Lesona 26

Pe a Mavae le Tofotofoina o le Faatuatua

Folasaga

I lenei lesona, o le a aoao ai tamaiti aoga mai le Tusi a Mamona faapea o le faatuatua ia Iesu Keriso e mafai ai e le Atua ona faia vavega mo i tatou. O le faatinoina o le faatuatua e mafai foi ona saunia i tatou ia maua ni molimau faaleagaga o le upumoni.

Faitauga Faaopoopo

Robert D. Hales, “Saili ia Iloa le Atua, Lo Tatou Tama Faalelagi, ma Lona Alo, o Iesu Keriso,” Ensign po o le Liahona, Nov. 2009, 29–32.
David A. Bednar, “Ole Atu ma le Faatuatua,” Ensign po o le Liahona, Me 2008, 94–97.
Neil L. Andersen, “Ua Lava Mea Ua E Iloa,” Ensign po o le Liahona, Nov. 2008, 13–14.

Fautuaga mo le Aoaoina Atu

2 Nifae 27:23; 3 Nifae 17:5–9, 20–24; Mamona 9:9, 18–20

O Le Faatuatua e Muamua atu i Vavega

Fai i tamaiti aoga e tau mai ni nai faataitaiga faaletusi paia o le faia e le Atua o vavega mo Ana fanau e tusa ai ma lo latou faatuatua ia te Ia. (O faataitaiga e ono aofia ai le faamaloloina e Iesu o e mamai ma le faatuina o e oti, o Mose na vaeluaina le Sami Ulaula, ma Keriso na pai atu i maa e faamalamalama ai vaa o sa Iareto.)

O le a se mea e mafai ona e fai atu i se tagata e le talitonu faapea o loo faaauau pea e le Atua ona fai vavega i le aso?

Valaaulia se tasi o tamaitiiti aoga e faitau leotele le 2 Nifae 27:23 ma se isi tamaitiiti aoga e faitau leotele le Mamona 9:9, 18-20. Fai i le vasega e vaavaai pe aisea o loo tutupu ai pea vavega i le aso.

E tusa ai ma nei fuaiupu, aisea e mafai ai ona tatou mautinoa e tutupu vavega i le lalolagi i aso nei? (O tamaiti aoga e tatau ona faailoa mai le aoaoga faavae lenei: Ona o le Atua e tutusa ananafi, le aso, ma le faavavau, Na te faaauau pea ona faia vavega e tusa ai ma le faatuatua o Lana fanau.)
Aisea i lou manatu e manaomia ai e le Alii i tatou ina ia i ai le faatuatua ae Na te lei faia ni vavega?

Ina ia faaalia le fesootaiga faaletusi paia i le va o le faatuatua ma vavega, valaaulia ni nai tamaiti aoga e feauauai i le faitauina leotele mai le 3 Nifae 17:5–9. Fai i le vasega e vaavaai mo mea na faailoa mai e le Faaola toetu faapea ua lava ae lei faatinoina e Ia vavega mo tagata.

E tusa ai ma le fuaiupu 8, o le a le mea na faatagaina le Faaola e faamalolo ai e mamai ma puapuagatia?

Valaaulia se tamaitiiti aoga e faitau leotele le 3 Nifae 17:20-24.

O a isi mea paia na tutupu na aafia ai tagata ona o lo latou faatuatua?
E mafai faapefea e le naunautaiga a Keriso e saunia nei vavega ona faateleina lo tatou faatuatua faapea e mafai ona Ia faaaogaina le mana e fesoasoani ai ia i tatou i o tatou manaoga?

Valaaulia se tamaitiiti aoga e faitau leotele le saunoaga lenei a Sister Sydney S. Reynolds, le fesoasoani talu ai i le au peresitene aoao o le Peraimeri:

“E pei lava o le taua … ‘vavega tetele’ ia le taua o ‘vavega iti i tulaga taitasi’ ia e aoaoina i tatou ina ia i ai le faatuatua i le Alii. O ia vavega e oo mai ao tatou iloa ma faalogo ma usitai i uunaiga a le Agaga i o tatou olaga. …

“Ou te talitonu o i tatou uma lava e mafai ona molimauina nei vavega laiti. Tatou te iloa ni tamaiti na tatalo i ni mea na leiloloa ma toe mauaina. Tatou te iloa ni tagata talavou na maua le lototele e tutu atu ai o ni molimau a le Atua ma lagonaina Lona aao lagolago. Tatou te iloa ni uo na totogiina sefuluai i ni tupe mulimuli lava, ma e ala i se vavega, na mafai e i latou lava ona totogiina o latou pili o le aoga, po o o latou pili o fale mautotogi, pe na mafai foi ona maua meaai mo o latou aiga. E mafai ona tatou fetufaai mea na tutupu i tatalo na taliina ma faamanuiaga o le perisitua na tuuina atu le lototele, aumaia le faamafanafanaga, po o le toefuataiina o le malosi. O nei vavega i aso taitasi o loo fesoasoani ia i tatou ina ia iloa ai le aao o le Alii i o tatou olaga” (“O se Atua o Vavega,” Liahona, Iulai 2001, 12).

Fai i tamaiti aoga e mafaufau i ni taimi na latou aafia ai po o se tasi latou te iloa ini vavega a le Atua i o latou olaga. Afai e le paia pe patino tele, valaaulia tamaiti aoga e faasoa mai ni aafiaga na latou oo i ai na faamaonia ai ia i latou o le Atua o loo avea pea ma se Atua o vavega.

Eteru 3:6–13, 17–20; 4:13–15; 12:6–7, 12, 19, 31

E saunia e le faatuatua i tatou e maua ni molimau faaleagaga

Valaaulia tamaiti aoga e mafaufau i se upumoni o le talalelei latou te mananao e maua ai se molimau faaleagaga po o se molimau e malosi atu. Faamatala atu o nisi tagata e filifili e le talitonu pe ola e tusa ma se mataupu faavae o le talalelei seia latou vaai i se faamautinoaga e moni lena mea.

Valaaulia tamaiti aoga e faitau le leoa le Eteru 12:6, ma vaavaai mo mea ua aoao mai e lenei fuaiupu e uiga i le faagasologa o le mauaina o se molimau faaleagaga.

O le a le mataupu faavae e mafai ona tatou aoao mai le Eteru 12:6 e uiga i le mauaina o se molimau faaleagaga? (E tatau ona faailoa mai e tamaiti aoga le mataupu faavae lenei: Ae tatou te lei mafai ona maua se molimau faaleagaga, e tatau ona tatou faatino muamua le faatuatua ia Iesu Keriso.)
O le a sou manatu i le uiga o le fuaitau “tofotofoina lou faatuatua”?

Faamatala atu o le tofotofoina o le faatuatua e le faapea o taimi uma e aafia ai i ni faigata. Faaali atu ma fai i se tamaitiiti aoga e faitau leotele saunoaga nei e uiga i le fautuaga a Moronae i le Eteru 12:6 a Elder Richard G. Scott o le Korama a Aposetolo e Toasefululua ma Sister Bonnie L. Oscarson, le peresitene aoao o Tamaitai Talavou:

“E mafai ona e aoao ia sili atu le faaaogaina o le faatuatua i le faaaogaina o lenei mataupu faavae na aoao mai e Moronae: ‘… Aua e le maua e outou se mau, seia uma le (Eteru 12:6). tofotofoina o lo outou faatuatua ’ [Eteru 12:6; faaopoopo le faamamafa]. O le mea lea, soo se taimi lava e te faataitaia ai lou faatuatua, o le galue lena ma le agavaa i se musumusuga, o le a e maua ai se molimau faamaonia a le Agaga” (Richard G. Scott, “O le Mana Fesoasoani o le Faatuatua i Taimi o le Le Mautonu ma Tofotofoga,” Ensign po o le Liahona, Me 2003, 76).

“I se lalolagi lea e avea le vave faamalieina ma ona faamoemoega, ua tele lava ina tausalaina soo i tatou i le faamoemoe i se taui e aunoa ma le galue mo lena mea. Ou te talitonu o loo tau mai e Moronae ia i tatou e tatau ona tatou faia muamua le galuega ma faatino le faatuatua e ala i le ola ai i le talalelei, ona tatou maua lea o le molimau i le moni o lena mea. E tupu le liua moni ao faaauau pea ona outou galulue i aoaoga faavae tou te iloa e moni ma tausi poloaiga, i lea aso ma lea aso, i lea masina ma lea masina” (Bonnie L. Oscarson, “Ia Outou Liua,” Ensign po o le Liahona, Nov. 2013, 77).

E faapefea e le manatu o le mauaina o se molimau o le upumoni ua faamatalaina e Elder Scott ma Sister Oscarson ona ese mai le manatu o i latou e mananao i faamautinoaga a o lei talitonu pe faatino?
E faapefea ona e iloa e moni lenei mea?

Valaaulia ni nai tamaiti aoga e feauauai i le faitauina leotele mai o le Eteru 12:7, 12, 19, ma le 31. Uunaia le vasega e matauina fuaitau “seia mavae ona latou faatuatua” ma “uma ona i ai muamua ia te i latou le faatuatua” i nei fuaiupu (atonu e te manao e fautuaina tamaiti aoga e maka nei fuaitau ia latou tusitusiga paia).

E tusa ai ma nei fuaiupu, o a faamanuiaga na saunia e le Alii mo nei tagata ina ua uma ona latou faaaogaina lo latou faatuatua? O a ituaiga o molimau faaleagaga o le upumoni ua e maua o se taunuuga o lou faatuatua?

Molimau atu faapea e pei lava o vavega, o molimau faaleagaga e le oo mai seia uma ona tatou faatinoina le faatuatua. Ina ia faamamafaina lenei manatu, mafaufau e faasoa atu le saunoga lenei a Peresitene Boyd K. Packer (1924–2015) o le Korama a Aposetolo e Toasefululua:

“E i ai se vaega o lau sailiga mo le malamalama faaleagaga, o loo i ai lena “laasaga tele o le faatuatua,” e pei ona ta’ua ai e le au fai tofamanino. O le taimi lea e te oo atu ai i le faatausiusiuga o le malamalama ma laa atu i le pogisa ma e iloa ai o loo malamalama foi le ala i luma atu mo na o se laa se tasi pe lua foi” (“O Le Sailiga mo le Malamalama Faaleagaga,” Liahona, Ian. 2007, 6).

Valaaulia se tamaitiiti aoga e faamatala mai luitau na feagai ma le uso o Iareto ao ia fausia vaa na aveina atu ai lona aiga i le laueleele folafolaina ma aotele mai mea na ia faia e foia ai na luitau (tagai Eteru 2:16–25; 3:1–5).

Na faapefea e le uso o Iareto ona faaaoga le faatuatua ia Iesu Keriso?

Valaaulia ni nai tamaiti aoga e feauauai i le faitauina leotele o le Eteru 3:6–13, 17–20.

Na faapefea e le Alii ona faamanuia le uso o Iareto mo lona faatuatua?

Fai atu i se tamaitiiti aoga e faitau leotele le saunoaga lenei a Elder Jeffrey R. Holland o le Korama a Aposetolo e Toasefululua: Valaaulia le vasega e vaavaai mo uiga o le faatuatua o le uso o Iareto:

“O le faatuatua luitauina, o le faatuatua e mafuli ai mauga, e pei o lena faatuatua a le uso o Iareto, e muamua i le vavega ma le atamai. E tatau ona ia talitonu ao lei fetalai mai le Atua. E tatau ona ia galue ao lei manino mai le tomai e faamaea ai lena galuega. E tatau ona ia muai tautino atu i le aafiaga atoa e oo lava i le vaega muamua o lona iloaina. O le faatuatua o le ioeina ma le atoatoa—i luma mai—i soo se tulaga atonu e moomia ai e le Atua i taimi uma e lua, i le [taimi] lata mai ma le mamao o le lumanai.(Christ and the New Covenant: The Messianic Message of the Book of Mormon [1997], 18–19).

E mafai faapefea ona e aoteleina le faamatalaga a Elder Holland o le faatuatua o le uso o Iareto?
O a nisi o faataitaiga o faatinoga e mafai ona tatou faia e faailoa ai lo tatou faatuatua i le Alii?

Tuu atu i tamaiti aoga se taimi e suesue ai le Eteru 4:13–15 ma faailoa mai le mea na fai mai Moronae e tatau ona tatou faia e maua ai le malamalama ma faaaliga mai le Agaga.

O le a lou manatu i le uiga o le “saeia [le] veli o le le talitonu”? E faapefea e le faia o lenei mea ona fesootai i le faagasologa o le faaaogaina o le faatuatua? (E mafai ona fesoasoani le faamatala atu o le saeia i ona uiga i le sasae po o le vaelua ma o le veli e faatatau i se mea e ufitia ai pe nanaina.)
O le a le fautuaga a Moronae ia i tatou i le mea e fai ina ia “saeia lena veli o le le talitonu”?

Faaali atu le saunoaga lenei a le Perofeta o Iosefa Samita (1805–44), ma fai i se tamaitiiti e faitau leotele.

“O le Atua e na te le faaalia se mea ia Iosefa, ae o mea o le a Ia faailoa atu i le Toasefululua, ma e oo lava i se aupito itiiti o le Au Paia e mafai ona ia iloa mea uma i le vave e na te mafai ai ona talia ia mea, aua o le a oo mai le aso e le manaomia ai e se tasi le faapea atu i lona tuaoi, ia outou iloa le Alii aua e iloa au e i latou uma … e mai le itiiti e oo i le sili [tagai Ieremia 31:34]” (Aoaoga a Peresitene o le Ekalesia: Iosefa Samita [2007], 268).

E faapefea e lenei saunoaga a le Perofeta o Iosefa Samita ona fesoasoani ia te oe ia malamalama ai i lou malosiaga e maua ai faaaliga?

Luitauina tamaiti aoga e mafaufau loloto po o a tofotofoga o le faatuatua o loo latou feagai nei, ma valaaulia i latou e mafaufau i mea e mafai ona latou faia e faamalosia ai ma faaaoga lo latou faatuatua. Faasoa atu lau molimau faapea e tuuina atu e le Atua i Ona soo faatuatua molimau faifai pea o le upumoni ao latou faaaogaina le faatuatua.

Faitauga a Tamaiti Aoga

2 Nifae 27:23; 3 Nifae 17:5–9, 20–24; Mamona 9:9, 18–20; Eteru 3:6–13, 17–20; 4:13–15; 12:6–7, 12, 19, 31.
David A. Bednar, “Ole Atu Ma le Faatuatua,” Ensign po o le Liahona, Me 2008, 94–97.