Seminare ma Inisitituti
Lesona 18: Saunia mo le Aso Faaiu o le Faamasinoga

Lesona 18

Saunia mo le Aso Faaiu o le Faamasinoga

Folasaga

O le olaga nei o le taimi lea e saunia ai e feiloai ma le Atua. Ua faamatala mai e le Tusi a Mamona le mea e tupu i o tatou agaga i le va o le oti ma le Toetu. A mavae ona toefuatai o tatou agaga i o tatou tino faavavau, o le a tatou tutu i luma o le nofoa faamasino o le Atua, lea o le a fuafuaina ai lo tatou taui faavavau e tusa ai ma a tatou faatinoga ma manaoga o o tatou loto.

Faitauga Faaopoopo

Fautuaga mo le Aoaoina Atu

Alema 34:32–34; 40:6–7, 11–14

A mavae le oti, o e amiotonu e o i le parataiso ma o e amioleaga e o i le falepuipui o agaga

A o lei amataina le vasega, tusi le fesili lenei i le laupapa:

E mafai faapefea e tagata e le malamalama i le faamoemoega o o latou olaga faaletino ma e le talitonu i le olaga pe a mavae le oti ona eseese auala e feola ai mai tagata e malamalama i nei mea?

Fai i tamaiti aoga e tali mai i le fesili lenei. Ona faamanatu lea ia i latou ua fesoasoani le Tusi a Mamona ia i tatou ia malamalama i le faamoemoega o le olaga i le lalolagi ma aoaoina i tatou faapea o le olaga e faaauau pe a mavae le oti.

Valaaulia se tamaitiiti aoga e faitau leotele le Alema 34:32–34 ao vaavaai le vasega mo mea na aoao mai e Amoleka i tagata o Amonaea e uiga i le faamoemoega o le olaga.

  • O a aoaoga faavae taua e uiga i le faamoemoega o le olaga i le lalolagi na aoao mai e Amoleka? (E tatau ona faailoa mai e tamaiti aoga ni nai aoaoga faavae i lenei fuaitau, e aofia ai mea nei: O le olaga lenei o le taimi mo i tatou e saunia ai e fetaiai ma le Atua.)

  • O a auala ua fesoasoani ai lenei aoaoga faavae ia te oe e malamalama ai pe faapefea ona e ola i lou olaga i aso uma iinei i le olaga faitino?

Ina ia fesoasoani i tamaiti aoga ia malamalama atili i lenei aoaoga faavae, mafaufau e faasoa atu lenei saunoaga a Peresitene Thomas S. Monson:

Peresitene Thomas S. Monson

“Ua tatou o mai i le lalolagi ina ia aoaoina, ia ola, ia alualu i luma i la tatou faigamalaga e faavavau e agai atu i le atoatoa. O nisi e i ai i le lalolagi mo na o sina taimi, ae o isi e umi ona soifua ai i le lalolagi. Ae e le o le uumi o o tatou soifua, ae o le lelei o o tatou soifuaga” (“Ua Ia Toetu Mai,” Liahona, Ian. 1982, 27).

  • Aisea na lapataia ai i tatou e Amoleka ia aua le tolopoina le aso o lo tatou salamo?

Faaali atu le saunoaga lenei a Peresitene Henry B. Eyring o le Au Peresitene Sili ma fai i se tamaitiiti aoga e faitau leotele ao vaavaai le vasega pe aisea e matautia ai le tolopoina:

Peresitene Henry B. Eyring

“E i ai se tulaga matautia i le upu e i ai se aso pe afai o lona uiga o le, ‘e le o le aso nei.’ ‘E i ai se aso o le a ou salamo ai.’ ‘E i ai se aso ou te faamagalo ai o ia.’ ‘E i ai se aso o le a ou talanoa ai i lau uo e uiga i le Ekalesia.’ ‘E i ai se aso o le a amata ai ona ou totogi le sefuluai.’ ‘E i ai se aso o le a ou toe foi ai i le malumalu.’ ‘E i ai se aso …’ Ua faamanino mai e tusitusiga paia le leaga o le faatuai [tagai Alema 34:33–34]. … O le aso nei o se meaalofa faapelepele a le Atua. O le manatu, “E i ai se aso o le a ou,” e mafai ona avea o se gaoi i avanoa o le aso nei ma faamanuiaga o le faavavau” (“O le Aso Nei,” Ensign po o le Liahona, Me 2007, 89).

Valaaulia ni nai tamaiti aoga e feauauai i le faitauina leotele mai o le Alema 40:6–7, 11–14. Fai i le vasega e mulimuli i le faitauga, ma vaavaai mo mea na aoao ai e Alema lona atalii o Korianetona e uiga i le mea e tupu i o tatou agaga pe a tatou feoti. (Atonu e fesoasoani le faasino atu na faaaoga e Alema le fuaitau “pouliuli i fafo,” e lei faatatau o ia i le tulaga mulimuli o Satani ma i latou ua faasalaina. Na i lo lena, sa faatatau o ia i le tulaga o e amioleaga i le va o lo latou oti ma lo latou toetu. E masani ona tatou faatatau i lenei tulaga o le falepuipui o agaga.)

  • O le a le eseesega i le va o le tulaga o e amiotonu ma le tulaga o e amioleaga pe a mavae le oti? (E ui atonu latou te faaaogaina ni upu eseese, e tatau i tamaiti aoga ona faailoa mai le aoaoga faavae lenei: I le va o le oti ma le toetu, o agaga o e amiotonu e nonofo i le parataiso ae o agaga o e amioleaga e nonofo i le falepuipui o agaga.)

  • Aisea e taua ai le malamalama o a tatou faatinoga faaletino o le a aafia ai lo tatou tulaga pe a mavae le oti?

2 Nifae 9:12–13; Mosaea 15:21–26; 16:6–11; Alema 11:40–45; 40:4–5, 19–24

O o tatou agaga o le a toefuatai i o tatou tino i le Toetu

Faamanatu i tamaiti aoga faapea ao aoao e Apinati le Tupu o Noa ma ana faitaulaga, na ia faamatalaina le mea o le a tupu ia i tatou pe a mavae le oti. O aoaoga faavae na ia aoaoina e faamatalaina ai le mea o le a tupu ia i tatou pe a mavae lo tatou taimi i le lalolagi o agaga, po o le parataiso po o le falepuipui o agaga. Fai i ni nai tamaiti aoga e feauauai i le faitauina leotele o le Mosaea 16:6–11 ao vaavaai le vasega mo mea na aoaoina e Apinati.

  • O a aoaoga faavae na aoao e Apinati e uiga i le mea o le a tupu ia i tatou pe a mavae lo tatou taimi i le lalolagi o agaga? (Faamamafa atu upumoni nei: Ona o Iesu Keriso na motusiaina noataga o le oti, o le a tatou toetutu taitoatasi ma maua se tino e faavavau. O e amiotonu o le a mautofi i le fiafia e le iu, ao e amioleaga o le a tuuina atu i le faasalaga e le iu.)

Tau atu i tamaiti aoga o le tele o perofeta o le Tusi a Mamona na molimau mai i le Toetu ma faamatalaina pe o le a faapei. Tusi mau fuaitau nei i le laupapa (e aunoa ma ni otootoga) ma tofi tamaiti taitoatasi e faitau se tasi o fuaitau. Ia mautinoa ua faaaoga fuaitau uma lava. Fai i tamaiti aoga e faitau le leoa a latou fuaitau, ma vaavaai mo nisi faamatalaga e uiga i le Toetu.

2 Nifae 9:12–13 (O le parataiso o le a tatala mai agaga amiotonu, ma o le falepuipui o agaga o le a tatala mai agaga amioleaga. O agaga o le a toefuatai i o latou tino ma avea ma tagata tinolepala.)

Mosaea 15:21–26 (O e amiotonu o le a oo mai i le Uluai Toetutu, e faapea foi i latou na maliliu e lei malamalama ma fanau laiti. O e amioleaga e leai sa latou vaega i le Uluai Toetutu.)

Alema 11:40–45 (O tagata uma, e amioleaga ma amiotonu, o le a toe faatasia le agaga ma le tino i lo latou foliga atoatoa ma o le a laulaututu i luma o le Atua ina ia faamasinoina e tusa ai ma a latou galuega.)

Alema 40:4–5, 19–24 (E i ai se va i le va o le oti ma le Toetutu pe a o atu agaga i le lalolagi o agaga. A mavae lena, e i ai le taimi ua tuupoina mo agaga o tagata uma ina ia toefuatai ai e faavavau i o latou tino atoatoa ma tutu i luma o le Atua ina ia faamasinoina.)

Tuu atu i tamaiti aoga se taimi e faamatala ai mea na latou aoaoina e uiga i le Toetutu mai a latou fuaitau na tofiaina. Mafaufau e tusi nisi o o latou manatu i le laupapa i talaane o fuaitau talafeagai. Afai e manaomia, fai atu se tasi po o le sili atu o fesili e pei o nei e faateleina ai le malamalama o tamaiti aoga i nei fuaitau:

  • E faapefea e nei upumoni ona faamalosia lou talitonuga e moni le Toetu ma o se vaega taua o le fuafuaga a le Tama Faalelagi?

Valaaulia se tamaitiiti aoga e faitau leotele le saunoaga lenei a Elder Dallin H. Oaks o le Korama a Aposetolo e Toasefululua. Fai i le vasega e faalogo pe faapefea e se molimau o le Toetutu ona faamanuiaina i tatou i le olaga faaletino.

Elder Dallin H. Oaks

“Tatou te iloa foi le mafuaaga na tusia ai e le Aposetolo o Peteru e faapea o le Atua le Tama, i Lona alofa tele, ‘na fanaufouina i tatou ina ia iu i le faamoemoe ua ola, i le toetu mai o Iesu Keriso nai e ua oti’ 1 Pet. 1:3; tagai foi 1 Tes. 4:13–18).

“O le ‘faamoemoe ua ola’ ua tatou maua i le toetu, o lo tatou talitonuga maumaututu lea o le oti e le o le mutaaga lea o lo tatou faasinomaga, ae ua na o se laasaga e tatau ai i le suiga o le faagasologa mai le olaga nei i le tino ola pea. O lenei faamoemoe ua suia ai le vaaiga atoa lava i le olaga i la le tino. …

“O le mautinoa o le toetu tatou te maua ai le malosi ma le faamoemoe e onosaia ai luitau o le olaga o loo feagai ma i tatou taitoatasi, ma i latou tatou te alolofa i ai, o mea e pei o tulaga le atoatoa faaletino, mafaufau, po o lagona ia tatou te o mai ma i tatou ina ua fananau mai pe oo mai foi i le gasologa o le olaga. Ona o le toetu, ua tatou iloa ai o nei faaletonu faaletino ua na o se taimi le tumau!

“O le mautinoa o le toetu e aumaia ai foi ia i tatou se lagona malosi e tausia ai poloaiga a le Atua i le olaga nei. …

“O lo tatou malamalama mautinoa foi o le toetu mai i se tino ola pea, ua tatou maua ai foi le lototele e fetaiai ai ma le oti—e oo lava i se oti ua tatou ta’ua o le oti ae le i oo i le taimi. …

“O le mautinoa o le toetu ua fesoasoani foi ia i tatou e onosai ai i le tetea ma e pele ia i tatou ona o le oti. … E ao ona tatou taufai vivii i le Atua ona o le mautinoa o le tino ola pea ua mafai ai ona na o sina taimi le tumau e tetea ai i la le tino, ma ua tatou maua ai le faamoemoe ma le malosi e faaauau ai pea” (“Toetu,” Liahona, Iulai 2000, 15–16).

  • O anafea na tuuina atu ai ia te oe e le mautinoa o le Toetu le malosi po o le uunaia o oe ia sili atu le ola amiotonu?

Faasoa atu lau molimau e uiga i le moni o le Toetu.

Alema 5:15–21; 7:21–25; 41:2–6

Saunia mo le Faamasinoga Mulimuli

Faamatala atu na uunaia e Alema tagata o le Ekalesia i Saraemila e saunia mo le Faamasinoga Mulimuli i le fesili atu ia i latou e vaai faalemafaufau ia i latou lava o tutu i luma o le Atua ina ia faamasinoina. Valaaulia ni nai tamaiti aoga e feauaua’i i le faitauina leotele mai o le Alema 5:15-21. Fai i le vasega e vaavaai mo mea ua tau mai e Alema i ana tagata faalogologo e mafaufau i ai.

  • O fea o fesili a Alema e matuai anoa lava ia te oe?

  • O le a le mataupu faavae e mafai ona tatou aoao mai le molimau a Alema i le fuaiupu 21 e uiga i le mea e tatau ona tatou faia ina ia faaolaina ai? (Fesoasoani i tamaiti aoga e faailoa mai le mataupu faavae lenei: E le mafai ona faaolaina i tatou sei vagana ua faamamaina i tatou i le toto laveai o Iesu Keriso.)

Ina ia fesoasoani i tamaiti aoga ia malamalama atili i lenei mataupu faavae, faaali atu le saunoaga lenei a Peresitene Iosefa Filitia Samita, ma valaaulia se tamaitiiti aoga e faitau leotele:

Peresitene Iosefa Filitia Samita

“Ou te iloa e leai se mea e sili atu le taua pe talafeagai i lenei taimi nai lo le valaau atu ia salamo, e oo foi i tagata o le Au Paia o Aso e Gata Ai, ma ou te valaau atu ia i latou e oo foi ia i latou e le auai i le Ekalesia, e usiusitai i nei upu a lo tatou Togiola. O lenei ua ia ta’u sao maia e leai se mea le mama e ui atu i lona afioaga. Ua na o i latou ua faamaonia e i latou lava ua faatuatua ma ua faamamaina o latou ofu i lona toto e ala i lo latou faatuatua ma lo latou salamo—e leai ma nisi e ese mai ai e maua le malo o le Atua” (Aoaoga a Peresitene o le Ekalesia: Joseph Fielding Smith [2013], 91).

Fai i tamaiti aoga e suesue le leoa le Alema 7:21–25, ma valaaulia i latou e vaavaai ma maka tulaga lelei e tatau ona tatou sailia e atiina ae ina ia le pisipisia ai o tatou ofu.

  • O a uiga ma tulaga lelei na e faailoaina i nei fuaitau e taua ia i tatou e atiina ae ao tatou saunia ina ia faamasinoina e le Alii?

Uunaia tamaiti aoga e mafaufau pe o a latou faatinoga ma manaoga o o latou loto ua saunia ai i latou e fetaiai ma le Atua i le Faamasinoga Mulimuli. Uunaia i latou e fai soo se suiga e manaomia ina ia avea le Aso o le Faamasinoga o se aso fiafia.

Faitauga a Tamaiti Aoga