« បង្កើតបរិយាកាស និងឱកាសសម្រាប់សិស្ស ដើម្បីឲ្យព្រះវិញ្ញាណបរិសុទ្ធបង្រៀនពួកគេ » ជំនាញការអភិវឌ្ឍគ្រូបង្រៀន ( ឆ្នាំ ២០២២ )
« បង្កើតបរិយាកាស និងឱកាសសម្រាប់សិស្ស ដើម្បីឲ្យព្រះវិញ្ញាណបរិសុទ្ធបង្រៀនពួកគេ » ជំនាញការអភិវឌ្ឍគ្រូបង្រៀន
បង្រៀនដោយព្រះវិញ្ញាណ
បង្កើតបរិយាកាស និងឱកាសសម្រាប់សិស្ស ដើម្បីឲ្យព្រះវិញ្ញាណបរិសុទ្ធបង្រៀនពួកគេ ។
ជំនាញ ៖ បង្កើតស្វ័យវាយតម្លៃរបស់សិស្សអំពីគោលលទ្ធិ សេចក្តីពិត ឬគោលការណ៍ ។
និយមន័យ
ការបង្រៀនដោយព្រះវិញ្ញាណរួមមានការជួយសិស្សពិចារណាអំពីទស្សនវិស័យ អារម្មណ៍ និងបទពិសោធន៍ផ្ទាល់ខ្លួនរបស់ពួកគេ ដែលទាក់ទងនឹងសេចក្តីពិតជាក់លាក់ ។ វិចារណញាណ និងស្វ័យវាយតម្លៃផ្ទាល់ខ្លួននេះអាចយាងអញ្ជើញព្រះវិញ្ញាណបរិសុទ្ធឲ្យជួយសិស្សម្នាក់ៗមើលឃើញរឿងទាំងឡាយ « តាមដែលមាននៅពេលនេះ ហើយ … តាមដែលនឹងមាននៅពេលខាងមុខ » ( យ៉ាកុប ៤:១៣ ) នៅក្នុងជីវិតរបស់ពួកគេ ។ ស្វ័យវាយតម្លៃប្រកបដោយប្រសិទ្ធភាពជួយសិស្សពិចារណាអំពី ( ១ ) ការយល់ដឹងផ្ទាល់ខ្លួននាពេលបច្ចុប្បន្នរបស់ពួកគេអំពីសេចក្តីពិតមួយជាក់លាក់ ( ២ ) មូលហេតុដែលសេចក្តីពិតទាំងនេះទាក់ទងនឹងជីវិត និងស្ថានភាពផ្ទាល់របស់ពួកគេ និង ( ៣ ) របៀបរស់នៅតាមសេចក្តីពិតនេះកាន់តែប្រសើរឡើង ។ អ្នកអាចអញ្ជើញឲ្យមានស្វ័យវាយតម្លៃនេះនៅគ្រប់ពេលអំឡុងពេលបង្រៀនតាមរយៈមធ្យោបាយផ្សេងៗរួមមាន សកម្មភាពសរសេរ សំណួរពិភាក្សា និងការអញ្ជើញដើម្បីអនុវត្តគោលលទ្ធិ និងគោលការណ៍ ។
គំរូ
នេះជាឧទាហរណ៍ពីរបីនៃរបៀបដែលអ្នកអាចបង្កើតស្វ័យវាយតម្លៃរបស់សិស្សបាន ៖
-
នៅពេលចាប់ផ្តើមថ្នាក់រៀន អ្នកអាចអញ្ជើញសិស្សឲ្យកត់ត្រាសង្ខេបនៅក្នុងសៀវភៅកំណត់ត្រារបស់ពួកគេ អំពីការយល់ដឹងបច្ចុប្បន្នរបស់ពួកគេអំពីច្បាប់នៃដង្វាយមួយភាគក្នុងដប់ ។
-
នៅពេលបញ្ចប់ថ្នាក់រៀន អ្នកអាចអញ្ជើញសិស្សឲ្យសញ្ជឹងគិតថា ៖ « តើការយល់ដឹងរបស់ប្អូនអំពីច្បាប់នៃដង្វាយមួយភាគក្នុងដប់បានផ្លាស់ប្តូរខុសពីពេលចាប់ផ្តើមថ្នាក់រៀនយ៉ាងដូចម្តេចខ្លះ ? »
-
បន្ទាប់ពីរកឃើញគោលការណ៍ផ្សេងៗជាមួយគ្នាមកពីបណ្តុំបទគម្ពីរហើយ អ្នកអាចសួរសិស្សថា « តើប្អូនចាត់ចំណាត់ថ្នាក់អំពីលំដាប់នៃសារៈសំខាន់របស់គោលការណ៍ទាំងនេះនៅក្នុងជីវិតរបស់ប្អូនដោយរបៀបណា ? »
-
អំឡុងពេលការពិភាក្សាក្នុងថ្នាក់ អ្នកអាចសូមឲ្យសិស្សគិតអំពីរបៀបដែលដង្វាយធួនរបស់ព្រះយេស៊ូវគ្រីស្ទ ជះឥទ្ធិពលលើជីវិតរបស់ពួកគេមកដល់ត្រឹមចំណុចនេះ ។
-
អ្នកអាចអញ្ជើញសិស្សឲ្យគិតអំពីរបៀបដែលពួកគេអាចអនុវត្តអ្វីដែលពួកគេបានរៀន ៖ « សូមពិចារណាអំពីសភាពបច្ចុប្បន្នដែលប្អូនកំពុងមើល ‹ ទៅ [ ព្រះគ្រីស្ទ ] ដោយនូវគ្រប់ទាំងគំនិត › ( គោលលទ្ធិ និងសេចក្ដីសញ្ញា ៦:៣៦ ) ។ សូមកត់ត្រាអំពីអារម្មណ៍ដែលប្អូនគិតថា ជាជំហានបន្ទាប់ដើម្បីឲ្យប្អូនកែលម្អទំនាក់ទំនងរបស់ប្អូនជាមួយទ្រង់ទាក់ទងនឹងបញ្ហានេះ » ។
សូមចុចនៅត្រង់នេះដើម្បីមើលវីដេអូអំពីគំរូនេះ ។
អនុវត្ត
សូមប្រើការអនុវត្តមួយ ឬច្រើននៃការអនុវត្តខាងក្រោមនេះ ដើម្បីកែលម្អសមត្ថភាពរបស់អ្នកដើម្បីបង្កើតស្វ័យវាយតម្លៃសម្រាប់សិស្សរបស់អ្នក ៖
-
សូមមើលផែនការមេរៀនបន្ទាប់ ។ សូមជ្រើសរើសគោលលទ្ធិមួយដែលអ្នកកំពុងគ្រោងផ្តោតចិត្តទុកដាក់លើ ។ សូមអនុវត្តសរសេរស្វ័យវាយតម្លៃរបស់សិស្សដ៏សាមញ្ញចំនួនពីរបី ដែលអាចប្រើដើម្បីពិចារណាអំពីការយល់ដឹងបច្ចុប្បន្នរបស់ពួកគេអំពីគោលលទ្ធិនេះ ឬរបៀបដែលការយល់ដឹងរបស់ពួកគេបានផ្លាស់ប្តូរដោយសារអ្វីដែលពួកគេបានរៀន ។
-
សូមជ្រើសរើសគ្រាណាមួយនៅក្នុងមេរៀនបន្ទាប់ ជាពេលដែលគ្រោងធ្វើការពិភាក្សាក្នុងថ្នាក់ ។ សូមអនុវត្តសរសេរសំណួរពីរបី ដែលជួយសិស្សវាយតម្លៃទស្សនវិស័យ និងបទពិសោធន៍របស់ពួកគេផ្ទាល់ ទាក់ទងនឹងគោលការណ៍ដែលនឹងរកឃើញ ។
-
សូមស្វែងរកកន្លែងមួយនៅក្នុងផែនការមេរៀនបន្ទាប់ ជាកន្លែងដែលអ្នកនឹងផ្តោតលើការអនុវត្ត ។ ជាជាងគ្រាន់តែការអញ្ជើញសិស្សឲ្យអនុវត្តគោលលទ្ធិ ឬគោលការណ៍ជាក់លាក់ណាមួយ សូមអនុវត្តសរសេរការអញ្ជើញពីរបី ដែលជួយពួកគេវាយតម្លៃការអនុវត្តបច្ចុប្បន្នរបស់ពួកគេ និងរបៀបដើម្បីបន្តកែលម្អ ។
ពិភាក្សា ឬពិចារណា
សូមពិចារណាអំពីអ្វីដែលអ្នកបានរៀនពីបទពិសោធន៍នេះ ។ ប្រហែលអ្នកអាចកត់ត្រាគំនិតមួយចំនួននៅក្នុងសៀវភៅកំណត់ហេតុការសិក្សាបាន ។ សូមពិចារណាសំណួរខាងក្រោម ៖
-
តើខ្ញុំបានធ្វើអ្វីខ្លះកាលពីមុនដើម្បីជួយសិស្សឲ្យធ្វើស្វ័យវាយតម្លៃ ?
-
តើខ្ញុំបានរៀនអ្វីខ្លះនៅក្នុងបទពិសោធន៍នេះ ដែលអាចកែលម្អសមត្ថភាពរបស់ខ្ញុំ ដើម្បីជួយសិស្សឲ្យធ្វើស្វ័យវាយតម្លៃ ?
-
តើខ្ញុំនឹងធ្វើអ្វីខ្លះដើម្បីបន្តកែលម្អ ?
រួមបញ្ចូល
សម្រាប់ផែនការមេរៀននីមួយៗនាសប្តាហ៍នេះ សូមប្រើស្វ័យវាយតម្លៃផ្សេងមួយ ដើម្បីជួយសិស្សរៀនពីព្រះវិញ្ញាណបរិសុទ្ធ ។ សូមចំណាយពេលស្វែងរកអ្វីដែលអ្នករៀនមកពីបទពិសោធន៍នេះ ហើយអនុវត្តម្តងទៀតនៅក្នុងការរៀបចំរបស់អ្នក និងនៅក្នុងថ្នាក់រៀនរបស់អ្នក ។ សូមបន្តអនុវត្ត រៀន និងធ្វើឲ្យកិច្ចខិតខំរបស់អ្នកបានប្រសើរឡើង ដើម្បីជួយកែលម្អបទពិសោធន៍សិស្សរបស់អ្នក និងលើកទឹកចិត្តដល់ការបន្តលូតលាស់ និងការរីកចម្រើនរបស់ពួកគេ ។
តើចង់បានបន្ថែមទៀតទេ ?
-
ជែហ្វ្រី អ័រ ហូឡិន « Angels and Astonishment » ( ការចាក់ផ្សាយសម្រាប់ការបំពាក់បំប៉នប្រចាំឆ្នាំ ស.&វ. ថ្ងៃទី ១២ ខែ មិថុនា ឆ្នាំ ២០១៩ ) broadcasts.ChurchofJesusChrist.org
-
« អញ្ជើញឲ្យរៀនសូត្រដោយឧស្សាហ៍ » ការបង្រៀនតាមរបៀបរបស់ព្រះអង្គសង្គ្រោះ ( ឆ្នាំ ២០១៦ ) ទំព័រ ២៩–៣០
-
« Invite Diligent Learning » ( ៣:៣៥ ) ( វីដេអូ ) ChurchofJesusChrist.org