Seminare ma Inisitituti
Lesona 16: Salamo ma le Faamagaloina

Lesona 16

Salamo ma le Faamagaloina

Folasaga

Ina ia faamamaina mai le agasala, e tatau ona tatou faaaogaina le faatuatua ia Iesu Keriso i le salamo. Ao tatou salamo ma le faamaoni, e mafai ona tatou maua le faamagaloina o agasala, lea e aumaia le olioli ma le filemu o le mafaufau lelei i o tatou agaga. E mafai ona tatou maua le faamagaloina o agasala i o tatou olaga atoa ao tatou tausia poloaiga a le Atua ma alofa ma auauna atu le tasi i le isi.

Faitauga Faaopoopo

Fautuaga mo le Aoaoina Atu

Alema 34:15–17; 3 Nifae 9:13–14, 19–22

Faaaogaina o le faatuatua ia Keriso agai i le salamo

Fai i tamaiti aoga e vaai faalemafaufau faapea ua fesiligia i latou e lauga i le sauniga faamanatuga e uiga i le salamo. Valaaulia ni nai tamaiti aoga e faasoa mai mea e mafai ona latou tau atu e fesoasoani ai i tagata o le Ekalesia ia malamalama atili i lenei aoaoga faavae. A uma ona latou faasoa mai a latou tali, faaali atu ma faitau le saunoaga lenei a Peresitene Dieter F. Uchtdorf o le Au Peresitene Sili:

Peresitene Dieter F. Uchtdorf

“Tatou te manaomia se faatuatua malosi ia Keriso ina ia mafai ai ona salamo” (“Vaega Tonu o le Toe Foi Saogalemu,” Ensign po o le Liahona, Me 2007, 100).

  • Aisea e moni ai lenei fuaitau?

Valaaulia se tamaitiiti aoga e faitau leotele le Alema 34:15–17, lea e tusia ai aoaoga a Amoleka i sa Sorama e faatatau i le salamo. Uunaia le vasega e mulimuli i le faitauga ma vaavaai mo mea na aoao atu e Amoleka e manaomia mai ia i tatou ina ia faamagaloina.

  • O le a le mataupu faavae e uiga i le mauaina o le faamagaloina ua aoaoina i nei fuaiupu? Ao tali mai tamaiti aoga, tusi le mataupu faavae lenei i le laupapa: Ina ia maua faamanuiaga alofa mutimutivale o le faamagaloina, e tatau ona tatou faaaoga le faatuatua ia Iesu Keriso ia salamo ai. Faasino atu i tamaiti aoga o le fuaitau “faatuatua ia salamo ai” o loo taua faafa i nei fuaiupu. O se avanoa lenei e faamamafa ai le tomai faalesuesuega i tusitusiga paia o le iloaina o upu e fai soo.)

  • Aisea e tatau ai ona tatou faaaoga le faatuatua ia Iesu Keriso ina ia salamo ai ma faamagaloina? (E tatau ona tatou maua le faatuatua i Lana taulaga togiola ina ia mafai ai e lenei taulaga ona aoga i o tatou olaga. Ua na o Lana Togiola lava e mafai ai ona faamagaloina i tatou ina ia suia o tatou loto ma faamamaina mai le agasala [tagai Mosaea 5:2].

Ina ia fesoasoani i tamaiti aoga e malamalama atili pe faapefea ona o mai i le Faaola ma salamo, faamatala atu ina ua mavae le faatafunaiga maoae i le atu Amerika lea na molimau i Lona faasatauroga, na aoao e le Faaola tagata i mea e tatau ona latou faia ia salamo ai ma maua le faamagaloina mai ia te Ia. Valaaulia tamaiti aoga e suesue le 3 Nifae 9:13–14, 19–22 ma se paga, ma vaavaai mo fuaitau na e faamatalaina le fetalaiga a le Faaola i mea e tatau ona tatou faia e o mai ai ia te Ia ma salamo. A lava loa se taimi, valaaulia tamaiti aoga e faasoa mai mea na latou mauaina.

  • O le a le mataupu faavae ua aoao mai e le Alii i nei fuaiupu e uiga i mea e tatau ona tatou faia ina ia salamo ai? (E ui e mafai e tamaiti aoga ona filifilia nisi upu, e tatau ona latou faailoa mai le mataupu faavae lenei: Afai tatou te o mai ia Keriso ma se loto momomo ma se agaga salamo, o le a Ia taliaina i tatou ma laveaiina i tatou mai a tatou agasala.)

  • E mafai faapefea e le valaaulia a le Faaola ia “[sau] ia te au pei o se tamaitiiti”(fuaiupu 22) ma “foi mai nei ea ia te au” (fuaiupu 13) ona fesoasoani ia i tatou ia malamalama atili i le uiga o le maua o se loto momomo ma se agaga salamo?

  • O a aafiaga o le olaga e mafai ona mafua ai ona maua e se tagata se loto momomo ma se agaga salamo?

Valaaulia se tamaitiiti aoga e faitau le saunoaga lenei mai ia Elder Bruce D. Porter o le Fitugafulu. Mafaufau e saunia se kopi o le faamatalaga lenei mo tagata taitoatasi o le vasega. Uunaia tamaiti aoga e faalogo mo ni vaaiga i le ala tatou te ofoina atu ai se loto momomo ma se agaga salamo ao tatou salamo.

Elder Bruce D. Porter

“O le a se loto momomo ma le agaga salamo” … O le gauai atoatoa atu o le Faaola i le Tama Faavavau, o le uiga tonu lea o se loto momomo ma se agaga salamo. O faataitaiga a Keriso ua aoao mai ai ia i tatou o le loto momomo o se uiga e faavavau o le tulaga faaleatua. A momomo o tatou loto tatou te nofouta lelei i le Agaga o le Atua ma iloa lo tatou faalagolago ia te Ia, i mea uma ua tatou maua ma o tatou tagata uma. O le taulaga e oo mai i lenei tulaga, o se taulaga o le faamaualuga i ona tulaga uma. E pei o le omea e mamanu gofie i lima o se faiipu atamai, e mafai ona galueaiina ma faaleleia se tagata loto momomo i aao o le Matai.

“O se loto momomo ma se agaga salamo o tulaga manaomia foi ia o le salamo [tagai 2 Nifae 2:6–7]. … A tatou agasala ma manaomia le faamagaloga, o le loto momomo ma le agaga salamo o le oo i le ‘tiga e tusa i le Atua [e] tupu ai le salamo’ (2 Korinito 7:10). E oo mai lenei mea pe afai o lo tatou manao e matuai malosi ia mama mai agasala lea e tiga ai o tatou loto i le faanoanoa ma tatou mananao ai e faalelei ma lo tatou Tama oi le Lagi. O i latou ua i ai se loto momomo ma se agaga salamo e naunau e fai soo se mea e fetalai mai ai le Atua ia i latou, e aunoa ma le tetee pe le fiafia. Ia tuu lo tatou faia o mea i a tatou ala, ae aoao e faia i le ala a le Atua. I se tulaga faapena o le gauai atu, e mafai ona aoga ai le Togiola ma tupu mai ai le salamo moni” (“O Se Loto Momomo ma se Agaga Salamo,” Ensign po o le Liahona, Nov. 2007, 32).

  • E tusa ai ma le saunoaga a Elder Porter, o le a le uiga o le o mai ia Keriso ma se loto momomo ma se agaga salamo?

Valaaulia tamaiti aoga e mafaufau loloto i mea e mafai ona latou faia ia sili atu ai le atoatoa o le faaaogaina o lo latou faatuatua ia Iesu Keriso i le ofoina atu ia te Ia o se loto momomo ma se agaga salamo. Atonu e te manao e tuu atu ia i latou ni nai minute e tusi ai ni lagona e oo ia i latou e ala atu i le Agaga.

Molimau atu o le meaalofa alofa mutimutivale o le Faaola o le salamo ua avanoa ia i tatou taitoatasi. Valaaulia ni nai tamaiti aoga e faasoa mai o latou lagona e uiga i le taulaga togiola a le Faaola ma le meaalofa o le salamo.

Enosa 1:4–8; Mosaea 4:1–3; Alema 19:29–30, 33–36; 36:19–21

O le faamagaloina o agasala e aumaia lagona o le olioli ma le filemu

  • E mafai faapefea ona e tali atu i tagata e mananao e iloa pe faapefea ona latou iloa pe ua faamagaloina i latou i se agasala ua tuanai?

Valaaulia tamaiti aoga e suesue le Enosa 1:4–8; Mosaea 4:1–3; ma le Alema 36:19–21, ma vaavaai mo auala e mafai ai e tagata ona maua se faamagaloina o a latou agasala.

  • E tusa ai ma nei fuaiupu, e mafai faapefea ona tatou iloa ua tatou mauaina se faamagaloina o a tatou agasala? (Fesoasoani i tamaiti aoga ia malamalama i le mataupu faavae lenei: Ao tatou salamo faamaoni ma maua le faamagaloina o a tatou agasala, e tafiesea lo tatou nofosala, e faatumulia i tatou i le Agaga o le Alii, ma tatou lagonaina le olioli ma le filemu. Pe a uunaia e le Agaga ma manaoga o tamaiti aoga, e mafai ona e faasoa atu le saunoaga lenei a Elder Neil L. Andersen o le Korama a Aposetolo e Toasefululua: “Mo i latou o e ua salamo faamaoni ae e foliga mai e le o mafai ona lagona le mapusaga: ia faaauau pea ona tausi poloaiga. Ou te folafola atu ia te outou, o le a oo mai lena mapusaga i le taimi lava a le Alii. O le faamalologa e manaomia ai foi le taimi” [“Salamo … Ina ia Ou Faamagaloina Outou,” Ensign po o le Liahona, Nov. 2009, 40].)

Ina ia faamaninoina atili lenei mataupu faavae, fai i ni nai tamaiti aoga e faitau leotele ni nai fuaiupu e faamatalaina le liua o le Tupu o Lamonae ma lona nuu, i le Alema 19:29–30, 33–36. Valaaulia le vasega e vaavaai mo faamanuiaga e maua e tagata ona o lo latou salamo ma le faatuatua.

  • O a faamanuiaga faapitoa na maua e le Tupu o Lamonae, lana masiofo, ma le tele o isi sa Lamana ona o lo latou faatuatua? (Na suia o latou loto, na auauna atu agelu ia i latou, na latou papatiso, na faatuina le Ekalesia, ma na liligi atu e le Alii Lona Agaga i luga o i latou.)

  • O anafea na e vaaia ai isi o aafia i nei faamanuiaga ao latou salamo ma faalatalata atili atu i le Alii?

Ina ia fesoasoani i tamati aoga e lagona le moni ma le taua o le mataupu faavae o loo i luga, fai i se tamaitiiti aoga e faitau le molimau lenei a Peresitene Boyd K. Packer (1924–2015) o le Korama a Aposetolo e Toasefululua:

Peresitene Boyd K. Packer

“O tusi na maua mai i e na faia ni sese matuia. Na latou fesili mai: ‘Pe mafai ea ona faamagaloina au?’

“O le tali o le ioe!

“Ua aoao mai le talalelei ia i tatou o le mapusaga mai le tiga ma le agasala e mafai ona maua e ala i le salamo. E leai se amio, leai se tuinanau, leai se fouvalega, leai se solitulafono, leai se agasala e le aofia ai i le folafolaga o le faamagaloga atoatoa, vagana ai ni nai tagata toaitiiti o e ua filifili le malaia ina ua uma ona maua se malamalama atoatoa.

“‘O loo faapea mai Ieova, o maia, ina tatou filifili ia, e ui lava ina pei o ofu mumu a outou agasala, e sisina ia e pei o le kiona; e ui lava ina mumu ia e pei o le ie ulaula, e avea e pei o fulufulu mamoe.’ O lona uiga, le tala mai a Isaia, ‘pe afai tou te gauai ma faalogo’ [Isaia 1:18–19]” (“O le Taeao Pupula o le Faamagaloga,” Liahona, Ian. 1996, 22).

Valaaulia tamaiti aoga e mafaufau loloto i se taimi na latou lagona ai le olioli ma le filemu o le mafaufau lelei lena e oo mai faatasi ma le salamo atoatoa.

Mosaea 4:11-12, 26

Faatumauina o se faamagaloga o a tatou agasala

Fai i se tamaitiiti aoga e faitau leotele le Mosaea 4:11–12, 26. Valaaulia tamaiti aoga e vaavaai mo mea na aoao atu e le Tupu o Peniamina i le ala e faatumauina ai le faamagaloga o a tatou agasala.

  • E tusa ai ma nei upu a le Tupu o Peniamina e faapefea ona tatou faatumauina le faamagaloga o a tatou agasala i o tatou olaga atoa? (E tatau ona faailoa mai e tamaiti aoga le mataupu faavae lenei: Afai tatou te manatua le alofa ma le agalelei o le Atua ia i tatou, tutu mausali i lo tatou faatuatua, ma alolofa ma auauna atu i isi, e mafai ona faatumauina le faamagaloga o a tatou agasala. )

Ina ia fesoasoani i tamaiti aoga ia malamalama lelei i lenei mataupu faavae, valaaulia se tamaitiiti aoga e faitau leotele le saunoaga lenei mai ia Elder D. Todd Christofferson o le Korama a Aposetolo e Toasefululua:

Elder D. Todd Christofferson

“Salamo o lona uiga o le taumafai ia sui. O le faifai i puapuaga o le Faaola i le Togalaau o Ketesemane ma luga o le satauro lo tatou manatu faapea, o Ia e tatau ona suia i tatou i tagata amiotonu e aunoa ma sa tatou taumafaiga moni. Nai lo lena, ia tatou saili atu i Lona alofa tunoa e faaatoatoa ai ma tauia a tatou taumafaiga sili ona filiga (tagai i le 2 Nifae 25: 23). Atonu e tatau ona tatou tatalo mo ni taimi ma ni avanoa e galulue ai ma taumafai ma faatoilaloina le agasala e pei ona tatou tatalo mo le alofa mutimutivale. E mautinoa lava e faamanuia e le Alii se tagata e manao ia oo mai i le faamasinoga ma le agavaa, o le e galue ma le filiga i lea aso ma lea aso ina ia suitulaga e le malosi ia vaivaiga. O le salamo moni, o le suiga moni e manaomia ai ni taumafaiga fai soo, ae o loo i ai se mea lelei atu ma paia i ia taumafaiga” (“O Le Meaalofa Paia o le Salamo,” Ensign po o le Liahona, Nov. 2011, 39).

  • O a manatu ma lagona ua e maua ao e mafaufau faapea o le Alii e “ataata i luga” ia outou pe a outou galulue e faatoilalo le agasala ma le vaivai faalelalolagi?

Faasoa atu lau molimau e uiga i le Toetu o Iesu Keriso. Faamautinoa i tamaiti aoga faapea a latou salamo, o le a latou maua le olioli ma le filemu o le mafaufau lelei. Uunaia tamaiti aoga e iloilo o latou olaga ma faaaoga lo latou faatuatua ia Iesu Keriso e salamo ai.

Faitauga a Tamaiti Aoga