekesōtosi 20:5; ʻĒseta 3:5–6, 8

Na‘e talaange ʻe Hāmani ki he tu‘í naʻe ‘ikai muimui ʻa e kau Siú ki he ngaahi lao ʻa e tuʻí. Ko ia naʻe tuku ʻe he tuʻí ke faʻu ʻe Hāmani ha lao foʻou: ʻe tāmateʻi ʻa e kau Siu kotoa pē ʻi ha ʻaho pau.

‘Ēseta 3:8–11, 13 

Na‘e kole ʻe Motekiai kia ʻĒseta ke talanoa ki he tu‘í. ʻE lava ʻe he tuʻí ʻo liliu e lao ‘a Hāmaní mo fakahaofi ʻa e kau Siú. Ka na‘e ilifia ʻa ‘Ēseta. ʻI he taimi ʻe niʻihi naʻe faʻa tāmateʻi ʻe he tuʻí ʻa e kakai na‘a nau ō mai ke talanoa mo ia ʻo ʻikai fakaafeʻí.

ʻĒseta 4:5–11

Na‘e kole ʻe Motekiai kia ʻĒseta ke ne fakakaukau ki he kau Siu ʻe tāmate‘í. Na‘e pehē ʻe Motekiai mahalo kuo tuku ‘e he ʻEikí ʻa ‘Ēseta ʻi he palasi ‘o e tuʻí ke fakahaofi e kau Siú.

ʻĒseta 4:13–14

Naʻe ʻilo ʻe ‘Ēseta kuo pau ke ne talanoa ki he tuʻí, ‘o tatau ai pē kapau ʻe tāmateʻi ia. Naʻe kole ʻe ʻĒseta ki he kau Siu kotoa pē mo ‘ene kau tamaioʻeikí ke nau ‘aukai mo ia.

ʻĒseta 4:15–16 

Hili ʻa e ‘aukai ʻi he ‘aho ʻe tolú, naʻe teuteu ʻa ‘Ēseta peá ne ʻalu atu ke sio ki he tuʻí.

ʻĒseta 5:1

‘I he taimi naʻá ne ofi atu ai ki he tu‘í, naʻá ne puke hake hono tokotoko fakatu‘í. Na‘e ʻuhinga ‘eni naʻe fiefia ʻa e tuʻí ke sio ki ai pea na‘e ʻikai te ne tuku ia ke mate. Na‘á ne ʻeke ange ʻa e me‘a naʻá ne fie ma‘ú. Na‘e tala ange ʻe ‘Ēseta ki he tuʻí na‘e ʻi he tu‘unga fakatuʻutāmaki ‘a hono kakaí. Koe‘uhi ko e lao ʻa Hāmaní, ʻe tāmateʻi ai ia mo e kau Siu kotoa pē ʻi he puleʻangá.

‘Ēseta 5:2–3; 7:4–6

Na‘e tuputāmaki ‘a e tuʻí kia Hāmani peá ne tuku ke tāmateʻi ia. Na‘e fokotuʻu ʻe he tu‘í ha lao foʻou ʻa ia ne maluʻi ai ‘a e kau Siú. Na‘e fakangofua leva kinautolu he taimí ni ke nau maluʻi kinautolu kapau ʻe feinga ha taha ke fakamamahiʻi kinautolu.

‘Ēseta 7:9–10; 8:10–11

Na‘e fakahaofi ‘e he tui ʻa ʻĒseta ki he ʻEikí mo ‘ene loto-toʻa ke talanoa ki he tu‘í, ʻa hono kakaí. Naʻe ʻi ai ha kātoanga kai, kae ‘ikai ko e mate mo e mamahi. Na‘e kātoanga fiefia e kau Siú.

‘Ēseta 8:16–17; 9:18–32