Ua tusia i le Tusi a Mamona le faatafunaiga o tagata ma nuu e faatinoina le amioleaga ma faatagaina le faia o faapotopotoga faalilolilo. I le taimi lava lena, ua aoao mai le Tusi a Mamona e mafai ona tatou ola amiotonu e ui lava ina tatou nonofo i se siosiomaga amioleaga. I lenei lesona, o le a aoao tamaiti aoga i mea e mafai ona latou faia ina ia tumau ai i le amiotonu i le lalolagi o le aso.
O faapotopotoga faalilolilo e mafaia ona faaumatiaina le saolotoga ma nuu
Tusi le fuaitau teritori a le fili i le laupapa ma fesili i tamaiti aoga po o le a le uiga.
Faaali atu le saunoaga lenei a Peresitene Boyd K. Packer o le Korama a Aposetolo e Toasefululua, ma valaaulia se tamaitiiti aoga e faitau leotele:
Ata
Peresitene Boyd K. Packer
“O outou le autalavou ua ola ae i teritori o le fili. Ua tatou iloa mai tusitusiga paia sa i ai se taua i le lagi ma sa fouvale Lusifelo ma, ‘ua lafo ifo i le lalolagi’ [Faaaliga 12:9]. Ua ia naunau e faasalaveia le fuafuaga a lo tatou Tama Faalelagi ma saili atu e pulea mafaufau ma amioga a tagata uma” (“Fautuaga i le Autalavou,” Ensign po o le Liahona, Nov. 2011, 16).
O a ni auala e tutusa ai le ola i lenei taimi e pei o i ai i le teritori a le fili?
Faamatala atu o lenei lesona o le a iloiloina ai le faamatalaga a le Tusi a Mamona o le siosiomaga amioleaga lea na ola ai ni tagata amiotonu. Valaaulia tamaiti aoga e vaavaai mo mataupu ma aoaoga faavae e mafai ona latou faaaogaina ao latou suesueina faataitaiga o tagata na tumau i le faatuatua e ui lava na siomia e le amioleaga.
Faamanatu i tamaiti aoga e faapea na molimauina e Moronae le faatafunaiga o le nuu atoa o sa Nifae. Na ia faamatalaina le amioleaga lea na taitai atu i le faatafunaina o sa Nifae ma sa Iareto. Valaaulia se tamaitiiti aoga e faitau leotele le Eteru 8:18 ma le 21 ao faailoa mai e le vasega le mafuaaga o lenei faatafunaina. Valaaulia tamaiti aoga e faasoa mai mea na latou maua.
E faapefea ona latou faamautinoaina lo latou faaauauina?
Fai i tamaiti aoga e faitau se tasi o fuaitau i le laupapa ma vaavaai mo tali i fesili ua lisiina. Tau i tamaiti aoga o le fuaitau latou te filifilia atonu e le taliina ai fesili uma e tolu, ae e tatau ona latou sailia le mea latou te mafaia. A maea se taimi talafeagai, talanoaina fesili i le laupapa o se vasega. Ona talanoaina lea o mea nei:
Mai mea na e faitauina, o a taunuuga o le faatagaina o faapotopotoga faalilolilo ia faia ma faateleina? (E tatau ona faailoa mai e tamaiti aoga le mataupu faavae lenei: O faapotopotoga faalilolilo e mafai ona faaumatiaina le saolotoga, malo ma nuu.
O le a sou manatu i nisi o faataitaiga o faapotopotoga faalilolilo i o tatou aso?
Ina ia fesoasoani e talanoaina lenei fesili, faaali atu saunoaga nei a Elder M. Russell Ballard o le Korama a Aposetolo e Toasefululua ma Peresitene Ezra Taft Benson (1899–1994). Fai atu i se tamaitiiti aoga e faitau leotele:
Ata
Elder M. Russell Ballard
“O loo i ai i pulega faalilolilo o nei aso ni talavou ua fai kegi, o faalapotopotoga ua gaosia fualaau faasaina, ma vaega toatele o tagata latou te faia faiga faasolitulafono. O pulega faalilolilo i o tatou vaitaimi, e faagaoioia e pei lava o le au faomea a Katianetona i le taimi o le Tusi a Mamona. … O lo latou faamoemoega e aofia ai le ‘fasioti tagata, o le vete, ma le gaoi, o le faitaaga, ma amiolega eseese uma’ [Helamana 6:23]” (M. Russell Ballard, “Tutu Atu Mo le Upumoni ma le Amiotonu,” Liahona, Ian. 1998, 43).
Ata
Peresitene Ezra Taft Benson
“Ou te molimau atu ua faateleina le sosolo o le amioleaga i itu uma o o tatou alaalafaga. (Tagai MF&F 1:14–16; 84:49–53.) Ua sili atu le faatulagaina lelei, sili atu le faafoligaina ma le poto, ma sili atu le siitiaina ma le malosi nai lo se isi lava taimi muamua. Ua lauolaola faapotopotoga faalilolilo ua tuinanau i le mana, ma tupe, ma le viiga. … (Tagai i le Eteru 8:18–25.)” (Ezra Taft Benson, “Ou te Molimau Atu,” Ensign, Ian. 1989, 93).
Aisea i lou manatu na faaaofia ai e perofeta o le Tusi a Mamona faamatalaga e uiga i faapotototoga faalilolilo ia latou faamaumauga?
Valaaulia se tamaitiiti aoga e faitau leotele le Helamana 6:20, 37-40. Tuu atu i le vasega e mulimuli i le faitauga, ma vaavaai mo eseesega i le va o sa Lamana ma sa Nifae. (Manatua: O le faatusatusa ma sue eseesega o se tomai e mafai ona e faamamafaina i lenei lesona [tagai Aaoaoina Atu Ma Le Aoaoina Mai o le Talalelei: O Se Tusitaulima mo Faiaoga ma Taitai i Seminare ma Inisitituti o Aoaoga Faalelotu (2012), 22].)
O a mea e mafai ona tatou aoao mai nei fuaiupu e uiga i le ala e aveesea ai le amioleaga ma faapotopotoga faalilolilo?
Tau atu i tamaiti aoga na fanau Mamona i se siosiomaga o le faateteleina o le amioleaga na aumaia e nei faapotopotoga faalilolilo. Fai i tamaiti aoga e suesue fuaitau nei ma vaavaai ma maka faamatalaga o le siosiomaga o Mamona: Mamona 1:13–14, 16–17, 19; 2:8, 14–15, 18. Valaaulia tamaiti aoga e lipoti mai mea na latou maua, ona fesili atu lea:
O a ni popolega o le a e maua i le ola ai i se siosiomaga faapea?
Valaaulia se tamaitiiti aoga e faitau leotele le Mamona 1:15 ma le 2:19.
O a ni mea e mafai ona tatou aoao mai le faataitaiga a Mamona i lena taimi o le amioleaga? (Ao tali mai tamaiti aoga, tusi lenei upumoni i le laupapa. E mafai ona tatou ola amiotonu e tusa lava pe o siomia i tatou e le amioleaga.)
Tuu atu i tamaiti aoga se taimi e faitau ai le Mamona 3:2–3, 12, 22 e iloa ai po o a nisi mea e mafai ona latou aoao pe na faapefea e Mamona ona ola amiotonu i se taimi o le amioleaga. A uma ona lipoti mai e tamaiti aoga mea na latou mauaina ia Mamona, fai atu fesili nei:
O ai se isi i le Tusi a Mamona o se faataitaiga o le ola amiotonu ao siomia e le amioleaga? (O tali e mafai ona aofia ai Eteru, Moronae, Apiso, ma tagata o e na talitonu o le a fanau mai Keriso, e pei ona tusia i le 3 Nifae 1.)
O a luitau o loo tatou feagai ao tatou tauivi e ola amiotonu i se lalolagi amioleaga?
Faamanatu i tamaiti aoga o le atalii o Mamona, o Moronae, na ola i lena foi taimi o le faateteleina o le amioleaga. Ae lei maliu o ia, na tusia e Mamona se tusi ia Moronae o loo tusia i le Moronae 9. Fai i se tamaitiiti aoga e faitau leotele le Moronae 9:6, 22, 25-26. Valaaulia le vasega e mafaufau pe faapefea e le fautuaga a Mamona i nei fuaiupu ona mafai ona fesoasoani e ola amiotonu ai i se lalolagi amioleaga.
O a mea ua tatou aoao mai nei fuaiupu o le a fesoasoani ia i tatou e ola amiotonu ai i le lalolagi o aso nei? (Fesoasoani i tamaiti aoga ia malamalama i le mataupu faavae lenei: Afai tatou te faatuatua ia Keriso ma i Lana Togiola, ona tatou maua lea o le malosi e ola amiotonu ai e ui lava o loo siomia i tatou e le amioleaga.)
O a faataitaiga ua e vaaia i se tasi o loo ola amiotonu i totonu o le amioleaga i le aso?
E faapefea e le taulai atu ia Iesu Keriso ma Lana Togiola ona fesoasoani ia te oe e aluese ai mai le amioleaga po o tulaga faigata?
Faasoa atu le saunoaga lenei a Sister Virginia U. Jensen, le fesoasoani talu ai i le au peresitene aoao o le Aualofa, e fesoasoani ai i tamaiti aoga e mafaufau ai i se isi mea e mafai ona latou faia e tutumau ai i le faatuatua ma le amiotonu:
Ata
Virginia U. Jensen
“Ina ia faatumauina lo tatou tutu mausali mo i tatou lava ma feasoasoani i isi ia tutu mausali, e ao lava ona totoina mausali le savali o le talalelei toefuataiina i o tatou loto ma aoaoina i o tatou aiga. … Aoao a outou fanau pele i le ala e faaaoga ai mana o le lagi e ala atu i le anapogi ma le tatalo. Ia aoao i latou o le tausia o le aso sapati ia paia o le a puipuia ai i latou mai le lalolagi. Ia aoao i latou ia usiusitai. Ia aoao i latou ia saili le finagalo o le Atua, ae le o tagata. Ia aoao i latou na o le pau le ala e tasi e toe foi atu ai i lo tatou aiga faalelagi, o le alofa lea i lo tatou aiga faalelagi, o le alofa lea ma mulimuli i le Faaola ma le tausia ma le osia o feagaiga ma poloaiga. O upumoni o le talalelei ma le malamalama i le fuafuaga o le faaolataga o auupega ia e mafai ona faaaoga e o outou aiga e manumalo ai i faatosinaga leaga a Satani” (“Tutu Mausali,” Liahona, Ian. 2002, 94).
O le a le mea na tuuina atu ia te oe le naunautaiga ma le malosi ia usiusitai ai i le Alii i se lalolagi ua faateleina le amioleaga?
Faamatala atu faapea i le taimi o le taua umi i le va o sa Nifae ma sa Lamana o loo tusia i le tusi a Alema, o tagata sa tatau ona tetee atu i malosiaga o le leaga ina ia faasaoina o latou ola. Valaaulia tamaiti aoga e suesue le Alema 62:41 ma vaavaai mo auala eseese na tali atu ai tagata i le faafeagai ma le amioleaga. Valaaulia tamaiti aoga e faasoa mai mea na latou maua e mafai ona fesoasoani ia i latou ia ola amiotonu ai i se lalolagi amioleaga.
Valaaulia se tamaitiiti aoga e faitau leotele le saunoaga lenei a Peresitene James E. Faust (1920–2007) o le Au Peresitene Sili i lenei fuaitau.
Ata
Peresitene James E. Faust
“I totonu o se lalolagi ua faateleina le le talafeagai e ola ai ma saili ai le fiafia ma le olioli, e tusa lava po o le a le mea e oo mai, e tatau lava ona tatou tutu faatasi ma le Alii e aunoa ma le masalosalo. E moomia ona tatou taumafai ina ia faamaoni i itula uma o aso taitasi ina ia ‘aua lava ne’i luluina lo tatou faatuatua i le Alii. …
“O le mamafa e le o i le ituaiga o mea e tupu ia i tatou, ae o i le auala tatou te taulimaina ai mea e tutupu ia i tatou. E faamanatu mai ai ia te au se fuaitau mai ia Alema. Ina ua mavae se taua umi e toatele “na faamaaaina” ae na “faamaluluina nisi e toatele ona o o latou puapuaga’ [Alema 62:41]. O tulaga lava e tasi ae na maua mai ai ni tali e faafeagai. … E moomia e i tatou uma taitoatasi ona i ai o tatou lava faleteuoloa o le faatuatua e fesoasoani ai ia i tatou e faatoilaloina ia faafitauli lea ua avea ma se vaega o lenei olaga faataitai” (“O Fea Ou te Tu Ai?” Ensign po o le Liahona, Nov. 2004, 18, 20).
Fai i tamaiti aoga e faaalu ni nai minute e tusi ai tali i fesili nei:
O a ni tautinoga ua e faia ina ia tutu “faatasi ma le Alii e aunoa ma se masalosalo”?
Ona uunaia lea o tamaiti aoga e mafaufau loloto i fesili nei:
O a uunaiga ua e maua mai le Agaga e faatatau i le ala e mafai ai ona sili atu lou tuuto i le Alii?
O le a se mea e mafai ona e faia e fesoasoani ai i tagata o lou aiga ia sili atu le tuuto i le Alii?
Molimau atu faapea ao tatou faaauau i le faatuatua, o le a faamanuia i tatou e le Alii ma fesoasoani ia i tatou ia ola amiotonu i le totonugalemu o le amioleaga.