Seminare ma Inisitituti
Lesona 27: Faatuatua, Faamoemoe, ma le Alofa Mama

Lesona 27

Faatuatua, Faamoemoe, ma le Alofa Mama

Folasaga

O uiga o le faatuatua, faamoemoe, ma le alofa mama e manaomia mo i latou uma e faamoemoe e nonofo i le afioaga o lo tatou Tama oi le Lagi. O nei uiga o ni meaalofa mai le Atua na e oo mai ia i latou o e saili i ai e ala i le mulimuli i le faataitaiga a Iesu Keriso.

Faitauga Faaopoopo

Fautuaga mo le Aoaoina Atu

Eteru 12:28; Moronae 10:18–21

Faatuatua, faamoemoe ma le alofa mama e manaomia mo le faaolataga

Fai i tamaiti aoga e faaigoa faavave mai uiga latou te manatu e taua ona latou mauaina i le olaga faitino. Ona fai atu lea ia i latou e faailoa mai po o fea o na uiga latou te manatu e sili le taua ina ia mautofi ai i le malo o le Atua.

Faamanatu i tamaiti aoga ao faaiu e Moronae lana galuega i papatusi auro, na ia tusia nisi o upu apoapoai mulimuli ia i latou o le a i ai se aso e faitau ai i faamaumauga. O se vaega o lana fautuaga na ia faamamafaina ai uiga e tolu na e manaomia i lo tatou faaolataga. Valaaulia se tamaitiiti aoga e faitau leotele le Moronae 10:18–21, ma fai i le vasega e faailoa mai nei uiga e tolu.

  • Aisea i lou manatu e matuai taua ai uiga o le faatuatua, faamoemoe, ma le alofa mama i lo tatou faaolataga?

Ina ia fesoasoani i tamaiti aoga e taliina lenei fesili, valaaulia se tamaitiiti aoga e faitau leotele le Eteru 12:28, ma fai i le vasega e faailoa mai le aoaoga faavae o loo aoaoina i lenei fuaiupu.

  • O le a le aoaoga faavae o loo aoaoina i lenei fuaiupu? (O tamaiti aoga e tatau ona faailoa mai le mea lenei: O le atiina ae o le faatuatua, faamoemoe, ma le alofa mama e aumaia i tatou ia Iesu Keriso.

Valaaulia tamaiti aoga e vaavaai mo mataupu ma aoaoga faavae i lenei lesona atoa e mafai ona fesoasoani ia i latou ia sili atu ai le atoatoa o le malamalama ma le atiina ae o nei uiga taua.

Alema 32:26–29, 37–41; Moronae 7:21, 25–28, 33

O le faatuatua e faatagaina i tatou e “taofi mau i mea lelei uma”

Tusi Faateleina Lo Tatou Faatuatua ia Iesu Keriso i le laupapa.

Faamanatu i tamaiti aoga o le perofeta o Alema na faaaogaina se faataoto i se fatu ua tupu e aoao ai sa Sorama pe faapefea ona atiina ae le faatuatua ia Iesu Keriso. Valaaulia ni nai tamaiti aoga e feauauai i le faitauina leotele o le Alema 32:26-29. Uunaia tamaiti aoga e faailoa mai ai fuaitau na e faamatalaina mea e mafai ona tatou faia e faateleina ai lo tatou faatuatua.

Valaaulia ni nai tamaiti aoga e faasoa mai se fuaitau na latou faailoaina ma faamatala mai le fuaitau ua aoaoina pe faapefea ona tatou faateleina lo tatou faatuatua. Ao faailoa mai e tamaiti aoga fuaitau, atonu e te manao e tusi i lalo o le ulutala i le laupapa. O fuaitau e mafai ona aofia ai mea nei: ala mai ma fafagu o outou mafaufau; tuu ane o se avanoa mo se vaega o au upu; manao e talitonu; tuu ane se avanoa, e mafai ona toto ai o se fatu [le upu] i lou loto. Afai e manaomia, fesoasoani i tamaiti aoga ia malamalama o le upu mafaufau e faatatau i lo tatou mafaia ona mafaufau ma faatino.

  • I le fuaiupu 29, aisea i lou manatu na aoao ai e Alema faapea o lo tatou faatuatua o le a le atoatoa ai pe a uma ona faia o lenei faataitaiga?

  • O a nisi mea e te manatu e manaomia e faaatoatoa ai lo tatou faatuatua?

Valaaulia ni nai tamaiti aoga e feauauai i le faitauina mai le Alema 32:37-41, ma fai i le vasega e vaavaai mo mea e tatau ona tatou faia e atiina ae ai le faatuatua e manaomia e maua ai le ola e faavavau.

  • O le a le mataupu faavae na aoao e Alema i nei fuaiupu pe faapefea ona tatou mafai ona faaauau ona faamalosia lo tatou faatuatua? (E tatau ona faailoa mai e tamaiti aoga le mataupu faavae lenei: Afai tatou te tausia ma le filiga le afioga a le Atua i o tatou loto, o le a tupu lo tatou faatuatua ia Iesu Keriso. Tusi lenei upumoni i luga o le laupapa.)

  • O le a sou manatu i le uiga o le tausiga ma le maelega o le afioga? O a nisi o faatinoga faifai pea e mafai ona tatou faia e fafagaina ai le upu a le Atua ma fesoasoani e faatupuina le loloto o le faatuatua i o tatou loto?

Ina ia fesoasoani i tamaiti aoga e malamalama pe faapefea ona tausia le afioga a le Atua, faaali atu le saunoaga lenei a Peresitene Henry B. Eyring o le Au Peresitene Sili, ma valaaulia se tamaitiiti e faitau leotele ao vaavaai le vasega mo ki i le tausia o lo tatou faatuatua:

Peresitene Henry B. Eyring

“E tusa lava pe o le a le tele o lo tatou faatuatua i le taimi nei e usitai ai i le Atua, e manaomia pea ona tatou faamalosia atili ma faafouina pea e le aunoa. E mafai ona tatou faia lena mea e ala i le filifili nei ia tali vave atu e usitai ma naunau atili e tumau. O le aoao ina ia vave amata ma ia tutumau ai, o ki ia i sauniuniga faaleagaga. …

“… O aluga o taimi, faapea ma a tatou filifiliga i aso taitasi, [tatou] te atiina ae ai le faatuatua tatou te manumalo ai i tofotofoga o le usiusitai. E tatau ona tatou filifili e vave faataunuu soo se mea e finagalo ai le Atua ia i tatou. Ma e tatau ona tatou filifili e tutumau i tofotofoga laiti o le usiusitai, lea e atiina ae ai le faatuatua tatou te manumalo ai i tofotofoga sili atu, ia o le a faapea lava ona oo mai” “Sauniuniga Faaleagaga: Ia Vave Amata ma Ia Tumau Ai,” Ensignpo o le Liahona, Nov. 2005, 38, 40).

  • O le a le saunoaga a Peresitene Eyring i mea e tatau ona tatou faia e faamalosia ma tausia ai lo tatou faatuatua?

  • Aisea i lou manatu e matuai taua ai le usiusitai tumau ma i aso uma i le afioga a le Atua i le fausia o lo tatou faatuatua ma le talitonu ia te Ia?

Valaaulia ni nai tamaiti aoga e faasoa mai pe faapefea e le mulimuli i mataupu faavae na aoao mai e Alema ona aafia ai lo latou faatuatua ia Iesu Keriso.

Tau i tamaiti aoga na molimau mai le perofeta o Mamona i le taua e faavavau o le faatuatua ia Iesu Keriso. Valaaulia ni nai tamaiti aoga e feauauai i le faitauina leotele mai le molimau a Mamona i le Moronae 7:21, 25–28, 33 ao mafaufau loloto le vasega i mea e mafai ona latou faia e faateleina ai lo latou faatuatua i le Alii ma “taofi mau” i faamanuiaga ua faailoa mai e Mamona.

Eteru 12:4, 8–9; Moronae 7:40–42

O le faamoemoe o se taula i le agaga

Valaaulia se tamaitiiti aoga e faitau leotele leEteru 12:8-9 ma se isi e faitau leotele le Moronae 7:40–42. Fai i tamaiti aoga e faailoa mai le uiga e mafai ona tatou maua ao tatou atiina ae le faatuatua.

  • E tusa ai ma nei fuaitau, o a uiga e oo mai ona o le faatuatua?

Faitau fuaitau nei e lua, ma fai i tamaiti aoga e faailoa mai lo la eseesega: (1) Ou te faamoemoe e le timu le aso. (2) Ou te faamoemoe afai ou te salamo, o le a faamagaloina au e ala i le Togiola a Iesu Keriso.

  • E faapefea ona eseese nei lagona o faamoemoega? (O le muamua o se faamoemoega e le mautinoa mo se mea e le oo i ai le malosi o se tasi, ae o le lona lua o se lagona o le mautinoa lena e uunaia le faatinoga.)

Ina ia fesoasoani i tamaiti aoga ia malamalama i le uiga faaletusi paia o le faamoemoe, valaaulia se tamaitiiti aoga e faitau leotele le saunoaga lenei a Peresitene Dieter F. Uchtdorf o le Au Peresitene Sili:

Peresitene Dieter F. Uchtdorf

“O le faamoemoe o … le faatuatua tumau o le a faataunuuina e le Alii Ana folafolaga ia i tatou . O le mautinoa lea afai o le a tatou ola e tusa ai ma tulafono a le Atua ma upu a Ana perofeta, o le a tatou maua faamanuiaga manaomia i le lumanai. O le talitonu ma le faamoemoe o le a taliina a tatou talosaga. E faaali mai i le talitonu ia te oe lava, lagona o le lelei mea uma, naunautai, ma le faapalepale ma le onosai ” (“O le Mana e le Iu o le Faamoemoe,” Ensign po o le Liahona, Nov. 2008, 22).

Valaaulia tamaiti aoga e faitau le leoa le Moronae 7:41 ma vaavaai mo mea o le a tatou faamoemoe i ai ao tatou atiina ae le faatuatua ia Keriso.

  • O le a le mataupu faavae na aoao mai e Moronae e faatatau i le faamoemoe i le fuaiupu? (O tamaiti aoga e tatau ona faailoa mai le mea lenei: Ao tatou atiina ae le faatuatua ia Iesu Keriso, tatou te maua ai le faamoemoe i Lana Togiola e mafai ona tatou siitia ai i le ola e faavavau.

  • Aisea i lou manatu e fesootai vavalalata ai le faatuatua ia Iesu Keriso ma le faamoemoe?

Valaaulia se tamaitiiti aoga e faitau leotele le Eteru 12:4, ma tuu atu i le vasega e vaavaai po o faapefea ona faamatalaina e Moronae le faamoemoe.

  • O le a le mea ua aoao mai e le faaaogaina e Mamona o se taula ia i tatou e uiga i le faamoemoe? E mafai faapefea ona avea se tagata e leai se faatuatua e pei o se vaa e aunoa ma se taula?

Valaaulia ni nai tamaiti aoga e molimau mai i le faamoemoe e oo mai i o latou olaga ona o le faatuatua ia Iesu Keriso.

Eteru 12:33–34; Moronae 7:43–48

O le alofa mama o le alofa le pona lea o Keriso

Valaaulia se tamaitiiti aoga e faitau leotele le Moronae 7:43-44, ma fai i tamaiti aoga e faailoa mai po o a uiga na tau mai e Mamona e tatau ona tatou atiina ae i le taimi lava tatou te maua ai le faatuatua ma le faamoemoe.

Faaali atu le fuaitau lenei mai ia Peresitene Ezra Taft Benson (1899–1994), ma valaaulia se tamaitiiti aoga e faitau leotele:

Peresitene Ezra Taft Benson

“A tatou saili moni e avea atili faapei o le Faaola ma le Matai, o lona uiga e tatau ona avea le aoao ia alolofa e faapei ona ia alofa ma a tatou sini faasilisili. Ua taua e Mamona le alofa ‘le mea ua silisili lea i mea uma’ .Moro. 7:46)” (“O Uiga Faaleatua o le Matai,”Liahona, Ian. 1987, 48).

Ina ia faamaninoina pe aisea ua avea ai le alofa mama o se uiga e matuai taua lava le sailia, valaaulia ni nai tamaiti aoga e feauauai i le faitauina leotele o le Moronae 7:45-47. Faasino atu o nei fuaiupu ua fesoasoani ia i tatou e malamalama ai i le alofa mama i le lisiina po o le a le alofa mama ae po o le a foi le le alofa mama.

  • O a upu ma fuaitau i nei fuaiupu ua tau mai ai le taua o le alofa mama?

  • O a manatu ma vaaiga e mafai ona tatou faasoa atu i uiga o le alofa mama ua lisiina i le fuaiupu 45

Valaaulia se tamaitiiti aoga e faitau leotele le Moronae 7:48.

  • O le a le mea ua fautua mai Mamona ia i tatou e fai ao tatou sailia le meaalofa o le alofa mama? (Fesoasoani i tamaiti aoga e faailoa mai le mataupu faavae lenei: Afai tatou te tatalo ma le malosi o le loto ma mulimuli ia Iesu Keriso, e mafai ona faatumuina i tatou i le alofa mama.)

  • E faapefea e le sailia mo le meaalofa o le alofa mama ona fesoasoani ia i tatou ia avea ai ma ni soo sili atu o Iesu Keriso?

Valaaulia se tamaitiiti aoga e faitau leotele le Eteru 12:33-34 ao vaavaai le vasega mo fesootaiga i le va o le alofa mama ma le Togiola a Iesu Keriso.

  • O le a le sootaga i le va o le alofa mama ma le Togiola?

Fai i se tamaitiiti aoga e faitau leotele le saunoaga lenei a Elder Jeffrey R. Holland o le Korama a Aposetolo e Toasefululua:

Elder Jeffrey R. Holland

“O le faamatalaga sili atu o le ‘alofa le pona o Keriso’ … e le o mea tatou te taumafai i ai o ni Kerisiano ae tele lava ina toilalo e faaalia agai i isi ae nai lo lena, o le mea na faamanuiaina ai Keriso ma le atoatoa i le faaalia ia i tatou. O le alofa mama moni e na o le tasi lava le taimi na iloa ai. E faaalia atoatoa lava ma mama i le alofa togiola, e le uma, ma e le iu o Keriso mo i tatou. … O le alofa o Keriso mo i tatou lena e ‘tauaveina mea uma, talitonu i mea uma, faamoemoe i mea uma, onosai i mea uma.’ E pei lava ona faaalia ia Keriso e faapea ‘e le uma le alofa mama.’ O le alofa mama lena—lona alofa le pona mo i tatou—a aunoa ma na mea ua meanoa lava i tatou, leai se faamoemoe, mai alii ma tamaitai uma lava e sili le pagatia. O le mea moni, o i latou ua maua faamanuiaga o lona alofa i le aso mulimuli—le Togiola, le Toetutu, ola e faavavau, folafolaga e faavavau—e mautinoa lava o le a lelei lava mo i latou” (Christ and the New Covenant [1997], 336).

  • E faapefea ona fesoasoani Elder Holland ia te oe e malamalama pe aisea “e le uma [ai] le alofa mama” ma aisea e “silisili” ai i meaalofa faaleagaga?

  • O le a le mea e mafai ona e faia e faasoa ai i isi le alofa le pona o Iesu Keriso ua Ia tuuina mai ia te oe ma le le taofiofia?

Fai i tamaiti aoga e iloilo le Moronae 7:45 ona seti lea o se sini e tatalo ma galue ia sili atu le atoatoa o le atiina ae o se uiga se tasi o le alofa mama. Molimau atu i le fesoasoani paia ua e maua ao e galue e atiina ae le alofa mama e oe lava ia.

Faitauga a Tamaiti Aoga