Seminare ma Inisitituti
Lesona 11: Puipuia I Tatou Lava mai Aoaoga Faavae Sese o Aso e Gata Ai

Lesona 11

Puipuia I Tatou Lava Mai Aoaoga Faavae Sese o Aso e Gata Ai

Folasaga

I le faaopoopo atu i le aoaoga “o le atoatoa o le talalelei a Iesu Keriso” MF&F 20:9, ua faamalosia e le Tusi a Mamona e mulimuli ia Keriso agai i aoaoga ma manatu sese o loo taatele i aso e gata ai. O se tasi auala e faataunuu ai lenei mea o le faailoaina lea o fili o Keriso ma faailoa aoaoga faavae sese ua latou faasalalauina. Ao suesue e tamaiti aoga tala i faiaoga pepelo i le Tusi a Mamona, o le a latou aoao e iloa le va o upumoni o le talalelei ma manatu sese o le lalolagi.

Faitauga Faaopoopo

Fautuaga mo le Aoaoina Atu

2 Nifae 28:3–9, 12–15; Iakopo 7:1–12; Alema 1:2–6; 30:12–18, 39–44; Iosefa Samita—Mataio 1:22

Faailoaina ma le puipuia o i tatou lava mai aoaoga faavae sese

Fai i tamaiti aoga e mafaufau i manatu eseese o loo i ai i le lalolagi e uiga i mataupu e pei o mataupu nei: O le upumoni na tuuina mai e le Atua agai i talitonuga fesuisuiai (o le manatu faapea e leai se sao po o se sese aoao), saolotoga faalelotu agai i aia tatau a vaega e i ai mea faapitoa e fiafia i ai, ma le aia tatau i se faapau pepe agai i le aia tatau i le ola. Ao outou talanoaina nei manatu, mafaufau e tusi i le laupapa. Tuu atu i tamaiti aoga se taimi e talanoaina ai pe aisea e tatau ai ona tatou faaeteete e talia manatu na e sao.

Faamatala atu faapea ina ua lata i le faaiuga o Lona soifua, na valoia e Iesu Keriso tulaga matautia faaleagaga o le a i ai i aso e gata ai. Valaaulia se tamaitiiti aoga e faitau le Iosefa Samita—Mataio 1:22. Atonu e te manao e faasino atu faapea o le fuaitau “o e ua filifilia e tusa ma le feagaiga” e faatatau i tagata o le Ekalesia a Iesu Keriso.

  • O a ni taufaamatau ua faia e “Keriso pepelo” ma “perofeta pepelo” i o tatou aso?

Faaali atu le saunoaga lenei mai ia Peresitene Ezra Taft Benson (1899–1994).

Peresitene Ezra Taft Benson

“O le Tusi a Mamona e faailoa ai fili o Keriso. Na te ta’useseina mataupu sese ma tuu i lalo finauga. (Tagai 2 Ni. 3:12.) E faamalosia ai soo lotomaualalalo o Keriso e tetee atu i faiga faatiapolo, auala, ma aoaoga faavae a le tiapolo i o tatou aso. O ituaiga o tagata liliu ese o loo i le Tusi a Mamona e talitutusa lava ma ituaiga tagata o loo i ai i aso nei. Na mamanuina e le Atua le Tusi a Mamona, faatasi ai ma lona muai silafia le mafuatiaina ina ia mafai ona tatou iloa ai le mea sese ma iloa ai auala e faafetaia’ia ai manatu sese faaleaoaoga, faaupufai, faalelotu, ma faafilosofia o o tatou aso.” Aoaoga a Peresitene o le Ekalesia: Ezra Taft Benson [2014], 132).

  • O a mea ua aoao mai e lenei fuaitau i le ala e mafai ai e le suesueina o le Tusi a Mamona ona puipuia i tatou mai aoaoga sese? (Ia mautinoa ua faailoa mai e tamaiti aoga lenei mataupu faavae: Ao tatou suesue i le Tusi a Mamona ma faaaoga ona aoaoga, e faamalolosia i tatou mai le tiapolo ma aoaoga ma manatu sese o o tatou aso.)

  • O le a le tulaga lelei o i ai i le aoao e uiga i fuafuaga a Satani ae e te lei oo moni lava i ai?

Fai i ni nai tamaiti aoga e feauauai i le faitauina leotele o le 2 Nifae 28:3–9 ao vaavaai le vasega mo manatu sese na fai mai Nifae o le a taatele i o tatou aso. E mafai ona e uunaia tamaiti aoga e maka upu ma fuaitau taua. Valaaulia tamaiti aoga e faasoa mai mea na latou faailoaina, ona fesili atu lea:

  • O a nisi o faataitaiga i aso nei o nei manatu sese? (O faataitaiga e ono aofia ai mea nei: manatu lelei e fesuisuiai; talitonuga faapea ona o le alofa o le Atua ia i tatou o le a Ia le faasalaina i tatou; ma le faailogatagata i Kerisiano, o e masani ona vaaia o ni tagata faafoliga pe tetee.)

Ina ia fesoasoani e tali lenei fesili, faasoa atu le faamatalaga lenei mai ia Elder M. Russell Ballard o le Korama a Aposetolo e Toasefululua. Fai i tamaiti aoga e faalogo mo aoaoga sese ua feagai mai latou.

Elder M. Russell Ballard

“O perofeta ma faiaoga pepelo o i latou ia ua faailoa mai faapea o le Perofeta o Iosefa Samita o se taufaasese; latou te masalosalo i le Uluai Faaaliga o se mea e sao. Latou te faailoa mai faapea o le Tusi a Mamona ma isi tusi faavae e le o ni tusitusiga paia anamua. Latou te taumafai foi e toe faamatalaina le natura o le Aiga Atua, ma latou te teenaina faapea na tuuina mai ma o loo faaauau pea ona tuuina mai faaaliga e le Atua i aso nei i na perofeta faauuina ma lagolagoina. …

“Atonu o le mea e sili ona faasalaina, o lo latou teenaina lea o le Toetu ma le Togiola a Keriso, ma finau mai faapea e leai se Atua e mafai ona faaolaina i tatou. Latou te teenaina le manaomia o se Faaola. I le faapuupuuga, o nei tagata taufaasese o loo taumafai e toe faaliliuina ia aoaoga o le Ekalesia ina ia fetaui i o latou lava manatu e fafauina, ma i le faagasologa e teenaina ai Keriso ma Lana matafaioi faamesia.

“O perofeta ma faiaoga pepelo o loo taumafai foi e suia ia aoaoga na tuuina mai e le Atua ma aoaoga faavae o tusitusiga paia lea e puipuia ai le paia o le faaipoipoga, o le natura paia o le aiga, ma aoaoga talafeagai o le mama faaletagata. Latou te fautuaina se toe faauigaina o le ola mama ina ia faamaonia ai le faitaaga, mulilua, ma sootaga faatauatane” (“Ia Faaeteete i Perofeta Pepelo ma Faiaoga Pepelo,” Liahona, Ian. 2000, 63–64).

Fai i tamaiti aoga e suesue le 2 Nifae 28:12–15, ma vaavaai mo taunuuga o le talitonu i aoaoga sese.

  • O a nisi o taunuuga o le talitonu i aoaoga ma manatu sese?

Faaali atu le saunoaga lenei a Elder Ulisses Soares o le Au Peresitene o le Fitugafulu, ma fai i se tamaitiiti aoga e faitau leotele:

Elder Ulisses Soares

“E le mafai ona tatou faatagaina i tatou lava ia lē mautonu i savali lauiloa ia ua faigofie ona taliaina e le lalolagi ma ua feteenai ma le aoaoga faavae ma mataupu faavae moni o le talalelei a Iesu Keriso. O le tele lava o nei savali faalelalolagi e leai se mea e faatusa ai nai lo se taumafaiga o lo tatou lalolagi e tauamiotonuina le agasala” (“Ioe, Tatou Te Mafaia ma O Le A Tatou Manumalo!” Ensign po o le Liahona, Me 2015, 75).

  • O le a le saunoaga a Elder Soares i le faamoemoega o le tele o savali lauiloa na e feteenai ma le talalelei a Iesu Keriso? (Fesoasoani i tamaiti aoga e faailoa mai lenei upumoni: E faaaoga e Satani aoaoga sese e faatosina ai i tatou e fai le agasala. E mafai ona e sue i le Alema 30:53 mo nisi faamatalaga e uiga i lenei upumoni.)

Vaevae le vasega i ni vaega se tolu. Tusi fuaitau o mau nei i le laupapa, ma tofi vaega taitasi e suesue se tasi o fuaitau: Iakopo 7:1–7; Alema 1:2–6; po o le Alema 30:12–18. Fai i tamaiti aoga e faailoa mai nisi o aoaoga sese na aoao mai e Serema, Neoa, ma Korioa ma tusi i le laupapa i lalo o ulutala talafeagai.

Serema (Iakopo 7:1–7)

Neoa (Alema 1:2-6)

Korioa (Alema 30:12-18)

  • Pe na e vaai i ni aoaoga po o manatu sese e pei ona lisiina i le laupapa ua aafia ai tagata o le Ekalesia i aso nei?

Valaaulia tamaiti aoga e faatusatusa le Iakopo 7:5, 8–12 ma le Alema 30:39–44 ia iloa ai pe o a mea na faamalolosia ai Iakopo ma Alema mai aoaoga sese a Serema ma Korioa. (Manatua: O le faatusatusaina o se tomai faalesuesuega o tusitusiga paia. O le matauina o mea e tutusa ai po o “eseesega i va o aoaoga, tagata, po o mea e tutupu e mafai ona manino tele ai le taulai i upumoni o le talalelei” Aoao Atu ma le Aoaoina Mai o le Talalelei: O Se Tusitaulima mo Faiaoga ma Taitai i Seminare ma Inisitituti o Mataupu Faalelotu (2012), 22].)

  • O a mea na faamalolosia ai Iakopo ma Alema mai aoaoga sese? (O tali e tatau ona aofia ai mea nei: aafiaga faaleagaga talu ai, malamalama i tusitusiga paia, malamalama na maua mai le Agaga Paia, ma se molimau ia Keriso.)

  • O le a se mataupu faavae e mafai ona tatou aoao mai i tali a Iakopo ma Alema i nei aoaoga sese? (Fesoasoani i tamaiti aoga e faailoa mai lenei mataupu faavae: Pe a tatou faalagolago ia tatou molimau ia Keriso ma saili le taitaiga a le Agaga Paia, e mafai ona tatou faatoilalo luitau i lo tatou faatuatua.)

  • Ua faapefea e lau molimau ona faamalosia oe mai aoaoga sese po o faitioga i ou talitonuga?

Uunaia tamaiti aoga e faasoa mai mea ua latou faia e puipuia ai i latou lava mai aoaoga sese na e mafai ona tafiesea lo latou faatuatua ia Iesu Keriso ma Lana talalelei toefuataiina.

2 Nifae 26:29; 3 Nifae 18:24; 27:27

Iloaina o tulaga pagatia o faitaulaga pepelo

Tau atu i tamaiti aoga faapea o nisi o tulaga pagatia faaleagaga i le Ekalesia e sau mai i tagata o loo i totonu o le Ekalesia. Fai i se tamaitiiti aoga e faitau leotele le 2 Nifae 26:29 ao vaavaai le vasega mo tulaga pagatia faaleagaga ua faamatalaina e Nifae.

  • E tusa ai ma lenei fuaitau, o a ni faitaulaga pepelo? (Pe a talai e tagata le talalelei mo le lauiloa patino po o oa nai lo mo le tulaga manuia o fanau a le Atua.)

  • O a auala e mafai ai e faitaulaga pepelo ona fatuina ni tulaga pagatia faaleagaga mo tagata o le Ekalesia?

Ina ia fesoasoani e taliina nei fesili, valaaulia se tamaitiiti aoga e faitau le saunoaga lenei a Elder M. Russell Ballard:

Elder M. Russell Ballard

“Ia tatou nofouta i perofeta pepelo ma faiaoga pepelo, e le gata i alii ma tamaitai, o e na tofiaina i latou lava e faailoa atu ia aoaoga o le Ekalesia ma taumafai e faasalalau atu a latou talalelei pepelo ma faatosina mai ai i latou o e mulimuli i ai e ala i le lagolagoina o faatasiga tetele, o tusi, ma tusi o talaaga o olaga o loo aofia ai faamatalaga e luitau ai ia aoaoga faavae o le Ekalesia. Ia nofouta ia i latou oe tautatala ma faasalalau e tetee i perofeta moni a le Atua ma talaiina atu ma le malosi i isi ma le le fefe ae le amanaia ai le tulaga lelei e faavavau o i latou o loo latou faaseseina” (“Ia Faaeteete i Perofeta Pepelo ma Faiaoga Pepelo,” Liahona, Ian. 2000, 73).

  • E mafai faapefea ona e puipuia oe lava ma isi mai faitaulaga pepelo?

  • E mafai faapefea ona e puipuia aoaoga faavae o le Ekalesia pe a tautatala nisi e tetee i perofeta a le Atua i aso e gata ai?

Tau atu i tamaiti aoga faapea na aoaoina e le Faaola Ona soo i le ala e tatau ai ona aoao ma uunaia isi e i latou e suitulaga ia te Ia. Fai i tamaiti aoga e suesue le leoa le 3 Nifae 18:24 ma le 3 Nifae 27:27, ma vaavaai pe faapefea ona ese le auaunaga faaletalalelei moni mai le faitaulaga pepelo.

  • E faapefea e mafuaaga ma faatinoga a faiaoga ma taitai amiotonu ona ese mai mafuaaga ma faatinoga a i latou e agasala i le faitaulaga pepelo? (O tamaiti aoga e tatau ona faailoa mai le upumoni lenei: O soo o Iesu Keriso e saili e auauna atu ma faamanuia isi e ala i le faasino atu o i latou ia te Ia.)

Moronae 7:12–17; Eteru 4:11–12

Iloaina o le mea sao mai le mea sese

Fai i tamaiti aoga e mafaufau i se taimi na fesiligia ai e se tasi pe faitioina o latou talitonuga. Valaaulia se tamaitiiti se toatasi pe toalua e faasoa mai o laua aafiaga.

Valaaulia ni nai tamaiti aoga e feauauai i le faitauina leotele mai le Moronae 7:12–17 ma le Eteru 4:11–12 ao mulimuli i ai le vasega, ma vaavaai mo le ala e iloa ai pe o se mea e mai le Alii pe mai le tiapolo.

  • O le a le mea ua e aoao mai lenei savali e uiga i le ala e mafai ai ona tatou faamasino i le va o le lelei ma le leaga? (Ia mautinoa ua malamalama tamaiti aoga i le mataupu faavae lenei: O mea uma e mai le Atua e valaaulia i tatou e fai le lelei, ia talitonu ia Iesu Keriso, ma ia alofa ma auauna i le Atua.)

Valaaulia se tamaitiiti aoga e faitau leotele le saunoaga lenei a Peresitene Ezra Taft Benson:

Peresitene Ezra Taft Benson

“Sei ou fautuaina atu ni suega pupuu se tolu e aloese ai mai le faaseseina. …

“1. O le a se tala mai i tusitusiga faavae e uiga i ai? …

“2. O le taiala lona lua o le: o le a se tala a Peresitene o le Ekalesia i aso e gata ai e uiga i lea mataupu—aemaise lava le Peresitene o loo soifua? …

“3. O le suega lona tolu ma le suega mulimuli o le Agaga Paia—le suega o le Agaga. … O lenei suega e mafai ona atoatoa le aoga pe afai o le ala o fesootaiga ma le Atua o loo mama ma mama aiai ma le pona i agasala” (i le Conference Report, Oct. 1963, 16–17).

Ina ia faaiuina, fai i tamaiti aoga e mafaufau loloto pe mafai faapefea ona sili atu lo latou faaaogaina o tusitusiga paia, saunoaga a perofeta, ma le Agaga Paia e faailoa ai aoaoga sese ma aloese ai mai le faaseseina. E mafai ona e uunaia i latou e suesue le Iakopo 7, Alema 1, ma le Alema 30 mo nisi faamatalaga ma mafaufau loloto pe faapefea e nei mataupu ona fesoasoani ia i latou ia sili atu le iloa o le va o le mea moni ma le mea sese.

Faitauga a Tamaiti Aoga