Seminare ma Inisitituti
Lesona 12: O Lo Tatou Manaomia o le Toefanauina Faaleagaga

Lesona 12

O Lo Tatou Manaomia o le Toefanauina Faaleagaga

Folasaga

Mai le Tusi a Mamona ua tatou aoao ai faapea “o le tagata natura o se fili i le Atua” (Mosaea 3:19). I lenei lesona, ua faatonuina tamaiti aoga faapea e ala atu i le salamo ma le faaaogaina o le faatuatua ia Iesu Keriso, e mafai ai ona tatou faatoilaloina le tagata natura, ma “toe fanauina,” ma aafia i se liua tele o le loto. O lenei liua e manaomia e ulufale atu ai i le malo o le Atua.

Faitauga Faaopoopo

Fautuaga mo le Aoaoina Atu

Mosaea 3:19; 16:2–5; Alema 41:10–11

Tuueseina o le tagata natura

I le laupapa, tusi ai le saunoaga lenei a Peresitene Ezra Taft Benson (1899–1994), upusii mai “To ‘the Rising Generation,’” New Era, Iuni 1986, 5:

“E le mafai ona e faia le mea sese ae lagonaina le fiafia. E le mafai!” (Peresitene Ezra Taft Benson)

  • Aisea e le mafai ai ona fiafia pe a fai ni filifiliga sese?

Fai i se tamaitiiti aoga e faitau leotele le Alema 41:10-11 ao vaavaai le vasega mo taunuuga o le amioleaga. (Faamamafa atu le upumoni lenei: E lei avea lava le amioleaga ma fiafia.)

  • O a nisi o taufaasese e faaaoga e Satani e uunaia ai i tatou e soli poloaiga na e taitai atu i le fiafia?

  • E tusa ai ma le fuaiupu 11, o le a le uiga o le i ai i se “tulaga o le natura”? (Ina ia i ai “i le tulaga faaletino,” “i totonu o le au oona ma i totonu o noanoaga o le amioletonu,” ma “ua aunoa i latou ma le Atua i le lalolagi.”)

  • E faapefea ona fesoasoani le Alema 41:10-11 e faamatala ai pe aisea e le mafai ai e le agasala ona taitai atu i le fiafia? (E feteenai ma le natura o le Atua, ma o le “natura o le Atua” o le “natura o le fiafia.”)

Faamanatu i tamaiti aoga ua tatou mautofi uma lava i taunuuga o le Pau o Atamu. Fai i se tamaitiiti aoga e faitau leotele le Mosaea 16:2-5 ao faailoa mai e le vasega upu ma fuaitau e faamatalaina ai le tulaga pau o tagata.

  • O a upu ma fuaitau na faaaoga e Apinati e faamatala ai le tulaga pau o le tagata?

  • O le a le uiga o le upu “alu pea” i le fuaiupu 5? (Manatua: O le faailoaina o upu autu o se tomai faalesuesuega i tusitusiga paia e mafai ona e filifilia e faamamafa iinei.)

  • O le a le mea e mafai ai mo i tatou ona laveaiina mai lo tatou tulaga agasala ma pau?

Fai i tamaiti aoga e faitau le leoa le Mosaea 3:19 ma faailoa mai pe faapefea ona tatou faatoilalo lo tatou tulaga pau.

  • O le a le uiga o le “gauai atu i uunaiga a le Agaga Paia”?

  • O le a le mea e tatau ona tatou faia ina ia “[tuu] ese le tagata natura”? (E tatau ona faailoa mai e tamaiti aoga le mataupu faavae lenei: Ao tatou mulimuli i uunaiga a le Agaga Paia ma faalagolago i le mana o le Togiola, e mafai ona tatou tuuese le tagata o le natura.)

Valaaulia tamaiti aoga e mafaufau i faamaoniga ua latou vaaia ua mafai ai e le Faaola ona suia i tatou i ni tagata sili atu nai lo le mea e mafai ona avea ai i tatou. Valaaulia ni nai tamaiti aoga e faasoa mai o latou manatu.

Valaaulia tamaiti aoga e tali le leoa fesili nei:

  • O le a se mea e mafai ona e faia ina ia atoatoa ai le “[gauai] atu i uunaiga a le Agaga Paia”?

  • O a uiga o se tamaitiiti ua lisiina i le Mosaea 3:19 e sili ona e manaomia e atiina ae?

Mosaea 5:1–5, 7–8; 27:24–26

Toe fanauina

Fai i tamaiti aoga e lisi igoa o tagata i le Tusi a Mamona na aafia i se liuga i o latou natura ona o le Togiola a Iesu Keriso.

Faamanatu i tamaiti aoga faapea o Alema le Itiiti ma atalii o Mosaea sa, mo se taimi, sa faatasi ma e le talitonu i Saraemila o e na faasaua i tagata o le Ekalesia (tagai Mosaea 27:8). Ina ua mavae le asiasiga a se agelu, na tuua Alema e aunoa ma se malosi ma na le mafai ona tautala. Ina ua mavae aso e tolu, na toefuataiina le malosi o Alema ma na ia molimau mai i se liuga faavavega na tupu i totonu ia te ia (tagai Mosaea 27:11-24).

Fai i se tamaitiiti aoga e faitau leotele le Mosaea 27:24-26 ao vaavaai le vasega mo le faamatalaina e Alema o lenei liuga faavavega.

  • O a upu ma fuaitau i nei fuaiupu e fesoasoani e faamatalaina le uiga o le toe fanauina?

  • E faapefea e le fuaiupu 26 ona fesoasoani e faamatala pe aisea tatou te manaomia ai le toe fanauina? (Ia mautinoa ua malamalama tamaiti aoga i lenei mataupu faavae: Ua na o le avea ma tagata fou ia Keriso e mafai ai ona tatou mau tofi i le malo o le Atua.)

Ina ia fesoasoani i tamaiti aoga ia malamalama i le mea e tupu a o tatou toe fanauina faaleagaga, fai i tamaiti aoga e faitau leotele le Mosaea 5:1-5, 8. Fai i le vasega e vaavaai mo upu po o fuaitau o loo taua ai faapea o le nuu o le Tupu o Peniamina na aafia i le toe fanauina faaleagaga.

  • O le a le faamaoniga na e maua faapea o le nuu o le Tupu o Peniamina na aafia i se liuga faaleagaga? (O tali e tatau ona aofia ai mea nei: sa latou le toe mananao e fai mea leaga, na latou mananao e fai mea lelei e le aunoa, sa faamalamalamaina o latou mafaufau, ma na faatumuina i latou i le olioli ma naunau e osi feagaiga ma le Alii.)

  • E tusa ai ma le fuaiupu 2 ma le 4, o a mea e manaomia ina ia maua ai se “liuga tele o le loto”? (E tatau i tamaiti aoga ona faailoa mai lenei mataupu faavae: A o tatou faaaoga le faatuatua ia Iesu Keriso ma maua le Agaga Paia, e mafai ona tatou aafia i se liuga tele o le loto.)

Faaali atu le saunoaga lenei a Elder David A. Bednar o le Korama a Aposetolo e Toasefululua. Fai i se tamaitiiti aoga e faitau leotele a o vaavaai le vasega pe o faapefea ona faamatala e Elder Bednar le liuga tele o le loto.

Elder David A. Bednar

“Faamolemole o le liua o loo ta’ua i le Mosaea 5 e maoae, e le laitiiti—o se toefanau mai faaleagaga ma le suiga e ala mai i le faavae o mea tatou te lagonaina ma naunau i ai, o mea tatou te mafaufau i ai ma fai, ma o tatou ituaiga o tagata. E moni, o le natura moni o le talalelei a Iesu Keriso e afua ai se suiga taua ma le mautu i o tatou lava natura, e mafai i lo tatou faalagolago i “taui, ma le alofa mutimutivale ma le alofa tunoa o le Mesia Paia” (2 Nifae 2:8)” (“E Ao Ina Toe Fanau Mai Outou,” Ensign po o le Liahona, Me 2007, 20).

  • O le a le mea na sili ona tulagaese ia te oe i le faamatalaga a Elder Bednar o le liuga tele o le loto?

Valaaulia tamaiti aoga e talanoaina mea e mafai ona tatou faia ina ia faaauau ai pea ona aafia i le liuga tele o le loto.

Fai i tamaiti aoga e faitau le leoa le Mosaea 5:7 ma vaavaai pe faapefea ona suia la tatou sootaga ma Iesu Keriso a o tatou toe fanauina.

  • O a auala tatou te avea ai ma fanau a Iesu Keriso?

Valaaulia tamaiti aoga e mafaufau i le taua o le avea ma “fanau a Keriso,” ma valaaulia i latou e faasoa mai pe faapefea e lenei mea ona uunaia i tatou a o tatou saili ia toe fanauina.

Alema 5:14, 26–27; Eteru 12:27

O le toe fanauina faaleagaga e manaomia ai le taimi ma taumafaiga

Valaaulia se tamaitiiti aoga e faitau leotele le saunoga lenei a Elder D. Todd Christofferson o le Korama a Aposetolo e Toasefululua a o faalogologo le vasega pe faapefea ona ia faamatalaina le faagasologa o le mauaina o le liuga o le loto:

Elder D. Todd Christofferson

“Atonu tou te fesili, Aisea e le vave ai ona tupu lenei suiga tele ia te au? E tatau ona e manatua ia faataitaiga ofoofogia a le nuu o le Tupu o Peniamina, Alema, ma isi i tusitusiga paia e—matua ofoofogia ae e le o se mea e masani ai. O le toatele lava o i tatou, e faifai malie suiga ma e umi se taimi e tulai mai ai. O le toe fanauina, e le pei o lo tatou fananau mai i la le tino, o se faagasologa ae le o se mea ua fuafua e tupu. Ma o le galue ai i lena faagasologa, o le faamoemoega tutotonu lea o le olaga nei.

“O le taimi foi lea, aua ne’i o tatou tauamiotonuina i tatou lava i a tatou taumafaiga faasamasamanoa. Aua ne’i faamalieina i tatou e taofiofi ni lagona e faia le leaga. Ia tatou aai ma feinu ma le agavaa i le faamanatuga i vaiaso taitasi ma faaauau pea ona pipiimau i le Agaga Paia ina ia veleeseina ia mauaa o mea eleelea o loo totoe i totonu ia i tatou. Ou te molimau atu a o outou faaauau ai i le ala o le toe fanauina faaleagaga, o le a aveeseina e le alofa togiola o Keriso a outou agasala ma pisipisia o na agasala o loo ia te outou, o le a mou ese atu faaosoosoga, ma o Keriso o le a faapaiaina ai outou, e pei ona paia o Ia ma lo tatou Tama.(“Toe Fanauina,” Ensign po o le Liahona, Me 2008, 78).

  • E tusa ai ma le saunoaga a Elder Christofferson, aisea e avea ai le toe fanauina e pei o se faagasologa nai lo se mea e tupu?

  • E faapefea e le faagasologa o le toe fanauina faaleagaga ona fesoasoani ia i tatou ia avea ma tagata paia e pei o le Tama Faalelagi ma Lona Alo, o Iesu Keriso? (Fesoasoani i tamaiti aoga e faailoa mai lenei upumoni: E ala mai i le alofa tunoa o Iesu Keriso, e mafai ona faamagaloina i tatou ma maua le fesoasoani e faaauau ai i le ala o le toe fanauina faaleagaga.)

Ina ia fesoasoani i tamaiti aoga ia malamalama atili i le uiga o le alofa tunoa,mafaufau e faasoa atu lenei fuaitau mai le Bible Dictionary:

“E faapena foi … e ala i le alofa tunoa o le Alii, ona maua e tagata taitoatasi, e ala i le faatuatua i le Togiola o Iesu Keriso ma le salamo i a latou agasala, maua le malosi ma le fesoasoani e fai ai galuega lelei, ia semanu e le mafai ona latou tausisia pe ana tuu e fai i a latou lava ala. O lenei alofa tunoa, o se mana gafatia lea e mafai ai e alii ma tamaitai ona maua le ola e faavavau ma le faaeaga pe a uma ona latou faia le mea sili latou te mafaia”(Bible Dictionary, “Grace”).

Valaaulia tamaiti aoga e faitau le leoa le Alema 5:14, 26–27 ma vaavaai i mea na aoao mai e Alema ia i latou ua amata le faagasologa o le toe fanauina faaleagaga ma le aafiaga o le liuga o le loto. Valaaulia tamaiti aoga e mafaufau loloto pe o le a faapefea ona latou taliina fesili a Alema.

  • E tusa ai ma le fuaiupu 27, o a mea e tatau ona tatou faia pe a uma ona tatou mauaina le liuga o le loto? (E tatau ona tatou faaauau ona savavali ma le le pona i luma o le Atua, ma saili le faamagaloina o a tatou agasala.)

  • Aisea i lou manatu na aoao mai ai Alema o le lotomaualalo o se vaega taua tele o le faatumauina o le liuga o o tatou loto?

Tau atu i tamaiti aoga faapea na aoao e le Alii Eteru pe aisea e taua tele ai le mana o le lotomaualalo a o tatou saili ia maua se liuga o le loto. Faamanatu i tamaiti aoga o mataupu faavae faaletusipaia e masani ona faaaoga upu afai ma ona, ma valaaulia i latou e iloilo le leoa le Eteru 12:27 , ma vaavaai mo mataupu faavae “afai-ona”. Talanoaina mataupu faavae nei a o faailoa mai e tamaiti aoga: Afai tatou te o mai ia Iesu Keriso, ona Ia faaali mai lea ia i tatou lo tatou vaivaiga. (Afai tatou te lotomaualalo ma faatuatua i le Alii, ona Ia faia lea o mea vaivai ma mea malolosi ia i tatou.)

  • Aisea e te manatu ai e taua ona tatou iloa o lo tatou vaivaiga?

  • O le a lou manatu i le uiga o le fasifuaitau “ua lava lou alofa tunoa mo tagata uma … o e faamaualaloina i latou lava i ou luma”?

Faaali atu le saunoaga lenei a Elder Bruce C. Hafen o le Fitugafulu ma valaaulia se tamaitiiti aoga e faitau leotele:

Elder Bruce C. Hafen

“Afai la o i ai ni faafitauli i lou olaga, aua e te manatu faapea o loo i ai se mea o loo sese ia te oe. O le tauivi ai ma na faafitauli o le faavae lea o le faamoemoega o le olaga. A o tatou faalatalata atu i le Atua, o le a Ia faaali mai ia i tatou o tatou vaivaiga, ma o na vaivaiga o le a tatou atamamai, ma malolosi ai. Afai o loo e iloaina le tele o ou vaivaiga, o le uiga o lena mea o loo e agaigai atu i le Atua, ae le o le mamao ese mai ai” (“O le Togiola: O Mea Uma mo Tagata Uma,” Ensign po o le Liahona, Me 2004, 97).

  • O a mea e mafai ona tatou faia e aloese ai mai le lotovaivai pe a tatou iloaina o tatou vaivaiga?

Faasoa atu lau molimau faapea o le alofa tunoa o Iesu Keriso o le a fesoasoani ia i tatou e faatoilalo ai o tatou vaivaiga a o tatou saili ia toe fanauina faaleagaga.

Faitauga a Tamaiti Aoga