Seminare ma Inisitituti
Lesona 22: ‘E Pei Lava O Au Nei’

Lesona 22

“E Pei Lava O Au Nei”

Folasaga

O Iesu Keriso toetu na valaaulia Ona soo e mulimuli i Lana faataitaiga. E ala i le suesueina o mataupu faavae na Ia aoaoina i sa Nifae i le malumalu o Nuumau, e mafai ona tatou aoao ai pe faapefea ona avea faapei o Ia. Na tatalo le Faaola faapea o i latou uma e talitonu ia te Ia e mafai ona aafia i le lotogatasi ma Ia ma lo tatou Tama Faalelagi. O lenei lesona ua fuafuaina e fesoasoani i tamaiti aoga ia malamalama ai i mea e mafai ona latou faia e avea atili ai faapei o Iesu Keriso.

Faitauga Faaopoopo

Fautuaga mo le Aoaoina Atu

3 Nifae 27:21-22, 27

Avea e faapei o Iesu Keriso

Amata le vasega i le faaali atu o le saunoaga lenei a Elder Lynn G. Robbins o le Au Peresitene o le Fitugafulu, ma fai i se tamaitiiti aoga e faitau leotele:

Elder Lynn G. Robbins

“O le toatele o i tatou, tatou te faia ni lisi o mea e fai e faamanatu ai mea tatou te mananao e faataunuuina. Ae e seasea lava i ai ni lisi ia avea ai. Aisea? O mea e fai o gaoioiga po o faatinoga e mafai ona maka faasa’o i le lisi pe a uma ona fai. Ae, o le ia avea ai, e le taitai uma ona fai. E le mafai ona e maua ni maka faasa’o [ua maea] i se lisi ia avea ai. E mafai ona ou aveina lo’u toalua mo se afiafi matagofie i le Aso Faraile nei, o se mea lea e fai. Ae o le avea ai ma se toalua lelei e le o se mea lea e tupu; e tatau ona avea ma se vaega o lo’u natura—o’u uiga po o lo’u ituaiga tagata” (“Alii [ma Tamaitai] Pe Faapefea La Outou Amio e Tatau Ai?” Ensign po o le Liahona, Me 2011, 104).

  • O le a sou manatu i le mea e finagalo le Alii ia avea ai i tatou o ni tagata o Lana Ekalesia?

Valaaulia tamaiti aoga e faitau le leoa le 3 Nifae 27:21–22, 27 ma vaavaai mo faatonuga na tuuina atu e Iesu Keriso i Ona soo sa Nifae.

  • O le a le mea na poloai atu le Faaola i Ona soo e fai ma avea ai i latou? (Tusi le upumoni lenei i le laupapa: Ua tau atu e le Alii i Ona soo e fai Lana galuega ma avea faapei o Ia.)

  • E mafai faapefea i lou manatu ona tatou avea atili faapei o le Faaola?

  • O a nisi o Ana galuega ua mafai ona e faia?

Valaaulia tamaiti aoga e talanoaina pe mafai faapefea e aoaoga o le Tusi a Mamona ona fesoasoani ia i tatou ia avea faapei o Iesu Keriso. Mafaufau e tusi tali a tamaiti aoga i le laupapa. Faasoa atu lau molimau faapea o le suesueina o le Tusi a Mamona ma le faaaogaina o ona aoaoga o le a fesoasoani ia i tatou ia avea atili ai faapei o le Faaola.

3 Nifae 12:1–16, 43–45; 13:1, 5–7, 16–18, 22–24, 33; 14:1–5, 21–27

O le lauga a Keriso i le malumalu i Nuumau ua aoaoina i tatou pe faapefea ona avea faapei o Ia

Faaali atu le fuaitau lenei mai ia Peresitene Ezra Taft Benson (1899–1994), ma valaaulia se tamaitiiti aoga e faitau leotele:

Peresitene Ezra Taft Benson

“O lena tagata e maoae ma sili ona faamanuiaina ma fiafia, o lona soifuaga e sili ona talafeauga ma le mamanu a le Keriso. E leai se faiā o lea tulaga ma oa o le lalolagi, ma le malosi, po o le lauiloa. Na o le pau le suega moni o lo tatou maoae, manuia, ma le olioli, o le tele lea e mafai ona tatou ola latalata atu ai e faapei o le Matai, o Iesu Keriso. O Ia o le ala sa’o, o le upumoni atoatoa, ma le ola atili” (“Iesu Keriso—Meaalofa ma Faamoemoega,”Liahona, Ape., 1977, 14).

  • E tusa ai ma le saunoaga a Peresitene Benson, o le a le mea e tupu pe a tatou filifili e avea Iesu Keriso ma mamanu o o tatou olaga?

Faamanatu i tamaiti aoga faapea, ina ua faaali atu le Faaola i Lona nuu i le malumalu i Nuumau, na Ia tuuina atu se lauga e tutusa ma Lana Lauga faaletusipaia i le Mauga. O mataupu faavae paia na aoaoina e le Faaola i le Lauga i le Mauga ma le malumalu i Nuumau ua fuafuaina e fesoasoani ia i tatou e avea ai faapei o Ia.

Faaali atu le saunoaga lenei mai ia Peresitene Harold B. Lee (1899–1973). Afai e manaomia, faamatala atu o le upu ata faataatia e faatatau i fuafuaga e faaaoga i le fausiaina o se fale.

Peresitene Harold B. Lee

“I lana Lauga i luga o le Mauga, sa tuuina mai ai e le Matai se faaaliga o ona lava uiga, o se tulaga atoatoa lelei, … ma o lea na tatou maua mai ai se ata faataatia mo o tatou lava olaga” (Aoaoga a Peresitene o le Ekalesia: Harold B. Lee [2000], 200).

Tusi mau faasino nei i luga o le laupapa:

3 Nifae 12:1-12

3 Nifae 12:13-16, 43-45

3 Nifae 13:1, 5–7, 16–18

3 Nifae 13:22–24, 33

3 Nifae 14:1-5

3 Nifae 14:21-27

Tofi tamaiti aoga ia taitasi ma faitau se tasi o nei fuaitau ma faailoa mai se mataupu faavae e mafai ona fesoasoani ia i latou ia avea atili ai faapei o Iesu Keriso. E mafai ona e uunaia tamaiti aoga e maka pe faailoga nei mataupu faavae i a latou tusitusiga paia. Valaaulia i latou e mafaufau pe latou te iloa se tasi o loo faataitaia mataupu faavae na latou faailoa mai.

A uma se taimi talafeagai, valaaulia tamaiti aoga e faasoa mai mea na latou mauaina. Pe a manaomia ma pe a uunaia ai e le Agaga, e mafai ona e fai atu nisi fesili e pei o fesili nei:

  • E mafai faapefea e le ola ai pea i lenei mataupu faavae ona fesoasoani ia te oe ia avea ai atili faapei o Keriso?

  • O a aafiaga na e oo i ai e faaalia ai le taua o le mataupu faavae na e faailoaina?

Valaaulia tamaiti aoga e fai se sini ia avea atili faapei o le Faaola i le faaaogaina o se tasi po o le sili atu o nei mataupu faavae i o latou olaga.

Ioane 17:9–11, 20–23; 3 Nifae 19:19–23, 28–29

Ia tasi ma le Tama ma le Alo

Faamatala atu faapea i Lana asiasiga i sa Nifae, na tatalo Iesu Keriso mo soo e toasefululua na Ia filifilia ma mo i latou uma o le a talitonu i a latou upu. Valaaulia ni nai tamaiti aoga e faitau leotele mai le 3 Nifae 19:19–23, 28–29. Fai i tamaiti aoga e vaavaai mo faamanuiaga na tatalo Iesu o le a tuu mai i luga o e talitonu ia te Ia.

  • O le a le mataupu faavae e mafai ona tatou aoao mai le tatalo a le Faaola mo i tatou ina ia tasi ma le Tama ma le Alo? (E tatau ona faailoa mai e tamaiti aoga lenei mataupu faavae: E ala i le faatuatua, e mafai ona faamamaina ai i tatou ma avea ai ia tasi ma Iesu Keriso, e pei ona tasi o Ia ma le Tama.)

Ina ia fesoasoani i tamaiti aoga ia malamalama atili i lenei mataupu faavae, faamatala atu faapea o se tatalo e pei o lena na ofoina atu e Keriso i le malumalu i Nuumau o loo faamaumauina i le Feagaiga Fou. Fai i tamaiti aoga e faafesootai nei fuaiupu ma le Ioane 17:9–11, 20–23. Valaaulia i latou e faitau le leoa ia mataupu ma mafaufau pe faapefea ona faatatau ia i tatou.

  • E mafai faapefea ona aafia oe i le iloaina na tatalo Iesu i le Tama mo oe?

  • O a auala e mafai ona tatou maua ai i le lotogatasi lena e i ai i le va o le Tama ma le Alo?

Fai i se tamaitiiti aoga e faitau leotele le saunoaga lenei a Elder D. Todd Christofferson o le Korama a Aposetolo e Toasefululua. Valaaulia tamaiti aoga e vaavaai mo mea e tatau ona latou faia ia tasi ai ma Iesu Keriso ma le Tama Faalelagi.

Elder D. Todd Christofferson

“Na maua e Iesu le lotogatasi atoatoa ma le Tama, e ala i le gauai atu o Ia lava, i le tino ma le agaga, i le finagalo o le Tama. O Lana galuega e manino lava lona taulaiga, aua foi sa le finagalo o Ia e faavaivaia pe faalavelaveina lo la tasi ma le Tama. Na fetalai Iesu e faatatau i Lona Tama, e faapea, ‘Ou te faia pea lava o mea lelei ia te ia (Ioane 8:29). …

“O le mea moni lava o le a le mafai ona tatou tasi ma le Atua ma Keriso, sei iloga tatou te avea o Laua finagalo ma faamoemoe, e fai ma o tatou faanaunauga sili. O lea usiusitai e le mafai ona ausia i se aso se tasi, peitai e ala mai i le Agaga Paia, o le a aoaoina ma taitaiina i tatou e le Alii, pe afai tatou te naunau i ai, seia oo i le taimi tonu, e mafai ona faapea mai ai ma le faamaoni, o Ia ua i totonu ia i tatou, e pei o le Tama o i totonu ia te Ia” (“Ina ia Tasi I Latou ia I Tatou,”Liahona, Nov. 2002, 71–72).

  • E tusa ai ma le saunoaga a Elder Christofferson, o le a le mea e tatau ona tatou faia ia tasi ai ma le Tama ma le Alo?

Tusi fesili nei i le laupapa, ma valaaulia tamaiti aoga e faaalu ni nai minute e tusi ai i lalo a latou tali:

O a auala na faaalia ai e Iesu faapea ua Ia usiusitai atoatoa i le finagalo o le Tama Faalelagi?

O a nisi auala e mafai ona sili atu ai lo tatou usiusitai i le finagalo o le Tama Faalelagi?

Faaiu i le faasoa atu o lau molimau faapea o le usiusitai i le finagalo o le Tama e mafai ai mo i tatou ona avea atili faapei o lo tatou Faaola o Iesu Keriso.

Faitauga a Tamaiti Aoga