Seminare ma Inisitituti
Lesona 3: O Le Usiusitai e Aumaia ai Faamanuiaga

Lesona 3

O Le Usiusitai e Aumaia ai Faamanuiaga

Folasaga

O lo tatou usiusitai i poloaiga a le Atua o se tasi auala tatou te faaalia ai lo tatou faafetai mo Ana faamanuiaga taua. O le Faaola o lo tatou faataitaiga sili o le usiusitai. O lo tatou naunau e usiusitai e faatupuina ai lo tatou alofa mo le Atua. O le usiusitai i poloaiga e mafai ai e le Atua ona saunia le fesoasoani tatou te manaomia ao tatou saili e faataunuu galuega faigata.

Faitauga Faaopoopo

Fautuaga mo le Aoaoina Atu

1 Nifae 2:2–4, 9–13, 16, 19–20; Mosaea 2:20–24, 41

E ala atu i lo tatou usiusitai, tatou te faaalia ai lo tatou faafetai i le Atua ma maua Ana faamanuiaga silisili.

Faaali atu le saunoaga lenei a Elder Joseph B. Wirthlin (1917–2008) o le Korama a Aposetolo e Toasefululua, ma fai i se tamaitiiti aoga e faitau leotele:

Elder Joseph B Wirthlin

“E mafai faapefea ona tatou toe totogi le aitalafu ua tatou nofo aitalafu ai i le Faaola? Sa Ia totogiina se aitalafu Na te lei faia, ina ia faasaoloto ai i tatou mai se aitalafu e le mafai ona tatou totogia. Ona o Ia, o le a tatou ola ai e faavavau. Ona o Lana taulaga e le iu, e mafai ai ona faamagaloina a tatou agasala, e mafai ai ona tatou maua le meaalofa sili o meaalofa uma a le Atua: o le ola e faavavau.

Pe mafai ea ona i ai se tau o lena meaalofa? Pe mafai ea ona tatou tauia se meaalofa faapena?” “Aitalafu Faalelalolagi, Aitalafu Faalelagi,” Ensign po o le Liahona, Me 2004, 43).

Tuu atu i tamaiti aoga se taimi e talanoa ai i tali e ono taliina ai le fesili na fai e Elder Wirthlin. Uunaia tamaiti aoga e vaavaai mo mataupu ma aoaoga faavae i le taimi o le lesona na e fesoasoani e taliina lenei fesili.

Valaaulia tamaiti aoga e faitau le leoa le Mosaea 2:20-24. Fai ia i latou e vaavaai mo mea na aoao mai e le Tupu o Peniamina pe faapefea ona tatou vaai ia i tatou lava i la tatou sootaga ma le Atua.

  • Aisea i lou manatu na aoao mai ai le Tupu o Peniamina e tusa lava po o a a tatou mea e fai, o i tatou o ni “auauna le aoga” pea i le Atua?

  • E ui ina e le mafai lava ona tatou toe totogi atu la tatou aitalafu i le Atua, o a mea ua fautuaina mai e nei fuaiupu e mafai ona tatou faia e faaalia ai lo tatou faafetai mo mea uma ua Ia faia mo i tatou? (Fesoasoani i tamaiti aoga ia malamalama i le mataupu faavae lenei: Pe a tatou iloaina la tatou aitalafu e faavavau i le Atua, tatou te mananao e auauna atu ia te Ia ma tausi Ana poloaiga.

Tau atu i tamaiti aoga faapea o se tasi o tala sili faatusi paia o le usiusitai i le Atua e maua i le amataga o le Tusi a Mamona, lea e faamaumauina ai le ala na tali atu ai le perofeta o Liae ma lona aiga ina ua faatonuina i latou e le Atua e fai se mea e matuai faigata lava. Fai i se tamaitiiti aoga e faitau leotele le 1 Nifae 2:2-4.

  • Aisea o le a faigata ai i le aiga o Liae ona usiusitai i le poloaiga a le Atua e tuua Ierusalema?

Valaaulia tamaiti aoga e suesue le 1 Nifae 2:9–13, 16, ma vaavaai mo eseesega i le va o uiga ma amioga a Lamana ma Lemuelu ma uiga o Nifae i le tali atu i lenei poloaiga. (Manatua: O lenei gaoioiga o le a uunaia tamaiti aoga e faataitai le taua o le tomai o le suesue i tusitusiga paia o le faatusatusa ma le faafetauiga.)

  • O a upu ma fuaitau e faamatala ai le tali a Lamana ma Lemuelu? (Na malo o la ua, na la muimui, ma na la le iloa galuega a le Atua.)

  • Na faapefea ona tali atu Nifae i le poloaiga e tuua Ierusalema? (Na lotomaualalo o ia; na ia manao ia iloa mea a le Atua; na i ai lona faatuatua i upu a lona tama, lea sa avea ma perofeta; ma na ia tatalo.)

  • Aisea na ese ai le tali a Nifae i upu a lona tama nai lo ona uso?

Tuu atu i tamaiti aoga se taimi e mafaufau loloto ai pe o sili atu lo latou faapei o Lamana ma Lemuelu pe faapei o Nifae pe a faatonuina i latou e le Alii po o taitai o Lana Ekalesia e fai se mea faigata.

Valaaulia se tamaitiiti aoga e faitau leotele le 1 Nifae 2:19-20. Fai i le vasega e mulimuli i le faitauga ma faailoa mai le folafolaga a le Alii ia Nifae.

  • O a fuaitau i nei fuaiupu e aotele ai mea ua folafola mai e Nifae? (Ia mautinoa ua malamalama tamaiti aoga i le mataupu faavae lenei: Afai tatou te tausia poloaiga, o le a tatou manuia i le laueleele. E mafai ona e faasino atu faapea o se tasi lenei o autu e sili ona fai soo i le Tusi a Mamona. E mafai ona e uunaia tamaiti aoga, ao latou suesue i le Tusi a Mamona, ia matau le tele o auala ua fai soo ai lenei autu.)

  • O a uiga lelei na tuuina atu e le Alii ia Nifae? Aisea i lou manatu e taua ai nei uiga mo i tatou taitoatasi ia i ai i la tatou sootaga ma le Alii?

  • E ui lava o le usiusitai atonu e le masani ona taunuu i le manuia faaletino, o a faamanuiaga e mafai ona tatou faamoemoeina o se taunuuga o le usiusitai i le Alii? (Ina ia fesoasoani e taliina lenei fesili, mafaufau e faitau le Mosaea 2:41.)

2 Nifae 31:6–10, 15–16; Mosaea15:7; 3 Nifae 11:11; 12:19–20, 48

O le mulimuli i le faataitaiga a le Faaola o le usiusitai e fesoasoani ia i tatou ina ia o mai ia te Ia ma le Tama

Faaali atu le saunoaga lenei a Elder Robert D. Hales o le Korama a Aposetolo e Toasefululua:

Elder Robert D. Hales

“Mai lesona uma ua tatou aoaoina mai le soifuaga o le Faaola, e leai se lesona ua sili ona manino ma mamana nai lo le lesona o le usiusitai” (“Afai Tou Te Alofa Mai ia te Au, Ia Outou Tausi Mai i Au Poloaiga,” Ensign po o le Liahona, Me 2014, 35).

  • O a faataitaiga mai le soifuaga o le Faaola ua faaalia ai Lona usiusitai?

Ina ia fesoasoani i tamaiti aoga ia talanoaina atili lenei fesili, fai ia i latou e faitau le Mosaea 15:7 ma le 3 Nifae 11:11, ma vaavaai mo mea na naunau Iesu e fai ina ia usitai ai i Lona Tama.

Valaaulia tamaiti aoga e feauauai i le faitauina leotele o le 2 Nifae 31:6–10, 15–16 ao vaavaai le vasega mo mea e mafai ona tatou aoao mai le faataitaiga a le Faaola e uiga i le taua o le usiusitai ma faamanuiaga na e oo mai mai le usiusitai.

  • O le a se mea e mafai ona tatou aoaoina mai i le faataitaiga a le Faaola e uiga i le taua o le usiusitai? O le a se mea e mafai ona tatou aoaoina mai Lana faataitaiga e uiga i faamanuiaga na e oo mai mai le usiusitai? (Ia mautinoa ua faailoa mai e tamaiti aoga lenei mataupu faavae: Ao tatou mulimuli i le faataitaiga a le Faaola o le usiusitai i Lona Tama, o le a tatou tumau i luga o le auala vaapiapi lena e taitai atu i le faaolataga.)

Faaali atu le saunoaga lenei a David A. Bednar, ma fai i se tamaitiiti aoga e faitau leotele:

Elder Robert D. Hales

“O le usiusitai faaleagaga faatagata matua o ‘le usiusitai lea o le Faaola.’ E uunaia lea e ala i le alofa moni mo le Tama Faalelagi ma Lona Alo. … O lo tatou alolofa i le Faaola o le ki lea i le usiusitai faale-Faaola” (“Afai Tou Te Alofa Mai ia te Au, Ia Outou Tausi Mai i Au Poloaiga” 36-37).

  • Aisea e avea ai le alofa i le Tama Faalelagi ma Iesu Keriso “o le ki” i le usiusitai i poloaiga?

Faasino atu faapea o Iesu Keriso toetu na aoaoina sa Nifae e uiga i faamoemoega o le usiusitai i poloaiga. Fai i tamaiti aoga e faitau le leoa le 3 Nifae 12:19–20, 48 e iloa ai nei faamoemoega.

  • E tusa ai ma nei fuaiupu, o a mafuaaga na tau mai e le Faaola ua tuuina mai ai poloaiga ia i tatou? (E tatau ona faailoa mai e tamaiti aoga le mataupu faavae lenei: Ao tatou o mai ia Keriso ma tausia poloaiga, o le a avea atili i tatou faapei o Ia ma lo tatou Tama i le Lagi, ma o le a faaolaina i tatou.)

  • O a auala ua fesoasoani ai lou usiusitai ia te oe e sau ai i le Faaola?

Tuu atu i tamaiti aoga se taimi e mafaufau loloto ai i mea e mafai ona latou faia ia sili atu ai le usiusitai i poloaiga a le Tama Faalelagi ina ia mafai ona avea atili ai i latou faapei o Ia ma Lona Alo.

1 Nifae 3:4–7, 15–16;4:1–2; 7:12; 17:1–31; 18:1–4

Ua saunia e le Alii le fesoasoani ia i latou o e usiusitai

Valaaulia tamaiti aoga e mafaufau i se taimi na foliga faigata ai le tausia o se poloaiga faapitoa a le Atua ao faataunuuina se valaauga po o se tofiga faaleEkalesia na foliga mai o se luitau. Faamanatu i tamaiti aoga o Nifae ma ona uso na feagai ma puapuaga ma lamatia i le oti ina ua poloaiina e le Atua i latou e toe foi i Ierusalema e aumai papatusi apamemea. Fai i tamaiti aoga e faitau le 1 Nifae 3:4–7 ma faailoa mai se mataupu faavae na latou aoaoina mai le faataitaiga a Nifae lena e mafai ona faateleina ai lo latou lava mafaia ona usiusitai.

  • O le a le mataupu faavae e mafai ona tatou aoao mai i le tali a Nifae i le poloaiga faigata mai le Alii? (Tusi le mataupu faavae lenei i le laupapa ao iloaina e tamaiti aoga: Afai tatou te saili e fai mea ua poloaiina mai e le Alii, o le a Ia saunia se ala mo i tatou e faataunuu ai.)

Ina ia fesoasoani i tamaiti aoga e malamalama i lenei mataupu faavae, tusi mau fesootai nei i le laupapa ma tuu atu i tamaiti aoga se taimi e suesue i ai, ma vaavaai mo le ala na tali atu ai Nifae ina ua saili e faataunuu mea faigata na poloaiina ai o ia e fai: 1 Nifae 3:15–16; 4:1–2; 7:12. A uma ona faasoa mai e tamaiti aoga mea na latou mauaina, faamatala atu o Nifae na mulimuli ane faamatalaina nisi o auala na fesoasoani ai le Alii ia i latou e tausia Ana poloaiga. Fai i tamaiti aoga e faitau le 1 Nifae 17:1–4 ma faailoa mai auala na fesoasoani ai le Alii ia i tatou. Fai atu foi i tamaiti aoga e maka le fuaitau a Nifae “ma ua faapea ona tatou vaai,” lea e faaaogaina i le Tusi a Mamona atoa lava e saunia ai le tagata faitau e tuuina atu le manatu faapitoa i upu na e mulimuli mai.

A o faasoa mai e tamaiti a latou tali, tusi upu nei i le laupapa:

Faafailele

Faamalosia

Saunia mea e manaomia

Valaaulia tamaiti aoga e faaalu ni nai minute e vaai faavave ai i le tala i le 1 Nifae 17:5–31; 18:1–4, ma vaavaai mo faataitaiga pe na faapefea e le Alii ona fafagaina, faamalosia, po o le saunia mea e manaomia mo le aiga o Liae.

  • O a ni auala na faaali ai e le Alii lona alofa mutimutivale i le aiga o Liae? Na faapefea ona Ia saunia mea e manaomia e fesoasoani ai ia i latou?

  • O a faamanuiaga na tuuina atu e le Alii i le aiga o Liae e tutusa ma faamanuiaga tatou te manaomia i le aso?

  • O anafea na e aafia ai i le fesoasoani a le Alii i se tasi o nei auala ao e taumafai e usiusitai ia te Ia?

Faamanatu i tamaiti aoga e fesiligia e le Alii lo tatou usiusitai ina ia mafai ona Ia saunia mo i tatou ni faamanuiaga silisili mo a tatou taumafaiga ia avea faapei o Ia. Faasoa atu le saunoaga lenei a Peresitene Harold B. Lee (1899–1973):

Peresitene Harold B. Lee

“O le poloaiga e aupito sili ona taua a le Atua, o le poloaiga lena e tasi o loo faigata ia te oe ona tausia i le aso nei. … Ia faatoilaloina lena faafitauli ona amata lea i le isi tasi lena e pito sili ona faigata ia te oe le tausiaina. O le ala lena e faapaiaina ai oe e ala i le tausiga o poloaiga a le Atua” Aoaoga a Peresitene o le Ekalesia: Harold B. Lee [2000], 34).

Valaaulia tamaiti aoga e mafaufau e uiga i se poloaiga e faigata ia i latou ona usitai i ai. Uunaia i latou e faia se fuafuaga ia sili atu le usiusitai ina ia sili atu ai le atoatoa ona agavaa e maua le fesoasoani a le Alii.

Faitauga a Tamaiti Aoga