Lēsoni 21

Ko e Hāʻele Mai ʻa Sīsū Kalaisí

Talateú

ʻOku hoko ʻa e ngaahi makatuʻunga mo e ngaahi meʻa naʻe hoko fekauʻaki mo e hāʻele ʻa Sīsū Kalaisi ki he Ongo ʻAmeliká ko ha sīpinga ki Heʻene Hāʻele ʻAngaua Maí. ʻE tokoni ʻa e lēsoni ko ʻení ki he kau akó ke nau fakaʻaongaʻi ʻa e ngaahi tefitoʻi moʻoni mei he Tohi ʻa Molomoná ke nau toe mateuteu ange ki he “ ʻaho lahi mo fakamanavahē” (3 Nīfai 25:5) ʻi he taimi ʻe toe hāʻele mai ai ʻa Kalaisi.

Laukonga Puipuituʻá

• Dallin H. Oaks, “Preparation for the Second Coming,” Ensign pe Liahona, May 2004, 7–10.

• Jeffrey R. Holland, “Ko e Teuteu ki he Hāʻele ʻAngaua Maí,” Liahona, Tīsema 2013, 48-51.

Ngaahi Fokotuʻu ki hono Akoʻí

Hilamani 14:20–30; 16:1–5; 3 Nīfai 9:1–5, 12–14; 10:12

ʻOku ʻomi ʻa e ngaahi fakaʻilongá ke tokoni kiate kitautolu ke teuteu ki he Hāʻele ʻAngaua Mai ʻa e ʻEikí

Fakaafeʻi ʻa e kau akó ke nau vahevahe ha ngaahi meʻa naʻe hoko pē ha ngaahi ʻekitivitī ʻi heʻenau moʻuí naʻe fie maʻu ke nau teuteu ki ai (hangē ko e ngāue fakafaifekaú). Hili iá pea fehuʻi ange leva:

• Ko e hā ʻa e faikehekehe naʻá ke aʻusia ʻi he meʻa naʻe hoko ko iá koeʻuhí ko hoʻo mateuteú?

• ʻOkú ke pehē naʻe mei kehe fēfē hoʻo aʻusiá ʻi he meʻa naʻe hoko ko iá kapau naʻe ʻikai te ke mateuteu?

Fakaʻaliʻali ʻa e lea ko ʻeni naʻe fai ʻe Palesiteni ʻEselā Tafu Penisoní (1899–1994), pea fakaafeʻi ha tokotaha ako ke ne lau leʻolahi ia. Kole ki he kalasí ke nau fakafanongo ki he akonaki ʻa Palesiteni Penisoni ʻe lava tokoni ʻa e Tohi ʻa Molomoná ke tau mateuteu ki he:

“ʻOku tau maʻu ʻi he Tohi ʻa Molomoná ha sīpinga ʻo e teuteu ki he Hāʻele ʻAngaua Maí. Ko e konga lahi taha ʻo e tohí ʻoku nofo taha ia ki he ngaahi taʻu ʻe hongofulu tupu kimuʻa pea hāʻele ʻa Kalaisi ki ʻAmeliká. Te tau lava ʻi hano ako fakalelei ʻo e vahaʻataimi ko iá ke ʻiloʻi ʻa e ʻuhinga naʻe fakaʻauha ai ha niʻihi ʻi he ngaahi tautea fakalilifu naʻe hoko kimuʻa ʻi Heʻene hāʻele ki aí, pea mo e meʻa naʻá ne ʻomi ʻa e niʻihi ke tuʻu ʻi he temipalé ʻi he fonua ko Mahú, ʻo velo honau nimá ki he ngaahi mata kafo ʻi Hono ongo nimá mo e ongo vaʻé” (Ngaahi Akonaki ʻa e Kau Palesiteni ʻo e Siasí: ʻEselā Tafu Penisoni [2014], 159).

• Fakatatau kia Palesiteni Penisoni, ko e hā ʻoku totonu ke tau ako fakamātoato ai ʻa e fakamatala ʻi he Tohi ʻa Molomoná fekauʻaki mo e hāʻele ʻa Sīsū Kalaisi ki Hono kakai ʻi he ngaahi vahefonua ʻAmeliká? (Fakapapauʻi ʻoku mahino ki he kau akó ko hono ako ko ia ʻo e fakamatala ʻi he Tohi ʻa Molomoná fekauʻaki mo e ngaahi meʻa naʻe hoko ʻi he ʻaʻahi ʻa Sīsū Kalaisi ki he ngaahi vahefonua ʻAmeliká, te tau ako ha sīpinga ke teuteu ai ki he Hāʻele ʻAngaua Maí.)

Fakaafeʻi ʻa e kau akó ke nau kumi ha ngaahi tefitoʻi moʻoni mo e ngaahi tokāteline ʻi heʻenau ako ʻa e fakamatala ki he ʻaʻahi ʻa e Fakamoʻuí ki he ngaahi vahefonua ʻAmeliká ʻe ala tokoni kiate kinautolu ke teuteu ki he Hāʻele ʻAngauá.

Fakamanatu ki he kau akó, kimuʻa hono ʻaloʻi ʻo e Fakamoʻuí, naʻe kikiteʻi ʻe Samuela ko e Leimaná ʻa e ngaahi fakaʻilonga ʻe hoko fakataha mo e ʻaloʻi pea mo e pekia ʻa e Fakamoʻuí. Kole ki he kau akó ke lau ʻa e Hilamani 14:20–27 pea kumi ʻa e ngaahi fakaʻilonga ʻo e pekia ʻa Kalaisí.

• Ko e hā ʻa e ngaahi fakaʻilonga naʻe kikiteʻi ʻe Samuela ki he kau Nīfaí ʻe hoko fakataha mo e pekia ʻa Sīsū Kalaisí?

Vaheʻi ʻa e vaeua ʻo e kau akó ke nau lau ʻa e Hilamani 14:28–30 kae lau ʻe he toengá ʻa e Hilamani 16:4–5. Kole kiate kinautolu ke kumi ʻa e ngaahi ʻuhinga naʻe ʻave ai ʻa e ngaahi fakaʻilonga ko ení ki he kau Nīfaí. ʻE lava ke ke poupouʻi e kau akó ke nau tokanga makehe ki he taimi ʻoku ʻasi ai e kupuʻi lea ko e “ko hono taumuʻá ke …”

• Fakatatau ki he ngaahi veesi ko ʻení, ko e hā ʻoku ʻomai ai ʻe he ʻEikí ʻa e ngaahi fakaʻilongá? (Tokoni ke ʻilo ʻe he kau akó ʻa e tokāteline ko ʻení: ʻOku ʻomi ʻe he ʻEikí ʻa e ngaahi fakaʻilonga mo e meʻa fakaofo koeʻuhí ke tau tui kiate Ia pea fakahaofi ai kitautolu. Fakakaukau ke tohi ʻa e tokāteline ko ʻení ʻi he palakipoé.)

• Ko e hā ʻoku talamai ʻe he Hilamani 14:29 ʻe hoko kiate kinautolu ʻoku ʻikai ke tui ki he ngaahi fakaʻilongá mo e meʻa fakaofó? (ʻE hoko mai ʻa e fakamaau totonú kiate kinautolu.)

Fakamatala ange ʻoku hā ʻi he fakamatala ʻi he 3 Nīfaí, ʻa e ngaahi fakaʻilonga mo e meʻa fakaofo kuo palōmesí—kau ai ʻa e fakaʻauha ko e kikite ʻo e pekia ʻa e Fakamoʻuí—naʻe kamata ke hoko ʻo moʻoni. Kole ki ha kau ako e niʻihi ke nau taufetongi ʻi hono lau leʻolahi ʻa e 3 Nīfai 9:1-5, 12-14; 10:12 kae kumi ʻa e kalasí ki he meʻa naʻe hoko kiate kinautolu naʻe tui ki he ngaahi pōpoaki ʻa Samuela mo Nīfaí, pea pehē foki ki he meʻa naʻe hoko kiate kinautolu naʻe ʻikai ke tui ki aí.

• Fakatatau ki he ngaahi veesi ko ʻení, ko e hā naʻe fakaʻauha ai ʻa e niʻihi ʻo e kakaí? Ko e hā naʻe fakahaofi ai ha niʻihi?

Fakamahino ange kuo akonekina ʻa e kau muimui ʻo Sīsū Kalaisi ʻi he ʻaho ní ke nau tokanga ki he ngaahi fakaʻilonga ʻe hoko kimuʻa ʻEne Hāʻele ʻAngaua Maí. Kole ki he kau akó ke nau aleaʻi ʻa e founga ʻoku tokoni ai ʻa hono maʻu ha mahino pea mo hono fakatokangaʻi ʻa e ngaahi fakaʻilonga ʻo e Hāʻele ʻAngaua Maí, ʻa ia kuo kikiteʻi ʻe he kau palōfitá, ki he kāingalotu ʻo e Siasí ʻi he ngaahi ʻahó ní ke nau toe mateuteu ange ki Heʻene hāʻele maí.

3 Nīfai 11:1–17

Ko e teuteu ke tali ʻa e Fakamoʻuí

Fakaʻaliʻali ha ʻīmisi ʻo Sīsū Kalaisi ʻi Heʻene hā ki he kau Nīfaí. ʻI he toe vakaiʻi ʻe he kau akó ʻa e fakamatala ki he ʻaʻahi ʻa e Fakamoʻuí ki he kau Nīfaí, poupouʻi kinautolu ke nau kumi ʻa e ngaahi tāpuaki naʻe maʻu ʻe kinautolu ʻoku tui ki he ngaahi fakaʻilonga ʻo e pekia ʻa e ʻEikí mo mateuteu ki Heʻene hāʻele maí.

Fakaafeʻi ha niʻihi ʻo e kau akó ke nau taufetongi ʻi hono lau leʻolahi e 3 Nīfai 11:1–12 .

• Naʻe teuteuʻi fēfē ʻa e kakaí ʻi he tui ki he ngaahi fakaʻilonga ʻo e hāʻele mai ʻa e ʻEikí kuo palōmesi maí ki he meʻa te nau aʻusia ko ení?

• ʻOku fakamanatu fēfē mai ʻe he ngaahi veesi ko ení ʻa e fie maʻu ke tau teuteu mo kitautolu?

Fakaafeʻi e kau akó ke nau taufetongi hono lau leʻolahi ʻo e 3 Nīfai 11:13–17 pea fakakaukauloto ki he ongo naʻa nau mei maʻu kapau ne nau ʻi ai tonu ʻi he meʻa naʻe hokó.

• ʻOku fakafofongaʻi fēfē ʻe he meʻa naʻe hoko ko ʻení ʻa e finangalo ʻo e ʻEiki ko Sīsū Kalaisí maʻatautolu kotoa? (ʻOku totonu ke hā mei he ngaahi talí ʻa e moʻoni ko ʻení: ʻOku fakaafeʻi ʻe Sīsū Kalaisi ʻa e tokotaha kotoa pē ke haʻu kiate Ia pea maʻu ha fakamoʻoni ko Ia ʻa e ʻOtua ʻo e māmaní kotoa. )

• Ko e hā ʻa e ngaahi founga ʻoku lava ke faitatau ai ʻa e ngaahi meʻa ʻoku hoko ko ʻení mo e meʻa ʻe hoko ʻi he Hāʻele ʻAngaua Mai ʻa Sīsū?

• Ko e hā nai te ke fai ke ke muimui ai ki he fakaafe ʻa e Fakamoʻuí koeʻuhí ke ke mateuteu ke ke tuʻu ʻi Hono ʻaó ha ʻaho?

Fakaʻosi ʻaki ʻa hono fakaʻaliʻali ʻa e lea ko ʻeni ʻa ʻEletā Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá:

“Fēfē kapau ko e ʻaho ʻo ʻEne hāʻele maí ko ʻapongipongi? Kapau ne tau ʻilo te tau feʻiloaki mo e ʻEikí ʻapongipongi—ʻi haʻatau mate vave pe ʻi Haʻane hāʻele fakafokifā mai—ko e hā te tau fai ʻi he ʻaho ní? Ko e hā ha faʻahinga vete hia te tau fai? Ko e hā ha ngaahi angafai te tau taʻofi? Ko e hā ha ngaahi moʻua te tau totongi? Ko e hā ha fakamolemole te tau fakahoko? Ko e hā ha ngaahi fakamoʻoni te tau fai?”

“Kapau te tau fai ʻa e ngaahi meʻa ko ʻení he taimi ko iá, ko e hā ʻoku ʻikai ke tau fai ai ʻi he taimi ní? Ko e hā ʻoku ʻikai ke tau fekumi ai ki he fakanongá ʻi he kei lava ke maʻu ʻa e melinó?” (“Preparation for the Second Coming,” Ensign pe Liahona, May 2004, 9).

• Ko e hā ʻoku mahuʻinga ai ke tau mateuteu ʻo hangē ka hāʻele mai ʻa e ʻEikí ʻapongipongí?

Fakaafeʻi ʻa e kau akó ke nau fekumi mo talangofua ki he ngaahi ueʻi ʻa e Laumālié ʻi heʻenau teuteu ke feʻiloaki mo e ʻEikí.

Laukonga ʻa e Tokotaha Akó

• Hilamani 14:20–30; 16:1–5; 3 Nīfai 9:1–5, 12–14; 10:12; 11:1–17.

• Dallin H. Oaks, “Preparation for the Second Coming,” Ensign pe Liahona, May 2004, 7–10.