Lesona 20

Faamalosia o lo Tatou Faatuatua ma le Molimau

Folasaga

O le faatuatua ia Iesu Keriso ma Lana talalelei e aumaia le malosi ma le puipuiga faaleagaga i fanau a le Atua. Ua faaalia e le Tusi a Mamona uiga ma amioga na e mafai ona taitaiina tagata i le faaitiitia o le le talitonu. Na lapatai mai perofeta o le Tusi a Mamona i nei amioga ma uiga ma aoao mai mataupu faavae o le talalelei o le a faamautuina ma faamalosia ai lo tatou faatuatua ma le molimau.

Faitauga Faaopoopo

Neil L. Andersen, “Asiosio Faaleagaga,” Ensign po o le Liahona, Me 2014, 18–21.
L. Whitney Clayton, “Filifili e Talitonu,” Ensign po o le Liahona, Me 2015, 36-39.
Larry S. Kacher, “Aua le Faatauvaaina Mea Paia,” Ensign po o le Liahona, Nov. 2014, 104–6.

Fautuaga mo le Aoaoina Atu

2 Nifae 1:10–11; 9:28; Mosaea 2:36–37; 26:1–4; Alema 12:9–11; 31:8–11; 46:7–8; Helamana 4:11–13; 13:24–26; Mamona 9:7–8

O uiga ma amioga na e mafai ona faavaivaia le faatuatua ma le molimau

Faaali atu le fesili lenei ma valaaulia tamaiti aoga e tali faapuupuu mai:

E faapefea ona mafai mo i latou na aafia i faamanuiaga o le talalelei ona leai so latou faatuatua ma se molimau?

Faamanatu i tamaiti aoga na lapatai mai le perofeta o Liae faapea o ana fanau o le a i ai se aso e leai ai se faatuatua ia Iesu Keriso ma Lana talalelei. Valaaulia se tamaitiiti aoga e faitau leotele le 2 Nifae 1:10–11, ma fai i tamaiti aoga e vaavaai mo le taunuuga na iu i ai le le talitonu o le fanau a Liae. (Atonu e fesoasoani le faamatala atu o le fuaitau “faaitiitia i le le talitonu” o lona uiga o le faavaivaia faaleagaga ona o le le talitonu.)

O le a le taunuuga o le le talitonu na iu i ai tupuaga o Liae?

Faasino atu e ui i le tele o mea moni e taitai atu i le faatafunaga o le nuu o sa Nifae, o le mafuaaga autu lava o le pau o sa Nifae o lo latou le maua lea o le faatuatua ia Iesu Keriso ma Lana talalelei. Mo lenei mafuaaga, o tusitala o le Tusi a Mamona na lapatai soo mai lava i amioga ma uiga na e faavaivaia le faatuatua i le Alii ma na faaauau ona aoao mai pe faapfea ona fausia ma faamalosia le molimau.

Fai i tamaiti aoga e faitau leotele le Mosaea 26:1-4, ma uunaia le vasega e vaavaai mo uiga ma amioga na e faavaivaia le faatuatua o nisi o tagata i le taimi o le Tupu o Mosaea.

Valaaulia tamaiti aoga e faailoa mai se mataupu faavae na aoao mai i nei fuaiupu e uiga i le mea e tupu i tagata e filifili e le talitonu ma usitai i le upumoni. I totonu o mataupu faavae e ono faailoa mai e tamaiti aoga, e i ai nei: Pe a filifili tagata e le talitonu ma usitai i upumoni ua aoaoina ai i latou, o o latou loto e faamaaaina ma latou le mafai ai ona olioli i faamanuiaga o le faatuatua ma le molimau.

Pe a filifili tagata e le talitonu ma usitai i upumoni ua aoaoina ai i latou, aisea i lou manatu e faamaaaina ai o latou loto i le Agaga?

Ina ia fesoasoani i tamaiti aoga e faailoa mai nisi uiga ma amioga na e mafai ona taitai atu i le leai o se faatuatua ma le molimau, tusi fuaitau o mau nei i le laupapa. Tofi tamaiti aoga taitasi e faitau se tasi po o le lua o fuaitau, ma ia mautinoa o fuaitau taitasi ua atofaina. Fai i tamaiti aoga e suesue a latou fuaitau atofaina mo uiga ma amioga na e mafai ona taitaiina tagata i le leai o se faatuatua ma le molimau.

A maea se taimi talafeagai, fai i tamaiti aoga e faasoa mai uiga ma amioga ua latou faailoaina ma faamatala mai pe faapefea ona mafai e nei uiga ona faavaivaia le faatuatua ma le molimau. Aotele tali a tamaiti aoga i le laupapa i talaane o fuaitau e fesootai.

O fea o nei uiga po o amioga e te manatu e sili ona matautia mo tagata talavou matutua o le Ekalesia i le aso? Aisea?

Fai i tamaiti aoga e filifili se uiga po o se amioga ua lisiina i le laupapa ma faamatala mai mea e mafai ona tatou faia e puipuia ai mai na uiga po o amioga.

Tuu atu i tamaiti aoga se taimi e mafaufau loloto ai po o a uiga po o amioga na faamatauina ai lo latou lava faatuatua ma le molimau ma po o mea e mafai ona latou faia e faamalosia ai i latou lava.

2 Nifae 28:21–23; Mamona 5:16–18

O taunuuga o le le mauaina o le faatuatua ma le molimau

Faamanatu i tamaiti aoga ao taitai e Mamona le autau a sa Nifae, na i ai se taimi na ia iloaina ai le tulaga amioleaga ma le leai o se faamoemoe o lona nuu. Fai i tamaiti aoga e suesue le Mamona 5:16-18, ma vaavaai mo le faamatalaina e Mamona o le tulaga faaleagaga o lona nuu.

O le a sou manatu i le uiga o le ola “e aunoa ma Keriso ma le Atua i le lalolagi”?
O a mataupu faavae e mafai ona tatou aoao mai upu a Mamona e uiga ia i latou ua leai se faatuatua i le Alii ma mumusu e salamo? (E ui atonu latou te faaaogaina ni upu eseese, e tatau i tamaiti aoga ona faailoa mai le mataupu faavae lenei: Afai tatou te faatagaina i tatou lava e le maua le faatuatua ma tatou mumusu e salamo, o le a aluese le Agaga mai ia i tatou ma o le a tatou le maua le taitaiga a le Alii.
E tusa ai ma le fuaiupu 18, o le a le mea na lapatai mai Mamona o le taunuuga o le le mauaina o le taitaiga a le Alii?

Faamatala atu na aoao mai Nifae o le faagasologa o le le mauaina o le Agaga ma le taitaiina faatagata o taua e le tiapolo e masani ona lemu ma faifaimalie. Valaaulia ni nai tamaiti aoga e feauauai i le faitauina leotele mai o le 2 Nifae 28:21-23, ma fai i le vasega e faailoa mai upu ma fuaitau e faamatalaina ai lenei vaivai faifai malie faaleagaga.

O a uiga na faailoa mai e Nifae e mafai ona taitai ai se tagata i le vaivai faaleagaga?
Aisea i lou manatu e faapitoa ai le matautia o nei uiga i lo tatou faatuatua?

Valaaulia se tamaitiiti aoga e faitau leotele le tala lenei a Peresitene Henry B. Eyring o le Au Peresitene Sili:

“E pei lava ona tuuina mai ia i tatou le upumoni o lea fuaitau i lea fuaitau ma mumu lemu ai le malamalama ao tatou usiusitai, e faapea lava, ao tatou le usiusitai, o le a faaitiitia la tatou molimau o le upumoni e toeitiiti lava a tatou le iloaina, mai lea vaega itiiti i lea vaega itiiti, ma o le pogisa e faaifo malie lava lena e faigofie ai e e faamaualuluga ona teena soo se mea ua suia.

“Ua ou faalogo i le faamaualuga o se alii na savali ese lemu lava mai le Ekalesia. Na muamua lava ona ia le toe faiaoga i lana vasega o le Aoga Sa, ona ia le toe sau ai lea i le Ekalesia, ona galo ai lea ia te ia ona totogi lana sefuluai mai i lea taimi i lea taimi. … Na te lei lagonaina le eseesega, ae na ou lagonaina. O le malamalama i ona mata ma e oo lava i le susulu i ona foliga ua faaitiitia. Na te lei iloaina, ona o taunuuga o le le usiusitai i le Atua e foliga mai o le fatuina o se vaigase faaleagaga ua lava e taofia ai soo se lagona ao momotuina noataga ma le Atua. E le gata na amata ona mou lemu atu le molimau o le upumoni, ae e oo lava i manatuaga pe faapei le i ai i le malamalama na amata ona foliga mai ia te ia o se mea valea” (“A Life Founded in Light and Truth” [Faigalotu a le Brigham Young University, Aok. 15, 2000], 3, speeches.byu.edu).

O le a sou manatu o a nisi o faailoga o se tagata ua amata ona leai sona faatuatua ma le molimau?

1 Nifae 15:7–11; 2 Nifae 25:28–29; Mosaea 4:11–12; 15:11; Helamana 15:7–8

Faamalosia o le Faatuatua ma le Molimau

Faaali atu ma valaaulia se tamaitiiti e faitau le saunoaga lenei a Elder Neil L. Andersen o le Korama a Aposetolo e Toasefululua.

“I le natura, o laau e ola a’e i se siosiomaga matagiā e malolosi atu. Pe a agi se matagi i autafa o se laau mu’a, o malosiaga i totonu o le laau na te faia ni mea se lua. Muamua, latou te faatupuina ia a’a ina ia tutupu vave ma sosolo mamao atu. Lona lua, e amata fatu e malosiaga i totonu o le laau ni sela ia e faamafiafiaina le ogalaau ma lala ma atili lavātia ai le malosi o le matagi. O nei aa ma lala malolosi atu e puipuia le laau mai matagi ia e mautinoa lava e toe foi atu.

E manino lava e sili atu lou taua i le Atua nai lo o se laau. O oe o Lona atalii po o Lona afafine. Na Ia foafoaina lou agaga ia malosi ma mafai ona tetee atu i asiosio o le olaga. O asiosio o lou talavou, e pei o le matagi e taia ai se laau mu’a, e mafai ona faateleina ai lou malosi faaleagaga, e saunia ai oe mo tausaga o i luma atu” (“Asiosio Faaleagaga,” Ensign po o le Liahona, Me 2014, 18).

O le a se mea e mafai ona tatou faia e maua ai le malosi faaleagaga ma onosaia luitau i lo tatou faatuatua ma le molimau?

Faamanatu i tamaiti aoga o le Tusi a Mamona o loo i ai mataupu faavae o le talalelei na e mafai ona taitaia tagata o e saili ia maua le faatuatua ma se molimau e sili atu le malosi.

Fai i se tamaitiiti aoga e faitau leotele le 2 Nifae 25:28–29, ma faamatala atu o nei fuaiupu ua aoteleina ai se lauga maoae a Nifae i lona nuu i le pe faapefea ona faaolaina. Fai i tagata o le vasega e vaavaai mo mea na aoao mai Nifae o le filifiliga e sili le taua o le a tatou faia i o tatou olaga.

O le a le mea na aoao atu e Nifae o le filifiliga e sili le taua o le a tatou faia i o tatou olaga? (Fesoasoani i tamaiti aoga ia malamalama i le mataupu faavae lenei: Afai tatou te filifili e talitonu ia Iesu Keriso ma tapuai ia te Ia ma o tatou manatu, mafaufau, ma le malosi atoa, ona mafai lea ona tatou tumau i le malosi faaleagaga ma o le a le tuliina i fafo.)

Faaali atu le saunoaga lenei a Elder L. Whitney Clayton o le Fitugafulu ma fai i se tamaitiiti aoga e faitau:

“Ua uunaia i tatou e perofeta i augatupulaga uma ma aioi mai ia i tatou ia talitonu ia Keriso. … O le faaiuga e talitonu, o le filifiliga aupito taua lea e mafai ona tatou faia. E mamanuina ai isi a tatou faaiuga uma tatou te faia. …

“O le talitonu ma le molimau ma le faatuatua e le o ni mataupu faavae na ona tau ane ai. E le o se mea e tupu fua ia i tatou. O le talitonu o se mea tatou te filifilia—tatou te faamoemoe i ai, tatou te galulue ia maua, ma e tatou te ositaulaga foi ia maua. O le a le faafuasei lava ona tatou talitonu i le Faaola ma Lana talalelei nai lo le faafuasei ona tatou tatalo pe totogi le sefuluai. Tatou te filifili ma le manino e talitonu, faapei lava ona tatou filifili e tausi isi poloaiga” (“Filifili e Talitonu,” Ensign po o le Liahona, Me 2015, 38).

O le a sou manatu i le uiga o le “o le talitonu ma le molimau ma le faatuatua e le o ni mataupu faavae na ona tau ane ai”?
Aisea i lou manatu e avea ai le tauivi e ola i mataupu faavae o le talalelei ma auala sili e faamalolosia ai lo tatou faatuatua ma le molimau?

Ina ia fesoasoani i tamaiti aoga e iloa nisi o auala e mafai ona tatou faia ai ni taumafaiga e faamalolosia ai lo tatou faatuatua ma le molimau, tusi fuaitau nei i le laupapa ma fai i tamaiti aoga taitoatasi e faitau le leoa ia le itiiti ifo ma le tasi. Valaaulia i latou e vaavaai mo mataupu faavae na e mafai ona fesoasoani ia i tatou e faamalolosia ai lo tatou faatuatua ia Iesu Keriso ma Lana talalelei.

Valaaulia tamaiti aoga e faasoa mai mea na latou matauina i nei fuaitau o mau. E mafai ona e valaaulia tamaiti aoga e fai se molimau pe na faapefea ona latou faaaogaina nei mataupu faavae po o nisi foi i o latou olaga ma faamanuiaina ai i le faateleina o le faatuatua ia Iesu Keriso ma Lana talalelei. Uunaia tamaiti aoga e fai ni taumafaiga e manaomia e faamalosia ai lo latou faatuatua i le Alii.

Faitauga a Tamaiti Aoga

1 Nifae 15:7–11; 2 Nifae 1:10–11; 9:28; 25:28–29; 28:21–23; Mosaea 2:36–37; 4:11–12; 15:11; 26:1–4; Alema 12:9–11; Alema 31:8–11; 46:7–8; Helamana 4:11–13; 13:24–26; 15:7–8; Mamona 5:16–18; 9:7–8.
L. Whitney Clayton, “Filifili e Talitonu,” Ensign po o le Liahona, Me 2015, 36–39.