Lesona 9

“A ia Outou Saili le Malo o le Atua”

Folasaga

Ina ua uunaia e le perofeta o le Tusi a Mamona o Iakopo lona nuu e saili le malo o le Atua (tagai Iakopo 2:18), na ia faia lea mea i se taimi ao avea agasala o le faamaualuga, fiafia i oa ma le ola le mama o ni faafitauli ogaoga. O nei agasala o se taufaamatau i le lotogatasi ma le alualu i luma o le malo o le Atua i le lalolagi. O le saili mo le malo o le Atua o le avea lea o le talalelei o se faamuamua maualuga i o tatou olaga. O lenei lesona o le a fesoasoani i tamaiti aoga e tautino mai e tuuese le agasala ma ia sili atu ona saili atoatoa le malo o le Atua.

Faitauga Faaopoopo

Dieter F. Uchtdorf, “O Le Faamaualuga ma le Perisitua,” Ensign po o le Liahona, Nov. 2010, 55–58.
“Aua Nei E Fai mo Oe ni Atua Ese i O’u Luma,”mataupu 14 i le Aoaoga a Peresitene o le Ekalesia: Spencer W. Kimball (2006), 145-53.
“O le Poloaiga Sili—Alofa i le Alii,” mataupu 1 i le Aoaoga a Peresitene o le Ekalesia: Ezra Taft Benson [2014], 37).

Fautuaga mo le Aoaoina Atu

Alema 7:14–16, 19, 21–24

Ua aoaoina i tatou e le Tusi a Mamona pe faapefea ona mulimuli i le ala i le malo o le Atua

Fai i tamaiti aoga e mafaufau i mea e manaomia ona siakiina soo ina ia faatumauina le tulaga lelei (mo se faataitaiga, siakiina o le suauu o le afi po o maa o le masini mo le asu, po o le siakiina e se fomai po o le fomai nifo).

O a faamanuiaga o le siakiina soo o nei vaega? (E mafai ona tatou foia ni faafitauli ma aloese mai faalavelave po o tulaga pagatia i le lumanai.)

Faamatala atu faapea e faapena foi lo tatou manaomia ona iloilo le tulaga o o tatou olaga faaleagaga e faavasega ai vaivaiga ma aloese ai mai le tulaga pagatia.

Tau atu i tamaiti aoga faapea ao auauna atu Alema le Itiiti o se faitaulaga sili, na ia asiasi i tagata o le Ekalesia i Kitiona ma uunaia i latou e iloilo lo latou tulaga faaleagaga. Fai i tamaiti aoga e faitau le leoa le Alema 7:19, ma vaavaai mo tulaga faaleagaga o tagata i Kitiona.

Na faapefea ona faamatala e Alema le tulaga faaleagaga o tagata o Kitiona? (O tagata na “i ai i totonu o le ala e tau atu i le malo o le Atua.”)

Faamatala atu faapea o le “malo o le Atua” e le itiiti ifo ma le lua uiga eseese—o le tasi e faalelalolagi ma le tasi e faaselesitila. Valaaulia se tamaitiiti aoga e faitau leotele le saunoaga lenei a Elder Bruce R. McConkie (1915–85) o le Korama a Aposetolo e Toasefululua, ma fesoasoani i tamaiti aoga ia malamalama faapea i le Alema 7:19 o le “malo o le Atua” e faatatau i le malo selesitila:

“O le Ekalesia a Iesu Keriso o le Au Paia o Aso e Gata Ai e pei ona faatulagaina ai nei o le malo o le Atua i le lalolagi. … I lalolagi e faavavau, o le malo selesitila o le malo o le Atua. … Ua mamanuina le talalelei e saunia ai tagata mo se tofi i le malo selesitila o le Atua” (Mormon Doctrine, lom. lona 2[1966], 415–17.)

Fai i tamaiti aoga e faitau le Alema 7:14-16 ma vaavaai mo mea na faatonuina ai e Alema tagata e tatau na latou faia e mautofi ai i le ola e faavavau.

Aisea i lou manatu na valaaulia ai e Alema tagata ia salamo ae ua latou i ai lava i le ala o le amiotonu? (Na manaomia e tagata o Kitiona ona tumau ai i le ala o le amiotonu.)

Valaaulia ni nai tamaiti aoga e feauauai i le faitauina leotele mai o le Alema 7:21-24. Fai i le vasega e vaavaai mo faatinoga ma amioga na o le a fesoasoani ia i tatou e mautofi ai i le malo o le Atua.

O a mea e tatau ona tatou faia ma avea ai ina ia mulimuli ai i le ala e taitai atu i le malo o le Atua? (Aotele tali a tamaiti aoga i le tusia o le mataupu faavae lenei i le laupapa: E ala i le ola ai i mataupu faavae o le talalelei, ua tatou mulimuli i le ala lena e taitai atu i le malo o le Atua.)

Valaaulia tamaiti aoga e mafaufau po o faapefea ona fesoasoani a latou faatinoga ia i latou ia avea atili faapei o Iesu Keriso ma ia alualu i luma agai i le malo o le Atua. Fai ia i latou e mafaufau pe faapefea o latou lagona e uiga i le alualu i luma o loo latou faia nei.

1 Nifae 10:21; 2 Nifae 9:39; Iakopo 2:12–14, 20–28; 3:10–12; Mosaea 2:20–25; 4:13, 21–26; 3 Nifae 12:27–30

O le fiafia i oa, faamaualuga, ma le ola le mama e taofia ai i tatou mai le sailia o le malo o le Atua

Faamatala atu faapea i le Tusi a Mamona atoa lava, na lapataiina e perofeta a le Atua tagata agai i le agasala. Mo se faataitaiga, na poloaiina Iakopo e le Alii e fetuu ona tagata mo agasala ia na “inosia i le Atua” (Iakopo 2:5).

Tusi mau fesootai nei i le laupapa: Iakopo 2:12–14, Iakopo 2:20–21, ma le Iakopo 2:23–28. Fai i tamaiti aoga e vaai faavave i nei fuaitau, ma vaavaai mo agasala faapitoa na taua e Iakopo. Fautuaina tamaiti aoga e maka upu ma fuaitau na e faamatalaina nei agasala. A uma se taimi talafeagai, valaaulia tamaiti aoga e faasoa mai agasala na taua e Iakopo i fuaitau taitasi. Tusi agasala taitasi latou te faailoa mai i luga o le mau fesootai i le laupapa faapenei:

Fiafia i oa	Faamaualuga	Ola le mama
Iakopo 2:12-14	Iakopo 2:20–21	Iakopo 2:23-28

Valaaulia se tamaitiiti aoga e faitau leotele le Iakopo 3:10-12 , ma fai i le vasega e vaavaai mo upu ma fuaitau na faaaoga e Iakopo e faaalia ai le matautia o agasala a tagata.

O a upu ma fuaitau o faaalia ai le matautia o agasala a tagata?
Na faaaoga e Iakopo le fuaitau “iuga leaga matautia” o le agasala fuaiupu 12). Valaaulia tamaiti aoga e faafesootai Iakopo 3:12 ma 2 Nifae 9:39 ma le 1 Nifae 10:21. Fai i se tamaitiiti aoga e faitau leotele nei fuaiupu. Fai i le vasega e vaavaai mo nisi taunuuga o le agasala. Valaaulia le vasega e faailoa mai se upumoni mai nei fuaitau pe faapefea e agasala e pei o le faamaualuga, le mama, ma le fiafia i oa ona aafia ai se tasi o loo saili i le malo o le Atua. (E tatau i tamaiti aoga ona faailoa mai se upumoni e pei o lenei: O le agasala e taitai atu ai i le oti faaleagaga ma taofia ai i tatou mai le ulufale atu i le malo o le Atua.)

Tusi mau faasino nei i luga o le laupapa:

Fiafia i oa	Faamaualuga	Le mama
Iakopo 2:12-14 Mosaea 4:13, 21-26	Iakopo 2:20–21 Mosaea 2:20-25	Iakopo 2:23-28 3 Nifae 12:27-30

Fiafia i oa

Faamaualuga

Le mama

Valaaulia tamaiti aoga e filifili ma faitau se tasi o fuaitau fou. Fai ia i latou e vaavaai mo auala e aloese ai mai agasala o le fiafia i oa, faamaualuga, ma le le mama. A maea se taimi talafeagai, fai i tamaiti aoga e faasoa mai mea na latou maua.

E faapefea e le mulimuli i nei fuaitau ona fesoasoani i se tagata o le Ekalesia e saili le malo o le Atua ma ia faamalosia le Ekalesia a le Alii i le lalolagi?

Mataio 6:33; Iakopo 2:17–19

O le a matou saili le malo o le Atua e sili atu i nisi lava mea e fiafia i ai

Faamatala atu faapea i le faaopoopo atu i le lapataiina o ona tagata e uiga i le fiafia i oa, faamaualuga, ma le le mama, na tuuina atu e Iakopo le fautuaga e fesoasoani ia i latou e faatoilalo ai o latou manao le amiotonu. Fai i se tamaitiiti aoga e faitau leotele le Iakopo 2:17-19 ao vaavaai le vasega mo le fautuaga na tuuina mai e Iakopo.

O a mea ua tatou aoao mai le fautuaga a Iakopo e mafai ona fesoasoani ia i tatou e aloese ai mai le agasala? (O tamaiti aoga e tatau ona faailoa mai le mea lenei: Ua poloaiiina i tatou e le Atua e saili le malo o le Atua e sili atu i isi lava mea e fiafia i ai.)
O le a le uiga ia te oe o le saili muamua le malo o le Atua?

Faaali atu le fuaitau lenei mai ia Peresitene Ezra Taft Benson (1899–1994), ma valaaulia se tamaitiiti aoga e faitau leotele:

“Pe a tatou faamuamua le Atua, o isi mea uma lava o le a oo atu i o latou tulaga tatau po o le aveese foi mai o tatou olaga. O lo tatou alolofa i le Alii o le a pulea mea o loo manaomia mai lo tatou alofa, o mea o loo manaomia mai ai o tatou taimi, o mea tatou te fiafia i ai o loo tuliloaina, ma le faatulagaga o a tatou mea e faamuamua”Aoaoga a Peresitene o le Ekalesia: Ezra Taft Benson [2014], 40).

O a nisi o faataitaiga o mea na e “oo atu i o latou tulaga tatau po o le aveese foi mai o tatou olaga” pe a tatou avea le Atua ma o tatou faamuamua?
O le a se faataitaiga o se mea ua oo atu i lona tulaga tatau pe ua aveese mai lou olaga ao e avea le Tama Faalelagi ma Lona malo ma faamuamua i lou olaga?
O le a le taunuuga o le faamuamua o le Atua ia i tatou pe a faaosoosoina i tatou e le faamaualuga, fiafia i oa, le mama, po o isi agasala?

Valaaulia se tamaitiiti aoga e faitau leotele le Mataio 16:33. Tau atu i tamaiti aoga faapea o Faaliliuga a Iosefa Samita e faitauina faapea: “O le mea lea, aua neʼi saili i mea o lenei lalolagi ae ia outou muai saili e atinae le malo o le Atua, ma faatuina lana amiotonu, ma o nei mea uma e faaopoopoina atu ia te outou” (Faaliliuga Iosefa Samita, Mataio 6:38 [i Mataio 6:33, vaefaamatalaga a]).

Faaali atu le saunoaga lenei mai ia Elder Dallin H. Oaks o le Korama a Aposetolo e Toasefululua:

“‘Saili … muamua e fausia le malo o le Atua’ o lona uiga ia faatulaga le muai faamuamua i le Atua ma Lana galuega. O le galuega a le Atua o le aumaia lea o le ola e faavavau o Lana fanau (tagai Mose 1:39), ma mea uma e faatatau i ai. … O nisi mea uma e lona lua. … E pei ona fai mai se tasi, afai tatou te le muai filifilia le malo o le Atua, o le a i ai sina eseesega i le taimi mulimuli ona o mea sa tatou filifilia nai lo lena” (“Ia Tulimatai atu I Mea e Faamuamua,” Liahona, Iulai 2001, 99–102).

O a nisi o auala e mafai ai e se tagata talavou o le Ekalesia ona “fausia le malo o le Atua”?

Valaaulia se tamaitiiti aoga e faitau leotele le faamatalaga lenei mai ia Elder Robert D. Hales o le Korama a Aposetolo e Toasefululua.

“O le filifili ia i ai i le malo [o le Atua], tatou te vavaeese—le faaesea—i tatou mai le lalolagi. O le a fai lelei o tatou laei, o le a mama o tatou mafaufauga, ma mama foi la tatou gagana. O tifaga ma televise tatou te matamata ai, o musika tatou te faalogologo ai, o tusi, mekasini, ma nusipepa tatou te faitauina e faagaeetia. O le a tatou filifili ni uo e faamalosiauina a tatou sini o le faavavau, ma o le a tatou faia ma le agalelei isi. O le a tatou aloese mai mea faatamai o le ola le mama, taalo tupe, tapaa, ava oona, ma fualaau faasaina. O a tatou gaoioiga i le Aso Sa o le a atagia mai ai le poloaiga a le Atua ia manatua le aso Sapati ia faapaiaina. O le a tatou mulimuli i le faataitaiga a Iesu Keriso i le ala tatou te faia ai isi. O le a tatou ola ina ia agavaa e ulufale atu i le maota o le Alii” (O le Feagaiga o le Papatisoga: O le i Ai i le Malo Ma ni o o le Malo,” Ensign, Ian. 2001, 8).

E mafai faapefea ona aafia tulaga uma o o tatou olaga i le sailiga o le malo o le Atua?
Ua faapefea ona aafia lou olaga po o le olaga o se tasi o le aiga po o se tasi e masani ai i le sailiga o le malo o le Atua?

Uunaia tamaiti aoga e mafaufau loloto i mea e mafai ona latou faia pea e saili ai le malo o le Atua. Uunaia i latou e faalogo mo uunaiga a le Agaga ma tusi i lalo mea ua latou fuafua e fai. Molimau atu i faamanuiaga na e oo mai i le faamuamua o le Atua i o tatou olaga.

Faitauga a Tamaiti Aoga

Mataio 6:33; Iakopo 2:12–28; 3:10–12; Mosaea 2:20–25; 4:13, 21–26; Alema 7:14–16, 19, 21–24; 3 Nifae 12:27–30.
“O le Poloaiga Sili—Alofa i le Alii,” mataupu 1 i le Aoaoga a Peresitene o le Ekalesia: Ezra Taft Benson [2014], 37-45.