លើកទឹកចិត្តសិស្សឲ្យស្គាល់ព្រះអង្គសង្គ្រោះតាមរយៈការសិក្សាដំណឹងល្អប្រចាំថ្ងៃ ។

« លើកទឹកចិត្តសិស្សឲ្យស្គាល់ព្រះអង្គសង្គ្រោះតាមរយៈការសិក្សាដំណឹងល្អប្រចាំថ្ងៃ » ជំនាញការអភិវឌ្ឍគ្រូបង្រៀន ( ឆ្នាំ ២០២២ )

« លើកទឹកចិត្តសិស្សឲ្យស្គាល់ព្រះអង្គសង្គ្រោះតាមរយៈការសិក្សាដំណឹងល្អប្រចាំថ្ងៃ » ជំនាញការអភិវឌ្ឍគ្រូបង្រៀន

អញ្ជើញឲ្យមានការរៀនសូត្រដ៏ឧស្សាហ៍ព្យាយាម

លើកទឹកចិត្តសិស្សឲ្យស្គាល់ព្រះអង្គសង្គ្រោះតាមរយៈការសិក្សាដំណឹងល្អប្រចាំថ្ងៃ—គោលដៅការសិក្សា ។

ជំនាញ ៖ ជួយសិស្សក្នុងការបង្កើតគោលដៅសិក្សាព្រះគម្ពីរប្រចាំថ្ងៃ

និយមន័យ

ការជួយសិស្សអភិវឌ្ឍទម្លាប់នៃការសិក្សាព្រះគម្ពីរប្រចាំថ្ងៃនឹងអនុញ្ញាតឲ្យព្រះអម្ចាស់បង្រៀន ពង្រឹង និងដឹកនាំពួកគេតាមរបៀបដែលពួកគេត្រូវការ ។ អ្នកអាចជួយសិស្សដោយការជួយពួកគេឲ្យបង្កើតគោលដៅសិក្សាព្រះគម្ពីរប្រចាំថ្ងៃ ។ ការណ៍នេះអាចត្រូវបានធ្វើឡើងប្រកបដោយប្រសិទ្ធភាព តាមរយៈការជួយសិស្សឲ្យ ៖

យល់ពីពរជ័យដែលបានសន្យាទាក់ទងនឹងការសិក្សាព្រះគម្ពីរប្រចាំថ្ងៃ
ដាក់គោលដៅប្រកបដោយការអធិស្ឋានក្នុងការសិក្សាព្រះគម្ពីរប្រចាំថ្ងៃ
សម្រេចចិត្តពីពេលវេលា និងទីកន្លែងសិក្សាព្រះគម្ពីររៀងរាល់ថ្ងៃ និង
សម្រេចចិត្តប្រើវិធីសាស្ត្រមួយដើម្បីសិក្សាព្រះគម្ពីរ ។

កាណ៍នេះអាចធ្វើនៅដើមឆមាស ហើយរំព្ញកឡើងវិញតាមការចាំបាច់ ដើម្បីជួយសិស្សបន្តរីកចម្រើន ។

គំរូ

នេះជាឧទាហរណ៍មួយចំនួនអំពីរបៀបដែលអ្នកអាចជួយសិស្ស ដាក់គោលដៅសិក្សាព្រះគម្ពីរប្រចាំថ្ងៃ នៅពេលពួកគេព្យាយាមសិក្សាព្រះគម្ពីររៀងរាល់ថ្ងៃនាឆ្នាំបច្ចុប្បន្ននេះ ៖

សូមសួរសិស្សឲ្យពិចារណាអំពីពរជ័យអ្វីខ្លះដែលពួកគេបានដកពិសោធតាមរយៈការសិក្សាព្រះគម្ពីរប្រចាំថ្ងៃ ។
សូមអញ្ជើញសិស្សឲ្យស្រាវជ្រាវបទគម្ពីរ ឬសុន្ទរកថាសន្និសីទទូទៅរកមើលការសន្យានានាដែលទាក់ទងនឹងពរជ័យ ដែលកើតមកពីការសិក្សាព្រះបន្ទូលនៃព្រះ ។
សូមរំឭកសិស្សឲ្យដាក់គោលដៅប្រកបដោយការអធិស្ឋានក្នុងការសិក្សាព្រះគម្ពីរប្រចាំថ្ងៃ ។ សូមឲ្យពួកគេស្វែងរកការណែនាំពីព្រះអម្ចាស់ នូវអ្វីដែលពួកគេត្រូវការបំផុត និងរបៀបបដែលពួកគេទទួលអារម្មណ៍ថា ពួកគេអាចកែលម្អបានលើកិច្ចខិតខំរបស់ពួកគេពីមុន នៅពេលពួកគេបន្តរៀនសូត្រ និងរីកចម្រើន ។
សូមជួយពួកគេក្នុងការដាក់គោលដៅប្រចាំថ្ងៃអំពីពេលវេលា និងទីកន្លែងដើម្បីសិក្សា តាមរយៈការឲ្យពួកគេសញ្ជឹងគិតអំពីទម្លាប់ប្រចាំថ្ងៃបច្ចុប្បន្នរបស់ពួកគេ ។ សូមអញ្ជើញពួកគេឲ្យពិចារណាពីពេលវេលា និងទីកន្លែងមួយសម្រាប់ការសិក្សាប្រចាំថ្ងៃ ជាកន្លែងដែលអាចឲ្យពួកគេមានស្មារតីនឹងធឹង យកចិត្តទុកដាក់ និងផ្តោតអារម្មណ៍ ។
សូមជួយសិស្សសម្រេចចិត្តអំពីរបៀបដែលពួកគេចង់សិក្សាព្រះគម្ពីរនាឆ្នាំបច្ចុប្បន្ន ។ សូមឲ្យពួកគេពិចារណាអំពីវិធីសាស្ត្រផ្សេងៗនៃការសិក្សា ។ សូមអញ្ជើញពួកគេឲ្យដាក់គោលដៅជាក់លាក់ ដោយរំឭកពួកគេថា គោលដៅទាំងនេះអាចកែសម្រួល និងសម្របបាន នៅពេលពួកគេបន្តឆ្ពោះទៅមុខ ។

សូមចុចនៅត្រង់នេះដើម្បីមើលវីដេអូអំពីគំរូនេះ ។

អនុវត្ត

សូមប្រើការអនុវត្តមួយ ឬច្រើននៃការអនុវត្តខាងក្រោមនេះ ដើម្បីកែលម្អសមត្ថភាពរបស់អ្នកក្នុងការជួយសិស្សឲ្យដាក់គោលដៅសិក្សាព្រះគម្ពីរប្រចាំថ្ងៃ ៖

សូមពិនិត្យមើលដោយផ្ទាល់ខ្លួននូវពរជ័យមួយចំនួនដែលបានសន្យាទាក់ទងនឹងការសិក្សាព្រះគម្ពីរប្រចាំថ្ងៃ ។ ការណ៍នេះអាចរកឃើញនៅក្នុងព្រះគម្ពីរទាំងនោះ ឬនៅក្នុងសារលិខិតនៃសុន្ទរកថាក្នុងសន្និសីទទូទៅ ។ សូមជ្រើសរើសការសន្យាមួយនៃការសន្យាទាំងនេះ ដើម្បីចែកចាយជាមួយសិស្ស នៅពេលអ្នកដាក់ផែនការអញ្ជើញពួកគេឲ្យស្វែងរកការសន្យានានាសម្រាប់ខ្លួនពួកគេ នៅក្នុងមេរៀនបន្ទាប់ ។
សូមពិចារណាអំពីរបៀបដែលអ្នកអាចអញ្ជើញសិស្សឲ្យដាក់គោលដៅប្រកបដោយការអធិស្ឋានក្នុងការសិក្សាព្រះគម្ពីរប្រចាំថ្ងៃ ។ សូមកត់ត្រាសំណួរមួយ ឬពីរដែលអ្នកគិតថា អាចសួរសិស្សដែលនឹងជួយពួកគេឲ្យអញ្ជើញព្រះអម្ចាស់ចូលទៅក្នុងការដាក់គោលដៅរបស់ពួកគេ ។
សូមអនុវត្តអញ្ជើញសិស្សឲ្យសម្រេចចិត្តរើសពេលវេលា និងទីកន្លែងដើម្បីសិក្សាព្រះគម្ពីរប្រចាំថ្ងៃ ។ សូមកត់ត្រាសំណួរមួយដែលអ្នកអាចសូមសិស្សឲ្យពិចារណា ដែលរៀបរាប់ពីកាលវិភាគប្រចាំថ្ងៃ ការយកចិត្តទុកដាក់ និងការដកនូវការរំខាននានាចេញ ។
សូមអនុវត្តជួយសិស្សជ្រើសរើសវិធីសាស្ត្រសិក្សាព្រះគម្ពីរ ដោយផ្តល់ជម្រើសដល់ពួកគេ និងការពិភាក្សាអំពីអត្ថប្រយោជន៍នៃវិធីសាស្ត្រនីមួយៗ ។ សូមអនុវត្តបង្ហាញវិធីសាស្ត្រមួយចំនួននេះដល់សិស្ស ដើម្បីពួកគេអាចឃើញពីរបៀបដែលពួកគេអាចកែសម្រួលការសិក្សាផ្ទាល់របស់ពួកគេ ឲ្យបំពេញតម្រូវការរបស់ពួកគេខ្លាំងបំផុត នៅពេលពួកគេព្យាយាមសិក្សាព្រះគម្ពីររៀងរាល់ថ្ងៃនាឆ្នាំបច្ចុប្បន្ននេះ ។

ពិភាក្សា ឬពិចារណា

សូមពិចារណាអំពីអ្វីដែលអ្នកបានរៀនពីបទពិសោធន៍នេះ ។ ប្រហែលអ្នកអាចកត់ត្រាគំនិតមួយចំនួននៅក្នុងសៀវភៅកំណត់ហេតុការសិក្សាបាន ។ សូមពិចារណាសំណួរខាងក្រោម ៖

តើកាលពីមុនខ្ញុំបានធ្វើអ្វីខ្លះដើម្បីជួយសិស្សឲ្យដាក់គោលដៅសិក្សាព្រះគម្ពីរ ?
តើខ្ញុំបានរៀនអ្វីខ្លះពីបទពិសោធន៍នេះ ដែលអាចកែលម្អសមត្ថភាពរបស់ខ្ញុំ ដើម្បីជួយពួកគេដាក់គោលដៅសិក្សាព្រះគម្ពីរ ?
តើខ្ញុំអាចជួយសិស្សរបស់ខ្ញុំឲ្យខ្ជាប់ខ្ជួននឹងគោលដៅសិក្សាព្រះគម្ពីររបស់ពួកគេដោយរបៀបណា ?

រួមបញ្ចូល

សូមពិនិត្យមើលតួនាទីថ្នាក់របស់អ្នកប្រកបដោយការអធិស្ឋាន ខណៈពិចារណាអំពីឧទាហរណ៍នៅក្នុងវគ្គគំរូ និងអនុវត្តនៅក្នុងការបំពាក់បំប៉ននេះ ។ សូមពិចារណាអំពីឧទាហរណ៍ណាមួយដែលអាចជួយសិស្សរបស់អ្នកបានល្អបំផុត ក្នុងការបង្កើតគោលដៅសិក្សាព្រះគម្ពីរ ។ ដោយប្រើឧទាហរណ៍មួយនៃឧទាហរណ៍នានា ឬឧទាហរណ៍មួយនៃឧទាហរណ៍របស់អ្នកផ្ទាល់ ដោយចាប់ផ្តើមជាមួយនឹងការផ្លាស់ប្តូរបន្តិចបន្តួច ដែលជួយសិស្សរបស់អ្នកអភិវឌ្ឍទម្លាប់ល្អនៃការសិក្សាព្រះគម្ពីរប្រចាំថ្ងៃ ។ សូមកំណត់ពេលវេលា ជាពេលដែលអ្នកអាចតាមដានយ៉ាងជាប់លាប់ ដើម្បីដឹងថា ទម្លាប់នោះដំណើរការយ៉ាងណា និងជួយពួកគេកែសម្រួលគោលដៅរបស់ពួកគេ ប្រសិនបើចាំបាច់ ។

តើចង់បានបន្ថែមទៀតទេ ?

រីឆាដ ជី ស្កត « The Power of Scripture » Liahona ខែ វិច្ឆិកា ឆ្នាំ ២០១១
ដេវីឌ អេ បែដណា « A Reservoir of Living Water » ( Brigham Young University devotional ថ្ងៃទី ៤ ខែ កុម្ភៈ ឆ្នាំ ២០០៧ ) speeches.byu.edu
« Daily Scripture Study and Goals » Inservice Leaders’ Resources