“Kapitulo 3: Leksiyon 4—Pagkahimong mga Disipulo ni Jesukristo sa Tibuok Kinabuhi,” Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo (2023)
“Kapitulo 3: Leksiyon 4,” Isangyaw ang Akong Ebanghelyo
Kapitulo 3: Leksiyon 4
Pagkahimong mga Disipulo ni Jesukristo sa Tibuok Kinabuhi
Pagtudlo Niini nga Leksiyon
Ang bunyag usa ka malipayon nga ordinansa sa paglaom. Kon kita mabunyagan, atong gipakita ang atong tinguha sa pagsunod sa Dios ug mosulod sa dalan paingon ngadto sa kinabuhi nga dayon. Gipakita usab nato ang atong pasalig sa pagkahimong mga disipulo ni Jesukristo sa tibuok kinabuhi.
Kini nga leksiyon giorganisar sumala sa mga pakigsaad nga atong himoon sa bunyag. Kini naglakip sa mosunod nga nag-unang mga seksiyon, ang matag usa niini adunay mga subseksiyon:
Tabangi ang mga tawo nga makasabot nga ang mga baroganan ug mga sugo nga inyong gitudlo kabahin sa pakigsaad nga ilang himoon sa bunyag. Ipakita nila kon sa unsang paagi nga ang matag bahin niini nga leksiyon motabang nila nga “moduol ngadto kang Kristo … ug moambit sa iyang kaluwasan” (Omni 1:26; tan-awa usab sa 1 Nephi 15:14).
Maayo kon itudlo ninyo kini nga leksiyon sulod sa pipila ka pagbisita. Kinahanglang panagsa ra nga ang usa ka pagbisita sa pagtudlo molapas og 30 minutos. Kasagaran mas maayo nga mohimo og mubo, mas kanunay nga mga pagbisita nga maghisgot og mas gamay nga mga bahin sa materyal.
Planoha kon unsa ang inyong itudlo, kanus-a ninyo kini itudlo, ug unsa ka dako sa oras nga inyong kinahanglanon. Ikonsiderar ang mga panginahanglan sa mga tawo nga inyong gitudloan, ug tinguhaa ang giya sa Espiritu. Mahimo kamong mag-agad-agad sa pagtudlo sumala sa unsay labing makatabang sa mga tawo nga mag-andam alang sa bunyag ug kompirmasyon.
Pipila sa seksiyon niini nga leksiyon naglakip og piho nga mga imbitasyon. Pagtinguha og inspirasyon sa paghukom kon unsaon ug kanus-a ipadangat ang mga imbitasyon. Pagmanggihunahunaon sa lebel sa pagsabot sa matag tawo. Tabangi siya nga mosunod sa ebanghelyo usa ka lakang sa matag higayon.
Atong Pakigsaad nga Mahimong Andam sa Pagdala ngari Kanato sa Ngalan ni Jesukristo
Kon kita mabunyagan, kita makigsaad nga mosunod ni Jesukristo “uban ang hingpit nga katuyoan sa kasingkasing.” Kita usab nagsaksi nga kita “andam sa pagdala [ngari kanato] sa ngalan ni Kristo” (2 Nephi 31:13; tan-awa usab sa Doktrina ug mga Pakigsaad 20:37).
Ang pagdala ngari kanato sa ngalan ni Jesukristo nagpasabot nga kita mohinumdom Kaniya ug maningkamot nga magpakabuhi isip Iyang mga disipulo sa tibuok kinabuhi. Tugotan nato ang Iyang kahayag nga modan-ag pinaagi kanato ngadto sa uban. Atong tan-awon ang atong kaugalingon isip Iyaha ug unahon Siya diha sa atong mga kinabuhi.
Ang mosunod nga mga seksiyon naghulagway og duha ka paagi nga kita mohinumdom ug mosunod ni Jesukristo.
Pag-ampo Kanunay
Ang pag-ampo mahimong usa ka yanong pakigsultihanay sa Langitnong Amahan nga nagagikan sa kasingkasing. Sa pag-ampo, kita bukas ug matinuorong makigsulti Kaniya. Kita mopadayag og gugma alang Kaniya ug pasalamat alang sa atong mga panalangin. Mangayo usab kita og panabang, proteksiyon, ug direksiyon. Samtang atong taposon ang atong mga pag-ampo, kinahanglang mogahin kita og panahon nga mohunong ug maminaw.
Si Jesus mitudlo, “Kamo kinahanglan gayod nga mag-ampo sa kanunay ngadto sa Amahan sa akong ngalan” (3 Nephi 18:19; tan-awa usab sa Moises 5:8). Samtang mag-ampo kita pinaagi sa ngalan ni Jesukristo, atong gihinumdoman Siya ug ang Langitnong Amahan.
Si Jesus nagpakita og ehemplo nga atong sundon samtang kita mag-ampo. Daghan kita og makat-onan mahitungod sa pag-ampo pinaagi sa pagtuon sa mga pag-ampo sa Manluluwas diha sa mga kasulatan (tan-awa sa Mateo 6:9–13; Juan 17).
Ang atong mga pag-ampo mahimong maglakip sa mosunod nga mga bahin:
-
Sugdi pinaagi pagtawag sa Langitnong Amahan.
-
Ipadayag ang mga pagbati sa atong kasingkasing, sama sa pasalamat alang sa mga panalangin nga atong nadawat.
-
Pangutana, pagtinguha og giya, ug pangayo og mga panalangin.
-
Taposa pinaagi sa pag-ingon og, “Sa ngalan ni Jesukristo, amen.”
Ang mga kasulatan nagpahimangno kanato nga mag-ampo sa buntag ug sa gabii. Apan, mahimo kitang mag-ampo bisan kanus-a ug sa bisan unsa nga kahimtang. Alang sa atong personal ug pamilya nga mga pag-ampo, kini mahimong makahuloganon nga magluhod kon kita mag-ampo. Kita kinahanglan nga kanunayng adunay usa ka pag-ampo sa atong mga kasingkasing. (Tan-awa sa Alma 34:27; 37:36–37; 3 Nephi 17:13; 19:16.)
Ang atong mga pag-ampo kinahanglang mahunahunaon ug gikan sa kasingkasing. Kon kita mag-ampo, kinahanglang likayan nato ang pagsulti sa sama nga mga butang sa sama nga mga paagi.
Kita mag-ampo inubanan sa hugot nga pagtuo, sinseridad, ug tinuod nga katuyoan nga lihokon ang mga tubag nga atong madawat. Samtang buhaton nato kini, ang Dios mogiya kanato ug motabang kanato sa paghimo og maayo nga mga desisyon. Kita mobati nga mas duol Kaniya. Siya mohatag kanato og pagsabot ug kamatuoran. Siya mopanalangin kanato og kahupayan, kalinaw, ug kalig-on.
Pagtuon sa Kasulatan
Pagkat-on og Dugang mahitungod Niini nga Baroganan
-
Ang Giya ngadto sa mga Kasulatan, “Pag-ampo”
Pagtuon sa mga Kasulatan
Si Nephi mitudlo, “pagbusog sa mga pulong ni Kristo; kay tan-awa, [kini] magtug-an kaninyo sa tanan nga mga butang nga inyong buhaton” (2 Nephi 32:3; tan-awa usab sa 31:20).
Ang pagtuon usa ka mahinungdanon nga paagi sa paghinumdom ug pagsunod ni Jesukristo. Diha sa mga kasulatan atong makat-onan ang Iyang kinabuhi, pangalagad, ug mga pagtulon-an. Makat-onan usab nato ang Iyang mga saad. Samtang basahon nato ang mga kasulatan, atong masinati ang Iyang gugma. Molambo ang atong mga kalag, ang atong hugot nga pagtuo Kaniya madugangan, ug ang atong mga hunahuna malamdagan. Ang atong mga pagpamatuod sa Iyang balaanon nga misyon mahimong mas lig-on.
Atong gihinumdoman ug gisunod si Jesus samtang gamiton nato ang Iyang mga pulong sa atong mga kinabuhi. Kinahanglan nga tun-an nato ang mga kasulatan kada adlaw, ilabi na ang Basahon ni Mormon.
Ang mga kasulatan sa Ang Simbahan ni Jesukristo sa mga Santos sa Ulahing mga Adlaw mao ang Balaang Biblia, ang Basahon ni Mormon, ang Doktrina ug mga Pakigsaad, ug ang Perlas nga Labing Bililhon. Kini gitawag usab nga “sumbanan nga mga kasulatan.”
Pagtuon sa Kasulatan
Pagkat-on og Dugang mahitungod Niini nga Baroganan
-
Ang Giya ngadto sa mga Kasulatan: “Kasulatan, Mga”
Ang Atong Pakigsaad nga Motuman sa mga Sugo sa Dios
Timan-i: Adunay daghang paagi sa pagtudlo sa mga sugo nga makita dinhi niini nga seksiyon. Pananglitan, mahimo ninyong itudlo kini sulod sa pipila ka pagbisita. O mahimo ninyong itudlo ang pipila niini isip kabahin sa unang tulo ka mga leksiyon. Kon magtudlo sa mga sugo, seguroha nga ikonektar kini ngadto sa pakigsaad sa bunyag ug sa plano sa kaluwasan.
Kon kita mabunyagan, kita makigsaad ngadto sa Dios nga kita “maghupot sa iyang mga sugo” (Mosiah 18:10; Alma 7:15).
Ang Langitnong Amahan mihatag kanato og mga sugo tungod kay Siya nahigugma kanato. Gusto Niya ang labing maayo alang kanato, alang karon ug sa kahangtoran. Isip atong Langitnong Amahan, nasayod Siya kon unsa ang atong gikinahanglan alang sa atong espirituhanon ug pisikal nga kaayohan. Nasayod usab siya kon unsa ang maghatag kanato sa kinadak-ang kalipay. Ang matag sugo usa ka balaanon nga gasa, gihatag aron sa paggiya sa atong mga desisyon, sa pagpanalipod kanato, ug sa pagtabang kanato nga molambo.
Usa ka rason nga mianhi kita sa yuta mao ang pagkat-on ug paglambo pinaagi sa paggamit sa atong kabubut-on sa maalamon nga paagi (tan-awa sa Abraham 3:25). Ang pagpili nga motuman sa mga sugo sa Dios—ug ang paghinulsol kon kita makasala—motabang kanato nga makasugakod niining kasagarang mahagiton nga mortal nga panaw.
Ang mga sugo sa Dios usa ka tinubdan sa kalig-on ug mga panalangin (tan-awa sa Doktrina ug mga Pakigsaad 82:8–9). Pinaagi sa pagsunod sa mga sugo, atong makat-onan nga kini dili makahasol nga mga lagda nga nagpugong sa atong kagawasan. Ang tinuod nga kagawasn naggikan sa pagsunod sa mga sugo. Ang pagkamasulundon usa ka tinubdan sa kalig-on nga magdala kanato og kahayag ug kahibalo pinaagi sa Espiritu Santo. Kini maghatag kanato og mas dako nga kalipay ug motabang kanato nga makab-ot ang atong balaanon nga potensiyal isip mga anak sa Dios.
Ang Dios nagsaad sa pagpanalangin kanato kon kita mosunod sa Iyang mga sugo. Ang pipila ka panalangin alang lamang ngadto sa piho nga mga sugo. Ang Iyang labing mahinungdanon nga mga panalangin mao ang kalinaw niini nga kinabuhi ug kinabuhi nga dayon sa kalibotan nga umaabot. (Tan-awa sa Mosiah 2:41; Alma 7:16; Doktrina ug mga Pakigsaad 14:7; 59:23; 93:28; 130:20–21.)
Ang mga panalangin sa Dios parehong espirituwal ug temporal. Sa pipila ka higayon, gikanahanglan nato nga mahimong mapailobon sa pagpaabot alang niini, mosalig nga kini moabot sumala sa Iyang kabubut-on ug tukma nga panahon (tan-awa sa Mosiah 7:33; Doktrina ug mga Pakigsaad 88:68). Aron makaila sa pipila ka panalangin, gikinahanglan nato nga mahimong mapaminawon ug mapaniiron sa espirituwal nga paagi. Tinuod gayod kini sa mga panalangin nga moabot sa ingon og yano ug ordinaryo nga mga paagi.
Ang pipila ka panalangin mahimong mailhan lamang human nga kini mahitabo ug kita makahinumdom sa unsay nahitabo. Ang uban tingali dili moabot hangtod human niini nga kinabuhi. Dili igsapayan sa tukma nga panahon o kinaiya sa mga panalangin sa Dios, kita makaseguro nga kini moabot samtang kita maningkamot sa pagsunod sa ebanghelyo ni Jesukristo (tan-awa sa Doktrina ug mga Pakigsaad 82:10).
Ang Dios hingpit nga nahigugma sa tanan Niyang mga anak. Mapailobon siya sa atong mga kahuyang, ug Siya mopasaylo kon kita maghinulsol.
Ang Duha ka Dagkong mga Sugo
Sa dihang si Jesus gipangutana, “Unsa man ang labing dakong sugo sa balaod?” Siya mitubag, “Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong hunahuna.”
Si Jesus dayon misulti nga ang ikaduhang dakong sugo susama ngadto sa una: “Higugmaa ang imong isigkatawo sama sa imong kaugalingon” (Mateo 22:36–39). “Wala nay sugo nga labi pang mahinungdanon kay niining duha” (Marcos 12:31).
Isip espiritu nga mga anak sa Dios, kita adunay dako nga kapasidad alang sa gugma. Kabahin kini sa atong espirituwal nga panulondon. Ang pagsunod sa duha ka dagkong mga sugo—ang paghigugma sa Dios og una ug ang paghigugma sa atong isigkatawo—mao ang kinaiya nga motino sa mga disipulo ni Jesukristo.
Gugma sa Dios
Adunay daghang paagi nga kita makapakita sa atong gugma alang sa Dios. Kita makasunod sa Iyang mga sugo (tan-awa sa Juan 14:15, 21). Kita mahimong mouna Kaniya sa atong mga kinabuhi, motugyan sa atong kabubut-on ngadto sa Iyaha. Kita makasentro sa atong mga tinguha, mga hunahuna, ug mga kasingkasing Kaniya (tan-awa sa Alma 37:36). Kita mahimong magpuyo nga mapasalamaton alang sa mga panalangin nga Iyang gihatag kanato—ug mahimong manggihatagon sa pagpakigbahin niadto nga mga panalangin (tan-awa sa Mosiah 2:21–24; 4:16–21). Pinaagi sa pag-ampo ug pagserbisyo sa uban, kita makapahayag ug makapalawom sa atong gugma alang Kaniya.
Sama sa ubang mga sugo, ang sugo sa paghigugma sa Dios kay alang sa atong kaayohan. Kon unsa ang atong gihigugma mao ang magtino kon unsa ang atong gitinguha. Kon unsa ang atong gitinguha mao ang magtino kon unsa ang atong gihunahuna ug gibuhat. Ug kon unsa ang atong gihunahuna ug gibuhat mao ang magtino kon si kinsa kita—ug kon si kinsa kita nga mamahimo.
Gugma alang sa Uban
Ang paghigugma sa uban usa ka sumpay sa atong gugma alang sa Dios. Ang Manluluwas mitudlo kanato og daghang paagi sa paghigugma sa uban (tan-awa, sama pananglit sa, Lucas 10:25–37 ug Mateo 25:31–46). Kita motabang ug moabiabi kanila sa atong mga kasingkasing ug mga kinabuhi. Kita mohigugma pinaagi sa pagserbisyo—pinaagi sa paghatag sa atong kaugalingon bisan sa ginagmay nga mga paagi. Kita mohigugma sa uban pinaagi sa paggamit sa mga gasa nga gihatag sa Dios kanato aron sa pagpanalangin kanila.
Ang paghigugma sa uban naglakip sa pagkahimong mapailobon, mabination, ug matinuoron. Naglakip kini sa kaandam sa pagpasaylo. Nagpasabot kini sa pagtagad sa tanang tawo uban ang pagtahod.
Kon kita mohigugma og usa ka tawo, kita ug kana nga tawo parehong mapanalanginan. Ang atong mga kasingkasing molambo, ang atong mga kinabuhi mahimong mas makahuloganon, ug ang atong hingpit nga kalipay madungagan.
Mga Panalangin
Ang duha ka dagkong mga sugo—ang paghigugma sa Dios ug ang paghigugma sa atong isigkatawo—mao ang pundasyon sa tanang sugo sa Dios (tan-awa sa Mateo 22:40). Kon higugmaon nato og una ang Dios, ug mohigugma usab sa uban, ang tanan sa atong kinabuhi molihok ngadto sa ilang tukma nga dapit. Kini nga gugma makaapekto sa atong panglantaw, sa paggamit sa atong panahon, sa mga interes nga atong tinguhaon, ug sa han-ay sa atong mga prayoridad.
Pagtuon sa Kasulatan
Pagkat-on og Dugang mahitungod Niini nga Baroganan
-
Tan-awa sa Ang Giya ngadto sa mga Kasulatan, “Gugma nga Putli,” “Gugma”
Sunda ang Propeta
Ang Dios nagtawag og mga propeta aron mahimo Niyang mga representante dinhi sa yuta. Pinaagi sa Iyang mga propeta, Siya mopadayag sa kamatuoran ug maghatag og giya ug mga pasidaan.
Ang Dios mitawag ni Joseph Smith aron mahimo nga ang unang propeta sa kataposang mga adlaw (tan-awa sa leksiyon 1). Ang mga sumusunod ni Joseph Smith sa samang paagi gitawag sa Dios aron sa pagpangulo sa Iyang Simbahan, lakip na ang propeta nga nangulo niini karon. Kinahanglan nga makabaton kita og kombiksiyon sa balaanon nga tawag sa buhi nga propeta ug mosunod sa iyang mga pagtulon-an.
Ang mga pagtulon-an sa buhi nga mga propeta ug apostoles naghatag og kalig-on sa mahangtoron nga kamatuoran sa usa ka kalibotan nga nag-usab-usab ang mga mithi. Samtang mosunod kita sa mga propeta sa Dios, ang kalibog ug kagubot sa kalibotan dili makabuntog kanato. Makakaplag kita og mas dako nga kalipay niini nga kinabuhi ug makadawat og giya alang niini nga bahin sa atong mahangtoron nga panaw.
Pagtuon sa Kasulatan
Pagkat-on og Dugang mahitungod Niini nga Baroganan
-
Ang Giya ngadto sa mga Kasulatan: “Propeta,” “Propeta nga Babaye,” “Pagpanagna, Panagna”
Tumana ang Napulo ka mga Sugo
Gipadayag sa Dios ang Napulo ka mga Sugo ngadto sa usa ka karaan nga propeta nga ginganlan og Moises aron sa paggiya sa Iyang katawhan. Kini nga mga sugo magamit gihapon kaayo sa atong panahon. Kini nagtudlo kanato nga mosimba ug mopakita og pagtahod sa Dios. Nagtudlo usab kini kanato kon unsaon sa pagtagad sa usag usa.
-
“Ayaw pagsimba ug laing dios gawas kanako” (Exodo 20:3). Ang lain nga mga “dios” mahimong maglakip og daghang butang, sama sa mga katigayonan, gahom, o pagkabantogan.
-
“Ayaw pagbuhat ug diosdios o larawan ” (Exodo 20:4).
-
“Ayaw pasipad-i paggamit ang akong ngalan” (Exodo 20:7).
-
“Hinumdomi ang adlaw nga igpapahulay ug ilha kini nga balaan” (Exodo 20:8).
-
“Tahora ang inyong amahan ug inahan” (Exodo 20:12).
-
“Ayaw kamo pagpatay” (Exodo 20:13).
-
“Ayaw kamo panapaw” (Exodo 20:14).
-
“Ayaw kamo pangawat” (Exodo 20:15).
-
“Ayaw kamo pagbutangbutang sa inyong isigkatawo” (Exodo 20:16).
-
“Ayaw kamo kaibog” (Exodo 20:17).
Pagtuon sa Kasulatan
Pagkat-on og Dugang mahitungod Niini nga Baroganan
-
Ang Giya ngadto sa mga Kasulatan, “Sugo, Ang Napulo ka mga”
Sunda ang Balaod sa Kaputli
Ang balaod sa kaputli usa ka mahinungdanon nga bahin sa plano sa Dios alang sa atong kaluwasan ug kahimayaan. Ang sekswal nga kasuod tali sa bana ug asawa gi-orden sa Dios alang sa paglalang og mga anak ug alang sa pagpahayag og gugma sulod sa kaminyoon. Kini nga kasuod ug ang gahom sa paglalang og kinabuhi sa tawo gituyo nga mahimong maanindot ug sagrado.
Ang balaod sa Dios sa kaputli mao ang pagpugong sa sekswal nga mga relasyon gawas sa usa ka legal nga kaminyoon tali sa usa ka lalaki ug usa ka babaye. Kini nga balaod nagpasabot usab sa pagbaton og hingpit nga pagkamatinuoron ug pagkamaunongon sa kapikas sa usa ka tawo human sa kaminyoon.
Aron sa pagtabang kanato sa pagsunod sa balaod sa kaputli, ang mga propeta nagpahimangno kanato nga mahimong limpyo sa atong mga hunahuna ug mga pulong. Kinahanglan natong likayan ang bisan unsang klase sa pornograpiya. Sa pagsunod sa balaod sa kaputli, kinahanglan nato nga mahimong ligdong sa atong kinaiya ug panagway.
Ang mga bunyaganan kinahanglang mosunod sa balaod sa kaputli.
Paghinulsol ug Pagpasaylo
Sa panan-aw sa Dios, ang paglapas sa balaod sa kaputli seryoso kaayo (tan-awa sa Exodo 20:14; Mga Taga-Efeso 5:3). Naggamit kini sa sayop nga paagi sa sagrado nga gahom nga gihatag Niya sa paglalang og kinabuhi. Apan Siya nagpadayon sa paghigugma kanato bisan kon kita nakalapas niini nga balaod. Siya nagdapit kanato nga maghinulsol ug mahimong limpyo pinaagi sa maulaon nga sakripisyo ni Jesukristo. Ang pagkawalay paglaom sa sala mahimong mailisan sa tam-is nga kalinaw sa kapasayloan sa Dios (tan-awa sa Doktrina ug mga Pakigsaad 58:42–43).
Mga Panalangin
Ang Dios mihatag kanato sa balaod sa kaputli aron sa pagpanalangin kanato ug sa espiritu nga mga anak nga Iyang ipadala sa yuta. Ang pagsunod niini nga balaod mahinungdanon sa personal nga kalinaw ug sa pagbaton og gugma, pagsalig, ug panaghiusa sa atong mga relasyon sa pamilya.
Samtang kita mosunod sa balaod sa kaputli, kita mapanalipdan gikan sa espirituwal nga kadaot nga moabot gikan sa sekswal nga kasuod gawas sa kaminyoon. Kita usab makalikay sa emosyonal ug pisikal nga mga problema nga kasagarang nag-uban sa ingon niana nga mga relasyon. Kita molambo sa atong pagsalig sa atubangan sa Dios (tan-awa sa Doktrina ug mga Pakigsaad 121:45). Kita mahimong mas bukas sa impluwensya sa Espiritu Santo. Kita mahimong mas andam sa paghimo og sagrado nga mga pakigsaad diha sa templo nga maghiusa sa atong mga pamilya sa kahangtoran.
Pagtuon sa Kasulatan
Pagkat-on og Dugang mahitungod Niini nga Baroganan
-
Ang Giya ngadto sa mga Kasulatan, “Kaputli”
Tumana ang Balaod sa Ikapulo
Usa sa dako nga pribilehiyo sa pagkahimong miyembro sa Simbahan mao ang kahigayonan sa pagbayad og ikapulo. Kon kita mohatag og ikapulo, kita nagtabang sa pagpalambo sa buhat sa Dios ug pagpanalangin sa Iyang mga anak.
Ang balaod sa ikapulo naa nang daan sukad pa sa kapanahonan sa Daang Tugon. Pananglitan, si propeta Abraham mibayad og ikapulo sa tanan nga iyang gipanag-iya (tan-awa sa Alma 13:15; Genesis 14:18–20).
Ang pulong nga ikapulo literal nga nagpsabot og ikanapulo. Kon kita mohatag og ikapulo, atong gidonar ang ikanapulong bahin sa atong kinitaan ngadto sa Simbahan (tan-awa sa Doktrina ug mga Pakigsaad 119:3–4; ang tubo nagpasabot nga kinitaan). Tanan nga anaa kanato usa ka gasa gikan sa Dios. Kon kita mobayad og ikapulo, kita nagpakita og pasalamat Kaniya pinaagi sa pag-uli og usa ka bahin sa unsay Iyang gihatag kanato.
Ang pagbayad og ikapulo usa ka pagpakita sa hugot nga pagtuo. Kini usa usab ka paagi sa pagpasidungog sa Dios. Si Jesus mitudlo nga kinahanglan natong “[unahon] pagpangita ang gingharian … sa Dios” (Mateo 6:33), ug ang ikapulo mao ang usa ka paagi sa pagbuhat niana.
Paggamit sa mga Pundo sa Ikapulo
Ang mga pundo sa ikapulo sagrado. Atong ihatag ang atong ikapulo ngadto sa usa ka sakop sa bishopric, o diha sa daghang dapit kita mahimong mobayad sa online. Kon ang bishopric makadawat og ikapulo, ipadala nila kini ngadto sa punoang buhatan sa Simbahan.
Usa ka konseho nga gilangkoban sa Unang Kapangulohan, sa Korum sa Napulog Duha ka Apostoles, ug sa Tigdumalang Bishopric ang motino kon unsaon sa paggamit ang mga pundo sa ikapulo diha sa buhat sa Dios (tan-awa sa Doktrina ug mga Pakigsaad 120:1). Kini nga mga paggamit naglakip sa:
-
Pagtukod ug pagmentinar og mga templo ug mga meetinghouse.
-
Paghubad ug pagmantala sa mga kasulatan.
-
Pagsuporta sa mga kalihokan ug mga operasyon sa lokal nga mga kongregasyon sa Simbahan.
-
Pagsuporta sa misyonaryo nga buhat sa tibuok kalibotan.
-
Pagsuporta sa buhat sa family history.
-
Pagpundo sa mga eskwelahan ug edukasyon.
Ang ikapulo dili gamiton sa pagbayad sa lokal nga mga lider sa Simbahan. Boluntaryo sila nga nagserbisyo nga walay bisan unsa nga bayad.
Mga Panalangin
Kon kita mobayad og ikapulo, ang Dios nagsaad og mga panalangin nga labaw pa sa bisan unsa nga atong gihatag. Iyang “ablihan … ang mga bintana sa langit ug ibubo … sa madagayaon gayod ang mga panalangin” (Malaquias 3:10; tan-awa sa mga bersikulo 7–12). Kini nga mga panalangin mahimong espirituwal ug temporal.
Pagtuon sa Kasulatan
Pagkat-on og Dugang mahitungod Niini nga Baroganan
-
Ang Giya ngadto sa mga Kasulatan: “Ikanapulo, Mga Ikapulo”
Sunda ang Pulong sa Kaalam
Ang Balaod sa Ginoo kabahin sa Panglawas
Ang atong mga lawas sagrado nga mga gasa gikan sa Dios. Matag usa kanato nagkinahanglan og pisikal nga lawas aron mahimong mas sama Kaniya. Ang atong mga lawas importante kaayo nga ang mga kasulatan nagtandi niini ngadto sa mga templo (tan-awa sa 1 Mga Taga-Corinto 6:19–20).
Gusto sa Ginoo nga atong itratar ang atong mga lawas inubanan sa pagtahod. Aron matabangan kita sa pagbuhat niini, Siya mipadayag og usa ka balaod sa panglawas nga gitawag og Pulong sa Kaalam. Kini nga pagpadayag nagtudlo kanato nga mokaon og masustansiya nga mga pagkaon ug dili mogamit og mga butang nga makadaot sa atong mga lawas—ilabi na sa makahubog nga ilimnon, tabako, ug mainit nga mga ilimnon (pasabot tsa ug kape).
Sa diwa sa Pulong sa Kaalam, ang mga propeta sa modernong panahon mipasidaan batok sa paggamit og ubang makadaot, dili legal, o makaadik nga mga butang. Ang mga propeta mipasidaan usab batok sa pag-abuso sa gireseta nga mga droga. (Ang inyong presidente sa misyon motubag sa mga pangutana kabahin sa ubang mga butang sa inyong heyograpikanhon nga dapit nga dili angay gamiton.)
Mga Panalangin
Ang Ginoo mihatag sa Pulong sa Kaalam alang sa atong pisikal ug espirituwal nga kaayohan. Siya nagsaad og dako nga mga panalangin kon kita motuman niini nga sugo. Kini nga mga panalangin naglakip sa kahimsog, kaalam, mga bahandi sa kahibalo, ug proteksiyon (tan-awa sa Doktrina ug mga Pakigsaad 89:18–21).
Ang pagtuman sa Pulong sa Kaalam motabang kanato nga mahimong mas andam sa mga pag-aghat sa Espiritu Santo. Bisan kon kitang tanan makasinati og mga hagit sa panglawas, ang pagsunod niini nga balaod motabang nato nga mahimong mas himsog sa lawas, hunahuna, ug espiritu.
Ang mga kandidato sa bunyag kinahanglang mosunod sa Pulong sa Kaalam.
Alang sa giya mahitungod sa pagtabang sa mga tawo nga nanglimbasog sa mga pagkaadik, tan-awa sa kapitulo 10.
Pagtuon sa Kasulatan
Pagkat-on og Dugang mahitungod Niini nga Baroganan
-
Ang Giya ngadto sa mga Kasulatan: “Pulong sa Kaalam”
-
Tabang sa Kinabuhi: “Pagkaadik”
Himoang Balaan ang Adlaw nga Igpapahulay
Usa ka Adlaw alang sa Pagpahulay ug Pagsimba
Ang Igpapahulay usa ka balaan nga adlaw nga gipahinungod sa Dios alang kanato matag semana aron mopahulay gikan sa atong inadlaw nga mga trabaho ug sa pagsimba Kaniya. Usa sa Napulo ka mga Sugo nga gihatag ngadto kang Moises mao ang “hinumdomi ang adlaw nga igpapahulay ug ilha kini nga balaan” (Exodo 20:8; tan-awa usab sa mga bersikulo 9–11).
Sa usa ka pagpadayag sa modernong panahon, ang Ginoo mimatuod pag-usab nga ang Igpapahulay, “mao ang adlaw nga gitudlo ngadto kaninyo sa pagpahulay gikan sa inyong mga kahago, ug mohatag og mga paghalad sa inyong mga pag-ampo ngadto sa Labing Halangdon” (Doktrina ug mga Pakigsaad 59:10). Siya usab miingon nga ang Igpapahulay kinahanglan nga usa ka adlaw sa pagmaya, pag-ampo, ug pagpasalamat (tan-awa sa mga bersikulo 14–15).
Isip kabahin sa atong pagsimba sa Igpapahulay, kita motambong sa panagtigom alang sa sakramento matag semana. Niini nga panagtigom, kita mosimba sa Dios ug moambit sa sakramento aron sa paghinumdom ni Jesukristo ug sa Iyang Pag-ula. Kon kita moambit sa sakramento, atong gibag-o ang atong mga pakigsaad ngadto sa Dios ug nagpakita nga kita andam sa paghinulsol sa atong mga sala. Ang ordinansa sa sakramento maoy sentro sa atong pagbalaan sa adlaw nga Igpapahulay.
Didto sa simbahan moapil usab kita sa mga klase diin kita magkat-on og dugang mahitungod sa ebanghelyo ni Jesukristo. Ang atong hugot nga pagtuo molambo samtang kita magkaubang magtuon sa mga kasulatan. Ang atong gugma molambo samtang kita moserbisyo ug mopalig-on sa usag usa.
Agig dugang sa pagpahulay gikan sa atong mga paghago atol sa Igpapahulay, kinahanglan nga likayan nato ang pagpamalit ug ang ubang mga kalihokan nga mohimo niini nga sama ra sa usa ka komon nga adlaw. Atong ipadaplin ang mga kalihokan sa kalibotan ug itutok ang atong mga hunahuna ug mga aksiyon diha sa espirituwal nga mga butang.
Usa ka Adlaw sa Pagbuhat og Maayo
Ang pagbuhat og maayo atol sa adlaw nga Igpapahulay ingon kaimportante sa unsay likayan nato nga buhaton aron ipabilin kining balaan. Magkat-on kita sa ebanghelyo, magpalig-on sa hugot nga pagtuo, mopalambo og mga relasyon, mohatag og serbisyo, ug moapil sa ubang makapabayaw nga mga kalihokan uban sa pamilya ug mga higala.
Mga Panalangin
Ang pagbalaan sa adlaw nga Igpapahulay usa ka pagpahayag sa atong debosyon sa Langitnong Amahan ug kang Jesukristo. Samtang atong himoon ang mga kalihokan nga mahiuyon sa tuyo sa Dios alang sa adlaw, kita mobati og hingpit nga kalipay ug kalinaw. Kita mahimong mabaskog sa espirituwal nga paagi ug mabag-o sa pisikal nga paagi. Kita usab mobati nga mas duol sa Dios ug mapalawman ang atong relasyon sa atong Manluluwas. Kita labaw nga moamping sa atong mga kaugalingon nga “walay buling gikan sa kalibotan” (Doktrina ug mga Pakigsaad 59:9). Ang Igpapahulay mahimong “ikalipay” (Isaias 58:13; tan-awa usab sa bersikulo 14).
Pagtuon sa Kasulatan
Pagkat-on og Dugang mahitungod Niini nga Baroganan
-
Ang Giya ngadto sa mga Kasulatan: “Adlaw nga Igpapahulay”
Sunda ug Tahora ang Balaod
Ang mga Santos sa Ulahing mga Adlaw nagtuo bahin sa pagsunod sa balaod ug sa pagkahimong maayo nga mga lumulupyo (tan-awa sa Doktrina ug mga Pakigsaad 134; Mga Artikulo sa Hugot nga Pagtuo 1:12). Ang mga miyembro sa Simbahan giawhag sa paghatag og serbisyo aron sa pagpalambo sa ilang mga komunidad ug mga nasod. Giawhag usab sila nga mahimong usa ka impluwensiya alang sa husto nga moral nga mga hiyas sa katilingban ug sa gobyerno.
Ang mga miyembro sa Simbahan gidapit nga moapil sa panggobyerno ug sa politikanhon nga proseso nga nahisubay sa balaod. Ang mga miyembro kinsa naghupot og mga posisyon sa gobyerno makalihok sa ingon nga mga kapasidad ingon nga nagpakabana nga mga lumulupyo, dili isip mga representante sa Simbahan.
Pagtuon sa Kasulatan
Pagkat-on og Dugang mahitungod Niini nga Baroganan
-
“Politikanhon ug Sibiko nga Kalihokan” sa seksiyon 38.8.29 sa Kinatibuk-ang Tamdanan nga Basahon
Atong Pakigsaad nga Moserbisyo sa Dios ug sa Uban
Pagserbisyo
Kon kita mabunyagan, kita makigsaad nga moserbisyo sa Dios ug moserbisyo sa uban. Ang pagserbisyo sa uban mao ang usa sa nag-unang mga paagi nga kita moserbisyo sa Dios (tan-awa sa Mosiah 2:17). Si propeta Alma mitudlo nga kadtong nagtinguha nga mabunyagan nga kinahanglan silang “andam sa pagtambayayong sa usag usa nga mga alantoson, … sa pagbangotan uban niadto nga nagbangotan … , ug sa paghupay niadto nga nagkinahanglan sa kahupayan” (Mosiah 18:8–9).
Sa dili madugay human sa bunyag, ang bag-o nga mga miyembro kasagaran makadawat og usa ka calling sa pagserbisyo diha sa Simbahan. Kini nga mga calling boluntaryo ug walay bayad. Kon dawaton nato kini ug makugihong moserbisyo, molambo kita sa hugot nga pagtuo, makaugmad og mga talento, ug makapanalangin sa uban.
Laing bahin sa atong serbisyo diha sa Simbahan mao ang pagkahimong usa ka “tigpangalagad nga igsoong lalaki” o usa ka “tigpangalagad nga igsoong babaye.” Niini nga responsibilidad, kita moserbisyo sa gisangon nga mga indibidwal ug mga pamilya.
Isip mga disipulo ni Jesukristo, mangita kita og mga oportunidad nga moserbisyo kada adlaw. Sama Kaniya, kita “[m]aghimog mga maayong butang” (Mga Buhat 10:38). Kita moserbisyo sa atong mga silingan ug sa uban diha sa atong komunidad. Kita makaapil sa mga oportunidad sa pagserbisyo pinaagi sa JustServe diin kini anaa. Kita makasuporta sa makitawhanon nga mga paningkamot sa Simbahan ug makaapil sa pagtubag sa katalagman.
Pagtuon sa Kasulatan
Pagkat-on og Dugang mahitungod Niini nga Baroganan
-
Ang Giya ngadto sa mga Kasulatan: “Pag-alagad”
Pagpakigbahin sa Ebanghelyo
Isip kabahin sa atong pakigsaad sa bunyag, kita mosaad nga “mobarog ingon nga mga saksi sa Dios” (Mosiah 18:9). Usa ka paagi nga kita mobarog isip mga saksi mao ang pagpakigbahin sa ebanghelyo ni Jesukristo. Ang pagtabang sa uban nga modawat sa ebanghelyo mao ang usa sa labing makalipay nga mga matang sa serbisyo nga atong mahatag (tan-awa sa Doktrina ug mga Pakigsaad 18:15–16). Kini usa ka gamhanan nga pagpahayag sa atong gugma.
Kon masinati nato ang mga panalangin sa pagsunod sa ebanghelyo, natural lang nga kita ganahan nga ipakigbahin kadto nga mga panalangin. Ang mga sakop sa pamilya, mga higala, ug mga kaila kasagaran nga mahimong interesado kon kita magpakita og matinud-anon nga ehemplo ug makita nila kon sa unsa nga paagi nga ang ebanghelyo pagpanalangin sa atong mga kinabuhi. Mahimo natong ipakigbahin ang ebanghelyo sa normal ug natural nga mga paagi (tan-awa sa Kinatibuk-ang Tamdanan nga Basahon, kapitulo 23).
Atong madapit ang uban nga moapil kanato sa mga kalihokan sa pagserbisyo, sa komunidad, sa paglingaw-lingaw, ug sa Simbahan. Kita makadapit nila ngadto sa usa ka panagtigom sa Simbahan o sa usa ka tulumanon sa bunyag. Kita makadapit nila nga motan-aw og usa bidyo sa online nga nagpasabot sa ebanghelyo ni Jesukristo, mobasa sa Basahon ni Mormon, o mobisita og open house sa templo. Adunay daghan kaayong mga pagdapit nga mahimo natong ipaabot. Kasagaran, ang pagdapit yano nga nagpasabot sa paglakip sa atong pamilya, mga higala, ug mga silingan sa unsay gibuhat na nato.
Kon kita mangayo, ang Dios motabang kanato nga makaila og mga kahigayonan sa pagpakigbahin sa ebanghelyo ug sa pagsulti sa uban kon giunsa niini pagpanalangin sa atong mga kinabuhi.
Alang sa dugang nga impormasyon mahitungod sa paggamit sa mga baroganan sa “paghigugma, pagpakigbahin, ug pagdapit” tan-awa sa “Pakighiusa sa mga Miyembro” diha sa kapitulo 9.
Pagtuon sa Kasulatan
Pagkat-on og Dugang mahitungod Niini nga Baroganan
-
Ang Giya ngadto sa mga Kasulatan: “Misyonaryo nga Buhat”
Pagpuasa ug mga Halad sa Puasa
Ang Dios miestablisar sa balaod sa puasa isip usa ka paagi alang kanato sa pagpalambo og espirituhanon nga kalig-on ug sa pagtabang niadtong nanginahanglan.
Ang pagpuasa nagpasabot sa dili pagkaon ug pag-inom sulod sa usa ka panahon. Ang Simbahan kasagarang migahin sa unang Dominggo sa kada bulan isip usa ka adlaw sa pagpuasa. Ang usa ka adlaw sa puasa kasagarang naglakip sa dili pagkaon ug pag-inom sulod sa 24 oras kon kaya ra sa atong lawas. Ubang importante nga mga bahin sa Dominggo sa puasa naglakip sa pag-ampo ug pagpamatuod. Giawhag usab kita nga magpuasa sa ubang mga higayon kon mabati nato ang panginahanglan.
Pag-ugmad og Espirituhanon nga Kalig-on
Ang pagpuasa makatabang kanato nga mahimong mapainubsanon, mas mapaduol sa Dios, ug mobati nga espirituwal nga mabag-o. Sa wala pa magsugod sa iyang pangalagad, si Jesukristo nagpuasa (tan-awa sa Mateo 4:1–2). Ang mga kasulatan nagrekord og daghang asoy sa mga propeta ug sa uban nga nagpuasa aron mahimo nilang mapalambo ang ilang espirituwal nga kalig-on ug magtinguha og espesyal nga mga panalangin alang sa ilang kaugalingon o sa uban.
Ang pagpuasa ug pag-ampo mag-uban gayod. Kon kita magpuasa ug mag-ampo uban ang hugot nga pagtuo, mas sayon nato madawat ang mga personal nga pagpadayag. Mas andam usab kita nga makaila sa kamatuoran ug makasabot sa kabubut-on sa Dios.
Pagtabang Niadtong Nanginahanglan
Kon kita magpuasa, kita moamot og kwarta ngadto sa Simbahan aron sa pagtabang sa pag-atiman sa mga tawo nga nanginahanglan. Kini gitawag og halad sa puasa. Gidapit kita sa paghatag og halad nga dili moubos sa bili sa duha ka kan-anan nga wala kan-a. Giawhag kita nga magmadagayaon ug mohatag og sobra pa kay sa kantidad niini nga mga kan-anan kon mahimo nato. Ang paghatag og halad sa puasa mao ang usa ka paagi nga kita makaserbisyo sa uban.
Ang mga halad sa puasa gamiton alang sa paghatag og pagkaon ug uban pang mga kinahanglanon sa mga tawo nga nanginahanglan, dinhi sa atong dapit ug sa tibuok kalibotan. Alang sa impormasyon mahitungod unsaon sa pagtampo og mga halad sa puasa, tan-awa sa “Paghatag og mga Ikapulo ug Ubang mga Halad” niini nga leksiyon.
Pagtuon sa Kasulatan
Pagpuasa
Pag-atiman Niadtong Nanginahanglan
Pagkat-on og Dugang mahitungod Niini nga Baroganan
-
Ang Giya ngadto sa mga Kasulatan: “Pagpuasa, Puasa”
-
Kinatibuk-ang Tamdanan nga Basahon: 22.2.2
Atong Pakigsaad nga Molahutay hangtod sa Kataposan
Kon kita mabunyagan, kita makigsaad sa Dios nga “molahutay hangtod sa kataposan” sa pagsunod sa ebanghelyo ni Jesukristo (2 Nephi 31:20; tan-awa usab sa Mosiah 18:13). Maningkamot kita nga mahimong mga disipulo ni Jesukristo sa tibuok kinabuhi.
Ang Basahon ni Mormon nga propeta nga si Nephi mihulagway sa bunyag isip ang ganghaan diini kita mosulod sa dalan sa ebanghelyo (tan-awa sa 2 Nephi 31:17). Human sa bunyag, kita “mopadayon sa unahan uban ang pagkamakanunayon kang Kristo” (2 Nephi 31:20).
Samtang kita “mopadayon sa unahan” diha sa dalan sa pagkadisipulo, kita mag-andam nga moadto sa templo. Didto mohimo kita og mga pakigsaad uban sa Dios samtang kita modawat sa mga ordinansa sa templo. Diha sa templo, kita matugahan og gahom ug mahimong maselyo isip mga pamilya alang sa kahangtoran. Ang pagsunod sa mga pakigsaad nga atong himoon sa templo moabli sa pultahan ngadto sa matag espirituwal nga pribilehiyo ug panalangin nga anaa ang Dios alang kanato.
Samtang kita matinud-anong magpadayon subay sa dalan sa ebanghelyo, kita sa kataposan makadawat sa labing dako nga gasa sa Dios—ang gasa sa kinabuhi nga dayon (tan-awa sa 2 Nephi 31:20; Doktrina ug mga Pakigsaad 14:7).
Ang mosunod nga mga seksiyon nagpasabot og pipila ka aspeto sa unsay gihatag sa Dios aron sa pagtabang kanato nga molahutay hangtod sa kataposan sa atong mortal nga panaw—ug makakaplag og hingpit nga kalipay niini.
Pagkapari ug mga Organisasyon sa Simbahan
Ang pagkapari mao ang awtoridad ug gahom sa Dios. Pinaagi sa pagkapari, ang Langitnong Amahan mohimo sa Iyang buhat sa “pagpahinabo sa pagka-imortal ug kinabuhi nga dayon” sa Iyang mga anak (Moises 1:39). Ang Dios naghatag og awtoridad ug gahom ngadto sa Iyang mga anak nga lalaki ug mga anak nga babaye dinhi sa yuta aron sa pagtabang nga matuman kini nga buhat.
Ang pagkapari makapanalangin kanatong tanan. Ang mga ordinansa sama sa bunyag ug sa sakramento madawat pinaagi niadtong kinsa naghupot og mga katungdanan sa pagkapari. Makadawat usab kita og mga panalangin sa pagkaayo, kahupay, ug tambag.
Ang Pagkapari ug Pagpangulo ug mga Calling sa Simbahan
Ang Simbahan gigiyahan ni Jesukristo pinaagi sa mga propeta ug apostoles. Kini nga mga lider gitawag sa Dios, giorden, ug gihatagan og awtoridad sa pagkapari nga molihok alang sa ngalan sa Manluluwas.
Sa karaang panahon, si Kristo mihatag sa Iyang Apostoles niining sama nga awtoridad sa pagkapari, nga mitugot kanila sa pagpangulo sa Iyang Simbahan human nga Siya mikayab ngadto sa langit. Sa kataposan kana nga awtoridad nawala sa dihang ang mga katawhan misalikway sa ebanghelyo ug ang mga Apostoles namatay.
Ang langitnong mga mensahero mipahiuli sa pagkapari niadtong 1829 pinaagi ni Propeta Joseph Smith, ug ang Ginoo miestablisar pag-usab sa Iyang Simbahan uban sa apostoles ug mga propeta. (Tan-awa sa leksiyon 1.)
Sa lokal nga lebel, ang mga bishop ug mga presidente sa stake adunay awtoridad sa pagkapari aron pangulohan ang mga kongregasyon sa Simbahan.
Kon ang mga lalaki ug mga babaye tawagon ug i-set apart nga moserbisyo diha sa Simbahan, sila hatagan og awtoridad gikan sa Dios sa paglihok niana nga calling. Kini nga awtoridad gihatag sa mga misyonaryo, mga lider, mga magtutudlo, ug sa uban hangtod nga sila i-release gikan sa ilang mga calling. Kini gidelegar ubos sa direksiyon niadtong kinsa naghupot sa mga yawe sa pagkapari.
Kini nga awtoridad sa pagkapari magamit lamang sa matarong (tan-awa sa Doktrina ug mga Pakigsaad 121:34–46). Kini nga awtoridad usa ka sagrado nga pagsalig sa pagrepresentar sa Manluluwas ug sa paglihok diha sa Iyang ngalan. Kanunay kining gituyo aron sa pagpanalangin ug pagserbisyo sa uban.
Aaronic nga Pagkapari ug Melchizedek nga Pagkapari
Diha sa Simbahan, ang pagkapari naglakip sa Aaronic nga Pagkapari ug sa Melchizedek nga Pagkapari. Ubos sa direksiyon niadtong kinsa naghupot sa mga yawe sa pagkapari, ang Aaronic ug Melchizedek nga Pagkapari itugyan ngadto sa takos nga lalaki nga mga miyembro sa Simbahan. Human matugyan ang angay nga pagkapari, ang tawo i-orden ngadto sa katungdanan niana nga pagkapari, sama sa deacon o elder. Kinahanglan siyang i-orden sa usa ka tawo kinsa adunay gikinahanglan nga awtoridad.
Sa dihang ang usa ka lalaki o batan-ong lalaki makadawat sa pagkapari, siya mohimo og pakigsaad sa Dios aron sa pagtuman sa sagrado nga mga katungdanan, moserbisyo sa uban, ug motabang sa pagpalambo sa Simbahan.
Ang mga batan-ong lalaki mahimong modawat sa Aaronic nga Pagkapari ug maorden nga mga deacon sugod sa Enero sa tuig nga sila mag-edad og 12. Mahimo silang maorden nga mga teacher sa tuig nga sila mag-edad og 14 ug mga priest sa tuig nga sila mag-edad og 16. Ang lalaki nga mga kinabig kinsa husto ang pangidaron mahimong makadawat sa Aaronic nga Pagkapari sa dili madugay human sa bunyag ug kompirmasyon. Ang mga tighupot sa Aaronic nga Pagkapari modumala sa mga ordinansa sama sa sakramento ug bunyag.
Human sa pagserbisyo sulod sa usa ka panahon isip usa ka priest diha sa Aaronic nga Pagkapari, ang usa ka takos nga lalaki kinsa sa dili momenos 18 ang edad mahimong makadawat sa Melchizedek nga Pagkapari ug maorden isip usa ka elder. Ang mga lalaki kinsa makadawat sa Melchizedek nga Pagkapari makapahigayon og mga ordinansa sa pagkapari sama sa paghatag og mga panalangin sa pagpang-ayo ug paghupay ngadto sa mga sakop sa pamilya ug sa uban.
Tan-awa sa Kinatibuk-ang Tamdanan nga Basahon, 38.2.9.1, alang sa impormasyon mahitungod sa bag-o nga mga miyembro nga modawat sa pagkapari.
Mga Korum ug Mga Organisasyon sa Simbahan
Mga Korum sa Pagkapari. Ang usa ka korum mao ang usa ka naorganisar nga grupo sa mga naghupot sa pagkapari. Ang matag ward adunay korum sa mga elder alang sa hamtong nga mga lalaki. Ang mga korum sa mga deacon, mga teacher, ug mga priest alang sa batan-ong mga lalaki.
Relief Society. Ang Relief Society naglakip sa mga babaye nga nag-edad og 18 anyos ug pataas. Ang mga sakop sa Relief Society mopalig-on sa mga pamilya, mga indibidwal, ug sa komunidad.
Young Women. Ang mga batan-ong babaye moapil sa organisasyon sa Young Women sugod sa Enero sa tuig nga sila mag-edad og 12.
Primary. Ang mga bata nga nag-edad og 3 ngadto sa 11 kabahin sa organisasyon sa Primary.
Sunday School. Ang tanang adult ug kabatan-onan motambong sa Sunday School, diin sila magtigom aron sa pagtuon og dungan sa mga kasulatan.
Alang sa dugang nga impormasyon mahitungod sa pagkapari, tan-awa sa Kinatibuk-ang Tamdanan nga Basahon, kapitulo 3.
Alang sa dugang nga impormasyon mahitungod sa mga korum sa pagkapari ug sa mga organisasyon sa Simbahan, tan-awa sa Kinatibuk-ang Tamdanan nga Basahon, kapitulo 8–13.
Pagtuon sa Kasulatan
Pagkat-on og Dugang mahitungod Niini nga Baroganan
-
Kinatibuk-ang Tamdanan nga Basahon, kapitulo 3: “Mga Baroganan sa Pagkapari”
Kaminyoon ug mga Pamilya
Kaminyoon
Ang kaminyoon tali sa lalaki ug sa babaye giorden sa Dios. Kini maoy sentro sa Iyang plano alang sa mahangtorong pag-uswag sa Iyang mga anak.
Ang paghiusa sa usa ka bana ug asawa diha sa kaminyoon kinahanglan mao ang ilang mahimong labing gimahal nga yutan-on nga relasyon. Sila adunay sagrado nga responsibilidad nga magmaunongon ngadto sa usag usa ug magmatinud-anon sa ilang pakigsaad sa kaminyoon.
Ang usa ka bana ug asawa managsama sa mga mata sa Dios. Ang usa kinahanglang dili modominar sa lain. Ang ilang mga desisyon kinahanglan himoon pinaagi sa panaghiusa ug gugma, uban sa hingpit nga partisipasyon sa duha.
Kon ang bana ug asawa mohigugma sa matag usa ug magtinabangay, ang ilang kaminyoon mahimong tinubdan sa ilang kinadak-an nga kalipay. Sila mahimong magtinabangay sa usag usa ug ang ilang mga anak makauswag paingon sa kinabuhi nga dayon.
Ang Pamilya
Sama sa kaminyoon, ang pamilya gi-orden sa Dios ug mao ang sentro sa Iyang plano alang sa atong mahangtorong kalipay. Ang atong mga pamilya mas lagmit nga mahimong malipayon kon kita magsunod sa mga pagtulon-an ni Jesukristo. Ang mga ginikanan motudlo sa ilang mga anak sa ebanghelyo ni Jesukristo ug magpakita og ehemplo sa pagsunod niini. Ang mga pamilya mohatag og mga oportunidad alang kanato nga mohigugma ug moserbisyo sa usag usa.
Ang mga ginikanan kinahanglan nga mohimo sa ilang pamilya nga ilang kinatas-an nga prayoridad. Usa kini ka sagrado nga pribilehiyo ug responsibilidad alang sa mga ginikanan sa pag-atiman sa mga anak nga ilang gipanganak o gisagop.
Tanang pamilya adunay mga hagit. Samtang magtinguha kita sa suporta sa Dios ug motuman sa Iyang mga sugo, ang mga hagit sa pamilya makatabang kanato nga makat-on ug molambo. Usahay kini nga mga hagit motabang kanato nga makat-on nga maghinulsol ug mopasaylo.
Ang mga lider sa Simbahan miawhag sa mga miyembro sa Simbahan sa paghimo og sinemana nga home evening. Ang mga ginikanan mogamit niini nga panahon sa pagtudlo sa ilang mga anak sa ebanghelyo, sa pagpalig-on sa mga relasyon sa pamilya, ug magkauban nga maglingaw-lingaw. Ang mga lider sa Simbahan miisyu usab og usa ka pamahayag nga nagtudlo sa importante nga mga kamatuoran mahitungod sa pamilya (tan-awa sa “Ang Pamilya: Usa ka Pamahayag ngadto sa Kalibotan,” ChurchofJesusChrist.org).
Laing mga paagi sa pagpalig-on sa pamilya naglakip sa pag-ampo sa pamilya, pagtuon sa kasulatan, ug magkaubang pagsimba. Kita usab makasiksik sa kasaysayan sa pamilya, makatapok og mga sugilanon sa pamilya, ug makaserbisyo sa uban.
Daghang tawo adunay limitado nga mga oportunidad alang sa kaminyoon o alang sa mahigugmaong mga relasyon sa pamilya. Daghan ang nakasinati og diborsiyo ug uban pang lisod nga mga kahimtang sa pamilya. Apan, ang ebanghelyo indibidwal nga mopanalangin kanato bisan pa sa kahimtang sa atong pamilya. Ug kon kita matinud-anon, ang Dios mohatag og paagi alang kanato nga makabaton sa mga panalangin sa mahigugmaon nga mga pamilya, niini man nga kinabuhi o sa kinabuhi nga moabot.
Pagtuon sa Kasulatan
Kaminyoon
Pamilya
Pagkat-on og Dugang mahitungod Niini nga Baroganan
-
Ang Giya ngadto sa mga Kasulatan, “Banay,” “Kaminyoon, Pagminyo”
-
Kinatibuk-ang Tamdanan nga Basahon, kapitulo 2: “Pagsuporta sa mga Indibidwal ug mga Pamilya sa Buhat sa Kaluwasan ug Kahimayaan”
Buhat sa Templo ug Family History alang sa Patay na nga mga Katigulangan
Ang Langitnong Amahan nahigugma sa tanan Niyang mga anak ug nagtinguha sa ilang kaluwasan ug kahimayaan. Apan binilyon sa mga tawo ang nangamatay nga wala makadungog sa ebanghelyo ni Jesukristo o makadawat sa makaluwas nga mga ordinansa sa ebanghelyo. Kini nga mga ordinansa naglakip sa bunyag, kompirmasyon, ordinasyon ngadto sa pagkapari alang sa mga lalaki, sa tuga sa templo, ug sa mahangtorong kaminyoon.
Pinaagi sa Iyang grasya ug kaluoy, ang Ginoo mihatag og lain nga paagi alang niini nga mga tawo nga makadawat sa ebanghelyo ug sa mga ordinansa niini. Didto sa kalibotan sa mga espiritu, ang ebanghelyo gisangyaw ngadto niadtong namatay nga wala makadawat niini (tan-awa sa Doktrina ug mga Pakigsaad 138). Diha sa mga templo, kita makapahigayon og mga ordinansa alang sa atong namatay na nga mga katigulangan ug sa uban. Kining namatay na nga mga tawo didto sa kalibotan sa espiritu mahimo dayong modawat o mosalikway sa ebanghelyo ug sa mga ordinansa nga gipahigayon alang kanila.
Sa dili pa kita makapahigayon niini nga mga ordinansa, gikinahanglan natong ilhon ang atong mga katigulangan nga wala makadawat niini. Ang pag-ila sa atong mga sakop sa pamilya aron makadawat sila sa mga ordinansa mao ang usa ka nag-unang katuyoan sa atong buhat sa family history. Kon kita makakita og impormasyon mahitungod nila, idugang nato kini ngadto sa database sa Simbahan sa FamilySearch.org. Dayon kita (o ang uban) mahimong makapahigayon og proxy nga mga ordinansa alang kanila diha sa templo.
Samtang atong ilhon ang atong mga katigulangan ug mopahigayon og mga ordinansa alang kanila, ang atong mga pamilya mahimong mahiusa alang sa kahangtoran.
Pagtuon sa Kasulatan
Pagkat-on og Dugang mahitungod Niini nga Baroganan
-
Kinatibuk-ang Tamdanan nga Basahon, kapitulo 28: “Mga Ordinansa sa Templo alang sa mga Patay”
Mga Templo, ang Pagtuga, Mahangtoron nga Kaminyoon, ug Mahangtoron nga mga Pamilya
Mga Templo
Ang templo mao ang balay sa Ginoo. Usa kini nga balaan nga dapit diin makahimo kita og mga pakigsaad uban sa Dios samtang kita makadawat sa Iyang sagrado nga mga ordinansa. Samtang atong tumanon kini nga mga pakigsaad, atong mabatonan ang gahom sa pagkadiosnon nga mapakita sa atong mga kinabuhi (tan-awa sa Doktrina ug mga Pakigsaad 84:19–22; 109:22–23).
Ang Pagtuga
Usa sa mga ordinansa nga atong madawat diha sa templo mao ang gitawag nga pagtuga. Ang pulong nga pagtuga nagpasabot nga “usa ka gasa.” Kini nga gasa sa kahibalo ug gahom naggikan sa Dios. Atol sa pagtuga, mohimo kita og mga pakigsaad sa Dios nga mobugkos kanato ngadto Kaniya ug sa Iyang Anak, si Jesukristo (tan-awa sa kapitulo 1).
Ang mga hamtong mahimong angayan nga makadawat sa ilang kaugalingon nga pagtuga sa templo human sa dili momenos usa ka tuig nga pagkamiyembro sa Simbahan. Alang sa dugang nga impormasyon mahitungod sa pagtuga, tan-awa sa Kinatibuk-ang Tamdanan nga Basahon, 27.2.
Mahangtoron nga Kaminyoon ug Mahangtoron nga mga Pamilya
Ang plano sa Dios sa kalipay makapahimo sa mga relasyon sa pamilya nga makalahutay lapas pa sa kamatayon. Diha sa templo kita mahimong maminyo alang karon ug sa kahangtoran. Kini ang mohimo nga posible alang sa mga pamilya nga mag-uban sa kahangtoran.
Human ang minyo nga mga magtiayon makadawat sa ilang pagtuga sa templo, mahimo silang maselyo o maminyo alang sa kahangtoran. Ang ilang mga anak mahimong maselyo ngadto nila.
Ang usa ka bana ug asawa nga naselyo diha sa templo kinahanglang motuman sa mga pakigsaad nga ilang gihimo aron makadawat sa mga panalangin sa mahangtoron nga kaminyoon.
Pagtuon sa Kasulatan
Pagkat-on og Dugang mahitungod Niini nga Baroganan
-
Kinatibuk-ang Tamdanan nga Basahon, kapitulo 27: “Mga Ordinansa sa Templo alang sa mga Buhi”