Lesona 6

O Le Tusi a Mamona na Tusia mo o Tatou Aso

Folasaga

O le Tusi a Mamona ma le talalelei toefuataiga a Iesu Keriso o se vaega “o se galuega ofoofogia ma le mea e ofo ai” na aumaia e le Atua i aso e gata ai (2 Nifae 25:17). Ona o le Tusi a Mamona e maua ai le atoatoa o le talalelei, na te faatinoina se matafaioi autu i le faatoilaloina o le liliuese ma aumaia agaga ia Keriso. O lenei lesona ua faamamafaina ai lenei faamaumauga paia na tusia e ni tusitala na vaai i o tatou aso.

Faitauga Faaopoopo

• Jeffrey R. Holland, “Saogalemu mo le Agaga,”Ensign po o le Liahona, Nov. 2009, 88–90.

• “Faalilofia le Lalolagi ma o Tatou Olaga i le Tusi a Mamona,”mataupu 10 i le Aoaoga a Peresitene o le Ekalesia: Ezra Taft Benson [2014], 137–45.

Fautuaga mo le Aoaoina Atu

2 Nifae 27:6, 29–30, 35; 3 Nifae 29:1–2; Mose 7:62; Iosefa Samita—Talafaasolopito 1:34

O le matafaioi a le Tusi a Mamona i aso e gata ai

Faamatala i tamaiti aoga faapea o le Tusi a Mamona o loo faamaumau ai valoaga faapea o le a i ai le amioleaga ma le liliuese i le lalolagi i aso e gata ai (tagai 2 Nifae 27:1, 4–5). O le Tusi a Mamona o loo faamaumau ai foi le vaifofo a le Alii mo nei faafitauli. Fai i se tamaitiiti aoga e faitau leotele le 2 Nifae 27:6, 29–30, 35 ao vaavaai le vasega mo le vaifofo a le Alii.

• E tusa ai ma nei fuaiupu, o le a le mea o le a fai e le Alii i aso e gata ai e tetee atu ai i le amioleaga ma le liliuese?

• O a auala ua saunia ai e le Tusi a Mamona se vaifofo i le amioleaga o aso e gata ai?

Tau atu i tamaiti aoga na faamaumauina e Mamona se valoaga e uiga i se matafaioi faaopoopo o le a faia e le Tusi a Mamona i aso e gata ai. Tuu atu i tamaiti aoga ni nai minute e suesue ai le 3 Nifae 29:1–2} ma vaavaai mo lena valoaga. E mafai ona e faasino atu faapea o le fuaitau “nei upu” e faatatau i le Tusi a Mamona.

• O le a le galuega taua o le a amata i le oo mai o le Tusi a Mamona? (O le faapotopotoina o Isaraelu.)

Faamatala atu na faamatalaina e Peresitene Ezra Taft Benson (1899–1994) le matafaioi autu o le Tusi a Mamona i le Toefuataiga o le talalelei ma le amataina o le galuega a le Alii i aso e gata ai. Valaaulia se tamaitiiti aoga e faitau leotele le faamatalaga lenei:

“[Sa lomia i ni nai aso a o lumanai le faatulagaina o le Ekalesia. Sa tuuina atu i le Au Paia le Tusi a Mamona e faitau a o lei tuuina atu ia i latou faaaliga sa otooto mai ai mataupu faavae maoae e pei o tikeri e tolu o le mamalu, faaipoipoga faaselesitila po o galuega mo e ua maliliu. Na muamua oo mai a o lei faatutuina korama o le perisitua ma le faalapotopotoga a le Ekalesia. Pe ua le tau mai ai ea la i lenei mea se mea e uiga i le finagalo o le Alii i lenei galuega paia?” (“O le Tusi a Mamona—O le Maaauau o la Tatou Tapuaiga,” Ensign, Oke. 2011, 4).

• Aisea i lou manatu na muamua ai le oo mai o le Tusi a Mamona nai lo isi lava mea taua na tutupu o le Toefuataiga ma e matuai totonugalemu lava i le galuega a le Alii o le faapotopotoina o Isaraelu ma le faatoilaloina o le amioleaga i aso e gata ai?

Ina ia fesoasoani e taliina lenei fesili, fai i se tamaitiiti aoga e faitau leotele le Iosefa Samita—Talafaasolopito 1:34. Valaaulia le vasega e vaavaai mo mea o loo maua i le Tusi a Mamona.

• O a mea o loo maua i le Tusi a Mamona? (Fesoasoani i tamaiti aoga e faailoa mai le upumoni lenei: Ua maua i le Tusi a Mamona le atoatoaga o le talalelei a Iesu Keriso.)

• O le a le uiga o le saunoaga a Moronae faapea o le Tusi a Mamona e maua ai “le atoatoaga o le Talalelei e faavavau”?

Ina ia fesoasoani e taliina lenei fesili, faaali atu le saunoaga lenei a Peresitene Ezra Taft Benson ma fai atu i se tamaitiiti aoga e faitau leotele:

“Ua fetalai mai le Alii lava Ia o loo i le Tusi a Mamona le ‘atoaga o le talalelei a Iesu Keriso’ (MF&F 20: 9). E le faapea la ua i ai aoaoga faavae ma mataupu faavae uma lava ua faaalia mai. Ae o lona uiga, o le Tusi a Mamona o le a tatou maua ai le atoatoa o na aoaoga faavae e manaomia mo lo tatou faaolataga. Ma o loo aoao mai i ni auala manino ma faigofie” Aoaoga a Peresitene o le Ekalesia: Ezra Taft Benson [2014], 147).

• O a nisi o “aoaoga faavae e manaomia mo lo tatou faaolataga” o loo maua i le Tusi a Mamona? (O nei aoaoga faavae e aofia ai le Togiola, faatuatua ia Iesu Keriso, salamo, papatisoga, ma le meaalofa o le Agaga Paia.)

Faamatala atu faapea na aoao mai le perofeta a le Alii o Enoka e uiga i le taua o le Tusi a Mamona i aso e gata ai. Valaaulia se tamaitiiti aoga e faitau leotele le Mose 7:62. (E mafai ona e tusia i le laupapa faapea “na [auina] i lalo mai le lagi le amiotonu” e faatatau i faaaliga na mafai ai ona i ai le Toefuataiga ma “[auina atu] le upumoni i fafo mai le laueleele” e faatatau i le Tusi a Mamona. Uunaia tamaiti aoga e tusi nei faamatalaga i le pito o a latou tusitusiga paia pe fatu se tusi puupuu ia latou tusitusiga paia faaeletonika.)

• E tusa ai ma lenei fuaiupu, o le a faapefea ona faaaoga le Tusi a Mamona i aso e gata ai? (Ina ia fesoasoani e faapotopotoina le au filifilia a le Atua i le Ekalesia mai itu e fa o le lalolagi.)

• O anafea na e vaaia ai le Tusi a Mamona o fesoasoani i se tasi ia liua i le talalelei ma auai i le Ekalesia a le Alii?

• O a nisi o auala e mafai ai ona tatou “tafi le lalolagi” i le amiotonu ma le savali o le Tusi a Mamona “e pei o se lolo”?

Valaaulia tamaiti aoga e tautino mai e fai se mea e “faalolovaia” ai o latou loto, o latou aiga, ma le lalolagi i le savali o le Tusi a Mamona i le vaiaso a sau.

3 Nifae 21:9-11

O le moni o le Tusi a Mamona e onosaia ai le fili

Fai i tamaiti aoga e mafaufau i se taimi na latou puipuia ai le Tusi a Mamona po o le savali o le Toefuataiga o le talalelei mai le fili.

Valaaulia se tamaitiiti aoga e faitau leotele le 3 Nifae 21:9-11. Ae lei amata ona faitau le tamaitiiti aoga, faamatala atu faapea na faailoa mai e Elder Jeffrey R. Holland o le Korama a Aposetolo e Toasefululua le “auauna” i nei fuaiupu o le Perofeta o Iosefa Samita (tagai Christ and the New Covenant [1997], 287–88).

• E faapefea e le Perofeta o Iosefa Samita ona fetaui i le faamatalaga i nei fuaiupu?

• E tusa ai ma nei fuaiupu, o le a le mea o le a faaali atu e le Faaola i tagata e tetee ia Iosefa Samita ma le Tusi a Mamona i aso e gata ai? (Fesoasoani i tamaiti aoga e faailoa mai le aoaoga faavae lenei: O le poto o le Atua e sili atu nai lo le atamai o le tiapolo.

• E faapefea ona fesoasoani le Tusi a Mamona e faaalia ai faapea o le “poto [o le Atua] e sili atu nai lo le atamai o le tiapolo”?

Faaali atu le saunoaga lenei a Elder Jeffrey R. Holland o le Korama a Aposetolo e Toasefululua:

“Ua [sili atu ma le 180] tausaga o suesuea pea lenei tusi ma osofaia, faafitia ma faavasega taitasitasi ona vaega, faasinosinomia ma faitioina atonu e le faapei o se isi lava tusi i le talafaasolopito faalelotu i ona po nei—atonu foi e leai lava se isi tusi i soo se talafaasolopito faalelotu. Ae o la lava e tumau. E lei manuia ni manatu na laga e uiga i lona faapogai ma toe mou atu. … E leai lava se tasi o nei tali e manino le vaivai e faatatau i lenei tusi, na tatalia le suega aua e leai lava se isi tali nai lo le tali na tuu atu e Iosefa, o ia o le faaliliutusi talavou e lei lava se aoaoga. O lenei mea, ma te tutu ai faatasi ma lou lava tamamatua, o le na fai mai se faaupuga faigofie, ‘E leai se tagata amioleaga e mafai ona tusia se tusi e pei o lenei, ma e leai foi se tagata lelei na te tusia, sei vagana ua moni ma ua poloaiina ai e le Atua e fai.” (“Saogalemu mo le Agaga,” Ensign po o le Liahona, Nov. 2009, 89).

• Aisea i lou manatu ua tele naua ai le faasagatau agai i le Tusi a Mamona?

• O a aafiaga ua aoaoina ai oe faapea o le Tusi a Mamona e mafai ona tatalia le faasagatau ua tuuina mai i ai?

• O le a lou lagona ma o a mea ua e aoaoina ao e aoaoina isi e uiga i le Tusi a Mamona po o le puipuia o lona moni?

Mamona 8:1-5, 26-35

O le Tusi a Mamona na tusia mo o tatou aso

Faamanatu i tamaiti aoga na molimauina e Moronae le faatafunaina o lona nuu. Fai i tamaiti aoga e faitau le Mamona 8:1-5 ma mafaufau i mea atonu na manaomia Moronae e fai e puipuia ai papatusi auro.

• Vaai faalemafaufau faapea o oe o Moronae. O a nisi o mafuaaga o le a e manao ai i isi e faitau lau faamaumauga?

Fai i tamaiti aoga e faitau le Mamona 8:26-35, ma vaavaai mo mea na vavalo mai ai Moronae e uiga i tulaga i le taimi o le a oo mai ai le Tusi a Mamona. E mafai ona e uunaia tamaiti aoga e maka mea ua latou maua.

• Na faapefea e Moronae ona faamatalaina le taimi o le a oo mai ai le Tusi a Mamona? (O le a avea o se aso o le liliuese ma le amioleaga.)

• O a ni faaiuga e mafai ona e faia e faalagolago i le fuaiupu 35? (E mafai ona e faasino atu faapea e faaopoopo atu ia Moronae, o isi perofeta e aofia ai Nifae, Iakopo, ma Mamona na faapea mai na latou tusitusi mo tupulaga i le lumanai. Mafaufau e tuu atu i tamaiti aoga e faafesootai le fuaiupu 35 ma le 2 Nifae 25:21–22 ma Mamona 7:1.)

• Aisea e taua ai le iloa faapea na silafia e Moronae ma isi tusitala o le Tusi a Mamona ia faafitauli o le a feagai ma i tatou i le aso? (Ao outou talanoaina lenei fesili, faamamafa atu le upumoni lenei: O aoaoga a le Tusi a Mamona e matuai taua ia i tatou aua o tusitala na silafia faafitauli o le a tatou feagai.)

Ina ia fesoasoani i tamaiti aoga ia malamalama i lenei upumoni, valaaulia se tamaitiiti aoga e faitau leotele le saunoaga lenei a Peresitene Ezra Taft Benson:

“O le Tusi a Mamona … na tusia mo o tatou aso. Sa le’i maua e sa Nifae le tusi; e faapena foi ia sa Lamana o aso anamua. Sa fuafuaina mo i tatou. Sa tusitusi Mamona e lata i le taufaaiuiuga o le malo o sa Nifae. E ala mai i musumusuga a le Atua, o lē e silafia mea uma mai lava i le amataga, sa ia faapupuuina ai talafaamaumau o seneturi e tele, filifilia tala, lauga, ma mea na tutupu o le a sili ona aoga ia i tatou.

“Ua molimau mai tusitala autu taitasi o le Tusi a Mamona na latou tusitusi mo tupulaga o le lumanai. … Afai na latou vaai i o tatou aso ma filifilia mea o le a sili ona taua mo i tatou, pe le o se pogai sili ea lena ona taua e tatau ai ona tatou suesue ma aoao i le Tusi a Mamona? E tatau ona le aunoa ona tatou fesili ifo ia i tatou lava, ‘Aisea na musuia ai Mamona (po o Moronae po o Alema) e le Alii ia faaaofia na mea i lana tusitusiga? O le a se lesona e mafai ona ou aoaoina mai lena mea e fesoasoani ai ia te au ou te ola ai i nei aso ma nei vaitau?’” (Aoaoga: Ezra Taft Benson, [2014], 140).

• E mafai faapefea e le manatuaina faapea o le Tusi a Mamona na tusia mo o tatou aso ona suia ai le ala tatou te faitauina ai?

Valaaulia tamaiti aoga e tuuina mai ni faataitaiga pe na faapefea ona tuuina atu e le Tusi a Mamona le taitaiga ia i latou, malosi, tali i fesili, po o vaifofo i faafitauli.

Faitauga a Tamaiti Aoga

• 2 Nifae 25:17–18; 3 Nifae 21:9–11; 29:1–4; Mamona 8:1–5, 26–35; Eteru 12:22–26; Mose 7:62; Iosefa Samita—Talafaasolopito 1:34.

• “Faalilofia le Lalolagi ma o Tatou Olaga i le Tusi a Mamona,”mataupu 10 i le Aoaoga a Peresitene o le Ekalesia: Ezra Taft Benson [2014], 137-45).