Na oo perofeta o le Tusi a Mamona i ni taumafaiga maoae i le faiga ma le faasaoina o tusitusiga paia ia o le a faamanuiaina ai i tatou i o tatou aso. I lenei lesona, o le a faamanatu ai i tamaiti aoga ao latou suesue ma ola i afioga a perofeta, e mafai ona latou maua le mana e faatoilalo ai Satani, asaina lo latou ala i le olaga faitino, ma iu ai lava ina maua le ola e faavavau.
Faaali atu le saunoaga lenei a Elder D. Todd Christofferson o le Korama a Aposetolo e Toasefululua, ma fesili i tamaiti aoga pe faapefea ona latou taliina le fesili ua ia tuuina mai:
Ata
Elder D. Todd Christofferson
“Atonu e [matua silisili atu] lo tatou nofoaitalafu ia i latou oe na faamaoni i le faamaumauina ma le puipuia o le afioga i le tele o augatupulaga, e masani lava e faoa ma galuega ma osiga taulaga tiga ma le fita—o Mose, Isaia, Aperaamo, Ioane, Paulo, Nifae, Mamona, Iosefa Samita, ma le tele o isi. O le a le mea na latou iloa i le taua o tusitusiga paia e tatau foi ona tatou iloa?” (“O Le Faamanuiaga o Tusitusiga Paia,” Ensign po o le Liahona, Me 2010, 32).
O le a sou manatu i mea na iloa e nei tusitala e uiga i le taua o tusitusiga paia e manaomia foi ona tatou iloaina?
Faamanatu i tamaiti aoga faapea o Nifae ma ona uso na poloaiina e le Alii ia toe foi i Ierusalema e aumai papatusi apamemea. Valaaulia ni nai tamaiti aoga e feauauai i le faitauina leotele mai o le 1 Nifae 3:19–20 ma le 5:21–22 ao vaavaai le vasega mo mafuaaga na matuai taua ai papatusi apamemea ia Liae ma lona aiga.
E tusa ai ma nei fuaiupu, aisea e matuai taua ai tusitusiga Paia? (O tamaiti aoga e tatau ona faailoa mai le upumoni lenei: O tusitusiga paia e faasaoina afioga ma poloaiga a le Atua e pei ona tuuina atu i Ana perofeta.)
Ina ia fesoasoani e faamalosia lenei upumoni, faamanatu i tamaiti aoga o le fia selau o tausaga ina ua taunuu le aiga o Liae i le laueleele folafolaina, na feiloai o latou tupuaga ma tagata o Saraemila (o sa Moleka), o e na malaga mai Ierusalema ae lei leva ona malaga ese le aiga o Liae.
Valaaulia tamaiti aoga e faitau le leoa le Ominae 1:14–17 ma le Mosaea 1:3–5 ma matau le eseesega i le va o i latou na i ai tusitusiga paia (sa Nifae) ma i latou e lei i ai (sa Moleka). (Manatua: Ina ia aoao e uiga i le tomai o le suesueina o tusitusiga paia o le “faatusatusa ma sue eseesega”, tagai Aoao Atu ma le Aoaoina Mai o le Talalelei: O Se Tusitaulima mo Faiaoga ma Taitai i Seminare ma Inisitituti o Aoaoga Faalelotu [2012], 22.)
O a taunuuga na aafia ai sa Moleka ona sa leai ni a latou tusitusiga paia? (Tagai foi 1 Nifae 4:13.)
O a faamanuiaga na oo mai i sa Nifae ona sa i ai a latou tusitusiga paia?
Valaaulia se tamaitiiti aoga e faitau leotele le Alema 37:3-4, 8 ao vaavaai le vasega mo faamanuiaga na maua e sa Nifae mai papatusi apamemea.
E tusa ai ma le fuaiupu 8, o a nisi o faamanuiaga na maua e sa Nifae mai papatusi apamemea?
O le a sou manatu i le uiga o le tala a Alema ina ua ia faapea mai o tusitusiga paia “ua faalautele le manatu o lenei nuu”?
Ina ia fesoasoani ia manino le uiga o lenei fuaitau, fai i se tamaitiiti aoga e faitau leotele le saunoaga lenei a Elder D. Todd Christofferson ao vaavaai le vasega mo nisi manatu pe faapefea ona faateleina e tusitusiga paia lo tatou manatu:
Ata
Elder D. Todd Christofferson
“O tusitusiga paia e faateleina ai lo tatou manatu e ala i le fesoasoani ia i tatou ia manatua pea le Alii ma lo tatou sootaga ma Ia ma le Tama. Latou te faamanatu ia i tatou mea na tatou iloa i le muai olaga. Ma latou te faateleina lo tatou manatu i se isi uiga e ala i le aoaoina o i tatou e uiga i vaitausaga, tagata, ma mea na tutupu tatou te lei aafia ai lava. …
“Ua faateleina foi e tusitusiga paia o tatou manatu e fesoasoani ia i tatou ina ia le faagaloina mea na aoaoina e i tatou mai tupulaga ua mavae. O i latou e le o i ai pe o loo le amanaiaina le afioga faamaumauina a le Atua o le a oo lava ina faamutaina lo latou talitonu ia te Ia ma galo ai le faamoemoega o lo latou ola ai” (“O le Faamanuiaga o Tusitusiga Paia,” 33).
O a nisi o auala ua faateleina ai e tusitusiga paia lo tatou manatu?
O a aoaoga faavae, mataupu faavae, po o tala i tusitusiga paia ua faalauteleina pe faateleina lou manatu i le Alii ma lou faia ma Ia?
Valaaulia se tamaitiiti aoga e aotele faapuupuu le faaaliga a Liae o le laau o le ola (tagai 1 Nifae 8. Ona fesili lea i le vasega po o le a le mea e suitulaga ai le ai uamea ma pe aisea e avea ai ma se vaega e taua tele o le faaaliga. Afai e manaomia, valaaulia tamaiti aoga e faitau le 1 Nifae 8:21-24, 29-30.
Fai i tamaiti aoga e suesue le 1 Nifae 15:23–24 ma vaavaai mo faamanuiaga na e oo ia i latou e pipii mau i le afioga a le Atua. E mafai ona e uunaia tamaiti aoga e faailoga mea ua latou maua.
O le a sou manatu i le uiga o le “pipii mau” i le afioga a le Atua?
E tusa ai ma nei fuaiupu, o a faamanuiaga e mafai ona tatou maua i le pipii mau i le afioga a le Atua? (E tatau ona faailoa mai e tamaiti aoga le mataupu faavae lenei: Afai tatou te pipii mau i le afioga a le Atua, o le a tatou le fano lava faaleagaga ma o le a le manumalo le fili ia i tatou.)
Faaali atu le saunoaga lenei a Elder David A. Bednar o le Korama a Aposetolo e Toasefululua, ma valaaulia se tamaitiiti aoga e faitau leotele:
Ata
Elder David A. Bednar
“Sei ou fautua atu la o le piimau i le ai uamea e aofia ai, se fuafaatatau tele, le agaga tatalo, faifai pea, ma le faaaoga faamaoni o tusitusiga paia o se puna mautinoa o upu moni faaalia ma o se taiala faamoemoeina mo le malaga i le ala sao ma le vaapiapi i le laau o le ola—faapei o le Alii o Iesu Keriso” (“Miti a Liae: Piimau Pea i le Ai Uamea,” Liahona, Oke. 2011, 36).
Faamatala atu o ni nai perofeta o le Tusi a Mamona na aoaoina mai nisi o faamanuiaga na e oo mai ia i latou e pipii mau i le afioga a le Atua. Tusi mau fesootai nei i le laupapa. Valaaulia tamaiti aoga taitasi e suesue se tasi po o le lua [o mau fesootai], ma saili ia iloa faamanuiaga na e oo mai le suesueina o le afioga a le Atua. Ona fai lea i tamaiti aoga e tusi faamanuiaga ua latou faailoa mai i le laupapa i talaane o le mau fesootai:
Valaaulia tamaiti aoga e famatala mai se mea e mafai e se talavou nofofua matua ona fai i aso uma o le olaga e pipii mau ai i le ai uamea.
Fai i tamaiti aoga e mafaufau pe o le latou faaaogaina o tusitusiga paia e mafai ona faamatalaina o loo pipii mau i le ai uamea.
Valaaulia tamaiti aoga e mafaufau ma tusi i lalo ni mea faapitoa e mafai ona latou faia ia sili atu ai le pipii mau i le ai uamea ma sili atu ai le maua atoatoa o nei faamanuiaga.
O le afioga a le Atua e taitai atu i le ola e faavavau
Faamanatu i tamaiti aoga o le perofeta o Liae na mauaina se meafaigaluega mai le Alii e taua o le Liahona. Valaaulia se tamaitiiti aoga e faitau leotele le Alema 37:38-42 ao vaavaai le vasega pe na faapefea ona faamanuiaina le aiga o Liae e le Liahona.
Na faapefea ona faamanuiaina e le Liahona le aiga o Liae?
O le a le mea na manaomia e le aiga o Liae ina ia mafai ai ona galue lelei le Liahona? (O le tapasa e faatoa galue pe a latou gauai atu i ana faatonuga ma faaaoga le faatuatua ma le filiga. Tagai foi i le 1 Nifae 16:28.)
Faamatala atu na aoaoina e Alema faapea o le aoga o le Liahona o se “ituaiga” ma o se “ata” — o lona uiga o se faatusa—o le ala o le a tatou faaaoga ai le afioga a le Atua. Fai i se tamaitiiti aoga e faitau leotele le Alema 37:43-46 ao faailoa mai e le vasega mea e tutusa ai le va o le Liahona ma afioga a Keriso.
O le a le mataupu faavae e faatatau i afioga a Keriso na aoaoina e Alema i nei fuaiupu? (E tatau ona faailoa mai e tamaiti aoga le mataupu faavae lenei: Afai tatou te gauai i afioga a Keriso, o le a taitaiina i tatou i se ala sao i le ola e faavavau. E mafai ona e uunaia tamaiti aoga e maka le upu afai i fuaiupu 45–46. Tau i tamaiti aoga o le aoao e faailoa le fesootaiga o mafuaaga-ma-le-taunuuga o se tomai taua lena e mafai ona faaleleia ai la latou suesuega o tusitusiga paia,)
O le a sou manatu i le uiga o le taitaiina i se “ala sao” i le ola e faavavau?
O a nisi o mea e mafai ona tatou faia ina ia mafai ai ona sili atu i le na o le faitau o afioga a Keriso ae amata ona “gauai” i ai?
Faaiu le lesona i le faaali atu o le saunoaga lenei a Elder David A. Bednar, ma valaaulia tamaiti aoga e faitau i ai ma mafaufau loloto i fesili a Elder Bednar.
Ata
Elder David A. Bednar
“O se tafe faifai pea o le vai ola e sili atu le maualuga nai lo se tofo masani.
“Pe o ta faitauina, suesueina, ma sailiina tusitusiga paia i se auala e mafai ai e i taua ona pipii mau i le ai uamea … ? Pe o ta fetaomi atu i luma agai atu i le punavai o le vai ola—ma faalagolago i le afioga a le Atua? O ni fesili taua nei mo i tatou taitoatasi e mafaufau loloto i ai ma le agaga tatalo” (“A Reservoir of Living Water” [Faigalotu a le au talavou matutua o le Church Educational System, Fep. 4, 2007], 7, lds.org/broadcasts).
Fesili atu pe i ai ni tamaiti aoga e fia faasoa mai a latou molimau pe faapefea e le suesueina o le afioga a le Atua ona faamanuiaina i latou. Uunaia tamaiti aoga e faaauau le mafaufau loloto i fesili a Elder Bednar, ma valaaulia i latou e mulimuli i ai ma mafaufauga ma lagona na latou maua i le taimi o le lesona ina ia faia a latou suesuega o le afioga a le Atua ia sili atu le mataalia ma aoga.